السبت، 20 أغسطس، 2011

عن الحجاب أتحدث



كنت صغيره عندما قررت أن أرتدي الحجاب, كان عامي الأول في الكلية و كانت صدمة لكل من كان يعرفني في هذه الفتره, كانوا يلوموني (ليه كده)(ده إنت شعرك كان و كان ليه عملتي في نفسك كده) بصراحة غضبت, لأن حتى من كان يبارك لي كانت في عيناه نظرة (لية)...كانت قناعتي ومازالت أني طامعه في أن أكون أكثر طاعة لربي, لم يكن قراري بناء على رغبة أهلي و لم يكن عادة في عائلتي الا للأمهات, حتى في مجتمعي حيناها في النادي و المدرسة الإنجليزية كان الحجاب شئ نادر...لكنها كانت عقيده وقرت في قلبي ليس لأحد عليها من سلطان.



قررت أيضاً مع الحجاب أن أكون مثال جيد للفتاة المحجبة...لم أكن عمري تلك الفتاة التي تتكلم كداعية إسلامية أو تأخذ جانب من الناس الذين ليسوا على نفس منهجها و لم أكن أيضاً النموذج الآخر الذي يهين الحجاب بالمصاحبة و التصرفات الغير لائقة و الأخلاق الغير حميده...كنت أتعامل مع الجميع بعفوية و رحابة صدر فكسبت حبهم لي و لمظهري.


الحجاب بالنسبة لي لم يكن غاية للزواج بل على العكس كان هاجس أن (من سأُحب حتماً سيتمنى ألا أكون مُحجبه) يداعبني و كان سبب ترددي في البداية, لكن أتاني تكذيب سريع عندما وجدت أن مُعدل المعجبين كان في إزدياد :), فعرفت حينها أن الحب أو الزواج ليس له علاقة بالمظهر, لم أريد يوماً أن يكون قرار الحجاب هو قرار زوجي ,كان يؤلمني أن أجد فتاه (وكثيراً ما حدث) ترتدي الحجاب بناء على رغبة صديقها أو خطيبها ثم تخلعه بمجرد أن يتركها الشاب, و كأنه تمثيل أو أسلوب (لترييح الزبون) و ليس له علاقة برب العالمين و رضاه.


كان مهم عندي جداً (و مازال) أن أكون فتاة أنيقة...أوازن بين مراعاة ملابسي لشروط الحجاب و شياكتها و لله الحمد لم أدخل يوماً في مجتمع إلا و سمعت جمل الإطراء على ملابسي و ذوقي, و الأسئلة الدائمه عن الأماكن التي أشتري منها, صحيح أنني أحياناً أشعر بالحرج عندما أذهب إلى مناسبة و أجدني أشيك من صاحبة المناسبة, لكن هذا لا يمنع أني لن أتنازل عن أن أكون راضية تماماً عن مظهري.


و قد قررت أن أنافس أمينة شلباية و (جويل بالصراحة أحلى)و أطرح اليوم على الفتايات المحجبات بعض النصائح لأخطاء شائعة و مستفزه.


بداية يجب أن نتفق أن للحجاب شروط و حدود لا يجب أن نتخطاها و هي معروفه و لمزيد من التفاصيل حول شروط الحجاب و آيات وجوبه وجدت أن إدراج أختي لولو كات أم هريره صاحبة مدونة المدينة الفاضله كافي و وافي, الصفات الشرعية للحجاب.


1-الlegings (البنطالون اللي شبه الشراب) و البنطالونات الslim مش حجاب و شكلها مقزز لما مُحجبه بتستعبط و بتلبسها و ممكن نلبس بدلها بنطالونات عادية الوسع أو Blue Jeans اللي بشوفه مناسب لمعظم الملابس و شيك جداً.


2- البنتاكور(البنطالون القصير) و الترواكار (ال2/3 كم) و ثني الكم لإظهار جزء من الذراع بحجة الحر أو أي حجه مش من الحجاب أبداً و شكله مُستنفر جداً.


3-البوديهات الكارينا و غيرها (اللي تقريباً 90% من المحجبات بيلبسوها) بتصف حجم الذراع و بتخليه شكله مُقرف لو تخين أو مُضحك لو رفيع...ممكن نخليها في نطاق ضيق جداً لو هيبان منها جزء صغير من بعد الكوع مثلاً, و ممكن كمان نستغنى عنها خالص و نستبدلها بشيميزات (قمصان) , كُمّها بيبقى مش واسع و مش ملزوق على الجسم زي الكارينا.


4-البنطالونات الAladin أو علاء الدين, الواسعه جداً و من عند القدم ممسوكة بأستك, بصراحة بعيدة تماماً عن الذوق و بتخّن و كتير سمعت ولاد بيتريقوا عليها.


