الجمعة، 3 يونيو 2011

القصقوصة الثالثة (وصلتك رساله)

بيحب الخروج و الضحك و السفر و الجيم طبعاً, بيهتم بنفسه جداً لبسه مهندم و عصري, شعره كمان بيصففه بشكل جذاب جداً, شخصيته مرحه متزنه متدين بغير تذمت, خفيف و روش بغير تفاهه, متسامح جداً و صاحب صاحبه, بعيد تماماً عن السياسة و لسه مخلص إمتياز طب عين شمس....يا بنات متفهمونيش غلط ده مش عريس...ده أحمد سامي...أخويا الصغير هو صغير عني صحيح بس يفصّل مني أربعة.
دائماً الناس بتقول اننا بنشبه بعض مع ان كل الخطوط العريضه في الشكل بينا مختلفه تماماً بس مرات كتير بخبط في ناس معرفهومش و يقولولي (إنت أخت أحمد سامي؟) بعمل فيها قدامه اني متغاظه و اني أكيد أكيد أجمل منه بس بصراحه من جوايا ببقى مبسوطه عشان "مين ميحبش أحمد؟"
يوم 27 يناير كنا كلنا متضايقين و أحمد كان مبيفكرش ينزل عشان أسباب كتير, عنده مستشفى و الموضوع بالنسبه له مظاهره و هتنفض و نرجع كما كنا...بس منظر الشباب اللي بيتضربوا و يتجرجروا على عربيات الداخليه كان بيستفزه جداً, تاني يوم أحمد نزل و إتخنق بالغاز وإترش بالميه  شاف الشباب و هما بيتهانوا , حس بغضب الناس و القهر و المذله اللي احنا عايشين فيها و من يومها قرر انه هينزل كل يوم لحد ما يبان آخر...عرف و عرفنا كتير عن السياسه يمكن كنا موافقين من أول لحظه على الثوره و المظاهرات عشان كنا شايفين معاناة الناس و تأخر البلد و كل المثقفين نفسهم يهجوا منها و كل الحرامية بيسرقوا أكتر و المنتفعين بيستفيدوا أكتر و البسطاء بيتطحنوا أكتر بس مكناش مدركين كوارث تانيه كتير بينتها الثوره.
بعد الخطاب التاني أحمد كان هناك و مر بلحظات تردد زينا كلنا و روّح البيت طلبت منه إنه مينزلش تاني يوم لحد ما نفهم إيه اللي بيحصل بس ماسمعش كلامي و كان هناك من بدري....الغريب ان والدي شاف باصات كبيره متجهه للميدان مكتوب عليها (هيئة البترول)!!, و شاف كمان (بحكم سكنا في حي الدقي القريب من الميدان) بلطجية ماشين بيقولوا "إحنا هنوريهم رامي الإعتصامي و توتو و لولو دول" ده غير إن صديقتي اللي كانت في شرم الشيخ عرفت من شباب هناك انهم بيشتغلوا في تكسير الجبال و نقل الحجاره بسيارات لميدان التحرير!!
أحمد سمع ان في مظاهرة هتجيلهم في الميدان تمسك أكتر بموقفه و قال في نفسه إيه يعني إحنا وقفنا في وش الشرطه مش هنقف في وش ناس مدنين, بعد شوية لقى الناس بتجري بتجري جري معاهم لحد ما وصل عند سور الميدان و هو بينط عشان يلحق يهرب من أبو لهب و أعوانه و خيله و جماله, وصلته رساله نصها كالآتي " من إيجبت لوفرز...ندعوك للإنضمام في مظاهرة هتنطلق إنهارده الساعه 3 الظهر من ميدان مصطفى محمود للي خايف على مصر و عايز إستقرار"....!!!!
أحمد طبعاً في اللحظه دي كان نفسه يحدف الموبايل و محسش بنفسه غير و هو بيشتم و يجري و يشتم...قضى اليوم في المستشفى الميداني يحاول بالإمكانيات المتاحه إنه يساعد المصابين لكن للأسف القتلي و اللي فقدوا عنيهم كانت أعدادهم في إزدياد و مكانوش قادرين يستعينوا بسيارات الإسعاف اللي كانت بتيجي لأنها كانت بتنقل المصابين على مستشفيات أمن الدوله..!
كانت مهزله بكل المقايس و أحمد رجع و كل هدومه حتى حذاءه دم...إتغسلت الهدوم و راح منها الدم لكن أحمد مفضلش زي ما هو إتغير من اليوم ده مبقاش بيحب الضحك و الهزار...مبقاش متسامح و قلبه أبيض زي زمان...مبقاش بيستمتع بالخروج و السفر...لما بيسمع عن مجموعة آسفين يا ريس و آخر إصدارتها بيصاب بالغثيان...أحمد إتغير نفسي بقى حال البلد يتغير هو كمان.
إدعوله بقى عشان عنده إمتحان مهم أوييييي 

هناك 47 تعليقًا:

سواح في ملك اللــــــــــــــــــه- يقول...

