السبت، 18 يونيو 2011

القصقوصة الثالثة عشر (المصاحبة)


حب عندي يساوي خطوبة إن لم تحبني لا تخطبني و إن أحببتني لا تفكر سوى أن تخطبني و كل ما دون ذلك هو إعجاب لم يرقى للحب.
هذا هو مبدأي في الإرتباط و لا حلول وسط عندي, لا أعترف بأي إرتباط غير رسمي أعتبره (مصاحبة) حتى لو كان هناك ألف وعد بالزواج قد يعتبرني البعض معقده , لكن في الحقيقه أشياء كثيره جعلت هذا قراري من البداية, أولها كان إحترامي لأهلي و حفاظي على ثقة وضعوها في و إطمأنوا فلن أخذلهم, ثانياً لأني لا أعترف بان أعطي قلبي و مشاعري الا لشخص واحد يستطيع أن يحافظ علي و هذا الشخص ليس من صفاته (المصاحبة).

لن أرتبط بشاب مهما كان حتى لو أعجبت به و أنا أعلم أن ليس بنيته أن نكون شركاء في الحياه, أنا لست تلك الفتاة العبيطه التي تحب مثل الأغاني التركية و تعيش مثل الأفلام الهندية و تنجرح و تبكي مثل المسلسلات العربية, أنا لست هذه الفتاة التي تنجرف وراء الحب دون عقل ثم تبكي على اللبن المسكوب و تعيش حياتها بجرح لا يشفى أو ذكرى تعذبها, أنا لست أيضاً هذا النموذج الآخر الذي يرسم و يخطط و يرمي بشبكة (المصاحبة) التي قد تأتي بعريس.

كانت جميلة و خفيفة الظل تتعرف بهذا, تضحك مع هذا, تبحث عن الحب بين الكلمات و العيون, توهم نفسها بأنها تحب , تحب هذا الاحساس أن يقول لها (خلي بالك من نفسك) أن تقول له (كلمني لما توصل البيت) أن تتأبط ذراعه و تسير أمام الناس, أن يأتي لها بوردة حتى لوقاطفها  من الحديقة المجاوره, أن تبكي عندما يمر بمشكله أن يغير عندما يراها تتحدث مع غيره, تحب أن تستأذنه قبل أن تخرج مع أختها و أن تستشيره في لون ثوب التخرج, و أن تبعث له برساله و يرد عليها فوراً,هكذا أحبت إحساسها بالحب معه.

لم يقل لها يوماً (سنتزوج) و لم تسأله يوماً (متى؟) فقط عاشت التجربة بكل مافيها سنوات طويله حتى إقتربت ساعة التخرج و بدأت ساعتها البيولوجيه تخبرها أن المعاد قد أتى و بدأ نور أحمر يشتعل بتقطع  في رأسها, إنتظرت أن يقول شئ, لم يقل , سألته هي عن اليوم الذي حدده للقاء أهلها, قال لها بعد الجيش....
مشاعرها إنتحرت لم تعد تحبه أو لم تعد تحب حبه, تمسك بها أخبرها أنه يريدها لكن عندما تتحسن ظروفه, تركته  و أتت تبكي عندي بكاء لأول مره صادق من القلب ليس (كاموفلاج) مثل السنوات السابقه.
 "مش قلتلك مينفعش"
 "كنت فاكراه هيتقدم بعد التخرج"
"مش قلتلك خليه يقابل أهلك و يتعرف عليهم و يتقدملك و كل خطوه بعد كده تيجي على مهلها"
 "كنت خايفه يفتكرني واقعه و برمي نفسي عليه"
 "الواقعه هي اللي ترتبط بواحد من غير شروط"
 "كنت بحبه...مش عارفه إزاي هعيش من غيره"
 "سيبتيه ليه؟"
 "قبل ما يسبني"
بعدها بشهر كانت قد إرتبطت بآخر دون علم أهلها و لكن لرحمة الله بها تزوجها و ظلت حتى الآن ذكريات الأول تطفو بين الحين و الآخر مع أغنية مع مكان مع تاريخ معين...و هل ينسى المرء سنوات من عمره...هذه حكاية صديقتي و الكثير من البنات اللاتي  إستهانوا بمشاعرهن و وضعنها في غير مكانها فإما رخصت إما أصابهن جرح نافذ, أراهن كثيراً في كل مكان أتمنى أن أصرخ فيهن "مش هيتجوزك يا غبية" "إنت أغلى من كده" لكن هيهات لا فائده فسحر الشعور بأنك في حالة حب أقوى من الحب نفسه.

