الثلاثاء، 30 يوليو، 2013

كتّر شيرك


مِكملين!!
مِتجمعين!!
بكُل أشكالنا و ألوانا راجعين
عيش للناس!!!!!!!!!!!!

لأ فينا الخير بجد
إعلاناتنا بتشبهنا
و حُبنا لبعض
و خوفنا على بعض

وبحتاجلك وتحتاجلي .. مابينا ألف حلقه وصل
وبشبهلك وتشبهلي .. في حُب الخير وطيبة الأصل!!!!!


إنسانيتنا الطاااااغيه
تقبُلنا للآخر
و إحترامنا للمُعارضين لآراءنا

رمضان أهو هلّ علينا هوااا .. هنشيّر طول الشهر سوااا

المصري أصيل بيحب الشير .. وبيفرح لمّا يدي الغير

مبنشمتش و مبنشتمش و مبنخوّنش و مبنكيلش بمكيالين
كتر شيرنا بجد!!

سيبكم من كلام الإعلانات و من كل اللخبطه و الإحباط اللي بنمُر بيهم
إحنا فعلاً شعب عنده تكافل عظيم و عاطفه كبيرة و أصل طيب لكن مشكلتنا إن كتير منا (خرفان) مش بمعنى إخوان اللي تحفظت عليه و عمري ما إستخدمته لكن بمعنى سياسة القطيع..لمّا بنثق في فكرة أو توجُّه أو في حد بنديله دماغنا..و صعب نغيّر من أفكارنا
عشان كده أنا بحترم جداً اللي بيفضل على مبادئه لكن عنده مرونه و ممكن يغيّر من آراءة وفقاً للعقل و المنطق و الإحساس..لأنه إنسان مش مجرد ماكينه!
المُهم
كُل يوم أطفال بيموتوا عشان مفيش لبن أو أدوية أو أجهزة مُعينه في مستشفيات الأطفال الحكومية باللذات اللي محدش مهتم بيها و لا عندهم فلوس يعملوا إعلانات..
خلينا نعمل خير في رمضان قبل ما يعدي مننا 
أنا هعمل ظرف زي السنة اللي فاتت و هحاول أجمع أكبر قدر ممكن عشان نشارك في التبرعات لمُستشفى أبو الريش الياباني عند القصر العيني..و نتقابل هناك في المستشفى يوم السبت 3 أغسطس الساعة 4 العصر إن شاء الله.

هنـــــــا التفاصيل عند أسامه الأزهري

تعالى و كتَر شيرك :)

هناك 5 تعليقات:

re7ab.sale7 يقول...

اه والله معاكي حق
للأسف انا مش هقدر اجي التجمع
لسببييين مهمين جداااا
الاول ان بابا رافض السفر للقاهرة ف الظروف الوحشة دي
وثانيا ان انا لسة مقبضتش هههههه ومفلسة حتي احمد مش راضي يسلفني ...ادي الاخوات والا بلالالالالاش

شمس النهار يقول...

احنا شعب مالوش حل
:)

Aya Mohamed يقول...

احنا شعب فى قمة التناقض :)
ربنا معاكم ويوفقكم للخير دايما يارب

الازهرى يقول...

هيييييييييييييييييييه
أنا اسمى مكتوب

:)

Hayat يقول...

كتر خيرك قبل شيرك يا دكتورة :D
:)دمت بخير