الأربعاء، 15 يونيو 2011

القصقوصة الثانية عشر (لغتنا الجميله...جامده آخر حاجه)


في آواخر التسعينات بدأت تظهر كلمات جديده غريبه علينا وقتها لكن مُعبّره جداً...زي مثلاً كلمة (روش) و (إبعت) و(بيئه) و كلام تاني كتير كان أهالينا بيستغربونا أوي لما نقوله بس الغريب بقى ان في ناس في نفس أعمارنا بيستغربوا بردو من الكلمات دي و بيعتبروها صفاقه و قلة أدب مع إنها كلمات بريئه جداً...

مقدرش أقول إني بقول طول الوقت الكلام ده لكن ده ميمنعش اني بقوله لما يكون مُعبّرعن حاله معينه بحس ان مفيش كلمه هتعبر كده, يعني مثلاً كنت في الكليه مره و طلعت مني بتلقائيه جداً كلمة (طحن) في وصف صعوبة إمتحان ما لقيت البنات ضحكوا و واحده قالت بجد "في بنت تقول طحن..دي كلمه ولادي" على أساس إيه كلمه ولادي عندها شنب مثلاً...حاجه غريبه و الله, و بعدها طبعاً بقيت بستعمل (كبّر)و (نفّض) و (مهيس) و (إشتغاله) و كل كلمه جديده تطلع طالما بتعبر كويس أوي و مفيهاش حاجه غلط هقولها عادي ده مش هيقلل من أنوثتي أو أخلاقي لا سمح الله.

الفتره الوحيده اللي مسكت لساني شويه عن الكلمات دي لما كنت مخطوبه مش إسترقاق و لا حاجه  بالعكس أنا بتخنق من (حد جميل و حد لذيذ و عسوله و طيوبه و الجو ده ) بس لأني في الفتره دي كنت حالمه أوي و شبه شخصيه في روايه أو بطلة فيلم رومانسي بجد لما بشوف صوري أو فيديو ليه في الوقت ده مبعرفنيش...كان صعب أوي إنه يقولي إنه حجز معاد الفرح مثلاً أقوم أقوله (قشطه) كنت هفصله من رومانسية اللحظه.

اللي فكرني بالموضوع ده إني كنت في كورس إجباري عن مهارات الاتصال و بعدين دخلت في مناقشه حاده مع زميله لي في العمل عن أن الكلمات الجديده دي بذيئه و تنم عن قلة الأدب و إننا مش مفروض نسمح لأولادنا يقولوا كده "أمال لو عرفت إن أنا اللي بقول:)" و أضافت كمان إن مفيش دوله في العالم بتنسلخ من جلدها و تستبدل لغتها بلغه تانيه و إن كده تراثنا و لغتنا الجميله هتروح و كلام كبير كده...طبعاً أنا مسكتش.
أولاً لغتنا لغة القرآن, لغة الضاد, محدش جاب سيرتها و لا مسها و لا يقدر بالعكس إحنا بنحاول نقرى و نتثقف عشان نحافظ عليها, اللغه العربيه الفصحى خارج الموضوع أصلاً...أما بقى تحور اللغه العاميه فده شئ مش جديد يعني مثلاً لما أهالينا بطلوا يقولوا "سعيده" و خلوها "صباح الخير" كفروا؟, و لما بطلوا يقولوا "نينه" أجرموا و لما دخلوا كلمات كتير على اللغه العاميه زي (شرابة خُرج) (لبط)(استعباط)(استهبال) ده قلل من شأن اللغه العاميه؟

بالعكس أنا شايفه إن ده أثراها و إحنا كمان أثرينا لغتنا لما أضفنالها  مصطلحات جديده و بقى لينا لونّا المميز و حوارنا الخاص بينا, و ده عمره ما كان غير ميزه لجيلنا الشباب (السيس) اللي عملوا الثوره, بالعكس أفتكر الجيل اللي ميطلعش منه كلمات جديده و مفاهيم و إعتقادات جديده يبقى جيل ماسخ مالوش طعم و لا شكل معين ,شرط طبعاً إن أي إضافه في اللغه أو تغير في المعتقدات متتنافاش مع طباعنا الشرقيه و قيمنا الدينيه.

