الأربعاء، 4 يوليو 2012

عن التدوين و عنّي

الصورة من حفلة توقيع كتاب بنكهة مصر بمكتبة (أ)
أصدقائي 

يمكن كتبت الكلام ده على الإيفنت بس عايزه أعيده هنا تاني .. قد إيه أنا سعيده بحدث التدوين اليومي و الزخم اللي عمله من تدوينات متنوعه رائعه و مدونين جدد..يمكن أكون مقدرتش أتعرف عليهم كلهم بسبب ضيق وقتي الشديد سامحوني لكن أكيد هتعرف عليهم ولو بعد الحدث..كمان عايزه أشكر كل اللي عملوا مجهود في تنظيم تجميع التدوينات في روابط حسب اليوم و كمان في إختيار التدوينه الـ 15 عشان تكون موحده و نجاوب عن نفس الأسئله جميعاً..شكراً بجد و إتشرفت بيكم جداً.


نبدأ حل الأسئله..


1-عرّف نفسك؟


شيرين سامي..صيدلانية بالنهار..مدوّنه و كاتبه بالليل..طفلة أحياناً و..أم طول الوقت :)


2-ما أكثر ما يميّز شخصيتك؟


ممممم يمكن البساطه بكره التعقيد جداً..متوتره حبتين و جايز أكون متناقضه أو مختله شوية و غلسه أحياناً :) 


3-ما هي أهم نقطة تحول في حياتك؟


كتيييير بس أهم واحده..يوم أن أصبحت أم.. حياتي تحولت بشكل كبير.


4-كيف دخلت إلى عالم التدوين؟


سمعت عن التدوين من خلال كتب عايزة أتجوز و رز باللبن لشخصين..كنت متردده لكن أخويا حسم الموضوع لما أنشأها وبعتهالي على الـ e-mail من أمريكا حيث يقيم .. وبدأ السحر :)


5-ما إسم مدونتك و لماذا إخترته؟


حدوتة مصرية..بعيداً عن عشقي لأغاني محمد منير..حدوتة عشان بحب أحكي حواديت من خلال قصة, شعر, خاطره كلها حواديت صغيره, و مصرية عشان كل أنهاري بتصب في مصر..و كل حواديتي عن أهلها..حتى كتابي إخترت إسمه "بنكهة مصر" هي في دمي مـ الآخر :)


6-صف مدونتك؟


مدونتي هي بيتي..هي كراستي الكبيره اللي بكتب فيها و بيشاركني قراءتها كل أنواع البشر..بدل ما كنت بكتب لنفسي..
مالهاش تصنيف محدد هي مدونة بشريه..غاضبه, حالمه, عاشقه, كارهه, تعبه, فرِحه..
أنا يمكن عامله تصنيفات على الجنب عشان كل بوست يكون في محله.


7-من هم أكثر ثلاث شخصيات أثّرو بك من عالم التدوين و من خارجه؟


-د.ستيته حسب الله الحمش صاحبة مدونة "مش عارفه بس نفسي أعرف" للأسف هي مقلّه دلوقتي لكن كان لها أكبر تأثير علي من ساعة ما دخلت عالم التدوين..إنسانه جاده و ساخره..رومانسية أحياناً..عفوية جداً..كتاباتها رااائعه كانت بتشغل مراوح في عقلي..بإختصار هي مميزه و مش زي أي حد.


-فاتيما صاحبة مدونة روح قلب ماما..أول ما بدأت أدوّن خبطت في مدونتها و لقيت كلام بمنتهى الحب عن مدونين في يوم تجمع تدويني..قلت هو في حاجه كده؟ جايز تكون مجاملات أو مبالغة..لحد ما تابعتها و لقيتها فعلاً إنسانه في منتهى الحناااان و الطيبه و كاتبه في منتهى الإحساس, بتأثر أوي بأي حاجه بتكتبها حتى لو كلمتين..كان لي شرف التعرف عليها و حضرت معظم حفلاتي بجد حسيت قد إيه هي فعلاً روح قلب الملائكه زي ما بيسميها أ.إبراهيم و بكون معاها مطمّنه كأنها معرفة سنين..


