الأحد، 8 يوليو 2012

سنتين و أنا بدوّن



سنتين و أنا بدوّن
سنتين و أنا بمارس أحلامي بالتدوين
سنتين و أنا بخرج بره كل الشبابيك بالتدوين
سنتين و أنا بحب و بكره وبتألم و بفرح بالتدوين
سنتين بكتب و أنا بضحك و أنا بعيط و أنا موجوعه و أنا محبطه و أنا مختاله بنفسي و حاسه بنجاح
سنتين و أنا بعذبّها بهجرها و بدلّعها :)


تعرفوا ساعات كنت بكتب بس لمجرد التواصل..كنت بكتب عشان أقرى تعليقاكم و بس.
و ساعات كنت بكتب و ببقى نفسي أقفل التعليقات مببقاش عايزه حد يقولي..مالك؟
المدونة بالنسبة لي أكتر من مجرد صفحة بكتب فيها قصص و حواديت.
جزء مني مبيتنفسش غير هنا..
مريت السنة اللي فاتت بنجاحات و إحباطات كتير..
أهم نجاح طبعاً كان نشر كتابي بنكهة مصر
و عايزه أقول إن يوم الأربع 30 يناير أول حفلة توقيع في معرض الكتاب كان من أجمل و أسعد أيام حياتي.
عشان معظم الناس اللي بحبها كانت هناك..معظمكم..و ناس فاجأتني إنهم جاينلي مخصوص من سفر.




بجد أسعدتوني
عملت كمان حفلة توقيع في مكتبة ديوان الإسكندرية و كان يوم رائع رغم قصره.

                                                             ده مقطع فيديو من الحفلة


و كمان حفلة توقيع و مناقشة للكتاب في مكتبة (أ) الميرغني و كانت حفلة موفقه الحمد لله 


و ندوة تواصل في الأوبرا قريت فيها قصتين من الكتاب






و أخيراً ندوة سهرة مع كتاب في نادي القصة بنادي الصيد و كانت مناقشه أكتر من رائعه الحمد لله
هنا مقاطع من الندوة
كمان سجلت حلقة تليفزيونيه في قناة النيل الثقافية




كنت متوتره شوية بس التجربه كانت جميله :)


سنتين..يعني المدونه لسه يادوب حضانه :)
قد إيه بكون سعيده لما أروح الشغل و ألاقي ناس من و أنا بركب الأسانسير يقولولي "التدوينه اللي إنت كتبتيها إمبارح كانت.."
مسمّيني في الشغل شيرين اللي بتكتب :)
فعلاً الكتابه فعل بيميز أي إنسان و سعادتي لا تقدر بتمن إني بمارس أرقى مهنه في الوجود و هي الكتابه...مهنه مقابلها حب و إمتنان.


عايزه أشكر كل أصدقائي المدونين و أقولهم إنتوا أكتر ناس شجعتوني إني أكتب أو أنشر أو أستمر في التدوين,,بشكر كمان كل زملائي في دار ليلى و كل حد دخل و علق و لو مره واحده و كل اللي بيدخلوا و مش بيعلقوا و أكتر ناس عايزه أشكرهم هما الناس اللي بيعلقوا عندي دائماً دون إنقطاع رغم إن زيارتي لمدوناتهم شحيحه..أنتم بتخلوني صحيح أخجل من تقصيري بس كمان بحس بطاقة الحب اللي عندكم و الإصرار و القناعة إنكم بتعلقوا عشان بتحبوا كتاباتي و بتنتظروها ومش مستنين أرد الزياره..كل الشكر و التقدير لكم بجد :)


هنا بوست السنة اللي فاتت من أجمل التدوينات عشان التعليقات :)


بحس إن المدونه شبهي أوي..و البنت اللي بتقرى فوق دي شبه الطفله اللي جوايا..لبسها أرستقراطي لكن قاعده على سور بيت قديم بتقرى و هي حافيه..و صورة البروفايل كمان بحسها شبهي بألوانها و ضحكتها..أو كانت..


كعادتي في الفترة الأخيره البوست مش مترابط بس أكيد ماليان حب ليكم :)
كل سنة و مدونتي اللي أغلى عندي من أي كتاب..بخير
و كل سنة و إنتم جنبي و أنا معاكم.


*****************


تنويه بُكره الإتنين اليوم الـ 20 في الحملة يوم تدوين موحد للتضامن مع اخوتنا في سوريا و بورما و التعريف بقضيتهم و الدعاء لهم


هناك 24 تعليقًا:

سندباد يقول...

