الاثنين، 28 نوفمبر 2011

فــ كل شارع فــ بلادي...صوت الحرية بينادي


صحيح إني مش راضيه تماماً عن الإنتخابات و مفيش و لا حزب قرأت له برنامج إنتخابي أو حتى قدرت أعرف أو أفهم رؤيته, مع إني كنت ببحث و بسمع و بسأل...لكن في النهاية أنا سعيده جداً إن أخيراً في خطوة تمت ولو كان مفيش إختيارات واضحه و مفيش حد من الأحزاب حرك ساكن في أحداث التحرير الأخيره...و أنا ضدهم كلهم...لكن..

صممت إني أحتفط بحقي و أنتخب...مش هقول إنتخبت مين لكن هقول إني حاسه إن صوتي هيفرق و حريتي في إختياري مش في النتيجه النهائيه...لذلك أنا راضيه بأي نتيجه مع العلم بأن أي مرشح مش هيقوم بواجبه هنحذفه من الحياه السياسيه نهائي...صحيح في فلول كتير...و مرشحين بتوع مصلحتهم..و ناس مش مفهومين...الطوابير طويله و الناس بترغي بترغي و عاملين إزعاج رهيب...غير إن في منهم بيملي أراءه على الناس و بيثير بلبله... بس أنا سكتهم و قلتلهم إن اللي ذاكر ذاكر خلاص...لكن...
إحساس رائع إنك أدليت بصوتك و قمت بواجبك..دي مش أول مره بالنسة لي..إنتخبت في دورة قبل كده إخوان مع إني مش إخوانجيه...لكن كنت عايزه أي حد إلا الوطني اللي لا يمت للوطنية بصله...و كانت الإنتخابات قبل كده فاضيه عشان بالبطاقة الإنتخابيه و عشان كلنا عارفين مين اللي هيكسب...لكن من يضحك أخيراً يضحك كثيراً.

دلوقتي مصر كلها في الشارع...

في هذا اليوم العظيم لا يسعني إلا أن أشكر كل من ضحى بحياته و كل من سالت دماءة و كل من ذهب إلى ميدان التحرير و حمل روحه على كفه...من أجل هذه اللحظه التاريخيه...و أنت يا من كنت ضد التحرير لا تنسى أن تقرأ الفاتحه على أرواح الشهداء قبل أن تدلي بصوتك.

هناك 34 تعليقًا:

Unknown يقول...

بعتذر عن عدم ردي على تعليقات البوستين الماضيين.
و بشكر كل من عزاني في وفاة خالتي الغالية لا أراكم الله مكروه في عزيز.

تحياتي و كل الود لكم

ابراهيم رزق يقول...

اختى العزيزة
شرين

البقاء لله انا لله و انا اليه راجعون
انا لم اعرف الا الان
اسكن الله الفقيدة فسيح جناته

تعرفى ان بوستك ده جاء فى وقته تماما
انا كنت محتار و لم احدد موقفى لانى اعتقد ان الاختيار بين السىء و الاسوء لا يفرز الا السىء كما ان اللجنة الانتخابية بعيدة و اريد ان اذهب الى التحرير و ساليناز بتزن عشان اذهب انتخب
اعتقد انى قد حددت موقفى تحياتى
و البقاء لله مرة اخرى

تَرَآَنِيْل ♥ ~ يقول...

مسآء الحريه الحقيقه
مسء الخطوآت الأولى للصعود

لآ أحد سيكون رآضى كُل الرضآ عن الإنتخآبآت
ولكن أن تقوم بدورك دون تشويه ولآ مؤآمرآت
ولآ نيآت مشوهه

يآ ربى اليوم الأول للإنتخآبآت تسير على مآ يرآم
حتى يحزن الدسآئس بيننآ
وتخرب مُخططآت الأغبيآء فينآ

آآآآمين آآآمين

فمن لآ يرغب بإستقرآر الأمور بمِصرُ
هو الخآئن وليس نحن

عمرو فكرى يقول...

تحذفى مين م الحياة السياسية تماما؟ :)

اذا كان فى فلول وطنى مترشحين دلوقتى عادى ومتوقع انهم يكسبوا؟

عمرو فكرى يقول...

