الخميس، 18 نوفمبر، 2010

ببساطه




ببساطه في موضوع صغير بيستفزني شويه هو موضوع الجمال و مفهومه عند الناس يعني كل الناس بتقول ان الجمال جمال الروح و الكلام التقليدي اللي كلنا عارفينه لكن في قرارتهم في منطقة اللاوعي الجمال ليه مقاييس تانيه خالص يعني مثلاً الرجاله الجمال بالنسبه لهم شكل و مظهر بالمقام الأول الستات الكبار الجمال بالنسبه لهم أدب و سمعان كلام و مفيش مانع من بياض و شوية تختخه أما البنات فامفيش واحده شايفنها جميله لازم تكون جميله بس عايزه تخس, جميله بس دمها تقيل أو مش ستايل يعني و الى آخره.

أعرف واحده جميله كانت ماشيه مع صاحبتها الأقل منها جمالاً و عدى من جنبهم ولدين طبعاً هي تصورت انهم هيعاكسوها لاقيتهم بيعاكسوا صاحبتها و هي و لا أكنها هنا عرفت بعد كده ان جيبة صاحبتها القصيره هي اللي خلتها في نظرهم أحلى, و في بنت مش في منتهى الجمال و بنلاقى واحد بيحبها و دايب دوب كمان, وحتى احنا ممكن نشوف أخوتنا أو أصحابنا أجمل من صورتهم الحقيقيه بكتير عشان كده أنا بشوف ان الجمال عامل زي السحر و في عفاريت (زي مسرحية حلم منتصف الصيف لشكسبير) بتضع سحر الجمال في عيون الناس عشان يشوفوا اللي بيحبوهم أجمل بكتير من الحقيقه.

نيجي بقى للجزء المستفز الجمال اللي الناس بتفتكره في الزياده زيادة المكياج زيادة العطور زيادة العري آه و الله زيادة العري , كل طبقات الشعب العُليه المستعليه و الوسطى المضمحله حتى الشعبيه المتشعبه كلهم بيؤمنوا بمبدأ كل ما كشفت أكتر و ضيقت على الآخر هتبقى مالآخر و اكبر دليل على كلامي الأفراح لما بتروح فرح تلاقي البنات (مش كلهم طبعاً) بيتفننوا في زيادة كل شئ و تلاقي عنيك زغللت من الألوان و فساتين مش مناسبه على أجسام مش مناسبه و الرقص طبعاً مش مجامله للعروسه زي ما بيدعي البعض قد ما هو أحد أساليب اظهار الجمال و مفيش فرق في كلامي بين محجبه أو غير لأن للأسف كله بيتبع موضة علمني العوم والنبي يا أحمد و ربنا يخليلنا بوديهات كارينا.

كتير بشوف بنات بسطاء بيتعاملوا مع العري على انه رُقي و تحضر و في أي مكان الناس بتفتكر الست اللي صبغه شعرها أصفر منجاوي و حطى في وشها أربع ألوان على الأقل هانم حتى في المهرجانات و الحفلات الفنانات الفاضلات كلهم بيتسموا بالمبالغه في لبسهم و ماكياجهم ألوان صارخه و عري غيرلائق.
من يومين شوفت خطوبة الأمير ويليام ابن الأميره ديانا و ملك انجلترا المنتظر و بهرتني خطيبته في رقة مظهرها ملكة انجلترا القادمه في فستان قمه في البساطه و الذوق و مظهر ناعم هادئ يخطف القلوب لا في عُري بقى و لا بتنوّر في الضلمه و لا حاجه, تصورت لو كان المشهد ده عربي كان هيبقى في كم هائل من المبالغه في كل شئ, نفسي الناس تغير فكرتها عن الجمال شويه عن اقتناع مش شعارات و خلاص لأن في الأول و الآخر الشئ الزائد عن حده حتى لو جذبك لدقائق فهو بيعمل شعور بالنفور لكن البساطه بتحمل في طياتها أسمى معاني الجمال و ده مجرد رأي.






هناك 58 تعليقًا:

FAW يقول...

