الأحد، 5 يونيو 2011

القصقوصة الرابعة (بحب نفسي)


أجازة...ماذا تعني كلمة أجازة ألا أذهب للعمل, أن أصحى براحتي, أن لا أقوم بأي نشاط, أمممممم مخطأ من ظن هذا فالأجازة كلها أعمال و مشاوير مرهقة لا نكاد ننتهي منها حتى نشعر أننا بحاجه لأجازة حقيقية أجازة من الأجازة, نكتشف أن نهاية الأسبوع مرت و لم نحصل على أجازة بعد.

في هذا اليوم نحن مدعوين على الغذاء عند أسرة زوجي , والدته قريبة جداً لقلبي أنتظر زيارتها بفارغ الصبر, الكل يأكل بمرح و الأحاديث تتدفق بين الجميع, أنا لا أستطيع مشاركتهم الأحاديث بسبب إنشغالي في إطعام إبني, حماتي تقول كل دقيقة "آمن عايز ياكل..أكليه" " آمن خلّص...إديله معلقه تانيه" أستمر في إطعامه حتى يشبع و ينتهي الجميع و أنا لم أأكل بعد حماتي تقول "إنتي لسه ماكلتيش...لازم تاكلي" أُفضّل ألا أتناول الغداء عن أن أجلس وحيده على السُفره.

في المساء يقرر زوجي أن نذهب جميعاً للنادي, يجلس الجميع يتبادلوا الأحاديث المختلفه ماعدا أنا لا أجلس, أتابع إبني أتعقبه و هو منطلق في كل مكان حماتي تقول "آمن عايز يشرب" " آمن عايز يغير" "آمن عايز يلبس جاكت عشان ميبردش" "آمن عايز يغسل وشه" حاضر حاضر حاضر.

بعد ساعات من تلبية مطالب آمن و اللهث وراءه في كل مكان وضعته بين يدي حماتي التي أمطرته قُبُلاً و قلت مبتسمة و أنا أبعد "آمن عايز يقعد مع جدته شوية", مشيت جريت هرولت بعدت عن عيون الجميع و كأني أصبحت عصفور صغير يطير ثاقباً الفضاء, إلى أن إطمأنيت أني وحيدة في أمان فميشت بتؤده و هدوء حتى وصلت للكافية, طلبت حلوى الباباز الذي أعشقه و شرعت أأكله  بمنتهى البطأ و الإستمتاع دون أن أشعر بأي شئ حولي سوى ذوبان الكريمه و الكيك المحلى في فمي ثم شربت موكا مثلجة بالتوت أرتشفها شفطه شفطه و أنا شبة مغمضة العقل في سبات عميق ينقلني إلى منطقة أخرى من اللا وعي بعيداً عن الأرض.

إنتهيت عدت و أنا في حالة إنتشاء عالي تعجب الجميع من السعادة الغير مبرره التي ظهرت على وجهي, و بادرني زوجي بالسؤال أين كنت, أجبته أني كنت أبحث عن الحلوى المفضله لآمن, أعطتني إياه حماتي و هي تقول "آمن عايز ينام"...
أحياناً أحتاج أن أجلس مع نفسي, أحب نفسي, أدلل نفسي حتى أستطيع أن أهب حبي للجميع.

هناك 37 تعليقًا:

سواح في ملك الله- يقول...

ماشاء الله

ربنا يحفظ امن ووالديه

يوميات جميلة

تحيتي لام امن

Mona Abo - Elso3od يقول...

حماتك دي سكر احب انا كده ههههههههههههههه
معلش يا شيري كلنا هذه المرأة بنسرق لحظات قليلة من الحياة نستمتع فيها بخلوة صغيرة مع النفس علشان نقدر نكمل المشوار
و بعدين انتوا بتروحوا نادي ايه اجي اتمشي معاكي شوية علشان نفسي فعلا امشي معاكي حاسة اننا هانضحك كتير بس انا هاشرب كابيتشينو تشوكلات فليفور ممكن ‎:)‎‏
مبسوطة جدا لعلمك من الشهر التدويني ده
تحياتي لاحلي شيري

Casper يقول...

بالتأكيد حين يكون الانسان سعيدا فسيسعد من حوله

_________

ربنا يحفظ امن ويبارك فيه

خالص تحياتي

مصطفى سيف يقول...

ربنا يخليلك حماتك ويباركلك في آمن
وربنا يمتعك بالاجازات الجاية
تحياتي استمتعت بيومياتك واسلوبك في السرد

ENG./ELSAYED,PMP يقول...

مهم جدا موضوع بحب نفسى ده ... ربنا يحفظكم
تحياتى

بنوتة مصرية يقول...

اسلوبك جميل اوى اوى اوى

ربنا يخليلك ابنك اللى اسمة جميل وجديد عليا اول مرة اسمعة

انا معاكى ان الانسان لازم يحب نفسة عشان يعرف يحب الآخرين ...

تحياتى ليكى ولآمن :)

FAW يقول...

أهم حاجة فعلا والله إن الواحد يحب نفسه و يدلعها و مينسهاش في وسط زحمة الحياة

ربنا يخليلك آمن وجدة آمن :)

بس موضوع صعب قوي ربنا يقويكي D:

تحياتي . .