-أ.إبراهيم رزق صاحب مدونة سالسيوزياد..هو دائماً زي ما بحب أقوله سندي في عالم البلوجر :) بصرف النظر عن كونه دائم السؤال عني و متابعتي و نصحي و مساندتي و حضر كللل حفلاتي و كان واقف جنبي في مواقف كتير كأخ حقيقي, لكن كمان كتاباته أثرت في و خليتني أتذوق الأدب الساخر اللي ماكنتش بحبه..و مدونته بالنسبة لي هي وقفة راحه وسط تعب اليوم..


و مدونين تانيين كتيييير أثرو في زي مصطفى سيف صديقي الدمث و أخي و زميلي, أ.يوسف أبي الروحي في التدوين,  أ.ماجد القاضي و تشجيعه الدائم..آخر أوراق الخريف نوران..رامي و قلبه الطيب..شمس النهار الرائعه بتواصلها الدائم..رحاب صالح هبه فاروق, نيسان و كتيييير بجد لو كتبتهم كلهم بتأثيرهم علي هاخد كتاب..


8-ما هي طقوسك الخاصة عند الكتابة؟


مممم زمان كان القلم الرصاص و الكشكول و أكتب و أناعلى سريري في أي وقت :)
دلوقتي اللابتوب على رجلي و صوابعي نازله تنقير من غير ما أراجع أو أفكر في الغالب..و عادة بكتب متأخر بعد ما التتار يناموا :)


9-ما هو الأسلوب المفضّل لديك في التدوين؟


في التدوين بحب أكتب بعشوائيه من غير ترتيب و بحب أحكي مواقف بسيطه من وجهة نظري و بإحساسي.


10-في رأيك ما أهم ما يميز تدويناتك؟


المفروض إنتم اللي تقولوا..بس قد تكون touching ده يمكن أكتر تعليق إتكتبلي و سمعته..إني بلمس شئ من جوا اللي بيقرالي..


11-ماهو تقيمك لعالم التدوين في الفترة الأخيرة؟


قبل حدث التدوين اليومي كنت فاكره الناس بطّلت تدوّن لأن بالفعل كتييير من المدونين القدامى هجروا مدوناتهم..و أنا كنت في طريقي..لكن بعد الحدث إكتشفت إن كل الأحداث و المجريات مش هتقدر تطفي شمس الكتابه..و المدونات أصبحت أكتر و كتير منهم متميزين بجد..يمكن العدد الكبير خلانا نفتقد جزئية إن كلنا نبقى عارفين بعض و منفوتش بوست لبعض و نتنناقش في كل بوست..لكن أتوقع هيكون في دواير مستقله و العجله هتستمر..


12-إختر أقرب تدويناتك لنفسك و ضع رابطها و حدثنا عنها.


كلهم ولاااادي :) يعني بجد صعب أختار واحده بس..لأنهم أكتر من 250 تدوينه لكن ممكن أختار بعضهم
تحت تصنيف كلام عني...لازلت أنا و أرجوك لا تؤذيني..هما أنا بإختصار.
تحت تصنيف كلام جوايا...ببساطه و أنا لست ملاكاً و لست ببشر..
تحت تصنيف قصة قصيرة...لأنك لم تفهم سر الحمام..لأنها مكتوبة بالوجع..
تحت تصنيف خواطر..ستبقى و كرقصة تانغو..
تحت تصنيف قصاقيص من حياتنا..الأول على قلبي و تالته تالت..
تحت تصنيف ب ح ب ك..كلهم :) بس أكتر واحده..نوبات..


كفاية عليكم كده :)


13-إستعرض أهم المواقف الغريبة أو الطريفه التي صادفتك مع التدوين؟


في قصة معطف من القيود..و القصة دي عايزه بوست لوحده عشان أتكلم عن تابعتها..أول ما نشرتها المدوّن العزيز مصطفى سيف كتب تعليق رااائع و كان في جمله مميزه جداً..المهم كل اللي كتبوا تعليقات بعديه حوالي 20 تعليق كتبوا نفس الجمله و قالولي إنها أكتر جمله عجبتهم في القصة..و هي مش في القصة أساساً :)) طبعاً لأني غلسه نزلت بوست بعديه بساعات و قلتلهم أنا مش عايزه حد يجي يدي التمام في المدونه و يمضي حضور أنا عايزه حد يكون قرى بجد و بتركيز و مش هزعل من اللي معلقش بالعكس هحترم ظروفه و إنشغاله أو حتى عدم إعجابه بالقصة لكن مش هحترم إن التعليق يكون أداء واجب..


