الأحد، 25 سبتمبر 2011

عربون محبة...لنوران الشاملي


نوران الشاملي...قريت البوست بتاعك و إستغربت جداً إن لسه في ناس كده...طيبة كده...و بتخاف على زعل الناس كده...بجد أنا كنت بحبك و بقيت بحبك أكتر...مش عشان حاجه..غير عشان إنت إنسانه نادره فعلاً...كنت بتابعك من زمان و مبعلقش...و كنت بحس إنك شخصيه بتجلد نفسها و تأنب نفسها بإستمرار و بتتظاهر بالقوه و أعتقد إنها عكس كده..لأن اللي عنده قلب يقدر يحب الناس و يخاف على مشاعرهم أكيد جزء منه بيبقى ضعيف..ضعف أقرب للحنان.

أنا اللي زعلني حاجتين..أولاً إني كنت الوحيده اللي متبرعتش بالدم التجمع اللي فات...و كنت جايه بنية التعرف على الموجودين و فاتيما طبعاً..و ده مش عيب أبداً كلنا نفسنا نشوف بعض بشكل أو بآخر..و بنبقى متشوقين نعرف اللي بيكتب الكلام ده شاكله إيه...دي طبيعه إنسانيه...متخيلتش إن دي حاجه ممكن تكون غير مرغوب فيها...لغرض التبرع بالدم بس!

الحاجه التانية...أنا رغم تربيتي في مجتمع مختلط...إلا إني بحترم جداً التقاليد الشرقيه..و ميضايقنيش أبداً إن يكون فيه تجمع نسائي..زي ما فيه قسم في الكوافير للمحجبات...زي ما في عربية في المترو للسيدات...زي ما طول عمري بخرج مع أصحابي لوحدنا..و زي ما في أصول و تقاليد عربية و دينية مقدرش غير إني أحترمها...لكن إن يتم الإعلان عن التجمع بصيغة إن التجمعات المختلطه أقل إحتراماً..و إن المدونين الرجال نيتهم يعاكسوا و يتعرفوا و يستظرفوا..و بالتبعية المدونات البنات رايحين و هما عارفين إنهم هيتعاكسوا..بجد شئ ضايقني و حسيت فيه إهانه ضمنية.

يمكن أنا فهمت غلط و يمكن إنت عبرت غلط بس في النهاية أنا بقدر مجهودك في عمل الخير و مبادرتك الرائعه بالتبرع بالدم...ربنا يكرمك و يجازيكي خير عنها...و عايزه أقولك على سر...أنا مبزعلش من حد أبداً..يمكن بتنرفز شويه كده و بنزل على مفيش...و مبنتظرش إعتذار و رسميات أبداً...كلمة واحده طيبة صادقة بترضيني جداً.

شكراً يا نوران و كوني بخير و سعاده دائماً
:)

هناك 43 تعليقًا:

نـوران الـشـامـلـي يقول...

يا خبر .... إيه ده كله
!!!!!!!!!!!!!!!

انا مش عارفة اقول ولا كلمة يا شيرين

....
ربنا يعزك يارب ويكرمك

بجد انتى احرجتيني اوي بذوقك ده


شكرا ياشيرين

شكرا جدا انك تقبلتى اعتذارى بصدر رحب

وشكرا على البوست ده اوى

واسفة بجد ان كلامي ضايقك
والله مكونتش اقصد ابدا

وان شاء الله مايحصلش سوء تفاهم تاني ابدا

اشوفك على خير ان شاء الله



سلام

اختك نورا

فاتيما يقول...

قبلة على جبينكما
إنتوا الاتنين يا بنات


ربنا يديم الود
يا رب

شمس النهار يقول...

ياشرين انتي رقيقة جدا
وعايزة اقولك نوران بنوته مصرية بكل ماتعني الكلمة
من ساسها لراسها
واللي بيعجبني فيها انها مابتتكسفش تعتذر
وتراجع نفسها بسرعة
واللي يعمل كده يوكون جواه زي براه
ماتخافيش منه ابدا
وكويس انكم اتصافيتوا
شوفوا لنا لقاء حريمي بقا:))))
:)))))

ابراهيم رزق يقول...