والله يا شيرين إنتي قلتي وجهة نظري بصراحه
فيه بنات بيبقوا مزودينها فعلا , طب والله أنا مستني اليوم اللي هقول لمراتي فيه إنتي حلوة كده وإحنا رايحين فرح ومتأكد إنها مش هتقتنع وهتفتكرني مجنون
الصورة اللي فوق دي لو في مصر البنات هيقولوا إيه العروسه المجنونه دي , ( فرح يعني لازم تبقي أوفر ). . معروفه , وكأنه عرف .
أنا عن نفسي مؤمن تماما بالنظرية بتاعت إن الإنسان بيتغير كل ما نعرفه أكتر , يعني لو مع الوقت إكتشفنا إنه كويس هيحلو فعنينا حتي لو وحش , ولو إكتشفنا إنه وحش هيبقي وحش حتي لو هو ملاك . .
تحياتي ليكي وآسف لو كنت طولت .

سواح في ملك الله- يقول...

موضوع هايل بجد بيلفت الانتباه
لتفاهه تفكير بعض البنات
بناءا علي سطحيه تفكير
بعض الرجال او الشباب
فمن الرجال ماينظر للانثي نظره جنسيه فقط
وهذا النوع سهل الايقاع به بصرف النظر عن
شكل الانثي ولكن يجب هي ان تعلم انه اذا ارتبطا
سيظل ينظر اليها هذه النظره الحيوانيه
فهو لن يري فيها غير جسد واذا ذهب الجسد وامتلا
او تغير شكله مع تغير السنين تركها وبحث عن غيرها
وهذا النوع من الرجال الان مااكثره
ولذلك يجتهدن كثيرات في اظهار مفاتنهم
ولكن للجمال مقاييس كما
قلتي فمثلا في قصةسيدنا
يوسف ماختلفوانسوة القوم علي جماله
(فلما راينه اكبرن وقطعن ايديهن)
وقال الله تعالي في كتابه العزيز
(( انا خلقنا الانسان في احسن تقويم ))
تحيه لكي موضوع جميل جدا ويلفت الانتباه
احييكي عليه

Dr/ walaa salah يقول...

كلامك صح والله يا شيري

اللي عايز يعرف اذا كان عنده عمى الوان ولا لا يروح فرح ويبتدي يميز جميع الالوان اللي في الدنيا كلها


دي الوان الطيف والوان جديده كمان

البنات بتتفنن انها تبقى عامله زي المهرج وخلاص

وبصراحه مش لازم في الافراح

والله انا بشوف بنات لابسه ملابس المفروض متطلعش بيها برا البيت

وبسأل نفسي اذا كان هى لابسه كده في الشارع امال في البيت بتلبس ايه

المشكله انهم فاكرين ان ده الجمال بعينه

انا شايفه ان الجمال جمال بساطه وذوق وروح اهم شئ

مشكوره يا شيري على الموضوع الواقعي

ربنا يهدي بجد البنات دول

Mona Abo - Elso3od يقول...

صباح الخير
معاكي حق في كل كلمة عن موضوع الجمال و مفهومه المشوه عند الناس اما عن اللبس و المكياج فدا العادي المتوقع من شعب فقد هويته مش عارف هو ايه بالظبط كل واحد بيقلد المظهر اللي يعجبه غربي خليجي ايراني كله ماشي
دا غيرالشباب اللي بيقلد المظاهر الغربية لللشواذ وهو مش فاهم و عارف تقليد و خلاص و أهو كله يروش ........
تحياتي لارائك و قلمك
و شكرا علي الاضافة

ستيتة حسب الله الحمش يقول...

مساء الفل يا شيرين

إنتي طرحتي كذا موضوع في موضوع واحد

مفهوم الجمال عند الشرقين وخاصة المصريين
ومما نرى في الشارع من ببغاوات نستطيع أن نجزم إن حصل لنا تشوه في مفاهيم الجمال

ثم ذكرتي الكارينا
أسوء اختراعات اليوم
اللي دخل حتى في فستان العروس
شيء لا يظهر اي جمال
ولا يزود حشمة
ولا ليه لزمة
بس هو رزق ناس عند ناس تانين

بالنسبة لخطيبة ويليام فدي صديقته وعايشين مع بعض من 8 سنوات
هل بعدها ها تبقى فرحانة زي اي بنت بدبلة الخطوبة؟ ولا بخاتم ديانا
مؤكد كل الفرحة اللي على وجهها بلقب اميرة ويلز
بعد 8 سنوات معيشة كاملة كزوجين
متقدريش تقارنيها بفرحة بنوتة جميلة صغننة بفارس الأحلام
ولا إيه؟

تحياتي

Tamer Nabil يقول...

