الأربعاء، 9 نوفمبر 2011

شوية حاجات مستفزه


أنا و أحمد أخويا بعد عودته من أول أسابيع الجيش


أنا : إيه أهم حاجه إتعلمتها في الجيش يا أحمد؟
أحمد : عايزه تعرفي أهم حاجه ممكن يكدروني عشانها.
أنا : يكدروك؟ يعني إيه؟
أحمد : يعني يعاقبوني.
أنا : يحبسوك مثلاً؟
أحمد : لأ يعني مثلاً نفضل نلف حوالين الصول...نطوف حواليه.
أنا بضحك : طب إيه أهم حاجه لازم تعملها عشان متتكدرش؟
أحمد : البطه.
أنا : ؟؟؟؟؟
أحمد جاب فوطه و مسكها من النص بفمه و فضل يبرم فيها و بعدين لفها بطريقه معينه تشبه البطه و وضعها على السرير في سعادة و نصر الأبطال....أهم حاجه البطة...!


                   ****************************

 زوجي و الشيخ جنيدي حارس العماره يوم جمعة تحديد المسار


زوجي : هتروح يا شيخ جنيدي الميدان ؟
جنيدي : هاروح إن شاء الله.
زوجي : هتروح ليه يا شيخ جنيدي ؟
جنيدي : عشان أنتخب اللي هينتخب الرئيس.
زوجي بدهشه : هتنتخب في الميدان ؟ هتنتخب مين ؟
جنيدي : هنشجع اللي هينتخب الرئيس.
زوجي بنفس الدهشه : مين اللي هينتخب الرئيس ؟
جنيدي : الناس اللي هيمسكوا مجلس الشعب.
زوجي : شيخ جنيدي...عندي ليك مفجأة...إنت اللي هتنتخب الرئيس.
جنيدي بذهول : أنا اللي هنتخب الرئيس.
و ما زال جنيدي مذهول حتى الآن....


                            **************************

  زوجي و أحد الأقارب


القريب : شيرين بتكتب حلو أوي بس بصراحه التعليقات زيادة حبتين..
زوجي : أنا بتنبألها بمستقبل مُبهر..بس مالها التعليقات؟
القريب : يعني (مبدعه) و (رائعه) و (رومانسية) كلام محبش حد يقوله لمراتي.
زوجي : أولاً اللي بيعلق بيتكلم عن كتابتها و هيه فعلاً كتابات رائعه...ثانياً الكاتب لازم تديله حريته كامله عشان يقدر يُبدع...اللي بيعمل غير كده مش واثق في نفسه أو في زوجته.


                        ***************************


أنا و كوثر فراشة بالعمل

أنا : بس بنتك كبرت يا كوكو و بقت عروسه.
كوثر : أُمال دي كمان بقت بتلبس على الموضه بنطالونات ضيقه و عريان.
أنا : طب إيه علاقة العريان بالموضه؟
كوثر : هيه عايزه تبقى بنت ناس مش لابسه تحجيبة زيّنا.
أنا : تحجيبة؟؟ و زيّنا كمان...طب إمشي يا كوثر بدل ما أرتكب جريمه.

                     ****************************

أنا و سيدة بمسجد

أنا أهم بالصلاة و هي توقفني بسرعه و تقول :
السيدة : إنتي حاطه مانيكير؟
أنا : أيوه في مشكله ؟
السيدة : مينفعش صلاتك مش هتتحسب...شيلي المانيكير و بعدين صلي.
أنا : تمام بس أنا متوضيه قبل ما أحط المانيكر و محافظة على وضوئي.
السيده : مينفعش تصلي بيه روحي شيليه الأول و تعالي صلي.
أنا : بس أخاف الصلاة تفوتني.
السيدة : صلاتك بيه مش هتتحسب روحي شيليه.
خرجت بكل سذاجه و طاعه أبحث عن صيدليه عشان أشتري أسيتون و طبعاً فاتتني الصلاه.