هناك 44 تعليقًا:

ليلى الصباحى.. lolocat يقول...

السلام عليكم


قد يعتبرني البعض معقده

وانا اعتبرك ست البنات هههه
احييك على القصة الرائعة والفكرة الطيبة جدا جدا

دائما كانت ماما (توصينا ) خدى بالك من نفسك اوعى حد يضحك عليك ويقولك كلام حلو ويخليك تروحى معاه فى اى مكان اياك تصدقى ولد الا اذا كان هيدخل البيت من بابه

دى كلها وصايا الام المسلمة الطيبة واكيد هنعلم اولادنا نفس الكلام
انا مش مع الفكرة انى لازم اجرب قبل الزواج ده كلام ((عبيط ) ولا يأتى الا بالفساد والدمار ومخالفة الشرع الاسلامى

اشكرك جدا جدا جدا اوى خالص
رائعة فعلا احييك حبيبتى
دمت بكل خير

جايدا العزيزي يقول...

نعم شيرى

سحر الشعور بالحب اقوى من الحب نفسه

كم يبهرنى ابداعك

رائعه كما عهدتك ومميزة

تحياتى

سواح في ملك اللــــــــــــــــــه- يقول...

الاخت الرائعة

انحني لاهلك اجلالا واحتراما لانهم خيرا فعلوا

حين ربيا فتاة بمثل هذا الخلق الرفيع

واحترمت غيابهما قبل حضورهما



واشفق علي الفتاة الاخري ولا احملها الذنب

كله

فالاهل اولا لهم دورا لم يقوما به

والولد لم يكن رجلا لانه ان كانت له اختا

لن يرضي لها هذا

وطبعا البنت تتحمل جزءا من المسئولية

يارب تكون اتعلمت من قسوة التجربة

وتاخد بالها من اولادها ان اذن الله لها

بالانجاب

تحيتي

ابراهيم رزق يقول...

ساتكلم من مفهوم ذكورى مع انى لااحب ان اتكلم بهذا المفهوم
اغلب الشباب لا يثق فى هذه العلاقات و لو وثق و تمت مثل هذه العلاقة تبقى فى الحلق غلظة لا تزول و تظهر بين الحين و الحين هذه الغلظة هى قليل او كثير من الشك
اثناء الكلية كانت زميلة لى على علاقة بزميل مثلها و كانت العلاقة تشتعل و تهدء و اثناء الخطوبة تقدم لها مهندس مرموق فطلبت رائى فقلت لها انتى هتاخدى راى عيل لسه بياخد المصروف انا بالنسبة للى متقدملك عيل انا لسة الحياة غامضة امامى لسة بدور على العشرة جنيه مصروف هو مستقر و مستعد للزواج لو مناسب و فى قبول من ناحيتك له وافقى فورا و فعلا تمت الخطوبة و تزوجت بعد التخرج و مازالت تذكرنى بهذه القصة و هى تضحك
تحياتى

دعاء العطار يقول...

يااااااااه ياشيرين

كتير اوووووووى كده

نادر جداً لما تلاقى حد زيك كده

متفقه معاكى فى كل كلللمه قولتيها

بجد بيظلموا نفسهم قبل أى حد تانى

دمتى عسوله (: (:

موناليزا يقول...

متفقة معاكِ جدا جدا جدا

كنت ايام الجامعة صحباتى اللى مصاحبين انا بالنسبة لهم ناظرة المدرسة
يعنى لو واحدة واقفة مع واحد وشافتنى بتبقى عارفة انى باخدها من ايديها وهو قاعد واقولها عندنا محاضرة
طبعا ماقولكيش اغلبية الشباب اذا ماكنش كلهم كانوا مش طايقينى ازاى
وجودى معناه ان المقابلة انتهت:)

وفعلا كانوا بيعتبرونى معقدة وواخدة الدنيا جد زيادة عن اللزوم بس تعرفى ده كان بيزيدنى فخر بجد

Haytham Alsayes يقول...

