الأربعاء، 6 يوليو، 2011

عدت سنه...


من حوالي سنه أو أكتر شويه قررت أرجع تاني للقرايه بإنتقام نزلت إشتريت كتب منهم اللي كنت أعرفه و منهم اللي عجبني إسمه, من ضمن الكتب كان كتاب (رز باللبن لشخصين) لرحاب بسام قريته و عجبني أوي بس مفهمتش هو قصص قصيره و لا خواطر و لا إيه بالظبط مواضيع مش مرتبطه و الكاتبه معظم الوقت كانت بتتكلم عن نفسها, بصراحه مفهمتش يعني إزاي ممكن حد يكتب خواطر من حياته كأنها مذكرات و تتنشر في النهايه فهمت إن رحاب مدونه و إنها كتبت الخواطر في مدونتها و لما لاقت نجاح دار الشروق نشرتلها الكتاب.

أول مره أعرف يعني إيه مدونه, سمعت في نفس الوقت عن غاده عبد العال و (عايزه أتجوز) قريته و عجبني بردو و فهمت إن التدوين حاجت بنحسها و بننفعل بيها مش شرط تكون أدبيه أو متصنفه بشكل معين مش أكتر من إحساسك و بس, عجبتني الفكره صحت جوايا حبي للكتابه بس كنت متردده أوي لحد ما أخويا أنشأهالي على سبيل التشجيع, فرحت و خوفت في نفس الوقت, بس قررت إني لازم أجرب.

كتبت قصة و نشرتها يوم 7 يوليو و أنا حاسه إني عامله زي المطربه اللي داخله على مسرح و واقفه ورا الستاره مخضوضه و مرعوبه و أول ما الستاره إتفتحت لقت المسرح فاضي مفيش جمهور بس فضلت تغني بردو كانت مبسوطه من إحساسها على المسرح...., مكنتش عارفه إني لازم أزور مدونات و أتعرف عليها عشان الناس تعرفني, فضلت أنشر بوست ورا بوست و أصحابي و أهلي بس اللي يقروا لحد ما جه يوم و لاقيت تعليق عندي من مدون معرفش عرفني إزاي, و فضل متابعي الوحيد و مشجعي الأوحد في ساحة التعليقات لحد ما إتعرفت عن طريق مدونته على كنوز من المدونات.

طبعاً المدون ده سندباد صاحب سفينة فكره اللي بتبحر في كل بحور الكلمات و المشاعر, و إتفتح الباب أمامي على مصرعيه, وقتها لما كنت بزور أي مدونه و ألاقي بال30 و 40 تعليق و أحياناً التعليق بيبقى أطول من البوست نفسه كنت مستغربه جداً فهمت بعد كده إن التعليقات كتير بتكون أهم و أعمق من البوست لأنها بتحمل آراء و أفكار و تجارب مختلفه  بتثري البوست حتى لو تعليق صغير في كلمه واحده مهم جداً عندي و بيشجعني التعليق الوحيد اللي مش بيسعدني هو اللي بينم عن عدم قراءة جيده, كمان أعقل مجنونه كانت تقريباً من أول المتابعين و المشجعين ليه و منونه كمان.

عرفت ملكة التدوين د.ستيته و كانت من الناس اللي حببوني جداً في التدوين و خلتني أحس إني لما بقرالها كأني بسمعها و بشوفها بحبها جداً, عرفت كمان فاتيما القلب الحنين و الاحساس الرائع و قلبها الكبير اللي بيسع الدنيا, و صديقتي الجميله الرقيقه أوييييي منى أبو السعود, و الكاتبه الرومانسيه جداً كارمن, و سواح في ملك الله الطيب الهادئ العاقل جداً, و أطيب أخت لولو كات نور ساطع بين المدونات, و FAW الكاتب المتمرد المختلف, و الحسيني من أروع كتاب المشاعر الانسانيه, و remass اللي بتلمسني بصدق كلامها, و رامي و إحساسه العالي,و الحب الجميل قمر المدونات, و قلب القطه اللي زي السكر و الكاتب المميز جداً كاسبر, و الشاعر الرائع أحمد الصعيدي, و أسامه نصر اللي بيتكلم من قلبه, و جايدا فاكهة التدوين بروحها الطيبه و شهرزاد ذات الأسلوب الراقي, و شيماء علي اللي مش زي أي حد, و أحاسيس أيوشه الكاتبه المبدعه و طبعاً طبعاً نوران اللي حبيتها أول ما قريتلها.

و ماجد القاضي الأدب و العلم و الثقافه, و أشرف محي الدين واحة الكلمات الراقيه و موناليزا الكاتبه الجميله  المتغيره كالطقس, و رحاب صالح عندما تتمرد الرومانسيه, و هيثم السايس الكاتب التاريخي بمعنى الكلمه,  نهى صالح كاتبة السهل الممتنع, أفروديت الثائره, و tears صاحبة الفكر المختلف و ميس فينوس الزهره الرقيقه الحزينه, و هبه فاروق الجميله و أكتر مدونه بتضحكني, وعرفت بعد كده شمس المدونات شمس النهار و الكاتب الرائع في كل ألوان الكتابه إبراهيم رزق و زميلي في الصيدله أستاذي في التدوين مصطفى سيف, و نسمة الحب ريماس, و الأم الجميله زيزي, و دعاء العطار القاصة الجميله, و بنت من الزمن ده اللي بتكتب بلسان البنات, و د.دودي الساخره جداً, و human صاحب القلم الراقي, و وجع البنفسج اللي كتابتها مليئه بالشجن, و نيللي الانسانه لأبعد الحدود و عباس ابن فرناس الشاعر الرائع, و مها البنا العزيزه عندي جداً و محب روفائيل, و حافية القدمين و نيسان, و شمس العصاري و عبد المنعم مدونة هسهس, و تركيب و نبع الغرام و أغاني الشتا, و مصر حره و اسراء و wish i could be a butterfly و كتييير أعتذر لو ذاكرتي مأسعفتنيش إني أكتب كل الأسماء.

أفتقد جداً د/ولاء صلاح, زهرة , يوميات شحات, صيدلانيه طالعه نازله, أسماء عبد العزيز, كارولين فاروق, حره من البلاد.

كل الأسماء دي هما الكنز الحقيقي لمدونتي و هما السبب إني لسه بكتب لحد دلوقتي و رغم أي ظروف و أسماء تانيه كتير سامحوني لو مفتكرتش ناس كتير لكن أي حد علق عندي و لو مره واحده أكيد شجعني و دفعني لقدام, عايزه اشكر أسرتي الرائعه خاصة أمي اللي دائماً بتشدني لما أتأخر و أبي اللي ورثني موهبته و بشكركم طبعاً دمتم لي سند و كنز رائع بفخر بيه.

