تحديث
مبروووووووك يا مصر
أول رئيس مش عسكري
مبروووووووك يا مصر
خلصنا من كل فلول النظام القديم
مبروووووووك يا مصر
دم ولادك مارحش هدر
مخذلتناش يا رب
الحمد لله
أصدقائي
مش عارفه أكتب إيه بس حاسه إني عايزه أكتب و أدوّن و خلاص مش بس عشان حملة التدوين لكن عشان الكتابه بتريّح و أنا مخنووووقه...في رسايل من القدر حاسه إنها بتقولي حاجات مش عارفه صحيحه و لا لأ!؟؟
الرسالة الأولى
أبويا كالعاده بقاله فترة بيقنعني أبطّل كتابه على المدونة و أكتب لنفسي زي زمان..
أمي بقالها فترة بتنصحني أبعد عن النت و أركّز في حياتي..
إمبارح اللاب توب إتكسر...
مش عارفه هقدر أستلمه إنهارده و لا لأ
بس أنا قررت أكتب من كومبيوتر أثري في بيتي القديم
مش بعند معاك يا قدر بس مش فهماك
الرسالة التانية
3 حوادث سيارة في شهر واحد
أجمدهم لما عربية نقل خبطت عربيتي..شوهت الباب و كسرت عضم العربية
و التانية لما خبطت أنا في سور كوبري 6 أكتوبر و كسرت تارة العجلة
و آخرهم إمبارح لما عربية زنقت علية و كسرتلي المراية
بس أنا بخير الحمد لله
لكن حسيت إن القدر بيقولي ...حاسبي
أنا مش خايفة من الموت بالعكس ساعات كتير بتمناه
لكن خايفه عشان مباتوبش
من شروط التوبة الندم
و أنا مبندمش
خايفة منك يا رب
الرسالة التالته
أنا من سكان مدينة نصر لكن أشهد الله إني بريئه من اللي الناس عملوه إمبارح عند المنصّة
و لو كنت أعرف إنها منطقة فلول ماكنتش سكنت فيها
لما الناس في التحرير وشوشهم جاده وهتافاتهم من القلب
و مجموعة المنصّة طبل و زمر و رقص
لما أبويا في التحرير سأل شاب بايت هو و أسرته..إنت جيت هنا ليه
قاله عشان أنا أيام المخلوع إعتقلوني و خلوني أسجد لصورته..
و الناس عند المنصّه عمالين يتغنوا و يغنوا لشفيق!
الرسالة واضحة المره دي
هاااانوا عليكم
الشهداء هانوا عليكم
و مفيش فايده فيكم
بتكرهوا الثورة...حتى لو مقولتوش
خايفين متاكلوش بيضزا و ماتروحوش تصيفوا زي كل سنة
خايفين على إستقراركم و مش مهم كرامة الشعب
صديقاتي اللي خايفين لو الإخوان مسكوا ميعرفوش يلبسوا بنطالونات
صديقاتي الأقباط اللي خايفين نبقى مصرستان
الموظفين عندي في الشغل اللي عايزين أي حد من ريحة المخلوع
كل الناس اللي إستفادوا أيام المخلوع و خايفين على مصالحهم الشخصية
مفيش فايده فيكم
الشهداء هــــــــــــــــــــــانوا عليكم
أنا بكتب البوست ده في ظروف ملخبطة و قبل ظهور نتيجة الإنتخابات بساعة تقريباً عشان مش هكتب تاني سياسة..