قصة حقيقة كل يوم بتتكرر
كل يوم بتحصل
بس ممكن تكتبي قصة حب عن شاب
هو ليه كله بيكتب عن البنات هو احنا ملناش نفس ولا احنا اوغاد ذئاب بشرية ينزل الزبد من شدقيها هههههههههههه

طبعا القصة عجبتني جدا
متابعك كل يوم في الشهر التدويني الجميل دة

تحياتي وتقديرى :)

Bent Men ElZman Da !! يقول...

بالعكس انتى مش معقده ولا حاجه
ده هو ده عين العقل
وللاسف مابقاش ده اللى بيحصل دلوقتى
وبردو كل بنت بتتعلم من اخطائها
تسلم ايدك :))

FAW يقول...

المشكلة . .

إن محدش بيتعلم من خطأ الغير

وكله يقولك : أنا غير

بنات كتير بيصاحبوا عشان يعيشوا إحساس الحب مش الحب . . وأبدعتي لما ذكرتي جملة (خللي بالك من نفسك) . . دي ظاهرة عالمية :)

فيه برضو بنات بيشوفوا بنات علاقاتهم بتكلل بالزواج ويقولوا طب ما نعمل زيهم , ما يعرفوش إن اللي مخفي جوه البيوت أكتر من اللي بيظهر بره

reemaas يقول...

مشكلة كبيرة يا شرين لما يكون معظم البنات عارفين ان كلامك صح جدا وبردو بيقعوا فى نفس الحدوتة

هل لان ده مكتوب او لان كل حكايه بتختلف عن اللى قبلها او ثقه فى ح مايتوثقش فيه او الشماعه المعتادة الظروف

الله اعلم بس اعتقد ان كل البنات والولاد هيايدوا كلامك وكل البنات والولاد هيقعوا فى نفس الغلط

Mostafa gazar يقول...

قد يعتبرنى البعض معقده؟؟؟؟؟؟!!!!!!!!
و هل الأدب والألتزام والطريق الصحيح هو التعقيد.......
ياريت كل البنات والشباب يفكرو ان فعلا لا يصح الا الصحيح....و بالنسبه للشباب....ما لا ترتضيه لأختك لا ترتضيه لبنات الناس...و لو ترضيه لنفسك ولأختك......فسامحنى فلست من الرجوله فى شئ.....قصقوصه واقعيه وشاهدنا منها الكثير للأسف ولكن كل انسان يعتبر تجربته مختلفه عن الاخرين......ربنا يصلح الحال للجميع
.............................
و السعيد من اتعظ بغيره والتعيس من اتعظ به غيره

Ramy يقول...

كلامك صح جداً جداً

عارفه

أن ده سبب أساسى فى أنى محبتش طول عمرى و لا صاحبت

علشان كان الحب عندى زى ما بتقولى كدة يعنى أرتباط رسمى و نية سليمة

و انا مكنش ينفع ارتبط و انا مش مكون نفسى أو على الأقل أقدر أتحمل مسئوليه

فتأخرت قوى لغاية متخبط فى دماغى (:

تحياتى

د/دودى يقول...

البنت عندنا بتتعلق بقشايه اى حاجه و يمكن لما بتحب او حتى بتعجب بتتخيل بان الاعجاب يعنى الارتباط و الا فما المعنى اما صاحبنا فمفهمش كل التلميح ده يبقى يا غبى يا واطى و ممكن الاتنين...

مصطفى سيف الدين يقول...

شيرين
كم هو رائع فكرك ليت كل البنات يرون الامور كما وصفتي
لذلك اؤيدك بشدة
القصة عجبتني جدا واسلوبك كالعادة يفوق الروعة روعة
تحياتي لكي

Unknown يقول...

السلام عليكم

كلامك صحيح أختي شيرين ولا جدال عليه بالطبع..

لكن المشكلة أن الأخلاق واحترام البيت فقط لا تكفي؛ لأن الكثير من البنات من عائلات محترمة وتقع أيضا في هذه الإشكالية (العلاقة غير الشرعية باسم الحب مع شاب ممكن جدا أن يكون محترم وصادق في نية الزواج)...

لكن المانع الحقيقي الذي يجب أن يكون حائلا دون ذلك هو الالتزام بالشرع قبل كل شيء...

