تفاصيل صغيره عن البؤجه+تحديث

التحديث بوست بقلم ماما زيزي و بوست بقلم أستاذ فاروق فهمي في الآخر عن نفس اليوم....بشكركم على كلامكم الرائع أسعدتوني بجد :)

من سنة تقريباً دخلت مدونة فاتيما "روح قلب ماما" لأول مره و كان بوست عن تجمع تدويني في الإسكندرية, فاتيما كانت بتوصف التجمع و الناس و بتحكي عن طلتهم و قفاشتهم و حضورهم بشكل دافي و رائع جداً, بجد يوميها تمنيت إني أكون معاهم, صحيح إن حظي مأسعفنيش إني أحضر تجمعات تدوينيه قبل كده, لكن دائماً كنت بتمنى إني أكون جزء من الكيان الرائع ده.

أنا مش إجتماعيه بشكل كبير, كمان وقتي ضيق أوي و تحركاتي صعبه, يعني لما بخرج عن مدينة نصر (حيث أسكن) أو الدقي (حيث أيامي و صبايا) بحس بغربه شديده, لكن المره دي تشجعت و قررت إني لازم أروح, للأسف معرفتش إزاي أروح بالعربيه و خفت أتوه, فركنت عند محطة مترو قريبة من مكان عملي, المترو كنت إعتزلته من أيام الكليه, دلوقتي بقى أسوأ للأسف ماليان شحاتين و أصحاب عاهات بيخوفوا الناس كسبيل للشحاته و باعه جائلين داخل العربيات ,تقريباً مفيش أي نوع من الأمن...بجد زعلت على حال المترو كان أفضل من كده.

نزلت عند محطة الزهراء و مشيت دقيقتين بالظبط بدوّر على الكافيتريا المتفق عليها, لقيت ناس بيندهولي قاعدين على قهوه بلدي , بجد فرحت جداً المكان كان رائع و الجو كان جديد عليه تماماً كان ناقص بس حد يقول شعر عشان تكتمل الصوره , قلتلهم بخجل "أنا شيرين سامي"...فاتميا إنتشلتني من خجلي بجد هيه شخصيه مميزه جداً تحسها كده من دمك, للأسف مقدرتش أقعد معاهم غير ساعتين أو أقل, لكن تعرفت على شخصيات و ناس كنت أتمنى أشوفهم جداً.

قابلت أستاذ إبراهيم رزق دي تاني مره بس بجد أسعدني تواجدي معاه في هذا التجمع هو و بنته القمر "ساليناز" و كان له حضور كبير, قابلت كمان داليا قوس قزح, و لمست إنسانيتها و جدعنتها بجد سعدت بتعرفي عليها, حضور ماما زيزي كان مفجأة بالنسبة لي دائماً كنت بحس إنها بتمثل جزئية الأمومه و الحنان المغلف بالعقل و خفة الدم في البلوجر, لكن متخيلتش إنها كمان في الواقع بنفس التركيبة الرائعه دي.

و بعدين طل علينا أستاذ فاروق فهمي و على يمينه القمر و على شماله الشمس بناته كارولين و هبه اللي كنت دائماً بتابعهم و سعدت بالتعرف عليهم و بالرغم من تدويناتهم الساخره المتميزه بخفة الدم إلا إنهم في الحقيقه شخصيات رصينه و أنيقه جداً, و أستاذ فهمي طبعاً بحضوره الطاغي و حلاوة لسانه.

و هنا حضرت صديقتي العزيزة منى أبو السعود اللي بجد كان نفسي أشوفها من زمان و لما شوفتها محستش غير إنها شبه كلامها أويييييي, منتهى الطبيعيه و الذوق, من أجمل الحاجات في التجمع هو لقائي بمنى بجد و بنوتتها الجميله و علي اللي حبيته جداً.
 كان في شباب كتير من المدونين لكن في واحد كان بيتكلم و عنيه مليانه بحبه للكتابه, هو طالب في كلية الحقوق وعرفت إنه بيكتب من زمان و حالياً بيكتب على الفيس بوك بس, إقترحت عليه ينشئ مدونة بس هو كان خايف إن كتاباته تتسرق, ليه؟ بستغرب جداً من الحكايه دي, زي زميلي العزيز مصطفى سيف لما قرر إنه يقلل كتابه في المدونة عشان كتاباتاه متتسرقش!!

يعني أنا أحد من متعتي و أقلل من سعادتي وإستمتاعي بالكتابه و التواصل عشان يمكن أتسرق! يعني ما أرتبطش عشان يمكن ننفصل, يعني محبش عشان يمكن أنجرح, مغامرش عشان يمكن أفشل, أنا ضد المبدأ ده تماماً, اللي بيسرق ده إنسان ضعيف و معندوش حلم...مش هوقف طموحي عشانه.

الجميل بقى إن أحمد عاشور اللي إتكلمت معاه أنشأ يومها بالفعل المدونة إسمها يوميات مجهول و بجد فرحت جداً بالخطوة دي, دائماً بحس إني عايزه أشجع أي واحد بيكتب بصرف النظر عن معرفتي بموهبته لأنه لما هيكتب هينمي أي بوادر موهبه عنده و لأني كمان كنت بفتقد التشجيع على الكتابه....أنا هتابع أحمد و يا ريت اللي يحب يزوره و يتعرف على كتاباته واضح إنه موهوب و طموح.

كنت سعيده جداً بتواجدي معاكم في النهار القصير ده, كان نفسي أقعد أكتر, و كان نفسي أروح التبرع بالدم و أتعرف على نوران لكن معلش إن شاء الله تتعوض, و نفسي أروح قهوة البورصه اللي حكيتلي عليها فاتيما, و كنت عايزه أكمل مناقشه مع أستاذ إبراهيم و ماما زيزي عن موضوع (حب العشرة) , و كنت عايزه آكل و أشرب معاكم عشان يبقى عيش و ملح :)
 حاسه إني رغيت كتير بس بحب التفاصيل أنا :)

 و لسه في ناس كتير نفسي أشوفهم...أشوفكم جميعاً على خير إن شاء الله

و ده بوست كتبه أستاذ فاروق فهمي عن اللقاء....أشكرك أستاذي :)

خدعوني وقالوا إن هذا نوراً

بوست ماما زيزي....بوسة مني لحضرتك:)

بؤجة الحب..