                         ************************

أنا و صديقتي المقربه

أنا : مش هتقولي رأيك في كتاباتي أنا بكتب في المدونة  دلوقتي بقالي سنة...ناس كتير معرفهومش بيقولولي رأيهم...محتاجه رأيك إنتي.
صديقتي : الوقت بس مشكلتي الوقت مش بلحق أدخل.
أنا : بس إنتي بتحبي القرايه و دائماً بتكلميني عن روايات و كتب بتقريها...و عندك وقت لقراءتها.
صديقتي : ما أنا ساعات بقرالك.
أنا : طب و ساكته ليه إنقديني لو في حاجه شيفاها غلط أو مش عجباكي.
صديقتي : بصراحه أسلوبك ركيك شويه...يعني عادي.
أنا : تمام طب إيه الحاجه اللي بتعجبك؟
صديقتي : إيه رأيك ننزل نشتري لبس إمتى؟

                      ************************

أنا و زميلة و موظفة بالعمل

الزميله: هتختاري مين يا شيرين رئيس؟
أنا : إنتي قررتي هتختاري مين؟
الزميله : عمرو موسى
أنا : ليه؟
زميلتي : بيشتغل في السياسه من زمان و أكيد خبرته جيده بالمهام الرئاسيه.
أنا : و إنت يا مدام مُشيرة؟
الموظفة : أنا هختار أحمد شفيق طبعاً.
أنا : ليه يا مدام مُشيره؟
الموظفة : عشان ألطف و عينية مليانه كده و مؤدب.
زميلتي : و إنتي يا شيري هتختاري مين دوختينا؟
أنا : لسه...لسه اللي هيخدم مصر من خلال الرئاسه مظهرش.


و يتوالى الإستفزاز....



هناك 48 تعليقًا:

Ramy يقول...

مش عارف اقولك أيه

هى حاجات مستفزة كلها

بس تضحك بجد

انا كنت فى مود ما يعلم بيه إلا ربنا بس ضحكتينى

......

و تحية كبيرة جداً لزوج حضرتك بجد بأمانة

ربنا يخليكوا لبعض

.............

ياسمين يقول...

صديقتك ..يعني فعلا فيه ناس كدا بتحبط الواحد مع انه بيكونوا اقرب الناس لينا شيء بيجرح أووي
ع كل حاجة ربنا يسعدك وانت موهبة ومتميزة جداا

FAW يقول...

شفيق مين وموسي مين بس :)

علي فكرة أعتقد لما صاحبتك تقرا كتابك إن شاء الله الموضوع هيختلف , كل واحد بيحب يقرا بطريقة معينة وحاجات معينة , أنا الصراحة بصعوبة ومعاناة علي ما عرفت أدخل عالم المدونات ده وأعرف أقرا حاجة مش علي ورق

بس فعلا شوية حاجات مستفزة بجد :)

تحياتي . .

مصطفى سيف الدين يقول...

ربنا يكون في عونك يا شيرين
بصراحة حاجات مستفزة جدا
وبالذات ان شفيق عينه مليانة دي نكتة الموسم بصراحة
اول مرة اعرف حد له علاقة بمبارك عينه مليانة
تحياتي

Unknown يقول...

Ramy: :) طب كويس إني ضحكتك ما هو شر البلية ما يضحك.
ربنا يخليك يا رامي هو فعلاً فاجئني بردّه و دعمه ليه هو اللي مخليني أستمر في الكتابه :)

أرق تحية لك

EMA يقول...

لازم كام موقف مستفزين يوميا دا العادي هههههههه..

تسلمي و تسلم مدونتك الجميلة

تقبلى مروري البسيط و متابعتى

تحياتي و كل عام و انت بخير

Unknown يقول...

ياسمين : هو أنا متجرحتش بصراحه إحنا صحاب أوي و أنا عارفه إنها بتحبني بس عند حتة الكتابة دي للأسف مبتبقاش هيه...مش عايزه أظلمها و أقول منفسنه بس بردو مش قادره أفهم عدم إهتمامها و مشاركتها ليه في أهم شئ في حياتي.

نورتيني يا ياسمين و متشكره بجد :)

Unknown يقول...

FAW: شوفت بقى أنا مستحمله قد إيه :)
أنا مش زعلانه منها أنا بس مستغرباها و هيه على فكرة قالت رأيها من غير ما تكون قرت بالفعل...مش فاهمه ليه؟

يالله أهو كله إستفزاز
نورتني

sabry abo-omar يقول...