في أول سنه تدوين نشرت أكتر من مائة بوست و سجلت برامج إذاعه قلت فيها أجزاء من أشعاري كانت تجربه جميله, كمان عملت مدونه تانيه (معطف من القيود) بقلم كل المدونين كورشة عمل بالاشتراك مع أستاذ إبراهيم رزق و مصطفى سيف, و أختيرت قصتي (معطف من القيود) الجزء الأول ضمن كتاب إلكتروني (عتبة الباب) مجموعه من القصص القصيره بأقلام المدونين, و صفحتي على الفيس بقى ليها أكتر من 750 متابع و المدونه بقى ليها رانك رقمه 2 (مش فاهمه بس حسه انها حاجه كويسه) غير طبعاً الحدث الرائع (التدوين اليومي لشهر يونيو) اللي إستمتعت فيه متعه مضاعفه بالكتابه و متابعة مدوناتكم, و لسه أحلامي مبتخلصش بس الحياة علمتني إن كل شئ بأوان.

مدونتي الحبيبه بيتي التاني لما بفتحك و أنا في الشغل لمدة ثواني خلسة بحس إني لاقيت نفسي, وصورة البنت اللي فوق دي بحس إنها أنا و صورت البروفايل شبهي من جوه بألوانها بضحكتها, و لون المدونه هو اللون اللي إخترت أشوف بيه حياتي حتى لو ده مش لونها, كل سنه و حدوتي المصرية أجمل و أنجح بيكم و معاكم.

هناك 88 تعليقًا:

الحسينى يقول...

أولاً مبروك السنة
عقبال يارب سنين كتير كلها تدوين راقى وتكون سنين بلون المدونة المميز.
قبل ما انسى عاوز أقولك إنى دايماً أسم شيرين مرتبط فى دماغى بصورة البنت اللى فى المدونة وعندى شبه يقين إنها شبهك بالظبط :)
"من أروع كتاب المشاعر الانسانيه"
عاوز أبروزها واعلقها عندى مش علشان حاسس إنى كده لكن علشان فى حد شايفنى كده.
زى ما قلتى يا شيرين أن اللى بيخلى الحد فينا يكتب هو الناس وتعليقاتهم وفى ناس معينة بتستنى تعليقهم على البوست علشان عارفه أنهم قروا بجد مش بيعلقوا علشان يجاملوكى وبس.
البوست فرحنى مش بس علشان لقيت أسمى وسط ناس حلوة أوى كده "وده شرف ليا" ولا علشان افتكرتينى وسطهم "ودى حاجه تسعدنى"
لكن علشان البوست مبهج ومفرح وحاسس أنه يوم مميز عند حد عزيز عليا ودى حاجه تفرح.
عجبنى أسم الولاد بالأزرق والبنات بالبينك :)
تحياتى وتمنياتى لك بحياة سعيدة فى التدوين وبره التدوين.

موناليزا يقول...

كل سنة وانتى ومدونتك بخير
ومنورين عالم بلوجر:)

Bent Men ElZaman Da !! يقول...

كل سنه وحدوتك بخير :))
وعقبال يارب ما تبقى سنين كتير مش سنه واحده بس
بحب اوى اسمع اى حد بيتكلم عن مدونته بيتكلم بحنيه وحب اوووى زى ما انتى عملتى كده وبتعامليها على انها حته من جواكى عشان بتكتبى فيها كل كلمه جواكى ممكن مش تقوليها لأى حد
مبسوطه اوووى بجد انى بقرألك
بتتكلمى بهدوء بيعبر عنك جدا
يارب دايما تكونى مبسوطه وشايفه الدنيا بلون المدونه :))
كل سنه وكل يوم وانتى بألف خير يا شيرين

كريمة سندي يقول...

أكيد كانت أحلى سنة .. كل سنة وأنت مدونتك بخير يارب

وإن شاء الله القادم أحلى بكتير

شيرين سامي يقول...

الحسيني: الله يبارك فيك هي الصوره قريبه مني جداً بس مقدرش أقول انها شبهي أنا أكيد أجمل :)
ده رأيي في كتاباتك بإختصار انت عارف انها تستاهل أكتر من كده بكتير لكن عشان محدش بيعرف يقدر نفسه بنفتكر اننا أقل, مبسوطه أوي بتعليقك الحلو و أنا اللي اتشرفت بتعليقاتك المميزه طول الفتره دي و سعدت بمتابعتك اللي ضافت لي كتير.
ولاد أزرق بلون البحر و بنات بينك بلون الورد.
تحياتي و تمنياتي ليك بكل خير و سعاده
شكراً أويييييي

naysan يقول...

كل تدوينه وانتي بخير شيرين...وان شاء الله سنوات قادمه احلى واحلى وخير اكتر ومحبين اكتر.
انا عرفتك جديد عن طريق اشرف....اثارت فضولي فراشة التدوين زي ما بيسميكِ اشرف ولما زرت مدونتك عرفت انه موفق جدا في التسميه فطريقتك في الكتابه محببه الى النفس وقريبه من القلب و خفيفة الدم متل الفراشه بالزبط...حقيقي تمنيت لو عرفتك من اول ما ابتديتي بالتدوين...لكن ملحوقه ...ان شاء الله لما نخلص من الاجازه الصيفيه ورمضان على خير...ح ابقى اتفرغ لقراءة كل البوستات اللي فاتتني.

شكرا لحضرتك لانك تذكرتيني بالرغم من حداثة معرفتنا ...كلك زوء وان شاء الله كل سنه وانتي وحبايبك ومدونتك بالف خير.

فتات الزكريات يقول...

ذكري ميلاد سعيدة للمدونة
اليوم بتحتفلي بمرور عام
وان شاء الله تحتفلي بالذكري 120
لانشاء المدونة
وانا حكون سعيد وانا بنضم لهاي الاسرة الجميلة من الاشخاص الرائعين الي ذكرتيهم
:)

Wish I were a Butterfly ... يقول...