كل سنة وانتى طيبة وبخير

عيد سعيد عليكى


مع خالص تحياتى

الحب الجميل يقول...

معاكى حق يا شيرى
موضوع متميز
شكرا ليكى

شيرين سامي يقول...

FAW:مطولتش و لا حاجه و سعيده ان وجهات نظرنا مُتطابقه و سعيده أكتر بمتابعتك الجميله شكراً و تحياتي لك

سندباد يقول...

دايما مواضيعك بتبقي مجال للمناقشة والاخد والرد وده اللي عاجبني في مدونتك بيبقي كل شئ فيها هادف
دي مقدمة لابد منها
بالنسبةللبوست الجمال شئ نسبي زي ما كل شئ في الدنيا شئ نسبي وعمرك ما هاتلاقي اتنين متفقين علي مقاييس الجمال لولا اختلاف الاذواق لبارت السلع
اما عن اللي بيزودوها دول سواء كان بنات او شباب ده بيبقي ضعف ثقة البنت الواثقة من نفسها هي اللي عارفة انها جميلة سواء من بره او من جوه من غير تزويق مالوش لازمة
سلمت يداك واسف علي الاطالة
كل سنة وانتي طيبة
تحياتي

شيرين سامي يقول...

سواح في ملك الله: أشكرك على تعليقك اللي أثرى البوست و أضافله تحياتي لك و دائماً منورني

شيرين سامي يقول...

Dr/ walaa salah: انت اللي كلامك صح الصح و فعلاً مش بس في الأفراح أنا بلاقي في عز الضُهر ترتر و حاجات بتلمع و دهبي و فضي عادي يعني
شكراً يا جميله على تعليقك الجميل

شيرين سامي يقول...

Mona Abo - Elso3od: صباح الفل عندك حق فعلاً الناس بتقلد أي حاجه و السلام من غير أدنى وعي بالذوق و الآداب العامه
أشكرك يا جميل و نورتيني

شيرين سامي يقول...

ستيتة حسب الله الحمش: طبعاً حضرتك عارفه زيارتك بتسعدني قد ايه و رأيك دائماً بيهمني جداً
بالنسبه لخطيبة ويليام أنا عارفه ان عادات الغرب خصوصاً في حياتهم الخاصه منتهى الحريه الجنسيه و الحمد لله اننا كعرب معندناش الانحلال ده لكن أنا كنت بتكلم عن نقطه واحده بس الشكل و بساطته مش فرحتها لأن أكيد زي ما حضرتك قلتي هي فرحانه بالحياه اللي مستنياها
و كتبت البوست ده بس لأن نفسي البنات ميبالغوش في مظهرهم و يضيعوا جمالهم الرباني
أشكر حضرتك جداً و يارب دائماً منوراني

شيرين سامي يقول...

Tamer Nabil: و انت طيب و شرفتني بجد بمتابعتك

شيرين سامي يقول...

الحب الجميل: الشكر ليكي على زيارتك الجميله

شيرين سامي يقول...

سندباد : دائماً تعليقاتك كلها ذوق أشكرك بجد و كلامك كله مظبوط الثقه في النفس فعلاً من أهم الحاجات اللي بتأثر في احساسنا بجمالنا
شكراً و في انتظار تعليقاتك دائماً

Tarkieb يقول...

الجعان تملى بيحلم بسوق العيش...عشان كدة تلاقي بنغني للعيون السود والشعر للاسود واول ماحد يشوف واحدة بيضة وعينها خضرة وشعرها اصفر بيريل عليها...عشان كدة كل الفيديو كليبات من نوع ناس في بلدهم مش حلويين بس عند العرب موززز...هي دي الدنيا في مصر الستات تفرد شعرها وفي اوروبا يعملوه كيرلي....بالنسبة لمعاكسة العريان عشان البلد بقيت كلها عبايات....

Casper يقول...

موضوعك وللأمانة مهم جدا ونلمسه جميعا في حياتنا
وللاسف الشديد ظهر مفهوم الجمال عند اغلب الناس انه جمال الشكل

مما لا شك فيه وحتى لا نغالط انفسنا فجمال الشكل مطلوب لكن ليس هو المقياس والاساس بل هو عامل من وجهة نظري مطلوب في فتاة الاحلام

... ولله الحمد لدي مبدأ في الحياة وهو العري ليس دليلا على الجمال ...