عموماً مبحبش المجامله الزياده حد النفاق في التدوين و مبحبش التظاهر بشخصية غير الحقيقية يعني كاتبه تكون مبتكتبش غير تدوينات دينيه و هي مقضياها شات و على الخاص! خليك نفسك بكل ما فيك حتى لو زفت..إعذروا صراحتي..


مبحبش "غير المعرف" يمكن ماكنتش عامله التعليق عندي بغير معرف عن غير قصد و في يوم إكتشفته و قلت أجرب..لقيت حد أو حده غالباً كتبالي إنها فرحانه إني هقفل المدونه و إني ريحتها..قفلت الغير معرف تاني لسبب واحد..أنا مبشرفش على التعليقات بعرضها فوراً كمان إكتب تعليقك من حسابك لو عندك الجرأة..ده غير إني سمعت من مدونه صديقه إن بيجلها تعليقات على الغير معرف معاكسات و طلبلت جواز ساعات..حاجه فاشله بجد..طب خلي عندك دم و قول إنت مين..خلاص كفاية كده :)


14-هل أحداث التدوين تأثر عليك و كيف؟


أكيد زي أي مجتمع بنتشارك في الأفراح و الأحزان.


15-إختر أي مدوّن و وجه له سؤال؟


مممم هختار كل المدونين المتغيبين و هقولهم..هترجعوا إمتى؟


أكيد طولت عليكم بعتذر و أتمنى يدوم التواصل و الود و تحققوا كل أحلامكم و أمانيكم..

هناك 32 تعليقًا:

مفكر حكيم يقول...

واخيرا عرفتك حق المعرفه
شكرا على الدعوه اللى جمعتنا
وشكرا لصاحب الفكره لليوم 15
وشكرا ليكى لانك وصفتى نفسك بكل سهوله
(انتى ان قدر الاله مماتكى لن ترين المدونين يرفعوا الرأس بعدك)

Aya Mohamed يقول...

فرحانة جداااا انى اتعرفت عليكى
مش عارفة اقولك قد ايه
مبسوطة جدا ان فكرة اليوم ال 15 عجبتك
وعجبتك مدونين كتير كدا
واجاباتك عسل زيك بالظبط
ربنا يوفقك ويسعدك دايما يارب

الازهرى يقول...

صدقينى لما أقول لك إن فكرة التدوين اليومى
كانت من أروع الأفكار اللى قابلتها خلال 2012 فى 2011 كت فى متاهة و2010 لو كان فى كنت فى الجيش

وبصراحة كنت مش واثق إنى هأشارك
بس لما قفلت حساب الفيس ورجعت للمدونة لقيت نفسى باكتب بزيادة

أهم حاجة فى حدوتة مصرية اللى بأتابعها من زمان على فكرة حتى لو بدون تعليق

إنها بسييييييييييييييييطة
وأنا بأكره التكلف

بجد شكرا كمان مرة على الفكرة الجميلة

تحياتى وخالص مودتى

كريمة سندي يقول...

ما أجمل أن نتعرف على عمق شخصيتك الرائعة سعدت بما قرأته هنا لكي كل الود والتقدير غاليتي

ليلى الصباحى.. lolocat يقول...

كان لى حظ كبير ان تعرفت عليك مع بداياتى فى التدوين
انسانة رقيقة وبسيطة وجميلة
اتشرف بمتابعتك دايما ياشيرين


اسأل الله لى ولك كل فلاح وتوفيق ونجاح
دمت بود وسعادة حبيبتى

shreif elsaftty يقول...

رائع جدا ربنا يوفقك يارب ويسعدك وتشوفي اولادك احسن ناس في الدنيا

مصطفى سيف الدين يقول...