وصراحة أتأذى جدا من مصطلح (مصاحبة) الذي صراحة لم يكن منتشرا أيام دراستنا الجامعية، وعندما كان يقال فبم يكن يدل على مجرد علاقة حب (بريئة)، بل كان مصطلحا سيء السمعة لأقصى درجة....!!

هذا لا يعني أنني لم أتعرض لمثل ذلك في بداية الجامعة من إحدى الزميلات.. ولكن ولله الحمد أوقفتها مباشرة وبلا تردد ابتغاء وجه الله.

تحياتي على أسلوبك الذي استخدم العقل والمنطق في الإقناع.. وإن كنت أود الاستعانة في الأساس بالجانب الشرعي.

مها البنا يقول...

محقه تماما يا شيرين

من أحب أحداهن .. سيحافظ عليها ولن يقبل لها او لنفسه أن يساء إلأيها بأى شكل .. زى ما قال عمرو خالد مره عن المصاحبه:
لو عاوزه تعرفى رأيه فى الصحوبيه .. خليه وإنتى راكبه جنبه وقوليله مش اختك دى فى العربيه اللى قدامنه مع شاب؟

لو اتخض ونزل يدور عليها وهو عصبى (هتعرفى قيمتك عنده ونظرته ليكى) ولو فضل ساكت وقالك غيه يعنى (هتعرفى قيمته هو ومدى دونيته) ..
يعنى فى كلتا الحالتين .. مش مقبول (لأن فى كلتا الحالتين فى حاجه غلط)

بوست رائع كالعاده

متابعه يا قمر

سندباد يقول...

اسمع كثيرا عبارة الحب في حد ذاته علاقة منتهية واللي بعد كده ده قدر وربنا يسهل المهم اننا مع بعض
نوع من انواع التحايل علي الاعراف والتقاليد ومع ذلك ورغم ذلك المشاعر عندما تاتي كانها فيضان نهر الامازون وشلالاته
تحياتي لفكرك الراقي

إنسان || Human يقول...

رائع جداً يا شيرين

ده فعلاً مش تعقيد ... هي دي الأصول

عايز تحبني إرتبط بيا رسمي

كلم أهلي

اللي بيحصل في الجامعات ده تهريج

وقلة أدب كمان

الراجل يبقى قاعد في البيت .. ومش عارف إن بنته بتستأذن واحد غريب قبل ما تخرج
كلام فارغ ... ده شغل مستفز

بعد إذن هاشيرها على الفيس لأنها عجبتني

eng_semsem يقول...

انا كولد بقولك برافو عليكي جبتي من الاخر ان المصاحبه نهايتها وحشه في جميع الظروف بداية بتعلق بوهم لن يتحقق نهاية بزواج وقلب معلق برجل اخر او انثى اخرى فهي عذاب يستمر لوقت طويل وفي النهايه لا تحقق هدف انما نخسر بسببها اهداف
تقبلي تحياتي

Unknown يقول...

أم هريرة.. lolocat : و عليكم السلام و رحمة الله و بركاته لولو الجميله إيه الكلام الحلو ده كله بجد أسعدتيني بتعليقك و بإنك بنت ناصحه مش عبيطه:)
يا رب منوراني دائماً
شكراً مره أخرى و تحياتي الشديده لكي

Unknown يقول...

جايدا العزيزي: شكراً يا جايدا يا فاكهة المدونات العربيه ده شرف كبير ليه.
تحياتي الخالصه لكي

Unknown يقول...

سواح في ملك الله: اشكرك على ذوقك و تعليقك الجميل دائماً و عندك حق التربيه ليها عامل كبير في تجنب تجارب الارتباط الغير رسمي و الذي غالباً لا يكلل بالنجاح و العامل الديني كمان مهم.
الولد و البنت مشتركين في الخطأ تمام كما وضحت أشكرك على مشاركتك الرائعه.
تحياتي و تقديري لك

الحسينى يقول...

