الأحد، 14 أغسطس، 2011

سؤال


مبهورة بيك أنا
مفتونة من سنة
و بعبّر عن عواطفي بمجرد دندنة

دندنتي في السهر
و على ضي القمر
تسافر ويّا نجمة توصل كل البشر

بيني و بينك صحاري
وديان جبال براري
لكن رمشي و رمشك إتجدلوا في العصاري
مش حاسس بيّه لكن....
أنا حاسه بيك أوي
و بروح و يّاك أماكن ف خيالي المنطوي 

لُقانا مستحيل
و لافيش عندي البديل
غير إني أفضل أدندن لحن و يكون أصيل

بقابلك في الخيال
و بسألك سؤال
إمتى عيوني و عيونك ينتصروا علــ مُحال


أغنية لإيمان يونس ,فرقة المصريين , قديمة جداً و أنا ساعتها كنت صغيره جداً و برغم صغر سني و مفهومي البرئ عن الحب و المشاعر, لكن الأغنية دي كانت زي السحر بالنسبة لي, حفظتها يمكن من أول مره أسمعها و مسمعتهاش غير مرات قليله جداً و مع ذلك فضلت معايا, في صندوقي اللي جوايا اللي بخبي فيه حاجات صغيره لكن تأثيرها كبير عليّه...حاجات محدش يفهمها غيري و محدش يحسّها زيي.

يمكن إفتكرتها الفترة اللي فاتت لما كنت بمارس أكتر حاجه بحبها, و هي تمشيتي على الشط و الزبد الأبيض بيغطي أقدامي, لقيتني بدندنها و بدأت أفتكر قد إيه أثّرت فيّه و شكّلت خيالي , لدرجة إني تصورت إن الحب هو البُعد , و إن كل ما كانت الحكاية أصعب كل ما كانت أقوى و أجمل, الأغنية إدتني مساحة من الخيال و كانت بداية أحلام اليقظه بالنسبة لي و غرقي بين وقت و التاني في دنيا تانية بتاعتي أنا بس, و كبرت و فضل السؤال, ليه بنغفل عن حب  ممكن نلاقيه قريب مننا و نفضل نفكّر في حب بعيد مستحيل و كأننا بنتفنن في تعذيب روحنا.

هناك 41 تعليقًا:

Casper يقول...

اغنية جميلة

تحياتي

ياسمين يقول...

ببساطة ياشيري إحنا بنحب الحاجات الصعبة البعيدة..مع ان القريب بيبقي جبنبنا بس هتقولي ايه ف طبع البشر!!

شيرين سامي يقول...

كاسبر: لو سمعتها كمان هتلاقيها أجمل
تحياتي ليك

شيرين سامي يقول...

ياسمين: ما هو طبع البر ده اللي هيجنني.
تحياتي ليكي يا جميل
نورتيني

Noha Saleh يقول...

انا معرفش الاغنية دى بس عاوزة عاوزة اقول ان كل واحد فينا فى اغنية لها اثر فى حياته

اما بخصوص الاجابة عن سؤالك فعاوزة اقولك ان البشر بطبيعتهم بيحبوا الحاجة المستحيلة عليهم وممكن لو طالوها ينسوها او ماتبقاش مهمة بالنسبة لهم
يعنى بيبقى احيانا مجرد تحدى وحب امتلاك

شيرين سامي يقول...

نهى صالح: و لو إنه تفسير قاسي بس فيه جزء صحيح أوي, إن الحاجه لما بتبقى ملكنا مبنحسش بقيمتها زي ما بتكون بعيده...بس في حاجه تانيه يا نهى يمكن نوع من السحر في البُعد بيخلي القلب أضعف...مش عارفه.

نورتيني يا جميل :)

مدونة رحلة حياه يقول...

السلام عليكم
وتبقى الذكريات تعيش داخلنا مختبئة فى اعماق ذاتنا
ولكل منا ما يحتفظ به داخله
جميلة الاغنية وواقعى السؤال

شمس النهار يقول...