ماجد القاضي يقول...

السلام عليكم

(و قلت مبتسمة و أنا أبعد "آمن عايز يقعد مع جدته شوية")... ملعوبة..! :)

جميلة بجد.. كتير من الأمهات بتنسى نفسها فعلا.. وإذا تذكرت لا تستطيع الاستمتاع بالحياة في وجود كائنات قططية ملتصقة بها ليل نهار....

أنا صراحة كل فترة أجلس بالبنات وأترك لزوجتي العنان للانطلاق بعيدا عنا.. تذهب إلى أمها أو تتنزه مع إحدى صديقاتها...! هذا حقها بالتأكيد.

................
البوست السابق كنتي كاتباه وعندك 18 سنة.... يعني من سنة بس؟!!!

تحياتي أختي شيرين.

قهوة بالفانيليا - شيماء علي يقول...

ضروري جدا ..
السلام النفسي اللي بيحصل لما نحب ندلع نفسنا بيدينا طاقة إيجابية ممتازة للحياة ..
يا ستي ربنا يخلي آمن ..
و ابقي بوسيهولي :)

Ms Venus يقول...

انا وحشة بجد

متأخرة بقالى كتير وفات عليا اكتر من بوست

معلش يا شيرين سامحينى غصب عنى ظروفى ملغبطة جدا

أحياناً أحتاج أن أجلس مع نفسي, أحب نفسي, أدلل نفسي حتى أستطيع أن أهب حبي للجميع.

تعرفى نفسى اعمل كده

ربنا يسعد ايامك كلها يارب

الحسينى يقول...

هو ده
أنا عادة بافسح نفسى وأخرج مع نفسى واشتريلى حاجة حلوة وأدينى يوم كسل من غير اى شغل او خروج او تفكير حتى :)
بس يمكن ده لانى لسه معنديش ارتباطات كبيرة
ربنا يخليلك أمن ويخليكى ليه.
تحياتى

نيللى يقول...

اولا انحنى ليكى اجلالا وتعظبما على هذا البوست الرائع ..سردك رئعه احسستنى انى كانى كنت معكم

ثانيا ماشاء الله لاقوه الا بالله ربنا يخلليلك حماتك وابنك يارب واسم ابنك جديد ورائع

وفكرتينى السعاده اللى بتغمرنى وانا بشرب القهوه اللى ممنوعه على دلوقتى عشان حامل بعد 3 سنين انتظار
ادعيلى ربنا يثبت حملى

وعجبتنى جدا مقولتلك ان لازم الانسان يدلل نفسو عشان يسعد اللى حوليه

دعاء العطار يقول...

" آمن عايز يقعد مع جدته شوية "

ههههههههههههه

ساعات كتير بنحتاج ننفرد بنفسنا ... ونهتم بيها ... نحس ان لها حقوق علينا عشان نعرف نأدى حقوق غيرنا

اسلوبك كالعاده يمتعنى (:

zizi يقول...

شيري الجميلة ..

حلوة قوي القعدة معاكي في النادي وكدت المح آمن وهو يجري بعيداً وتلاحقينه والمح حماتك وهي تتابعه معك عن بعد ..اسلوبك سهل ويسير بنا وكاننا في قارب يتمايل بنا على وجه النيل في نعومة ويسر ..سلمت يداكي ..تحياتي وشكري

reemaas يقول...

بداية الاسم عاجبنى اوى ياشرين ربنا يحميه حبيبتى

ثانيا الاجازة يوم ممتع مش يوم راحة

ثالثا بقى
أحياناً أحتاج أن أجلس مع نفسي, أحب نفسي, أدلل نفسي حتى أستطيع أن أهب حبي للجميع.

جمله فى الجووووووووووووووون

ريــــمــــاس يقول...

مساء الغاردينيا شيري
ربنا يخليلك ابنك وحماتك وجوزك
بجد الانسان محتاج يفتكر نفسه شويا
انا بشوف خواتي ازاي الوحدة
عماله تجري ورى ولادها ههههههه
هما متعبين انما حلوين
ويارب بألف هنا وشفا الحلوى بتاعتك
بس انا زي البقية من صحابنا
عاوزة اعرف معنى اسم ابنك
بجد اسم غريب شويا ( آمن )
؛؛
؛
لروحك عبق الغاردينيا
كانت هنا
reemaas

rack-yourminds يقول...

كتر مننا بيجد راحته في ان يختلي بنفسه

حفظكم الله جميعا

ابراهيم رزق يقول...

بصى يا شرين

ربنا يخلى لكى امن ويبارك فيه و يجعله قرة اعينك و يجعل له من اسمه نصيب و يبارك فى زوجك

ساعات بابقى عايز اغمض عينى و اسمع ام كلثوم و فيروز لكن ده اصبح حلم من الاحلام بسبب زياد و ساليناز

زمان ايام العزوبية الجميلة قوى كنا فى لحظة نقرر هنسافر اسكندرية خلال دقائق الشنطة الهاند باج الخفيفة و على طول على اسكندرية نلاقى فندق او شقة مش مشكلة نبات على البحر لا يفرق
دلوقتى الاستعداد قبلها بشهر و الشنط مش عايز اقولك قد ايه

تحياتى

شيرين سامي يقول...