كل سنة و بلوجك طيب يا جميلة :)). صحيح انت جديدة نسبيا، بس مش عارفة ليه بحسك من أقدم الناس اللي أعرفهموبحس براحة أوي لما أدخل البلوج دة وكأنك كنت معايا من سنين و بتشجعيني بتعليقاتك مع إني عمري ماسمعت عنك غير من شهور بس :))

معاكي في وصفك لفاتيما جداجداجدا، و ف وصفك للجميلة شيماء علي
تعاونك مع "مصطفى سيف" في مدونة دي حاجة جميلة أوي لأن انتو الاتنين من أرقى الشخصيات هنا

أنا كمان بداية مدونتي كانت مع نفسها بس مش كنت عايزة أزور حد :). كنت عايزاهم يكتشفوها لوحدهم :)،و بدايتها خالص كان اتنين اجانب هم اللي شافوها وحبوهالأني كنت بكتب انجليزي بس

منورة عالم البلوجر دايما يا شيرو:)

مجداوية يقول...


السلام عليكم

جميل الجرد السنوي اللي عملتيه بطريقة جديدة ومهم جدا إننا نفتكر ليه بنكتب حتى لو مقراش لينا حد فالكتابة في حد ذاتها علاج وتفريغ شحنات وطاقات لابد أن نعبر عنها

كل عام تدويني وأنت ومدونتك بخير ونجد فيها دائما كل الخير

بس ليه اخترتي كاب كيك ومجبتيش تورتة؟ :))

عشان كل واحد ياخد واحدة وهو ساكت ؟ :)


دعاء العطار يقول...

كل سنه وأحلى شيرى فى الدنيا طيبه

كل سنه وحدوته مصريه بتمتعنى وبتضيفلى

عارفه ياشيرين

أنا قربت منك اوى فى ملة التدوين اليومى ... حسيت انى شايفاكى قدامى بقصاقيصك الجميله

بس قبل ملة التدوين اليومى كنت متخيلاكى كده ... بنوته رقيقه .. هاديه .. عاقله ... متمرده ... متفائله

فاكتشفت انى كنت أعرفك من كتاباتك من غير ماتتكلمى عن نفسك

بجد فرحانه أوى انى اتعرفت عليكى ..

بالنسبه لكتاب ارز باللبن لشخصين ... كنت زيك كده مشتغرباه لما قريته

كنت حاسه ان طعمه حلو ومش فاهمه الحلاوه دى جايه منين

هو ده اللى بيفرق البلوج عن اى حجه تانيه ... انك بتحسى انها انتى ... وعشان هى انتى وبصدق بتطلع محسوسه

.............

غبت كتير عنكم وافتقدتكم .. بس رجعت الحمد لله .. حاسه ان كان ناقصنى كتير لما بعدت عن مدونتى ...

كل سنه وانتى طيبه وبوسيلى آمن (: (:

مصطفى سيف يقول...

كل سنة وانتي ومدونتك بخير
وعقبال 100 سنة للمدونة الجميلة حدوتة مصرية اللي هي فعلا حدوتة جميلة احنا بنعيشها فيها
دايما صاحبتها بتتميز باسلوب جميل اوي و غالبا بتلهمنا بكتاباتها زي معطف من القيود
اما عن نفسي يمكن اكون زميلك في الصيدلة لكن استاذك في التدوين دي واسعة اوي عليا مش مقاسي خالص :)

اشكرك على شعورك الجميل
تحياتي ليكي وربنا يحققلك كل امنياتك

سواح في ملك اللــــــــــــــــــه- يقول...

اولا كل سنة وانتي طيبة

ثانيا اشكرك جدا علي الوسام اللي اهديتهولي

وهو رايك الكريم

ثالثا الله اعلم انني اعدك اختا لم تلدها امي

ولكنك اخت فاضلة ربنا يبارك فيكي

ويحفظك وزوجك الكريم وابنائك الاعزاء

تحيتي يادكتورة

الحــب الجميـــل يقول...

كل سنه ومدونتك جميله وانتى اجمل يا شيرين
كل سنه وانتى منوره البلوجر ببوستاتك الجميله
كل سنه وانتى بخير يا حبيبتى
وشكرا لذوقك وشعورك الجميل يا حبى

ادام الله عليكى حب الناس

أم هريرة.. lolocat يقول...

السلام عليكم

كل سنة وانت بخير ياطيبة
كل يسنة و انت دايما متألقه وجميلة
وكتاباتك تسعدنا وتلمنا كلنا حواليك هنا

http://files2.fatakat.com/2011/4/13025643751954.gif

اكيد كتاباتك وقلمك هم السبب الرئيسى فى انك تشعرى بهذه المشاعر والاحاسيس الجميلة
وتكتبى البوست الرائع ده
لان القلم هو الحكم الرئيسى فى الامر واذا لم يكن كذلك تأكدى ان مافى اى انسان ممكن انه يستمر فى زيارة موقعك

انت انسانة موهوبة ومتواضعة وكلك نشاط وفكر وثقافة

كل سنة وانت دايما بخير حبيبى
واشكرك على كلامك الجميل

http://www.emanoeel.com/up/uploads2/images/emanoeel-600d68380e.gif

FAW يقول...

كل سنة وإنتي طيبة وعقبال ألف سنة تدوين

يدوب كنت لسه بفكر في الموضوع ده لقيتك سبقتيني , بما إني برضو بقالي سنة وبدأت معاكي في يوليو . . بس مش هقدر أقول ولا أعبر أكتر من كلامك الجميل وإحساسك العالي ده بجد .

قمة الراحة النفسية بحسها وأنا بقرالك أي حاجة

أنا كمان إتأثرت بصورة الطفلة اللي فوق وحسيتها إنتي , لدرجة غصب عني إتفاجئت لما عرفت إنك أم :))

يمكن عشان مشاعرك صادقة فتحسي إنها زي ماتكون لسه مش متأثرة بشوائب الحياة

متمرد ومختلف ؟ . . . يا رب تكون بمعناها الحلو :)) . . عجبني أصلا وصفك ليا بكاتب , ربنا يخليكي :) . . وشرف ليا إنك تفتكريني

أنا كمان مفتقد يوميات شحات (اللي نفسي أعرف إسمه)
ومفتقد زهرة (اللي الخطوبة خدتها من التدوين ربنا يقويها) . . كانت أول واحدة تشجعني بتعليقاتها :)

منورانا دايما يا شيرين

زهرة الضحا يقول...

مبروك ليكي مرور السنه
و عقبال سنين كتيييير تكتبي فيها كل اللي تحبيه
و أحب أقولك إني لسه جديده في التدوين و إللي بتحكيه بيحصل لي بالظبط بس أول واحد علق عندي و أنا نفسي إستغربت إن كلامي يستاهل إن حد يعلق عليه كان
د/ مصطفي سيف و هو و bent mn elzaman da هما اللي دايما متابعنني
و شكرا علي كم أسماء المدونيين إللي انت قولتيهم علشان انتي كده عرفتيني بيهم و إنشاء الله هزور مدونتهم

اتنمى بقي إنك تزوري مدونتي علشان تنور :)

جايدا العزيزي يقول...

