إنت مش بتاعة كل يوم..
مالك؟
إنت مش شيرين..
حد زعلك..حد ضايقك؟
إنطفيتي..
بقيتي شبه التماثيل..من غير روح..
بتتصرفي زي ما تكوني أداة..
مبتضحكيش بصوت عالي..
بتعيطي من غير سبب..
مبتبصيش قدامك و إنت ماشيه..
مبتوزعيش بونبون على صحابك..
مبتتكلميش..
إنت مش بتاعة كل يوم
*********
أول مره مبقاش خايفه من سيرة الموت
دائماً نفسي معجزش..يإما أفضل أحافظ على نفسي و شكلي
يا إما أموت قبل ما أعجز
أصل أنا نفسي أفضل أمشي بسرعه و ألبس جينز و مالبسش غامق..بكره الغوامق
نفسي ماكبرش..من جوايا على الأقل
*********
عايزه أعتذر لإنسان أذيته من غير ما أقصد و معرفش هيقرى و لا لأ و هيسامحني و لا لأ
********
معنديش ثقافة الفراق أنا
عمري ما قطعت علاقتي نهائي بحد
بتخانق و بزعل و بقفش..بس مبقاطعش
بختفي في لحظات الوداع
بكره النهايات
كنت بزعل لما أشوف إتنين سابوا بعض أو صحاب قطعوا مع بعض
مجربتهاش غير مع صديقة عمري و خدت وقت طويل عشان أتعافى
يعني إيه بعد ما كنا هنا أبقى هنا و هي هناك و هناك يبقى هنا و هنا هناك
و يعني إيه أروح نفس الأماكن لوحدي
و يعني إيه منسلمش على بعض
مالناش حتى حق السؤال عن بعض
و اللي هيتكلم هتبقى كرامته مهدوره
و يمكن ينجرح أكتر
*********
راضيه أكيد
هو عيب الواحد يكون عنده طموح
طب عيب الواحد يعمل الحاجه اللي نفسه فيها
طب عيب الواحد يدور على حاجات بسيطه تفرحه
طب عيب نيجي على نفسنا و نتغير
هو لازم نعيش في صراع؟
*********
مبعرفش أكتب كلمات منمقه
و لا بعلق بجمل أدبيه من العيار الثقيل
ما تقوليش بعد كده إني كاتبه
مبعرفش أنافق و مبحبش السهوكة
و مبحبش أدخل في حوارات طويله
بقول رأيي و خلاص
ما تقوليش بعد كده إني إجتماعيه
بيقولوا عني تنكة
و ساعات مغروره و عامله هانم
أنا بعتز بنفسي طبعاً..
لكن اللي يشوفني مغروره أكيد محاولش يتكلم معايا
بحس إني خمسمية حاجه مالهومش دعوه ببعض
حاجه منهم بتأذي من غير قصد
ما تقولش بعد كده إني هايله
**********
طول ما أنا بعيد عنها بفضل أفكر إني لو روحتلها و حضنتني أوي
هحس بأمان الدنيا و هنسى أي حاجه بتضايقني
و لما بروحلها...بسيبها و أقعد على النت
**********
اليوم العالمي للمرأة...