الحب هو البعد

والاصعب هو الاجمد
ليه بنغفل عن حب قريب
ونفكر ونتمسك بحب بعيد
التفنن في تعذيب النفس
؟؟؟؟؟؟؟

كل دي مسائل معقدة
وماحدش لقلها اجابات حتي الان

حتي عبد الوهاب قال بفكر في اللي ناسيني

تفتكري النفس البشرية امتي هتتعدل
وتروح للسهل وتيسر علي نفسها السعادة
بوست جميل

Bent Men ElZaman Da !! يقول...

اول مره اعرفها الاغنيه دى
كلامها تحفه
ان شاء الله اسمعها
ميرسى يا شيرين :)

سندباد يقول...

ده السؤال الغامض اللي مش بنقدر نجاوب عليه مهما سالنا نفسنا او حد سالنا ليه بنفرط في مشاعر قريبة مننا وممكن نعيش معاه اسعد اوقاتنا وندور علي مشاعر بعيدة بتعذبنا وفي بعض الاحيان بتهينا نفسيا
سؤال صعبة الاجابة عليه يمكن عشان هو ده طبع النفس البشرية
تحياتي للبوست العميق ده

دعاء العطار يقول...

عشان ياشيرى احنا دايما مخلوقيين نبص للى مش فى ايدينا

حتى لو كان اللى فى ايدينا اجمل بكتييييييير من اللى نفسنا فيه

وممكن نكتشف ده بعد فوات الاوااان

ع فكره انا كمان فيه حاجات صغيوره بتاثر فيا اوى بالسلب وبالايجاب

(:

وحشتنى كتاباتك (: (:

زهرة يقول...

الله يا شيرين

جميله الاغنيه دى ..

فيه اغانى معينه بتفكرنا بذكرى مرينا بيها . ولما بنسمعها بنضحك من جوا قلبنا ..

وساعات بردوا بنضحك بس علشان منعيطش .. لإننا للاسف مبنبقاش عايزين نفتكر .. وبنزعل لو حاجة فكرتنا

تحياتى :)

مصطفى سيف يقول...

ماحنا لو عرفنا للسؤال ده اجابة كنا فهمنا انفسنا من زمان وارتحنا :)
الاغنية جميلة والبوست رائع
تحياتي

ابراهيم رزق يقول...

جميلة الاغنية يا شرين بس انا مستغرب لان سنك كان صغير قوى ساعتها

تعرفى من حوالى شهرين كانت فرقة المصريين فى ساقية الصاوى و غنت الاغنية دى و اغانيها الروعة بتاعة صلاح جاهين زى متحسبوش و ماشية السنيورة المفاجاة ان اللى غنتهم ايمان يونس

تحياتى

سواح في ملك اللــــــــــــــــــه- يقول...

لكل مننا حلم يظل يبحث عنه الي ان تنتهي حياته

وقد يكون حلمه بجواره وتحت يديه

ولايستمتع به لانه لايراه و يبحث عنه

في مكان اخر

تحيتي يادكتورة

وحمد الله علي السلامة

Timo.. يقول...

اللللله.
ده اول انطباع عن كلمات الاغنية البسيطة قوي اللي بتدخل القلب على طول..
عارفة انا معنديش ريدر ليه ياشيرين..؟؟
علشان ادخل عند الناس بطريقة عشوائية واقيم اللي بيكتبوه ولو مش عجبني مش باعلق..
والغريبة اني باجي عندك وباكون مبسوط باللي بتكتبيه جدا ومفيش مرة بامشي من غير ما اعلق..

انت حدوتة حلوة..
حدوتة مصرية :)

reemaas يقول...

اول مرة اسمعها بس لاقتنى بحاول اتخيل لحنها علشان ادندنها

:)

zizi يقول...