أول مره سمعت عن كتاب "عايزه أتجوز" للكاتبه و المدونه سابقاً المميزه جداً غاده عبد العال إشتريته فوراً , بس أول ما قريته إتصدمت...أصلي مكنتش بقرا غير روايات باللغة العربيه الفصحى و مكنتش قريت الكتب الساخره اللي إنتشرت جداً باللغه العاميه...إستغربت أوي بس و أنا بقراه حسيت إن الكتابه العاميه فن مش سهل لأنك لازم تكون كاتب فكره مُبهره مفيش أي إعتماد على الصور الجماليه و الخيال بقدر ما انك هتعتمد على موهبة الوصول لعقل و قلب الناس بطريقه شيقه و من غير أي حاجز لغوي.

من ساعتها و أنا عرفت قيمة الكتابه باللغه العامية, و بستمتع جداً لما بقرى أي مقال أو حكاية باللغه العاميه , لكن ده ميمنعش إن عشقي الأول هو الكتابه و القراءه باللغة العربية الفصحى. 

هناك 42 تعليقًا:

سواح في ملك الله- يقول...

الاخت الفاضلة

انا عارف طبعا انك بتتكلمي الكلام ده

ببراءة

مش عارف

اولا اختلاف الراي ميزعلش

وانا عمري ماحب حد يزعل من كلامي

لكني مطالب في التعليق ان اقول مااعرف

بس انا بشوف ان في لعتنا العامية القديمة

الي هي مافيهاش طحن واحلق وكبر ومهيس

ارقي بكتير من الكلام المستحدث ده

وارجوا الاتصدمي لما اقوللك مصدرة

دائما كنت بشوف مصادر الكلام ده ومنابعه

كان بيبقي فيه مجموعة شباب

قاعدين وباللغة الدارجة بتاعتهم

( بيعملوا دماغ )

وتخرج من واحد كلمة اي كلمة

يقوم الكل يضحك عليها وتتاخد الكلمة

دي عليه وكل مايشوفوه يقولوها

فتنتشر الكلمة وتضاف للقاموس اوتوماتيك

طبعا ليس كل مردد يعرف مصدر الكلمة

ولكنه واقع

تحيتي اختي الفاضلة

دعاء العطار يقول...

ساعات كتير بقول كلمات زى دى ومش بحس انها غلط أو عيب أو انها لفظ خارج مثلاً

بس بالنسبه للكتابه بصراحه بقالى فتره طويله بلزم نفسى بالكتابه باللغه العربيه الفصحى وقليل أوى لما أكتب باللغه العاميه

لأنى بحس كده انى مش بعمل حاجه جديده

كأنى بحكى بس بطريقه شيقه ... وحتى الكتاب الكبار اللى بيكتبوا ساخر بيتكبوه باللغه العربيه الفصحى

جاتلى فتره طويله أكتب باللغه العاميه وبس لغاية ماحسيت انى هنسى اللغه العربيه الفصحى فأخدت قرار انى اكتب بيها دايماً الا فى حالات استثنائيه

ضحكتينى على " قشطه " فى فترة الخطوبه

ههههههههههههههههههه

استمرى (:

Tarkieb يقول...

الوقت بيخلى الكلام او بيشيله خالص من القاموس اليومي

ENG./ELSAYED,PMP يقول...

أيه رأيك بقى أنى كنتى بتفرج على عشرة طاولة بين أتنين ... يعنى ... حوالى 45 سنه ... و48 سنه ... و الاتنين اساسا ( لبط ) بس شوفى بقى الالفاظ اللى بتتقال على عشرة طاولة ... أنت ( أرعن ) باللعبة اللى لعبتها دى ... يا حبيبى أنت هتتغلب ... التانى يرد عليه ... أيه ( حيثياتك ) :)... والدور كله على هذا الحال ... مع العلم انا بتكلم عن جوز معلمين فى السوق يعنى :) ... بس بصراحة أنا حبيت الفرجة على الطاولة اكتر من لعبها ... وخصوصا عليهم بسبب الكلام اللى بيقلوه ده :)
تحياتى

FAW يقول...