سواح في ملك الله: شكراً يا سواح ربنا يخليك و يحفظك
تحياتي الخالصه لك

شيرين سامي يقول...

منى أبو السعود:ههههه فعلاً كلنا هذه المرأه بس يارب حتى نعرف نلاقي وقت زي ده نسرقه و لو مره كل أسبوع.
هقولك على النادي و يا ريت نتقابل و نتمشى مع بعض أكيد دي حاجه تسعدني جداً و هنضحك كتير لأن واضح ان بنا حاجات مشتركه :)
تحياتي لأجمل منى مش محتاجه أقولك تعليقك بيفرحني ازاي

شيرين سامي يقول...

Casper: عندك حق يا أسامه و عشان كده كتبت البوست :)
تحياتي و احترامي ليك

شيرين سامي يقول...

مصطفى سيف: شكراً على الدعوه الجميله و سعيده جداً بمتابعتك
تحياتي و تقديري لك

شيرين سامي يقول...

ENG./ELSAYED,PMP: متشكره بجد و سعيده جداً انك متابعني يا رب دائماً منورني
تحياتي الخالصه لك

شيرين سامي يقول...

بنوتة مصرية: شكراً يا جميل على تعليقك الرقيق و زيارتك الحلوه
سعيده جداً انك بتنوريني
تحياتي و كل الود لكي

شيرين سامي يقول...

FAW: شكراً يا مصطفى ربنا يخليك على فكره الكلام ده من سنوات دلوقتي آمن كبر و جوري هي اللي مكانه و أنا ساعات مببقاش لاقيه نفسي :)
تحياتي ليك
نورتني

شيرين سامي يقول...

ماجد القاضي: و عليكم السلام أستاذ ماجد سعيده انك قريت البوست اللي فات مع علمي انك لا تستهويك الأشعار بس واضح ان فكرتك عن سني غلط خالص :)

موقفك مع زوجتك موقف رائع و ياريت كل الأزواج يتيحوا الفرصه لزوجاتهم انهم يقضوا وقت بعيد عن روتين البيت لأن ده هيفيدهم هما أولاً.
تحياتي و كل الاحترام لك

شيرين سامي يقول...

قهوة بالفانيليا - شيماء علي: الله يخليكي يا شيماء البوسه وصلت :)و الطاقه الايجابيه محتاجه تزيد
زيارتك غاليه عندي جداً
أرق تحية لكي

شيرين سامي يقول...

Ms Venus: متعتذريش يا فينوس عشان أنا كمان مقصره مع الجميع و لازم كلنا نراعي ظروف بعض
سعيده جداً ان القصقوصه دي عجبتك و مستنياكي دائماً
أجمل ورده لأرق فينوس

شيرين سامي يقول...

الحسينى: كويس انك بتطبق ده عشان الحياه محتاجه كده و أكتر من كتر الضغوط.
يا رب دائماً منورني و شكراً على التعليق الجميل
تحياتي الخالصه

شيرين سامي يقول...

نيلي: المدونه نورت بزيارتك الغاليه بجد و ألف ألف مبروك على الخبر الجميل هدعيلك يا حبيبتي و ربنا يفرحك عن قريب.
سعيده ان البوست عجبك و استمتعي مش ضروري بالقهوه لكن حتى و لو بالنوم أو الهدوء:)
تحياتي و كل الود لكي

شيرين سامي يقول...

دعاء العطار: ظيارتك هي اللي بتمتعني و تفرحني شكراً يا دودو
أرق تحيه ليكي

شيرين سامي يقول...

ماما زيزي: الشكر ليكي على تشجيعك ليه و تعليقك اللي بستناه.
تحياتي و تقديري لكي

شيرين سامي يقول...

reemaas: هو إسم جديد فعلاً مبسوطه انه عجبك و نفسي أستمتع بالأجازه بس بحسها علقه :)
شكراً يا جميل على تعليقك الحلو
تحياتي و حبي لكي

شيرين سامي يقول...

ريــــمــــاس: الرقيقه دائماً تسعيديني بتعليقك الجميل شكراً على ذوقك و آمن هو من الأمان.
تحياتي العطره لكي و لأولاد اخوتك الحلوين

شيرين سامي يقول...

rack-yourminds: شكراً على الدعوه الحلوه و في إنتظارك دائماً
تحياتي الخالصه

شيرين سامي يقول...

ابراهيم رزق: شكراً جداً على ذوق حضرتك و تعليقك الحلو و دعوتك الأحلى .
و كمان لما بنسافر لازم نكون ناسينن حاجه أو اتنين على الأقل :)
المهم الواحد يحاول يختلي بنفسه أو يخرج مع أصحابه و لو مره في الشهر عشان نعرف نواصل.
تحياتي لحضرتك و منورني دائماً

mostafa gazar يقول...

ربنا يخلى اّمن ويبارك فيه....وربنا يوفقك دئما ويجعل كل لحظاتك سعاده وفرحه