كل سنه ومدونتك بخير شيرى

ودايما منورة بلوجر

قد ايه روحك حلوة

وكتباتك احلى

انت مش نسيتى اى مدون

سعيده جدا حبيبتى لتذكرى

حقا احبك فى الله

دمت مبدعه

ودامت مدونتك الاولى والاعظم

تحياتى

مها البنا يقول...

كل سنه وإنتى طيبه يا أحلى شيرين .. ويارب كده أعوام طويله وسعيده وناجحه فى عالم التدوين.

أتمنى السنه الجايه تكتبى عن أنجازات أكتر وحاجات اكتر حققتيها .. ربنا يسعدك


على جنب كده ..

فرحت قوى انك افتكرتينى وسط الاسامى الحلوه دى :)

ابراهيم رزق يقول...

برة القزاز كان غيم و امطار و برق
ما يهمنيش انا قلت و لا عندى فرق
غيرت رائى بعد ساعة زمان
و كنت فى الشارع و فى الجزمة خرق
عجبى ؟؟؟؟

هو ده التدوين الكتابة بحرية بدون اى توجهات انا جربت العمل كمحترف لم استطيع اجمل شىء فى الدنيا ان تعمل ما تحب بمفهوم الهواية لا تفرق معك اى حسابات

كل سنة و انتى طيبة
كل سنة و انتى تلقائية
كل سنة و انتى بسيطة
كل سنة و انتى مبدعة
كل سنة و انتى متالقة
كل سنة و انتى حرة
كل سنة و انتى و عائلتك بخير
كل سنة و انتى مثلما تريدى
كل سنة و انتى تكونى كما انت

سعيد بكى و اعتز برايك الذى اعتقد انى لا استحقه
تحياتى و تمنياتى لامن ان يكمل الحدوتة السعيدة الجميلة

reemaas يقول...

الف الف مبروك على السنة دى يا شيرى ويارب تبقى سنين

قلبى وقع فضلت اقرا وادور على اسمى مش شفته فى الاول زعلت اوى

وبعدين رجعت ادور تانى اكيد فى سطر فلت منى انا متاكدة

لحد ما وجدتنى بقى:)


تعرفى يا شرين التدوين اليومى عرفنى بيكى اكتر وقربنى لمعظم اللى ذكرتيهم اكتر بجد كانت تجربه فريدة

إســـراء يقول...

يادى الجهل
كتبت تعليق كبيييييييييير وضاع مش عارفه ازاى على الأرجح لأنى لسه مش بعرف أتعامل مع النظام هنا خالص ههههههههههه


المهم بقى انا قلت حاجات كتير أوى فى التعليق المفقود مش عارفه أعيد تانى ولا يتمسح تانى ؟؟؟؟؟؟؟؟

يلا هجرب وخلاص وأرجع أكتب تعليق غيره .

مبدئياً بشكرك كتير كتير كتير يا قمر
ان تعليقى اللى فات لفت انتباهك بس طبعاً هو لا يوفيك حقك اطلاقاً .

كل عام وانتى بكل خير ويارب كل سنة تعدى عليكى بمزيد من النجاح والتميز والتألق البسيط اللى شفته فى كتاباتك .


"أول مره أعرف يعني إيه مدونه وعجبني بردو و فهمت إن التدوين حاجات بنحسها و بننفعل بيها مش شرط تكون أدبيه أو متصنفه بشكل معين مش أكتر من إحساسك و بس " .

ده كلام انتى قولتيه بس ده اللى أنا عايزة أقوله بقى دلوقتى فعلاً حاجة فى منتهى الجمال طبعاً فكرة التدوين خليتى نفسى يبقى ليا مدونة وأنافسك بقى على الساحة هههههههه أنا بحب الكتابة وبكتب فى منتدى محترم أوى بس لسه بدرى انى أستقل
بمدونة حاسة انى لسه صغنونة على كده بس عموماً استعدى للمنافسةالمتوحشة ههههههههه.


أخيراً عايزة أشكر كل الناس اللى ذكرتيهم فى التوبيك ده واحد واحد لأن كلهم فعلاً يستحقوا كل الشكر
تعليقاتهم الجميلة بتعبر عن شخصية مميزة لكل واحد أو واحده فيهم لكنهم جميعاً يتقاسمون معك صفة الاحترام والأخلاق الكريمة وليا الشرف بجد انى اكون موجودة فى وسط الناس دى

فشكرى وتقديرى للجميع وان شاء الله متابعة معك جديد كتاباتك

طبعاً أنا رغاية جداً معلش استحميلنى بقى ضريبة النجاح وأكيد أنا عارفه انى مش مزعجة خالص ههههههههههههه

بالتوفيق دائماً حبيبتى

إســـراء يقول...
أزال المؤلف هذا التعليق.
اغانى الشتاء يقول...

هابى بيرث داى تو يو تشا تشا تشا ,
على فكرة انا كمان مدونتى عدت السنة باقل من شهر .
بس معرفتش اكتب ايه بهذه المناسبة :))))
ا شاء الله مدونتك تحفة و مكنتش ابدا اتخيل ان كل ده فى سنة واحدة , حسستينى بانى فاااااشل هاهاهاهها ,
عقبال ما تتم 6 سنين و تروحى تقديملها فى المدرسة :))

eng_semsem يقول...

كل سنه وانت طيبه وعقال مية سنه تدوين تبدعي فيهم وتسعدينا بكلماك ومتابعتك وتعليقاتك يا احلى حدوته مصريه
تقبلي تحياتي ودعواتي لكي بدوام النجاح والتوفيق

سندباد يقول...

كل سنة وانتي ومدونتك الراقية بخير وفي تقدم وامتاع واستمتاع وكما قلت في بوست الواجب التدويني ان القلم هو ما يبقينا علي قيد الحياة لانه ياخذ منا همومنا ويعطينا الراحة الهدوء والاستقرار النفسي
ومن حسن حظي اني اتعرفت علي مدونتك في بداياتها حتي اتابع تطورها ونضجها خطوة بخطوة ومتشكر لكلمات الرقيقة
كل سنة والتدوين سعيد بوجودك
تحياتي وتقديري

شيرين سامي يقول...

