الاثنين، 2 يوليو، 2012

كل يوم شغل

التدوينه دي مختلفه شوية, فيها صور من واقع عملي حيث أقضي 7 ساعات يومياً..كنت عادة بحب الشغل و طول عمري كان نفسي أشتغل و أدوّر في صفحات الوظائف الخاليه..لكن والدي رفض أشتغل و أنا طالبه فإضطريت أستنى أول ما أتخرج و إشتغلت قبل ما النتيجه تطلع..في صيدليه ثم مستشفى ثم مركز معلومات الدواء..ثم صيدليه مره تانيه كمديره و أخيراً في الإدارة المركزية للصيادلة.


و حتى الهيئات زي المستشفى و الإدارة تنقلت بين أقسامهم, يعني جربت كل شغل الصيدله تقريباً ماعدا شركات الدواء لأني مقدرش و لا أحب أشتغل بليل, صحيح شغلي مُرهِق جداً و بعيد عن سكني جداً بس بحب طبيعته لو جنبنا كتير من الروتين, شغلي هو تسجيل الأدوية...طبعاً محدش فاهم يعني إيه :)
مش مهم





النيـــــــل...أجمل حاجه في شغلي إني بصبّح كل يوم على النيل و ساعات مطلعش الشغل على طول..أسمع أغنيه و أنا قصاد النيل الصبح بدري...لوحدي..








ده المنظر من شباك المكتب...جميل..بس مبفضاش أبُصّ منه كتير..




المكتب المنظم ده مكتبي :) أنا مرضيتش أظبطه, صورته كده بحاله بورقه بهمجيته :)
طبعاً هناك الفيس بوك مقفول و المدونه ممكن أدخلها خلسة..
و هقولكم على سر بس يا رب محدش من الشغل يقراه...هنا حيث أقضي نص وقتي سرحااااان :) بس عشان أنا مش هنصب على البلد..باخد شغل معايا البيت و أمري لله..



و ده جزء من ملفاتي عندي زيهم مرتين..نفسي أروح مره الشغل ألاقيهم ولعوا :)
و ده نفس الدولاب اللي بغنّي قدامه ساعات :) و ساعات كتير بقف سرحانه زي المجانين :)




ده بقى الكوريدور أو الطرقه اللي بتودي على المكاتب..أهميتها في الشبابيك..انا صورتها في لحظة نادره و هيه فاضيه لكن في الطبيعي الشبابيك بتكون مشغوله ببنات بيتكلموا في الموبايل..صف واحد كده..واحده مخطوبه بتحب..واحده متجوزه بتتخانق..أم بتملي جوزها طلبات البيت...و هكذا :)




ده الشباك اللي أنا بتكلم فيه...يمكن مش واضح لكن كله شخبطه بالقلم الجاف :)


كل ما بدخل الشغل بفتكر جملة عبد الفتاح القصري الخالده (هو كل يوم شغل شغل..هو إحنا مالناش شغل إلا نروح الشغل) :)
مبحبش في الشغل إني بكون مضطره عليه حتى و أنا تعبانه, جسدياً أو نفسياً, الأجازات صعبه و الشغل كتيييير, بس الحلو إنك بتلاقي ناس تصبّح عليك و تسأل عنك بالإكراه :)



كلهم عندي "يا جميل" ذاكرتي متستحملش تسلم و تنادي كل يوم على 100 إسم, لكن المضحك إني فـ مره بقول لزميله "باي يا جميل" لقيت زميل بيرد بكل ثقة "مع السلامة" من كتر الضحك بقيت بخبي نفسي من الناس :) و قررت أرجع أنده بالأسماء تاني..أو أقول كلام البنات الملزق اللي مبحبوش (يا توته..يا سكره..يا عثل..يا قمرايه..) يععععع مبحبش الكلام ده.