5-البلوزات القصيره على بنطالون...لو هتلبسي بنطالون أرجوكي متلبسيش عليه حاجه أقصر من الركبة لأن تفصيلة البنطالون بتفصّل الجسم حتى لو كان واسع و بما إن المنطقه اللي بتظهرها البلوزات القصيره هي أكثر المناطق إغراء فالطرحه اللي فوق دي إيه لزمتها؟


6-الطُرح...الألوان مُهمه جداً و التغير مطلوب...ساده منقوش مفيش مشكله, لكن ربنا يخليكي إبعدي عن الفناكيش و الترتر و البرُبرُق عشان الزيطه بس...أنا بحب الstrass أو اللمعه البسيطه لكنها مش مطلوبه بالنهار بالذات...ممكن الطرح تبقى فيها تفاصيل أجمل زي إنها تكون بيليسيه أو ألوانها ديجراديه و يُفضل تكون ناعمه, حرير أو شيفون أفضل من القطن.


7-ربطة الطرحة...أنا بحب الربطه العاديه جداً , السبانش و الفناكيش و شغل المذيعات المحجبات ده بيبقى مُلفت بس مش شرط يكون شيك...خلينا نتفق إن مش كل مُلفت شيك...المهم الرقبه متبانش و تكون شروط الحجاب مستوفاه...و يا ريت البنات اللي بيعملوا فونكيشه كبيره تحت الطرحه على أمل إنهم يدوا إيحاء إن شعرهم طويل, يبطلوا لأن شكلها مش ظريف و راسهم زي الجمل كده.


8-الشُنط...زمان كنت بحب الشنط الصغيره جداً, دلوقتي إضطريت أحب الشنط الكبيره :)..بس بحاول يكون شكلها Funnky يعني ألوانها جذابه و مش شرط تكون نفس لون اللبس بس يُفضّل تكون مناسبة للحذاء, الكعب العالي ساحر بحبه جداً و برتدية معظم الوقت بشرط مايكونش مفتوح و حاطين مانيكير ( أنا كمان بحاول أبطّل :)) لأنها أكيد بتبقى مُلفته.


9-بالنسبة للي بيلبسوا عبايات ساعات بتبقى ضيقه و ده بيتناقض مع الغرض منها الأفضل تكون شكلها ملائكي و ألوانها هادئه رقيقه (بلاش الغوامق لأنها بتكبر في السن).


10-الmake-up أو المكياج...ابوووووس إيديكم بلاش الأحمر و الفوشيا و البني و الأورنج و بلاش كمان الطماطميتين اللي على الخدود و كحل كليوباترا ده راحت عليه من زمان...مفيش أجمل من الألوان الnatural الطبيعية, بطريقه بسيطة مش مرسومه رسم, و يا ريت يبقى في المناسبات بس.


11-الperfume ممكن نستبدله بbody splash بيكون خفيف ريحته مش نفاذه و في نفس الوقت بيبقى مُنعش.


12-السوارية...التطريز الكتير بيبقى مش لطيف كمان الستان اللامع مش ضروري يكون الفستان كله...ممكن يكون حزام من التطريز أو جزء بسيط من الفستان, أنا شايفة إن تفصيلة الفستان و نعومته بيبقوا أجمل كتير من كونه لامع, كمان بشوف إن تناسق الألوان و رقة الموديل مع القليل من اللمعان بيريحوا العين و يجذبوا الإنتباه (بالطريقة الصحيحه مش لفت النظر اللي بيليه نقد أو تريقه) و طبعاً الفساتين المجسمه أو الضيقه الواصفه مش من الحجاب في شئ, مش معنى كده إني بقصد نلبس جلابية لكن كل بنت لما بتبص في المرايا بتبقى فاهمه كويس إذا كان لبسها ضيق و بيبرز مفاتنها و لا مناسب و محترم.


أعزائي المشاهدين إنتهت الحلقه أرجو أنها تكون عجبتكم :)

هناك 46 تعليقًا:

ماجد القاضي يقول...

السلام عليكم

أحييك على المقال بشكل عام.. طرح راق وموضوع جميل.. جزاك الله خيرا عليه..

لكن لا أؤيد بشكل كامل كل ما عرضتيه في تفاصيل شكل الحجاب ومتعلقاته. ربما يكون لي عودة، لكن هذه تحية سريعة على فكرة المقال.

تحياتي أختي الكريمة.

ياسمين يقول...

انا اتحجبت وانا في 2اعدادي مكنتش ملتزمة بيه ..ولا حتي مقتنعة بيه خالص..عشان كدا كنت بروح المدرسة بيحي وانزل الشارع عادي..لكن مش عارفة فيه حاجة غريبة خلتني احسن ان الحجاب جزء من شخصيتي ومش ينفع اني اتخلي عنه وكمان موضوع الشياكة دا ملوش دعوة بإنك محجبة بالعكس انا شايفة ان المحجبات بيعتموا بشياكتهم أكثر ياتري الطرحة هتمشي مع اللبس والجزمة لازم تكون لون الشنطة ..يعني الاهتمام بالمظهر باعتداء..شيء كويس..شكراا شيري

ابراهيم رزق يقول...

