الاثنين، 19 ديسمبر، 2011

اللي يضرب بنت ميبقاش راجل




يمكنك أن تدهس الورود لكن لا يمكنك أن تؤجل الربيع

اللي يضرب بنت ميبقاش راجل


كلمه كنت بسمعها طول عمري و كنت مصدقاها لغاية ما الحقيقه فضلت تبان قدامي شوية بشوية...
لما لقيت بنت الجيران بتضّرب من باباها علقه سخنه في البلكونه و هيه لسه ماجبتش 14 سنة.
لما لقيت قريبتي اللي ضحكت يوم مع إبن الجيران و باباها شافها فضربهاعلى وشها.
لما لقيت صديقتي جاية بدراعها متجبس و قالت إنها وقعت من على السلم و عرفت بعد كده إن جوزها هو اللي كسر دراعها.
لما لقيت صديقه أخرى جالها نزيف في الأنف لأن زوجها ضربها مره بونيه (آه و الله بونيه) يعني بوكس يعني بقبضه يده.
لما سمعت حواديت كتير عن زوجات بيتضربوا و يسكتوا عشان المركب تمشي أو عشان هو عصبي أو عشان هو إعتذر.
لما ست كبيره مره قالتلي : عادي إن البنت تضّرب من جوزها على الأقل مره أو مرتين في العمر لكن أكتر من كده لأ!!
لما حماة صاحبتي قالتلها : و إيه يعني لما يضربك ده ربنا هو اللي قاله يعمل كده!!
و محدش ينكر إن ده موجود في المجتمع بكل طبقاته بس في السر في الهُس عشان تفضل صورة الراجل راجل و يمكن يدافع عن حقوق المرأة كمان و عشان البنت تفضل صورتها قوية متتهزش في عيون الناس.
و دلوقتي عرفت إن البنت كمان ممكن تضّرب من عسكري أو فرد أمن أو راجل غريب و اللوم ميبقاش عليه...يبقى عليها عشان خرجت من بيتها (أصلها لو كانت خارجه تشتغل و تجيب في البيت فلوس كانت بقت بمية راجل)
أو عشان باتت بره البيت (ماهي لما كانت بتبات أيام الثوره كانت بطله دلوقتي إيه هنرجع لمسلسلات طلعت ذكريا تاني!)
أو عشان بلطجيه و بتشتم الجيش و بتحدف طوب...و هل جزاء حدف الطوب كل هذا العنف و القسوة من  أشخاص يؤسفني  إنهم رجال.
أو يمكن عشان صفات ملابسها...و إنت مالك و مال ملابسها إنت لك إنها كانت مستوره و محتشمه مالكش دعوه بغير كده...بتدافعوا عن إيه عن الضحيه و لا المجرم  عن الضعيف و لا القوي عن المظلوم و لا الظالم ...كفايكم ظلم للمرأة...المرأة لم تخلق عشان تقعد في البيت و تغسل المواعين و تربي العيال...المرأة دلوقتي بتدرس و تشتغل و تشيل هموم كتير...كم عدد الأسر اللي بتعولها إمرأة...كم عدد الرجال اللي شبّوا على يد إمرأة...عيب أوي لما ننتقص من دورها و نحصره في البيت.

 أسماء بنت يزيد قتلت 9 من الروم في معركة اليرموك ..... الصحابيه خوله بنت الاوزور ارعبت جيوش الروم بمفردها ودخلت وسطهم تقاتل كالاسد حتى انها قهقرت جيوش الروم الى الوراء وكان خالد ابن الوليد موجود فى المعركه وهيا تقاتل .......الصحابيه نسيبه بنت كعب كانت تحارب فى جيوش المسلمين ودافعت عن الرسول فى احدى الغزوات با...لسيف وحمته من الكفار امراه حمت الرسول مع ان الرسول رجل والصحابه كانوا حوله والرسول اشاد ببراعتها وقال ما التفت يمينا او يسارا الا رايتها تقاتل دونى .......الى يقولك ايه الى منزلها قوله ان النساء ايام الرسول كانوا يقعن فى الاسر فى الغزوات والرسول مكنش بيقول يارتنا منزلناهم ولا خليهم فى بيتهم..............الى يقولك كدا وقله ان بنات مصر بتقولك ان لو تعريتها هتغطى بلدها فانها تمنح غطاء جسدها لبلدها رغم صعوبة التعريه ورغم المهانه.

