الأحد، 13 نوفمبر، 2011

تفاصيل صغيره عن البؤجه+تحديث


التحديث بوست بقلم ماما زيزي و بوست بقلم أستاذ فاروق فهمي في الآخر عن نفس اليوم....بشكركم على كلامكم الرائع أسعدتوني بجد :)

من سنة تقريباً دخلت مدونة فاتيما "روح قلب ماما" لأول مره و كان بوست عن تجمع تدويني في الإسكندرية, فاتيما كانت بتوصف التجمع و الناس و بتحكي عن طلتهم و قفاشتهم و حضورهم بشكل دافي و رائع جداً, بجد يوميها تمنيت إني أكون معاهم, صحيح إن حظي مأسعفنيش إني أحضر تجمعات تدوينيه قبل كده, لكن دائماً كنت بتمنى إني أكون جزء من الكيان الرائع ده.

أنا مش إجتماعيه بشكل كبير, كمان وقتي ضيق أوي و تحركاتي صعبه, يعني لما بخرج عن مدينة نصر (حيث أسكن) أو الدقي (حيث أيامي و صبايا) بحس بغربه شديده, لكن المره دي تشجعت و قررت إني لازم أروح, للأسف معرفتش إزاي أروح بالعربيه و خفت أتوه, فركنت عند محطة مترو قريبة من مكان عملي, المترو كنت إعتزلته من أيام الكليه, دلوقتي بقى أسوأ للأسف ماليان شحاتين و أصحاب عاهات بيخوفوا الناس كسبيل للشحاته و باعه جائلين داخل العربيات ,تقريباً مفيش أي نوع من الأمن...بجد زعلت على حال المترو كان أفضل من كده.

نزلت عند محطة الزهراء و مشيت دقيقتين بالظبط بدوّر على الكافيتريا المتفق عليها, لقيت ناس بيندهولي قاعدين على قهوه بلدي , بجد فرحت جداً المكان كان رائع و الجو كان جديد عليه تماماً كان ناقص بس حد يقول شعر عشان تكتمل الصوره , قلتلهم بخجل "أنا شيرين سامي"...فاتميا إنتشلتني من خجلي بجد هيه شخصيه مميزه جداً تحسها كده من دمك, للأسف مقدرتش أقعد معاهم غير ساعتين أو أقل, لكن تعرفت على شخصيات و ناس كنت أتمنى أشوفهم جداً.

قابلت أستاذ إبراهيم رزق دي تاني مره بس بجد أسعدني تواجدي معاه في هذا التجمع هو و بنته القمر "ساليناز" و كان له حضور كبير, قابلت كمان داليا قوس قزح, و لمست إنسانيتها و جدعنتها بجد سعدت بتعرفي عليها, حضور ماما زيزي كان مفجأة بالنسبة لي دائماً كنت بحس إنها بتمثل جزئية الأمومه و الحنان المغلف بالعقل و خفة الدم في البلوجر, لكن متخيلتش إنها كمان في الواقع بنفس التركيبة الرائعه دي.

و بعدين طل علينا أستاذ فاروق فهمي و على يمينه القمر و على شماله الشمس بناته كارولين و هبه اللي كنت دائماً بتابعهم و سعدت بالتعرف عليهم و بالرغم من تدويناتهم الساخره المتميزه بخفة الدم إلا إنهم في الحقيقه شخصيات رصينه و أنيقه جداً, و أستاذ فهمي طبعاً بحضوره الطاغي و حلاوة لسانه.

و هنا حضرت صديقتي العزيزة منى أبو السعود اللي بجد كان نفسي أشوفها من زمان و لما شوفتها محستش غير إنها شبه كلامها أويييييي, منتهى الطبيعيه و الذوق, من أجمل الحاجات في التجمع هو لقائي بمنى بجد و بنوتتها الجميله و علي اللي حبيته جداً.
 كان في شباب كتير من المدونين لكن في واحد كان بيتكلم و عنيه مليانه بحبه للكتابه, هو طالب في كلية الحقوق وعرفت إنه بيكتب من زمان و حالياً بيكتب على الفيس بوك بس, إقترحت عليه ينشئ مدونة بس هو كان خايف إن كتاباته تتسرق, ليه؟ بستغرب جداً من الحكايه دي, زي زميلي العزيز مصطفى سيف لما قرر إنه يقلل كتابه في المدونة عشان كتاباتاه متتسرقش!!