ربنا ان شاء الله ينجحه

متبصيش للتغيير ده دلوقتي

التغيير ده ايجابي

وان شاء الله هتشوفي احمد سامي

انسان ناجح وجميل

ربنا معاه

بنوتة مصرية يقول...

ربنا ينجحة والله دة المفروض ميزعلش دة لازم يفرح انا معاه ان الواحد كان مصدوم من كمية الفساد اللى فى بلدنا بس يفرح لانة على الاقل ساهم فى تطهير الفساد دة ورحيل مبارك الظالم بصوت احمد ومساعداتة وغيرة وغيرة وغيرة مصر قامت بثورة وهتبنى اكتر لو رجعنا ضحكنا تانى عشان نبنى بلدنا ...

ومحدش يزعل من اللى بيحصل فى مصر دلوقتى الحكاية مسألة وقت وبأذن الله مصر هتكون جنة بأيادى أبنائها اللى بيحبوها ...

وربنا معاك يا احمد وينجحك وينجحنى وينجح كل اللى بيطلبو العلم فالعلم سبيل الحياة ...

تحياتى

reemaas يقول...

ياااااااااارب ينجح ان شاء الله

هو فعلا كلنا اتغيرنا قناعتناو مفاهمنا طريقه كلامنا ومواضيع كلامنا كله كله اتغير واكيد البلد كمان هتتغير بس الصبر

دعاء العطار يقول...

" ...يا بنات متفهمونيش غلط ده مش عريس...ده أحمد سامي. "

ههههههههههههههه كده تحطمى قلوب العذارى D: D:

ومين يشوف اللى شافه أحمد ومايتغيرش ؟

دايماً لما حد يقولى ده راجل كبير ومش باقيله فى الدنيا كتير بيكون ردى عليه : أصلك مش مات لك شهيد ولا عينيك ضاعت

شبباب كتير زى أحمد اتغيرت جواهم حاجات كتير وفيه ناس لسه زى ماهى ولا كان حاجه حصلت

جميله القصقوصه ياشيرى .. فى انتظار القادم (: (:

رحلتنا في الحياة يقول...

كلنا اتغيرنا بس على الرغم من الاسى والحزن والقرف من حال البلد
بس التغير دا كان للاحسن ربنا معاه يارب
ويوفقه
وباذن الله هيرجع زى الاول لما يشوف حال البلد افضل وافضل

ابراهيم رزق يقول...

طبعا مش هو بس
فى اكتئاب ما بعد الولادة و هذا بيصيب الام
فى اكتئاب ما بعد الثورة و هذا اصابنى و اصاب عدد كبير
فكرتينى بيوم الاربعاء الدامى و زوجتى و امى بيتصلوا بى
فى حاجات بخاف احكيها عشان اللى بيسمعنى ميفتكرنيش ببالغ او بخرف
لكن المستشفى الميدانى و الدكاترة اقسم بالله انى اردت ان تكون كل مستشفيات مصر هذه الخيمة من تفانى الاطباء الشباب اللى زى الورد
تحياتى الى احمد و ربنا يوفقه و ايام و هتعدى
تحياتى

ليلى الصباحى.. lolocat يقول...

السلام عليكم

لو كلنا ما اتغيرنا بعد كل الاحداث اللى حصلت
والمشاهد المختلفة اللى عاصرناها يبقى الثورة ماكان لها لزوم تحصل

اكيد كلنا اتغيرنا والثورة صنعت الرجال زى ما الرجال صنعوا الثورة

والمواقف اللى مرت على احمد زادته خبره و جعلت تفكيره اعمق وافضل ونظرته للمستقبل اشمل واكبر واوسع

ربى ينجحه ويحميه ويبارك فيك وفيه :)

يا اجمل اخت واحن اخت

ربنا يخليكم لبعض ويوفقه فى كل حياته

لك ارق تحية وتقدير

موناليزا يقول...

التجارب الواقعية القاسية تترك ندبات فى الروح

ربنا معاه

سَارةٌ يقول...