المقطع ده منقول من الفيس بوك و مش عارفه مين اللي كتبه لكنه بجد لخص كتير من اللي جوايا.

أرجوكم إرحموا الأنثى رفقاً بالمرأة الإسلام ليس نقاب و حجاب و طاعه فقط الإسلام رحمة قبل كل شئ و الرسول عليه الصلاة و السلام قال (إستوصوا بالنساء خيراً) متجلدوش اللي نزلت تعبر عن رأيها إجلدوا نفسكم لأنكم وصلتوها لكده بسلبيتكم و إختلافكم لأنكم حتى مرحمتوهاش و نزلتوا تجريح فيها و خوض في عرضها بدل ما تدافعوا عنها...فين الكرامه في النخوه.. لسه هتدافعوا عن نفسكم بتجريحكم فيها و لا يمكن عشان هيه مش تبع حزب قوي يدافع عنها...عموماً أنا كل يوم يزداد كرهي لكل الأحزاب و أصحاب المصالح.

و لسه هفضل أصدق الجمله دي و مش هنساق لقوانين المجتمع المريض بالسكيزوفرينيا....
اللي يضرب بنت ميبقاش راجل!

هناك 44 تعليقًا:

سواح في ملك اللــــــــــــــــــه- يقول...
أزال المؤلف هذا التعليق.
سواح في ملك اللــــــــــــــــــه- يقول...

الرسول كان اعظم الرجال

ولم يضرب امراة في حياته

بل خاصم وهجر شهرا

هذا خلق الرجال

اما بالنسبة للبنت اللي كانت في الاعتصام

فهي وضعت نفسها موضع الرجال

وعوملت معاملة الرجال

والعسكري بيضرب كل اللي بيقابله

اما حكاية التفاصيل دي

فانا مش معاها

احنا اتفقنا ان في وسط الفوضي

لاتمييز

تحيتي

شيرين سامي يقول...

أنا مش بنوته..قصدي مش نور يا خالد:)
المرأة بتحج يا سواح جنب الراجل كتف بكتف في عز الزحمة و الصعوبات و عليها نفس الواجبات التمييز يجب أن يكون في المعامله .. إزاي تُعامل معاملة الرجل؟
أنا أساساً مش موافقه إن الراجل يتعامل كده.

تحياتي ليك

سواح في ملك اللــــــــــــــــــه- يقول...

معلش اختلطت عليا اسم المدونة

اللي انا اقصده

ان في الفوضي

كل شئ يحدث

يعني في الحج زي مبتقولي

لو مجموعة وقعوا

كله بيقع لاتمييز بين رجل يقع وست متقعش

ظلالي البيضاء يقول...

دكتورة شيرين ..
أولاً أنا بالفعل باحترم حضرتك كويس أوي .. مش نفاق يعني ..
ثانياً .. أنا أشاركك الرأي مع التوضيح التالي ..
1- ظلم المرأة ليس إلا تقاليد موروثة ولا تمت معظمها للدين بصلة .. فكما ذكرتِ حضرتك حديث النبي صلى الله عليه وسلم :"استوصوا بالنساء خيراً"
وفي حديث آخر : "ما أكرمهن إلا كريم ؛ وما أهانهن إلا لئيم"
وفي حديث أكثر وضوحا : "خيركم خيركم لأهله ؛ وأنا خيركم لأهلي" والأهل في مصطلح زمن النبي صلى الله عليه وسلم يقصد به الزوجة ..
2- أما ضرب المرأة ففعلاً لم يضرب رسول الله امرأة ولا غيرها إلا الضرب في سبيل الله .. بل ونهى عن أن تُضرب المرأة في الوجه أو تُقبح أي أن يقال لها "قبحها الله " أو كما يقال في بلادنا "يقطع عمرها بها الخلقة أو بها الوش"
والضرب الذي ورد في القرآن وضحه المفسرون .. بأنه ضرب غير مبرح بسواك ونحوه لا بعصا .. والحرة لا ترضى لنفسها بالضرب .. لكن إذا كان عند بعض النساء خبث أو نحوه فلزوجها أو أبوها ضربها .. برفق .. فلا يكسر يدها ولا يؤذيها بل يشعرها بغضبه منها ليس إلا ..
3- هل يربي الرجالَ إلا أمهاتهم ؟؟