احم احم
ممكن اخش انا بخبط اهو
انا كنت هامشى بس قلن اخش و خلاص ما اهو كله ثقافة و ممكن نقول من وجهة نظر ذكورية
اختى العزيزة شرين
انا هاحكى عن تجربة زوجتى هى كانت غير محجبة قبل الخطوبة و لم اطلب منها ان تتحجب حتى بعد الزواج لدرجة ان ست جارة لى كبيرة نادتنى من البلكونة و قالت لى هى زوجتك مش اتجوزت خلاص متحجبتش لحد دلوقتى ليه و فجاة اثناء خروجنا لقيتها بتلبس طرحة و كانت العملية متعبة نصف ساعة فى الطرحة دلوقتى هوا الحجاب قرار شخصى من المرء
طبعا انا هاقول وجهة نظرى فى لبس المحجبات و دى وجهة نظر شخصية
ليس معنى الحجاب الا تهتم المراة بمظهرها بل يجب ان يكون و سطا مثل ديننا تماما
الاكسسورات المبالغ فيها بالنسبة للمحجبات فى اليدين و الصدر
افضل ملابس هى الجينز العادى او بنطلون عادى و شميس طويل عملى و شيك و غير ملفت للنظر
با النسبة للروج بلاش الاحمر و الفوشيا و البنى و الاورنج هو فيه الوان تانى
هههههههههههه

مع احترامى للاسدال و من يرتديه هو للبيت فقط و الصلاة اما من ترتديه فى الخارج فاشعر ان من ترتديه عبارة عن راس فقط مثل التماثيل الفرعونية
متفق معكى تماما فى بقية البوست
ايه الرغى اللى انا راغيته ده
اسيبكم بقى عشان تاخذوا راحتكم

تحياتى

Radwa Ashraf يقول...

موضوعك جميل أوووى و بتفق معاكى فى حاجات كتيرة
لأنى كمان معظم الحاجات دى بتضايق لما أشوف محجبات عاملينها
بكون عايزة أقولهم .. طيب إيه لازمة الحجاب ده ؟
و هو طبعا إقتناع و مش معناه أنك متكونيش شيك !!
تسلم إيدك يا جميلة .. =)

سواح في ملك اللــــــــــــــــــه- يقول...

احيانا اشوف محجبات

مغريات المنظر اكثر من السافرات

فلايكون تعليقي اكثر من جملتين

يمكن شعرها وحش

او مكسلة تسرح شعرها

عشان كدة هي محجبة من شعرها بس

تحيتي

دعاء العطار يقول...

ههههههههههههههههه

عسسسسسسسسسل وربنا ياشيرين

ضحكت كتير اوى وانا بقرا البوست ده وكله كوم وراس الجمل كوم تانى .. هما فعلاً بيعملوا كده عشان يبان اتن شعرهم طويل ؟!

متفقه معاك تقريبا فى كل كلمه قولتيها

الحاجه الوحيده اللى لسه مااعرفش هل هى حلال ولا حرام البنطلونات

انا بحب لبس البنطلونات جدا بحس انه عملى خاصة انى كنت بشتغل صحافه وكنت بحتاج تنطيط كتيييييير

لكن بصراحه معرفش هو حلال ولا حرام وفيها كلام كتير

بس كل اللى انتى قولتيه انا مؤمنه بيه تماماً

بجد ربنا يجازيكى خير ع موضوعك الجميل ده (: (:

شمس العصارى يقول...

اللى ملوش دعوة بالنصايح يعلق ولا ايه ههههههه
انا بضحك على بنطلونات علاء الدين وبسميها زى الصيادين
المهم
اجمل شئ الاقتناع
" ان سعادتى فى ايمانى .... وايمانى فى قلبى .... وقلبى لا سلطان عليه الا الله "
دمتى طيبة

سندباد يقول...

موضوع جديد وشيق
يعجبني التنوع والتغيير في موضعاتك
وربنا يهدي الناس جميعا
تحياتي لقلمك الرشيق

د/دودى يقول...

ايه ده كله ؟؟!!...برنامج ولا برامج الموضه بس على محجباتى ...انا اشتريت لبس السنه دى خلاص و عموما هو تقريبا نفس الاستايل بتاعى لان الدراسه تقتضى جينز و تونيكات و الطرح العاديه كعادتى و ربنا ما يقطع لنا عاده

eng_semsem يقول...

جميله النصائح وجميل الموضوع
والاجمل الاقتناع بيه
وانا كراجل مش بتلفت انتباهي واحده مش محجبه انها تكون زوجه والمحجبه مغطيه راسها مش اكتر وبقيت لابسها مش كويس بقلق جدا منها بحس انها مخادعه
جزاكي الله خير

Bent Men ElZaman Da !! يقول...

