الثلاثاء، 8 نوفمبر، 2011

ما بعد الخروف...


في مره من المرات النادره كان عندي مزاج و قررت إني أوضب الدولاب, و إتفاجئت إن عندي كمية لبس مالهاش أي لازمة, و لبس أطفال و شنط و أحذية...يعني كميات من الأشياء الغير مفيده تماماً بالنسبة لي لكن لغيري هي تساوي كتير, طب إحنا ليه بنعمل كده...ليه بنحب الكركبة و تحويش أي شئ حتى لو متأكدين إن عمرنا ما هنستعمله...هل مثلاً عندنا أمل إنه يرجع جديد أو يرجع موضه أو يرجع مقاسنا, طب مش غيرنا أولى..كام مره في اليوم بنشوف في الشارع ناس ماشين بلبس مقطع و متبهدل, كام مره بنشوف ناس لابسين صيفي في عز الشتا, طب كام مره بنشوف أطفال غلابه لابسين لبس كبير عليهم.

طب دول اللي بنشوفهم لكن يا ترى فكرنا البيوت البسيطه ممكن يكون بيحصل فيها إيه...ممكن يكونوا بيستعملوا كام قطعة ملابس, و لمدة قد إيه, و كام مره بيرفوها أو يرقعوها عشان تمشي الحال, و إحنا بنتبتر على لبسنا و نحوشه بمنتهى الأنانيه في سبيل يوم عمره ما هيجي و نحتاج فيه اللي شايلينه, مش هقولك فين الإنسانيه أو فين قيمة الإيثار...يمكن تكون بتتنسي في وسط الزحمة...لكن في الزمن اللي بناخد فيه سيئات مع كل نفس بنتنفسه...مش أولى بينا إننا نلم حسنات و ناخد ثواب هيقعدلنا ليوم الدين...بمنتهى البساطه...تخيل الفرحة اللي هتدخل على قلب إنسان غلبان لما ياخد لبس ليه أو لولاده...تخيل دعوته ليك من قلب صادق بجد.

خطوات بسيطه جداً...إفتح دولابك وطلع أي قطعه متلبستش بقالها سنة...وفتش في شنطك و أحذيتك طلع كل شئ مستعملتهوش من سنة...جمعهم في شنطة جهزهم يوم 11/11 الساعة 10 الصبح , إركب المترو خط حلوان و تعالى على محطة الزهراء...و هناك هتلاقي المدونين الحلوين الجدعان جداً أصحاب القلوب الطيبة جداً في العنوان ده : جمعية صحبة خير  مسجد زهراء مصر القديمة 20شارع أحمد خيرى فوق كافيتريا السرايا...و تبقى شاركت في حملة البؤجه أولاً.

بعديها هيكون في تبرع بالدم  إختياري طبعاً في المصل و اللقاح في الدقي  الساعة 2 ظهراً في حملة نوران الشاملي.

التفاصيل و أرقام التليفونات للضروره موجوده عند فاتيما روح قلب ماما هنا

و متنساش إن الدال على الخير كفاعله...بس إوعوا كلنا ندل و محدش يفعل :)

الصورة من مدونة فاتيما مالقتش أنسب منها

هناك 15 تعليقًا:

سواح في ملك اللــــــــــــــــــه- يقول...

حسنا فعلتي

الدال علي الخير كفاعله

تحيتي يادكتورة

نـوران الـشـامـلـي يقول...

شكرا يا شيرين على نشر الدعوة

جزاكي الله خيرا يا حبيبتي


كل سنة وانتي طيبة
واتمنى انى اتشرف بمعرفتك و رؤيتك يوم الجمعة ان شاء الله


شكرا ليكي

سلام
اختك نورا

reemaas يقول...

احنا بنعمل ده عندنا فى فرع رساله اللى هنا

فعلا بيدخل فرحة مابعدها فرحة على المحتاجين لده

ربنا يعينا كلنا على فعل الخير

ابراهيم رزق يقول...

ما بعد الخروف
انا اتخدعت يا جدعان العنوان ده خدعنى
انا حضرت نفسى و قلت شرين سامى هتخش (المعمل) من تانى قصدى المطبخ و (هتحضر) قصدى هتطبخ و هتقولنا طريقة عمل فتة الحمص نظرا لبعض اصولها الشامية او حتى الفتة المصرية او اسرع طريقة لتفاعل الموزة مع الرز بالشعرية
او ستقول لنا افضل طريقة و افضل علاج بعد كثرة تناول اللحوم و الضان او ستقول لنا على نوع فوار
لكنها خدعة جميلة عندك حق يا شرين لست ادرى ما هو سر تمسك المصريين باشيائهم القديمة و السر انها من الذكريات
مش عارف لبس طفل صغير ذكرى لماذا
عجلة طفل لم تعد تناسب عمره ذكرى لماذا
و هكذا و هكذا
ربنا يجازيكوا كلكم خير الجزاء
اسيبكم بقى بخير و اروح اشوف هنأكل ايه النهاردة
كل سنة و انتى طيبة

هديل يقول...

ربنا يجزيك خير و يجعله في ميزان حسناتك يارب .. كل عام و انتي بخير :)

فاتيما يقول...

