الخميس، 12 يوليو 2012

لا تحزن إن الله معنا


أحبك ربي
أحب كرمك و عفوك و حكمتك 
و أصبر بحبي لك على إبتلاءك
و أطمع بكل ما في كثيراً في رحمتك

*************

على الهامش

بالصدفة البحته تعثرت بتدوينة منشورة من يومين تشبه كتير تدوينه كتبتها أنا من سنتين أول ما بدأت تدوين
هي مش بس تشبهها في الفكرة لكن في مقاطع بالكامل منقوله من تدوينتي..
الغريب إن المدوّنه اللي كتبت التدوينه دي بتكتب حلو جداً و كنت بتابعها أحياناً حتى لو مبعلّقش
بس بعد الحركة دي بقيت بشك إن كل اللي هي كتباه بقلمها فعلاً !
مش عيب أكيد إننا نتأثر بكتابة حد أو نكرر فكرة بأسلوبنا..لكن أنا إستغربت نقل المقطع بالكامل من تدوينتي
الأغرب بقى إن تدوينتي حاجه كده بسيطه جداً مفيهاش حاجه تغري بالنقل !
بيقولوا لو سرقت إسرق جمل 
مش إسرق شيرين سامي :)

التدوينه إسمها "حنين غريب"



هناك 29 تعليقًا:

سواح في ملك اللــــــــــــــــــه- يقول...

مش عارف اقول ايه

بس ده دليل انك انتي مبدعة

وجواهرك تغري بالسرقة

تحيتي

shreif elsaftty يقول...

لا بصراحه كلاماتك رائعه وفيها ابداع يعني يطمع فيها
بس حقيقة انا ماشي بمبدأ اني لو هكتب اي كلام بس يكون انا اللى كتبه احسن ماانقل شعر وحكم فلاسفه لاني كده بغش نفسي قبل الناس ولو قدرت اضحك على كل الناس بعض الوقت مش هقدر اضحك على بعض الناس كل الوقت
وعشان كده برده حاطط عندي في المدونه كود ميسمحش لحد انه ينسخ او يحدد على الكلام "قال يعني من جمال اللى بكتبه"
بس برده اي كان اللى الواحد بيكتبه بيبقى شي خاص بيه وقريب منه مينفعش حد يجي ياخده وينسبه لنفسه كأن حد بيخطف حد من ولادك ويقول ده ابني
دمتي لنا مبدعه يادكتوره شيرين وده ان دل فانما يدل ع انك مبدعه

عمرو يسرى يقول...

ماهو عشان لو سرقت اسرق جمل كان لازم اللى هيفكر يسرق ابداع هيسرق د/ شرين سامى
وفى الاول فى الاخر اللى يسرق فكر حد مش هيقدر يستمر بعد كده اصلا وهيوقع
تحياتى

الازهرى يقول...

فكرتينى من سنتن فى حد اخد بداية خواطر من عندى وكمل عليها

أنا بطيعتى مش بأدور على حاجة انا كتبتها قبل كده
ومش بانتبه حتى لها
ولعبة اصحابى الاثيرة إنهم يجيبوا حاجة أنا كتبتها من فترة ويخلونى انقدها
ودايماباقع فيها

المهم واحد بعت لى بيقول فلان عمل كذا
قلت له مفيش مشكلة

وببعت له ميل فيه بقيتها بحيث يستبدلها باللى كمله هو علشان تكملته برلااحة كانت ركيكة جدا


سيبك
الكلام اللى مش نابع بصدق عمره ما بيوصل ولا بيكون أحسن أبدا

تحياتى دوما

Aya Mohamed يقول...

بحس ان لو حد اخد حاجة بتاعتك
وربنا عرفك ولو عن طريق الصدفة
ده معناه ان ربنا بيحبك مش عايز يضيع حقك
انتى مبدعة وتستاهلى تتسرقى
بس يارب ما يحصل كدا تانى ابدا :))

مصطفى سيف الدين يقول...

المفروض يا شيرين كنتِ جبتي التدوينة التانية كمان علشان من حقنا نعرف مين هي
و من حقها علينا ننصحها
اصعب شيء انك تسرق افكار و عواطف و احساس انسان
بس انتِ بصراحة تستاهلي تتسرقي :)
علشان انتِ مبدعة بجد
تحياتي

amina يقول...

هههههههه تصدقي عرفت قصدك مين..اصلي قريت بوستها واول ماقريت بوستك لقيته هوا هوا..
بس الصيني عمره مايبقى الاصل...
:)

زينة زيدان يقول...