بجد رائع يا شيرين الموضوع
التمهيد اللى فى الاول كمان عاجبنى اووى
تسلم ايدك على النصايح دى :))

mira@ يقول...

اختلاف الرأي لا يفسد للود قضيه
بتفق معاكي في شوية حاجات كده
بس بصراحه مش بحب البناطيل وخصوصا انها عليها اختلاف كتير
وانا بحب اتقي الشبهات
وفالاخر اسأل الله الهدايه للجميع
موضوع جميل :)

reemaas يقول...

ههههههههههههههه وربنا انتى سكر
ومتفقه معاكى جدا خصوصا فى حكايه البروبرق وراس الجمل
ولا العبايات يعنى واحده تقولى انا مش هلبس بناطيل وهعقلب عبايات اقولها كويس اجى الاقيها لابسه عبايه هتفرقع عليها بقى عاوزة اصوت البنطلون كااااااااااان ارحم
ولال الستريتشات اللى طالعه ويتلبس عليها دريل واسع دى ياساتر

بس انا مختلفه فى حاجة مع الاستاذ ابراهيم الحجاب مش قناعه شخصيه الحجاب فريضه

FAW يقول...

طبعا البوست للجميع ومفيش فرق بين ولد وبنت :)


حلوة المقدمة التمهيدية رغم إني برضو إتفاجئت أول ما الأرقام بدأت وحسيت إن ميس إيجيبت بتتكلم (مش تريقة خالص والله)

الكلام جميل قوي وأحب أضم صوتي لصوتك في موضوع بناطيل "الصيادين" :) . . والفونكيشة اللي بحس إن البنت عبارة عن دماغ . . alien awe . . :))

فعلا الحجاب لازم ييجي عن قناعة , مش عادة وخلاص ومش إجبار . .

مش عارف ليه بتضحكني قوي ديجراديه وبوليروه والأسماء العجيبة بتاعت البنات دي :))

موضوع جميل كالعادة

تحياتي . .

naysan يقول...

صباح الخير شيرين
ملاحظاتك كلها في محلها والله يقوي ايمانك ويثبت قلبك على الايمان ان شاء الله.

الحمدلله ان قرار الحجاب ليكي كان عن اقتناع شخصي وبدون ضغط او تقليد
وسبحان الله المحجبه عن اقتناع بتشعر بعزه وبكرامه داخليه بتخليها متمسكه به ومحافظه عليه من اي شبهه
.... اما لما يكون الحجاب مش بقناعه تامه من صاحبته بيتحول الى استعراض وشو واشياء غريبه مضحكه ومستفزه زي اللي ذكرتيها في البوست :)

ربنا يهدي بناتنا وشبابنا ويثبتهم على دينه يا رب.

شيرين سامي يقول...

ماجد القاضي: و عليكم السلام و رحمة الله و بركاته أستاذي العزيز حمد لله على سلامتك نورت المدونة بعد طول غياب...سعيده إن الموضوع و الطرح أعجباك...و كنت متوقعه إن ملاحظاتي أو نقدي لأشكال خاطئه في الحجاب قد لا تنال إعجاب البعض..إنتظرت أن تزورني مره أخرى لأسمع منك أكثر لكن دعني أتوقع رأيك لأنه يشبه كثيراً رأي أخي الأكبر.
أعتقد أنك غير موافق على فكرة البنطالون لأنه في رأي الكثير من الفقهاء فيه تشبه بالرجال..و لا أستطيع أن أعارضك لكن أنا سألت يوماً شيخ و أخبرني أنه طالما هناك ما يخفي تفاصيل الجسم فوق البنطالون فلا مانع من إرتداءه و هذا ما قصدته..و الغرض من البنطالون هو غرض عملي ليس أكثر لأن الفساتين و الملابس الفضفاضه دون شئ محكم تحتها مثل البنطالون لا تبدو عمليه.
و أراك تقصد المكياج لكن أنا ذكرت أيضاً أنه من الأفضل إختذاله على المناسبات...أما إذا كنت تقصد الbody splash فهو للعلم ليس من العطور في شئ هو فقط ليجعل الرائحه نظيفه و منعشه لمن يقترب...و للأسف يا أستاذي الكثير من المحجبات و المنقبات بالذات أشتم منهم رائحة العرق بشكل منفر...و هذا يبدو لأنهم يخشوا إستخدام مزيل العرق أن يكون له رائحه نفاذه و هذا خطأ غير صحيح...و المسلم يجب أن يكون مثال للنظافة و كل شئ طيب.
أتمنى أكون رديت على عتاب حضرتك على الموضوع و حتى إن لم تقتنع فلديك كل الحق.
لكن ملحوظه صغيره أنا وضعت لينك لولو كات عن مواصفات الحجاب الصحيحه أما أنا فكنت مجرد أصحح أخطاء شائعه بين الشابات المحجبات و إيجاد بدائل عصريه قد لا تتعارض مع مواصفات الحجاب.
سعيده بزيارة حضرتك مره أخرى و أتمنى أن تقرأ هذا الرد الطويييييل :)

تحياتي و كل التقدير لحضرتك

شيرين سامي يقول...