تحسي إنها بشنب فعلا :))

أنا معاكي في إن كل جيل لازم يبقي ليه كلامه ومفرداته , وده فعلا اللي بيخليله طعم بين الأجيال , وبالعكس بيأثر عالأجيال التانية

أنا فاكر مرة أخويا كان بيقول لماما ما تيجي نعدّي نزور مش عارف مين كده , راحت و بكل عفوية قالت : لأ فكّك

عسل والله الست دي :)

ضحكتيني قوي علي حد جميل و حد لذيذ , وفي نفس الوقت نرفزتيني من البنات البشعة اللي بتتكلم كده وفاكرين دي رقة وحاجة تجذب الولاد , دي أصلا حاجة مقززة مع إعتذاري . .

أنا كمان بحب الكتابة والقراية بالعامية , بس فعلا الفصحي ليها رونق تاني

منورة . .

ابراهيم رزق يقول...

اختى الفاضلة

فى الليل لما خلى ..الا من الباكى
و النوح على الدوح حلى ..للصارخ الشاكى
ما تعرف المبتلى.. فى الروض من الحاكى
سكون و وحشة و ظلمة..و ليل مالوش اخر
و نجمة مالت و نجمة .. حلفت ما تتأخر
ده النوم يا ليل نعمة ..يحلم بها ساهر
الفجر شقشق و فاض .. على سواد الخميلة
لمح كلمح البياض .. من العيون الكحيلة
والليل سرح فى الرياض..ادهم بغرة جميلة
هنا نواح ع الغصون..وهناك بكا ف المضاجع
ليه تشتهى النوم عيون..وعيون سوالى هواجع
و دوح غرق ف الشجون..و دوح ما شافش المواجع
يا ليل انينى سمعته .. و الشوق رجع لى و عاد
و كل جرح و ساعته..و كل جرح بمعاد
كم من مفارق وجعته..يا ليل و هجر و بعاد

هذه الكلمات العامية الجميلة اغنية فى الليل لما خلى لعبد الوهاب تخيلى من الفها امير الشعراء احمد شوقى لم يقل ان اللغة العامية خطر على اللغة العربية
نقطة ثانية لو تابعتى افلام الخمسينات و الستينات لاحظى ان هناك مفردات غريبة يسخروا منها هذه طبيعة اجيال كل جيل يتمسك بما نشأ عليه بعد عشرين عام سيصبح من يسمع تامر حسنى هو من يسمع الموسيقى الاصيلة هكذا الحياة
اللغة اداة توصيل طالما وصل المعتى المظبوط دون ابتزال فما الضرر كما ان هذه الكلمات تستخدم فى سياقها الاصلى دون ان نستغرب نقول طحن الدقيق
ما المانع ان اقول ان مطحون مثل الدقيق
الامثلة كثيرة لكنى اطلت كثيرا
تحياتى

mostafa gazar يقول...

وجهة نظر لها الاحترام والتقدير.......و أثرتى الموضوع ببساطه وتلقائيه وشجاعه....و بصراحه أنا مقتنع بوجهة نظرك

موناليزا يقول...

رغم تشابهنا فى حاجات كتير
لكن انا مختلفة معاكِ فى النقطة دى
لأن كتر الكلام كده هينسينا بجد مفردات اللغة

أوقت بييجى على بالى كلمة دارجة من كتر ما بسمعها مثلا فى التليفزيون واتفرجى عليا بقى وانا محطوطة فى موقف وبحاول اجيب مرادف يؤدى المعنى غير المصطلحات الجديدة.. ودلؤتى بقيت اظبط نفسى بتكلم بالفصحى

يعنى فى مرة شوفت صرصار فقلت لاخويا بسرعة ومن غير تفكير.. افتك بيه:) بدل ما أقوله مثلا اقتله أو موته

وطبعا أخويا ساب الصرصار وقعد يتريق على إفتك بيه:)

قصدى اقولك ان ممكن احنا كمان نعمل لغة خاصة بينا بإحياء مرادفات اللغة المندثرة

reemaas يقول...