البقاء لله
انا لله وانا اليه راجعون

ENG./ELSAYED,PMP يقول...

ازيك يا دكتورة ... اخبارك ايه ... البقاء لله ... انا لله وانا اليه راجعون

يعنى

كويس ... ان شاء الله اللى جاى احلى ... مفيش حاجة بتتعمل ف يوم وليلة ... النهاردة وصلنا للانتخاب ببطاقة الرقم القومى ... والشعب بقى بيقول ... اخوان ... واشتراكيين... وليبراليين ...الخ


كام سنه ... والناس تفهم يعنى ايه برنامج ... وخطه وموازنة وميزانية ... احنا كنا فين وبقينا فين ...!


تحياتى لشخصكم الكريم

وكل عام وانتم بخير

سواح في ملك اللــــــــــــــــــه- يقول...

دكتورة شيرين

البقاء لله

مكنتش اعرف موضوع خالة حصرتك

اسف علي التاخير

وصف الاحساس يقول...

السلام عليكم
البقاء لله استاذه شيرين ربنا يسكنها فسيح جناته

بالنسبه للانتخابات
مع ن مفيش حد اعرفه انه كويس ولا لا بس ناوية اروح ان شاء الله عشان ناس معينه ما تنجحش ونرجع لورا من تاني
انا شايفه انه ده الواجب علينا طالما المحكمة ما قدرتش تمنع الفلول من البرلمان يبقي احنا ال لازم نمنعهم
تحياتي

ليلى الصباحى.. lolocat يقول...

السلام عليكم
البقاء لله اختى
انا لله وانا اليه راجعون
لله ما اعطى وله ما أخذ


************
.صحيح في فلول كتير...و مرشحين بتوع مصلحتهم..و ناس مش مفهومين...الطوابير طويله و الناس بترغي بترغي و عاملين إزعاج رهيب...غير إن في منهم بيملي أراءه على الناس و بيثير بلبله... بس أنا سكتهم و قلتلهم إن اللي ذاكر ذاكر خلاص.
***************

الشعب المصرى سمة فيه ومش ممكن تنتهى ولاتختفى منه انه كثير الكلام ولا يستطيع التصرف الا فى النهاية ( يعنى لما يفيض بيه الحال)


لكن اعتقد بعد الثورة فيه شىء جوانا اتولد
وهو الكلام اللى بيصاحبه اصرار على الفعل
فيه شىء جوانا اتولد بيقول لازم نخاف على بكرة

يمكن ياشيرين الجاى يكون احسن لأولادنا واحفادنا


لكن اللى انا اعرفه ان مش لازم ابدا نتنازل عن حقنا حتى لو كان فيه فلول ولا مندسين ولا كتير احزاب ولا غيره

لازم نعرف احنا جينا من فين ورايحين لفين وده الاهم

شكرا لك حبيبتى على البوست الفعال الهادف وجميل اننا نعرف حقنا ونسعى له

تحياتى لاجمل شيرين فى بلوجر :)

faroukfahmy يقول...

العزيزة عليتا كلنا الاميرة شيرين
البقاء لله ولك خالص العزاء واسكن الله الفقيدة واسع جناته
اللى هيفوز ياشيرين فى هذه الانتخابات هى مصر وليس اى حزب او اى مرشح
بحق مصر اثبتت للعالم كله حب اولادها لها مهما كانت التفرقه فى المذاعب والاهواء والمصالح الشخصية
حقا لم اكن اتوقع هذا الاقبال الذى لم يسبقه مثيل فى تاريخ الانتخابات فلم يكن بهذا الاقبال المنقطع النظير فاختلاف الصافات لم تخغى معها اختلاف الاصوات
تأكدت مصر بحب اولادها واثبتت للعالم بخيبة ظنها فيهم
الفاروق

FAW يقول...