لكن مشكلتي مع الناس إني بكون كعادتي في عالم تاني (Day dreamer), منفصله عن كل شئ معظم الوقت, بالصدفه بعرف إن فلانه إتخطبت و علانه ولدت, بكون وسط 20 أو 30 حد لكن مع نفسي..مش قادره أسمع حكايتهم غير بوادني بس..أعترف إني مبقتش مستمعه جيده..يمكن لأن جوايا حكايات كتيييير و يمكن لأني فعلاً..تعبت. 

هناك 57 تعليقًا:

Deyaa Ezzat يقول...

حلوة الرحلة دي لعالم شغلك يا دكتورة

على أد إرهاق العمل (بمفهومه الكبير)وتعبه بس من غيره الانسان مالوش قيمة حقيقية

ربنا يعينك بقى D:

L.G. يقول...

كتبت تعليق واتمسح معلش
المهم التدوينة جميلة وفيها لحظات من حياتنا كلنا
انا بحب الشغل بس عشان كان بيخليني اشوف نور الشمس وابص على البحر والناس كل يوم لكن فعلا البطالة شبح بتخليك شبه الاموات لا بتشوف الشمس ولا بتتعامل مع ناس
النيل كره السكوت بيخرج من البيوت :) دمت بخير

الاحلام يقول...

ياااااااااااه على الروتين اليومى وياه على الى نشوف اليوم هنشوفه بكره وهو هو مش بيتغير حالات ملل الانسان عايشها كل يوم نفس الشباك ونفس الادراج ونفس الطرقه هى هى بتختلف الوانها ما بين هنا وهناك لكن هى هى
بس فيه اكيد اشياء ممتعه بتهون علينا حبنا للشغل والناس الى بتحبنا وبنحب نشوفها ونستمتع بالكلام معاه
شىء بيهون شىء والدنيا مستمره
تحياتى ابوداود

ابراهيم رزق يقول...

بدون تعليق

تحياتى

mostafa gazar يقول...

فعلا مش لاقى كلام أقوله .....تدوينه رائعه ....و شكرا جزبلا لكى لمشاركتنا هذه الأوقات ....أنا بحب جداا كل مكان اشتغلت فيه ودائما بيقا عندى عنه ذكريات جميله .....رائعه جدا الصور الموجوده و أسلوبك تلقائى وجميل ورائع .......ربنا يوفقك ويسعدك ويريح بالك:)

ليلى الصباحى.. lolocat يقول...

السلام عليكم

رحلة جميلة بالفعل ياشيرين وممتعة
صدقينى مش هتعرفى قيمة الشغل الا لما تسألى واحدة مثلى بيحصلها ملل من قلة الشغل هههههه

موفقة دايما ان شاء الله واستمتعنا برحلتك اليومية :)
تحياتى لك وتقديرى

دعاء العطار يقول...

كنت من 3 اسابيع بشتكي من الفراغ

حاليا بشتكي اني مش عارفه ادخل مدونتي وكل يوم اصحى الصبح اقول هو كل يوم شغل :(

بس عارفه مستمتعه بس المهم اني ارجع للتدوين تاني

وحشتيني :)

سندس يقول...

جميل اووي وانت بكتبي بتلقائية ياشيري

هبة فاروق يقول...

تصدقى عجبنى أوى مكتبك وشغلك شعرت انى عايزه اجى اقعد معاكى شويه
كتبتى حالتك وشغلك برقه كعادتك يا شيرى يا قمر

شمس النهار يقول...

:))

لطيف البوست
والنيل ده عشقي الاول
بحب سكوته ماشي كده في حاله من غير دوشه بهدلناه وهو برضوا وفي بيجي لحد عندنا تاني

:)

shreif elsaftty يقول...

دي لفه فعالم الدكتوره شيرين مش سمسم :D بس جميل ان مكتبك بيطل على النيل عشان لما تقفل معاكي خالص تقفي تشمي هوا وابقى ازرعي نعناع عند الشباك هيبقى حلو برده تدوينه رائعه جدا ومختلفه وفيه حب للمشاركه

Hanan w Haneen يقول...

