الخميس، 19 يوليو 2012

عندي تنفيض



بدأت من فترة في حالة من التنفيض..مش بس تنفيض البيت اللي بيسبق رمضان و بيهد حيل الناس قبل الصيام..


لأ حالة تنفيض تانيه خالص


تنفيض الدولاب..كل قطع الملابس اللي مبتتلبسش لأن مقاسها إتغيّر أو موضتها راحت أو حتى قدمت, في غيرنا كتير أولى بيها, و رمضان الثواب فيه مضاعف يعني لو كل واحده نفضت دولابها و نفّعت غيرها مش يبقى أفضل من إنها تفضل محوشه اللبس و مستخسراه في غيرها, فكر في الفرحة اللي ممكن تدخلها على قلب ناس بسطاء لمجرد إنك قررت تنفض دولابك.


تنفيض الهدوم..ده غير تنفيض الدولاب, تحويل كل القطع الضيقه أو اللي مش مناسبة لمواصفات الحجاب لإستخدامات أخرى غير الخروج بيها, فكري قد إيه هتكوني جميله و إنتِ حاسه إنك خارجه بلبس مش ملفت إلا بشياكته, أنا كتبت بوست في الموضوع ده قبل كده..هنا..فكري إنك تدوري على رضا ربنا قبل ما ترضي أنوثتك, و أكيد هتترحمي من النظرات السخيفه أو على الأقل مش هتشيلي ذنبها..راحة النفس و رضا رب العالمين أهم شئ لذلك قررت أنفض هدومي.


تنفيض عربيتي..تنفيض التابلوه تحديداً من شرايط الكاسيت, أنا طبعاً مش ضد سماع الأغاني أبداً, و أكيد مستشيختش مره واحده, لكن أنا مع عدم سماع الأغاني في رمضان على الأقل, عشان الأغنية مترنّش في دماغنا و إحنا بنصلّي, و متشغلش بالنا و إحنا في أي حالة من التعبد, و هحاول كمان أقللها بقية السنة لأنها تمكنت مني أو من خيالي جداً, بس هحتفظ طبعاً بشريط الأذكار و إحم إحم يمكن بشريط محمد منير :)


تنفيض دماغي..هنفض دماغي من أي حاجه تضايقها, هنفض من الناس اللي مالهاش لازمه, و من التفكير اللي مالهوش لازمه, و من أي حاجه تكون بتسحبني من الواقع, هنفض دماغي إلا من الناس اللي بحبهم و الحاجات اللي بحبها, هشرب عصير فريش و أقرى كتاب مفيد و أنفض للدنيا.


تنفيض قلبي..من همزات الشياطين, من أي حاجه عايزه تغير لونه و حالته, من أي حاجه عايزه تدنسه, من أي حاجه عايزه تأذيه, هنفض قلبي من أي هموم أو حزن, هوجه طاقاته للإتجاه الصحيح اللي تديله المتعه و الراحه, مفيش أجمل من قلب نضيف و معطر بالإيمان.


تنفيض التلفزيون..عادة مبتفرجش على مسلسلات إلا نادراً و السنه دي مش هتفرج خالص مش ناقصه شلل صراحه, هو رامز تعلب الصحراء هيكون لطيف أوي :)


تنفيض الكتابة...أيوة هنفض للكتابة و لو لفترة..قلمي محتاج أجازة , هوقفه بس مش هكسره, و زي ما دوّنا لمدة شهر محتاجين كمان ندّي القراءة حقها, على فكرة أنا كنت سعيده جداً بالشهر التدويني ده, رغم أنه كان زحمة عندي و كنت بدون تحت ظروف غريبه و مختلفه, و النص التاني بالذات الإنترنت ماكنش بيسعفني أبداً لدرجة إن نص الحاجات اللي كنت محضراها منشرتهاش, لكن سعيده إن الناس سعيده و إن مدونات و مدونين كتيييير قدموا أجمل ما عندهم خلال الشهر ده, مبسوطه من تعرفي بمدونات جديده و مبسوطه إن من خلال الحمله التواصل زاد بشكل كبير حتى لو أنا ماكنتش جزء منه.


كل سنة و إنتم طيبين رمضان كريم عليكم و على كل حبايبكم,  يا رب نستفاد من الشهر بجد و منضيعهوش, أوصيكم و نفسي بقراءة القرآن بتمعن و ختمه خلال الشهر, و أوصيكم بصلاة التراويح بخشوع قد إيه بتروّح عن نفوسنا و قلوبنا, و بتمنى إن ربنا يقدرني على الإلتزام بتعلم القرآن و حفظه, حاولت كتير للأسف و مبقدرش أكمل, مبحبش أقول الكلام ده عموماً بس المره دي تمنيت إن يمكن حد يكون عنده النيّه و يتشجع بكلامي.


ده بوست بعتز بيه جداً كنت كتباه من سنتين عن رمضان



إلى اللقاء

هناك 22 تعليقًا:

faroukfahmy يقول...

ابنتى شيرين مع ثبوت هلال شهر رمضان الكريم والتقائه بهذه الاشعاعات الايمانية وحثك بالعودة الى القرآن بنفوس عطشى وقلوب والهه فسوف نجد فيه الرؤى التنويرية التى يحتاج اليه عصرنا الفقير المعدم فى ايمانه الغنى لدرجة البطر فى امكاناته ومادياته
اما الذين اختاروا نبذ الدين طريقا والعلمانية منهجا والدنيا غاية وحيدة فقد اختاروا الموت لنفوسهم ودخلوا الحارة السد التى لا مخرجمنها

ابراهيم رزق يقول...