ياسمين: 12 سنة؟؟ و أنا اللي إفتكرت إني إتحجبت صغيره :)...بصي يا ياسو هو عدم الإقتناع بالشئ يجعلنا غير ملتزمين به بجديه و حب و الحمد لله إنك إقتنعتي و وجدتي نفسك فيه و بتفق معاكي إن الحجاب بيساعد البنت أكتر إنها تكون أنيقه و تراعي التناسق في كل شئ.

تحياتي الخالصه ليكي
نورتيني بالزياره

شيرين سامي يقول...

إبرايهم رزق: جميل إنه يكون قرارها و جميل إن حضرتك مأجبرتهاش أو حسستها إنها رغبتك إنت بس...بس كلك كده مكنتش مشجعها و دي مشكله يعني واحده صاحبتي بتعاني عشان إتحجبت و جوزها مش عاجبه و عمال بيتريق عليها و يحسسها إنها حاجه غريبه...بجد مشكله.
عجبني إن حضرتك مؤمن إن الحجاب لا يتعارض مع إهتمام المرأه بنفسها...بالنسبة لموضوع الروج فأنا هعذر حضرتك لأنك راجل و مش عارف إن فيه و لا مليون لو روج و لو لا حظت الأجانب في معظم الأوقات عمرهم ما بيحطوا الألوان الفاقعه اللي العرب بيعشقوها, لأن فيه درجات و ألوان كتير أقرب للطبيعي مجرد تنور الوش.

مفيش رغي و لا حاجه أنا بحب التعليقات الطويله بالذات تعليقات حضرتك :)

تحياتي و كل الإحترام ليك
نورتني

شيرين سامي يقول...

Radwa Ashraf: أنا كمان بتفق معاكي يا جميل و المفروض مع مراعاة الصفات الشرعية للحجاب نراعي الذوق و الشياكه عشان نكون مثال محترم للحجاب.

أرق تحية ليكي و شكراً كتير على الزيارة

شيرين سامي يقول...

سواح في ملك اللـــــه: هههههههه و الله عندك حق...وجهة نظر بردو ...هما غالباً متحجبين عشان يتجوزوا أو عشان سلو بلدهم...و الله أعلم.

تحياتي ليك

haneen adam يقول...

السلام عليكم غاليتي

طرح مميز جعله الله في ميزان حسناتك و شاهد لك يوم العرض نكون نحن شهداء عليه و هدا بك بنات المسلمين

بس عند استفهام . . الحجاب هو فرض ملوش علاقة بالحريات الشخصية لكل فتاه مسلمة بلغت !!

يبقى مش زوق و مش حرية فرض على كل مسلمة

و هو كمان مش مخيف لدرجة هادي هو مساله تعود بس مش اكتر و ما اجمل المحجبات

هو اجمل شي بالمراة وجها و الاشارب ( الطرحة ) بيكون بمثابة برواز يظهر جمالها مش يخفي و بعدين كل محجوب مرغوب . . نحنا عندنا البنت المش محجبات نادرة و البنات بيلبسوا الاشارب من المدرسة تلاقيها متعوده علية و ما في النظرات الي ليه التي قلتي عليها في بداية المقال بس لا أخفي عليكي أني مأخرا بت اشك بالحجاب . . ما عاد حجاب يا اختي . . و حتى الازياء الشرعية متل العبايات باتت فساتين سهرة . . فالنصائح جاءت بمحلها . . هدا الله بك بنات المسلمين و ردهن الى الاسلام ردا جميلا

البساطة و الاحتشام زينة الفتاه المسلمة الحيية

تقبلي مروري و تحياتي

zizi يقول...

شيري الحبيبة ..وحشتيني قوي لقيت الموضوع شيق فدخلت ..بصي يا حبيبتي انا حاتكلم من وجهة نظر ست كبيرة لكن عصرية"بإلتزام غير مخل "فمعظم اللي بتقولي عليه افضله وبالنسبة للبنطلون انا لا استطيع ان البس العباءة الطويلة لأنها تعيق حركتي ولكني اما ان ارتدي بنطلون وعليه تونيك طويل اوعليه بلوزة فضفاضةاما البدل فممكن البسها في المناسبات فقط وبرضه الجاكيت معقول مش مكسم قوي ..وكنت قبل كده احب قوي البس الكعب العالي دلوقتي ممكن البس الكعب اللي بيبقى النعل كله قطعة واحدة عشان بيدي راحة للرجلين وتناسق للجسم ..وبرضه بيعجبني قوي حجاب بنتي ودايماً بتنقي الوان الإيشاربات جميلة تحسي انها بتعبر عن حالتها النفسية وبنطلوناتها واسعة او غير مكسمة وبلوزاتها طويلة وانيقة وبجد بجد مش عشان بنتي انا باحس انها واخدة الحجاب كواجهةللمرأة المسلمة فتحبي تشوفيها بالحجاب اما من ناحية المكياج فأنا وبناتي نكاد لا نضعه الا في القليل النادر ولعلمك لما بنحط حاجة بسيطةبتغير تماماً لأنها غير معتادة ..
انامعكي في شيء ضروري في التحجب ..البساطة سر الجمال لأن التنطع في ربطة الإيشارب او وضع طبقات غريبة من الربطات فوق بعضها
لا يعطي الإحساس بالراحة .ز
و اخيرا..ارجو الا اكون قد اطلت عليكي ..وتقبلي تحياتي وشكريي

ابراهيم رزق يقول...