حقيقي ضحكتيني وخلتيني ابتسم من قلبي :)) .. جميــلة اوي حكايتك دى .. وحلو موضوع الشباك ده .. واحدة متجوزة تتخانق وواحدة مخطوبة تحب .. واقع مؤلم :D :D

سندباد يقول...

اللي لفت نظري في البوست ده اخر حاجة
احيانا من كتر الضغط بنبقي مش عايزين ولا عارفين نتكلم
رحلة في عالم الصيدلة عرفنا بها بعض جوانب حياتك
تقبلي مروري

Red Rose يقول...

أنا مقتنعه تماماً بالمقوله بتاعة حب ماتعمل حتي تعمل ماتحب و عندي يقين تام أني اقدر اشتغل اي حاجه و أتعلم كل يوم شغلانه جديده مادام عقلي يستوعبها و عندي الصحه اللي بيها اقدر اشتغل.

و بحب الصيدلة عشان بأحس خريج الصيدله يقدر يشتغل حاجات كتير و كان الكليه دي بتاعة السبع صنايع والحمد لله البخت مش ضايع تحيز بقي لكليتي اللي كنت بحبها اكتر من شغلي الحالي برغم انه عالنيل برضه بس الكليه كان فيها احلي سنين العمر.
ربنا يقويكي علي ملفاتك و مكتبك
تحياتي

Red Rose يقول...

عزيزتي شيرين ممكن اطلب منك حاجه ؟ هاعتبر انك قلتي ممكن....
انا عجبتني أوي مدونة نطفته و حسيتها أوي و رديت عليكي بس واضح أني رضيت متأخر ولم تقراي كلامي ممكن ترجعيلها وتقريه ؟
عارفه كمان حبيت أوي مدونه باخاف لانها فعلا بتوصف حاله عندي حقيقي وكان نفسي أكتبلك تعليق بس قلت مش هتشوفيه لأني قريتها كالعادة متأخر و بسبب الشغل برضه.
شكرًا لسعة صدرك ووقتك

مصطفى سيف الدين يقول...

بصراحة اليوم اللي بروح فيه الادارة المركزية للصيادلة باكره فيه نفسي دايما زحمة جدا و الروتين بقى هات دمغة و هات مرق من وزارة الصحة و هات مش عارف ايه مشفتش روتين في حياتي زي اللي هناك :)
بس كويس اهوه خلاص لقينا ضهر هناك هههههههه

جميل انك تحبي شغلك
ربنا يسعدك دايما و يهنيكي

Salma Hesham Fathey يقول...

عزيزتي د. شيرين،

حلو قوي كلامك عن المكان والمنظر والناس ..

الشغل شيء مهم ف حياة الناس لإنه بيحدد حاجات كتير قوي وأظن إن أهم حاجة فيه الراحة النفسية للبشر وللمكان واللي من غيرها يكون العمل مستحيل.

بوست جميل وعميق والنيل عظيم .. المسطحات المائية ليها سحر خاص عشان كده الواحد يشتاق للبحر مع إنه بيشوفه م السنة للسنة :)

تسلم إيدك

عمرو يسرى يقول...

اول مره اشوف حد عاجبه الشغل بتاعه
بوست جميل
تحياتى

Ramy يقول...

بحب انا التدوينات دى

(:

كُنت مبتسم قوى و انا بقراه

.....

Bent Men ElZman Da !! يقول...

انتى جميله اوى يا شيرين بجد
مش عارفه هاقولك الكلام ده كام مره بس انا لازم اقولهولك بقى

ضحكتنى اوى حكايه كلام البنات يعععع دى ههههههه

كفايه ان الواحد يصبح على النيل مع اغنيه جميله كده الصبح

بصراحه انا بعمل زيك فى حكايه جميل دى لما مش بفتكر الاسم بس بتغاظ اوى بعد كده انى مش فاكراه

اجمل حاجه ان الواحد يصبح حكايته بودانه هو
عشان ودان الناس بقت بتسمع كلام دوشه كتير اوى :))

الازهرى يقول...