كلما تكون المرأة محافظة على نفسها فهذا لانها جميلة فالمصوغات تحفظ في صناديق غالية

أما المرأة التى ترضي بالملابس الشبه العارية أظنها ليست جميلة بالمرة لأنها وبكل بساطة مثل التى لديه بضاعة وقد كسدت ويريد أن يتخلص منها بكل المحاولات

وجهة نظري الشخصية ان الجمال مكونات كثيرة ..
جمال الشكل عامل منها وليس هو الاساس فيها

....

موضوع متميز وطرح رائع
تقبلي مروري

Casper

reemaas يقول...

هى المشكلة يا شيرى فى ان البنات مابتبقاش فاهمه انها مش شرط علشان اتعاكست تبقى عجبت الولد
بمعنى تانى زى ماقولتى انتى ان الولاد ماعكسوش الجميله وعكسوا ام جيبة قصيرة هل الجميله فهمت ده ولا زعلت وراحت لبست حاجة قصيرة هى كمان؟
تبقى مصيبة بجد لو عملت كده
مش شرط ان اللى حطت مهرجان الوان ولفتت الظر تبقى نالت الاعجاب الصورة المليانة الوان بتلفت النظر لكن مابتستحوزش عليه

H@mdy يقول...

مساء الخير :)

كلام رائع .. وبجد انا بكره الافورة يعني لما حد يكون بيعمل حاجة اوفر وخاصة الموضوع ده بيبقي مستفذ جدا ..
ربنا يقطع محلات المكياج اللي في مصر علي الاقل :D:D

تحياتي *_*

يوميات شحات يقول...

كلامك عشرة على عشرة
أنا بالنسبة لي قبل الزواج كان بيلفت نظري اللي مش حاطة مكياج خالص أما الملونين و المزركشين دول مكنتش اتمنى ارتبط بأي واحده فيهن

شيرين سامي يقول...

Tarkieb: هههههه تعليقك حلو أوي بجد بس زي ما في عبايات في ميوهات بردو
شكراً لزيارتك و تعليقك نورتني

شيرين سامي يقول...

casper:سعيده بمرورك الرائع و أنا معاك ان الشكل عامل أساسي في الجمال و الحمد لله انه بيختلف من شخص للآخر و مبادءك رائعه يا عزيزي
شكراً و تحياتي الخالصه لك

شيرين سامي يقول...

reemaas: هو موضوع المعاكسه ده كان قصدي بيه ان الجمال في عيون الولاد(التافهين طبعاً) مش بالملامح و الرقه على قد ما هو بالتنانير القصيره
كلامك مظبوط يا جميله أشكرك و تحياتي لك

شيرين سامي يقول...

H@mdy: مساء الفل و نورت المدونه
لأ لألأ احنا محتاجين محلات المكياج بردو مش معنى ان فيه ناس بتاكلوا ان كل الناس بتستخدموا غلط
تحياتي ليك و نورتني

شيرين سامي يقول...

يوميات شحات: أشكرك على زيارتك و يا ريت كل الرجاله تفكر كده
تحياتي و سعيده بزيارتك

ostora يقول...
أزال المؤلف هذا التعليق.
ostora يقول...

الجمال كلمة يمكن حروفها بسيطه لكن معنها كبير اوي وبتختلف مقايسه من شخص لشخص
يعني في ناس بتشوف الجمال احيانا جمال عقل او فكر او شخصيه او اخلاق او شكل
او حتى مادي وكل شخص بيشوف من وجهة نظرو يعني شيء مالوش مقاييس نقدر نمشي عليها
مره كنت بتكلم مع حد وقلت جملة ان الجمال جمال الروح
رد قالي ده دايما شعار الوحشيين بيداروا بيه خبيتهم لان اي واحده بنشوفها لاول مره
اول شيء بيلفت انتباهي ليها قبل ما اعرفها او حتى اتكلم معاها هو شكلها
ممكن تكون جميله من بره بس ومن جوه فاضيه
بس بيفضل عنوانها الاولاني بالنسبه لي هو شكلها ويمكن يكون عنده حق وافتكر ده تفكير اغلب الشباب
بس في النهايه الجوهر بيطغي علي المظهر
واللي بتلبس عريان او ضيق مش شرط بتكون جميله او عاوزه تظهر جمال
كتير بيكون بس رغبه في لفت الانتباه ليها زي ما قلتي عن
البنت الوحشه صاحبة الجيب القصير واحيانا بيكون نقص بنداريه بحاجه تانيه
الجمال لا هو لبس ولا مكياج ولا ضيق رغم انهم احيانا بيظهروا جمال لو كانوا بدرجه معقوله
وربنا قال "الله الذي جعل لكم الارض قرارا والسماء بناء وصوركم فأحسن صوركم "
وبيفضل دينا و احترامنا ورقينا واخلاقنا وفكرنا هو جمالنا الحقيقي اللي مش محتاج الوان وبيظهر مع الوقت
قال رسولنا عليه الصلاة والسلام "تنكح المرأة لاربع لمالها و لحسبها وجمالها ودينها فأظفر بذات الدين تربت يداك "