اختى العزيزة شرين

انا اعرف ان انواع الروج كثير و درجات و ارقام انا كنت بهزر
هههههههههه

تسمحى لى ان اوضح نقطة هامة لكل اخواتى الاسلام ساوى فى الحقوق بين الرجل و المراة و منها التعطر فيجب على كل مسلمة ان تكون رائحتها طيبة
يوجد حديث شهير بين النساء عن التعطر و هو حديث موضوع و انا لا احب ان اتكلم فى المواضيع الدينية لكنى ادعو كل اخت الى قراءة كتاب الاحاديث الموضوعة للدكتور احمد شوقى الفنجرى لتعرف الاحاديث الموضوعة عن المراة التى تحد من حريتها كثيرا و لعلمك يا شرين هذه شهادة لوجه الله حضرت ندوة دينية بالشركة زمان و حضرها فضيلة الشيخ المرحوم عطية صقر و سئل عن البنطلون و اباحه و قال حكمه مثل حكم الفستان و العباية قد يكون حلال و قد يكون حرام و قال بالنص فى عصرنا معظم البنات تنزل الى العمل و البنطلون عملى بالنسبة لها
مشكلتنا ان معظم الفتاوى نأخذها عن ائمة فى عصور ماضية مع ان كل امام يعبر عن عصره
تسالينى عن رائى الشخصى اقول لكى الانوثة فستان
ههههههههه
طالما فتحت فى التعليق خلاص فى مهرجان القاهرة تعرفون انى متابع للسينما تنقسم النجمات المصرية الى فريقين فريق بقيادة المرحوم محمد داغر و فريق بقيادة هانى البحيرى و كل منهما يقف على الريد كاربت فى انتظار اعضاء فريقه لعمل دعاية له و من بعيد يقف فريق بقيادة ايمان (ايمى) طبعا نشاهد مهازل فى الموديلات من ضمنهم رزان مغربى ارتدت مرة فستان بماتور و كان بيلف من اسفل
نأتى الى الاجانب مثل جوليت بينوش و سوزان ساراندون نأتى الى الممثلة التى انتظرها الجميع سلمى حايك انتظرها الرجال و النساء فوجئنا بها ترتدى فستان بسيط جدا جدا و يمكن ان ترجعى الى صورها فستان بسيط جدا جدا يمكن ان ترجعى الى صورتها فى المهرجان و با المرة تشاهدى فساتين النجمات العرب
رغيت كتير بس اعمل ايه لكن الجزء الاول هام جدا ارجو ان نهتم به
تحياتى

re7ab.sale7 يقول...

جميل جدا يا شيرين
بس الحقيقية اللي شايفنها غير كدة خالص
بيكفي اني اقولك اني ف يوم وانا ف المحاضرة دخلت بنت منتقبة ....وليست محجبة فقط
ومعرفش كانت لابسة اية اصلا
كفاية اني اقولك ان المدرج كله ساب دكتور هاني يشرح وفضل يبص للبنت لغاية ما راااااااحت اخر المدرج
ولغايةى دلوقت معرفتش هي كانت لابسة اية ...؟
هي كانت لابسة نقاب بس علي اية معرفش جنز استرتش غريب وعباية مفتوحة غريبة وطرحة اغرب وميك اب للعيون افظع
بصي
التليفزيون ومجلات المحجبات خلت انواع الحجاب زفت الزفت
معلش يا شيرين
بس برضه جميلة بجد اراءك

الحسينى يقول...

Shereen I can't give a comment cs I'm on mobile but anyways my advice for the girls keep it simple clean and always remember that not every new fashion suites u nice topic ya shereen though I don't agree in some points. :)

شيرين سامي يقول...

دعاء العطار: ربنا يخليكي يا دودو ده من ذوقك يا جميل إنتي اللي زي السكر :)
بصي هو أنا كمان مقدرش أفتي في حتة البنطالونات دي بس أنا مجرد كتبت رؤيتي و ملحوظاتي على لبس المحجبات مش أكتر :)
نورتيني و اسعدتيني بالزياره
تحياتي ليكي

شيرين سامي يقول...

شمس العصاري: طبعاً تعلق براحتك المدونة مدونتك :)
أشكرك على الجمله الأخيره رائعه و مناسبة جداً.
تحياتي الخالصه لك

شيرين سامي يقول...