كل سنة وانتي معانا في عالم الابداع نستفاد ونتعلم ونزيد خبرة ونضج
ان شاء الله من نجاح الي نجاح ياشيرين انا ببقي سعيد جدا بنجاحاتك دي
تحياتي ليكي
كل سنة والمدونة طيبة

عمرو يسرى يقول...

كل سنه ومدنتك بخير
ويارب دايما من نجاح الى نجاح
انتى انسانه تستحقى كل خير
تحياتى

yasmeen يقول...

يمكن كنت من الناس اللي بتابع من بعيد لبعيد بس بجد انا كنت سعيدة جداااااا لما عرفت بكتابك اللي نزل والمقابلة علي التلفزيون ، انا بحب المدونة دي واكتر حاجه بحبها أسلوبك في الحكاية بحب اسمع الحكاية منك ..
اتمنالك النجاح والتوفيق دائما
وربنا يوفقك

في انتظار جديدك ^^

shreif elsaftty يقول...

كل سنه وانتى مدونه وقلمك بصحه وعافيه وابداعاتك بتزيد تألق وكل سنه وانتى معانا وكل سنه وانتى بتزيدي اصرار واعمالك بتزيد بتمنى لك التوفيق دائما اتمسكي بحلمك وحبك للكتابه مستنين منك كتيرر في المستقبل

ريـــمـــاس يقول...

صباح الغاردينيا شيري
وألف ألف مبرروك مرور عامان على مدونتك وألف مبروك لنجاحاتك وكتابك ووجودك بيننا وفي قلوبنا جميعاً ..
أحببتك من حواديتك وحين رأيت صورتك وسمعت صوتك أدركت أن بداخل شيرين طفلة جميلة أحببتها أكثر "
؛؛
؛
دي تورتة مني عشان الناس الي جاية دلوقتي مش حتكفي تورتاية وحدة ههههههههههههه
http://files.fatakat.com/2010/6/1276435314.jpg

_________________


http://up.graaam.com/img/1786acd2282b651c3993650957067398.png

ودي المشروبات
_______________

ودي أغنية كمان لعيونك انتي ومدونتك :)
http://www.youtube.com/watch?v=PUn2IPKeslQ

؛؛
؛
لروحك عبق الغاردينيا
كانت هنا
reemaas

;كارولين فاروق يقول...

كل سنه وانتي طيبه يا شيري
ومن نجاح لنجاح ان شاء الله
جميل النجاح وطعمه اجمل
ربنا يوفقك
تحياتي

ليلى الصباحى.. lolocat يقول...

كل سنة وانت جميلة ومنورة بلوجر
كل سنة وانت رقيقة ومتواضعة وحبوبة
كل سنة وانت متألقة ومبدعة
كل سنة واحنا كلنا ملمومين مع بعص وبنحضن بعض بحب ومودة وصداقة محترمة وعلاقات انسانية راقية
كل سنة وانت بخير حبيبة قلبى يااااااااااارب

http://www.youtube.com/watch?v=osKLrBxqkuA&feature=related

تحياتى وتقديرى

كريمة سندي يقول...

العمر لك يا رب .. تدوينة خفيفة ولذيذة بك .. وعقبال التألق بنجاح مبدع ومبهر لكل سنة .. تحية ود وتقدير

Hanan w Haneen يقول...

كل سنة وتدوينك ومدونتك طيبيين

عسولة اوي وبسيطة جدا ياشيري فى لقائاتك ^_^

وانتى من الناس اللى يستحقوا المتابعة ومبسوطة اوي ان الحملة عرفتنى عليكي وعلى كتير مدونين موهوبين

تحياتى :)

Bent Men ElZman Da !! يقول...

كل سنه وانتى دايماً مبدعه يا شيرين :)
مبسوطه ليكى وبيكى اوى بجد لما قريت البوست بتاع السنه اللى فاتت تانى وبتاع السنادى لاقيت انك الحمدالله قدرتى تحققى جزء كبير من احلامك
زى ما قولتى السنه اللى فاتت ان احلامك مابتخلصش
واتمنى ان احلامك تكون نهر لا ينضب ابداَ وتقدرى دايماً تحققيهم :)
عشان انتى فعلا تستاهلى كل خير
كل سنه وانتى جميله اوى كده :))

ظلالي البيضاء يقول...