يا لهوي يا شيرين انتي لسه شايلة من يوم التعليق ده بتاع المعطف
طيب هاقولك حاجة يومها بعد ما قريت القصة بدأت اكتب التعليق ده كتبت الجملة و حد اتضل بيا و اضطريت انزل ففصلت من تعليقي و معرفتش كنت ايه اللي باكتبه بعد الجملة دي قلتلك شكرا و اعتمدت المشاركةو بس بعدها قلت ابص على التعليق بتاعي اللي مش كامل لافاجىء بالمنظر بصراحة انا اللي حسيت بالحرج :)

عايز اقولك شكرا اد السماء على اصرارك على الحملة دي السنادي بصراحة مكنتش ناوي اشارك و مكنتش جاهز بس اصرارك على اننا نتلم تاني هو اللي خلاني مكونش انا السبب في اننا نتفرق و رغم اني مش مجهز حاجة بس بكتب يوم بيوم و ده صعب جدا
شكرا يا دكتورة ربنا يخليكي لينا

Tamer Nabil Moussa يقول...

سطور جميلة




تسلم ايدك

وربنا يوفقك ويكرمك



مع خالص تحياتى

ريـــمـــاس يقول...

صباح الغاردينيا شيري
اممم بجد النهردة حاسة بسعادة وانا داخله وخارجة من المدونات هههه هوا صحيح عيوني زغللت وتعبانه شويا لكن بجد متعة أني أتعرف عليكم أكتر رغم أنه كل شخص عشت معاه حروفه ولمس حروفي بقيت أعرف جزء منه النهردة بشوف شيري على طبيعتها أكتر رغم أنك دايماً طبيعيه وعفوية وكل الي ذكرتيهم بجد بعتز بيهم فاتيما روح قلب ماما تعرفت عليها متأخر بس بجد كنت بحبها من زمان من كلام أستاذ ابراهيم عنها أما عن ابوزياد هو بجد أخ حنين على الجميع وأنا بجد ببقى مبتسمة من قلبي في مدونتة وببقى طايره وحالمة في مدونتك :)
بتمنالك كل السعادة يارب في حياتك الخاصة وفي حياتك بيننا ولايحرمنا جمال إحساسك ويخليلك التتار هههههه "
؛؛
؛
لروحك عبق الغاردينيا
كانت هنا
reemaas

Red Rose يقول...

إجاباتك تتناسب مع شخصيتك الرومانسيه الصريحة الواضحه في كتابتك أتمني ان أتعرف عليكي اكتر كل يوم. تحياتي

ابراهيم رزق يقول...

ملاك التدوين
و اختى العزيزة

بجد و الله العظيم مش عارف اعلق و لا اكتب كلمة
بس اللى انتى قلتيه ده كتير عليا

تحياتى

Red Rose يقول...

انا جاوبت كل حاجه و يارب أجيب نمر حلوه

ظلالي البيضاء يقول...

دخلت المدونة وخرجت عدة مرات وأنا معقود اللسان لا أعرف ما أخطه هنا ..
عندي احساس بالاكتئاب قليلاً ..
لأنني وجدت أن كل من حولي في عالم التدوين رائعون ..
وأنني أقلهم روعةً ..
لا أعرف لهذا الشعور سبباً .. إلا أنه كذلك ..
دمت بخير وعافية دكتورة شيرين ..

rona ali يقول...

بيجد جميله
موقف معطف من القيود دة ضحكنى جدا
انا كمان بكرهه كده
لاننا مش بنجبر حد يعلق عندنا
طالما جيت اهتم مش تنافق

ومبسوطه انى عرفت شخصيتك اكتر ولو ان كل اللى كاتبه انا بحسه في كتاباتك بالفعل وفي طريقه كلامك في اى مكان

:))) ربنا يكرمك ويوفقك دايما

Deyaa Ezzat يقول...

أحب هنا أوجهلك الشكر مرة تانية على فكرة الحدث

ويارب دايما مبسوطة وناجحة حياتك الأسرية والعملية

أحمد أحمد صالح يقول...

سعيد بما عرفته عنك وان كنت عرفتك من خلال كتابك بنكهة مصر و من خلال تدويناتك، لأنك زي ما قلتي كلهم ولادك !!
..
دايما بالتوفيق بإذن الله، كل السعادة و النجاح و التألق..تحياتي

فاتيما يقول...