أنا بقى وفى أى شغل اشتغلته
يعرف عنى زمايلى موضوع السرحان بالذات
فى الإجتماع أكون فى عالم تانى

ممكن ششغال على اللاب فى إعداد مشروع جديد
وانا دماغى مش فى المنطقة أساسا

صحيح قليل بيعرف يكشفنى
بس لما باتكشف بيبقى الضحك للركب

يعنى مرة فى كان مديرى بيكلمنى على مشروع ضاع مننا وبنحاول نعدل فى جدول المواعيد علشان نقلل الخساير

وهو بيناقشنى وانا رديت عليه فى حاجة خاصة بمثرادس ملك من ملوك بونتس القديمة كنت مشغول وقتها إنى أقرأ عنه وعن بطولاته

وتخيلى بقى كمية التريقة والضحك والليلة اللى اتنصبت على دماغ سعادتى


بجد التدوينة خلتنى ضحكت كتيييييير
بعد يوم طويييييييييييل

rona ali يقول...

فضفضتك ليها تذوق اخر وخاص :)

اعتقد علي قد مافي حاجات حلوة بضحك في خبايا كده ورا السطور عن شخصيه شيرين الحاليه

عجبنى انك حسستينا كاننا معاكى ونقلك للي بيحصل خاصه الشبابيك بتاعت البنات والمتجوزين
والسرحان دة نعمه اة والله :)

معرفش هو المفترض البوست دة يكون بيبسط بس عندى احساس مختلف
يلا خير :))

انا مبسوطه انى جايت بقي ودة المهم مش كده ^_^

Angham Salah يقول...

جميل اوي كلامك يا شيرين
طلعتي زميله وكده :))
ربنا يوفقك
ويوفقني واشتغل بقي واعيش الاحاسيس دي
او يمكن تتغير :)
مبسوطه اني قريتلك اوي

eng_semsem يقول...

جميله تدوينتك وجميله رحلة الشغل وحلوه ملاحظة شباك الغرام والخناق هما كل البنات كده مش بيبطلوا كلام في التليفون ياما يحبوا ياما يتخانقوا مع اللي بيحبوه
تحياتي

richardCatheart يقول...

انا استمتعت جداااااااااا فى حاجات كنت متوقعها زى انك اكيد هتقفى اؤدام النيل وتغنى او تسمعى اغنيه هههههههههه وزى انك حد منفصل عن اللى حواليكى متواجده اه بس بنسبه حضور قليله

جميييييييييييييييييييل ومختلف يا شيرى

ظلالي البيضاء يقول...

دكتورتنا شيرين ..
إنت بالطريقة دي بتشجعينا نصور مكاتبنا ونتكلم عن أعمالنا فيها ..
طيب .. يا ستي يمكن في يوم من الأيام اعمل زي حضرتك ..

بالنتيجة أكيد أنا لو كنت في المكتب إياه كنت قلتللك : "مع السلامة" .. هههههههه

زينة زيدان يقول...

جولة جميلة لطيفة في عالمك
عالم صورتيه كما يبدو للناس وكما يبدو لكِ

أحب اسلوبك كأنكِ تسحبينا إلى هناك
وعجبتني جدا عبارتك " بكون بين 20 أو 30 حد بس مع نفسي"
فنحن نشعر بغربتنا ونحن يحفنا أناس كثر ونجد ألفتنا في الوحدة في تلك اللحظات التي نسترقها من زحمة الحياة ونختصها لذاتنا

تحيتي
على الهامش
" بدي وعد بس أجي المرة الجاية تخديني معك على شغلك.."
موافقة؟

اها
تمام بعرف راح توافقي
ميررررررررررررررسي أحلا شيري

وجع البنفسج يقول...

يا الله .. قديش اشتقت للشغل .. والبهدلة والصحيان بدري .. والعودة في عز الظهر .. نفسي ارجع ثاني للشغل والزحمة والملفات ومراجعات الناس .. ومناكفات زملاء العمل .. والقهوة المشتركة بين الصبايا في المكتب ..
وحكاوينا وقصصنا ونكتنا ..