يعني أنا أحد من متعتي و أقلل من سعادتي وإستمتاعي بالكتابه و التواصل عشان يمكن أتسرق! يعني ما أرتبطش عشان يمكن ننفصل, يعني محبش عشان يمكن أنجرح, مغامرش عشان يمكن أفشل, أنا ضد المبدأ ده تماماً, اللي بيسرق ده إنسان ضعيف و معندوش حلم...مش هوقف طموحي عشانه.

الجميل بقى إن أحمد عاشور اللي إتكلمت معاه أنشأ يومها بالفعل المدونة إسمها يوميات مجهول و بجد فرحت جداً بالخطوة دي, دائماً بحس إني عايزه أشجع أي واحد بيكتب بصرف النظر عن معرفتي بموهبته لأنه لما هيكتب هينمي أي بوادر موهبه عنده و لأني كمان كنت بفتقد التشجيع على الكتابه....أنا هتابع أحمد و يا ريت اللي يحب يزوره و يتعرف على كتاباته واضح إنه موهوب و طموح.

كنت سعيده جداً بتواجدي معاكم في النهار القصير ده, كان نفسي أقعد أكتر, و كان نفسي أروح التبرع بالدم و أتعرف على نوران لكن معلش إن شاء الله تتعوض, و نفسي أروح قهوة البورصه اللي حكيتلي عليها فاتيما, و كنت عايزه أكمل مناقشه مع أستاذ إبراهيم و ماما زيزي عن موضوع (حب العشرة) , و كنت عايزه آكل و أشرب معاكم عشان يبقى عيش و ملح :)
 حاسه إني رغيت كتير بس بحب التفاصيل أنا :)

 و لسه في ناس كتير نفسي أشوفهم...أشوفكم جميعاً على خير إن شاء الله

و ده بوست كتبه أستاذ فاروق فهمي عن اللقاء....أشكرك أستاذي :)

خدعوني وقالوا إن هذا نوراً

بوست ماما زيزي....بوسة مني لحضرتك:)

بؤجة الحب..

هناك 33 تعليقًا:

Ramy يقول...

كويس أنكم قضيتوا وقت جميل فى الخير

و ان اليوم كان رائع بهدفه و الناس الرائعة اللى فيه

انا حظى وحش قوى المرة دى

معرفتش أفلفس من الشغل ((:

دايماً كده متجمعين للخير و ف الخير

Mona Abo - Elso3od يقول...

ايه الاحراج ده :)
انا اللي فعلا مبسوطة اني شفتك و الله و انتي سبب شجعني اروح انتي عارفة بحب اجري من الحاجات دي بسرعة
و يا رب نتقابل تاني علي خير
و كل بؤجة و انتي طيبة

ابراهيم رزق يقول...

بجد احنا اللى اتشرفنا و انا فوجئت انك بتعرفى نفسك مع انى انا فاتيما عارفينك فقلت باين عليكى مكسوفة شوية
فعلا الصحبة كانت جميلة و الكل كان مبسوط و مش عايز اتكلم عشان منساش حد لكن الجميع كانوا فى منتهى الذوق و الادب و الرقى
طبعا اتبرعنا بالدم و كلنا كشرى عند كشرى التحرير و فى اللى كل كبده عند ملك الكبدة شلة نوران و فاتيما و داليا
شفتى بقى الاكل بيبقى ايه
و قعدنا على البورصة فعلا اليوم كان جميل
يا ريت المرة القادمة يكون امن موجود على فكرة هيستفيد
تحياتى لكى و يارب نتجمع على الخير و يوم حفل توقيعك للكتاب

فاتيما يقول...

عينى يا عينى
فاتيما ايه بقى وبوستات ايه
انتوا غلبتونا و عديتوا السلك
وبقيتوا اساتذة اهو ...
:)))

