سؤال

مبهورة بيك أنا

مفتونة من سنة

و بعبّر عن عواطفي بمجرد دندنة

دندنتي في السهر

و على ضي القمر

تسافر ويّا نجمة توصل كل البشر

بيني و بينك صحاري

وديان جبال براري

لكن رمشي و رمشك إتجدلوا في العصاري

مش حاسس بيّه لكن....

أنا حاسه بيك أوي

و بروح و يّاك أماكن ف خيالي المنطوي 

لُقانا مستحيل

و لافيش عندي البديل

غير إني أفضل أدندن لحن و يكون أصيل

بقابلك في الخيال

و بسألك سؤال

إمتى عيوني و عيونك ينتصروا علــ مُحال

أغنية لإيمان يونس ,فرقة المصريين , قديمة جداً و أنا ساعتها كنت صغيره جداً و برغم صغر سني و مفهومي البرئ عن الحب و المشاعر, لكن الأغنية دي كانت زي السحر بالنسبة لي, حفظتها يمكن من أول مره أسمعها و مسمعتهاش غير مرات قليله جداً و مع ذلك فضلت معايا, في صندوقي اللي جوايا اللي بخبي فيه حاجات صغيره لكن تأثيرها كبير عليّه...حاجات محدش يفهمها غيري و محدش يحسّها زيي.

يمكن إفتكرتها الفترة اللي فاتت لما كنت بمارس أكتر حاجه بحبها, و هي تمشيتي على الشط و الزبد الأبيض بيغطي أقدامي, لقيتني بدندنها و بدأت أفتكر قد إيه أثّرت فيّه و شكّلت خيالي , لدرجة إني تصورت إن الحب هو البُعد , و إن كل ما كانت الحكاية أصعب كل ما كانت أقوى و أجمل, الأغنية إدتني مساحة من الخيال و كانت بداية أحلام اليقظه بالنسبة لي و غرقي بين وقت و التاني في دنيا تانية بتاعتي أنا بس, و كبرت و فضل السؤال, ليه بنغفل عن حب  ممكن نلاقيه قريب مننا و نفضل نفكّر في حب بعيد مستحيل و كأننا بنتفنن في تعذيب روحنا.