اختى المحترمه شيرين سامي

جميله مدونتك واجمل منها كلماتك واسلوبك في الطرح
تحياتي ليكي

karmen يقول...

موضوع مهم جدا ياشيرين بجد تسلم ايدك

رأي ان فعلا الجمال مقاييسه بتختلف من شخص لاخر هو حاجة نسبية جدا
لو بنت ماشية في الشارع لابسة مش عارف ايه وحاطة في وشها 5 كيلو بوهية ممكن انت ماتشوفهاش جميلة بس غيرك شايفاها كده
استحالة هعمم رأي ع الكل احنا دينا بيقول ان الجمال المرأة المصانة انا ماعنديش اعتراض
بس هل لو واحدة متبرجة اقدر اقول كل الناس هتشوفها مش جميلة؟
المقاييس نفسها بتتختلف من شخص لاخر صعب اقول واحدة كل الناس شايفاها جميلة او كل الناس شايفاها وحشة بغض النظر بقي عن الصح والخطأ
بوست هايل شيرين تسلم ايدك

أحمد الصعيدي يقول...

رب حسن يراه الناس طيفا

وحسن يملأ الدنيا جمالا



صباحك سكر

أسعدك الله

شيرين سامي يقول...

ostora:كلامك رائع عايز فعلاً و عايز ينزل في بوست لوحده بجد أشكرك و عجبني لما قولتي ان الناس بتفتكر كلمة جمال الروح دي بيقولها الوحشين عشان يداروا وحاشتهم و ان الجوهر هو اللي بيطغي على المظهر
وبيفضل دينا و احترامنا ورقينا واخلاقنا وفكرنا هو جمالنا الحقيقي اللي مش محتاج الوان وبيظهر مع الوقت

أشكرك على اطراءك و تعليقك الجميل

شيرين سامي يقول...

karmen:أشكرك يا جميله هي مقاييس الجمال بتتفاوت فعلاً بشكل كبير و اللي مزودها دي زي ما بتعجب ناس مبتعجبش ناس بس أنا كان نفسي الناس تعرف ان مش لازم كل حاجه تبقى بزياده عشان تبقى حلوه
كلامك مظبوط و سعيده جداً بمتابعتك
نورتيني

شيرين سامي يقول...

أحمد الصعيدي: صباحك سكر و عنبر دائماً تعليقات حضرتك بتبقى مميزه جداً و بتسعدني
تحياتي لك و أشكرك

قهوة بالفانيليا - شيماء علي يقول...

:)
صح ..!!
الجمال بيبقى زي السحر ..
في ناس بتبىق جميلة من الداخل و جمالهم الداخلي بينعكس على اشكالهم الخارجية ..
بتحس سانهم غاية في الجمال .. فعلاً :)
تحية لك .

علاء سالم يقول...

السلام عليكم

موضوع جميل وقيم بجد
انا في رأيي إن الجمال الداخلي مهم وأيضاً الخارجي لأن الإتنين بيكملوا بعض
يعني بمثال بسيط الجمال الخارجي زي واجهة البيت وتصميمة وشكله الخارجي اللي أكد مهم
والجمال الداخلي هو نظافة البيت وترتيبة من الداخل وصلاحيته للإقامة
أكيد الداخلي أهم لكن الخارجي مهم أيضاً

أما عن كثرة الألوان والعري والرقص وخلافه فهي أشياء تقتل الجمال الموجود بالفعل
فليس هناك في المرأه أجمل من وجه تكسوه البراءة والعفوية والبساطه وملابس محتشمة لا تعرف التبهرج والتكلف.