و منكرش إني محبطه جداً
لعله خير
هناك 52 تعليقًا:
حفظك الله من كل شر .. وربنا بيمتحنا في أحلك الظروف ويبقى الخير في أمة محمد إلى قيام الساعة تحياتي
الف الف سلامه عليكى شيرى حبيبتى من الحوادث خدى بالك من نفسك وسوقى على مهلك وربنا هو الحافظ باذن الله
بعتب على بابا وماما لان التدوين خلاص بقى زى الادمان بالنسبه لنا تصدقينى لو قولتلك ان التدوين ملوش طعم وانتى مش موجوده بينا أنتى بونبونايه التدوين يا شيرى
صدقينى حاولنا كتير نبعد ومقدرناش
بالنسبه للنتيجه انا خايفه يارب ارزقنا السلام والامان واحفظ مصر واحفظنا من كل سوء
فى انتظار رجوعك للتدوين لانك خلاص انتى قبطان السفينه دلوقتى اللى بيقودنا وبيقود الحمله ولازم تكملى معانا المشوار على قد ما تقدرى باذن الله فى انتظار جديدك يا قمر وخلى بالك على نفسك
حمدالله على سلامتك اولا والمهم انك بخير
ثانيا مصر بخير طول ما اهلها خايفين عليها وبيحافظوا عليها ومش عايزنها تضيع تاني
وانا عن نفسي شايف الثوره بتخرج من غرفة الانعاش اللي كانت بتموت فيها بقالها سنه ونص وبتشم نفسها من جديد في قوه وشموخ وصمود ضد عودة النظام القديم
تحياتي
الف سلامة عليكي يا شيرين و ربنا يبعد عنك اي حاجة وحشة ..
معلش ساعات الدنيا بتلخبط كدة مرة واحدة بس باذن الله فرجه قريب ..تفاءلي خيرا و ان شاء الله كله خير يا قمر
تحياتي لقلبك الطيب
أولا ألف سلامة عليكى .. حاسبى بجد!
و خدى بالكك من نفسك
و كمان قدر الله ما شاء فعل .. الحمدلله أنك كويسة ..
التدوين ده أنا بيجيلى فترات بالشهور مش عارفة أكتب إيه و ليه و إمتى .. ببساطة مليش نفس فعلا!
لكن هترجعى إن شاء الله :)
هتلاقى عندك كلام تقوليه
بالنسبة لشفيق .. مصر بشكل عام جابتلى إحباط ..
مش حاسة أن فيه أى حاجة إتغيرت .. ده على كده نرجع مبارك بقى!
و الحاجة الوحيدة اللى مزعلانى مش الشعب (عايز شفيق .. يشبع بيه)
اللى مزعلنى .. الشهــداء !!!
حسبى الله و نعم الوكيل!!
دكتورة شيرين ..
بصراحة ..
تدوينتي الأخيرة "أسرار وردة" ولدت من رحم تدوينتك "نطفته" فهي ما ألهمني كلماتها ..
فإن أنت ذهبت بعيداً ذهبنا ..
لذلك فلتبقي ولنبقى ..
بس خللي بالك من نفسك وانتبهي للسواقة بتاعتك وما تشرديش في السيارة .. وربنا يحفظك ..
بس عن نفسي .. قلبت من بضع أشهر بالسيارة وخسرتها .. بس مش عارف اشتري غيرها بظروفنا الراهنة ..
أما مصر .. آاااااه يامصر ..
أنا فعلاً باتعمد إني ابتعد عن السياسة علشان أنا فهمي فيها محدود .. لكن فعلاً كلنا في سوريا بننتظر على نار نتائج الانتخابات بتاعتكم .. وبنقول لو فاز شفيق يبقى جبتوا العذاب ده لنفسكم ليه ؟؟
أهو كان حسني كويس أهو .. ومتواضع .. وما لزقش على الكرسي بتاعه أكتر من تمانتاعشر يوم بس ..
أما شفيق فيا خوفي يتعلم من بشار ويلزق طول العمر ..
كوني بخير .. فتتحتي جروحي يا شيرين ..
أولا ألف مليون سلامة عليكى يا شيرى
وربنا يحفظك من كل شر يارب
ثانياً أحيانا الدنيا بتخبط فينا كتير
انتى مش لوحدك كلنا الدنيا ملخبطة معانا
وبعدين المؤمن دايماً مُصاب ربنا بيختبر قوة صبرك واحتمالك وشكرك على اى حاجه سواء وحشة او حلوة
وبكرة ان شاء الله هيبقى اجمل ما احنا متوقعين
لعله خير
أخيرا بقى اوعى تبطلى كتابة خالص ولا تسيبى التدوينة لانى حبيتها اوووووووووووووى
دمتى بخير:))))
مبرووووك لمصر :)
والله فرحنا لكم.. كل العرب فرحانين من أجلكم :)
الف حمدلله على السلامه شيرين وربنا يبعد عنك كل شر.
ومبروووك لمصر ولكل حبايبي المصريين.