شيرين
البقاء لله أولا وللأسف لسه عارف حالا أهو

ثانيا

كنت فرحان زيك لغاية ما اللواء مختار الملا حرق دمي بتصريحاته السمجة اللي ملهاش أي وزن بس بتحرق دمي

بالنسبة للفلول أو غيرهم , للأسف لما بسمع حد بيقول اللي ميعجبناش ما ننتخبوش تاني بستغرب ! . . وهو أصلا فيه حد محتاج يدخل المجلس تاني عشان يحاول يرضينا . . خمس سنين حلوين قوي أكون فيهم نفسي وأنهب البلد ومش مستني منكم أصوات تاني , عادي يعني :)

يللا , بس أنا برضو متفائل ومتسألينيش ليه :)

وطبعا أنا مصوتتش أصلا :))

Unknown يقول...

و للحرية الحمراء باب بكل يد مضرجة بالدم يدقّ..

تحياتي و امنياتي باكتمال الحرية و النصر
لشعب مصر

منجي باكير

د/دودى يقول...

انا حابه قوى ان كل المدونيين انتخبوا و حريصين على كده و متضايقه لانى مرحله تالته...

مصطفى سيف الدين يقول...

البقاء لله يا شيرين
رحمها الله وغفر لها
ماسمعتش غير دلوقت
اما عن الانتخابات فالنتائج لن تكون مرضية لأن نسبة الفلول والفاسدين بالمجلس ستكون كبيرة
اتفق معكي الايجابية مهمة جدا ويا ريت كلنا نبقى ايجابيين
مش مهم مين اللي هييجي الاهم ان اللي هييجي هيبقى من اختيارنا
تحياتي

هبة فاروق يقول...

البقاء لله يا شرين
ويارب تبقى اخر الاحزان

Emtiaz Zourob يقول...

مبارك عليكم العرس الانتخابي يا شيرين .. عقبال الفرحة الكبيرة " انتخاب رئيس الجمهورية " ..

انا سعيدة انك رحتي وانتخبتي .. دي فرصتك .. وعلى قولة فهمي هويدي " اعتصموا وانتخبوا " ..

reemaas يقول...

البقاء لله يا شيرين
يارب تكون اخر الاحزان

اكيد اليوم رغم المخاوف كان حلو وصورتنا كانت تجنن
عقبال ما انزل انا كمان
انا مرحالة تالته

reemaas يقول...
أزال المؤلف هذا التعليق.
EvaLuna يقول...

الأخت شيرين ، انا أخنكم تقوى من الأردن.

بالأمس عندما كنت أشاهد الأخبار كان هنالك جملة واحد فقط تتردد في عقلي: "لو لم أكن مصريا لوددت أن اكون مصريا".

سعادتي بلا حدود و فخري بلا حدود بالأمة المصرية ، بأم الدنيا العظيمة .. انتم مصدر إلهام لكل الخيّرين في العالم و لكل الإيجابيين و لكل الأشخاص الذين يضيؤون شمعة بدلا من أن يلعنوا الظلام.

نحبكم جدا و فخورون بكم و قلبنا معكم في كل لحظة.

محبتي
تقوى مساعدة
عمان- الأردن

هديل يقول...

ربنا يتمملكم على خير يارب و يوليكم عليكم الصالح اللي يخاف ربنا فيكم يا شيرين .. :)

zizi يقول...

شيرين الغالية ..ازيك ان شاء الله تكوني بخير ..معلش انا الأيام دي عيانة والأنتيبيوتك مخليني زي التايهةوعشان كده يادوبك بابص على المدونات واعلق على واحدة والا اتنين وانام تاني ..والبقاء لله وربنا يرحمها ويجعل الجنة مثواها ..ونفس احساسك بالمشاركة هو فعلاً بيغمرنا كلنا يعني المرادي احنا بيكفينا نشارك بصوتنا حتى ولو جانبه الصواب قليلاًلكن بالتأكيد في المرات القادمة ستكون خبراتنا اكثر فيمن هم حولناوتكون اختياراتنا ادق ...تحياتي وشكري

The Royal Couturier يقول...