كلها مواضيع مستفذة بس دمها خفيف فعلا.. الأهم الثقة بالنفس اللى بناخدها بعد كذا موقف منهم.. انتى كمان بتكتبى كوميدى حلو ومليان قفشات ظريفة... تحياتى

Unknown يقول...

مصطفى سيف الدين : متستغربش يا مصطفى كل شئ بقى جايز و متوقع و الناس بجد بتقول كلام يفرس.

أسعدتني بزيارتك
تحياتي ليك

Unknown يقول...

EMA: أهلاً سهلاً بيك و نورت المدونة :)
إستفزاز ده العادي خصوصاً مع واحده سهلة الإستفزاز زيي :)

إتشرفت بمتابعتك و في إنتظارك دائماً
تحياتي لك

Unknown يقول...

sabry abo-omar: ما هو لولا الثقه في النفس بجد كنت هزعل أوي بحاول أخدها براحه.
كنت بكتب ساخر كتير بس مش عارفه ليه الرومانسي خدني شوية..شوية كتير.
سعيده بزيارتك و تعليقك
تحياتي لك

سواح في ملك اللــــــــــــــــــه- يقول...

لا هو موضوع الجيش ده صح

عشان يتعلم طاعة اوامر رايسه

لازم في الاول بيدبجواله القطه هههه

اما حكاية الصلاة وطلاء الاظافر دي محتاجة مفتي من الازهر مقدرش اجزم كلام الست صح والا غلط

بس دايما احنا ناخد بالاحوط

بالنسبة لزميلتك والمدونة ده تصرف طبيعي

فهي حتي لو كانت بتحب القراية في المدونات ممكن تدخل علي مدونتك

ومتقوللكيش اي راي

إنسان || Human يقول...

ههههههههه

لا لا لا ربنا بجد يعينك .. على ده كله


كلها أمثله فعلاً مستفزة ... بس أهم حاجه كرد فعل لكل ده وغيرها من المواقف الجميله اللي الواحد بيمر بيها في الحياه
أو بيشوفها حتى ...

ركبي على قلبك مـــــراوح

ابراهيم رزق يقول...

و الكون ده كيف موجود من غير حدود
و فيه عقارب ليه و تعابين و دود
عالم مجرب فات و قال سلامات
ده ياما فيه سؤالات من غير ردود
عجبى ؟؟؟

اولا و قبل اى تعليق كل التحية و الشكر و التقدير لزوجك على وعيه و تفتحه و تشجيعه و لكن الذى استغربه هو ذلك الاسلوب التحريضى و التعالى و التباهى بقلة الثقة فى نفسه و العجرفة فى طرح الموضوع لان اعتراضه على التعليقات لم يستفزنى لانها وجهة نظره انما المستفز فعلا قوله انا لا اقبل حد يقول لمراتى احتفظ برأيك لنفسك منتهى السطحية و العجرفة
بالنسبة لكوثر البعض يعتقد ان المدنية هى مزيد من التحرر فى التصرفات و العادات و التقاليد
اما السيدة فباى خلفية دينية حكمت و اى سلطة جعلتها تقرر ان الله لن يقبل صلاتك فبنفس المقياس لا يجوز ان تصلى من تضع كحل او روج او كريم وجه
اما زميلتك فيجب ان نحسن الظن بها و اغلب الظن انها صفة من صفاتها

تحياتى

Mostafa gazar يقول...