بارك الله بك ..
وأدعوك لقراءة أخر تدوينة لي ..
حيث كان الجزء الثاني من الابيات بدافع الغيرة على ابنة مصر التي آلمنا ضرب العساكر لها .. وكذلك التدوينة التي قبلها تضمنت المعنى نفسه ..
أعتذر للإطالة .. وتقبلي مروري واحترامي لك ولقلمك ..

FAW يقول...

نفس فكر من يلقي اللوم علي المتحرش بها والمغتصبة . .

أسهل يلوم الضحية ويدخل في تفاصيل عقيمة عشان جبان وخايف يخرج بره الإطار و رافض يفكر بعيد عن القطيع

لنا الله

تحياتي . .

سواح في ملك اللــــــــــــــــــه- يقول...

هو انا بصراحة

مش عارف فاو يقصد مين بتعليقه

بس لو كان يقصد تعليقي

عايز اوضحله حاجة

كون انك تنتقد اي شئ وكل شئ بيحصل

دلوقتي ده سهل جدا

ومحدش بيحاسب حد

الجبن والخوف يافاو هو انك متقولش رايك بصراحة

حتي لو كان ضد التيار اللي ماشي دلوقتي

كله بقي ثائر

وكله كان في التحرير

وكله بيشتم او يهاجم حكامه باعتباره ثائر

هي دي الموجه

وهو ده القطيع

ربنا يحفظ مصر

ابراهيم رزق يقول...

ازيك يا شرين

انا بجد مكنتش عايز اعلق زى محبتش اعلق على الفيس لانى بجد بشعر بمهانة كبيرة و شرخ نفسى كبير
اولا يا شرين انا اللى ربتنا امراة انا ابى توفى و انا عندى خمس سنين و امى كانت فى اوائل الثلاثينات و طلعت فى الدنيا لا اعرف الا امى يعنى تقدرى تقولى ابن امه و ارتباطى بامى ارتباط مرضى
زمان كان فى مصطلح انقرض اسمه بنت الحتة اللى لازم تدافع عنها و تتخانق عشانها و عيب فى حقك لو حد عاكسها و لو حد عاكس بنت و يعرفك يجى يعتذر لك
و لو صادفت و ركبت مواصلة اتوبيس مثلا مع زميلى سواء انا او احد زمايلى تلاقينى احاوطها داخل الاتوبيس مثل اختى او كنا فى رحلة نشعر انهم مسئوليتنا
اللى بحكى عليه ده مش خصال حلوة فيا او زمايلى لكنها حاجة جوانا ملناش دخل فيها
طبعا انا اخشى من هذه النقطة حتى لا اتهم بانى ثائر و باروح التحرير
معرفش الفتاة التى انتهكت لكنى اعرف السيدة خديجة و اول مرة اعرف اسمها من الاعلام اشاهدها كثيرا احيانا تقرء اللافتة التى احملها احيانا و تتناقش معى فيها اتذكر مرة عزمت على ببسكوتة و اعتقد فاتيما كانت موجودة
سيدة جميلة محترمة اولادها فى الخارج كيف يجروء احد ان يمد يده على سيدة كما انها فى عمر امه بجد و حياة ولادى بكيت
نأتى للفتاة الاخرى اشد ما المنى ان نترك الجانى و نلوم الضحية
نلومها لانها نزلت تطالب بمطلب عادل من وجهة نظرها حتى لو كانت الوحيدة
نلومها لانها ارتدت عباة على اللحم و كانها كان مطلوب منها ان ترتدى ملابس الغطاسين تحت العباة
هل نلوم من وضع السم فى الطعام ام نلوم من اكل منه
ما هذه القسوة التى نتعامل بها مع البشر
الكل يلوم الاطفال اللذين قبض عليهم و لم يلوم احد المجتمع الذى القاهم فى الشارع
و لم يلوم احد من ضربهم و عذبهم و اثار الضرب الواضحة عليهم لم تلفت نظر احد
بالذمة هل يملك واحد من اللذين قبض عليهم 200 جنيه و من الذى يوزع المبالغ
اطلب من الجميع ان يتقى الله و الا نكون قضاه و جلادون
و ان نقف مع انفسنا لعل الشرخ الذى نشعر به جميعا ننساه و نتعايش معه فاحيانا لا مفر من التعايش مع الالم طالما لا مفر من الالم
اما التحرير فانا على وشك ان اقول كفرت بالثورة

مصطفى سيف الدين يقول...

