السبت، 30 يونيو 2012

كن عند ثقتي بك




للمره المليون بأكد إني مبحبش أكتب في السياسه و ماليش فيها لكن لي في حب مصر..مشهد خطاب د.مرسي و قسمه في الميدان أسعدني.


أيوه أسعدني


هسمع كلام بقى من بتاع ..ده بيمثل..إحنا مبناكولش من الكلام ده..وعود كاذبه
و هسمع كلام من بتاع..عصام شرف بدقن..ده عامل فيها عبد الناصر..ده مش ناقصله غير الكتاب الأخضر..


و هسمع كلام أهيف من بتاع..ده لابس بدله كل حاجه فيها لون..ده بيتكلم بطريقه شعبيه..ده بيقول القسم في الشارع!!!
في الشارع!! ميدان التحرير مش شارع ميدان التحرير رمز عظيم..ميدان التحرير هو اللي شال مبارك و هو اللي جاب مرسي و هو اللي خلى كل واحد نازل ينتخب و يتفشخر أوي بصوته و بحُريّة جديده عليه..ميدان التحرير هو سبب التحرير للي حس فعلاً بتحرر مش للي لسه بيشتاق للعبوديه..


و للأسف الكلام ده على الفيس بوك و تويتر بشكل أكبر و من مدونين و كتاب معروفين كمان!


طبيعي إن كل واحد يقول رأيه لكن مش طبيعي إننا نتتريق و نهين رموزنا عمال على بطال عشان نبان أبطال و ثورجيه و بنفهم أحسن من أي حد..
أيوه رموزنا..شئنا أم أبينا هو الرئيس المنتخب.


في الوقت اللي كل البلاد العربيه و أصدقائي العرب على الفيس بوك بيشكروا في الخطاب و بيحسدونا على رئيسنا و بيهنونا عليه..إحنا نازلين شتيمه فيه..أنا بالمناسبة ضد الإهانه عموماً و برغم موقفي من شفيق لكن عمري ما شتمته أو عملت شير للنكت الكتير اللي طلعت عليه, موقفي واحد..


و بعدين ليه بنقارن بين مرسي و حماسه و قوة عباراته الثورية  و عصام شرف اللي من أول يوم و إحنا حسينا بضعفه و من أول شهر نزلت مليونيات تطالب بإستقالته, يعني لو هو شرف هتنزل مليونيات تشيله من الحكم..


لكن إحنا إعتدنا التخوين من أيام البرادعي اللي تحمل كل أنواع الطعنات..و شباب الثورة اللي بياكلوا كنتاكي و بيقبضوا الدولارات..و 6 أبريل الخونه..و كتير من الإشاعات و التخوين اللي أصبح مرض منتشر بينا جميعاً و بنردد كل كلمه زي البغبغانات.


أنا مش بقول بكلامي إني من مؤيدي مرسي أو الإخوان عموماً ربما اللي متابعني عارف موقفي من الإخوان و إني لا أتفق معهم معظم الوقت..لكن ضيقي كان من رأي الناس(و منهم مثقفين) المسبق بأن مرسي رئيس مجرد واجهه و تابع و كاذب و ممثل إلى آخره.
كلامه إخترق القلب و قال كل كلمة ممكن ترضي غضبنا و آملنا لإكتمال الثورة...المشهد كان مهيب و عظيم و مصر حُرّه و أبيه بشعبها.


الرجل متواضع و أنا حاسه فيه بصدق..قد يكون ده جزء من عاداتي إني اثق في الناس إلى أن يثبت عكس ذلك..و قد يكون لأن كلامه فعلاً طلع من قلب بيحب مصر بجد..بجد هو ده اللي حسيته و أتمنى الأيام تثبت صدق إحساسي و ربنا يعمل الخير لمصر.



الرئيس المصري..أول رئيس منتخب حلف اليمين...مش قادره أمنع نفسي إني أكون فرحانه :)

هناك 25 تعليقًا:

ابراهيم رزق يقول...

بصى يا ستى
صلى على النبى
زيدى النبى صلاه
كمان زيدى النبى صلاه

امبارح كنت قاعد فى قعدة فيها مجموعة من المدونين
كنت بقول مش هينفع نقف للراجل على كل حاجة
ده قال اهلى وعشيرتى
ده لابس كذا
ده ده زوجته لابسه كذا
مينفعش
زوجته زى امى و زى امهات كثير فى الشعب المصرى
صعب حد يشتغل تحت ضغط
و عشان كده انا مكنتش متنبأ بنجاح عصام شرف
صعب نضع احد تحت الميكرسكوب 24 ساعة حتى ميخدش راحته فى الحمام
الضغط مطلوب لكى يعمل الرئيس
لكن مش 24 ساعة
و يجب ان نحترم الاختيار و هذا مبدء يسرى على الجميع
اما من ناحية مرسى
هو الرئيس علينا يجب علينا احترامه
و حق علينا انتقاده ان اخطىء

تحياتى

yosef يقول...