كان الله فى عونك .......دى مش شوية حاجات مستفزه دى قمة الاستفزاز......بس والله مبسوط انك شاركتينا الحاجات دى لأن الكلام والحديث مع الأصدقاء يخفف الكثير عما بداخلنا ..و تذكرت كلمه ل د مصطفى محمود لا أدرى مدى ملائمتها للموقف ولكنى وجدتنى أتذكرها بعد أن قرأت كلماتك.....وبحت عنها مجدد ويقول د مصطفى محمود (على المؤمن أن يدعو إلى الإيمان، ولكن لا يضره ألا يستمع إليه أحد ولا يضره أن يكفر كل من حوله، فهو يستطيع أن يكون مؤمنا في أي نظام وفى أي بيئة .. لأن الإيمان حالة قلبية ، والدين شعور وليس مظاهرة، والمبصر يستطيع أن يباشر الإبصار ولو كان كل الموجودين عميانا فالإبصار ملكة لا تتأثر بعمى الموجودين) ثم أضاف فى مموضع اخر أهمية العبادات للوصول الى هذه الحاله القلبيه...... أرجو ان يكون المقصد من كلامى قد وصل اليكى .... ...تحياتى واحترامى الشديد لكى(شخصية وأدبا وثقافة وابداعا) ولزوجك ولأسرتك الجميله وكل الأصدقاء....و فى انتظار المزيد من الابداع والروعه والرومانسيه ....

عباس ابن فرناس يقول...

مبدعة ورائعة ورومانسية رغم انف احد الاقارب

تحياتى وكل سنة ونتى طيبة يادكتورة

Lobna Ahmed Nour يقول...

كلنا بنتعرض للاستفزاز طول الوقت
لكن انتي رصدتيه بطريقة حلوة أوي
:)

zizi يقول...

شيرين الجميلة الرقيقة ..انتي فعلاً جمعتي شوية حاجات ممكن تخلي الواحد يصرخ من مناطق معينة في تفكير الناس وهم يعتقدون انهم قمة في التفكير المنطقي ..ولعلمك بالنسبة لتكدير أخوكي في الجيش دول كانوا ساعات يخلوا المجند يمسح البلاط بفرشة الأسنان ..تخيلي ..وبالنسبة لصاحبتك فهي غالباً مالهاش في المدونات ولما انت سألتيها هي معتقدة ان النقد لازم يكون هجاء ..وده مفهوم أغلب الناس عن النقد للأسف ..
أما حكاية طلاء الأظافر وارتباطه بالصلاة ..فأنا حصل معايا ماهو الذ من ذلك ..انا سنة من السنين في رمضان قلت لما انزل اصلي التراويح في المسجد اللي قدامنا ونزلت وشفت الفوضى اللي على اصلها والعيال اللي جايبينهم معاهم وهم مليانين "صنة " وبيتجولوا بين المصلين واشياء أخرى غريبة كل ده عادي ..لكن ما أن بدأت الصلاة ورأوني وأنا اصلي على كرسي ..لأني لا أتحمل الركوع فترة طويلة وخاصة ان بعض الأئمة بيقعدوا يقولوا في التشهد ربع ساعة مش عارفة هل ده من تمام الإيمان والا ايه ..ماعلينا ..المهم ما أن خلصوا الركعتين الأولنيين حتى وجدت احداهن ..وهي تفتي الفتوى التي قررت بعدها الا اصلي في الجامع أي حاجة بعد كده الا اذا كنت طبعاً في عمرة أو حج ..قالت لي كما قالت لك صاحبتك "انت صلاتك مش جايزة وانت قاعدة على الكرسي "خللي بالك هم ماعندهمش حل وسط هم خلاص بيصدروا الأحكام التي لا فصال فيها ..فما تدقيش ..

غالبية الطبقة الغير متعلمة او اللي تعليمها محدود وبرضه ظروفها المادية محدودة بيربطوا الموضة بالعري وده ثقافة متوارثةويمكن لما بيشوفوا الأفلام بيفتكروا ان الموضة كده ..
اما الشيخ جنيدي فده واللي زيه هم اللي الواحد خايف منهم لأنهم حايمثلوا في الإنتخابات الأصوات الموجهة وممكن أي حد يوجههم حيثما شاء ..وربنا يستر

وبعدين روحي بقى وانت رومانسية كده ومبدعةورائعة ..انا عارفة ياختشيي جوزك مستحملك ازاي الله يكون في عونه ..والله دا له الجنة .. ههههههههههههه تحياتي

kmhmhgfd يقول...

ههههه
عسل يا شيرى بجد
ازاى مكنتش متابعاكى :)
زوجك وجنيدة ..
عجبتنى اوى

حَنيّـن نِضال يقول...