ورد فى ورق سوليفان يا حلوين اهديلكم
و الا انقله فى الطين بالشتلة و اجيلكم
الاولانى لو وحا باعجابى بكم
عجبى على التانى بايه يوحلكم
عجبى ؟؟؟؟
الصراحة انا سعيد جدا بزوال سوء الفهم

نوران الشاملى انسانة رائعة مثلك تماما
يا مرحب بالتجمعات الحريمى امال هتنمو على مين
اصل النم ده جينات
ربنا يوفقكم لما فيه الخير
انتى عارفة ان انتم الاثنين ضربتم مثل
عظمة الاعتذار من انسانة كبيرة و رائعة
و عظمة قبول الاعتذار و لمساتها من انسانة كبيرة و رائعة ايضا
تحياتى و تقديرى لكم انتم الاثنين

حفيدة عرابى يقول...

:)
والله انتم عسل
ربنا يديم الود وحبكم فى الله بينكم

Ramy يقول...

مش هعلق

ايوة

أنا مبسوط و خلاااااص (:

فاتيما يقول...

شيرين

معلش تانى بعلق

بس عاوزة اقول
سبحان الله

انا بكتبلك عند ابراهيم رزق
بعد بوست نوران
وانتى هنا بتردى على خيخة
وانا جيت هنا وانتى هناك
وهيا هنا

هههههههه

والله حاجة تفرح القلب الحزين

بصى
دا من عند ربنا اللى بيحصل دا
لما انتوا الإتنين ...
يبقى قلبكوا على بعض كدا
ومحدش يبقى عاوز يزعل حد
والكل تقريبا بيحاول يصلح ما بينكم
بينما انتوا الجوز بتسبقوا الجميع

بجد بجد
دى محبة من عند ربنا

ربنا يديمها
يا رب

الحمدلله

مصطفى سيف الدين يقول...

شيرين ونوران
ما اجملكما حقا ان الصداقة الحقيقية لا تتقوى الا في وقت الشدائد
ونوران بالرغم من معرفتي بها كانت منذ وقت قليل الا ان انطباعي عنها انها شخصية محترمة ذات عقلية رائعة فمن يحيا حياته من اجل الغير يستحق ان نرفع له القبعة وهي دوما تعيش من اجل الغير تحث الآخرين على التبرع بالدم وتريد ان يكون عمل الخير من اجل الخير فقط وان للتعارف وقت آخر وهذا يستحق التحية فهو اجتهاد مميز
اما انتي يا شيرين فكونك تحينتي الفرصة كي تتعرفين على اناس صادقيتهم فصدقوكي ولم ترهم عينيكي فهو شعور آخر يستحق التحية والتقدير وما حدث من سوء تفاهم سرعان ما سيزول ليتبقى المعدن الطيب في كل منكما
اسعد الله وقتيكما وبارك الله فيكما

شيرين سامي يقول...

نوران الشاملي: إنت قلتي كتير لما ظهرت بساطتك و ذوقك في مصالحتك ليه و أنا و الله ما كنت زعلانه منك شخصياً...هو سوء تفاهم و إن شاء الله ميتكررش..بس زيارتك ليه إنهارده أسعدتني بجد.
ربنا يسعدك و يقدرك على فعل الخير و يريح بالك دائماً.

أشوفك على خير يا نورا

أرق تحية لكي

شيرين سامي يقول...

فاتيما: المدونه نورت و القُبله وصلت :)
شكراً فاتيما ربنا يكرمك
:)

شيرين سامي يقول...

شمس النهار: فعلاً اللي يعمل كده إنسان بجد صافي و أهل للمحبه..و أنا سعيده بمعرفتي بيها جداً.
إن شاء الله نتقابل على خير
تحياتي و كل الود لكي :)

شيرين سامي يقول...

إبراهيم رزق: هي فعلاً إنسانه كبيره و كبرت في نظري زياده..و مفيش سوء تفاهم تاني إن شاء الله ساعات بس المواقف بتبين معدن أصحابها الأصيل.
سعيده بتواجد حضرتك و ربنا ما يحرمنا من أشعارك و أغانيك الجميله :)

تحياتي و إحترامي لك

شيرين سامي يقول...

حفيده عرابي: آمين ربنا يكرمك يا فندم :)
تحياتي لكي

شيرين سامي يقول...

رامي: ههههه و أنا كمان مبسوطه من زيارتك :)
تحياتي لك

شيرين سامي يقول...