انا عندى حالة سكتة معرفش ليه
وحاسة انى لو كتبت بوست هيكون غريب وطويل ومليان نتفاصيل وهيبقى مغموس بطعم شجنى وحزنى اللى بغالبه الأيام دى ...
واللى بالمناسبة اختفى وتلاشى وانا وسطكم امبارح بشكل مش غريب
لأنى دايما احس انى معاكم وسط اهلى
والناس اللى بتنسجم معانا بسرعة
بحسهم كدا يا شيرين
بحسهم اهلى
احنا ف التدوين اسرة كبيرة
بنبتدى جيران
والجيران بمرور العشرة والوقت بيبقوا اقرب من الاهل لأن احيان كتير بتفضفضى هنا بحاجات صعب تقوليها لاهلك عشان اعتبارات كتير ...
و بعد اكتر من تلات سنين اقدر اقولك ان التدوين الطيور فيه على اشكالها تقع
يعنى تلاقينا كلنا فينا من بعض
والعلاقات اللى بتدو بيننا
بيكون سببها اننا متشابهين رغم الأختلافات ...
والمراكبى لو تعرفيه قال تفسير رائع زمان على اللقاءات دى واعتقد انه حقيقى
اننا بنتجمع ف خير
مفيش مصالح بيننا
حتى التبرع والبؤجة مفيهوش منفعة شخصية لأى حد فينا ...
واللقاءات العادية بتبقى برضو هدفها خير اللهم الا الناس اللى نيتها وحشة ودول بينكشفوا بمرور الوقت وينطردوا بشياكة او ناس تحس انه انشغال عن حياتها العادية فتبعد ..
بس لو هتلاحضى وان شاء الله هتكونى جزء اصيل من دا ف المستقبل ...
اننا بنحرص على الأيام دى
لأننا عارفين انها خير و مفيهاش نفعية
والحمدلله وربنا مبارك فيها

شكرا ع البوست دا
انا فرحانة لأنى بشوفنا بعد كام سنة
بعيون جميلة ..واحنا حلوين كدا

انتى كمان انسانة مريحة يا شيرين
وبتدخلى القلب بسرعة
اظن سمعتى الجملة دى كتييييير
ومعتقدش انك هتستغربيها ...
:)

بالنوسبة لأحمد
انا بشكرك علبى تشجيعك ليه معايا
الكتابة متنفس و عصفور حر مش لازم ينحبس ومن الام بوست اللى نشرهم احمد انا مبسوطة جداااا ان عمل المدونة
واتوقع انها هتكون من المدونات المميزة ف وقت قياسى ان شاء الله

رأيك ف مونى بقى
لا تعليق
دا تقريبا نفس شعورى لما شوفتها اول مرة واللى زاد اكتر انى شوفت على وسلمى ربنا يخليهم ليها يا رب
ويبارك فيها

المرة الجاية تقعدوا اكتر يا بنات
ان شاء الله


تانى
شكرا ع البوست
وشكرا على مجييك
وشكرا على وجودك ف وسطنا يا شيرين

وتحياتى لزوجك العزيز
وسلامى ليه
لما شوفته يوم حفلة توقيع محمد غالية
حسيت انه شخص محترم ومميز
ويا ريت يبقى يشرفنا المرات الجاية


خالص حبى يا حبيبتى

فاتيما يقول...

آه

البورصة دى عندى
ان شاء الله المرة الجاية
هنقعد عليها كمطلب اول مخصوص
عشان خاطرك
:)))

سواح في ملك اللــــــــــــــــــه- يقول...

جزاكم كلكم ربكم حير يادكتورة

ابراهيم رزق يقول...

نسيت اقولك وجهة نظرى فى موضوع الحب و العشرة
الحب مثل الطقس احيانا بيكون حار و احيانا يكون بارد و احيانا يصل الى الصفر او مرحلة الجليد
لا يحمى الحياة الزوجية فى مرحلة الجليد و ينقذها من الموت بالبرودة الا العشرة
ربنا قال و جعلنا بينهم مودة و رحمة
فالمودة درجة اقل من الحب
و الرحمة صفة انسانية من انبل الصفات
عندما يجتمع المودة مع الرحمة تصبح عشرة
و اعتقد ان المودة و الرحمة تعلو فوق درجات الحب
اما الحب فمن يستطيع ان يحب حبا كبيرا
يستطيع ان يكره كرها صغيرا
و بعدين الجواز ايه غير شوية حاجات صغيرة فوق بعضها بتخلى الواحد يكلم نفسه
هههههههههههههه
ههههههههههههههههه

faroukfahmy58 يقول...

