الثلاثاء، 9 يوليو 2013

و للكلمة ألف معنى


كل سنة و إنتي طيبة
لمّا أمي قالتهالي كُنت عارفه إنها بتدعيلي إن رمضان يعدّي عليه و أنا سعيدة و مرتاحه و قُريبة من ربنا

كل سنة و إنتي طيبة
لمّا إبني قالهالي كُنت عارفة إنّه بيفكّرني أجيبله الفانوس اللي لسه مجبتوش

كل سنة و إنتي طيبة
لمّا أختي قالتهالي كُنت عارفه إنها بتقولي فاكرة زمان و إحنا بنقضّي رمضان كله سوى

كل سنة و إنتي طيبة
لمّا صَحبتي قالتهالي كُنت عارفة إنها بتعاتبني عشان بقالي كتير مكلمتهاش

كل سنة و إنتي طيبة
لمّا جاتلي على الميل من معظم شركات الدوا كُنت عارفه إنهم بيقولولي متنسيش ملفاتنا يا دكتورة

كل سنة و إنتي طيبة 
لمّا جاتلي في رسالة من زوجي رغم المسافات
كانت حروفها بتقول لسّه بحبــــك

و لمّا هتقولوهالي دلوقتي هبقى عارفه إنكم بتهنوني برمضان :)

كل سنة و إنتم طيبين رمضان كريم غصباً عن الألم



هناك 16 تعليقًا:

ابراهيم رزق يقول...

اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق

الاستيماره

اصحى يا نايم

وحد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحد الرزاق

رمضان كريم
فواد حداد

هههههههههههههههههههه

كل سنة و انتى طيبة
كل سنة و انتى شرين
كل سنة و وانتى و انا و هم طيبين
يعنى كل سنة و مصر طيبة

رمضان كريم عليكى و على عيلتك يارب

تحياتى

Unknown يقول...

ههههههههههه
رمضان كريم يا استاذ إبراهيم
بعلق عندك في نفس اللحظة اللي إنت بتعلق عندي :)
يا رب يبقى نفضل كل سنة طيبين و بخير و لو إنه صعب :)

سعيدة بتواجدك بجد

مروه زهران يقول...

كل رمضان وانتى بألف خير وصحة وسعادة وكل أسرتك يارب

مصطفى سيف الدين يقول...

كل سنة و انتي طيبة
و رمضان كريم
كل سنة و انتي و الاسرة متجمعين في فطار اول يوم
و ربنا يتقبل صلاتنا و صيامنا و ركوعنا و سجودنا
اللهم امين

aya mohamed يقول...

كل سنة وانتِ طيبة
هى فى حد ذاتها امنية ان كل سنة نبقى مع بعض و اقولك نفس الجملة لسنين كتير
رمضان كريم عليكى يا حبيبتى :*

Hayat يقول...

كل عام وأنتِ بألف خير و صحة وسلامة و سعادة وحب و كل أسرتك حولك في رخاء و سعادة
رمضان كريم

جميلة التدوينة :)

yosef يقول...

ولما بقولك كل سنة وانتِ طيبة
اعنيها واتمناها لكِ ولكل احبتكِ
ولمصر الغاليّة التي هانت على اهلها وتاجر بحبها المنافقون والمزيّفون

مش حقول اكثر
ولكن
حسبيّ الله في كل من تسبب بإراقة نقطة دم من المصريّين كائناً من كان

ورغم الالم والمعاناة
كل سنة وانتِ طيّبة ابنتي وصديقتي العزيزة

يوسف

فاتيما يقول...

كل سنة وانتى أرق نسمة عطر
بتعدى علينا
ف وسط الجو الملخفن دا يا شوشو

كل رمضان وانتى ف أحسن حال
وراضية ومتهنية
واحبابك بيكتروا
وعدوينك ربنا بيرد كيدهم
ونجاحاتك بتزيد
و كلامك الحلو بيقولنا ....
و بحبك يا صديقتى العزيزة
ودى ملهاش
الا معنى واحد بس
انك حبيبتى بجد
:-*

للنشر أو لأ
زى ما تحبى

Bent Men ElZman Da !! يقول...

كل سنة وإنتِ طيبة وروحك قريبه مننا زي ما إنتِ :)
رمضان كريم عليكِ يااارب :*

Unknown يقول...

مروة زهران:

ربنا يخليكي يا مروة و كُل سنة و إنتي بألف خير و سعادة :)

Unknown يقول...

مصطفى سيف:

شكراً يا مصطفى :)
كل سنة و إنت طيب و مُبدع و بألف خير

Unknown يقول...

آيه محمد:

الله أكرم يا آيه يا جميله :)
و أنا بحب الأُمنيات
كل سنة و إنتي طيبة و مبدعة و جميلة

Unknown يقول...

يوسف:

المدونة نوّرت :)
أشكرك يا استاذي و صديقي العزيز يوسف على كلامك و مشاعرك الطيبة بجد :)

مش قارده أفكّر في حال البلد و لا اللي بيحصل بس أقدر أقولك إن كل واحد من التمانين مليون له تفسيره الخاص و رؤيته..عن نفسي مش قادره أثق أو أصدق أي طرف لأن الطرفين متورطين بالدم.

ما علينا بلاها سياسة :)
ربنا يصلح الحال
و كل سنة و إنت بألف خير و هنا
إنت و أسرتك الجميله

Unknown يقول...

فاتيما:

كل سنة و إنتي طيبة يا صديقتي الجميلة الطيبة..تعرفي يا فاتيما أنا بحس بقدر من الصدق في كلامك و الله العظيم أكتر من أي حد لدرجة ممكن تخليني أدمع حتى لو الكلام عادي بس مش عارفه ليه بيأثّر فيّه..فيكي سرّ :)

أنا كمان بحبك إنتي أكيد عارفه :)

نشرت تعليقك يا فاتيما عشان أنا بأتباهى بمعرفتي بيكي
:)

Unknown يقول...

بنت من الزمن ده:

كل سنة و إنتي طيبة يا دندونة :)
ربنا يخليكي يا جميل

Unknown يقول...

حياة:

كل سنة و إنتي طيب و يا رب تحققي كل سنة اللي بتتمنيه :)