اغنية حلوة ياشيري ..بس فعلاً على رأي ابراهيم انت كنت صغيرة قوي وقتها..بس اقولك حاجة مش عارفة ليه فعلاًالحب دايماً مقرون بالهجر والفراق والشحتفة وبعد رمضان "عشان اكون خلصت اللي في ايدي احسن تفتكروا اللي حاكتبه ما ينفعش يتكتب في رمضان"ان شاء الله حاكتب حتة كده حاتعجبك ان شاء الله

ابراهيم رزق يقول...

معلش يا شرين تكلمت عن الاغنية و نسيت اتكلم عن البوست عمنا جاهين بيقول
اهوى الهوى و همس الهوى فى العيون
و بسمة المغرم و دمعه الحنون
و زلازلات الحب نهد الصبا
اكون انا المحبوب او لا اكون
عجبى ؟؟؟

هذا هو السؤال الذى طرحه عمنا جاهين و انتى ايضا تطرحيه و لكن الاجابة بسيطة انه الحب الذى لا يخضع غالبا الى المنطق و الى العقل و لو خضع لفقد بريقه و تحول الى شىء مادى يباع و يشترى و يوضع فى واجهة الفتارين
لكنه الحب الذى كثيرا ما نصف من وقعوا به بانهم مجانين
اسف على الاطالة و اسف على التعليق الثانى
تحياتى

Just Me يقول...

عَـذبُ الـكَـلام

FAW يقول...

أنا أعرف الفرقة , بس معرفش أساميهم ولا فاكرلهم حاجة بصراحة :))

بس فعلا فيه أماكن بتفركنا بأغاني وأغاني بتفكرنا بأماكن

أنا بالنسبة لي العجمي يعني منير , ومنير يعني العجمي :)

شيرين سامي يقول...

مدونة رحلة الحياة: الأجمل زيارتك أشكرك شكراً جزيلاً.
تحياتي و كل التقدير لك

شيرين سامي يقول...

شمس النهار: مبسوطه إن حضرتك حسيتي البوست بالشكل الجميل ده و أغنية عبد الوهاب بردو من الحاجات اللي أثرت فيه أوي و خلت في دماغي مية سؤال و سؤال...دون إجابه.

سعيده بتفاعل حضرتك مع البوست و أتمنى أكون دائماً عند حسن ظنك
:)

شيرين سامي يقول...

Bent Men ElZaman Da !!: أنا اللي بشكرك على زيارتك الحلوه دي.
نورتيني يا جميل :)

شيرين سامي يقول...

سندباد: أولاً كلامك صح جداً و مُحير جداً يعني يأستني إني ألاقي إجابة:)
ثانياً البوست مش عميق و لا حاجه بالعكس يمكن تافه كنت متردده إني أنشره بس ردة فعلكم فجأتني.

شكراً سندباد تحياتي و إحترامي ليك

شيرين سامي يقول...

دعاء العطار: إنت كمان وحشتيني أوي :)
بصي هو مش حكاية عدم قناعة بس في حاجة تانية زي سحر الخيال بتخلي الشئ المستحيل له بريق خاص...مش عارفه بصراحه..يمكن

مبسوطه إننا بنشبه بعض فحاجات شرف ليه أكيد :)
أرق تحية لكي

شيرين سامي يقول...

زهرة: يا سلام يا زهرة كتبت كلمة جميله أويييي (بنضحك عشان منعيطش)...:(
نورتيني و أسعدتيني بالزيارة و التعليق الحلو ده

تحياتي و كل الود لكي

شيرين سامي يقول...

مصطفى سيف: هقول إيه عندك حق :)
زيارتك هي الأروع
كل التقدير لك

شيرين سامي يقول...