:)

ميرسى ع البوست يا شيرين

حلو
ورقيق
وطيب زى عيونك


ان شاء الله اشوفك على ألف خير
يوم الجمعة انتى وبؤجتك ...

الصورة والبوست وكل المدونة تحت امرك
انتى كاتبه ف وقت مناسب جدا
عشان تفكرى اللى ناسى
او اللى مقراش البوستات التانية
وربنا يجعله
ف ميزان حسناتك ان شاء الله

بوسيلى العيال
والحضونة تاخديها لما اشوفك

:)

eng_semsem يقول...

ربنا يجازيكم خير وان شاء الله يكون يوم جميل كله خير
تحياتي

دعاء العطار يقول...

ممكن لانها بترتبط عندهم بذكريات .. بس ذكريات ولا ثواب عند ربنا .. اكيد الثواب :)

انا للاسف مش هعرف اشارك معاكم لانى مش من كايرو بس احنا عندنا جمعية رساله فى طنطا وبتعمل الحكايه دى دايماً ان شاء الله اشارك معاهم

جزاكى الله كل خير ع البوست ده ياشيرين :)

شيرين سامي يقول...

سواح في ملك الله: متشكره أوي يا خالد
تحياتي الخالصه لك.

****************

نوران الشاملي: متشكره أوي يا نورا بجد زيارتك بتنور المدونة.
كل سنة و إنت طيبة و بألف خير و هنا :)
أنا كمان يشرفني و يسعدني جداً إني أتعرف عليكي.

مفيش شكر على واجب

نورتيني و أرق تحية ليكي

*******************

reemaas: جزاكي الله خيراً يا نور و ربنا يقدرنا فعلاً.
تحياتي الخالصه ليكي


*******************

إبراهيم رزق: هههههههه أكيد حضرتك علقت قبل الغدا على طووول بصراحه أنا آخر واحده تاخد منها وصفة طبخ..ماليش فيه أوي...الحمد لله أكلي حلو بشهادة الناس بس للأسف مش مبتكره أوي مش مبدعه فيه.
أما الدوا فأنا تحت أمركم أي حد (وبيحصل كتير على الفيس) عايز يسألني يتفضل بس هسأل زوجي لأنه اشطر بصراحه :)
عن نفسي في حاجات من لبس الولاد أكيد هحتفظ بيها بس مش كل حاجه طبعاً.
ربنا يخليك يا أستاذي و كل سنة و إنت بألف خير و سعاده.

شيرين سامي يقول...

هديل: متشكره أوي على الدعوه الحلوه دي كل سنة و إنت بألف خير :)

****************

فاتيما: :)
لا ميرسي على واجب و بعدين مش تقولي إنك جايه عشان أفرش المدونة ورد و ياسمين :)

الحمد لله الوقت مناسب فعلاً و ربنا يسهل و اشوفك يوميها أنا عندي بؤج كتير مش بؤجه واحده.
ربنا يخليكي يا فاتيما و البوسات أكيد وصلت و الحضونات مستنينها :)

نورتيني يا حبيبتي

****************

eng_semsem: متشكره يا أسامه و كلك ذوق :)

****************

دعاء العطار: ربنا يخليكي يا حبيبتي و يقدرك على فعل الخير و أكيد الثواب أفضل و أبقى من الذكريات..خصوصاً إننا ممكن نجتفظ بالحاجات العزيزه أوي بس معظم الحاجات بتبقى عاده مش أكتر.

تحياتي ليكي نورتيني يا دودو

Carol يقول...

دعوة نبيلة و قيمة
:)
و مصر فيها كتير ناس محتاجة
محناجة لأشياء كثير قوي الملابس و الاكل و العلاج و الاهتمام و النظافة و التعليم ......
بس حلو نبتدي بخطوة
و يا رب نلاقي ناس تبتدي بالدعوة الأولى
تحياتي لك و لمجهودك القيم

AHMED SAMIR يقول...

بداية احب اقول لك...
كلنا هذا الرجل
كلنا دواليبنا مليانة كراكيب و لا نكتشف وجود هذه الكراكيب الا لما يجي لنا صحوة ضمير و نقرر نرتب الدولاب بعد ان يصل حاله لدرجة البؤس و لدرجة انك مش عارفة تطلعي اي حاجة انتي عايزاها من وسط هذا الكم من الهدوم...!!
عموما هي فكرة رائعة
و احب اضيف عليها ان حتى اللي ظروفه مش هتسعفه انه ييجي للقاء المدونين او بؤجة الخير
يعمل كدة هو بنفسه في منطقته...في محيطه و اكيد ناس كتير قوي هيستفيدوا
تحياتي

Ms Venus يقول...

ربنا يقدر الجميع دايما على فعل الخير


دمتى جميلة يا شيرى

mostafa gazar يقول...

جزاكم الله خيرا كثيرا ويارب الروح دى تكون موجوده فى كل مكان .التكافل من أساسيات المجتمع المثالى

faroukfahmy58 يقول...

للمرة الثانية ادخل بتعليقى على مدونتك ياشيرين ولا يظهر التعليق ، ماسبب عدم ظهورى عليك وما سبب عدم ظهور تعليقكك ويظهر تحت مسمى غير معروف عموما سوف اصل عليك تخت غير معروف
الفاروق