شيرين

مساء الخير

معاكِ حق وكل الحق
وان متضايق جدا من الفضائيات والفيسبوك والتويتر وبعض المدونين
ما الهم شغلة ولا عملو الا افتراض السيء به .... حتى عمله الجيد بيقلبوا نكت ومسخرة ...
اعطوا الريس مهلة 100 يوم قبل ان تحكموا عليه

موقف الميدان بالامس ...موقف عظيم
لا يستحقه الا المصريين الثوار والاحرار

دمتِ بخير

rona ali يقول...

انا بقي عادى مفرحتش ومزعلتش
انا بس حاسيت ان اخيرا بقي في رئيس منتخب لينا بعد العناء دة كله
انا هفرح اكتر لما ياخد قرارات يكون اقلها اغلبها كويس وصحيح وقانونى :)

اللى مش حابه بقي اننا زى ما عملوا الثوار من عصام شرف فرعون يعملوا كده منه هو مهمته يخدم البلد ويخدمنا لازم العقد دة زى ماقال نفضل فاكرينه ان حتى مرتبه اللى استغنى عنه مرتبنا احنا اساسا

في الطرف التانى محبتش الناس اللى وقفت علي التوكتوك وعشرتى النقد المقرف دة بكرهه بجد
ننقد تصرفات او قرارات ماشي بعيدا عن الشخص ماشي انما النقد الشخصى او اللى علي الكلام بيقرفنى

وفي النهايه
تحيه جمهوريه مصر العربيه ^_^

هبة فاروق يقول...

وانا كمان فرحانه ومبروك علينا رئيسنا ويارب دايما مصر بخير
دمتى بصحه وبخير يا شيرى يا قمر

Red Rose يقول...

من حقنا جميعا ان نفرح بالوضع الجديد وحتي صاحبوا التعليقات والنكت اغلبهم فرحانين بس خايفين يعترفوا او يواجهوا نفسهم بفرحتهم بس شويه كده وهيشد انتباههم حاجات تانيه اهم من بدلته الفاتحه و الكلام اللي مش مترتب و ياي ازاي يقول توك توك واتمني ان الحاجات التانيه دي تبقي اعمال الرئيس الجديد الحلوه زي الشوارع اللي بقت فله و المرور اللي انتظم و ووووو أملي فيه كبير و أتمني زيك انه مايخيبش ظني.
عم قول يارب .........

ليلى الصباحى.. lolocat يقول...

انا معكى فى كل حرف حبيبتى
تسلمى على احساسك وشعورك

معلش ياشيرين اليوم تعليقى بسيط
ادعيلى بالشفا عندى احتقان فى الحلق شديد

دمت بخير حبيبتى
وسلمت اناملك وعجبنى اوى تعليق استاذ ابراهيم

ريـــمـــاس يقول...

مساء الغاردينيا شيري
بجد بتمنى يكون قد كلامه ويبقى بنفس تواضعه ولا يغيره الكرسي ابداً ويارب تكون الايام الجاية احلى بكتير "
؛؛
؛
لروحك عبق الغاردينيا
كانت هنا
Reemaas

mostafa gazar يقول...

أنا أضم صوتى لكلاماتك ....أنا أرفض التجريح والاهانات و النكات المتهكمه ....ويارب يصلح له الحال ويعينه على هذه المهمه الثقيله .....هنا فى عمان الكل سعيد وفى أى مكان أذهب له يقابلنى الناس بالتهانى والابتسامات ...ويبقا علينا كمصريين أن نتقدم دائما للمساعده والبناء وليس النقد الغير بناء والوقوف والانتظار ...و ربنا يوفقنا جميعا ل (مصر) قويه ورائده و بناءه

مها البنا يقول...

انا الحقيقه يا شيرين بين هذا وذاك .. يعنى بخاف ساعات من انه يكون كلام وبس لكن طالما بقى رئيس لازم يكون له احترامه لان فيه فرق بين المعارضه والاهانه ..
انا كمان ضد الاخوان المسلمين على طول الخط ومش كنت احب مرسى او اى حد منهم يبقى رئيس لكنى انتخبت مرسى لما نزل قصاد شفيق .. المعادله مش كانت صعبه عندى ..
الخلاصه ان مرسى رئيس .. ولازم عشان نبتدى ننقد ونحاسب .. نديله وقت وفرصه

بعد ستة ائهر لعام من الأن سيرى الجميع ان كان صادق فى كلامه ولا شاطر فى الخطابه من وهو صغير

المهم .. نصبر

ولو مش صدق .. الحل مش بالمليونيه

لأ

الحل فى الانتخابات الرئاسيه القادمه

صوتنا بقى ليه قوه فى الصناديق زى ما ليه قوه فى الميدان

بس دوقتى ده وقت الصندوق

مش الميدان

اسفه انا سرحت وطولت .. بس زى بعضه بقى

كلمتين كانوا جوايا وطلعوا عندك :))

سلام يا قمر

الازهرى يقول...

