الاثنين، 11 فبراير 2013

أُقر أنا المسئول أعلاه


محمد منير..لا أذكر متى بدأت أسمعه أو كأني كبرت و أنا أسمعه فأصبح مرتبط بجزء من اللاوعي عندي, لا أنكر أني من الشخصيات التي تحمل دائماً أغنية داخلها, كل يوم أغنية تسيطر علّي و أحياناً أكثر, لا أخلو أبداً من أغنيّه, أُدندن في الصباح و أُغني بصوت عالي و أنا أقود سيارتي, أُغني في أشّد لحظات سعادتي و حُزني, أُغني لنفسي عادة لا حُباً في الطرب أو رغبة في أن يسمع أحدهم صوتي, إكتشفت مؤخراً أن معظم كتاباتي يتخللها أغنيات, حتى الكتاب "بنكهة مصر" ضبط فيه أكتر من أغنية تسربوا من حيث لا أدري و كانوا معبّرين تماماً عما بداخلي, أُغنية (تَملي فقلبي يا حبيبي) للرائع محمد فوزي, أُغنية (خليك فاكرني) لعمرو دياب, أغنية (زوروني كل سنة مره) لسيد درويش, وأُغنية (هُنا القاهرة) للرائع علي الحجار.

و إكتشفت أيضاً أن الكثير من تدويناتي تحمل مُنير بين طياتها, فعندما كتبت أول مرّه عن نشر كتابي كانت "ربّك لما يريد" و عندما كتبت بسعاده عن تسلّمي للكتاب كانت "قبل ما تحلم",و كتبت "من أول لمسة" و "أحمر شفايف" و الرااائعه "لمّا النسيم" و غيرهم, حياتي أيضاً تأثرت بأغاني مُنير, "المهنة بناضل بتعلم" التي كانت تشاركني طريقي إلى الكُلّية, صوتك, عنيك حلوين, المريلة الكُحلي, نانا, بتبعديني, أمر الهوى, من غير كسوف, بالحظ و بالصدف,عشق البنات, إزّاي, والعديد من أغاني مُنير, أهمهم بالطبع "حدوتة مصرية" :) و الأغنية التي تداعب إحساسي بشكل كبير و تُثير دموعي بمنتهى اليُسر "خــايف"
و أخاف لو قُلتي بردانه..أغطيكي بإحساسي..متدفّيش !


الألبوم الأخير لمحمد مُنير كان أجمل ما سمعت العام الماضي و قد كتبت تدوينة سابقة عن الأغنية الرائعه التي تخاطبني بشكل مباشر و دون مواربة "قلبي ميشبهنيش" و مازلت أرفع الصوت على 30 كلما سمعتها و أعيدها 3 مرات متتاليات على الأقل :)

و الأغنية التي تمّس القلوب المهمومه"أهل العرب و الطرب" و حكاية جدع بلا جاه مرسى الهموم قلبه, حيث عبّر مُنير عن مبدأ من المبادئ التي أتمنى إعتناقها عندما قال:
اللي يعاديك تعاديه و تفرجه فنونك...و اللي يراضيك تراضيه و تشيله فـ عيونك..

و أغاني الحمام التي تأسرني ربما لعشقي للحمام 
عيبِ إن أجول على نفسي إحترت أو أجول وليف روحي هجرني
من بين عيون الناس إخترت جوز العيون اللي جتلني..
و أنا يا حمام زيّك نايح..و الحُزن ده له لون و روايح
و يا حمام بتنّوح ليه..فكّرت عليه الحابايب..يا حمام ضاع منك إيه..
دوبتني كده فوج ما أنا دايب
ده العمر و أحلى ما فيه كان حلم و طار من يدّي

و الأغنية التي تحدثت عن هذا الصنف اللطيف من الرجال..
حارة السقّاين
ياما لك في الحُب ضحايا يحكوا عنك حكايات
بيقولو إنك بتألف في الليلة سبع غنوات
و الغنوه الواحده فليلة..تلحّنها سبع مرات
و تروح تاني يوم و تقولها
بحنين
و دموع
و آهات!

و أُغنية "الحُب نار" عندما غنّى مُنير
إنتي مش زي الجميع بسمتك لون الربيع..ضحكتك تجري فدمي تبعدي أنا مش هبيع..
ما إن سمعتها قبل نزول الألبوم و سمعت كلمة (حبيبتي) بطريقة مُنير حتى أعلنت لأصدقائي أنها أُغنيتي أنا :) فسمعوها جميعاً و قالوا (مُنير بتاع كل واحد لوحده)  :(

والأغنية التي خطفتني لعالمي البعيد.. "في عنيكي غُربة و غرابة"
أحلم على شالك و أنام كأني فرد من الحمام
برموش عنيكي تغطيني رمشك شطوط طب رسيني
انتي أنا... وبُكره ليّا وليكي..ليّا و ليكي..فـ عنيكي..