فاتيما: إنت تعلقي براحتك كلامك لوحده بيطبطب على القلب :)
فعلاً صدف غريبه و محبة ربانيه أنا شوفت تعليقك عند أستاذ إبراهيم و هو كان بيعلق عندي و أنا أساساً كنت بكتب البوست..متصورتش إن في حد ممكن يخاف على زعل حد تقريباً ميعرفوش...مكانش ينفع غير إني أبادل جمالها ده بجمال و تسامح في الله.
الحمد لله ربنا يديم الحب بينا جميعاً

نورتيني أوييييييي
و أسعدتيني جداً
:)
تحياتي و كل الود لكي

شيرين سامي يقول...

مصطفى سيف الدين: شكراً على كلامك الرقيق ده و رأيك المتفتح الراقي و إلتماسك الصح في الجانبين و أساساً مين ميحبش نوران و هي بالجمال و الطيبة دي.
أشكرك تاني مصطفى على تعليقك الرائع

تحياتي الخالصه لك

candy يقول...

فى جملة كنت دايما اسممعها من الكبار بس ماكنتش بحس معناها قوى أو شوفتها على ارض الواقع ..

كانت دايما واحدة فى عيتلنا تقولى فى أى كلام عن خلاف أو خناقة

"المحبة دايما تكسب"

"مافيش حاجة اسمها كرامة بين اللى بينهم عشرة وحب المفروض تياسبقوا علشان يتصالحوا لأنهم بيحبوا بعض .. والحب يعنى أنسى نفسى"

أنا مبسوطة أنى شفت دا "لايف" النهاردة :)

ربنا يديم المحبة وسعة الصدر والأفق والخير

مونتي بوكيه ورد يقول...

ما اجمل المشاعر عندما تتلاقي في مكان واحد

AHMED SAMIR يقول...

انا برضة قريت البوست دة
و استغربت جدا من طريقته الحقيقة
و حسيت انها بتهين المدونين..!!
بس اثرت السكوت
مش معقول مدونين على درجة عالية من الثقافة و العلم و المعرفة هيبقى هدفهم من حملة تبرع بالدم انهم يتفرجوا على سيدات و بنات و يحاولوا يتعرفوا عليهم
حقيقي
كان بوست فيه نوع من القسوة
تحياتي

نور الدين يقول...

إنها نوران ببساطتها وصدقها
وهذه أنت بوضوحك ومصارحتك
تحياتى لكما

eng_semsem يقول...

ينفع ارفع القبعه ليكم انتم الاتنين
ربنا يديم الود والمحبه ما بينكم وهو ده سلوك المدونين اللي اتعودنا عليه
ومفيش احسن من اننا نشوفكم دايما مبسوطين وفرحانين وان شاء الله يكون يوم جميل
تقبلي تحياتي

قلم رصاص يقول...

شعور طيب جدا
واحييكم انتوا الاتنين
وربنا يديم الود والحب في الله بينكم

:)

FAW يقول...

مش هكدب وأقول إني مش فاهم حاجة , أنا فعلا رحت قريت البوست مخصوص

علي فكرة ساعات الواحد لما بيبقي مؤمن بفكرة قوي زيادة عن اللزوم , بيعبر عنها بطريقة البعض ممكن يشوفها عنيفة !

طبعا أنا بتكلم علي نقطة التبرع و التعارف مش نقطة حضور الرجال . . دي بقي بجد لا تعليق .

بحيي فيكي سعة صدرك وبحيي فيها تقبلها للنقد وإن كان العنف لازال موجود بس بصورة ألطف كعناد طفلة لو تسمحلي

تاني بحيي فيكي تفهمك لطبيعة الفضول البشري :) . . ضحكتيني بجد :)

beautiful mind يقول...

السلام عليكم
ما اجمل ما قرأت
مشاعر صادقة بين شخصين تربطهم اخوة الله
ادام الله المحبه
لي تعليق صغير
مش كل المدونين بيروحو عشان يعاكسوا البنات
اكيد في حد مختلف
تحياتي

دعاء العطار يقول...

انتى عسل ياشيرين بجد وكل يوم بيزيد احترامى ليكى

بجد سعيدة انى اتعرفت على انسانه زيك حتى لو مكناش شوفنا بعض ولا مرة

بالنسبه للموقف اللى حصل انا مااعرفش استاذه نوران ومكنتش أعرف الموضوع كله ع بعضه بس فهمت


وجميل ان االانسان يعتذر لما يحس انه غلط

ربنا يديم المحبة يارب (: (:

أبو حميد يقول...