البقاء لله فى خالتك
بغض النظر عن البلاوى اللى سمعتها عن التزوير المرة دى ، و بغض النظر عن التجاوزات الكتير جدا اللى حصلت من تقريبا معظم المرشحين بس مبسوط خلى الشعب يجرب و ينتخب اللى عاوزه و مش هيعجبه الوحش و هيمشيه !
مع ان فى ناس كتير قررت المقاطعة لانها كانت شايفة ان ده الاصح فى النهاية اللى مقتنع ان المقاطعة صح و قاطع يبقى صاحب مبدأ و اللى مقتنع انه لازم يصوت و صوت يبقى صاحب مبدأ
ااهم حاجة الاختلاف ميتحولش لخلاف
تحياتى :)

eng_semsem يقول...

البقاء لله
انا لله وانا اليه راجعون
غفر الله لها واسكنها فسيح جناته
اختي العزيزه مش مهم هتختاري مين الاهم انك شاركتي في بناء مجلس يعبر عني وعنك
وبرغم وجود فلول او غيره ده مش معناه انهم نجحوا ومنظر الناس وهي واقفه عشان تقول كلمتها هز العالم كله لان الكل كان متخوف
يارب ادم علينا الامن والامان والاستقرار وولي علينا من يخافك ويرحمنا
تحياتي

نيسآان يقول...

صباح الفل شيرين
بجد برافو....
كم كان حماس المصريين للانتخابات ووقوفهم في الطوابير الطويله بالرغم من البرد والمطر واصرارهم على انه يكون لهم دور في التغيير...
كم كان هذا رائعا وملهما وعلى قدر عالي من المسؤوليه والوطنيه بحق ومش مجرد كلام...ربنا يحمي مصر وتبقى دايما احسن واعلى واغلى على قلب كل عربي.

ستيتة يقول...

البقاء لله حبيبتي
معلش انا المقصرة في السؤال وإلا علمت بدري
غفر الله لها وادخلها فسيح جناته وألهمكم جميعا الصبر والرضا

أما عن عرس الديمقراطية
فرحم الله الشهداء
هذه الإنتخابات برعاية الشهيد المصري
اللي لا حاكمنا قاتله
ولا ذكرنا اسمه حتى
ولا عاملنا أهله بما هم أهلا له
ربنا ييسر كل عسير

تحياتي

غير معرف يقول...

أستاذة شيرين ..
منذ مدة وأنا أتابع مدونتكم بين الوقت والآخر .. لكنني سجلت حديثاً في المتابعين بشكل رسمي معلن ..
ساءني أن أكون آخر المعزين بوفاة خالتك رحمها الله وأعظم الله أجركم وغفر لميتكم وألهم أهلها الصبر ..

كما قرأت مشاركتك في كتاب المئة تدوينة وهو ما شجعني لدوام المتابعة ..
كما أدعوك لمتابعة مدونتي فيما لو لاقت اهتمامك .. على الرابط :

http://mywhiteshadows.blogspot.com/

مع التحية ..
مدونة ظلالي البيضاء ..
محمد الذهبي

دعاء العطار يقول...

البقاء لله ياشيرين مكنتش اعرف خالص الا دلوقتى .. اسفه بجد

بالنسبه للانتخابات فانا بصراحه مبقتش عارفه هى فى صالح البلد ولا مش فى صالحها

بقى عندى احساس ان المجلس العسكرى مش هيمشى غير بثوره تانيه ومش مطمنه لانتخابات فى طل حكم المجلس العسكرى

اللهم ارنا الحق حقا وارزقنا اتباعه وارنا الباطل باطلا وارزقنا اجتنابه

Unknown يقول...

إبراهيم رزق : مبسوطه إني ساعدتك على إتخاذ قرار مهم زي ده و قُبُلاتي لساليناز :)


تَرَآَنِيْل ♥ ~ : نورتيني في أول زياره و سعيده برأيك جداً الحمد لله الإنتخابات عدت على خير و ربنا يعمل الخير لمصر :)


عمرو فكري : أهلاً بيك عمرو...أعتقد محدش من الفلول كسب على حد علمي..نورتني :)


ENG./ELSAYED,PMP : الحمد لله بقيت أفضل شكراً لسؤالك و سعيده معاك بالتقدم عقبال المزيد من الديمقراطيه و الحرية :)

سواح في ملك الله: مفيش أسف أبداً و متشكره ليك جداً

Unknown يقول...

