الاثنين، 12 أغسطس 2013

ثلاثة أعوام و أنا أُدوّن


أول نشر لي في المدونه كان في يوليو 2010 و ده يعتبر أهم تاريخ عندي, أهم من نشر كتابي و أهم من أي نجاح حققته أو لسه هحققه, في 3 سنين كتبت أكتر من 325 تدوينة, منهم 55 مسودّه, و تابعني 260 مُشترك ده غير المتابعين بدون إشتراك, نشرت كتاب (بنكهة مصر) مجموعة قصصية و أكتر من قصة في كُتُب جماعية, و عملت 4 حفلات توقيع و ندوتين و 3 لقاءات تليفزيونيه, في 3 سنين تدوين مدونتي وصلت لـ 130 ألف مشاهدة و معظم تدويناتي الحمد لله محققين ما بين 200 لـ  300 مشاهدة, و الأكثر مشاهدة اللي على الـ side bar تعدّوا الـ 1000 مشاهدة, أنا عارفه إن كل ده مش مقاييس للنجاح, لكن ساعات بتحتاج تفكّر نفسك باللي وصلتله عشان متضعفش و تتراجع.

لكن النجاح اللي كنت بحسه و بحبه كان بيجيني من ناس معرفهمش, لما صاحبتي تقولي إن بابها قرى كتابي و بيقولي إنه من أجمل ما قرأ, لما جارة صديقة لي تقرى الكتاب و تصمم تكلمني عشان تقولي إنها كانت في الكتاب, لما ألاقي واحده معرفهاش سيبالي في إدارة النادي جواب بخط إيدها سعاده و إعجاب بالكتاب, لمّا ناس في الشغل معرفهمش ألاقيهم متابعين مدونتي و بيعلّقوا شفاهياً بكل حب و ود على كتاباتي, لمّا بتجيلي إيميلات و رسايل فيسبوكويه من ناس و بعضهم مدونين يقولولي إنهم بالفعل تأثروّا بي و بكتاباتي, بجد بحس إن ده هو نجاحي, أنا مش عايزة أكون أحسن حد بيكتب, لأني أكيد أقل من غيري كتير ده كفاية أخطائي النحوية :), و لا عايزه أكون حد معروف أو محبوب لأن محاولة إرضاء الجميع هي الفشل, أنا مش عايزه غير إني أترك أثر.

الموضوع في التدوين بدأ هادي لكن بسرعه لقيت التعليقات و المتابعين زادوا لدرجة ماكنتش متوقعاها, مع إني مش من الناس اللي عندهم مبدأ (علقلي و أعلقلك), بتكسف أوي لما أعلق عند حد و ألاقيه علق عندي بعدها على طول, و لا أنا من الناس اللي بتققمص لو أصدقاءهم معلقوش عندهم, على فكرة أنا عمري ما عملت تاج لحد أو علقت عند حد مجامله أو عشان يعلق عندي عمري ما علقت عند حد إلا إذا كنت قريت اللي كتبه بجد و عندي حاجه أقولها, في ناس كنت بعلق عندهم و أنا بِنُص إقتناع عشان بحس إنهم مجتهدين و يستحقوا التشجيع, لكن النجاح عمره ما كان بالتعليقات, و لو إنها كتير كانت بتسعدني و تشجعني و بتفرق معايا, لكن في مدونين أكثر إبداعاً في رأيي من الكتاب الكبار و مع ذلك تدويناتهم من غير تعليقات و مدوناتهم من غير متابعين, هو في إتجاه جديد لعدم التعليق و التواصل زي زمان, جايز لضيق الوقت, أو لأننا إكتشفنا إن معظم التعليقات بتاعة (حلو/جميل) بقت بتتشاف إنها مجامله, أو بسبب المزاج العام عموماً..