حينما تفتقر لأي سلعة تستطيع بها ان تدافع عن نفسك منطقيا تتحول الى استعمال الايدي والاقدام وكل سلاح لديك مهما ان كان هذا السلاح مشروعا او غير مشروع حتى تفقد الآخرين قدرتهم على منطقية التفكير وهل هناك سلاح غير مشروع مثل استعمال القوة ضد النساء واحساس من معهم من الرجال بالعجز عن الدفاع عنهم
انها خطة دنيئة من مجلس دنيء ارتضى لنفسه استهداف النساء في مجتمع شرقي ولا يفهم عاقبة ذلك فالشرقي لا يتسامح ابدا في عرض انتهك مهما مر الزمن
تحيتي

FAW يقول...

أستاذ سواح

متعودتش أبدا إني أرمي كلام علي حد وحضرتك فهمتني غلط تماما

أنا إستشهدت بموضوع التحرش والإغتصاب ودول أظن ملهمش أي علاقة بالثورة وكوني ثائر من عدمه ، أنا بتكلم عن إن الرسول قال " من ستر مسلما ستره الله في الدنيا والآخرة "، يعني المفعول بها مينفعش نقعد نلومها ونقيم عليها الحد , وتاني بتكلم علي مدي شبه الموقف بالمثالين اللي ذكرتهم

تحياتي . .

سواح في ملك اللــــــــــــــــــه- يقول...

فاو شكرا لك

فلم يكن تعليقك واضحا

تحيتي

haneen nidal يقول...

و انا معاكي الي يضرب بنت ما يبقاش راجل

رسولنا الكريم بيقول لا يكرمهن الا الكريم و لا يظلمهن الا الئيم و قضف المحصنات من السبع الموبيقات و هي جزائها عند رب العالمين يا نيلاها و ربنا الي رح يخدلها بحقها كفائاها عم تاخد حسنات كل حد عم يطعن فيها و الي عراها دا حياخد نوب كل حد شاف عورتها وشوفي انت كم شخص في العالم شاف عورتها كفيتهت كدا ان تهان على الارض ترفع في السماء

و البنت دكتوره مش بنت شارع عجبي على عقول صغيره

و عجبي على العربي و رجولتو عجبي على حفيد المعتصم

قلولوا يمكن نسي ان فيوم لاجل امرأه قامت الدنيا و لم تقعد !!!!!!!

علموهم التاريخ كويس المدارس مش بتعلم حاجه و للاسف

قلولهم اليهود مش بتعمل كدا في فلسطين لا الامريكان في العراق

انتم تجبرتم اكثر من عدو الدين

حسبي الله و نعم الوكيل

بس الدنيا دنيا قصاص كما تدين تدان

متل ما هي عوره وانت كشفت سترها ليك عوره و في يوم رح ينكشف سترها

و الله انا وجعني قلبي عليها ربنا يكون في عونها و يصبر اهلها :((

وجع البنفسج يقول...

اللي يضرب بنت ميبقاش راجل .. وللاسف الشديد ما رأيناه كان فظيعا للغاية ..

وقبل أن نقول لهم رفقا بالمرأة .. نقول لهم رفقا بالاسلام وكفى تشويها له ..

ويكفي " عن جد " تبرير فعلة الجلاد واتهام الضحية .. لا وفي الاخر يركزوا على ملابسها أما ضرب العسكري لها في صدرها لم يراه أحد وعادي يعني !! حسبي الله ونعم الوكيل .. وعموما كله سلف ودين .. وربنا مابينساش حد والسماء ما بتحدفش طوب .. والقصاص يكون من أهل بيته للاسف .