متفقه معاكى جدا وشايفه ان طالما الكلمة مالهاش معنى يسئ للادب يبقى تتقال عادى انا بقى اختار اقولها امتى واقولها لمين ده الذكاء يعنى ماقولها وقت رومانسية ولا وقت شغل
بين الاصحاب تبقى جميله

لكل مقام مقال يعنى

مين قال اننا البلد الوحيد اللى بنبوظ اللغه او ليها مفرادتها كل بلد ليها لغتها الاصليه وعاميتها والعاميه طبيعى تختلف باختلاف العامة اللى بينطقوها

أخر العنقــــــود يقول...

صحيح ان لكل جيل له مصطلحاته ودي أحلى ما فيها
يعني بعض المصطلحات اللي ذكرتيها ماعتقدش ان مافيش حدد بيقولها في وسط تجمعات الصداقة
زي ما بنتكلم العامية اكيد بردو هنحافظ على لغتنا الفصحى - ان شاء الله
تدوينة تستحق القراءة :)
تحياتي

Carmen يقول...

روعة ياحبيبتي دايما بتوصلي معاني جميلة في اطار شيق تسلم ايدك

Bent Men ElZaman Da !! يقول...

معاكى حق ان فى كلام دلوقتى بقى يتقال مايتفهمش
اختى بتقولى شويه كلمات انا بتنح قدامها يعنى كلمه طحن وروش دى لغه عربيه فصحى قدام الكلام الغريب بتاعها
ده بقى الاحدث واللى انا لحد دلوقتى مش فاهماه
الكتابه باللغه العاميه جميله
بس الاهم انها متأثر على لغتنا العربيه نفسها

مها البنا يقول...

شيرين

مش عارفه أتفق معاكى ولا أختلف.

عارفه المشكله فين؟؟

المشكله إنى لو حضرت نقاش زى اللى حضرتيه عن جمال اللغه وقبح المصطلحات الجديده .. كنت هوافق على كل كلمه بتتقال. لكن فى نفس الوقت .. إكتشفت وانا بنقرا البوست إنى فعلا بستخدم هذا النوع من المصطلحات .. خاصة (إنزلى من على ودانى وكبرى دماغك). شفتى تناقض كده؟

مع ذلك .. أنا مقتنعه إن لغتنا العربيه فيها مصطلحات صالحه لكل شئ .. إحنا بس اللى بنكسل ندور وبنخاف من التعليق بإننا من أيام عماد حمدى.

بوست جميل .. وبرررضه هيخلينى أفكر شويه فى بعض سلوكى

دمتى فى حفظ الله

تحياتى

مصطفى سيف يقول...

انا بقى اللي نفسي اعرفه هو مين مفجر ثورة التهييس والطحن والتنفيض في مصر؟
مين المبدع الكبير اللي اقنعنا باللغة الروشة دي
انا بقى مش متفق معاكي لاننا في الوقت اللي بنحاول نقنع نفسنا بيه بالحفاظ على تراثنا هنتوه بين الالفاظ ومش هنعرف الماس من الازاز او الفصحي من الروشة
تحياتي

ماجد القاضي يقول...

السلام عليكم

ها هو إبداع جديد..!
ليس في اللغة والوصف هذه المرة.. لكن في طريقة وزاوية عرض الموضوع.. فقد أعجبني جدا وضعك لهذه التعبيرات الشبابية في موضعها الصحيح..

فهي فعلا يجب أن تقارن باللهجة العامية وليس باللغة العربية..

معالجتك للموضوع كانت جديدة في رأيي..
فغالب من يتعرض لها يكون بالمهاجمة.. لكنك كنتِ شجاعة وعرضتي نظرتك المخالفة لما هو سائد بالدليل المنطقي...