Timo.. يقول...

بجددد تحية كبيييييرة ليكِ يا شيرين واضم صوتي لصوتك :)
الناس فاهمة الجمال غلط وعشان كده طووول عمري باقول الشعب ده محتاج (يعاد تربيته) من اول وجديد :)

جايدا العزيزي يقول...

عندك حق ياقلبى

حقيقى الجمال من وجهه نظرى هو جمال الروح

وكتير من المناظر للبنات المسلمات بتستفزنى

بس المهم التربيه والاهل والوعى

وللاسف صرنا نفتقد لتلك الاشياء

اننا ببساطه شعب يحتاج لاعاده تاهيل

اشكرك على تميزك وجراتك

عيد سعيد

وكل عام وانت بخير

تحياتى

قلم رصاص يقول...

أصبتي كبد الحقيقه والله
أحييكي بجد على الطرح الرائع دا
ورأيك بناء جدا

شكرا لحضرتك وكل سنه وانتي طيبه
^^

شيرين سامي يقول...

قهوة بالفانيليا - شيماء علي: أشكرك على تعليقك فعلاً الجمال الداخلي من طيبه و حب و نقاء بيبان على طول في شكل جمال خارجي و العكس صحيح
شرفتيني بالزياره أتمني تزوريني دائماً:))

شيرين سامي يقول...

علاء سالم:و عليكم السلام و رحمة الله و بركاته تعليقك رائع و المثال اللي ذكرته صحيح جداً طبعاً مش شاعر:)
و بوافقك ان التكلف و البهرجه بتقتل الجمال الحقيقي
نورتني و أسعدتني زيارتك

شيرين سامي يقول...

Timo: أنا اللي بحييك و أشكرك على الزياره و عجبني أوي (اعادة تربية) الشعب ساعات كتير بحسها
نورتني و في انتظار زيارتك و تعليقك دائماً

شيرين سامي يقول...

جايدا العزيزي: كل سنه و انت طيبه يا جميله حقيقي رأيك بيهمني أوي و فعلاً مناظر البنات بتبقى مستفزه و هما فاكرين انهم كده حلوين
أشكرك بجد و نورتيني

شيرين سامي يقول...

قلم رصاص: كل سنه و انت طيب زيارتك هي الرائعه
أشكرك و تحياتي لك

eng_semsem يقول...

صحيح في بنات بيقصروا لبسهم ويدلعو نفسهم والرجاله لما بتعدي عليهم بيبصبصوا ويعاكسوا بس ده مش معناه اعجاب هو بيلاقي واحده عارضه نفسها وبيتفرج عليها مش معناه انه هيتجوزها او حتى يفكر فيها بس تفضل البنت اللي بيحلم بيها لازم تكون محترمه ومحجبه وبتخاف ربنا وتخاف من عيون الناسوتحافظ على جسمها لزوجها فقط هي حلم كل شاب

Samoura يقول...

والله حضرتك قلتي وجهه نظري بالظبط..
مفيش اختلاف إن الجمال وجهات نظر
ظي ما قلتي كل واحد ممكن يبص للجمال
إزاي سواء في اللبس او المكياج او الجسم..

بس فعلا إنا عن نفسي بتضايق جدا
من الموضة اللي بتتبعها أغلب البنات..
وكأنهم فاهمين العكس إنها لما لبس كدا يبئي
هتاخد نصيبها من الشباب!

مع إن في رأيي الشخصي كل ما كانت بسيطة
وعلي طبيعتها وبدون تكلف هتكون أجمل

..

وربنا يهدينا أحسن الوضع بئي
يضايق جدا في الشوارع .

...
شكرا علي موضوعك الجميل
وطرحك الممتاز ليه

alaa esa يقول...

مساء الخير سيدتى سعدت بمرورى على مدونتك حقا
و اود التاكيد على ان جمال المراءة يكمن فى طباعها بنسبة 75% و الباقى للنواحى الخاصة بالجسد و الملامح الخ فماذا نفعل بملكة الجمال وسوء لطباع فالمراءة ليس لوحات للعرض و انما روح و جسد مكملان لبعض والتاكيد على الروح لانها الباقية و الجسد يتبدل بفعل الزمن فالمراءة هى التى وان لم اكن ارها احسها
لك تحياتى على امل التواصل مجددا

شيرين سامي يقول...

eng_semsem: أشكرك على زيارتك و تعليقك أنا عارفه ان اللي بيعاكس بنت مش بيتجوزها بس هو بيخليها تفتكر انها كده حلوه فتفضل كده
تحياتي لك نورتني
و حمد لله على سلامتك

شيرين سامي يقول...