وصف الاحساس: متشكره ليكي عندك حق جداً و ده فعلاً دورنا و في الآخر لازم نرضخ لإرادة الشعب..نورتيني :)


أم هريرة.. lolocat: أختي الحبيبه بتفق معاكي جداً و كلنا أكيد إحساسنا و وعينا إتغير كتير و بقى علينا مسئولية أكبر و أهم...نورتيني و أسعدتيني كالعاده :)


faroukfahmy58: أستاذي العزيز مصر فعلاً تأكدت من حب ولادها ليها و حرصهم عليها أتمنى الجاي يكون أفضل..متشكره ليك جداً :)


FAW : ولا يهمك مصطفى متشكره ليك جداً..خلينا في الجانب المتفائل..:)

Unknown يقول...

منجي باكير: رائع تعليقك سيدي أشكرك عليه جداً..نورت المدونة :)


د/دودى: نسبة التصويت كانت جيده جداً و ماتزعليش هانت :)


مصطفى سيف الدين : شكراً مصطفى و متأكده إن النائج مش هتعجب الجميع لكن تكفينا المشاركه و الإيجابية و ربنا يستر في اللي جاي :)


هبه فاروق: متشكره أوي يا حبيبتي :)

Unknown يقول...

وجع البنفسج : يا رب يا إمتياز مستنيه اليوم ده جداً...إعتصموا و إنتخبوا..رائع :)


reemaas: متشكره أوي يا نور خلاص هانت :)


EvaLuna: الأخت الجميله تقوى نورتي المدونه أهلاً بيكي :) سعيده جداً بكلماتك و إحساسك الرائع و أكيد إحنا كمان بنحب أهل الأردن و سعداء بهذا الشعور الرائع :)


هديل : يا رب أتمنى من كل قلبي..شكراً ليكي :)

Unknown يقول...

zizi: ألف سلامة عليكي ربنا يطمنا عليكي دائماً...أكيد دي خطوه و اللي جاي أكيد هيكون عندنا خبره أكبر..متشكره أوي ليكي...نورتيني كالعاده :)


خياط الملكة - The Royal Couturier : شكراً أكرم..يارب فعلاً الإختلاف ميتحولش لخلاف لأن دي معانتنا دلوقتي...ربنا يستر.



eng_semsem: متشكره ليك أسامه...منظر الناس كان رائع فعلاً ..بضم صوتي ليك و يا رب يعملنا الخير.


نيسان: نيسانه التدوين العزيزه سعيده جداً بتعليقك الرائع و رأيك اللي إداني طاقه و إحساس بالفخر و المسئوليه نتمنى نكون قدها..شكراً حبيبتي :)

Unknown يقول...

ستيتة حسب الله الحمش: و الله كنت مش فاضيه أبداً أرد على التعليقات و مرديتش غير لما قريت تعليق حضرتك :)
المدونه و بيت صاحب المدونة و كل ما يحيط بالمدونة نور بزيارتك الكريمه بجد وحشتيني جداً :)

أشكرك و نعم بالله
للأسف ناس كتير لسه مش فاهمه يعني إيه حد يضحي بروحه من أجل مبدأ من أجل حرية و كرامه عشان هما يروحوا ينتخبوا و يتصوروا و يحتفلوا...ربنا يرحمهم و أكيد عمرنا ما هننساهم حتى لو لم تكرمهم الدوله كما ينبغي سيظلوا في قلوبنا.

نورتيني و أسعدتيني جداً :)

Unknown يقول...

مرآتي : أهلاً بيك استاذ محمد سعيده بتعليقك الأول و أكيد يشرفني أزور مدونتك :)
أشكرك على العزاء و لم تتأخر أبداً...سعيده إنك قرأت مشاركتي في المائة تدوينه و في إنتظار دوام التواصل.
كل التحية لك


دعاء العطار: و نعم بالله حبيبتي متشكره أوي.
أنا معاكي في علامات إستفهام كتير لكن في النهاية سعادتي بأولى خطوات الديمقراطيه حتى لو تعثرنا في البداية لكن أكيد هنوصل لمرادنا مع الوقت و منظر الناس كان مفرح جداً :)
أرق تحية لكي