مش عارفه ليه المرأة لها يوم
زي يوم مرضى السكر
زي يوم غسيل الإدين
زي يوم مهرجان الزهور
المرأة قيمتها أعلى من كده
و اللي يقول المرأة خدت حقوقها يمشي قبل ما أخبطه بحاجه
**********
ليه البنات لما بيتقابلوا بيفضلوا يتكلموا في هيافات
و يشتكوا من أزواجهم
و عائلات أزواجهم
و مشاكل الشغل
و قرف العيال
و محلات الملابس اللي عامله خصم
عشان كده مبقتش أحب أخرج معاهم
***********
أنا فتاة اللا مشكله
بضحك و بقول مفيش مشكله
مشاكل في الشغل...مفيش مشكله
حد ضايقني...مفيش مشكله
حد خد مكاني...مفيش مشكله
حد مبيسألش عني...مفيش مشكله
حد ظالمني...مفيش مشكله
الأسانسير عطلان..أطلع السبع أدوار حافيه..مفيش مشكله
مهما الدنيا إسودت..بقنع نفسي إن مفيش مشكله
و بحط سكر على أي شئ مُرّ
آخر اليوم ببقى نفسي أصرخ
لأ في مــشــكــــلـــه..في مــشــكـــلـــه
*************
بطلت أحكي حواديت
مش عارفه خيالي سابني و لا أنا اللي سيبته
بس متأكده إن روحي شبكت فـ حاجه و هي طايره
لما ترجع..هرجع أحكي
هناك 14 تعليقًا:
مقطع لفت انتباهي
***
راضيه أكيد
هو عيب الواحد يكون عنده طموح
طب عيب الواحد يعمل الحاجه اللي نفسه فيها
طب عيب الواحد يدور على حاجات بسيطه تفرحه
طب عيب نيجي على نفسنا و نتغير
هو لازم نعيش في صراع؟
*****
لا طبعا مش عيب
تحيتي يافراشة التدوين
تصدقي اول مرة اعرف ان غسيل الايدين له يوم :)
مالك بقى يا شيرين في ايه ؟ يا ستي كلنا كده بتجيلنا حالة من التهنيج بنحس اننا مش فارقة معانا حاجة
و بعدين خيال ايه اللي سابك ؟ كل الحكاية دي حاجة اسمها writer block
و بتحصل دايما و فترة و بتروح
متستسلميش للحالة دي علشان هي حالة طارئة كلنا بنمر بيها و في الآخر كلنا بنرجع لطبيعتنا و صدقيني فراشة التدوين هتفضل تطير علشان لسه في زهور كتير و الوان اكتر على جناحاتها مشفهناش
ممكن بقى شوية امل ؟
يا باب يا مقفول امتى الدخول
صبرت ياما و اللى يصبر ينول
دقيت سنين و الرد يرجع لى مين
مش لو كنت عارف مين انا كنت اقول
عجبى
جاهين
مش عارف اعلق بايه و لا ايه
لمن يا شرين كلنا هذا الرجل
قال تعالى
"نفس و ما سواها"
صدق الله العظيم
النفس البشرية مازال لها الكثير من الاسرار
الحل ان اكون نفسى و انا اعيش اللحظة بفرحها او حزنها
اعيشها بحيويتها او ركودها
اعيشها و اتعايش احاول ان اعيش و اقلل من التعايش
و احرص ان اكون فى النهاية انا بكل ما فى من متناقضات حتى لا اغترب عن نفسى
ان احسست بعيب فى احاول ان اصلحه ان لم استطع فهو انا و جزء منى
عايز اعلق على كل جزء ف البوست بس هاكون رغاى قوى
كلمة على جنب
اعجبنى البوست الذى رفعتيه و لا اعرف سبب رفعه
فجميل ان نعبر عن مشاعرنا الجميلة
اذا كان الموضوع لا يضليقك ارجو ان ترجعيه
تحياتى و سلامى الى زوجك العزيز و امن و جورى
حالة إن شاء الله هاتخرجى منها ، وانتى حاسة باحساس مختلف نتيجته "امتنان" وبيسموه "خبرة" ...
أكيد مريتى بالمود دا قبل كدة ، وكل مرة بيتهيألك أنه مختلف تماما ، وأنك مش هاتطلعى منه أبدا ... بالذات حتة الخيال اللى بيفارق دا .. بيرجع محمل بما لذ وطاب :)
بس اسمحيلى اسجل اعتراضى الشديد على الحتة دى :
"ليه البنات لما بيتقابلوا بيفضلوا يتكلموا في هيافات
و يشتكوا من أزواجهم
و عائلات أزواجهم
و مشاكل الشغل
و قرف العيال
و محلات الملابس اللي عامله خصم
عشان كده مبقتش أحب أخرج معاهم"
ليييييييييييييييه ؟؟؟؟؟؟؟
اكيد انتى اكتر واحدة عارفة أننا لما بنتوتر بتكلم وبنتكلم وبنتكلم ..
بنبقى فعليا مش عايزين حل .. وممكن واحدة تعيط علشان مش لاقية لون الروج اللى كانت عايزاه ! ..