تفاصيل صغيرة عن البؤجة
د/شيرين اود ان اسميكى اميرة شيرين فقد اتفق رأيى وبناتى على ان مظهركى مظهر بنت من بنات الاصول الراقية المنبع والاصل والفصل الشامخ (حينما اقول بنت مش امرأة بصراحة كأنك لم تدخلى عش الزوجية من طلعتكى البكيرة )
تفاصيلك الصغيرة عن البؤجة فصلــــــت بنسيج المحبة والود والاخاء
اصبح كلامك ياشيرين شأنه شأن الاقراص المهدئة المخدرة نخشى من ادمانه ولا نقدر على حماية عيوننا من طللته
حبك لعمل الخير ومساعدة الآخرين من الشباب الموجودة غلب وتملك من نفسك صدق من قال السعادة فى اسعاد الغير
الفاروق

هبة فاروق يقول...

شرين سامى
اقول ايه بعد كلامك الجميل ده
بجد كلك ذوق ورقة وجمال وبعدين اذ كنت انا وكارولين شمس وقمر تبقى انتى السماء المنوره اللى بتضمهم
بجد يا شيرى انا سعدت بمعرفتك ولو اننا مقعدناش كفايه مع بعض اتمنى المقابله الجايه تكون اطول واعمق
وسعيده جدا بالتعرف على منى ابو السعود وفاتيما بجد ناس جميله وصحبه رائعه
وكلمه كنت عايزه اقولهالك لما شوفتك انك نجمه من نجوم عالم التدوين
تحياتى لارق شيرى

وجع البنفسج يقول...

يا بختك يا شيرين .. والله انا كمان نفسي اشوف كل اللي شفتيهم بصراحة .. حسيت باحساسك الجميل لما شاركت في الندوة عبر سكايب .. تخيلي بقى لو شفنا بعض كده وجها لوجه .. ياااااااه مشهد اكيد راح يكون مؤثر جدا ..

كويس انك كتبتي عن البؤجة والله حاجة تشرف بصراحة .. ربنا يقدركم على فعل الخير دائما ..

بالنسبة لاحمد عاشور ان شاء الله لنا زيارة تشجيعية لمدونته ..

بالنسبة لقصة السرقة بقى .. انا معاك في كلامك .. مش لازم احنا للي نخاف من السارق المفروض انه السارق هو اللي يخاف .. كلماتك في محلها ..

ربنا يوفق الجميع يارب ..

Ahmed demo يقول...

بجد شكراً ليكي جداً ده كان شرف ليا انا اولاً اني اتعرف علي كل اللى كانو موجودين :) وعموماً الحمدلله فكرة المدونة دخلت دماغي وبدأت اكتب فيها ..

zizi يقول...

ابنتي الغالية شيرين ..عندما ذهبت لبؤجة الخير ماكان يهمني اين اضع اشيائي بقدر ما همني مع من سوف التقي فالجوامع حولنا كثيرة ورسالة يمكن استدعاء مندوبيها بالتليفون ..ولكنها هي في الحقيقة صحبة الخير التي الحت علي في الحضور فحضرت واسعدتموني جميعاً بهذا اللقاء
أما عنك فلن استطيع أن اصف ما وجدته فيكي من براءة وعيون تشع بالرقة والصدق وأما الآخرون فلسوف انتقل حالاً لمدونتي لأعطي كل ذي حقٍ حقه من الوصف ..ولي أمل أن التقي معكم في لقاءات أخرى لكي نستكمل في استفاضة ماقد بدأناه بالأمس ..تحياتي وشكري

yosef يقول...

شيرين

مساء الخير
والله يعطيكم الف عافية ويجزيكم كل الخير

والله نفسي كنت اكون معكم ...ولو كنت اعرف ان المجموعة التي اعرفها هنا واحبها كانت موجودة لما تأخرت لحظة رغم انه كان يوم سفري من مصر وعودتي الى هنا

على كلٍ الايام كفيلة بان توطد علاقات الاخوة والاخوات ويكون نموذج لقاؤكم مثلا يحتذى

دمتِ ودام كل اصدقاؤنا وصديقاتنا في مصر بكل الخير
وعلى الخير ان شاء الله نلقاكم دائماً

شيرين سامي يقول...

Ramy: شكراً يا رامي و تتعوض أكيد المره الجايه و إن شاء الله ظروفك تكون أحسن و تكون معانا.
نورتني :)

شيرين سامي يقول...