مبرووووووووووووووووك لمصر
مبرووووووووووووووووك لنا كلنا
والحمد لله على السلامة
وخير ان شاء الله خير
ربنا يحميكى يا شيرين
وخلى بالك من نفسك
النتيجه الحمدالله كانت عشان الشهداء مش عشان اى حاجه تانيه
ربنا يجعله الاصلح لينا وللبلد ان شاء الله :)
ربنا يحفظك وخلي بالك من نفسك اكتر من كده واولا قبل رأي مبرووووك وثانيا دائما متألقه ومميزه وسبقانا كلنا وكتير كلامك بيوصف اللى حسينوا تسلم ايدك
اول حاجة الف سلامة عليكي و على اللاب توب
تاني حاجة انا كمان زيك قررت مكتبش سياسة تاني بس غصب عني كل مرة برجع اكتب تاني يا رب ابطل بقى شكلي هروح السجن قريب
غير كدة دلوقت مرسي بقى الرئيس يعني معرفش لو لسة محبطة و لالا بس معلش كلنا بنمر باحباطات و اوقات وحشة جدا بس بعدين كل حاجة بتتضبط
انا مش مبسوطة لان لسة حق الشهداء مرجعش و يمكن انا حساسة للنقطة دي اوي عشان فقدت حد اكتر من روحي في الثورة بس ان شاء الله حاسة ان حقوق الشهداء هترجع و عيش ، كرامة ، حرية هييجي يوم و يبقى مش شعار لكن منهج حياة في مصر
سلامي
الف الف الف مليووووووووووووووووون مبروك يا شيرين
مش عارفة اكتب ولا اعلق من الفرحة
مبروووووووووووووووووووووووووووك
طب دلوقتى اقول مبروك يا شيرين وراح الخوف خلاص
انا مش اخوان وانتخبت مرسى لانه من الميدان
انا انتخبت اى حد يقول لا للفلول واى حد يشجعهم
الحمد لله ربنا معانا بجد متفائله جدا حتى على المستوى الشخصى
يمكن من بكرة نكون معارضه لكن كله عشان مصر
الحوادث متخافيش منها كله قدر والموت مش عايز تنبيهات ربنا يطول عمرك
ليه تبطلى الكتابة هنا ؟؟ اكيد عندهم سبب وانتى كمان ليكى رأيك
يارب دايما تكونى بخير
السواقه عاوزه دماغ فايقه يا شيرى .. اوعى تسوقى وانتى شارده ودماغك شغاله فى ميت حاجه .. ربنا يحفظك وبسلمك من كل سوء يارب
بالنسبه لبقيت رسايلك مش فيه عندى رد .. اصلى اتخضيت من حكاية التلات حوادث دول .. لما استوعبهم هبقى ارجع اعلق ان شاء الله :(
لعله خير بامر الله
اولا احنا مش نقدر نتحرم من كتاباتك هنا اوعي تبطلي
ثانيا الف سلامة عليكي و على العربية و ربنا يحفظك
ثالثا بقى الحمد ان مهذلة مدينة نصر انتهت مع اني مظنش التمثيلية الكبيرة خلصت لسة شوية
ربنا يعينا جميعا على ما بلانا
تحياتي :)
دائما ناخد الشئ من جانبه الحسن وبلاش نتشاءم ونقول زي ما قلتي لعله خير - والمؤمن دايما منصاب واذا احب الله عبدا ابتلاه
المهم اننا نرضي ونقول الحمدلله علي كل شئ اما موضوع الكتابة في حاجات مينفعش نبطلها لانها بق جوانا زي المية والهوا بس ممكن نمسك العصايا من النص احيانا عشان نقدر نكمل
وايا كان الرئيس اللي جي ندعو الله ان يتقي الله فينا
طولت عليكي معلش
فكرتينى بحادثه قريبه في موضوع الزنق علي العربيه دة :)))
وبرضوا شالها المرايه وطبقلها الجزء الجنبي اععععع وكان مينى باص هيئه نقل عام يعنى مبيرحمش ويقولها اصلي مش شيفك
بتوع فشيق دوال بلاش نضيع حسناتنا عليهم
حسبي الله ونعم الوكيل
ربنا يحميكى دايما ومش لازم تندمى علشان تتوبي المهم تقعدى وتفهمى اللى بيحصل وتتعلمى منه لان ربنا دايما بيشوف المؤمن فطن ومينفعش يقع في الشء مرتين :))) فلا تخيبى ظنه فيكى
حمدالله على سلامتك حبيبتى ربنا يحفظك
أصدقائي
الحمد لله اللاب توب إتصلح و إستلمته :)
نعاود النشاط...