سندباد: أنا اللي بشكرك على تعليقاتك الرائعه و تشجيعك الدائم.
نورتني و أسعدتني بزيارتك
تحياتي و كل الإحترام لك

شيرين سامي يقول...

د/دودي: ربنا ما يقطعلك عاده :)
بحب شراء اللبس جداً..مُتعه:)
نورتيني يا جميل

شيرين سامي يقول...

eng_semsem: أنا كمان بشكرك على تعليقك الجميل ده و فعلاً اللي مش بتحترم حجابها بتدي إنطباع (مُخادع)

شكراً تاني يا أسامه و سعيده بزيارتك
تحياتي ليك

شيرين سامي يقول...

Bent Men ElZaman Da : تسلميلي و بجد بفرح بمتابعتك...سعيده كمان إن البوست عجبك, يا رب دائماً منوراني :)
أرق تحية ليكي

شيرين سامي يقول...

mira@: أشكرك يا عزيزتي على التعليق و أكيد مش هنختلف ربنا بثبتك و إنت أكيد عندك حق في إتقاء الشبهات.
سعيده بزيارتك و نورتيني :)

شيرين سامي يقول...

reemaas :نور الجميله مبسوطه إن البوست عجبك للأسف أنا كمان ساعات بشوف عبايات ضيقه بتبقى مش ظريفه خالص.
بصي أنا أفتكر أستاذ إبراهيم يقصد إن الحجاب لما يجي عن قناعه بيبقى أفضل لكن أكيد الحجاب فرض مفيش كلام.
نورتيني يا جميل

شيرين سامي يقول...

FAW : ولا يهمك يا مصطفى البوست للجميع عادي :)
ميس إيجبت حتة واحدة:)...لأ بجد حاجات كتير بتنرفزني في لبس البنات و حاولت أجمع النقط العامه يمكن حد يستفيد...أنا كمان بضحك أوي على بنطالونات علاء الدين :)
مالها بقى لغة البنات مش رقيقه بالذمه:)

تحياتي ليك و سعيده إن البوست عجبك

شيرين سامي يقول...

naysan: صباح الورد و الياسمين نيسان :)
بتفق معاكي جداً في إن المحجبه عن قناعه بتحس بعزه و فخر بحجابها و سعيده إن ده حالي و بتمنى معاكي الثبات و الهدايه لكل الشباب و البنات.
سعيده و جداً بزيارتك الرائعه
نورتيني عزيزتي

شمس النهار يقول...

بجد بجد بوست جميل
بل رائع

كان نفسي البرامج الدينية المنتشرة الان تتكلم عن ده
وخصوصا مشاهير الدعاة
ربنا يجعله في ميزان حسناتك

والرك علي الام في البيت اللي مش بتوجه ابنتها

فتاه في زمن غريب يقول...

كلامك حلو جدا و دة اللي انا براعيه و بحب مش غصب عني الحمدلله بس كان ليا تعليق علي المكياج و كدة انه لي اساسا تحط مكياج الواحدة المفروض انها راضية بخلقة ربنا هي كدة بتعدل علي خلق ربنا دي حاجة الحاجة التانية الكعب العالي مش محبب لان الواحدة بتمشي تتكتك ف الشارع فدة بيبقي ملفت للانتباه و كمان لعن الله نساء كاسيات عاريات مائلات مميلات يضربن بخمرهن ليبدين ما يخفين من زينتهن لغير بعولتهن انا زمان كنت بحبه بس دلوقتي ممكن يبقي مستوي يعني و يا ريت متكونيش اتدايقتي من تعليقي دي اول مرة و اتمني متتدايقيش
السلام عليكم و رحمة الله و بركاته

Timo.. يقول...

والله انت حببتيني اكتر في الحجاب يا شيرين..
وبجد اللي بيعمل حاجة وهو مقتنع بيها بتكتسب الجمال منه وبتبان احلى واحلى عليه :)

انا اتعلمت النهاردة مجموعة مصطلحات جديدة:

Aladin
legings
الفناكيش
الترواكار
ديجراديه

عشان اعرف اتنطط شوية قدام فريدة :)

كل سنة وانت طيبة يا شيرين :)

شيرين سامي يقول...

haneen adam: و عليكم السلام و رحمة الله و بركاته أهلاً و سهلاً بك نورتيني في أول زياره و أسعدتيني بالتعليق المميز :)
أتفق معك طبعاً أن الحجاب فرض و أمر من الله سبحانه و تعالى و لكن في مجتمعنا في مصر الأغلبية تتعامل معه كعاده أو تقليد للأسف يغفلون فضله و شروطه و أنه طاعه و تقرب الى الله, و تحاول الكثيرات الجعل منه مجرد غطاء للرأس و هذا ما أستنكره جداً.
أما عن أن الحجاب يجعل الفتاه أجمل فهذا رأيي أيضاً كم جميل أن تكون تفاصيل الفتاه سر لا يعرفها الا حبيبها و زوجها...و كم جميل الوجه عندما يبرزه الحجاب.
أشكرك وسعيده جداً بزيارتك أتمنى أن تتكرر و يدوم التواصل
تحياتي و تقديري لكي

شيرين سامي يقول...