Mona Abo - Elso3od : مفيش إحراج و لا حاجه يا منى إن شاء الله نتقابل دائماً على خير و نقضي وقت أطول و أجمل...بوسيلي كتاكيتك :)

و كل بؤجه و إنت بألف خير

شيرين سامي يقول...

ابراهيم رزق : أستاذي بجد أنا اللي إتشرفت إني كنت معاكم و كان نفسي أكمل اليوم لولا ظروف زوجية قهريه :)
إن شاء الله هجيب آمن في يوم هيتبسط أوي و لو إنه بيتكسف شوية زي حالاتي:)

كشري أو كبده أمممممم أختار بيتزا ينفع :)

إن شاء الله نتجمع على خير و تنوروني يوم حفلة التوقيع بإذن الله

شيرين سامي يقول...

فاتيما : روح قلب الملايكة على رأي أستاذ إبراهيم :)
غلبنا مين يا فندم و هل يخفى القمر :)

مش عارفه أقول إيه بعد كلامك بجد يا فاتيما زي ما قلتي كنا جيران و بالوقت بنبقى أهل و غاية أملي إني ماكونش من الناس اللي بياخدها الإنشغال لأن ساعات كتير النداهه بتندهني :)
أجمل حاجه في التجمعات إنها مش بس لقاءات و كلام لكن وراها هدف خيري بيسمو بأرواحنا و يخلينا نحس إننا هنا عشان إنسانيتنا بس عشان الجزء العطلان بتاع العطاء يشتغل و ينتج شوية...حبيت كمان كل حوار جانبي أو عام كل كلمة كانت حكاية بجد.

أنا اللي بشكرك إنك كنت سبب بمعرفتي بالتجمعات دي و سبب لحبي للتدوين.
سلامك لزوجي هيوصل أكيد شكراً كتير :)
هو صحيح مالوش في التدوين أو الكتابة أو القراءة...و إنت عارفه إنه كان زهقان و بيسأل على معاد الماتش يوم حفلة التوقيع بس يمكن ده اللي بيميزه إنه بيجي على نفسه عشان خاطري :)

أرق تحية لأجمل فاتيما لما بتيجي بجد المدونة بتنور و تزهر كمان
:)

شيرين سامي يقول...

فاتميا : يا ريت نفسي أروحها بجد بإذن الله نتقابل هناك في يوم :)

ربنا يخليكي يا جميل

شيرين سامي يقول...

سواح في ملك الله : جزانا و إياكم يا خالد شكراً جزيلاً ليك :)

FAW يقول...

جميل قوي لقاء المدونين , والأجمل لما يكون في الخير

بحسدكو بجد علي المشاعر دي , ملناش نصيب بقي :)

أنا برضو زيك مبحبش أخاف من موضوع السرقة , أنا شايف إن اللي بيخاف هو أكتر واحد بيتسرق , اللي يخاف من العفريت يطلعله الظاهر :)

تحياتي يا دكتورة . .

شيرين سامي يقول...

إبراهيم رزق :
تصدق أقنعتني :) أنا بس مبحبش حياة تقوم بدافع حب العشره...يعني لازم يكون فيه تجديد و جنون و شوية لا معقوليات و رشة مفاجآت عشان تفضل الأشواق و المشاعر ملتهبه.
الحب يتشاف و يتحس و يتقال...مينفعش يتشاف بس و ميرضينيش إنه يتحس بس و لا هصدقه لو إتقال بس...أما الموده و الرحمة هما أكيد العمدان الأساسية لإستمرار الحب و الحياة.

سعيده بمناقشتك و حلوه النهاية :)

شيرين سامي يقول...

faroukfahmy58: طب أقول إيه بعد الكلام الحلو ده...أحرجتني بجد :)
أشكرك جداً أستاذي العزيز كتير عليه الكلام الحلوه ده...أميره مره واحده:)...لكن تعرف ملاحظتك في محلها فعلاً كل الناس بتتخدع في عمري و أمومتي و بيفتكروني بنت لسه في الجامعه :)
أنا تشرفت جداً بمعرفة حضرتك و بناتك المبدعات و مش هقولك بطل إدمان لأن إدمان مدونتي من النوع اللي مش بيضُر :)
نورتني و سعيده جداً جداً بتعليق حضرتك الرائع
كل التقدير و الإحترام لك

شيرين سامي يقول...