كل سنة و انتى طيبة
كل سنة و امن وجورى و الاستاذ هانى و بابا و ماما طيبين

حلو التنفيض بتاعك بس صعب قوى
يا ريتنى بعرف انفض

تحياتى

Unknown يقول...

أستاذ فاروق فهمي:

نورت مدونتي يا أستاذي العزيز
إفتقدتك مدونتي جداً

أشكرك و كل سنة و إنت بألف خير و سعاده مع أسرتك الكريمه

تحياتي و كل التقدير لك

Unknown يقول...

إبراهيم رزق:

كل سنة و حضرتك طيب و بألف خير إنت و أسرتك الجميله

أنا كمان لسه بجرب فب موضوع التنفيض ده ربنا يسهل :)

أنا هرد على تعليقك التاني بتاع الإشراف على التعليقات هنا..
أيوه يا أ.إبراهيم أنا إتعرضت لتعليق سافل في البوست اللي فات و من دهشتي مسحته بسرعه لأنها أول مره تحصل معايا حضرتك عارف إني مكنتش بشرف على أي تعليق..و إكتفيت بحظر الشخص ده و عملتله ريبورت لجوجل..لكن..
و ربي الذي أعبد لو تكررت مش هسكت و مش همسح التعليق لأني هعرف إزاي أجيبه و ساعتهاهعرف أحاسبه و مش هرحمه, ليست كل الطيبة ضعف.


تحياتي لحضترك
و متستغربنيش :)

Mostafa gazar يقول...

تدوينه متميزه
رمضان كريم
:-)

Unknown يقول...

شكراً مصطفى :)

رمضان كريم علينا جميعاً يا رب

شمس النهار يقول...

كل سنة وانتي بالف خير وصحة وسعادة

ومااجمل تنفيضك
ياريت الناس كلها تنفض زيك كده
:)

Unknown يقول...

شمس النهار:

كل سنة و حضرتك طيبة و بألف خير و سعاده
هي محاوله و يا رب تكمل و أعرف أنفض كويس :)

نورتيني

وصف الاحساس يقول...

كل سنه وانتي طيبه
فعلا محتاجين ننفض حاجات كتيير ربنا يعينا عليها
تحياتي

ضياء عزت يقول...

كل سنة وانتي طيبة يا دكتورة

وكل سنة وانتي منفضة

وحلوة فكرة التنفيض دي

موناليزا يقول...

البوست جميل على فكرة :)

وكل رمضان وأنتِ بخير

Unknown يقول...

كل سنه وانتى طيبه يا د شيرين بجد كنت من المستمتعين بالحمله وبدخولي مدونتك الرائعه كل سنه وانتى طيبه وربنا يعود علينا الايام بخير يارب وربنا يتقبل صيامنا وقيامنا

rona ali يقول...

اولا اولا كده كل سنه وانتى حلوة وطيبه وجميله اوى كدهو

ثانيا يعنى الله اكرم ويارب تكون ايام رمضانيه حلوة :)

ثالثا انا اتفق معاكى محتاجه انفض دماغى
جدااا التنفيض دة مبيحصلش الا في رمضان باقي السنه لا
وفي رمضان عادتا ماليش تقل علي المسلسلات بفضل الله ولا الكتابه وبنفض للفيس بوك برضوا :)

ربنا معاكى يارب التنفيض صعب شويه بس مش عليكى ;)

واتمنى دايما تكونى بخييير :)

Red Rose يقول...

كل سنه وانتي طيبه شيرين و رمضان كريم

Unknown يقول...

كل سنة و انتم و حروفكم وابداعكم بخير
تحياتي لكم و لمدونتكم الرائعة
فلطالما استمتعت بقراءة روائعها

Bent Men ElZman Da !! يقول...

شيرين الجميله :)
كل سنه وانتى طيبه ورمضان كريم عليكى يارب ان شاء الله
حبيت جدا فكره التنفيض ده
بحس اننا بنعملها تلقائى اصلا
تنفيض لاى حاجه ممكن تشغلنا عن المهم الشهر ده
تنفيض لاى حاجه ممكن تخلينا مش نوصل للاحسن اللى بنسعى ليه

كل سنه وانتى بخير .. كل سنه وانتى الى الله اقرب :)

زينة زيدان يقول...

أشكرك شيرين على هذا البوست الرائع
المتوافق مع الروح المسلمة والفطرة الطيبة

وددت أن أضيف كذلك يجب أن ننفض ألسنتنا من الغيبة والنميمة و ذكر مساوئ الغير

دعوة طيبة منكِ عزيزتي
وكل عام وأنت بألف خير
كل عام وأنت وأسرتك الطيبة بكل خير

eng_semsem يقول...

كل سنه وانت طيبه يا شيرين
تقبل الله منا ومنكم صالح الاعمال في شهره الكريم واعاننا على ذكره وشكره وحسن عبادته
تحياتي

هبة فاروق يقول...

اجمل شىء تنفيض القلب والدماغ من كل شىء عكر
دعوه طيبه منك حبيبتى تفبل الله منك ومنا صيام هذا الشهر الكريم
وكل سنه وانتى طيبه ورمضان كريم

rack-yourminds يقول...

كل سنه وانتي بالف خير

حقيقي كلنا محتاجين الي مراجعة انفسنا

اسال الله ان يرشدنا الي صالح الاعمال

Unknown يقول...

مبروك لحملة التنفيض الشاملة و عقبالي كده إن شاء الله ...

و كل سنة و أنتِ طيبة :))

Unknown يقول...

أشكركم جميعاً على تواصلكم

كل سنة و إنتم بألف خير

و كل تنفيض و إنتم طيبيبن
:)