مساء الخير د/ شرين

فعلا اشياء مستفزة و المستفز انها ما بتوقف عند هون كل يوم عم تتكرر و بطريقة مستفزة مملة :((((

و طبعا ربنا يخليلك زوجك و يخليكم لبض كما وراء كل عظيم امراة و راء كل عظيم ناجحة و مبدعة رجل داعم مساند مشججع محب :)

كوني دوما بخير و متخليش حاجة تستفزك ^____^

faroukfahmy يقول...

الغالية شيرين
اضم رأيى الى رأى الغالى سيف
حاجات كتيرة فى حياتنا مستفزة لدرجة ان الاستفزاز اصبح لا يستفزنا
وهذا الامر فكرنى لما كنت بالهند لما كانوا يواجهوا امرا خطيرا يقولون
no problem
وعندما اسألهم وماهى مشكلاتكم يرودون مشكلاتنا ان ليس لدينا مشاكل
فمن كثرة مشاكلهم اصبحت المشكلة عندهم ليست مشكلة وينطبق الامر على كثرة ما نواجهه من مستفزات
الفاروق

Carol يقول...

التدوينة مليانة و دسمة جدا
بترسم تفاصيل كثير و تعبر عن حال اليلد ببساطة و تشويق ...
أسلوبك رائع و أختيارلتك المشاهد مدهش ...
تدوينتك تظهر مدى حساسيتك للمواقف و الذي يحدث من حولك

وتيترجم جوانب كثيرة في الحياة و الشارع المصري و الثقافة الدينية و السياسية في المجتمع

برافو عليكي :)

AHMED SAMIR يقول...

ايه الاستفزاز دة....!!
هي ناقصة...حرام عليكي
كل موقف اكثر استفزازا من اللي قبله..!!
قيسي الضغط علشان كدة خطر عليكي
تحياتي....
(و لا بلاش...احسن الأخ اللي بيزعل من مبدعة و الكلمات دي يزعل من تحياتي كمان...يقولك هو بيقول تحياتي بمناسبة ايه..)!!!
طيب من غير سلاموعليكم

The Royal Couturier يقول...

ربنا يصبرك و الله , بس مش لوحدك تصدقى انا هعمل موضوع رد على بتاعك عن الاستفزازات اللى باستفزها !
جنيدى دى حاجة زعلتنى , عشان اما نقول الشعب مينفعش يتصلح من غير ما يتصلح التعليم ع الاقل بيزعقولى و يقولولى انتو جيل فاشل !
بالنسبة لقريبك : ربنا يشفى , ناس كتير كده , بس تصدقى مبدعة كلمة قبيحة لا يصح انها تتقال ! عيب اوى بصراحة :D
كوثر : اعتقد ينطبق عليها ما ينطبق على جنيدى : التعليم و الثقافة هما اللى يخلوا الناس تعرف تفكر صح !
السيدة الشيخة : انتى غلطانة انك سمعتى كلامها ! و ربنا يرحمنا من المستدينات
صديقتك : سبحان الله الوضع ده دايما بيحصل كتير , يعنى بابا و ماما بيقرولى اوقات كتير . اختى نادرا اما بتقرا و نادرا اما بتقولى ان حاجة حلوة و لازم ازن 3 ساعات عشان تقراها :) , اخواتى الاتنين يا دوب يعرفوا انى بدون :))
زمايلك دول بشوف زيهم كتير , ماما حاليا فى السعودية و كل ما تكلم حد يقولها يا حازم ابو اسماعيل يا عمرو موسى !!

هكتب البوست و ابعتلك اللينك بكرة ان شاء الله :))

دعاء العطار يقول...

والله هم يبكى وهم يضحك

ضحكت ع حاجات واتضايقت من حاجات تانيه واستفزتنى

المهم ان رغم كل الاستفزازات دى .. الواحد يمشى فى طريقه حاطط هدفه قدام عينيه ومايسمعش لاى حد انه ياثر عليه

وف الاخر ع راى استاذ ابراهيم

بلد مجانين صحيح

Bent Men ElZman Da !! يقول...

الحاجات المستفزه كتير اوى
اكتر حاجه ضحكتنى بجد موقف جنيدى
وربنا يخليلك زوجك بجد على تفهمه ده
وربنا كمان يرحمك من الاستفزاز ده :)

reemaas يقول...