انا اسمى مكتوب تانى :)
انشالله يخليكوا ليا

بصى
انا ببصم بالعشرة على كل اجاباتك
خصوصا فيما يختص بالاشخاص اللى كتبتى اسمى 0ولى ان اتفشخر) وسطهم واللى انتى ملحقتيش تعرفيهم عشان كان فيه ناس حلوة كتير اول انا ما دخلت التدوين بس للأسف هجروا المكان ..
وبدعو معاكى انهم يرجعوا

يا ريت


وانا دايما اقول ان كل واحد
مدونته شبهه
وانتى شبه مدونتك
انتى الناعمة الرقيقة الرومانسية الهادية وجواكى بركان ..
بس لما بتنفجرى بيكون انفجار ناعم
ف شكل ابداع و بيطلع جواهر ومكنونات كلها رقة
لأن دى طبيعتك ...

انتى زى ما قولتلك زمان
قارورة عطر المدونات يا شوشو
انتى هادية صحيح
بس ليكى عبير وشذى
وجمال طبيعى لا يخطئه القلب
جايز مش بتعملى صخب كبير ف المكان
لكن محسوس وظاهر
زى العطر لما يتضوع ف لحظات
فيسيب ذكرى حلوة


ربنا يديم الود
وتفضلى وسطنا هنا
والتاج جميل وكل ما حد يحطه على راسه
ينور ويلالى اكتر
وانتى تحديدا لما لبستيه
خليتله ريحة احلى من منظره كمان


خالص حبى ليكى يا حبيبتى
ومن تألف لتألق يا رب

السيد الحسيسى يقول...

تحيتى لك شيرين

re7ab.sale7 يقول...

يا مساء البنفسج علي احلي شيرين
والله يا شيرين الحب مش بيشتريه الناس
واذا كان اكتر من شخص متفقين علي حب شخص معين يبقي ده شيء رباني مش حد شاريه
انت كدة حبيتك لما دخلت مدونتك
ودخلتي قلبي علي طول
لما شوفتك افتكرت مقولة الاذن تعشق قبل العين احيانا
انت محبوبة جدا من كل اللي عرفوكي واللي معرفوكيش
ربنا يحبب فيك كل الناس
وانا بحبك اووي
ومش عارفة اكتب حاجة
بس عندي تعليق عي معطف من قيود انت بجد ابدعتي فيها وخليتينا نبدع
دمت مبدعة عزيزتي

Salma Hesham Fathey يقول...

تعريف جميل وبسيط بشخصية محترمة

تحياتي لكِ

eng_semsem يقول...

احلى حاجه في عالم التدوين انه قرب الافكار وبيخلينا نحكم على الجوهر مش المظهر عشان كده انا شخصيا وبحترمك وبقدرك من بداية دخولي لعالم التدوين
وتستحقي شكر كبير على حملة التدوين اللي شجعتنا جدا
دومتي بخير

أبو حميد يقول...

نفسى أرجع أدون تانى فعلاً
وما الدنيا إلا عجلة إنتاج كبيييييييييييييرة

أبو حميد يقول...
أزال المؤلف هذا التعليق.
أبو حميد يقول...

بصراحة بعد ما شوفت المدونين العظام اللى زى حضرتك بقيت مكسوف أدون تانى وأهفلط بأى كلام زى زمان

Sara يقول...

أول مرة أعرفك بالقرب دا يا شيرين :)

بالتوفيق دومـًا :)

Menna يقول...

النهاردة يوم مميز فعلا اني عرفت ناس كتير كلامهم كان بيحركني و مش كان عندي اي معلومات عنهم خالص
ده شئ فرحني
بس الاكيد بقى اني حبيتهم اكتر
و انتي اكيد اول الناس اللي حبيتها اوي الصراحة من ساعة ما بدات اقرالك يا رب ديما بخير و ممتعانا بكلماتك الجميلة و بوسيلي التتار بقى ربنا يخليهملك و يفرحك بيهم :)

نيسآان يقول...