أتمنى شيرين لو تضعي رابط تلك المدونة للتعامل مع الموضوع بالشكل الملائم
وحتى يكون هناك تعامل عام من قبل الجميع مع تلك الحالات
كما أنها هي نفسها لم تخجل من فعلتها
فكيف تخجلين أنتِ من فضح أمرها؟؟
يجب التعامل مع الأمر بشكل علني وجماعي
حتى نستطيع تحجيم تلك الحالات التي هي للأسف بزدياد ..
وهذا الأمر يمر بكِ اليوم وربما في الغد بأحد آخر.. إذن الأمر يخصنا جميعا ..

أكرر طلبي بأن تضعي رابط تلك التدوينة هنا لنتعامل مع الأمر بعقلانية وجدية تتناسب مع الموقف

Bent Men ElZman Da !! يقول...

المفروض كنتى نشرتى لينك المدونه دى كمان
عشان الواحد ياخد باله

بس ده دليل على ان كلامك مشجع على السرقه اصلا
ويعنى هو الجمل احسن من كلامك فى ايه يعنى :))

Angie يقول...

hard luck shereen :))

بس بصراحة التدوينة رائعة و ليها حق تسرأها ;)))

ابراهيم رزق يقول...

من هذا المنطلق

اتمنى ان تسيرى بحكمة امى
خلى اللى يشيل يشيل
الدنيا فيها
لكن الاخرة لا

ما يقرسنى فى هذا الموضوع ماذا يعيد على من يسرق

تحياتى

شمس النهار يقول...

اللي بيسرق تدوينة من عندك ده مش بيسرق جمل ده بيسرق غواصة
:)

لكن تقولي ايه في اللي بيسرق من عند شمس النهار
:))

بلاقي علي تويتر ناس ناشرة جمل من تدوينااااااااتي
اه ياتدويناتي
اقول ماشي مش مهم المهم الفكرة وصلت

سرقة الافكار والكلمات ده بقا عادي

لكن اطمني ماحدش هيعرف يسرق الروح
روحك في الكتابة
واعجابك بيها وبكتابتها
كده اتعرف
بتاخد من هنا ومن هنا
لو ركزتي هتلاقي الروح مختلفة في كتابتها

ميمي يقول...

مساء النور أستاذة شيرين
ده دليل على أنك كاتبة مبدعة وكتاباتك مميزة وجميلة انا بتعجبني اووي
نفسي الناس تبطل نقل من غير ما تذكر المصدر لأنها حاجة مستفزة جدااا
تحياتي
ميمي :))

هبة فاروق يقول...

بصى يا شيرى انتى رائعه وجميله وكتاباتك مميزه علشان كده أتسرقتى بس انا عارفه احساسك دلوقتى ان شىء منك أتسرق احساس يغيظ جداااا
انا اتعرضت لسرقه من النوع ده بس كان بوست كامل وفى اخر البوست كاتبه بقلم بلبله بصراحه مسكتش ودخلت المدونه بتاعتها وهددتها أنى حنزل الرابط لكل أصدقائى واكشف امرها بصراحه حذفت البوست بسرعه ودخلت وقالتلى أنها نشرت البوست علشان تشهر مدونتى ... طيب منين بتشهرى مدونتى ومنين كاتبه اسم تانى
الشعب يريد رابط المدونه دى وبسرعه يا شيرى علشان بجد عايزين مجهودنا نحافظ عليه من السرقه وعلشان كمان كل واحد يفكر الف مره قبل ما يسرق تعب غيره

شيرين سامي يقول...

سواح في ملك الله:

ربنا يخليك يا خالد
و لا جواهر و لا حاجه
دي مجامله منك أكيد

تحياتي لك

شيرين سامي يقول...

شريف:

شكراً يا شريف عى كلامك و أنا زيك بحب أكتب اي كلام بس يكون كلامي :)
أنا مبحبش الكود بتاع النسخ ده يشلني و يفضل كل شوية يطلعلي الرساله البايخه يحسسني إني حرميايه :)

شكراً تاني يا شريف و نورتني يا فاندم

شيرين سامي يقول...

عمرو يسري:

شكراً يا عمرو و الله أحرجتوني ماكنتش أقصد تقولولي لأ إنت مبدعه و هايله و كده..
و مش عايزه أظلمها قد تكون تأثرت أو أعجبت بالجمل..