كانت أيام .. اتمنى من كل قلبي أن تعود .. ولكن كله يعتمد على إنهاء الانقسام الفلسطيني .. وهو أمر صعب في الوقت الحالي للأسف :(

شيرين سامي يقول...

ضياء عزت:

أكيد يا عزت من غيره الحياه مالهاش قيمه :)
الله يخليك يارب

شيرين سامي يقول...

L.G. :

أنا طمان بحب الشغل عشان طقوسه أكتر من مفهومه نفسه..و البحر طبعاً جمييييل يا سلام لو نصحى كل يوم عليه :)
دمتِ بألف خير

نورتيني

شيرين سامي يقول...

الأحلام:

فعلاً يا أبوداود هو روتين لكن مش ممل هو مرهق بس..ربنا يقدرنا جميعاً عليه :)

أشكرك و نورتني بالزياره

شيرين سامي يقول...

إبراهيم رزق:
:)

أفهم أنا إيه طيب :S
زعلان و لا فرحان عجبتك و لا معجبتكش :)

تحياتي أ.إبراهيم

شيرين سامي يقول...

مصطفى جزر:

مبسوطه يا مصطفى إنها عجبتك و رأيك أكيد بيسعدني جداً :)

نورتني يا متابعي العزيز

شيرين سامي يقول...

لولو كات:

و عليكم السلام صدقتي و أختي لولو :)
أنا عارفه قيمته من دلوقتي أكيد بس نفسي أخد أجازة قصيره..
مبسوطه إن التدوينه عجبتك :)

منوراني دائماً

شيرين سامي يقول...

دعاء العطار:

إنتِ كمان وحشتيني جداً :)
تعرفي يا دودو أنا عمري ما كنت فاضيه حتى و أنا أجازه يمكن عشان بكره الفراغ و يمكن لأني دائماً بدور على حاجه أعملها..

سعيده بزيارتك العزيزه
و يا رب تفضي و تكرريها

نورتيني يا جميل

شيرين سامي يقول...

سندس:

زيارتك هي الأجمل أكيد :)

نورتيني

شيرين سامي يقول...

هبه فاروق:

ده من ذوقك يا فاندم :)
و أكيد هتنوري مكتبي و هنتكلم كتييير

أرق تحية لكِ

شيرين سامي يقول...

شمس النهار:

آه و الله وفي و طيب :)
أنا كمان بعشقه

نورتيني و شرفتيني كالعاده

شيرين سامي يقول...

شريف:

أشكرك و فعلاً وجودي جنب النيل فارق معايا كتير :)

تحياتي و تقديري لك

شيرين سامي يقول...

حنان و حنين:

:)
واقع بكل ما فيه من ألم و سعاده
مبسوطه إنها عجبتك

نورتيني

ابراهيم رزق يقول...

ههههههههههههههههه

عجبتنى و ابتسمت و معرفتش اعلق من عفوية البوست و تلقائيته

تحياتى

شيرين سامي يقول...

سندباد:

إنت فعلاً يا أمجد لمست أهم ما في البوست :(
هو مش ضغط بقدر ما هو نوع من الإكتآب..

تحياتي لك

شيرين سامي يقول...

RED ROSE:

تخيلي فعلاً إن حكايات سبع صنايع دي بجد :)

و لفتي نظري كمان أن الكليه كمان أو كليتي (القاهرة) كانت على النيل..مغرمه أنا بالنيل بينا قصة طويله بجد :)

ربنا يقوينا جميعاً

طبعاً ممكن و طبعاً قريت التعليق و كنت مبتسمه جداً :)
جميل إنك تلاقي كلمات بترد على حاجه كتباها بعناق مش مجرد رد..
أنا مقصره معاكِ إعذوريني أتمنى يكون عندك مدونه أقدر أتابعك فيها.

نورتيني و أسعدتيني جداً بزيارتك و تعليقاتك اللي بتثري أي بوست بكتبه

شيرين سامي يقول...