موناليزا: شكراً يا مونا البلوجر منور بناسه :)

شيرين سامي يقول...

Bent Men ElZaman Da !!: أنا اللي مبسوطه اني اتعرفت عليكي و متابعتك ضافت لي كتير, فعلاً المدونه دي جزء من المدون لأنه مصمم كل نقطه فيها زي ما هو بس عايز و لأنه بيكتب فيها كلام من قلبه و أهم حاجه لأن متابعينه ناس جميله زيكم:)
يمكن يبان اني هاديه بس أنا مش كده أوي يالله ربنا ستار حليم :)
نورتيني يا جميل

شيرين سامي يقول...

كريمه سندي: هي فعلاً أجمل سنه و أمتع وقت هو اللي بقضيه على البلوجر.
شكراً يا عزيزتي على ذوقك

mostafa gazar يقول...

ذكريات جميله و عقبال يارب مليون سنه تدوين و فعلا دائما بحس بجو الألفه والود والمحبه داخل المدونه بالاضافه الى الماده الأدبيه الرائعه والمبدعه.........و دائما أقرأ كل التعليقات على المدونه....
الى الأمام دائما وبالتوفيق و فى انتظار المزيد من الابداع

شيرين سامي يقول...

naysan: العبره مش بالحداثه لكن في انسان ممكن تقريله أو يقول كلمه تفضل تخليه يفتكرك.
أنا اللي بشكرك على ذوقك و دعواتك الحلوه و أشرف مدون متميز فأكيد اصدقاءه مثله , أتمنى أكون عند حسن ظنك للأسف خسرت أيضاً معرفتك منذ أن بدأت تدوين لكن ملحوقه :)
رمضان كريم عليكي و يا رب دائماً في خير و سعاده.
تحياتي و كل الود لكي

شيرين سامي يقول...

فتات الذكريات: سعدت أيضاً بزيارتك و تعليقك الجميل أشكرك على معايدتك و أتمنى لك مستقبل رائع في التدوين.
تحياتي لك

شيرين سامي يقول...

Wich i were a butterfly: أنا كمان حاسه اني أعرفك و ببقى سعيده في مدونتك اللي بحسها فعلاً مختلفه و مع نفسها :)
مبسوطه أوي بتعليقك و البلوجر منور بيكي و بكللل الناس الرائعه دي يا رب دائماً نفضل في تواصل و تدوم الصداقه بيننا.
شكراً يا أجمل فراشه

شيرين سامي يقول...

مجداويه : و عليكم السلام و رحمة الله و بركاته سعدت جداً بتعليقك و تشرفت بيه للأسف معرفتش حضرتك غير من قريب لكن ان شاء الله نكون دائماً في تواصل.
المره الجايه هجيب تورته لكل مدون :)
نورتيني بالزياره

شمس النهار يقول...

كل سنة وانتي ومدونتك بالف خير

وبجد مدونتك من المدونات اللي بحبها جدااااااااا

وبضم صوتي لصوتك في اسامي المدونين اللي اشتقنالهم وفي اسماء انتي ماحضرتهاش برضوا هجروا التدوين

ياريت كل الطيور المهاجرة ترجع للبلوجر

ريــــمــــاس يقول...

مساء الغاردينيا شيري
والف الف مبروك ويارب عقبال السنين الجاية وانتي بنفس النجاح وأجمل ومبسوطة أني تعرفت بمدونتك
وعشت معاكي حواديت جميلة بإحساس شيري "
؛؛
؛
لروحك عبق الغاردينيا
كانت هنا
reemaas

أم يقول...

كل سنة وانت ومدونتك بخير

zizi يقول...

شيري العزيزة يمكن بالصدفة جه عيد ميلاد المدونة مع دعوتي ليكي لفتح صندوق ذكرياتك وهي اطروحة طرحتها الأخت ام هريرة على مصطفى سيف ثم انتشرت من مدون للآخر ولما جاءت عندي اخترتك انت لتكملي المسيرةوهي فتح صندوق ذكريات والبحث فيه عما اثر فيكي ثم بعد ذلك تذكري كلمة اثرت فيكي ثم اهداء لشخص ثم سلام لشخص ثم عتاب لشخصثم شكر لشخص ثم في النهاية تنقلي هذا الواجب التدويني إلى خمسة او اكثر من اصحابك المدونين..

تحياتي وشكري

آخر العنقــــــود يقول...

كل سنه وانت ومدونتك بإشراق وتألق
يارب عبال ال100 سنة تدوين لان فعلا ما احلاها

دمت بسعادة

نيللى يقول...

ياااااااه ياشيرين وصفك ليه ..شرف لى بجد ..رينا يبارك فيكى ..والله اخجلتينى بوصفك ليه..والاحلى من الكلام صاحب الكلام سعيده انك شايفنى انسانه لابعد الحدود
وكل سنه وانتى طيبه يااحلى انسانه

Ms Venus يقول...

شيرين

صدقينى مش عارفة اقولك ايه

لو تعرفى اد ايه سعيدة انك افتكرتينى واديتينى وسام بجد

كل سنة وانتى دايما بخير ومدونتك الجميلة اللى بحس فيها بالدفء والصدق بخير

قولتهالك قبل كده وهقولها تانى

انتى من الناس الى بحب اوى اقرالها لان بحس بروح قريبة اوى منى فى كلامك

بنت مصرية بجد وعلى حق بتحب بلدها وبتحب الناس

ربنا يسعدك يارب يا جميلة ويحمى اسرتك الصغيرة ويهديكم السعادة دايما

احلى وارق وردة لعيون احلى شيرى

Tamer Nabil Moussa يقول...

كل سنة وانتى طيبة شرين

والمدونة طيبة وبخير

وقعبال مليون سنة تدوين

مع خالص تحياتى

الغاردينيا يقول...

ربي يسعدك وتحققي نجاح أكثر و أكثر

و الف مبروووووووووك حبوبة

لكي ارق التحيات

Carmen يقول...

الف مبروك ياحبيبتى ويارب دايما معانا
انا كمان مبسوطة انى اتعرفت ع احن قلبك وهو قلبك :)

http://karmenhome.blogspot.com/2011/07/3.html

http://karmenhome.blogspot.com/2011/07/4.html

http://karmenhome.blogspot.com/2011/07/blog-post.html

http://karmenhome.blogspot.com/2011/07/2.html

لك هدية روح استلمها :D

مونتي بوكيه ورد يقول...