إبراهيم رزق: هو أنا أولاً مش صغيره أوي يعني...يمكن مبحبش أول سني لأنه مش معبر عني :)...ثانياً الشريط كان بتاع مامتي فعلاً و أنا مسمعتهاش أول ما طلعت..بعدها أكيد..أغنية ظهرت فجأه في حياتي و إختفت فجأه بس فضلت جوايا.
فرحتني إنها لسه بتغني و الأغنية دي بالذات...نفسي أحضر حفلة زي كده بس للأسف صعب لأسباب كتير :(

تحية مؤقته و نستأنف في التعليق التاني :)

شيرين سامي يقول...

سواح في ملك الله: الله يسلمك يا خالد شكراً ليك...كلامك حكمة جميله يا ريت الناس تستفيد منها.

تحياتي الخالصه لك

شيرين سامي يقول...

Timo: الله على تعليقك إنت بجد أسعدني جداً...مبسوطه إن الأغنية عجبتك و وصلتك و طريقتك في التقييم العشوائي عجبتني أوي و شرفني طبعاً إن كتاباتي بتعجبك يا رب دائماً :)

المدونة جميله بيكم
شكراً مره تانيه و نورت الحدوته :)

شيرين سامي يقول...

remmass: لحنها حلو أوي على فكره
نورتيني يا جميل :)

شيرين سامي يقول...

zizi: أنا فعلاً سمعتها متأخر في شريط قديم كان عندنا...هستنى الحتة الجامده دي على نار و ربنا يتوب علينا بقى من الشحتفه :)

أرق تحية لكي

شيرين سامي يقول...

إبرايهم رزق: آسف على إيه يا استاذ إبراهيم م عارف إني بحب التعليقات الطويله بالذات تعليقات حضرتك اللي دائماً فيها أغنية حلوه أو كلمات جميله دائماً مبتدخلش بإيدك فاضيه :)

بجد بستمتع بتعليقات حضرتك جداً طول و علق تاني و تالت و لا يهمك...جميل جنون الحب بس أحياناً قاسي.

تحياتي و كل الإحترام لك

شيرين سامي يقول...

FAW: أنا كمان معرفهمش أوي بس الأغنية دي بحبها جداً...منير أمممممم حكاية يا مصطفى منير حكاية لما بسمعه بحس إنه بيغنيلي أنا :)
و بحب كل حاجه غناها حتى لو آهات

نورتني

Ms Venus يقول...

جميلة الاغنية والاجمل هو احساسك بيها


ليه بنحب المستحيل ؟

مش عارفة بس جايز لان المستحيل هو الخيال

والخيال دايما جميل

عكس الواقع

بنحب نعذب نفسنا فعلا


تحية ليكى يا شيرى

ريــــمــــاس يقول...

صباحك غاردينيا شيري
وماأجمل اغاني زمان
وذكرياتنا فكثيراً من الاغاني
كانت تشكل خيالنا :)
استمتعت هنا"
؛؛
؛
لروحك عبق الغاردينيا
reemaas

The illusionist يقول...

حلوه الاغنيه دى

اول مره اسمعها واول مره اعرف الفرقه

هبحث عنها

حَـبآيـۃْ.بـטּـدۉڷ يقول...

, لدرجة إني تصورت إن الحب هو البُعد , و إن كل ما كانت الحكاية أصعب كل ما كانت أقوى و أجمل
..
أنا أول مَرَّه اسمع الأغنيه دي على فكره
وعماله اعمل ريبلاي ريبلايْ ريبلاي :D
حَبِّيتها جداً خالص :)

..
كَلآمك حِلو أويْ يا شِيريينْ .. :)

شمس العصارى يقول...

تحية الى الماضى .... فهو اجمل ما فى حياتنا دائما
اخر فقرة بتفكرنى بمقولة جميلة وصعبة " من اسباب شقاء المرء ... ذهده فيمن يريدونه "

ديارا المصرى يقول...

بسم الله الرحمن الرحيم
الاجابة
عشان احنا بنى ءادميين ............بنحب دايما اللى مش لينا ^ـــ^