أكثر ما يميز أغاني مُنير هو الإختلاف و أكثر ما يجذبني فيها الكلمات المفعمه بالإحساس..يعرف كيف يختار الكلمات و ينسجها مع الألحان, مُنير بإختصار أكثر المُطربين تعبيراً عن كل حالاتي..التحدي في عيناه, عشق مصر, و صوته المحايد الدافئ المميز يُداعب أوتار قلبي..و أغانية تتوغل في إحساسي.
سأختم بمقطع من أجمل أغانية "يا رُمّان"
عشقت من غير سبب..عرفتني منفعه
علّمت قلبي الأدب..سنتين تلاته أربعه
عــدّى الزمــان و خــلاص أهــو بــان..مــين حــبّ ميــن إدعــى..

حقاً يكشف الزمان عن القليل من الحُبّ الصادق و الكثير من الإدعاء!

****************
على الهامش:
أُقرّ أنا المسئول أعلاه إنّي هحاول الإشتراك في حملة التدوين اليومي لشهر فبراير بالكتابة عن و حول الأغاني
و 
عودة للتدوين :)

هناك 17 تعليقًا:

Ramy يقول...

(:


ابتسامة علشان عودتك للتدويين

(:

و ابتسامة علشان منير

(:

و أبتسامة ليا انا(اشمعنى انتم) علشان محاولتى للرجوع للمدونات ((:

Unknown يقول...

رامي:
:))))
و دول شوية إبتسامات عشان رجوعك
و متغيبش تاني
:)

الازهرى يقول...

كالعادة رامى سبقنى
أنا كنت موجود هنا من شوية بأشوف اتفتحت ولا لأ

رحت كتبت فى ذكريات ورجعت لقيته علق
ينفع كده ؟؟؟؟


إزاى
بيوت السويس

أحلى أغنيتين فى رأيي
بعدهم
حدوتة مصرية
ولو بطلنا نحلم

أنا من المقرين بعودتى للتدوين
لإنى خلصت م الفيس والحمد لله

أسماء فتحي يقول...

جميلة اختياراتك ياشرين

وبراااافو عليكي مين ميحبش الكينج منير

انا كمان بعشق اغانية واحساسه بيها

فعلا اي حد يسمع منير هيتخيل انه بيغنيله هو وبس وانه عامل اغانية علشانه

تحياتي لكِ ولذوووووووووقك العالي

ASMAA FATHY

Unknown يقول...

أزهري:

:)
لو بطلنا نحلم طبعاااا
كنت سيباها هي و أنا بعشق البحر لتدوينات لوحدهم..عارفه إن أنا بعشق البحر أغنية نجاة..لكن بصوت منير بقت حاجه تانيه زي الدنيا ريشه فهوى.

بيوت السويس معرفتهاش غير قريب بس جميله طبعاً :)

و الله ساعات بحس الفيس بوك لعته
بس ساعات بيكون مهم و منجز

نورتني يا اسامه :)

Unknown يقول...

أسماء فتحي:

الكينج طبعاً :)
شكراً يا أسماء إنتي اللي كلك ذوق
نورتيني يا جميل

شمس النهار يقول...

الطرب والغناء والكتابة اخوات ياشيرين :)

انا بحب ج
ا اغنية لما النسيم بيعدي بموووت فيها
واغنية خارة السقاين دي اصلا اغنية شريفه فاضل
:)

اول مره اسمع عن حملة التدوين اليومي في فبراير :)
بس المهم ترجعوا كلكم تاني
:)

ابراهيم رزق يقول...

وسط الدايرة يا اجمل نايرة خلى قلوبنا تطير
وارحلى بينا فراشة حنينة بين زينات وعبير
لما الخصلة تدور طربانا نبقى حرير فى حرير

فرحى خلق اللة واتنى ياشبه القمرا
وارقصى رشى عبيرك فينا وفتحى يا زهرة
عمرك كلة فرح يازينة شيلى من الافراح وادينا
هترتاحى وتريحينا لسة الوقت طويل
دى اول اغنيه سمعتها من منير فى حياتى

منير ده ممكن تعتبريه مطرب الجيل بتاعنا
يكفى ان اغنية حدوتة مصريه دى نبراسى فى الدنيا
يهمنى الانسان ولو مالوش عنوان
منير ده تربية صلاح جاهين بدايته مع جاهين وشوفى تواضع و قمة جاهين كان بيختار اغانيه و هو اللى اختارله اغانى فواد حداد زى الجيرة و العشرة
و بموت جاهين بدات مرحلة عبد الرحيم منصور و الحان احمد منيب و بموتهم بدات مرحلة الراحل مجدى نجيب مع هانى شنودة ثم مرحلة كوثر مصطفى ونهايه بنور عبدالله