ZIZI:ماما زيزي العزيزه جميل إن حضرتك بتهتمي بأناقتك و مش بتستسهلي زي أمهات كتير :)...و أجمل حاجه و السر في أي جمال هي البساطه زي ما حضرتك ذكرتي عشان كده نفسي البنات تبطل بهرجه و يعطوا الحجاب ما يناسبه من بساطه و أناقه.
نورتيني و أسعدتيني بالزياره
تحياتي و حبي لحضرتك

شيرين سامي يقول...

إبراهيم رزق: فعلاً الجزء الأول مهم و ده قناعتي الشخصيه إن أي شئ ممكن يكون حرام أو حلال حسب معاير كتير و أكيد بنطالون واسع أفضل من فستان ضيق...فتوه مهمه أشكرك عليهاو في الآخر كل إنسان له حساباته و رؤيته و أظن أن إتقاء الشبهات خير من البحث عن فتاوي تبيح و أخرى تحرم عشان كده مقدرش ألوم أي حد بيختلف معايا لأنه ممكن يكون أفضل عند ربنا من عشرة زيي :)
بحب أتفرج على لبس الفنانات في المهرجنات صحيح مش بيعجبني كله بس في حاجات تفاصيل صغيره من هنا على هنا بقدر أطلع بأفكار حلوه...فاكره فستان سلمى حايك بس مكانش موضوع بساطه أنا حسيت إنها مستهتره بالمهرجان ده اللي وصلني لأني بشوف فساتينها في مهرجانات برّه بتبقى سينيهات و ذوقها بيبقى أعلى كتير.
سعيده بتعليقات حضرتك جداً و يا رب دائماً منورني.
:)

شيرين سامي يقول...

re7ab.sale7 : رحاي الجميله نورتيني بزيارتك...بصي أي واحده بتلبس وحش أو غريب أو مقزز بتمثل نفسها مش بتمثل الحجاب أبداً.
لأن الحجاب فريضه جميله مُحببه لمن يفهمها و يفعلها بحب لكن البنات اللي زي اللي كنتي بتحكي عنها المشكله عندهم هما لأنهم أساءوا لنفسهم مش للحجاب.
أنواع الحجاب(الزفت) و لو إني مش بتفق معاكي في الكلمه لكنها بتيجي من الكليه من النادي من وسط المجتمع المتناقض لكن الحجاب في التليفزين و المجلات نادر و مش سئ لهذه الدرجه.
سعيده بزيارتك و تعلقيك يا جميل
تحياتي ليكي

شيرين سامي يقول...

الحسينى: أخي العزيز المدونه نورت بزيارتك :)
كان نفسي أعرف بتختلف معايا في إيه؟ يمكن لأن غالباً أفكارنا بتتشابه و بتفق معاك طبعاً في البساطه.
تحياتي ليك

شيرين سامي يقول...

شمس النهار: مبسوطه أويييي أن البوست عجب حضرتك و طبعاً منكرش إن أمي دائماً بتشجعني على الإلتزام في كل شئ لكن بصراحه هي مبتفهمش في اللبس :))

نورتيني تحياتي و حبي لكي

شيرين سامي يقول...

فتاه في زمن غريب : و عليكم السلام و رحمة الله و بركاته أهلا بيكي في أول زياره و أتمنى تتكرر:)
اكيد مضايقتش أبداً لأن كل إنسان حر في وجهة نظرة و لأنك يا عزيزتي متكلمتيش غير صح و عن حب في الله و طاعته, على فكرة أنا مبحطش ميك أب غير في المناسبات لكن رأيي فيه كان بناء على إن البنت اللي بتحب تحط ممكن تضع ألوان هادئه طبيعيه متثيرش الإنتباه و قلت كمان إن لو محطتش يبقى أفضل.
و بالنسبة للكعب لي وجهة نظر إن اللي بتحب تمشي بطريقه ملفته أو (مايصه) مش هتفرق معاها و أنا رغم إني بحب ألبس كعب إلا إني بجد بمشي زي الألف :)و عموماً رأيك يحترم و جزاكي الله خيراً عنه.
سعدت جداً بزيارتك و تعليقك الرائع و مناقشتك الجميله
نورتيني
أرق تحية لكي

شيرين سامي يقول...

Timo..: تيمو بجد مبسوطه إن ده الإحساس اللي وصلك و فعلاً جمال الأشياء من جمال إحساسنا بيها :)
إتنطط براحتك بس هي أكيد عندها مصطلحات أكتر إنت لسه متعرفهاش :)
نورتني
تحياتي ليك و كل سنة و إنت بألف خير