عدت سنه و كل يوم بتزيدي في قلوب ال حواليكي لانك انسانه بتطوري نفك ومن نفسك وبتحبي ال حواليكي .. عجبني اوي احساسك كانك مطربه وطالعه لاول مره ع المسرح و كلنا بنسقفلك دلوقتي لانك قدرتي تنولي اعجبانا كلنا انا كمان مختلفش عنك كتير كل نجومك هما نجومي مع اني مبشاركش معاهم كتير بس بقرالهم وبقرالك تعرفي رحاب بسام اول بنوته قريتلها في عالم التدوين وكان نفسي اجيب كتاب رز بلبن لشخصين جدا علي بالي كل ما اسافر اجيبه اتسلي بيه في الطريق كانت هي وكلبوزه لكن سبماتيك و دورا و هبه دوبا و اخف دم و بعد كدا الورد فتح اكتر وشوفت فاتيما و صيدلانيه طالعه نازله و الصغيرة ايثار وشفتك ومصطفي سيف و ريماس و وجع البنفسج وكارمن و كتير اوي بحبهم
انا فعلا مقصر معاكم واتمني بالبوست دا اكون بعتذر عن تقصيري و اقولكم بحبكم كلكم و يارب كل سنه وانتم طيبين و دايما مبدعين و روحكم في اقلامكم وبوحكم هنا في المدونات الجميله

شيرين سامي يقول...

دعاء العطار: دودو انت فعلاً وحشتيني أوي و وحشتني قصصك الجميله و بساطة تعبيرك, أنا كمان قربت منك أوي في شهر التدوين اليومي و ده كان من أجمل الحاجات ان الواحد يتعرف على ناس مشتركين معاه في حب الكتابه و كل واحد منهم له لونه الخاص بيه و فعلاً دي ميزة التدوين ان المدون بيكون نفسه أوي و بياخد حب الناس على الهواء مباشرة :)
فرحانه أوي بمعرفتك و تعليقك أسعدني جداً ربنا يديم بنا المحبه.

أرق تحية لكي و في إنتظار عودتك قريب جداً

شيرين سامي يقول...

مصطفى سيف: الله يبارك فيك كلك ذوق و على فكرة انت و استاذ إبراهيم أصحاب فكرة مدونة معطف من القيود و انها تكون ورشة عمل الفضل يرجع ليكم, أستاذي في التدوين يا مصطفى لأنك ما شاء الله موهوب جداً و إنتاجك الأدبي غزير و ممتع في نفس الوقت.
سعيده جداً بمعرفتك و أتمنى أظل عند حسن ظنك
تحياتي و كل التقدير لك

شيرين سامي يقول...

سواح في ملك الله: ربنا يبارك فيك و يديمك لي أخ فاضل و ده إحساسي أنا كمان ِو وصفي المختصر ليك لم يوفيك حقك, شكراً على دعوتك الحلوه و أمانيك الرقيقه لي دائماً أنا أيضاً أتمنى لك كل خير و سعاده.
تحياتي واحترامي لك

شيرين سامي يقول...

الحب الجميل: أنا مستاهلش الكلام الحلو ده مايجيش حاجه في طيبة قلبك و رقة مشاعرك.
أنا اللي بشكرك على تعليقك الحلو أوييييي ده و ربنا يخليكي ليه.
تحياتي و كل الود لكي

شيرين سامي يقول...

ليلي أختي الحبيبه بجد مافيش حاجه تساوي سعادتي دلوقتي بكلماتك الطيبه ربنا يسعد قلبك يا حبيبتي أنا بجد مش قد الكلام الحلو ده يا ريت أكون قده و أفضل دائماً عند حسن ظنك, أنت من الناس اللي اتشرفت بمعرفتهم و بشكر البلوجر انه أتاحلي الفرصه اني أعرف ناس جميله كده و انت بالأخص لك طيبه لم أراها في أحد الا قليلين جداً.

هداياكي رائعه و تعليقك أجمل هديه شكراً جزيلاً لكي و ربنا يديم بيننا المحبه.
دمتي أختاً فاضله غاليه
تحياتي و كل الود لكي

شيرين سامي يقول...

FAW: الله يبارك فيك و كل سنه و انت منورني بزيارتك و كل سنه و مدونتك مميزه دائماً, أكيد مختلف و متمرد مالهاش الا معنى حلو عشان العادي عادي و التقليدي لا يلفت الانتباه و انت عمرك ما كنت تقليدي.
على فكره مش لوحدك عمر ما حد شافني غير و اتصدم اني أم دائماً بيفتكروني خريجه جديده أو طالبه عمر ما حد صدق اني متخرجه بقالي 10 سنين :)
شكراً على كلامك أججلتني بذوقك يا رب دائماً أكون عند حسن ظنك.

تحياتي ليك و نورتني

شيرين سامي يقول...

زهرة الضحا: أهلاً بيكي في عالم التدوين على فكره أنا زرتك بالفعل و حاولت أعلق عندك لكن معرفتش عشان عندي مشكله في التعليق لما بيكون تحت البوست يا ريتك تخلي التعليقات في صفحة لوحدها.
أكيد كلامك يستاهل التعليق عليه و ان شاء الله هزورك قريب بشكرك جداً على ذوقك و كل سنه و انت بألف خير.
تحياتي الخالصه لكي

شيرين سامي يقول...

جيدا العزيزي: أنا اللي بشكرك ياجيدا كنت من أول من شجعوني و لا أحد ينكر قدر محبة المدونين لكي.العظمة لله أشكرك على تعليق الجميل .
تحياتي و كل الود لكي

شيرين سامي يقول...

أستاذي إبراهيم رزق: بجد أهم ميزه للتدوين هي حرية الفكر و معرفة قلوب من ذهب مثلكم أنا سعيده جداً بالتديون و بمعرفتكم و بشكر حضرتك جداً على الأبيات الرائعه اللي بتزين بيها التعليقات كل مره و لى تمنياتك الرائعه لي بجد كتيييير عليه جداً.

أتمنى لك السعاده مع أسرتك الجميله و يا رب دائماً منورني.

تحياتي و كل التقدير لك

شيرين سامي يقول...

remmass: ازاي هنسى أجمل بنوته ده كلام و بعدين احنا زملاء مهنه كمان و أنت من أقدم الناس اللي إتعرفت عليهم و معرفتي بيكي كانت جميله لأني بجد إستمتعت بكل بوست قريته ليكي و حسيت بتلقائيه شديده.
يا رب دائماً التدوين يقربنا
أرق تحية لكي

زهرة الضحا يقول...