أختي دكتورة شيرين ..
رغم أنني حديث عهد بمدونتك إلا أنني عرفت منذ اليوم الأول لدخولي ههنا ..
أنني عندما أقرأ كلماتك فإنما أقرؤك أنت شيرين سامي ..
فالتدوين هو جزء منك تماماً كما هو جزء مني ومن كل الأحبة الذين يكتبون في مدوناتهم دواخل نفوسهم ومشاعرهم وقلوبهم وأرواحهم بكل صفاء ونقاء وصدق ..

فالمدونة هي نحن بوجوهنا المشرقة .. المستبشرة .. والمكتئبة .. والفرحة . والحزينة ..
المدونة هي نحن بكل تناقضاتنا ..

حقيقةً سعدت بأن أكون ههنا ..
كما سعدت بالتعرف على المجموعة الطيبة التي تحيط بعضها بعضاً وتضم بعضها بعضاً بدفء الأخوة الصادقة ..

وكل سنة وأنت وأهلك ومدونتك بألف خير ..

سواح في ملك اللــــــــــــــــــه- يقول...

اولا كل سنة وانتي ومدونتك بخير

ثانيا انا مبسوط لعودتك لآهلك واخواتك في بلوجر

تحيتي

ظلالي البيضاء يقول...
أزال المؤلف هذا التعليق.
مصطفى سيف الدين يقول...

كل سنة و انتي و مدونتك بخير و دايما بتتحفونا بالابداع و العبقرية
مدونتك ليها طابع الاسرة و الالفة علشان كده بابقى سعيد جدا فيها
و سعيد اني شاركت معاكي في حفل توقيع اسكندرية و شاركت معاكي في معطف من قيود
كل سنة و انتي طيبة

richardCatheart يقول...

انتى رائعه وجميله الاخلاق والخلق والله يا شيرى ربنا يسعدك ويفرحك ويجعل كل ايامك نجاح وافراح يااااااااااااااااارب

وكل سنة وانتى معانااااااااااااااا وحبيبة قلبنا ي ا سيرررررررررررررررررررررررررررررى
اموووووووووواه

هبة فاروق يقول...

كل سنه وانتى طيبه يا ارق مدونه فى الدنيا
ويارب دايما متجمعين هنا
انا كمان فى الحضانه بقالى سنتين زيك تقريبا انتى قبلى بكام شهر يارب دايما منوره هنا بينا يا شيرى
ربنا معاكى حبيبتى ومن نجاح لاخر

نسرين شرباتي "أم سما" يقول...

ما قدرت ما آجي وأحتفل معك حبيبي بهاي المناسبة اللي بتعنيلك وبتعنيلنا كتير :)
مش عارفة شو بدي أحكي بعد كل اللي حكوا من قبلي
لكن بجد أنا بكون سعيدة كتير لما أشوفلك بوست،، ساعات الوقت ما بيسعفني إني أرد،، بس المهم إني بقرأ وبنبسط يا شيرين
يا رب دايماً هيك تكوني فرحانة ومبسوطة ومشعة :)

ابراهيم رزق يقول...

كل سنة و انتى شرين

تحياتى

yosef يقول...

كل عام وانتِ ومدونتكِ واحبتكِ بالف خير......منورة ادايما ان شاء الله

mostafa gazar يقول...

كل عام وأنتى بخير وصحه وسعاده وراحة بال .....وكل عام والمدونه بخير و ابداع وروعه وتألق وبساطه وتلقائيه ...كل عام وأسرة المدونه بخير وحب وترابط .........تحياتى واحترامى و أطيب أمنياتى :)

Red Rose يقول...

كل يوم وانتي مدونه رقيقه رومانسيه مبدعه كما هي حالك
تحياتي

الازهرى يقول...

سنتين ؟؟؟؟

أعتقد كده كفاية جدا جدا جدا

اقعدى بقى كده وخلى بالك من شغلك
وججوزك وعيالك
وسيبك بقى من التدوين
ولعب العيال ده

reemaas يقول...

اعتقد انهم كانوا سنتين مميزين وكنتى فيهم ما شاء الله متالقة جدا يا شيرين

بفتخر بيكى والله وبقول انى اعرف كاتبه مهمة ومبدعة وبوريهم كتابك ناقصنى بس الاهداء ههههههههههه

كل سنة وانتى بالف خير وديما منوانا

نوال يقول...

السلام عليكم

كل عام وأنت وحدوتة مصرية من أجمل الحكايا..
قادك الله من نجاح إلى نجاح في تألق كبير

تقبلي تحياتي وأمانيّ الخالصة :)