المدوّنه عبّرت كتير عن شخصيتي و روحي, كتبت قصص قصيرة و خواطر و تدوينات عنّي و عن قناعاتي و عن وطني و المجتمع, كتبت أكتر من سلسلة زي قصاقيص من حياتنا اللي نقلت فيها بعض من واقعي, و تدوينات الأغاني (لسه هعملها تصنيف), بحب في مدونتي إن مالهاش لون مُعيّن و لا بتثبت على شكل معين من الكتابه, هنا الفرح و الحُزن و الأمل و اليأس, و الخيال و الواقع, عشان كده أنا هنا, مش عارفه إيه ممكن يكون بيميز كتاباتي, لكن أكتر تعليق بسمعه و بقراه و بيسعدني إني بلمس مشاعر الناس, يمكن لأن كتاباتي سهله و أفكاري واضحة و يمكن لأني بتحرى الصدق و التلقائيه في مشاعري, و أكره الإدعاء.

بحب مدونتي لأنها تحملتني بضعفي و خيبتي و سعادتي و هذياني, و أعترف إن كان لها أكبر تأثير عليّه و غيّرت من حياتي..صحيح مش للأفضل دايماً, لكن يكفي إني حققت من خلالها أجمل شئ في الوجود..الكتابة من أجل الكتابة و بدون قيود (قدر المستطاع :)), و حررت أفكاري و أحلامي و مشاعري هنا...رقصت الباليه في المعبد المهجور و أنا بكتب هنا, و إرتكبت إثمي العظيم هنا :)

هنــا تدوينة السنة اللي فاتت
و هنــــــــــــا تدوينة أول سنة (تعليقاتها أجمل منها :))
كُنت عايزة أنزّل كتابي PDF عشان أصدقائي اللي مش لاقين الكتاب أو المسافرين أو إخوتي العرب لكن معرفتش..ممكن أرسله بالـ e-mail

و هنــــا صفحة الكتاب على الـ goodreds عشان رأيكم يهمّني(اللي عملتهالي دينا ممدوح صديقتي الجميلة بنت من الزمن ده) 

و كل الريفيوهات اللي إتعملت للكتاب هنشرها على مدونتي تباعاً بإذن الله

شكراً لكل من علّق في مدونتي أو قرى و معلقش و شكراً لكل اللي شجعني و لو بكلمه و شكراً لكل أصدقائي و صديقاتي المدونين بجد أنا فخورة بصداقتكم و بمدونتي و بتكلم عنها في أي مكان أكتر ما بتكلم عن كتابي..لأن النجاح المرتبط بالعلاقات الإنسانية مذاقه أجمل :)

و إلى المزيد من تحقيق الأحلام..

هامش: نصحتني صديقة بتغيير صفحة التعريف بي على المدونة عشان تسهل متابعتي عن طريق Google Plus..صحيح مش فاهمه بس هجرب :)

هناك 26 تعليقًا:

ابراهيم رزق يقول...

أنا اللي بالأمر المحال اغتوى

شفت القمر نطيت لفوق في الهوا

طلته ما طلتوش إيه انا يهمنى

و ليه .. ما دام بالنشوة قلبي ارتوى
عجبى ؟؟

كل سنة ومدونتك طيبة
انا كلامى و شهادتى هتبقى مجروحة
لكن
اسمعى
http://youtu.be/yBfNGX-HXxw
واتفضلى
https://encrypted-tbn0.gstatic.com/images?q=tbn:ANd9GcS3MPS2Se9GXDnF1dUUfNePHmFAe-iNaAFuS1gRPgjXqVtP8uvk
ايه ده وقت افطار
https://encrypted-tbn0.gstatic.com/images?q=tbn:ANd9GcShiz7MIZfC2cA2yd4rqgebYmVl3t4d8uHAUhhqsWTwKDKcepb1
ايه ده اللى انا قدمته انتى صحيح من الدقى مش هينفع معاكى اتفضلى
https://encrypted-tbn1.gstatic.com/images?q=tbn:ANd9GcQ8IcLUILVZNWeAdqXI1tCQBIaZV8yq2J_dlDJhzfQkji85PQSj
كل سنة و مدونتك و انتى طيبين
تحياتى

momken يقول...