ربنا يصلح الحال يارب ..

هبة فاروق يقول...

عايزه اقول ان اللى يضرب بنت ميبقاش انسان ..ميبقاش حاجه خالص
يكفينى دموع ابنتى عندما شاهدت فيديو ضرب الفتاه وسحلها على الارض ..وشعرت بنظره خوف فى عينيها
الله يرحم الانسانيه ..الله يرحم النخوه
الله يرحم الرجوله
تحياتى

zizi يقول...

شيرين لايوجد أي كلمة تقال بعد ما قولتيه ...غير أني أم ولدي بنات وعندما اتخيل احداهن في هذا الوضع ابكي ولامجال هنا للعتب على البنت ان كانت تلبس شيئاً تحت العباءة أم لا ولكن هل لو مزقت عباءتها لأي سبب كان لايوجد عسكري يستطيع ان يخلع قميصه ليسترها ؟؟؟؟وساعتها كم من القبعات التي كانت سترفع للجيش وأفراده وربما كانت بردت نيران كثيرة مشتعلة بداخلنا ..وحتى لو كانت تفوهت كما سمعت بألفاظ بذيئة لأحد الضباط فهناك من الطرق الكثيرة لأخذ الحق غير هذه الطريقة المشينة ..ولنفترض ان هذه الفتاة راقصة هل هناك مايعطينا الحق أن ندينها هكذا ؟؟؟؟؟لا ثم لا ثم لا ...اخشى على الجيش رغم صدقه احياناً ان تنفذ نقاطه لدى الشعب وهنا ستكون الكارثة ...تحياتي وشكري

ستيتة يقول...

لما مش بعلق بيكون البوست احلى من مجرد تعليق وتحية
انقله وقتي للتويتر
تحياتي

ستيتة يقول...

أه بالنسبة للفلاسفة اللي معلقين ان البنت وضعت نفسها موضع الرجال
1- البوست قال موقفها في الغزوات فبلاش مزايدة
2- لما راحت إمرأة لتتسوق من سوق اليهود وكُشفت عورتها لم يلومها الرسول لذهابها لليهود انما حاربهم وأجلاهم من المدينة
ولم نسمع ما يشين المرأة في أي تاريخ إسلامي إلا عندما بُلينا بشيوخ السلاطين والمتأسلمين الذين لم يتعدى الدين حناجرهم

القصة اتنين منقولة من تويتر ربنا يخلي العقول الواعية الحيادية

تحياتي تاني
عوض علي عوض الصابرين يارب واحسن لي الخواتيم وألحقني بالشهداء

د/دودى يقول...

اللى يضرب متظاهره و يعيرها و يسلحها فى الشارع مش بس ميبقاش راجل يبقى مجرم يستحق العقاب بس مين يلاقى

سواح في ملك اللــــــــــــــــــه- يقول...

دكتورة ستيتة

انا طبعاقرات تعليقك عند شيرين سامي

انا مش فيلسوف يادكتورة

بس الوضع المنطقي

ان اي فوضي بتحصل لو خناقة حتي في

الشارع

بيتحمل تبعاتها الموجود

لاتمييز بين رجال ولا نساء

الفوضي بلا قوانين

وبعدين هي مش بتبات في خيمة برة

زيها زي الرجال

يبقي تتحمل التبعات برضه زيها زي الرجال

بلاش مزايدات علي دم الشهداء والبكاء والنحيب

سواح في ملك اللــــــــــــــــــه- يقول...

اه نسيت اقول وكلامي موجه للدكتورة ستيتة

الشهداء ماتوا عشان البلد دي تعيش

مش عشان تخرب

احنا مشيلناش دكتاتور

عشان نجيب مليون دكتاتور

أمل م.أ يقول...