مصطفى سيف الدين:

طبعاً لك ضهر و ابقى قولي بس يوم ما تيجي عشان أخد أجازة ههههههههه
طبعاً يا مصطفى إنت مش محتاج أقولك إنت أخ و صديق و يشرفني أساعدك في أي حاجه :)
نورتني يا زميل الصيدله و التدوين

شيرين سامي يقول...

سلمى هشام:

سعيده يا سلمى إن البوست عجبك :)
و أكيد النيل عظيم و البحر حكايه ما لهاش نهايه..حاجه كده إلهام

أشكرك و نورتيني بالزياره

شيرين سامي يقول...

عمرو يسري:

بيقولوا كده و الله أعلم إني إنسانه تُجيد التأقلم
بس بدأت أشك في الحكايه دي :)

نورتني

شيرين سامي يقول...

رامي:

أهلاً أهلاً أهلاً :)
المدونه نورت جداً بزيارتك
و طبعاً سعيده إني خليتك تبتسم

:)

شيرين سامي يقول...

بنت من الزمن ده:

إنتِ الأجمل يا دينا أكيد :)
واضح إن بينا حاجات كتير مشتركه
بصي هي كلمى "جميل" مش عشان بكون ناسيه بس بحس إن فيها نوع من الموده..

سعيده بزيارتك و تعليقك كالعاده

نورتيني

شيرين سامي يقول...

الأزهري:

:)
أنا بقى بتكشف بسهوله جداً :)
و السرحان بقى عادتي و هوايتي كمان

بس حاول تركز إنت في المشاريع عشان عجلة الإنتاج و لا إيه :))

سعيده إن التدوينه عجبتك و يا رب دائماً منورني

تحياتي لك

شيرين سامي يقول...

رونا علي:

طبعاً أنا كمان مبسوطه بوجودك :)
واضح إنك حسيتي التدوينه مقريتيهاش بس..

نورتيني و أسعدتيني بزيارتك

شيرين سامي يقول...

أنغام:

زميييله :)

يا رب تشتغلي شغلانه بتحبيها و تثبتي نفسك فيها كمان :)

نورتيني و أسعدتيني بزيارتك

شيرين سامي يقول...

أسامه:
:)
يا سلام ما هو الواحد لما بيحب حد بيكون على طول عايز يسمع صوته..

تحياتي لك

شيرين سامي يقول...

قلب القطه:

تعليقك هو اللي دائماً مختلف يا مارو
دائماً بتسعديني بوجودك :)

نورتيني يا جميل

شيرين سامي يقول...

ظلالي بيضاء:

يا ريت يا أخي محمد هيكون بسوت لطيف أكيد :)
بالنسبه للطيف اللي قال مع السلامه هو ماكنش بيهزر كان فاطرني بقوله يا جميل بجد هههههههه
عموماً حرمت أقولها في الشغل

تحياتي لك

شيرين سامي يقول...

زينه زيدان:

أكيد يا زينه ده إنتِ هتنوري الشغل و تشرفيه بس مش مسئوله لو ملّيتي :)

شكراً يا زينه على كلماتك الطيبه و بالفعل أشد لحظات الوحده لما بنكون وسط الناس..

سعيده بزيارتك يا صديقتي العزيزه

أرق تحية لكِ

Red Rose يقول...

ميرسي شيرين علي ردك انا حاولت اعمل مدونه فعلا بس ماعرفتش هاحاول تاني وأقولك لو نجحت المره دي.
تقبلي مروري علي مدونتك وردي عليها بما يمليه علي قلبي

شيرين سامي يقول...

وجع البنفسج:

إن شاء الله تتحل مشكلة الإنقسام عن قريب و ترجعي لشغلك و صديقاتك و القهوة :)

أنا مقدره شوقك للشغل جداً و مريت بيه في أوقات أجازات رعاية الطفل.

سعيده بزيارتك إمتياز الغاليه

نورتيني