انا مابحبش اللى يفتى والست بتاعه المونيكير ده بجد نرفزتنى انا كمان

صعب عليا عمو البواب بس رجعت قلت لنفسى وليه ما فيه كتير زيه

بتاعه شفيق عنيه ملونة دى نايمة نايمة يعنى

Unknown يقول...

سواح في ملك اللـه :
مش عارفه يا خالد بس مش لدرجة إن أهم حاجه في الجيش تكون البطه...في أكيد حاجات أهم.
موضوع المانيكير ده أنا كمان مفتيش فيه بس بالمنطق كده كان مفروض تسيبني أصلي عشان متفوتنيش الصلاه و بعدين أسأل و أستفسر.
صاحبتي أنا مش زعلانه منها...مستغربه بس.

سعيده بمشاركتك الدائمه لمواضيعي :)
تحياتي الخالصه لك

Unknown يقول...

Hu-man: ههههههه شفت يا محمد كمية الإستفزاز ده لسه في كتير بس أنا شايله و ساكته.
هجاول أركب مراوح ولو إن طبعي الحامي يغلب...سريعة الإشتعال :)

تحياتي ليك و نورتني بعد غياب

Unknown يقول...

ابراهيم رزق:
أشكرك أستاذي العزيز على تحيتك لزوجي و هو يستحقها و أكثر أنا بصراحه إتفاجئت برده أسعدني جداً تفهمه و تحضره.
بصراحه رجاله كتير بتفكر زي قريبي مقدرش ألومهم و لو إن الأسلوب كان تحريضي شوية خاصة و هو يعلم أن الغيرة بتلعب دور كبير في حياة أي زوجين...لكن المهم عندي رأي زوجي.

كوثر و زيها كتير للأسف تفكيرهم مستفز جداً...أما صديقتي فصدقني مش زعلانه منها لكن كنت أتمنى تشاركني إهتماماتي أو على الأقل تشجعني بإيجابية.

نورتني يا أستاذي
أرق تحية لك

Unknown يقول...

mostafa gazar:
أخي ومتابعي العزيز سعيده بتفاعلك مع البوست جداً و بالفعل كانت نيتي من وراه بعض الفضفضه مع الأصدقاء و التعرف على أراءكم المختلفه...و يا ترى ليه حق أستفز و لا لأ...بس الحمد لله طلعت معذوره :)
مفوم قصدك من كلمات الدكتور مصطفى محمود و بعتز جداً بالقطع الأدبية الفلسفيه الجميله اللي بتشاركنا بيها.
إن شاء الله هستمر في الكتابه طالما إنكم مستمرين في تشجيعي بهذا الشكل الرائع :)

تحياتي و كل التقدير لك

Unknown يقول...

عباس إبن فرناس :كل سنة و إنت طيب بألف خير...بس إيه الدخله القويه دي :)

Unknown يقول...

لبنى أحمد نور:
متشكره جداً يا لبنى و سعيده بأول زيارة منك بجد نورتيني
:)

Unknown يقول...

zizi: ماما زيزي أولاً سعيده جداً بتعرفي عليكي :)
ثانياً بقى بصرف النظر عن أي إستفزاز زيارة حضرتك و تعليقك عندي كافي إنه ينزل على قلبي برد و سلام :)
للأسف جرعات الإستفزاز في إزدياد و لواحده سهلة الإستفزاز زيي بتبقى فعلاً مشكله...بس عايزه أقولك مش مفروض إن الناس يفرضوا علينا تصرفاتنا, يعني لو جاء معاد الصلاه و في مسجد أكيد لازم نصلي فيه بصرف النظر عن أي إستفزاز ممكن يقابلنا بالعكس أنا بحس الناس دي بتبقى إختبار من ربنا عشان نعاملهم كما يملي علينا دينا و نصبر عليهم..زي الناس اللي بتزق و تزاحم في الحرم مثلاً..أتمنى مفيش أي شئ يمنع حضرتك من ممارسة حريتك في الصلاه في أي مكان.