بِغضْ النَّظرْ إنْ الوآحدْ عَنده إخواتْ
بَس مفكرشْ يتكلم عنهمْ كده يعنِيْ .. :DD

..

رَبنـآ يِوفقه بإذن اللهْ ..
رَبنـآ يخلِّيهُولكْ ..:)

..

تَدوينَه مُمتعه جداً ..:):)

FAW يقول...

طب وليه تكسفي البنات . . ما هو ممكن يبقي عريس برضو :)

فيه دكتور نفساني مش فاكر إسمه قال إن العقل الباطن للمصريين في الأيام دي بعد ما سمعوا أخبار الفساد والقتل والجرائم البشعة في حقهم بتخليهم بطريقة لا إرادية يبقوا عصبيين و وحشين في تعاملاتهم مع بعض , وكلام منطقي جدا وبشوفه في الشارع يوميا وإحنا معذورين


تدوينة جميلة بس ليا سؤال . . إيه مستشفيات أمن الدولة دي ؟؟


تحياتي . .

مصطفى سيف الدين يقول...

ومين ميحبش احمد
احمد مصري اصيل فيه زيه ملايين قصصهم هتتسطر في التاريخ
احمد بطل عرف يسخر نفسه ويجاهدها ويجبرها على مساندة الحق من غير خوف
الدم اللي على هدومه مهما اتغسل هتفضل ايديهم ملوثة بيه وهيفضل اثره في القلوب ده دم مش شوية حبر احمر هيتغسل وخلاص
بارك الله لكي في احمد وبارك الله في قلب احمد وفي عقل احمد وفي كل نفس يتنفسه احمد
وفقه الله في دراسته وفي امتحانه
تحياتي ليكي

الحسينى يقول...

العزيزة شيرين

اولاً ربنا يخليكوا لبعض.
ثانياً أكيد اللى شافه واللى كان أكبر من أى حاجه ممكن تخطر على البال لازم يأثر فيه ويغيره وأكيد التغيير إن شاء الله للأحسن علشان هيخليه هو وكل الشباب يزيد إصرار على حرية كاملة وثورة كاملة مش منقوصة.
بادعى ربنا أنه يرجع تانى يضحك ويهزر ويرجع متسامح مع نفسه ومع الدنيا كلها بس مينساش اللى حصل عشان ده هيخليه دايما هو وكل واحد فى مصر يسعى لأنه يشوف مصر أحسن
وأخيراً ربنا يوفقه فى امتحاناته وفى حياته كلها.
تحياتى.

Tamer Nabil Moussa يقول...

ربنا يوفقة ويكرمة

تغير لااحسن والافضل

الشعور بالاخرين يدل على الانسانية موجودة لسة


مع خالص تحياتى

Tamer Nabil Moussa يقول...

ربنا يوفقة ويكرمة

تغير لااحسن والافضل

الشعور بالاخرين يدل على الانسانية موجودة لسة


مع خالص تحياتى

شمس النهار يقول...

مش احمد بس اللي اتغير

كل اللي نزلوا التحرير اتغيروا

بس مصر 88 مليون كان لازم ال88 مليون ينزلوا علشان يتغيروا معانا

rack-yourminds يقول...

ان شاء الله ربنا هيكرمه وينجح بتفوق ولازم يفتخر بنفسه لانه من خيره شباب مصر واحرار هذا العالم

سندباد يقول...

اكيد مصر كلها لازم تتغير ولازم كلنا نفتخر باللي زي احمد واللي عملوه عشان يصحي ضمير الشعب اللي كان عايش مقهور ومخنوق ومنهوب
ربنا يخليه ليكم
وبالتوفيق ان شاء الله
وياريت تبلغيه تحياتي واحترامنا كلنا لشخصه الكريم

Mostafa gazar يقول...

ربنا يوفقك و ييسرلك الأمور يا أحمد.....و يارب ترجع زى زمان ......و بالتأكيد تجربه صعبه وقاسيه .....و ربنا يصلح حال البلد للأفضل

إنسان || Human يقول...

حدوته ولا شرين ولا مدام شيرين و د شيرين

إختاري اي حاجه فيهم

فرأت أقصوصاتك الثلاثة ... والصراحة الثلاثة اجمل من بعض

الصباح ... رائعة فعلاً بما اني الصبح دلوقتي حاسسها قوي ..ههههههه
الكلمات مفعمة بالصباح ورائحته الجلية ... أكثر واحدة محببة ليا في الثلاثة لرقتها


عن الطفولة كانت ... واضح انك كنتي طفلة غير عادية ... من يومك يعني


الثالثة ... والله انا حبيته من غير ما اشوفة ... ربنا يكرمه يارب ... ونرجع كلنا مش احمد بس زي الأول

دمتي بخير

غير معرف يقول...