هبة فاروق: يا خبر يا هبه بجد كتير عليه و الله إنت إنسانه مجامله و رقيقه...رقة فنانه زي ما باباكي قال:)
أنا إذا كنت نجمه في سماء التدوين بإنتوا اللي إديتنوني الإحساس ده بكلامكم و تشجيعكم و أكيدكلنا نجوم ساطعه بكتابتنا و بنسعد بعض :)

سعيده جداً بالصحبة الرائعه و بتعليقك الدافي و أتمنى يتكرر اللقاء و يكون أطول.
أرق تحية لكي

شيرين سامي يقول...

وجع البنفسج :
كان لقاء رغم قصرة مؤثر فعلاً بس للأسف فاتني تجمع المائة تدوينه بجد زعلت جداً و بتمنى يتكرر و تكوني معانا بإذن الله...عزائي الوحيد هو إن تجمعنا كان فيه خير أتمنى إن ربنا يتقبله.

سعيده إنك وافقتيني الرأي في موضوع السرقه و مفيش حاجه ممكن توقف مشاعر عايزه تظهر على الورق.

نورتيني و أسعدتيني بزيارتك
تحياتي و كل الود لكي

شيرين سامي يقول...

Ahmed demo: ربنا يوفقك يا أحمد و إنت موهوب بالفعل هحاول أتواجد عندك بإستمرار و سامحني لو قصرت بجد وقتي ضيق جداً.

متوفق دائماً و أهلاً بيك صاحب بيت في البلوجر :)

شيرين سامي يقول...

zizi: ماما زيزي إنت كنت نوارة اللقاء و عيونك عشان طيبة بتشوف كل شئ جميل :)
أشكرك جداً على كلامك الحلو ده و البوست الأجمل و يا رب دائماً منوراني.
أتمنى تجمعنا لقاءات كتير تانيه و تكون أطول عشان نقدر نتناقش براحتنا...قصتك الصغيره عن الزوجه التي إحتمت بزوجها كانت راااائعه :)

أرق تحية لأجمل أم

شيرين سامي يقول...

yosef: أستاذي العزيز مساء الفُل :)
ألف حمد لله على السلامه و أرجو أن تكون إستجممت و سعدت بزيارتك القصيره في مدتها عميقه في محتواها لأم الدنيا :)
أشكرك جداً و جازانا الله خيراً و إياكم بتمنى نتقابل في تجمع آخر و أكيد هتشرفني جداً معرفة حضرتك.

لك مني كل الإحترام و التقدير

شيرين سامي يقول...

FAW : كان جميل رغم قصره يا مصطفى هننتظرك تكون معانا في اللقاء الجاي إن شاء الله .
اللي بيخاف من العفريت بيستقصده مظبوط :)
نورتني و تحياتي ليك

أبو حميد يقول...

متجمعين دايما فى الخير
باقى اليوم كمان كان تحفة
حاجة على جنب كده... عايزين نكتب تانى فى ليالى مصرية

نيسان يقول...

حلو كتير ....

لكن عندي سؤال صغير....انتوا ليه سميتوها "بؤجة الجمعه"؟؟؟

كان لازم تسموها
جمعة الفرح باللمه الحلوه
جمعة الانتعاش بعد اللقاء
جمعة التعارف المشرف
جمعة هنيالكم يا بختكم :))

يا رب يكتر الجمعات الحلوه ويزيد المحبه والود

والشكر لكِ شيرين لتعريفنا بالمدون الجديد احمد.

شيرين سامي يقول...

أبو حميد :كويس إنكن إتبسطتم و خساره كان نفسي أكون معاكم بجد...إن شاء الله تتعوض.
ياريت نرجع تاني نكتب في الليالي..أنا أساساً إستغربت لما قلتلي إنها وقفت عشان الثوره...ما هي كل حاجه ماشيه عادي إشمعنا يعني اليالي المصريه :)

تحياتي ليك

شيرين سامي يقول...

نيسان : نيسانه الجميله شكراً على مشاعرك الحلوه و بالفعل اللقاء كان مؤثر رغم قصره..بتمنى كمان أشوفك و نتجمع دائماً في الخير :)

نورتيني يا نيسانه و ألف شكر

تحياتي الخالصه لكي

Days and Nights يقول...

الأخت الغالية والعزيزة / شيرين

كل عام وأنتى بألف خير

حبيت أطمئن عليكى

دمتى بكل الود

أخوك / تامر