.....

كل سنه وحضرتك فى منتهى الابداع يادكتور
وقبال ميه سنه ابداع
عجبنى فى البوست بتاعك جكمله
( على فكرة أنا عمري ما عملت تاج لحد أو علقت عند حد مجامله أو عشان يعلق
عندي )

اصل اعرف ناس بالعكس
يعنى يحجموا عن التعليق عند شخص لمجرد انه علق عندهم او انه قال رأيه بصراحه...او انهم تحت ضغط من اى نوع الله اعلم بعباده...ويهدى الجميع

كل عام وحضرتك بخير

تحياتى

Mostafa gazar يقول...

أنا مش عايزه غير إني أترك أثر.
.....
إني بلمس مشاعر الناس, يمكن لأن كتاباتي سهله و أفكاري واضحة و يمكن لأني بتحرى الصدق و التلقائيه في مشاعري, و أكره الإدعاء.
.......
النجاح المرتبط بالعلاقات الإنسانية مذاقه أجمل :)

.....
كل عام وأنتى بخير وصحه وسعاده وراحة بال ....أطيب أمنياتى بدوام التألق والابداع

موناليزا يقول...

مش عارفة إذا كنت قلتلك ده قبل كده ولا لأ
بس أنا بحب كتاباتك :)

كل عام وانتي ومدونتك في نجاح وتقدم دائم :)

الازهرى يقول...

أعتقد إن أكبر إنجاز
فى خلال السنين دى
وإنتى أغفلتيه

هو تعرفيفك لنا بالمدونة الرائعة دى
والكتابات اللى مستحيل أقدر أوصف روعتها بكلام

لإن من الصعب ترجمة الإحساس عندى لكلام

وعقبال 30 نة من الإبداع
وبعدهم بقى نبقى نتفاهم
هنكمل ولا إيه
يدينا ويديكى طولة العمر :)

KhaOula Kasmi يقول...

ان شاء الله من حسن الى احسن
ومن نجاح الى نجاح وكل سنة وانت رائدة الابداع
دمت بود :)

ستيتة يقول...

كل عام وانتي منورة المدونات يا شيرين
انتي من ألطف الكائنات اللي عرفتها على كوكب بلوج سبوت :) ودايما بدخل عندك بس علشان الصراحة..مصر "صدت" نفسي عن التدوين والتعليق..فيارب متكونيش زعلانة
وبكرة ان شاء الله تخلص المعمعة وربنا ينجي مصر ببركة اسمه اللطيف الهادي
ونرجع نهزر ونعلق وايامنا تبق حلوة تاني

كل سنة وانتي واسرتك الكريمة بكل خير

ياسمين خليفة يقول...

انا اول مرة أدخل مدونتك وانا بقالي اكتر من سنتين بدون ومفيش رد فعل كبير على اللي انا بكتبه بس نجاحك ده بيشجعني اني استمر في التدوين

شمس النهار يقول...

كل سنة وانتي طيبة ومدونتك مشعة نور منور بلوجر
وانت من الطف الناس اللي انا اتعرفت عليهم
ربنا يكرمك ويبارك فيكي وفي اسرتك

Unknown يقول...

إبراهيم رزق:

:)
بحب الرباعية دي جدااااا
الأغنية أول مره أسمعها بس جميله بجد :)
(يا مين يصحي لي العصفور...)
الفطار الأولاني أحلى على فكرة :)

شكراً يا أستاذ إبراهيم بجد
أسعدتني
و نورتني جداً

Unknown يقول...

momken:

أشكرك بجد على تهنئتك الرقيقه و كلامك :)
مفهمتش النص التاني من التعليق أوي..
بس معتقدش إن حد ممكن ميعلقش عند حد تحت ضغط أو لأنه قال رأيه بصراحة..الموضوع أبسط من كده.

كل سنة و إنت بألف خير
تحياتي لك

Unknown يقول...