بس كلنا عارفين أن مش هى دى المشكلة .. ومش هو دا صميم الموضوع .. إحنا عايزين نحس ببعض ، نسمع صوت بعض .. نتونس .... بس !
تحياتى :)
احيانا بنتعب من كتر الجري ونحتاج نستريح ناخد نفسنا
احيانا بنحس بملل من كتر الاشياء الللي بتحاول تمنع تقدمنا
احيانا بنشوف اشخاص كتير عايشه تدور على سبب عشان تتعبنا
بس الاكيد ان احنا هنكمل ونعيش حياتنا هنضعف شويه مش عيب بس هندور على اللي يقف جنبنا ويسندنا
هندور على الحلو في حياتنا ولو مش لاقينا هنصنع الحلو بايدينا
تحياتي لاختي العزيزه
"ليه البنات لما بيتقابلوا بيفضلوا يتكلموا في هيافات و يشتكوا من أزواجهم و عائلات أزواجهم و مشاكل الشغل و قرف العيال و محلات الملابس اللي عامله خصم عشان كده مبقتش أحب أخرج معاهم"
فراااغ أكيد ..على فكرة أنا من رأيك جداً
طب عيب نيجي على نفسنا و نتغير
هو لازم نعيش في صراع؟...
أنا مش عارفة أقولك حاجة غير إنك بجد لمستي حاجة جوايا مش عارفة حتى أوصفها..
صباح الغاردينيا شيري
اولاً وحشتيني اوي وانتي غايبة ومش بشوفك كتير لكن البوست دا شدني يمكن لاني اول مرة اشوف شيرين بتحكي عن نفسها اوي ومتضايقه اوي بس عاوزة اقولك كوني انتي انتي احلمي والبسي جنز وحافظي على شكلك بأبتسامة قلبك قبل شفايفك اوعي تسيبي القلم واوعي تحسي انك مش هتقدري تكتبي حواديت لأنها في دمك اسمعي ميوزك هادي ووابتسمي وامسكي القلم :) عشان انا مستنية حدوتة رومانسية من فراشة التدوين الجميلة "
؛؛
؛
لروحك عبق الغاردينيا
كانت هنا
reemaas
لأ لأ لأ والله انتى شيرين سامى
ولا يمكن ان تكونى الا شيرين سامى الصيدلية النابغة والكاتبه المعروفة والموهوبه بما تتمتعين به من اسلوب راق رفيع
صحيح الانسان فى كل يوم لا يبقى فى نفس المــــــود لكن هييجى الوقت اللى يلاقى فيه نفسه الصافية
بالتسبة للسن لازم نمر بجميع الادوار والاعمار العمر الصغير له جماله والعمر الكبير جماله اجمل اسأل مجرب
لا ياشيرين انا حاسس انى بقرأ كلام لحد تانى غير شيرين سامى ... شيرين سامى ذات الروح العالية الغالية
سلامتك ياست الكل
مقطع عجبني قووووووووووي
أنا فتاة اللا مشكله
بضحك و بقول مفيش مشكله
مشاكل في الشغل...مفيش مشكله
حد ضايقني...مفيش مشكله
حد خد مكاني...مفيش مشكله
حد مبيسألش عني...مفيش مشكله
حد ظالمني...مفيش مشكله
الأسانسير عطلان..أطلع السبع أدوار حافيه..مفيش مشكله
مهما الدنيا إسودت..بقنع نفسي إن مفيش مشكله
و بحط سكر على أي شئ مُرّ
آخر اليوم ببقى نفسي أصرخ
لأ في مــشــكــــلـــه..في مــشــكـــلـــه
دايما بنوهم نفسنا ان مافيش مشكله مع ان في مشكله وهو ده اللي بنكتشفه اخر اليوم استعيني بالله
تيحاتي وتقبلي مروري
صباح الفل والجوري:)
يعني ليش لازم نكون نفس المووود كل يوم؟ هالانسان المبتسم المتفائل ما بيطلعله يوم يكون حزين متضايق مكشر؟!!!واللا لازم نعيش الدور ونقول ما فيش مشكله على طول؟
لا يا عالم في مشاكل كتير بس نحنا اللي بنطنش وبنقول مش مهم ويبقى من حقنا اوقات نحزن ونتضايق او على الاقل نصمت بدون ما حد يعترض !
