عندي تنفيض

بدأت من فترة في حالة من التنفيض..مش بس تنفيض البيت اللي بيسبق رمضان و بيهد حيل الناس قبل الصيام..


لأ حالة تنفيض تانيه خالص


تنفيض الدولاب..كل قطع الملابس اللي مبتتلبسش لأن مقاسها إتغيّر أو موضتها راحت أو حتى قدمت, في غيرنا كتير أولى بيها, و رمضان الثواب فيه مضاعف يعني لو كل واحده نفضت دولابها و نفّعت غيرها مش يبقى أفضل من إنها تفضل محوشه اللبس و مستخسراه في غيرها, فكر في الفرحة اللي ممكن تدخلها على قلب ناس بسطاء لمجرد إنك قررت تنفض دولابك.


تنفيض الهدوم..ده غير تنفيض الدولاب, تحويل كل القطع الضيقه أو اللي مش مناسبة لمواصفات الحجاب لإستخدامات أخرى غير الخروج بيها, فكري قد إيه هتكوني جميله و إنتِ حاسه إنك خارجه بلبس مش ملفت إلا بشياكته, أنا كتبت بوست في الموضوع ده قبل كده..هنا..فكري إنك تدوري على رضا ربنا قبل ما ترضي أنوثتك, و أكيد هتترحمي من النظرات السخيفه أو على الأقل مش هتشيلي ذنبها..راحة النفس و رضا رب العالمين أهم شئ لذلك قررت أنفض هدومي.


تنفيض عربيتي..تنفيض التابلوه تحديداً من شرايط الكاسيت, أنا طبعاً مش ضد سماع الأغاني أبداً, و أكيد مستشيختش مره واحده, لكن أنا مع عدم سماع الأغاني في رمضان على الأقل, عشان الأغنية مترنّش في دماغنا و إحنا بنصلّي, و متشغلش بالنا و إحنا في أي حالة من التعبد, و هحاول كمان أقللها بقية السنة لأنها تمكنت مني أو من خيالي جداً, بس هحتفظ طبعاً بشريط الأذكار و إحم إحم يمكن بشريط محمد منير :)


تنفيض دماغي..هنفض دماغي من أي حاجه تضايقها, هنفض من الناس اللي مالهاش لازمه, و من التفكير اللي مالهوش لازمه, و من أي حاجه تكون بتسحبني من الواقع, هنفض دماغي إلا من الناس اللي بحبهم و الحاجات اللي بحبها, هشرب عصير فريش و أقرى كتاب مفيد و أنفض للدنيا.


تنفيض قلبي..من همزات الشياطين, من أي حاجه عايزه تغير لونه و حالته, من أي حاجه عايزه تدنسه, من أي حاجه عايزه تأذيه, هنفض قلبي من أي هموم أو حزن, هوجه طاقاته للإتجاه الصحيح اللي تديله المتعه و الراحه, مفيش أجمل من قلب نضيف و معطر بالإيمان.


تنفيض التلفزيون..عادة مبتفرجش على مسلسلات إلا نادراً و السنه دي مش هتفرج خالص مش ناقصه شلل صراحه, هو رامز تعلب الصحراء هيكون لطيف أوي :)


تنفيض الكتابة...أيوة هنفض للكتابة و لو لفترة..قلمي محتاج أجازة , هوقفه بس مش هكسره, و زي ما دوّنا لمدة شهر محتاجين كمان ندّي القراءة حقها, على فكرة أنا كنت سعيده جداً بالشهر التدويني ده, رغم أنه كان زحمة عندي و كنت بدون تحت ظروف غريبه و مختلفه, و النص التاني بالذات الإنترنت ماكنش بيسعفني أبداً لدرجة إن نص الحاجات اللي كنت محضراها منشرتهاش, لكن سعيده إن الناس سعيده و إن مدونات و مدونين كتيييير قدموا أجمل ما عندهم خلال الشهر ده, مبسوطه من تعرفي بمدونات جديده و مبسوطه إن من خلال الحمله التواصل زاد بشكل كبير حتى لو أنا ماكنتش جزء منه.


كل سنة و إنتم طيبين رمضان كريم عليكم و على كل حبايبكم,  يا رب نستفاد من الشهر بجد و منضيعهوش, أوصيكم و نفسي بقراءة القرآن بتمعن و ختمه خلال الشهر, و أوصيكم بصلاة التراويح بخشوع قد إيه بتروّح عن نفوسنا و قلوبنا, و بتمنى إن ربنا يقدرني على الإلتزام بتعلم القرآن و حفظه, حاولت كتير للأسف و مبقدرش أكمل, مبحبش أقول الكلام ده عموماً بس المره دي تمنيت إن يمكن حد يكون عنده النيّه و يتشجع بكلامي.

ده بوست بعتز بيه جداً كنت كتباه من سنتين عن رمضان

رائحة رمضان

إلى اللقاء