Samoura: أنا اللي بشكرك على تعليقك الجميل و سعيده ان وجهات نظرنا متطابقه
تحياتي لك و نورتني

شيرين سامي يقول...

alaa esa:مساء النور أسعدتني زيارتك جداً و أشكرك على تعليقك و في انتظار متابعتك
تحياتي لك و نورتني

الحسينى يقول...

موضوع ليس سهل والرد عليه باختصار غير وارد فعذراً على الإطاله "قبل ما أبدأ" :)
اتذكر مرة كنت فى دورة تدريبية ومعى 14 بنت ومدربة واحدة وأنا الشىء المذكر الوحيد وأثير موضوع الجمال من وجهة نظر الرجال وكيف يرى الرجل المرأة جميلة ومواصفات الرجال لفتيات الأحلام وكانت الخلاصة هى أنك تستطيع أن تضع ما ترغب فى قائمة مواصفاتك لكن الحب لا يعترف بالمواصفات المطلوبة من الكتالوج فعندما تحب لن ترى أنفها الكبير أو شعرها الذى لا يمت للأشقر بأى صله ولا قامتها التى لا تشبه هيفاء أو إليسا أو حتى نانسى كحل وسط :)
كذلك الحال بالنسبة للمرأة فليس هناك الكثير من رشدى اباظه واحمد عز يتجولون حولنا
اما موضوع البساطه فى خطبة الأمير ويليام فيكفى ان نشاهد اى فيلم اجنبى لنرى العروس سحبت شعرها للخلف غالبا ووضعت ماكياج فى منتهى البساطه ايضا هناك ظلم فى المقارنة بين عروس ولى العهد فى دولة مازالت تحافظ على تقاليد الشياكه مثل القبعات فى مباريات البولو وحفلات الزفاف وبين عروس ترتدى الكارينا لعدم وجود خيارات كثيرة لفستان يناسب فتاة محجبة
اخيرا فى الغرب ينفقون الكثير على التزين ولكن يعرفون جيداً أن لكل مقام مقال وان البساطه سر من اسرار الجمال والدليل عند زواج تشارلز من كاميللا انفقت الكثير من المال وكان ذلك محل نقد ولكن فى النهاية لم تظهر وكانها تضع كل الوان قوس قزح على وجهها
المشكلة هى الافتقار للذوق فى كل شيء بدأ من الملبس حتى الالفاظ وسلوكيات التعامل فى الشارع المصرى
تقبلى تحياتى

عباس ابن فرناس يقول...

زى ما مقاييس الجمال بتختلف من شخص لتانى
برضو بتختلف من بلد لتانى
بيقولك ان فيه بلاد مثلا بتحب الودان الطويلة المدلدلة هههه
اه والله
يعنى حتى مثلا برضو لو ودان البنت قصيرة يلبسوها حلق كبير وتقيل علشان ودانها تدلدل وكل ما كانت ودانها مدلدلة بيكون ده دليل طبعا على جمالها الطاغى
غير البلد طبعا اللى بيفضل المنخير المفرطحة
لذلك برضو بيلبسوهم حلق فى منخيرهم
واللى بيحب العيون الديقة واللى بيحبها واسعة والخ الخ
وبصرف النظر عن الاختلاف
لكن لو تمعنا فى كل المقاييس هنلاقى ان معظمها
منطقية
مش بيقلك لولا اختلاف الازواق لبارت السلع
تخيلى لو ربنا حط مقاييس وحدة اوثابتة للجمال (ويا حبذا لو كانت انفردت بيها مصر )
كان زمان بنات العالم كلها بارت
بنسبة لطريقة البس والمكياج الى منتشرة حاليا فى مصر
بحس انهم بليتشو مش بنات
تحياتى

محمود(باحث عن حب) يقول...