يا هلا بيكي عندي
بس انا مش عارفه اخلي ازاي التعليقات في صفحه واحده
و اعذري جهلي :)

شيرين سامي يقول...

اسراء: و لا يهمك بتحصل معايا كتير و التعليق بيضيع يزعل جداً لما بيكون طويل.
أنا اللي بشكرك على ذوقك و متدرديش في إنشاء مدونه لأنها تجربه فريده و ماتخافيش مش هقلق من منافستك أهلاً بالمنافسه الشريفه ده غير كمان ان جمال التدوين ان كل مدون له مذاقه الخاصو لونه المميز.
كل اللي ذكرتهم هم أسرتي التدوينيه اللي بعتز بيها جداً و أهلاً بيكي معانا.

سعيده بتعليقك يااسراء
نورتيني جميل

شيرين سامي يقول...

أغاني الشتا: هههههه مدرسه مره واحده ماشي :)
بس ما تقولش فشل عشان مفيش مدونه ناجحه و فاشله كل المدونات بتقدم اللي جوا أصحابها و على فكره مافيش إنجاز معين أنا عملته مجرد إستمتعت باللي بكتبه و بيكم.
ربنا يوفقك و بشكرك جداً كل سنه و انت بألف خير.

شيرين سامي يقول...

eng-semsem: أنا اللي إستمتعت بيكم بجد بشكرك على تعليقك الرائع اللي أسعدني جداً.
تحياتي الخالصه لك

Bent Men ElZaman Da !! يقول...

انا سبتلك واجب تدوينى عندى يا شيرين
اتمنى انك تشوفيه :))

Mona Abo - Elso3od يقول...

حبيبتي يا شيرين و الله اسفة علي التأخير في التعليق كنت خارج القاهرة
بصي انا كمان سعيدة جدااااااااااااا بدخول العالم ده زيك لاني اتعرفت علي احلي ناس عرفتها في حياتي و منهم انتي طبعا
يا رب يا رب كل سنة احلي من اللي قبلها و كل سنة نجاح اكتر و يا رب السنة الجاية نكون بنحتفل معاكي بكتاب ورقي بإسم شيرين سامي ... و شكرا اوي لانك افتكرتيني ربنا يا رب يديم الود و الحب بينا
احلي تحية لاحلي اخت

شيرين سامي يقول...

سندباد : ده من حسن حظي أنا ان كاتب رائع مثلك يكون أول متابع لي و دائماً هكون مدينه بالفضل ليك في معرفة الناس بي و تشجيعي.
صدقت في كلامك عن القلم و سر متعة الكتابه, أشكرك على تعليقك الجميل و أتمنى لك كل خير و سعاده

تحياتي و كل التقدير لك

شيرين سامي يقول...

مصطفى جزر : انت طبعاً عارف قيمة متابعتك لي و تعليقك المستمر المشجع على كل كتاباتي و أكيد عارف انك من أكتر الناس اللي شجعوني و أسعدوني بتواجدهم الدائم.
عايزه أشكرك جداً جداً لكل شئ و أتمنى أكون دائماً عند حسن ظنك.

تحياتي الشديده لك

شيرين سامي يقول...

شمس النهار: دي شهاده أعتز بيها من حضرتك و بجد تعليقاتك بتبقى ماليانه دفى و احساس صادق...بشكر حضرتك جداً انك بتابعيني في كلللل الظروف و المهم انك ماتغيبيش علينا.
تحياتي و كل الود لكي
دمتي بخير دائماً

شيرين سامي يقول...

ريماس : الرقيقه أنا مبسوطه أكتر بمتابعتك و تعليقاتك الجميله جداً و كل حروفها عطره و فواحه.
سعيده بتعليقك و يا رب نتواصل دائماً في كل الحواديت.
أرق تحية لكي
دمتي جميله كما أنت

شيرين سامي يقول...

أم : و انت بخير و سعاده أشكرك على المعايده الرقيقه.

شيرين سامي يقول...

zizi: المدونه نورت بتعليق حضرتك و سعيده انك شاركتيني المناسبه المهمه بالنسبه لي و واجب حضرتك من عيني طلباتك أوامر هحله في أقرب وقت.
سعيده اني تعرفت على مدونه جميله زي حضرتك
تحياتي الخالصه لكي

شيرين سامي يقول...

آخر العنقود: هو فعلاً ما أحلاها أشكرك على المعايده الرقيقه و كلماتك الطيبه.
تحياتي الخالصه لك

شيرين سامي يقول...

نيللي: صدقيني أكيد موفتكيش حقك في الوصف المختصر ده لأنك تستاهلي أكتر من كده بكتير ربنا يديم بيننا المحبه و يسعد قلبك دائماً.

تحياتي و كل الود لكي
دمتي بخير و سعاده

شيرين سامي يقول...

Ms Venus: فينوس الجميله أنا اللي اتشرفت بمعرفتك و تعليقاتك الحلوه دي هي اللي بتخليني أعشق التدوين و أكتب بإحساسي بشكرك على تعليقك الرقيق و يا رب دائماً أكون عند حسن ظنك.
نورتيني و اسعدتيني بوردتك المميزه العطره

شيرين سامي يقول...

تامر نبيل موسى: شكراً على ذوقك و كل سنه و انت بألف خير أنا بعتذر لو مكتبتش إسمك يمكن لأني بكتب بسرعه و عندي فيرس على الجهاز بيهددني:)
لكن طبعاً انت كاتب مميز بأدبك و هدؤك و أسلوبك السلس .
نورتني و أسعدتني بالزياره

شيرين سامي يقول...

الغاردينيا: و لكي كل الود و الاحترام أشكرك عل تعليقك الرقيق.
تحياتي العطره لكي

شيرين سامي يقول...

كارمن: شكراً يا سمسمه انتي اللي كلك ذوق و رقه يا رب يديم المعروف بيننا.
رحت و شوفت الهديه الجميله شكراً يا حبيبتي نورتيني و أسعدتيني بزيارتك.
:)

شيرين سامي يقول...

مونتي بوكيه ورد: صدقني لو قلتلك ان تعليقك ده من أجمل التعليقات اللي وصلتني و أثرت فيه جداً.
مش قادره أوصفلك أنا مبسوطه قد ايه ان في قارئ رائع زيك و متابع في الظل و مع ذلك تعليقك ده خلاني كأني أعرفك من أول ما دخلت التدوين مفيش أي داعي للاعتذار لأن المتابعه عمرها ما كانت لزام و لأن متابع زيك خير من ألف تابعوا لمجرد اني أتابعهم بالتبادل من غير أساس, رأيك فيه أكيد شئ أعتز بيه جداً و يا ريت تظهر و لو كل فتره.
شكراً جداً بجد أسعدتني
تحياتي و احترامي ليك

شيرين سامي يقول...