يا رب ما تعجزيش وتبقي شباب على طول و ما تخافيش على الشكل ....طالما الروح مرحه و شباب ,الشكل ما بيفرقش كتير.
و ما تجبيليش سيرة البنات وقعداتهم وقصصهم اللي بتتكرر في كل قعده...بس انا برضو بروح معاهم بيبقى في قفشات بتضحكني كتير وببقى أزن عليهم عشان يبطلوا الملل دا بالاضافه للاشياء الزاكيه والضيافه اللي ما بحبش افوتها :))
ما تزعليش كل يوم وانتي بخير عشان يوم المرأه العالمي ههههههههههه
وكل يوم وحواديتك بخير ... ما تخافيش حترجع الحواديت مع زهوة الربيع وحرارة الصيف بس هو البرد وكآبة الشتا هي اللي مجمده الافكار وهترجع بأذن الله.
كل يوم مش زى التانى
ساعات بنبقى مش بتوع كل يوم
لكن الطبع دايما يغلب التطبع
أكيد اكيد
هترجعى زى ما انتى
وبخصوص الاصحاب الاصحاب اللى بجد هما اللى لو واحد فيهم اعتذر للتانى ورجعله هياخده بالحضن
شيرين
صباح الخير
عادي جدا واقل من العادي
اعطيني سببا واحدا فقط لكي تكوني ناجحة واحلامك كبيرة وطايرة في السماء من الفرح وما تلاقي حواليكِ من بّقصقص اجنحتك ويهمس في أذنيكِ صباح مساء ان تصحي من احلامك ....
ولا يهمك ..
كوني على ثقة من البداية ان الحب عندنا مرتبط بان تكوني على شاكلتنا ومن طينتنا ...وبمفهومنا
اي تحت السيطرة في كل ما تقولينه وما تفعلينه
وعندما تتجاوزين الحدود ....تحل عليّك عبارات العزل
متكبرة ....متعجرفة...شايفة حالها ...وعلى شو....؟؟؟
ما تفكري ان حواء فقط من تواجه ذلك
صدقيني ان كل من يحاول ان يجعل من حياته بصمة خاصة له بواجه نفس المصير في مجتمع ...ما توجعش راسك ما فيش حاجة مستاهلة...
شو بدي احكي عن مجتمع اصبح العيب ...كل العيب في نظره ان تحاول ان تكون انسانا مبدعا
قديما قالوا وراء كل رجل عظيم إمراة
وانا اقول
وراء كل إنسان يفكر ويحاول ان يغير مجتمعه الى الافضل ...مئات ممن يقذفونه بالطوب ووللآسف اغلبهم من منهم اقرب الناس اليه
قد يكون الخوف من ان يحلق عاليا لا يقدرون على اللحاق به وبالتالي يفقدونه....حب التملك
لا تزعلي ولا تهتمي
اللي عاجبه ...عاجبه
واللي مش عاجبه يضرب راسه بالحيط
واحنا هربنا واجينا هون ليش؟؟؟؟
مش مشان نلاقي ناس فاهمتنا ومقدرة رسالتنا في الحياة دون منفعة لهم او مضرة علينا
الحمد لله ...
صباحك فل وياسمين
وسلميلي على النيل على الصبح
وقولي له ....
صاحبك متضايق ومخنوق ....زيّك
سواح
مصطفى
أستاذ إبراهيم
كارول
اسامه
موناليزا
إسراء
ريماس
أستاذ فاروق
حياتي
نيسان
عرفه
استاذ يوسف
بشكركم جميعاً بجد كلامكم فرق معايا كتير و تشجيعكم و إحساسكم بي أكيد بيساعدني إني أستمر في الكتابه و التعبير عن نفسي و عن غيري و دائماً بنتظر تعليقاتكم و كلامكم الطيب..ألف شكر :)
بعتذر عن الرد الجماعي لكن مش عايزه أرد بتفصيل عشان مارجعش تاني لنفس المووود
كل التحية و التقدير و الود لكم
إرسال تعليق