البساطه , الامومه , العفويه , بكتب احساسي ...حترجعوا ايمتى ؟؟؟
تفاصيل كثيره تجمعنا يا ست الستات.
وانا بشكرك من كل قلبي على الايفنت ودعوتك اللي رجعت لي حماسي للتدوين...مع اني بزوّغ كتير لاني مضغوطه كتير بسبب اجازة الاولاد وكمان ما بحبش أغصب نفسي عالكتابه الا لما تيجي الفكره اللي تخبطني وتكتّبني غصب عني هههههههههههه .
وشكر حار جداً عشان افتكرتيني :))ويا رب اكون عند حسن ظنك على طول يا رب.

mostafa gazar يقول...

:-)

private notes يقول...

متميزة شيرين
بسيطة و عفوية و ينبض بكِ القلب ♥
تحياتى

شيرين سامي يقول...

أصدقائي

بجد عايزه أشكركم على كلامكم و إحساسكم و تشجيعكم الدائم و مش عارفه أقول إيه إنتم أكيد أكتر ما أعتز بيه في التدوين :)

مفكر حكيم ربنا يخليك أشكرك بجد

أيه بشكرك على الفكره و سعيده بتعرفي عليكم

الأزهري :) أسعدني تعليقك و أتمنى أكون دائماً عند حسن ظنك

كريمه سندي أشكرك و دمتي متابعه عزيزه :)

لولو ربنا يخليكي إنتِ أكتر من أخت و أجمل من تعرفت عليه في عالم التدوين :)

شريف أشكرك و نورتني :)

مصطفى سيف ربنا يخليك يا مصطفى التدوين اليومي مكانش هيبقى له لازمه من غير كتابتكم و إنت تحديداً دمت أخ فاضل عزيز :)

تامر نبيل أشكرك و نورتني :)

ريماس أنا كمان مبسوطه بالحاله دي أوي و مبسوطه أكتر إنك دائماً بتنثري عطرك بين كلماتي :)

ريد روز شكراً يا جميل نورتيني :)

إبراهيم رزق مش كتير ولا حاجه بالعكس دمت لي و لكل المدونين السند و الأخ الرائع :)


محمد الذهبي ليه الإحساس الغريب ده خلي عندك ثقه بتميزك كل مدون أو إنسان و له الجانب الرائع بتاعه.

رونا شكراً يا رونا و سعيده بتواجدك الرائع :)

ضياء عزت أشكرك و نورتني يا فاندم :)

أحمد أحمد صالح مبسوطه بزارتك و تعليقك يا رب دائماً منورني :)

أنا مش قد كلامك الحلو ده يا فاتيما أحرجتيني و الله ربنا يخليكي ليه و للبلوجر كله:)

سيد الحسيسي أشكر زيارتك

رحاب صالح و أنا كمان بحبك و بحب كلامك و عفويتك و كتاباتك و كل شئ دمتي أخت و صديقه أعتز بها :)

سلمى هشام شكراً يا سلمى نورتيني كتير :)

أسامه سعيده بوجودك يا اسامه دمت أخ عزيز :)

أبو حميد هلفط يا عم دي أجمل حاجه الكلام اللي بيتكتب كده بعفويه و بعدين مين قال إن التدوين أدب وبس التدوين هو العشوائيه نفسها :)

ساره ربنا يخليكي يا ساره نورتيني :)

منه أنا كمان سعيده بالتعرف عليكي و حبيت مدونتك جداً يمكن عشان بحب الفراوله :)

نيسان أكيج إحنا مشتركين مع بعض في حاجات كتير و أكيد تأثرت بأسلوبك و إحساسك و بحب مدونتك جداً دمتي لي صديقه جميله أعتز بها جداً :)

بريفت نوتس شكراً يا جميل بجد سعيده بمعرفتك :)

شرفتوني و أسعدتوني جميعاً بجد

تحياتي و كل الود لكم

شيرين سامي يقول...

مصطفى جزر أشكرك يا متابعي العزيز سقطت سهواً من التعليق اللي فات
يالله لك نصيب في تعليق لوحد :))

Amira Ahmed يقول...

مبسوطة اووووووووووى انى اتعرفت عليكى
ومبسوطة اكتر من بساطتك فى كلماتك وطريقة تعبيرك
وبشكرك اكتر على دعوتك لحملة التدوين
اللى عرفتنا على بعض
وعلى مدونات رائعة
تحياتى لمزيد من التقدم والابداع