كريمة سندي:
أشكرك يا عزيزتي على دعوتك الرقيقه :)
صباح الغاردينيا شيري
أولاً الف الف الحمدلله على سلامتك وبعيد الشر يارب
ثانياً ألف ألف مبروك لمصر ويارب عهد خير جديد ..
ثالثاُ جميعنا نمر بضغطو عائلية تجعلنا نبتعد عن التدوين لكن صدقيني سيبقى الحنين لمدونتك وحرفك وأصدقائك أتمنى أن تبقين معنا ويبقى أسم شيري الذي أحببته بيننا :) "
؛؛
؛
لروحك عبق الغاردينيا
كانت هنا
reemaas
هبه فاروق:
الله يسلمك يا هبه و ربنا يسلم بجد..
هما مش شايفين الموضوع كده لهم وجهة نظر أخرى :)
ربنا يخليكي يا جميل البركة فيكي إنتي و الناس الحلوه دي كلها :)
الحمد لله ربنا يعمل الخير لمصر
ياااه يا هبه أنا قبطان..ده أنا حتى سواقتي بقت وحشة أوي...البركة فيكم و شكراً بجد على كلامك الجميل :)
تحياتي ليكي
اسامه:
الله يسلمك يا رب
الحمد لله ربنا كريم :)
تحياتي ليك
إيما إيما:
الله يسلمك..و ربنا يخليكي شكراً بجد
خلاص أنا تفاءلت..شوية يعني :)
تحياتي لكي
الف سلامه عليكى
خلى بالك من نفسك
رضوى أشرف:
الله يسلمك يا رب الحمد لله على كل حال
أنا دائماً عندي حاجه اقولها لكن المشكلة أعمق من كده..
خلاص شفيق بحححح
:)
ربنا سترها معاكي يا مصر
ألف شكر يا رضوى :)
ظلالي بيضاء:
الصديق العزيز محمد إن شاء الله هروح أقرى تدوينتك و سعيده إن تدوينتي كانت سبب لإلهامك :)
حمد الله على سلامتك و أكيد مش مهم العربية ربنا يعوضك عنها خير بإذن الله.
الحمد لله شفيق مبقاش له مكان و ربنا يعمل لنا الخير و ينصركم في سوريا العزيزه.
اشكرك و نورتني بالزيارة
أميرة أحمد:
الله يسلمك يا رب
بجد أسعدني جداً تعليقك
و بإذن الله هستمر في الكتابة و الأرزاق على الله :)
أشكرك و نورتيني بالزيارة
الكيل بمكيالين:
الحمد لله ألف شكر
ربنا يسعدنا و ينصرنا دائماً
تحياتي الخالصه
نيسان:
الله يبارك فيكي يا نيسان و يسلمك يا رب
الحمد لله
:)
يوسف:
أستاذي العزيز الله يبارك فيك يا رب
مدركة فرحتك :)
إن شاء الله خير
ألف حمدا لله على سلامتك ياجميل ،، وخلي بالك من السواقة
وربنا بيقبل التوبة مرة واتنين وعشرة طول ما الشمس لسه ماطلعتش من الغرب
الحمد لله على كل شئ
:-)
تحياتي لكِ
الف سلامة عليكي يا شيرين خلي بالك من نفسك كويس
معلش محدش في مصر حاليا مخه عليه فلازم تخلي بالك من نفسك
عايز اقولك مبروك بس زي ما قلتلك محدش في مصر مخه عليه علشان كده هاخلي المباركة بعدين لما يمشوا العسكر و نعرف ايه الصفقة الجديدة اللي هيوصلولها مع الاخوان علشان يسلموهالهم
عايز اقول مبروك لمصر بس كل ما افتكر يوم استشهاد الشيخ عماد عفت و ازاي الاخوان يوم ما كانت مصر كلها بتبكي كانوا بيرقصوا و بيغنوا في احدى الدواير علشان نجاح مرشح ليهم و ايه اللي قالوه على ست الستات و مين البلطجي و يوم ما منعوا الناس من الوصول لمجلس الشعب و غيره و غيره سجلهم اسود الفترة اللي فاتت
أنا ابطلت صوتي لان الفرق مش كبير اوي بين الاتنين مستني بس اشوف اللي هيعمله مرسي و على اساسه اقرر اقول مبروك و لا لاء
المهم انتي تخلي بالك من نفسك كويس و ان شاء الله اللاب يتصلح بسرعة و هنستناكي اكيد
ألف مليوووون سلامه عليكى يا شيرين ......و لعله خير ......و ربنا يصلح حال البلاد الى ما فيه خير للعباد .......و االله مش عارف أقولك ايه ..... ربنا يكرمك ويوفقك وييسرلك الامور الى كل خير وسعاده وراحة بال ....و خدى بالك من نفسك ....