نعم شيرين
الي بيضرب بنت مايبقاش راجل

انا والدي الله يطول في عمره لم يضربنا يوما
ومع ذلك نظرة واحدة منه كانت كفيلة ان
تشعرني انني سقطت في قاع الارض
والان الحمد لله زوجي لم يمد يده عليي طوال عشرتنا
وبالرغم من ذلك
اكن له كل الحب والاحترام

ما اريد قوله ان الضرب لا يفرض الاحترام
ولا يأتي بثمار طيبه في مجتمع متحضر
انا لست ضد العقاب
وحتى الضرب يمكن احيانا ان يكون حل
في بعض الحالات النادرة
فمثلا في المدارس خصوصا هذه الايام الاستاذ
والتعليم فقد الكثير ونحن ايام المدرسة
كان هنالك ضرب ولم نمت بالعكس
نحن الان اقوياء واقدر على مواجهة الصعاب
لكن الضرب ليس الحل الاول
وقد
اقول وقد
يكون الحل بعد الاخير

كوني بخير دوما

دعاء العطار يقول...

برافو عليكى ياشيرين بجد .. قولتى كلام كتير عايزه اقوله .. الموضوع اللى حصل ده كسر حاجه جوايا مش عارفه خلانى احس باهانه كبيره اوى ... اهانه لمجرد انى بنت

فعلا فعلا

دول لا يمتوا للرجوله بصله نهاااائى

صبح يقول...

كلامك يا شيرين قلناه و بنعيدو بس حاسة انو عبث في اللي وخدين فكرة عكسية و مش حيفهمو و مش حيتجاوبو لان طبعا اللي يرضى الست تتضرب مش حيغير فكرو بين يوم و ليلة ...لازم يرجع يتولد من جديد,,,
الست محترمة بلباسها و عبايتها و اعتقد كانت منقبة ...كانت في مظاهرة رجالة كتييير ايام الثورة و دلوقتي ماطلعوهاش...و قعدو جمب الدفاية يشربو اللبن ...الست طلعت اااه و فيها ايه زي ماقلت هي لما بتطلع تجيب لقمتها و لقمة رججاااالة كتتتير قاعدين في البيت بتبقى جدعه بس لما تتظاهر بتبقى عيب و حرام و مايصحش..سبنا الجاني و مسكنى في المسكينة ...قريت على الفايس كلام يجيب انهيار عصبي و جلطة دموية ,,,اللي يقلك لابسة عباية على اللحم ,,كان مفروض تلبس لبس عساكر بص اصل اللوك مكنش ينفع يوميها فسابت البدلة في البيت ...و اللي يقلك مالقتش راااجل يلمها ,,اهي لقت راجل يضربها ..يعني هي كان مفروض تتضرب يا في البيت يا في الميدان كويس اوي..و اللي يقلك مانعرفهاش ..و ده للاسف داعية كبير و علامة الصلاة محفففرة حفففر في وشو ..يعني لازم نعرفها عشان نقول مسكينة حراام تتضرب مادام مانعرفهاش ...يبقى تتضرب و تغتصب علني كمان دول طيبين انهم ضربوها بس...
بجد انا زهقت من الزبالة اللي احنا عايشين فيها بجد بجد اللي يرضى على ست كده.
اسفة على الفظ بس هو عندو مخ زبااالة ..

زهرة الضحا يقول...

عندك حق يا شرين والله
بجد شئ مؤسف و مقزز
انا من ساعة ما شوفت الفديو و أنا قرفانه من اللي بيحصل
و بجد زهقت من تعليقات نا كتيييييييييييييييييييييييييير ملهاش لازمه و قاعده تلوم علي البنت
اهههههههههههههههه يا بلد
و في تعليق علي الفاس عجبني جدا


راجل شاف ستات بتضرب وتتسحل وتتجرد من ملابسها والمبرر هي نزلت من بيتها ليه دي مش ملتزمة !!! هو استخسر في نفسه اضعف الإيمان و هما بيجيبوا حرية لراجل كل فكرته عن المرأة انها اتخلقت عشان تملي كرشه وتشبع غرايزه وتشاهده وهو في مراحل تطور الحلوف

اللهم أرنا الحق حقا و أرنا الباطل باطلا و ألهمنا الصواب

افكار مبعثرة يقول...

اللي يضرب بنت ما يبقاش راجل و لا انسان اصلا و بعدين حتى لو النت غلطانة هل ده عقابها انا كل ما شاوف الصورة و الاقيهم يتكاتروا عليها افكر هو مفيش واحد بس منهم صعبت عليه او حاول يحوش عنها او حاول يسترها
للدرجة دي هانت عليهم و للدرجة دي مفيش نخوة و للدرجة دي فيهم قسوة
حسبي الله و نعم الوكيل بجد
تحياتي ليكي

Bent Men ElZman Da !! يقول...