السلام عليكم

الشاب تلوقتى
اصبح تايه من البنات اللى فى الكلبات
والبنات اللى بترقص فى الافراح
والبنات اللى الواحد بيشوفهم
ماشكين فى راع شاب تانى وخايفه عليه انه يطير
ومن الممكن ميكونش فى علاقه بينه وبينها
موضوع صعب
الجمال
له مقايس عند ناس وناس لآ
يعنى جمال الروح والشكل والفكر واللبس
كوكتيل
يعنى
تلوقتى
معظم الناس الا ما رحم ربى بيمشى يفكر بنصه التحتانى
ربنا يقنا
شر الناس السوء يارب

شيرين سامي يقول...

الحسينى: لا اعتذار بيننا أولاً فاطالاتك تسعدني كثيراً ثانياً أنا متفقه معك في كل كلمه و بالمناسبه لغتك جميله, لكني لا أتفق معك في نقطه واحده و هي بوديهات الكارينا الكريهه لأن لها بدائل لكن للأسف ربما لإفتقار الذوق أو للاستسهال أو عملاً بمبدأ (كل ما تضيق على الآخر هتبقى مالآخر) يرتدونها
تحياتي لك و دائماً كده منورني

شيرين سامي يقول...

عباس ابن فرناس: أسعدتني جداً زيارتك و عجبتني أمثلتك عن مقايس الجمال أول مره أسمع عنها بس محتاجه تنزل في بوست لوحدها طبعاً انت عندك حق انه لولا اختلاف الأذواق لبارت السلع لأن فعلاً الي أنا بشوفه بعيد تماماً عن الذوق غيري بيبقى مبهور بيه
بجد نورتني و في انتظار زيارتك مره تانيه

شيرين سامي يقول...

محمود(باحث عن حب): و عليكم السلام و رحمة الله و بركاته أشكرك على زيارتك و تعليقك دائماً كده منورني

شمس العصارى يقول...

الجمال احساس
والعرى واللبس والموضة والبرفانات .. كلهم يخاطبوا الغريزة
والاحساس غير الغريزة طبعا
الا ترى ان المرأة الفاضلة اكثر جمالا وجاذبية من كل ممثلات الدنيا

شمس العصارى يقول...

على فكرة
فى انجلترا تقاليد ملكية
فحاليا لا يطلق على زوج الملكة اليزابث لقب " ملك انجلترا "
ولكن يقال " زوج الملكة "
ولا يمنح لقب ملكة انجلترا لذوجة الملك
واعتقد ان الاقرب لمنصب ملك انجلترا هو الامير تشاليز ولى العهد حاليا
وسواء كان هو الملك او ابنه ويليم فلن تحمل ايا من زوجتيهما لقب " ملكة انجلترا" ولكن سيقال زوجة الملك

model يقول...

الله الله الله، حتة دين بوست .. كان نفسي اكتبه .. على فكرة انا مش زيك مخضرمة في عالم التدوين ، لا ده انا يا دوبك باقول يا هادي ، و عاملة مدونة جديدة اسمها " عايزة اخس" و بوستك شدني لاني باكتب في موضوع قريب له ، شوفي انا كتير مقتنعة بمضمون كلامك ، لكن فقط نفسي تفرقي بين البرنسس خطيبة البرنس ويليام و بين باقي جميلات المجتمع الغربي تجنبا لوقوعك في فخ التعميم ، فانا لسة راجعة اليوم من عشاء في فندق ماريوت و جاورت خمس طاولات لجروب اجنبي اجارك الله من مبالغتهم في العري و التبرج ، اما نجن في الشرق فمعروف عنا المبالغة ايضا في التبرج و لكن ضعي في الاعتبار عوامل اخرى فنحن نحتاج لالوان فلسنا شقر و لسنا في معظمنا بيض مشرابين بحمرة ، ما يجعلنا نسقط في يئر الاوان لنشبه صورة ملطخة اشبه بصور الساقطات
اما الاميرة فليست بحاجة لكل ذلك فجسمها نحيل و شعرها منساب و بشرتها بيضاء ناصعة لا تحتاج لكريمات تفتيح
لا ابرر تبرج الشرقيات و لكن ابحث له عن تفسير
و الدليل لاحظي المكياج الخليجي و الهندي ، غارق في الاولان الصاخبةو كلما اتجهت البشرة للبياض قل احتياجها للمكياج و الا اصبحت بهلوان
عموما اعجبت بهذا البوست بشدة و ارجو ان يعجبك اول بوست لي في مدونة عايزة اخس
او
http://back2evans.blogspot.com
تحياتي