وعلى فكرة سبقتيني بالكلام عن لغتنا الجميلة.. لأن هناك بوست المفترض أن ينزل اليوم إن شاء الله عن اللغة العربية.. وبه تطرق لموضوع هذه التعبيرات أيضا...!

................
ملحوظة: في التعليقات السابقة:

عن 9 : صدقا لم أكن أؤنبك.. بل كنت أؤكد معك على أنه رغم أن هذه الأفعال غير صحيحة إلا أنني مقدر فعلها، ولعلي كنت سأضطر لنفس ما فعلتي.. ومن الجميل أن تظهر (إنسانية) الكاتب في مواضيعه.. أي يظهر ضعفه البشري فلسنا ملائكة وليست تصرفاتنا مثالية على الدوام.. وهذا ما يعطي لكتاباتنا واقعيتها...

وعن 10 : لم أقصد التطرق لعمل المرأة ولم أتصور أن زوجك يدفعك إلى ذلك قسرا.. بل كنت أنقد من يريد أن يحمل المرأة فوق طاقتها، فإذا اشتكت عاتبها بمثل قول المدير إياه (وكأن الموضوع فيه تشفي أو انتقام ما من النساء)!!!!!

...............
تحياتي الدائمة.

Haytham Alsayes يقول...

البوست دة جامد طحن
هههههههههههههههه

فعلا اللغة العامية فن مش سهل
وسعات لما الواحد يبقي مخنوق بيفضفض باللغة العامية بحس انها الاقرب للفضفضة
بس دة ميمنعش ان لغتنا الفصيحة اجمل واحسن وفيها صور شيقة جدا


تحياتي

givara يقول...

البوست رائع
بس اللى اروع من البوست شجاعتك فى تناولك للموضوع
اللغه اداة تواصل بين طرفين
طالما الطرفين موافقين على شكل الاداه مفيش هنا مشكله
يعنى مش هينفع اكلم والدى اللى عنده ستين سنه ولا شيخ مسجد واقوله الامتحان كان جامد طحن
وبرده مش هينفع اكلم زميلى واقوله الامتحان كان بالغ الصعوبه
المفردات طالما مخرجتش عن الذوق والادب
مش هيقرء ايه هيا بعد كده
جميل
استمرى

Casper يقول...

العامية جميلة بس ليس الكل يجيد استخدامها

ولو اني لا افضل الكتابة بالعامية لكن ميمنعش اني ممكن في يوم اجرب اكتب بالعامية

خالص تقديري لفكرك وقلمك

حآفية القدمين يقول...

شيري يسعدني تواجدي هناللمرا التانيه وعلى فكره اعتقد اني ادمنت هالمكان وانبسط وانا اقرى لك
ومن وجهة نظر شخصيه ..
ومتل ماقال احد الاخوان
((اختلاف الرأي لايفسد للود قضيه ))
انتي كلامك صح انو دام هالألفاظ ماتمس عادتانا وتقاليدنا والأهم ديننا مالها ضرر
واصلا هالكلمات شبابيه يعني فتره وتعدي
زي ماقلتي ممكن مااقدر استخدمها وانا مخطوبه
او قدام مدير بالعمل
او مكان رسمي
لكن ان حصل واستخدمتها دا مو معناتو اني ارتكبت خطيئه كبيره

دمتي بود

الحسينى يقول...

هههههههههههه
لا بعيد عن موضوع الشنب فى فعلاً كلمات مش بناتى خالص
يعنى احنا الولاد ممكن الناس تتقبل مننا أى حاجه لكن البنات صعب شوية.
مش عنصرية على فكرة بس فى حاجات بتتناقض مع شخصية البنات.
وفى كلمات كمان مش باقبلها من الولاد أو البنات زى "بيئة" مثلاً.
لكن عموماً أنا مش باحب التهويل بتاع اللغة وتنقرض والجيل المهبب اللى مش زى أيام زمان لأن أصلاً إحنا مش بنتكلم لغة عربية فصحى واللغة الدارجة بتتأثر بطبيعة الزمن اللى بيعيشه الانسان وتلبى احتياجاته للتعبير فالموضوع مش أزمة أوى يعنى طالما مش بندرسها فى المدارس.
تحياتى.