مهما كان لبس البنت دى او سبب وجودها فى الميدان
مفيش اى مبرر ابداً انها تضرب
مفيش راجل تنطبق عليه صفه الرجوله
يقبل باللى حصلها

شيرين سامي يقول...

ظلالي البيضاء :
أهلاً بك محمد سعيده و جداً بتعليقك الثري و أشكرك على الأحاديث النبوية الشريفه التي شاركتنا بها..بلفعل تفسيرك و كلامك لا خلاف عليه.

قرأت تدويناتك و كم هي صادقه و معبره أنا أيضاً أحترمك جداً و لوجودك الرائع بين حروفي شرف عظيم

لك مني كل الإحترام و التقدير

شيرين سامي يقول...

FAW:
فعلاً مصطفى شئ مؤسف و يدل على الجُبن و الأكثر إيلاماً هو إهانات البنات و السيدات لها بل و الخوض في شرفها.
لنا الله أنا فعلاً مكتأبه جداً
تحياتي ليك

شيرين سامي يقول...

إبراهيم رزق:
لأ متقولش كفرت بالثوره لأني بجد مخنوقه جداً و نفسي حد يديني أمل..أنا متؤلمه جداً من الناس و ردود أفعالهم أكتر من الفعل نفسه..بنلوم في البنات و في الأطفال اللي كنا سايبينهم لحد ما إستفحلت مشكلتهم و نلوم في الثوار و في أي حد ضد خيالنا و خلاص مع إن الحقائق واضحه مش محتاجه فوتوشوب.

ربنا يستر و بتمنى ننجو من اللي إحنا فيه المظاهره النسائيه و إعتذار لجيش إدوني بادرة أمل صغير.


ربنا يخليلك والدتك و سعيده إن لسه في رجال بيتعاملوا بمنطق بنت الحته.

تحياتي و كل التقدير لك

ظلالي البيضاء يقول...

دكتورة شيرين ..
قرأت ردك على فاو .. وآلمني أن نشعر بالاكتئاب .. وإن كان شعوراً مبرراً ..
لذلك أدعوك لزيارة تدوينات شقاوتي على مدونتي .. فهي متخصصة في زرع البسمة وإزالة كافة أشكال الاكتئاب .. ههه
ألف سلامة لحضرتك .. ومع التحية ..
أرجو أن أراك في قصص الشقاوة لو أتيح لك الوقت لذلك ..

شيرين سامي يقول...

مصطفى سيف الدين:
كلامك رائع بجد لا يخرج إلا من صعيدي دمه حامي :) لكن للأسف مصطفى وجدت الكثير من الرجال يبكون المجمع العلمي و يلعنون النساء الثائرات و كأننا على وشك فقدان شرقيتنا من أجل أن نصدق فقط أن جيشنا فوق الجميع..أنا هنا لا أزعم أن الجيش كله سئ لكن العناصر السيئه يجب أن تحاكم أولاً قبل أي إعتذار.

تحياتي الخالصه لك

شيرين سامي يقول...

haneen nidal:
و الله عند حق يا حنين في حاجات بحس إن حتى اليهود ميعملوهاش فينا و إحنا للأسف أذيناها كتير بكلامنا رغم إنها الضحيه و المفعول بها.
أشكرك حنين على تعليقك و مشاعرك الرقيقه و أتمنى أن تعود الحقوق لأصحابها عن قريب.

أرق تحية لكي

شيرين سامي يقول...

وجع البنفسج:
ربنا يصلح الحال يا إمتياز للأسف الناس إهتموا فعلاً بملابسها أكتر من ضرب الجندي لها في صدرها :(
شئ محزن و مؤسف أن يكون المجتمع بهذا الظلم.

سعيده بمشاركتك و ربنا ينصرنا جميعاً
تحياتي الخالصه لكي

شيرين سامي يقول...