عندك حق جداً إن الطبقات دي ثقافتهم من الأفلام و خايفه زيك من المستقبل السياسي لمصر في ظل جنيدي و أمثاله الكتير أوي.

هههههههههه هو ليه الجنه بجد بس أنا ليه الجنة أكتر :)))

أرق و أجمل تحية لأجمل أم

Unknown يقول...

zay maTigy :
أنا أكيد أسعد بمتابعتك و نورتي المدونة :)

Unknown يقول...

haneen nidal:
صباح الفُل و الياسمين حنين :)
هو أنا صحيح بأُستفز بسرعه لكن الحمد لله عندي القدره إني أنسى بسرعه و أعيش حياتي.
اشكرك على ذوقك و أكيد أنا مش عظيمه و لا حاجه لكن يسعدني إن زوجي يكون مشجع لي.
نورتيني بتعليقك الجميل

أرق تحية لكي

Unknown يقول...

faroukfahmy58 :
أستاذي العزيز و الله حضرتك عندك حق و بحاول أقول no problem بس غصباً عني بضايق شويه...يعني شوية كده صغيرين.
أشكرك على زيارتك الرائعه و تعليقك

كل التحية و التقدير لك

Unknown يقول...

Carol :
أنا كمان بحب تعليقاتك كارول دائماً بتكون مختلفه و فيها قدر كبير من الفهم لما أعني بالظبط :)
سعيده جداً إنها عجبتك و أكيد دي شهاده أعتز بيها من كاتبه رائعه زيك

دمتي بألف خير
تحياتي الخالصه لكي

Unknown يقول...

AHMED SAMIR:
ههههههههههههه
ماتخفش ضغطي لسه بخير ربنا يستر :)
قول و علق كما تشاء فتعليقاتكم هي أكثر شئ بيسعدني...و على كل مستفز أن يلزم حدود حريتي.
نورتني :)

Unknown يقول...

خياط الملكة - The Royal Couturier :
ههههههه تعليقك حكاية يا أكرم بس تعرف بتفق معاك جداً في إن الطبقات دي مش جاهزه للسياسه و للأسف هيضعونا في موقف لا نحسد عليه في الإنتخابات القادمه.

هستنى البوست على أحر من الجمر و متأكده إنه هيكون تُحفه :)

تحياتي ليك

Unknown يقول...

دعاء العطار:
ههههه بلد مجانين و مستفزين كمان :)
أكيد أهم حاجه إن الإنسان ميتأثرش بأي حاجه و يمشي على الطريق اللي راسمه لنفسه طالما بيراعي الله و ضميره.

نورتيني يا دودو

Unknown يقول...

Bent Men ElZman Da !! :
ربنا يخليكي يا حبيبتي مبسوطه جداً بزيارتك و تعليقك :)

أرق تحية لكي

Unknown يقول...

reemaas :
أنا كمان مبحبش الفتي و بضايق من نماذج جنيدي.
ههههه هيه قالت عنيه مليانه مش ملونه هههههه بس هيه تمشي بردو :)

تحياتي لأجمل نور

Ahmed demo يقول...

بجد يعنى ربنا معاكي علي التعامل في المواقف المستفزة دي وتستحملي انك تتعاملي معاهم تاني وممكن بشكل يومي

وبجد اللى فاكره ان بنتها كده علي الموضه .. او بمعني اصح بنت ناس ... تبقي دي اللي يتغنالها فعلاً اصله معاداش علي مصر :D

سندباد يقول...

وهو في ايه مش مستفز
علي راي محمد صبحي
العيش والعيشة واللي عيشينها مش يفورا الدم
صبرنا يارب

غير معرف يقول...

الجيش أسوء تجربة في حياة أي شاب مصري !
وجيل ابهاتنا اللي دخلوا الحرب وخرجوا من غير اي شيء سوى فرح معنوي بقى شيء باهت بعد 10 سنين وبعد كامب دافيد

الجيش المصري اسوء تجربة ممكن يعشيها انسان وخاصة لو داخل غصب عنه

kholood يقول...

يا بنت يا رائعه انتي انا اتحبست عندكمش عارفه اطلع ....من روعة كتاباتك الله بجد روعه رجعالك يا بنت مصر يا غاليه
خلووووووووود