مساء الغاردينيا شيرين
كثيرين من يشبهون احمد فمن لايتغير وهو يرى مارآه في مصر لاتقلقي عليه صدقيني هو اليوم بـ أحسن حال وغداً سيكون أفضل لأن ذلك الألم سيجعل عوده يشتد "
؛؛
؛
وبـ التوفيق لكِ وله
لروحك عبق الغاردينيا
كانت هنا
reemaas

ENG./ELSAYED,PMP يقول...

مش عارف الدكتورة
موضوع نتغير ده مش عارف هيحصل امته
ربنا ينجح احمد
وبالمناسبة موضوع البترول ده مش هوه بس ... تقريبا كل شركات مصر كانت عاملة كده ... منهم المقاولون العرب

المهم
اقرى الاغتذار ده
http://hesshesss.blogspot.com/2011/06/blog-post_04.html

Carmen يقول...

اقصوصة رائعة حبيبتي تسلم ايدك
تحياتي لك

Unknown يقول...

سواح في ملك الله: يارب يا خالد أشكرك على الدعوه الجميله

Unknown يقول...

بنوتة مصرية: كلامك صح جداً و ان شاء الله الجاي أفضل.
شكراً على تعليقك الرائع و دعوتك الحلوه.
تحياتي الخالصه لكي

Unknown يقول...

reemaas: احنا فعلاً محتاجين الصبر...ربنا يستر
تحياتي لأجمل بنوته

Unknown يقول...

دعاء العطار: كلنا فعلاً اتغيرنا بس نفسي نستغل التغير ده للأفضل و نلاقي الدنيا حوالينا كمان بتتغير.
شكراً يا دودو على تعليقك المميز دائماً
نورتيني

Unknown يقول...

ღ أحاسيس آيـــوشـه : يا رب يا أيوشه بجد نفسي نرجع نفرح زي الأول و الدنيا تتغير للأحسن.
نورتيني بزيارتك الحلوه

Unknown يقول...

ابراهيم رزق: نفسي تحكي يا أستاذ إبراهيم عشان نعرف أكتر و عشان مننساش...أتمنى الاكتئاب يزول و الفرح يعم.
الدكاتره و المصريين عموماً لما بيحسوا اللي بيعملوه ليه لازمه و لما يحسوا انهم بني أدمين و لما بيمروا بأزمة كبيره بيبقوا أقوى و أطيب ناس في الدنيا و محدش يقدر يهبط من عزيمتهم.
أشكرك يا أستاذي العزيز على تعليقك الرائع دائماً

Unknown يقول...

أم هريرة (lolocat: وعليكم السلام و رحمة الله و بركاته ربنا يخليكي يا لولو بجد بشكرك على دعوتك الحلوه و قلبك الجميل دائماً تعلقك بيبقى مليان حنان و طيبة.
تحياتي و كل الود لكي

Unknown يقول...

موناليزا: حكمه رائعه أشكرك عليها
تحياتي أختي العزيزه

Unknown يقول...

حَـبآيـۃْ.بـטּـدۉڷ: شكراً يا جميل على ذوقك...بصي هو محدش يتكلم كده عن إخواته لو كان عايش معاهم في البيت أو مبيعرفش يعبر عن نفسه بدون قيود أو خجل في الكتابه...و أنا لأني مش عايشه معاه و لأني بحب الكتابه جداً طلع البوست كده:)
تحياتي ليكي

Unknown يقول...

FAW: حلو كلام الدكتور اللي مش فاكر إسمه مظبوط جداً :)
مستشفيات أمن الدوله أقصد بيها أمن الدوله بدلاً من المستشفيات...عشان كده وزير الصحة إتشال لأن سيارات الإسعاف إستخدمت لأغراض أخرى.
شكراً يا مصطفى على زيارتك و متابعتك الرائعه
تحياتي لك

Unknown يقول...

مصطفى سيف: زميلي العزيز بجد تعلقك قمة الروعه أشكرك عليه جداً لأنك بجد حسيستني بروعة الاشتراك في الثوره و أحمد أكيد هيفخر جداً لما يقرى كلامك.
تحياتي و كل التقدير لك

Unknown يقول...

الله الله على قصاقيصك.. بجد ممتعة جدا.. أنا اتأخرت.. لكن مدونتك لا يفوتني منها تدوينة.. علشان كده لسه قاري 4 تدوينات وهذا تعليقي عليهم..