وجع البنفسج يقول...

عارفة مش شرط الواحد يكتب بالفصحى ولا العامية ، المهم انه يقدر يوصل فكرته للناس بسهولة ويسر ، لكن انا عندي اللغة الفصحى لا يعلو عليها ، يعني انا مثلا اكتب باللغة العربية الفصحى لكن ممكن استعين بالعامية في الرد على التعليقات .. المهم توصل فكرتي للناس ، بالنسبة للكلمات الدخيلة على لغتنا فيها الجميل والروش وفيها التقيل السمج .. بس كل لغة بتحصل فيها تغييرات حتى الانجلش بتدخل عليه كلمات ، يعني الانجليزي الحديث يختلف عن القديم .. في كلمات دخيلة عليه .. وهذا نتيجة طبيعية للتطور والتغير ..

شيرين سامي يقول...

سواح في ملك الله: أحترم رأيك جداً و مش ممكن هزعل حتى لو كان صادم أكتر من كده.
بس مش ممكن تكون كل الكلمات الجديده مصدرها كده, أكيد في حاجات طلعت من ناس طبيعين زينا بتعبر عن موقف ما بطريقه شبهنا.
عموماً رأيك و تعليقك أكيد اسعدني جداً و صدقني مش كل كلمه جديده برددها اللي بتكون معبره و صح بس.

تحياتي الخالصه لك

شيرين سامي يقول...

دعاء العطار: وجهة نظرك صح و فعلاً العامية هي حكاية بطريقه شيقه, و معاكي انك تستمري بالكتابه بالفصحى عشان تطوري من نفسك و تحافظي على مستواكي فيها أنا كمان باعمل كده...في الخطوبه مينفعش خالص :)

زياراتك و تعليقك دائماً بيسعدوني

تحياتي و كل الود لكي

شيرين سامي يقول...

Tarkieb: تمام كده الحلوه بس هو اللي بيفضل

شيرين سامي يقول...

ENG./ELSAYED,PMP: ههههههه ساعات الواحد بيستمتع فعلاً بكلام الناس و هما منهمكين في حاجه.
تحياتي ليك

شيرين سامي يقول...

FAW: ربنا يخليلك مامتك أحب أنا الأمهات العصرين :)
الكتابه بالعاميه جميله بس الفكره لازم تكون مُبهره و الطريقه شيقه و الفصحى طبعاً لا غنى عن جمال مفرداتها.

تحياتي ليك
نورتني

شيرين سامي يقول...

ابراهيم رزق: أستاذي دائماً بتشاركنا بشعر أو عمل جميل بيثري البوست و الحقيقه دي أول مره أسمع عن الأغنيه و كلماتها جميله فعلاً.
زي ما حضرتك قلت بالظبط مفيش جيل غير و بينقض مفرادات الجيل اللي قبله و غستخدام الكلمات بنفس معناها في غير سياقها مش هيضر اللغه العامية أبداً.

تعليقك مميز كالعاده و أجمل لما بيطول
تحياتي الخالصه لك

شيرين سامي يقول...

مصطفى جزر: متابعي العزيز شكراً على تعليقك و سعيده اننا متفقين.
تحياتي الخالصه لك

شيرين سامي يقول...

موناليزا: ههههههه افتك بيه انت كده عملتي زي مامتي بتقول القمامه و المقلاه و وهوكذلك و كلام زي كده كتير:)
بصي يا مونا انت وجهة نظرك في احياء المردفات القديمه تحترم و تنم عن شخصيه مثقفه و محترمه بس المفردات القديمه مش هتعبر عننا بنفس قوة المفردات الجديده و متنسيش اني بتكلم عن اللغه العاميه مش الفصحى اللي احنا مش بنتكلم بيها في الأساس.

سعيده بتعليقك حبيبتي
منوراني دائماً

شيرين سامي يقول...

reemaas:عليكي نور يا نور لكل مقام مقال :)

شكراً على تعليقك و متابعتك الحلوه

تحياتي الخالصه لكي

شيرين سامي يقول...