بنت من الزمن ده:
الحمد لله الله يسلمك يا دينا
أكيد عشان الشهداء
كانت هتبقى مهذله
ربنا ستر :)
نورتيني يا جميل
شريف:
ربنا يخليك و يسلمك
ده من ذوقك أكيد :)
تحياتي ليك
إيمي:
الله يسلمك يا جميل
مش سعيده بمرسي قد ما سعيده بسقوط شفيق ربنا يعملنا الخير و يصبرك على فقدان عزيز عليكي..و الله إن الشهداء هما أكتر جاجه خلتني أختار مرسي رغم إني مش إخوانية و لا هكون..
أشكرك يا إيمي و أرق تحية لكي
لولو كات:
الله يبارك فيكي يا رب و ألف حمد و شكر لله
:)
رؤى عليوة:
أنا كمان بقيت متفاءله
ربنا يكملها على خير
شكراً على تعليقك الرائع
و أتمنى أقدر أقاوم و مبطلش كتابة
تحياتي و تقديري لكي
منه:
الله يسلمك و يخليكي يا رب
و الله مدينة نصر مش كلها فلول
فضحونا منهم لله :)
نورتيني يا منه
ألف شكر بجد
مها البنا:
للاسف على طوووول دماغي شارده :(
ربنا يستر
ألف شكر على سؤالك يا جميل
نورتيني
سندباد:
أشكرك يا أكرم على تعليقك و متابعتك الدائمه..هحاول منشاءمش و بدعي معاك إن الرئيس الجديد يتقي الله فينا...و أحسبه هكذا..
تحياتي و تقديري لك
رونا علي:
شكراً يا رونا على نصيحتك الأخيره بجد فرقت معايا :)
نورتيني يا جميل
كارمن:
الله يسلمك يا رب
ألف شكر :)
ريماس:
مساءك سكر ريمو :)
الله يسلمك يا رب و يبارك فيكي و يعمل لمصر الخير
شكراً على كلماتك العذبه و أنا سعيده أكتر بوجودي معاكم :)
أرق تحية لكي
ريد روز:
حاضر يا فاندم هحاول :)
الله يسلمك
نورتيني
بنت باشا:
شكراً يا جميل و الله يسلمك يا رب
أكيد رحمة ربنا وسعت كل شئ
نورتيني و أسعدتيني بزيارتك
:)
مصطفى سيف:
صديقي العزيز الله يسلمك يا رب
أنا مش معاك يا مصطفى الفرق بينهم مش بسيط..صحيح أنا ضد الإخوان لكن هما مش مجرمين و مهما عملوا مش زي جرائم النظام السابق و النتيجة اللي وصلنالها دلوقتي من جهل و فقر و خراب..أكيد مفيش مقارنه..و إفتكر إنهم كانوا شركاء ثورة...أتمنى يكونوا عند حسن ظننا و ميخيبوش أمالنا عشان إحنا خلاص مش هنسكت بعد كده..
ربنا يستر
الحمد لله اللاب توب إتصلح :)
تحياتي الخالصه لك
مصطفى جزر:
صديقي و متابعي العزيز
اشكرك على دعاءك الرقيق و الله يسلمك يارب
لا تقلق أنا بخير :)
تحياتي لك
إرسال تعليق