نورتني كتير
تحياتي ليك

شيرين سامي يقول...

الأزهري:

ههههههه أنا زيك على فكرة بكبر دماغي بس مش عارفه ليه طلبت معايا غلاسه المره دي :)

شكراً على كلامك و متابعتك دائماً بتسعدني

نورتني يا فاندم

شيرين سامي يقول...

آيه محمد:

شكراً يا أيوش :)
بصي أنا مؤمنه عموماً إن ربنا بيحبني..الحمد لله
يا ستي و لا تحصل تاني..اللي بيعمل كده بيضر نفسه مبيضرنيش و أكيد بيبقى مكسوف من نفسه.

تحياتي ليكي

شيرين سامي يقول...

مصطفى سيف الدين:

إستحاله هحط الرابط أو أقول مين يا مصطفى..من ستر مسلماً في الدنيا ستره الله يوم القيامه.

أشكرك يا صديقي
بجد رأيك دائماً بيسعدني :)

تحياتي ليك

شيرين سامي يقول...

أمينه:

:)
هي كمان بتكتب حلو أنا متأكده بس خانها التصرف مش أكتر..

نورتيني و شكراً يا جميل

شيرين سامي يقول...

زينه زيدان:

صديقتي الجميله وحشتيني :)

مش هقدر يا زينه أكيد مش هحط الرابط و مش هحطها في الموقف ده..هي كانت مجرد قرصة ودن زي ما بيقولوا عشان تنتبه و متكررش التصرف ده..لكن إستحاله هأذيها بأي شكل..حتى لو ده منطق العقل..فأنا منطقي مختلف.

أرق تحية لكِ

شيرين سامي يقول...

بنت من الزمن ده:

ههههه عندك حق أكيد الجمل مش أحسن مني :)

نورتيني يا دندون

شيرين سامي يقول...

Angie:
:)
never mind
شكراً بجد مبسوطه إنها عجبتك :)

شيرين سامي يقول...

إبراهيم رزق:

فعلاً يا أ.إبراهيم مبيعودش عليه بحاجه
و مش هيقدر يطور من نفسه كمان

عموماً سعيده بزيارتك و سؤالك :)

نورتني

شيرين سامي يقول...

شمس النهار:

حلوه فكرة الغواصه دي :)

معلش يا شموسه إنتِ فكرتيني بـ د.ستيته مره بقولها إن حد سرق تدوينه ليها..ردت بإن المهم الفكرة توصل..بصراحة وجهة نظر تحترم و فيها إنكار للذات.

و بعدين كتاباتك في الجون طبعاً و لازم تتسرق.
بس محدش هيقدر يسرق الروح...كلام جميل و صحيح جداً :)

نورتيني و أسعدتيني بزيارتك

شيرين سامي يقول...

ميمي:

مساء النور يا ميمي
شكراً على كلامك الحلو :)
أتمنى أكون قده

أرق تحية لكِ

شيرين سامي يقول...

هبه فاروق:

ربنا يخليكي يا هبه يا صديقتي الجميله..هي حاجه تغيظ..بس مش عارفه ليه متغظتش أوي :)
بس إنت جدعه و برافو عليكي عشان خليتي البنت تمسح بوستك..دي بتستهبل تسرق قصة بحالها و تكدب كمان..
معلش أعذريني مش هقول هي مين للأسباب المذكوره في تعليقي على مصطفى و زينه..و أتمنى الناس تتعلم بجد و يحاولوا يكتبوا اللي جواهم و بس و أكيد هيكون أفضل عشان هتكون فيه روحهم بين السطور.

نورتيني

dodo, the honey يقول...

له له له !!
جمل مرة واحدة !
لم أكن لأصدق أن هناك أحدًا من لممكن أن يصل به التطفل إلى هذا الحدّ !
أقصد عليه أن يضع ما يدلل على أنه اقتطع من تدوينتكِ ..

لديك روحٌ عفوية لتقبل الأمر بهذه البساطة يا شيرين !
فاجأني أنكِ لا تظهرينَ هنا أيَّ غضب !
بل تعاملتِ معَ الامرِ ببساطةٍ كبيرةٍ جدًا ،
بساطةٍ أحييكِ عليها ،
فهي ما يفتقده البعض ..

أتمنى أن تنصحيها و لو بأن تعرضي لها تلك التدوينة يا صديقتي ..

دمتِ بخير و بدون " سرقة ! " ..

تحيآاتي لكِ ..