آخر العنقود: هسرق من كلامك و أقولك زي ما بنتكلم كده مع أصحابنا واجب علينا نحافظ على لغتنا الفصحى و تراثنا.
تحياتي ليكي سعدت جداً بالزياره و التعليق

شيرين سامي يقول...

Carmen: تسلميلي حبيبتي منوراني دائماً بتعليقك

شيرين سامي يقول...

Bent Men ElZaman Da !!: أنا كمان ساعات بسمع كلام مش عارفاه و بحاول أفهمه خلي أختك تفهمنا بقى :)
متفقه معاكي يا جميل
تحياتي العطره لكي

شيرين سامي يقول...

مها البنا: المهم التوازن بين ده و ده و ان عشقنا للغتنا العربيه ميندثرش و في نفس الوقت مفيش مانع من الكلام بلغه تتناسب مع العصر.
حلوه حكاية عماد حمدي دي :)

تحياتي ليكي
منوراني دائماً

شيرين سامي يقول...

مصطفى سيف: براحه عليه شويه :)
الاختلاف في الرأي لا يفسد للود قضيه (ولو اني بقيت بتشاءم من الجمله دي دائماً بيعقبها خناقه)
الموضوع مش ماس و ازاز يا دكتور لأني مش بقارن اللغة العربيه الفصحى باللغه العاميه.
عموماً بحترم رأيك جداً
منورني دائماً
تحياتي ليك

شيرين سامي يقول...

ماجد القاضي: و عليكم السلام و رحمة الله و بركاته سعيده جداً ان طرحي اعجبك و ان وجهة نظري وصلتك في إنتظار بوست حضرتك الجديد و أكيد هيكون رائع كالعاده.

بالنسبة لتعليقات حضرتك السابقه بعتذر عن سوء فهمي و أشكرك للتوضيح و في كل الأحوال تعليقاتك سواء بالمدح أو النقد بتهمني جداً.

تحياتي و كل التقدير لك

شيرين سامي يقول...

Haytham Alsayes : ههههههه بشكرك جداً بجد لما كاتب معرف بلغته الفصحى الرشيقه زيك و يبقى ده تعليقه على كلامي أكيد ده يسعدني جداً.
و بتفق معاك فان اللغه العربيه كلها صور و مفرادات جميله.
تحياتي الخالصه لك

شيرين سامي يقول...

givara: جميل كلامك خصوصاً المثال اللي ذكرته بتفق معاك في كل كلمهز
اشكرك على متابعتك و تعليقك الرائع
نورتني
تحياتي الخالصه لك

شيرين سامي يقول...

Casper: اكيد هتكون تجربه تستحق القراءه لأنها من كاتب مبدع مثلك.
تحياتي و إحترامي لك

شيرين سامي يقول...

حافية القديمن: صحيح عزيزتي استخدامي لهذه الكلمات لابد أن يكون في موضعه و بالتأكيد هو لا يعني اني ارتكبت جريمه لغويه:)

تعليق جميل اشكرك عليه و سعيده جداً بمتابعتك

تحياتي الخالصه لكي

شيرين سامي يقول...

الحسيني : أنا معاك في كل حاجه ماعدا موضوع بنت و ولد ده ايه المشكله ان بنت تقول أي كلمه طالما مش شتيمه أو مقززه.
هي غالباً بتبقى لغة صحاب و اخوات و زي ما انت قلت مش بتتدرس في المدرسه عشان ندعي انها هتبوظ لغتنا العربيهز

بيسعدني دائماً تعليقك

تحياتي الخالصه لك

شيرين سامي يقول...

وجع البنفسج: أحسنت يا امتياز فيها الجميل و القبيح و علينا التميز و الاختيار و البقاء للأجمل.
انت لغتك رائعه احيكي عليها و استمري في التابه بها و التعليق بما يتناسب مع الرد.

تعليق قيم و جميل أشكرك عليه

تحياتي و تقديري لكي