عاااااااااااااااا
تحيا الثورة
حتخلونى أعيط وأنا مش ناقص

ريــــمــــاس يقول...

مساء الغاردينيا شيري
ويارب يجمعكم دائماً على الخير
وتبقى صداقتكم مدى العمر
جميل ذلك الإحساس الذي قرأته هنا "
؛؛
؛
دمتِ بحب وود
لروحك عبق الغاردينيا
كانت هنا
reemaas

أبو حميد يقول...

هو أنا تعليقى إتمسح ليه؟؟؟؟؟
:(((((((((((

أبو حميد يقول...

طيب أنا أعمل إيه علشان تعليقاتى تتنشر؟؟؟؟؟؟؟؟؟

Carmen يقول...

ربنا يسعد كل ايامكم يارب :)

شيرين سامي يقول...

candy:فعلاً كاندي المحبة في الله هي اللي بتكسب...أشكرك على تعليقك و دعواتك الجميله.
تحياتي الخالصه لكي

شيرين سامي يقول...

مونتي بوكيه ورد: تعليقك أكمل المشاعر الجميله التي إجتمعت :)

شيرين سامي يقول...

AHMED SAMIR : أحياناً بيكون إيثار السكوت أفضل...بس أنا زعلت لأني بالفعل رحت قبل كده و عموماً الموضوع إنتهى و مصالحتها لي فيها مصالحه لكل من تأذى من البوست...و محدش يعمل كده إلا إنسان طيب بجد

لك مني كل التقدير

شيرين سامي يقول...

نور الدين: أشكرك على تعليقك العميق رغم صغره..هو إنت نور الدين صاحب كتاب (في صحتك يا وطن)؟
نورتني بالزياره :)

شيرين سامي يقول...

eng_semsem: شكراً يا أسامه على روحك الطيبة و مشاعرك الجميله...ربنا يديم بيننا المحبه دائماً.

تحياتي الخالصه لك

شيرين سامي يقول...

قلم رصاص: اشكرك على ذوقك و أتمنى ربنا يجمع المدونين على خير دائماً.

تحياتي و تقديري لك

شيرين سامي يقول...

FAW: ههههههه فضول طبعاً مش مصريين و شاربين من مية النيل :)
مبسوطه إنك معديتش مرور الكرام كده و شوفت الجانبين عشان تكون رأي..و أشكرك جداً على تعليقك.

نورتني :)

شيرين سامي يقول...

beautiful mind: و عليكم السلام و رحمة و بركاته...أكيد مش كلهم و لكل قاعده شواذ هيه كانت بتتكلم عن أقليه أكيد.
اشكرك على تعليقك و سعيده بزيارتك :)
تحياتي لك

شيرين سامي يقول...

دعاء العطار: شكراً يا دودو و القلوب عند بعضها أنا كمان سعيده بالتعرف عليكي جداً :)
أكيد الإنسان اللي يبادر بالصلح و يخاف على مشاعر الآخرين بيزيد إحترامه في نظر الجميع.
شكراً يا دودو أسعدني تعليقك
أرق تحية لكي

شيرين سامي يقول...

أبو حميد: طبعاً تحيا الثوره...معلش فعلاً لاقيت تعليقاتك في الرسائل الغير مرغوب فيها مش فاهمه ليه و عدت نشرها...لكن صدقني سعيده بزيارتك جداً و نورتني :)
تحياتي لك

شيرين سامي يقول...

ريماس: مساء الجاردينيا على ملكة الرومانسية شكراً جزيلاً و ربنا يتقبل منك عزيزتي:)

أرق تحية لكي

شيرين سامي يقول...

كارمن: ربنا يكرمك يا سمسمه :)
نورتيني

وجع البنفسج يقول...

ربنا مايجبش زعل .. والله شيرين زي العسل وقلبها ابيض وهذا الشيء واضح من كتاباتها واحنا يا جماعة مجتمع واحد ولازم المحبة والاحترام هي اللي تكون سائدة مابينا ..

حلو عربون المحبة انتي ونوران بتستاهلوا كل خير ..