هو ده الكلام
عشره على عشره :)))
تعرفى أنى دايما كنت باحط حدود للتعامل مع زميلاتنا البنات فى الجامعة لأنى وقتها مكنتش مستعد لأرتباط رسمى وخصوصاً أن ليا أخوات بنات واللى ماحبهوش لاختى ماحبهوش لبنات الناس.
ومع كده كنت باشوف بنات كتير بيدخلوا فى علاقات ويخرجوا من علاقات بشكل مستفز وكنت باقول أزاى بيعملوا كده.
وتعرفى كمان أن من كل العلاقات اللى كانت بين زمايلنا فى الجامعة مفيش غير علاقة واحدة بس أنتهت بالزواج.
فاكر مره صاحبى واحنا فى الجامعة كنا ماشيين من مكان بيقعد فيه الحبيبه فى جامعة عين شمس فقاللى أنا لما أتجوز واخلف وبنتى تكبر وتدخل الجامعه هاجى هنا أقفشها واقولها أنتى سايبة محاضراتك وقاعده تحبى ما أنا خلاص بقيت عارف العيال الحبيبة بيقعدوا فين :))))

Unknown يقول...

ابراهيم رزق: تمام يا أستاذ إبراهيم فمهما الرجل أقنع نفسه و غيره بأنه سبور و ميهموش انها تكون عرفت حد قبله لكن هيفضل شئ جواه يؤرقه و يعكر سعادته.
رأيك في مسألة عريس زميلتك رأي (صايع) أوي معلش مش لاقيه وصف تاني :)
فهمتها ان التاني ده مينفعش و لو إني بيصعب عليه لما اتنين يسيبوا بعض بس ده جزاء العبط.
تحياتي ليك

Unknown يقول...

دعاء العطار: شكراً يا دودو بس في زيي كتير و في مصاحبوش مضطرين عشان مجاتش فرصه :)
مبسوطه أوي ان القصقوصه عجبتك.
منوراني دائماً
:))

Unknown يقول...

موناليزا: ههههههههه برافو عليكي يا مونا بجد انت هتاخدي ثواب كبير و زمانهم دلوقتي لما بيفتكروكي بيحترموكي أكتر و بيقولوا كان عندها حق.
تعليقك دائماً مميز و بيضيف حاجه حلوه للتدوينه شكراً يا حبيبتي.
تحياتي الشديده لكي

Unknown يقول...

Haytham Alsayes : هههههههه لأ طبعاً الولاد مش أوغاد و لا ذئاب و لا حاجه بالعكس أنا زي ما اتعاطفت مع البنت اتعاطفت كمان مع الولد في الحكاية دي لأنه كان بيحبها و نفسه انها تستناه بس يمكن مش كل الولاد بتحب تتعرف بالعائله و تتقدم و هما لسه مش جاهزين.
عموماً لسه في حكاية حب رجالي جايه في السكه.
منورني دائماً و بتسعدني متابعتك.
تحياتي ليك

Unknown يقول...

Bent Men ElZaman Da !!: تسلمي ياجميل مبسوطه انك مشوفتنيش معقده:)
و يا ريت يتعلموا من أخطاءهم قبل فوات الأوان.
تحياتي ليكي

Unknown يقول...

FAW: حلوين الجملتين اللي في الأول دول من تأليفك؟
عندك حق أوي في حكاية ان البنات لما بيلاقوا متصاحبين اتجوزوا ده بيشجعهم أكتر.
منورني دائماً
تحياتي و تقديري ليك

Unknown يقول...

reemaas: ههههه أنا عارفه بردو ان ده هيحصل بس كان لازم أوضح وجهة نظري يمكن حد يستفاد أو يفوق.
شكراً يا نور على تعليقك الجميل
تحياتي ليكي

Unknown يقول...

مصطفى جزر: بديعه هذه الجمله يا مصطفى
و السعيد من اتعظ بغيره والتعيس من اتعظ به غيره

للأسف المؤدب دائماً معقد في نظر أقرانه خاصة في فترة المدرسه و الجامعه مع الشباب السطحيين.
تعليق مميز كالعاده.
تحياتي الخالصه لك

Unknown يقول...

رامي : هههههه اتخبطت في دماغك و لا في قلبك :)
أجمل حاجه لما تحس أول أحاسيس ليك و أول إعتراف و معاد و لمسه و كل شئ مع الانسان اللي عايزك تبقى شريك حياته.
سعيده بتعليقك يا رامي نورتني.
تحياتي ليك

Unknown يقول...