بعد الصمت التام
والسكون المزمن السنين اللى فاتت

صعب جدا التحكم فى الإنطلاقة
بس بإذن الله متفائل جدا

النقد بيقل من الناحية الغوغائية اللى كانت موجودة قبل كده
وبتتجه للنقد العاقل
والموجه فى الطريق الصحيح


بإذن الله بكرة جاى أحلى

سندباد يقول...

للاسف باشيرين انا مش متفائل وتوقعاتي انه الوضع ده وبالطريقة دي الايام اللي جاية هاتبقي صعبة اوي
وربنا يخيب ظني

شيرين سامي يقول...

أ.إبراهيم رزق:

عليه الصلاة و السلام :)

معاك يا استاذ إبراهيم في كل كلمه
مع عدم الضغط و مع حرية الإختيار
و مع النقد أكيد

نورتني كالعاده
:)

شيرين سامي يقول...

أستاذ يوسف:

مساء الخير و الأمل :)

كان مشهد رائع فعلاً لازم نفسده على نفسنا كالعاده..

تحياتي لك أستاذي العزيز

شيرين سامي يقول...

رونا علي:

تحيا جمهورية مصر العربيه :)
حلوه أوي سعيده إنك ذكرتي التحية في البوست :)

عصام شرف متفرعنش من الناس هو أساساً كان ضعيف و محكوم بالمجلس العسكري..و الناس كانت بتطالب بإستقالته من أول شهر..

أشكرك على مشاركتك و تعليقك
نورتيني

AHMED SAMIR يقول...

الخطاب مطمئن و رائع
اما التعليقات التافهة التي ذكرتي بعضها فهي ان دلت على شيء فانما تدل على تقاهة قائليها
تحياتي

شيرين سامي يقول...

هبه فاروق:

ربنا يسعدنا دائماً و تكمل بالخير
نورتيني يا كاتبتنا الجميله
:)

شيرين سامي يقول...

ريد روز:

أتفق معاكي إحنا شعب فكاهي أساساً :)
لكن بتضايق أوي لما تقلب إهانه و تخوين..
ياااااااااااارب
:)
نورتيني يا جميل

شيرين سامي يقول...

لولو كات:

ألف سلامه عليكي يا لولو إن شاء الله تقومي بالسلامه قريب.
كفاية وجودك و إسمك اللي بينور البوست مش ضروري تعليق طويل أو قصير..مجرد وجودك بيسعدني :)

أرق و أعذب تحية لكي

شيرين سامي يقول...

ريماس:

مساءك جاريدينيا و فًل بلدي :)

إن شاء الله ربنا يعملنا الخير..عندي خجل فظيع منك يا ريماس لأني بجد مقصره معاكي :(

دمتي صديقه جميله طيبه دائماً تترك عطرها الرائع بين حروفي

نورتيني

شيرين سامي يقول...

مصطفى جزر:

صديقي و متابعي العزيز سعيده بردة فعل إخواننا العرب و أتفق معاك في كل حرف في تعليقك و أشاركك الدعاء بمصر قوية :)
نورتني

شيرين سامي يقول...

مها البنا:

جميل إنك طولتي لأن كلامك رائع بجد و بتفق معاه جداً و بالفعل المليونيات فقدت قوتها و الصوت الوحيد دلوقتي للصناديق..ربنا يستر الديمقراطية بتقلق برضو :)

سعيده بزيارتك و تعليقك المهم
يا رب دائماً منوراني

سلام يا صديقتي الرائعه

شيرين سامي يقول...

الأزهري:

سعيده بحالة التفاؤل :)
هي فعلاً حالة تشبه الطيور المحبوسه في قفص لما بتخرج بتطير بشكل مش متوازن الأول و بعدين بتعود للطبيعه..

تسعدني دائماً بزيارتك

نورتني

شيرين سامي يقول...

سندباد:

تفاءل خير يا صديقي و راجع التعليقات و الله كلها أمل..خلينا حتى نستمتع بالفترة دي و وجود أول رئيس مصري منتخب و نخلي النقد لوقته.

نورتني

شيرين سامي يقول...

أحمد سمير:

أنا كمان إطمنت و تفاءلت ربنا يجعل القادم أفضل..

سعيده بزيارتك :)
نورتني

Hanan w Haneen يقول...

يااارب يكون عند حسن ظننا بيه وانا متفائلة خير مع بعض القلق بس ان شاء الله خير ..