مصطفى جزر:

متابعي العزيز :)
نورت بعد غياب
اشكرك و كل سنة و إنت بألف خير

Unknown يقول...

موناليزا:

شكراً يا منى بجد
إنتي قلتيلي الكلام ده كتير على فكره ;)
و رأيك أكيد بيسعدني
كل سنة و إنت بألف خير

تحياتي لكِ

Unknown يقول...

الأزهري:

:)
أسامه إيه الكلام الحلو ده
شكراً بجد و يا ريت أفضل دايماً عند حسن ظنك بما أكتب

مكملين طبعاً :)
بإذن الله

نورتني كتير

Unknown يقول...

khaOula GueSmi:

ربنا يخليك رائدة الإبداع مرّه واحده :)
كل سنة و إنتِ بألف خير

نورتيني و أسعدتيني بزيارتك

Unknown يقول...

ستيتة:

مش عارفه هتصدقيني لو قُلتلك you made my day زي ما بيقولوا :)
لما شوفت التعليق الصبح فرحت أوي بجد
مجرد إسم حضرتك في مدونتي بيسعدني و يشرفني جداااا :)
ما بالك بقى الكلام الجميل ده
لاطالما كنتي مشجعتي يا دكتورة و من أول يوم تدوين..أكيد عمري ما هزعل منك..و التعليقات كمان شئ ميستاهلش إن حد يزعل عشانه..المهم اللي في القلب :)
ربنا يصلح الأحوال
كل سنة و حضرتك طيبة و سعيدة و بألف خير
نورتيني جداً

Unknown يقول...

ياسمين خليفة:

للأسف الفترة دي أهدى فترة لبلوجر و التدوين..لكن خليكي مثابرة و إكتبي طالما عند فكرة و حكاية و رأي..حتى لو التفاعل مش كتير المهم إنك تستمري.
و ربنا يكرمك و توصلي للي بتتمنيه

نورتيني في أول زيارة :)

Unknown يقول...

شمس النهار:

شموسه البوست ده من غير تعليقك ماكنش هيبقى له طعم :)
ربنا يخليكي بجد
كل سنة و حضرتك طيبة و بألف خير و كل اسرتك الجميلة و الأحفاد الحلوين

رحاب صالح يقول...

والله يا شيري اجمل حاجة ف المدونة انها عرفتنا بيكي
لانك بجد انساسنة تستحق الحب
نعرفش اقول اية عنك بجد
يكفي اني لما بشوفك بحس بالتفاؤل
انت من الناس الي دايما اقرا لهم احس اووي ومعرفش اقول او اكتب تعليق يوصف الاحساس ده عشان كدة دايما مش بعرف اعلق
انا مبسوطة اني عرفتك ومبسوطة اني عرفتك علي احمد اخويا الي دايما بيفتكرك بالخير لانك تستحقي الخير :* بوسات وحضونات ااااااااد كدهون

Lobna Ahmed Nour يقول...

كل سنة وانتي طيبة وبتدوني يا شيرين :)

Huda Mahmoud يقول...

مش عايزه غير إني أترك أثر..
عجبتني اوي لانها نفس فكرتي ,حينما قررت اني اشارك في الحوليات ..

نيللي علي يقول...

أنا بحب كتاباتك لإنها شفافة بمعني إن بشوف من خلالها الواقع!!

بحب كتاباتك لإنها بتعيشني حالة!!

وصادقة ومش مدعية!!

جميل شيرين:)

Unknown يقول...

رحاب صالح:

إيه الكلام الحلو ده :)
أنا كمان مبسوطه بمعرفتك و بمعرفة أخوكي المحترم جداً أحمد
بجد تعليقك أكتر حاجه أسعدتني في اليومين الغم دول

كُل الود لكِ :)

Unknown يقول...

لبنى أحمد:

:*
:)

Unknown يقول...

هدى محمد:

:)
أعتقد ده أجمل من أي نجاح
نورتيني

Unknown يقول...

نيللي علي:

:)
و أنا بحب زيارتك و تعليقك يا نيللي
:*