د/دودي: مش مفروض البنت تتعلق في قشايه و ليه تدي حبها لحد ميستهالش لمجرد انها تخيلت ان ده ارتباط في رأيي ده إستهتار و الولد زي ما قلتي غبي أو بيتهرب و ساعات مش مستعد.
تحياتي ليكي

Unknown يقول...

مصطفى سيف: شكراً ليك ده من ذوقك و أعتقد بنات كتير عندهم نفس المبدأ.
سعيده بمتابعتك و تعليقك
تحياتي الخالصه لك

Ms Venus يقول...

أصبتى الهدف يا شيرين

اقصوصة مهمة جدا وواقعية ومتفقة معاكى

تحية لفكرك

Unknown يقول...

ماجد القاضي: و عليكم السلام و رحمة الله و بركاته أستاذ ماجد أولاً سعيده جداً بمتابعتك الرائعه.
ثانياً أنا لم أستعن بالجانب الشرعي لأسباب عديده منها لأنه شئ مسلم بيه و معروف أن مثل هذه العلاقات تعد حرام ان لم تغلف باطار شرعي و السبب الآخر أنني لست متفقهه في الدين و أخاف أن أكتب كلمه ليست في موضعها الصحيح أو أفتي عن غير علم لذلك أتحاشى الحديث في الدين و أكتفي بالقراءه و السؤال.

أنا أيضاً أعتبرها كلمة سيئة السمعه و أحمد الله أني لم أنجرف في هذه الظاهرة السيئه التي يعتبرها من يمارسها حباً.

دائماً تعليق حضرتك يضيف الكثير و رأيك يهمني, أتمنى أن أظل عند حسن ظنك.
تحياتي و احترامي لك

Unknown يقول...

مها البنا: مثال رائع يا مها أشكرك عليه بشده و طبعاً أشكر أستاذي و معلمي و قدوتي عمرو خالد أصاب الهدف كعادته ببراعه.
الأروع زيارتك و تعليقك المميز
نورتيني
تحياتي الشديده لكي

Unknown يقول...

سندباد: الحب يأتي كفيضان هذا صحيح لكن لماذا لا نجعله يصب في البحر المناسب.
جميل تعليقك و الأجمل زيارتك
تحياتي و تقديري لك

Unknown يقول...

Hu-man: طبعاً شيرها ده شئ يسعدني و الجملة اللي انت قلتها استفزتني أنا كمان فعلاً البنات لما بيرتبطوا من ورا أهاليهم معناها ان مفيش احترام كافي بينهم للأسف.
سعيده أوي انها عجبتك و انك رجعت نورتني من تاني.
تحياتي ليك و حمد الله على السلامه

Unknown يقول...

eng_semsem: تعليقك هو اللي جاب من الآخر و لخص قصدي بالظبط سعيده جداً بتعليقك و يا رب دائماً أكون عند حسن ظنك.
تحياتي ليك

givara يقول...

فى ناس بتحب على نفسها واسف على التعبير بس ده التعبير اللى فعلا بيوصف الحاله النور اكيد ومنطقيا احسن من الضلمه والفعل اللى تخاف ان الناس تعرفه اتأكد انه غلط
الاطار الرسمى هو الاطار اللى مفروض ىغطى اى علاقه
رسالتى وصلت اظن
تدوينه جميله وف الجوووول
احسنتى

Unknown يقول...

الحسينى: ههههه ضحكتني على صاحبك أوي تعرف أنا تأهبت كده ان كل واحد كان بيلعب ببنت ربنا بيرزقه ببنت و بيفضل خايف لحسن تعرف حد من وراه.
برافو عليك في طريقة تعاملك مع زميلاتك هي دي الأخلاق المصريه الصح.
شكراً على تعليقك الجميل اللي دائماً بيضيف لأي بوست بنزله.
يا رب منورني دائماً
تحياتي و كل التقدير ليك

Unknown يقول...

Ms Venus : شكراً يا فينوس إعجابك بيها ده شرف ليه.
نورتيني

Unknown يقول...

givara : و آسف ليه فعلاً في ناس بتحب على نفسها و بتدخل الكليه تدور على أي حب...للأسف بيرخصوا مشاعرهم.
تعليقك رائع أشكرك عليه.
تحياتي الخالصه لك