زهرة الضحا: مفيش جهل و لا حاجه أنا ياما سألت مدونين و لحد دلوقتي :)
بصي ادخلي على (اعدادات) و منها على (التعليقات) و هناك هتلاقي كذا اختيار منها ان التعليقات تكون في صفحه منفصله اختاريها و اختاري كمان انك تلغي حروف التأكيد اذا كانت موجوده لسهولة التعليق.
اي خدمه يا فاندم

شيرين سامي يقول...

بنت من الزمن ده: علم و ينفذ يا جميل:)

شيرين سامي يقول...

منى أبو السعود : حمد الله على سلامتك و مفيش أي داعي للاعتذار احنا اخوات و أنا كنت هكلمك أقولك ادخلي حالاً على المدونه لأن البوست ده مينفعش من غير تعليقك, بجد يا منى تعليقاتك الحلوه اللي من القلب دي بتريح قلبي و تشجعني أويييي اني أستمر.
دمتي لي أخت حبيبه
تحياتي و كل الود لكي

ندا منير يقول...

التدوين شئ عظيم وبيخليكى فعلا تحسى بقيمة كل حاجة تفكرى فيها وان فى ناس كتير متفقة معاكى وان فى مشاركة من اللى حواليكى

ويارب دايما تستمرى فيه

شيرين سامي يقول...

كل سنه و انت يا حبيبتى بتمتعينى بكتاباتك
احنا البيت الاول و من عشاقك

شيرين سامي يقول...

ندا منير: عندك كل الحق و يا رب دائماً منوراني بزيارتك و تعليقك
تحياتي الخالصه لكي
دمتي بكل خير

شيرين سامي يقول...

مفاجأه مكانتش تخطري على بال انك تعلق عندي في المناسبه دي بالذات مقدرش أقولك أكتر من ربنا يخليك ليه, حتى التعليق كتبته انت و طلع من حسابي عان تتأكد اننا واحد :)

Casper يقول...

مبروك السنة التي مرت
وبالتوفيق لكي في عالم التدوين

وفي انتظار المزيد من الابداعات

MTMA89 يقول...

مبرووووووك سنة كاملة من الابدعات

الفترة القصيرة اللي تابعت فيها مدونتك استفدت منها كتير
و اسلوبك مميز جدا

للاسف فاتني اتابع حملي التدوين اليومي عشان الامتحانات

تحياتي..
و مبروك مرة أخرى..


محمد
:)

شمس العصارى يقول...

شئ رائع لما الانسان يختلى بنفسه ويفتكر احداث فترة بيحبها
والاجمل لما يفتكر قد ايه كانت البداية صعبة ودلوقتى فى عمل متراكم جميل
كل سنة و"حدوته مصرية " مستمرة وصاحبتها فى احسن حال
تصدقى متوقعتش الاقى اسم شمس العصارى بين اسماء المدونات
بس دى لفتة جميلة جدا منك تذكر كل الناس

مونتي بوكيه ورد يقول...

مونتي بوكيه ورد: صدقني لو قلتلك ان تعليقك ده من أجمل التعليقات اللي وصلتني و أثرت فيه جداً.
مش قادره أوصفلك أنا مبسوطه قد ايه ان في قارئ رائع زيك و متابع في الظل و مع ذلك تعليقك ده خلاني كأني أعرفك من أول ما دخلت التدوين مفيش أي داعي للاعتذار لأن المتابعه عمرها ما كانت لزام و لأن متابع زيك خير من ألف تابعوا لمجرد اني أتابعهم بالتبادل من غير أساس, رأيك فيه أكيد شئ أعتز بيه جداً و يا ريت تظهر و لو كل فتره.
شكراً جداً بجد أسعدتني
تحياتي و احترامي ليك

رغم قصر تعبيري و عدم كفاية تعبيري عن مدي امتنناني بمعرفتكم الا انك منحتيني شهادة جميله جدا اعتز بها و يسعدني اضافتها في صندوق ذكرياتي في عالمي الصغير
ربنا يكرمك و يزيدك دايما .. اعجبني كل مشاركاتك في كتاب ال 100 تدوينه واسعدني ترشيحهم و تتويجهم في الجروب عندي للمشاركين

http://www.facebook.com/groups/150308615029590?id=185720281488423&ref=notif&notif_t=group_activity#!/pages/%D9%81%D9%8A-%D9%82%D9%84%D8%A8%D9%8A-%D8%B4%D9%8A%D8%A1-%D9%84%D9%83%D9%90/125936870797818

بالتوفيق للجميع

زهرة يقول...

عقبال مليون سنه لمدونتك اللى انا بحبها .. ومن اول المواضيع اللى كتبتبها كنت بتابعك وبستنى بوستاتك ..

افتقدتك جدا والله .. واللمه اللى بتجمع الناس اللى بحبها عند حد فيهم كتب موضوع وحشتنى جدا ..

بشكرك يا شيرين انك منسيتينيش ..

وحاضر مش هغيب تانى :))

يوميات شحات يقول...

كل سنة و انتي بخير و صحة و سلامة
,
,
و تألق و إبداع و تميز

فشكووول يقول...

السلام عليكم
تحياتى
انا زرت مدونتك كتير .. بس مش عارف هى دى نفس المدونه اللى زرتها ولا لأ
وعلى كل كل كتاباتك جميله وممتعه وهادفه وعملتى جرد لمدونات كتيره قوى كلهم هايلين ومدونين على درجه عاليه من الرقى وطبعا انا عارفهم كلهم ..
تحياتى وتمنياتى بالدوام والتوفيق

re7ab.sale7 يقول...

مش عارفة انا علقت والا لاء
بس الي اعرفه ان بحبك وبحب مدونتك جداااا
وحلوة كل كلمة بتقوليها وجميل كل احساس بتوصفيه بكلامك
زعلت اووي لما كنتي تقفلي مدونتك او تقفلي الفيس
بحس براحة لما اقرا كلماتك
بحسك بتتكلمي عني
وانا مبسوطة انك وصفتيني الوصف ده " عندما تتمرد الرومانسية " التمرد اللي مش بيعجب حد بس بيعجبني وف دمي ومش هيتغير التمرد ده ...
مبسوطة اني عرفتك اووي وانت من الناس اللي بفتخر بمعرفتهم فعلا :) :*