من عبقرية منير انه غنى اغانى لمطربين اخرين لكنه طبعها باسلوبه زى اغانى شادية و نجاة و سبقتنى شمس الشموس فى اغنية حارة الساقيين لشريفة فاضل و لو سمعتيها من شريفة هتسمعى حاجه مختلفه خالص
هتضحكى عليا لو قلتلك انا دخلت مسرحية الملك هو الملك 25مرة عشان اسمع اغانى منير لاحمد فؤاد نجم زى على عليوة و و الله يا دايم و تيك تيك و حلاقتك و شرم برم و طفى النور يا بهيه و شرم برم

ايه ده يا شرين ده انا كده كتبت بوست مش تعليق

سلام بقى لحسن لو فتحت على منير مش هقف

ليلى الصباحى.. lolocat يقول...

منير فنان شامل ودايما الفنان الشامل بيكون (معجون ) بالاحساس

خريج فنون تطبيقية ...ممثل ...مغنى يعنى كل حاجة تخص الفن :)

يمكن فيه ناس تدعى ان صوته كمغنى غير كامل زى حلمى بكر مابيقول عنه ان منير فنان ذكى بيقدر يركب صوته على احساسه رغم عدم اتقانه لجماليات الصوت لكن ان شايفة ان صوته فررررريد جدا اوى خالص :)

و عبقريته فى الاحساس الصادق دائما

الاغانى اللى اخترتيها تدل على رقى ذوق وحب للكلمة ومعناها بصراحة فيه اغانى كتير الايام دى تخلى الواحد ينجن ويصاب بال (( الغباء ) هههه

موضوع الاغانى والكلمة والاحساس موضوع فعلا خطير وله ابعاد كبيرة فى تشكيل المجتمع لايتسع طبعا التعليق لعرضها لكن حبيت احييك على اختيارك اللى دايما بيعجبنى

احسنت اختى الحبيبة
تحياتى بحجم السماء

Bent Men ElZman Da !! يقول...

اهو انا نفس الحالة دى كنت بعيشها مع فضل شاكر
حالياً مش لاقية حد يعبر عنى بعد ما أعتزل :D

Mohamed Koraaa يقول...

طب دلوقتي اللي عايز يكتب عن منير تاني يعمل ايه .. خلصتي كل الكلام . وقلتي أحلى اللي غناه . تحية ليكي عشان منير وتحية تانية عشان الكلام الحلو ..

Unknown يقول...

شمس النهار:

أنا كمان بحب الأغنية دي جداً :)
و أول مره أعرف إن حارة السقاين بتاعة شريفه فاضل.
حملة التدوين اليومي لشهر فبراير ده اللينك بتاعها
http://www.facebook.com/events/319318518184686/

نورتيني يا شموسه
و يا رب نقدر نستمر..

Unknown يقول...

إبراهيم رزق:

:)
أنا كمان و أنا بكتب البوست كان هاين عليا أكتب أغانيه كلها :)
طول يا فاندم و إكتب بوست و نص كمان المدونه مدونتك :)
للأسف فاتتني المسرحية زي ما فاتني حاجات كتير..

تحياتي الدائمه لك

Unknown يقول...

لولو كات:

مبسوطه إن التدوينه عجبتك :)
لا حلمي بكر ده أساسا آخر واحد أسمع لرأيه..
موافقه على كل كلامك و بشكرك كتير يا حبيبتي على ذوقك و وجودك اللي دايماً بيسعدني و يضيف لكلماتي :)

نورتيني

Unknown يقول...

بنت من الزمن ده:

آآآآه أنا كده فهمت ليه الـ url بتاع مدونتك مجنونة فضل..بس أنصحك تغيريه لإسم المدونه أو إسمك عشان لو حد بيدوّر على الإنترنت يقدر يلاقي مدونتك بشكل أسهل.
نورتيني يا دندونه

Unknown يقول...

Mohamed Koraaa:

أشكرك و سعيده إن التدوينه عجبتك :)
نورتني كتير

افكار مبعثرة يقول...

بجد بجد بجد حبيت التدوينة اوي و حبيت حكيك مع الاغاني جدا
انا من عشاق منير و اغانيه كده تحسي ليها مذاق خاص تدخل جواك و تبقى جزء منك حاجة كده بديهية مش مترتبة خالص
هشغل منير دلوقتي :)
تسلم ايديكي:)