الصباح جميلة جدا.. وصف حي للشارع المصري في الصباح الباكر.. أمتعتني..

تالتة تالت.. أروع.. أستمتع جدا بحكايات الطفولة..

الرسالة.. حلقة رائعة من حلقات تأريخ أيام الميدان.. لكن من داخل نفوس المصريين..

بجد أنا آسف إني بعكر هذه اللحظات الجميلة بالملاحظات والتعقيبات والذي منه...

استمري بالتوفيق..!

Unknown يقول...

الحسينى: شكراً جداً على ذوقك و رقة تعليقك كالعاده و أتمنى كل شئ يتغير للأفضل شكراً مره تانيه على دعوتك الجميله.
تحياتي الخالصه لك

Unknown يقول...

Tamer Nabil Moussa: أشكرك على زيارتك الرائعه و طبعاً الانسانيه مماتتش بدليل ان معظم الثوار ثاروا عشان غيرهم.
تحياتي و احترامي لك

Unknown يقول...

شمس النهار: عندك حق كلنا اتغيرنا بس صدقيني في ناس منزلتش و اتغيرت بردو و كتير كانوا في بيوتهم لكن قلوبهم في التحرير.
تحياتي و تقديري لكي

Unknown يقول...

rack-yourminds:أشكرك على كلماتك الرائعه و ذوقك.
تحياتي الخالصه لك

Unknown يقول...

سندباد: الشكر ليك يا سندباد على تعليقك الراقي و تشجيعك الدائم و أحمد أكيد هيسعده تعليقك الجميل.
تحياتي و تقديري لك

Unknown يقول...

mostafa gazar: ياااارب يا مصطفى أشكرك على تعليقك الرائع كالعاده.
تحياتي و إحترامي لك

Unknown يقول...

Hu-man: إزيك يا محمد ممكن تقولي أي حاجه الا مدام شيرين هجس اني موظفة أو اني مش أنا :)
سعيده انك قريت الثلاث تدوينات الأخيره و رأيك أكيد يهمني جداً
أشكرك على رأيك الجميل و أتمنى أكون دائماً عند حسن ظنك.
تحياتي الخالصه

Unknown يقول...

ريــــمــــاس: ريماس الرقيقه لديك كل الحق انما نحتاج الصبر لتمر بنا هذه الفتره للأفضل.
أشكرك على تعليقك الرائع دائماً
تحياتي الخالصه لكي

Unknown يقول...

ENG./ELSAYED,PMP:قريت الاعتذار و بحيك على شجاعتك الأدبية و الاخلاص و الصدق اللي بقى عمله نادره بجد أنا سعيده بيك جداً.
أشكرك طبعاً على الزياره و التعليق
تحياتي و احترامي لك

Unknown يقول...

Carmen: شكراً يا كارمن زيارتك هي الأجمل.
تحياتي الخالصه

Unknown يقول...

ماجد القاضي: سعيده جداً جداً يا أستاذ ماجد انك قريت الثلاث تدوينات حضرتك عارف ان رأيك فيما أكتب يهمني و يسعدني و كنت خايفه السياسه تكون خدتك بعيد...المشكله ان هذه الأيام الحقيقه غائبه و ان ظهرت متغيره...المشكله اننا بنغير رأينا مرات في يوم واحد...عشان كده أنا مش بنشر رأيي أو أرد على آراء الغير لأني مش على دراية بتفاصيل ما يحدث و مش عايزه أدخل نفسي في دهاليز السياسه.
أشكرك على إهتمامك و رأيك في كل قصقوصه شهاده أعتز بيها.
تحياتي و تقديري لحضرتك

تاكاشى يقول...

حدوته كلنا عشناها وكل واحد فينا شافها بطريقته
مش احمد لوحدة اللى اتغير وبقى بالشكل دا
انا كمان من وقتها وانا مارجعتش زى زمان
فى جوانا حاجه انكسرت جنب العزه اللى اتنصبت جوه قلوبنا

قوليله انه مش لوحدة وان احنا كلنا كدا وقوليله انى بتمناله النجاح والتوفيق باذن الله

zizi يقول...

شيري الغالية ..

انتي انسانة حلوة قوي ويبدو ان الصفة دي متوارثة وحسيت ان باباكي ومامتك هم اًلاًتنين فيهم الطيبة دي اللي باينة فيكي ..وان شاء الله احمد حايتغير بمرور الوقت للأحسن وحا يحس إنه عمل فيها حاجة للأحسن ..تحياتي ..