هبة فاروق:
ماتخليش بنتك تشوف المناظر دي يا هبه عشان متتعقدش و تكون فكرة سيئه عن الجيش ربما يعود يوماً كما عهدناه.

شكراً حبيبتي على مشاركتك و هما فعلاً الإنسانيه بريئه منهم.

أرق تحية لكي

شيرين سامي يقول...

zizi:
أنا مش سعيده أبداً إن للأسف ناس من الجيش شوهه صورته بالشكل ده و مكنتش أتمنى غير أن الجنود يحافظوا عليها بدافع إنهم حماة الوطن أو حتى بدافع الرجوله و النخوه لكن للأسف أحبطت جداً من تصرفاتهم..شئ مخزي.
و زي ما حضرتك وضحتي مهما كانت هذه الفتاه حرام ننهشها بألسناتنا و نتخذ العذر للمعتدي عليها لمجرد أننا في مجتمع ذكوري.

أسعدتيني بوجودك كالعاده
تحياتي و كل الود لكي

شيرين سامي يقول...

ستيته:
وجود حضرتك بتحية أو حتى كلمه بيسعدني جداً و وضعك للبوست في تويتر شرف كبير أويييييي ليه خصوصاً إني فاشله في التويتر :)

نورتيني و أشكرك جداً

أرق تحية لكي

شيرين سامي يقول...

د/دودى:
فعلاً يا دودي لكن تقولي لمين أنا كل يوم في صدام مع ناس بسبب الموضوع ده مع إنه مش محتاج دفاع.

نورتيني

شيرين سامي يقول...

أمل م.أ :
أمل الغاليه حفظ الله لك أباكي أنا أيضاً أبي لم يمد يده علي عمري و لم أعرف ثقافة الضرب إلا عندما بدأت عيناي تتفتح على المجتمع...للأسف الرجل الذي يفعل هذا بداعي أنه يقوّم أو يُربّي أو (يكسر للفتاة ضلع) حتى تضرخ له لا يعرف أنه يزرع بذور الكره له في قلبها و لا يعرف أنها أبداً لن تسامحه مهما مر الزمان.

أما عن الأولاد فأنا ضد الضرب تماماً و أفضل أن يكون الطفل صديق و يسمع الكلام حباً ليس خوفاً أما عن العقاب فناك الكثير من الطرق دوناً عن الضرب.

سعيده جداً بتعليقك
تحياتي الخالصه لكي

شيرين سامي يقول...

دعاء العطار :
شكراً يا دودو أنا كمان ده كان و لازال إحساسي لكن بقول يا رب اللي جاي يكون أفضل.
نورتيني يا جميل

شيرين سامي يقول...

صبح:
متأسفيش على اللفظ لأن اللي بيعمل كده يستاهلو بجد...كلامك فعلاً أثر فيه لأن دي نفس مأساتي معظم الناس اللي حواليه ضد البنت بطريقه غير منطقيه و بشكل غير قابل للتغيير عشان زي ماقلتي محدش بيتغير إلا إذا إتولد من جديد.
عموماً إن غداً لناظره قريب

أشكرك على تعليقك الرائع وسعيده جداً بزيارتك

تحياتي و كل الود لكي

شيرين سامي يقول...

زهرة الضحا:
مش عارفه أقول إيه بعد كلامك هو شئ مقزز فعلاً و أنا حسيت بالقهر من كلامك ده إنطباعنا كلنا.
آمين يا رب
ربنا يظهر الحق و يجازي الظالم

تحياتي و تقديري لكي

شيرين سامي يقول...

افكار مبعثرة :
هو الحقيقه في واحد غطاها في الآخر بس مش عارفه عنده نواة نخوة و لا خاف من الناس ولا يمكن خاف من ربنا.
نورتيني و سعيده بتعليقك

تحياتي الخالصه لكي

شيرين سامي يقول...

Bent Men ElZman Da !!:
الغريب إن في ناس قبلت و نهشت في عرضها كمان :(
نورتيني يا جميل

شيرين سامي يقول...

ظلالي بيضاء :
:)
أشكرك على مبادرتك الحلوه لزرع الإبتسامه على وجوهنا و إن شاء الله لي زياره لل(شقاوه) في مدونتك الرائعه :)

تحياتي الخالصه لك