السبت، 16 يوليو 2011

يا شعبي الحبيب الصبور المهاود...


يا شعبي الحبيب اهالي البلوجر الكرام بدأ انهارده التصويت على أفضل 100 تدوينه اتنشرت في شهر يونيو عشان يجمعوهم في كتاب الكتروني, طبعاً الفكره مش في انها تتنشر و لو متنشرتش مش هيقلل من المدون لكن الفكره في التحــــــدي اللي بيجذبني في أي شيئ, و عشان كده جمعتكم انهارده يا شعبي عشان تصوتولي و اطمنوا حتى لو مصوتوش أنتم في قلبي" علامة ذبح" :)

صوتولي بإسم الثوره بإسم الحريه و العداله الاجتماعيه بإسم تحالف قوى الشعب حاااااااا "صوت تصقيف"

مش مقنعه بلاش

صوتولي يرحمكم الله صوتولي بقدر إيمانكم و إنشروها أستحلفكم بالله و اللي هيعمل كده جزاءه عند ربنا عظيم.

مش مقنعه بردو

صوتولي بأمر من المجلس الأعلى و حرصاً على الاستقرار و مصلحة الوطن و المحافظة على مكتسبات الثوره"سبابه مرفوعه"

مياكولش معاكم الكلام ده

طب صوتولي و أنا أصوتلكم زي التعليقات كده علقلي و أنا أعلقلك تابعني و أنا أتابعك كده يعني

مش نافع بردو

خلالاااااااص صوتولي لو قريتم و عجبكم و أمري لله :)

التديونه الأدبيه (متى؟)

التدوينه الاجتماعيه (يوم الخميس)

التدوينه السياسيه (وصلتك رساله) هي مش سياسيه أوي بس أنا بتلكك :)

التدوينه الأخرى (عندما تُسافر)

تك تك تك تك خلصت مش عايزه كسل بقى و أنتخه و حزب الكنبه و الأغلبيه الصامته و الكلام ده إحنا في عهد جديد و كل حاجه لازم تتغير و لّا  اييييييه.

آخر معاد للتصويت يوم 25 ليكو عندي بونبوني و شوكولاه لحد يوم 25 يوم 26 إنسوني خالص هسافر بقى و كل واحد يشوف نفسه :)

لأ بجد بجد متصوتوش غير لو عجبكم و ما شاء الله بجد الانتاج غزير و رائع و متنوع مكنتش متخيله هذا الكم من الابداع عند المدونين كل يوم هقرى جزء و أدي صوتي للمستحق... أتمنى التوفيق و التفوق للجميع.



شيرين

هناك 22 تعليقًا:

جايدا العزيزي يقول...

كل دول امرنا لله

ابعتلك لنكاتى ههههههه

http://100posts-voting.blogspot.com/2011/07/blog-post_8347.html

وادى التانى
http://100posts-voting.blogspot.com/2011/07/blog-post_4368.html

reemaas يقول...

ايييييييييييه ده ماحدش قالى اننا نشترك بكل دول انا اشتركت بوحدايه

رحطى اونطة يانور

سندباد يقول...

بالتوفيق ان شاء الله
الشعب يريد حدوتة مصرية

Unknown يقول...

جايدا هدخل و أقرى حالاً متوفقه ان شاء الله

Unknown يقول...

ريماس: طب ليه يا نور ما الكلام كان واضح تدوينه واحد لكل قسم...عموماً حصل خير بس يا ريت تسيبي لينك تدوينتك في التصويت أو تعلني عنها.
متوفقه ان شاء الله

ابراهيم رزق يقول...

ليه كل ده

ده انتى ناقص تقولى تصويتة صغيرة تمنع بلاوى كتيرة
هنياك يا مصوت ليا يا فاعل الخير و الصواب
التصويتة بعشرة امثالها
هههههه

طبعا اذا مكناش هنصوت ليكى هنصوت لمين
انا بصوت اهو و الناس اتلمت

بجد بالتوغيق بأذن الله
و انا مدخلتش اهو لسببين خوفا من المنافسة و عشان اديكى فرصة هههههه
تحياتى
الشعب يريد شرين سامى

Unknown يقول...

سندباد: أيييييوه هو ده الكلام انت كده ثائر حق:)
شكراً ليك أوي

Unknown يقول...

ابراهيم رزق: ليه مادخلتش يا استاذ ابراهيم ده انت كنت هتاخد نص الكتاب بتدويناتك المجنونه :)
لأ أنا مبشحتش و لا حاجه أنا بحب شعبي و عايزه يصوت من نفسه من غير ما أستعمل القوه:)
شكراً لحضرتك أخجلتني بذوقك

سواح في ملك اللــــــــــــــــــه- يقول...

سعادة الريسة

نريد رفع الاجور ويكون الحد الادني ست تلاف جنيه

ونريد فيلل لمحدودي الدخل وعربيات

طيب لوواحد مبيعرفش يصوت يزعق وخلاص

ههه تحيتي

Unknown يقول...

سواح في ملك الله: كل طلباتكم أوامر من هنا لحد يوم 25 اطلب كل اللي نفسك فيه عشان تطمن على مستقبل ولادك :)

ماتزعقش يا خالد صوتك وصل خلاص
شكراً ليك و تحياتي الخالصه

Unknown يقول...

بالتوفيق إن شاء الله
تقديرى واحترامى

Unknown يقول...

محمد الجرايحي: أستاذي شرفتني بمتابعتك و أشكرك شكراً جزيلاً على تعليقك.
تحياتي و احترامي لك

سواح في ملك اللــــــــــــــــــه- يقول...

الحمد لله كلهم عجبوني وكلهم علمت عليهم

بالتوفيق يادكتورة

مصطفى سيف الدين يقول...

بالتوفيق ان شاء الله

ذو النون المصري يقول...

و كيف يكون التصويت؟؟؟؟؟؟؟؟؟؟و اين؟؟؟؟
اصلي كنت بره مصر
مش متابع الموضوع من اوله

غير معرف يقول...

مساء الغاردينيا شيري
ههههههههههه
ضحكني اسلوبك طب ياستي ماتزعليش هنصوت بصوت عاااااااااااااي "
؛؛
؛
لروحك عبق الغاردينيا
reemaas

Tarkieb يقول...

التصويت حسب الصحوبية وخفة دم الافتار...وكله نظام شيلني واشيلك...بالرغم من ده بالتوفيق

faroukfahmy يقول...

بالتوفيق ان شاء الله ياشيرين فانت جديرة بالححصول على اعلى الاصوات فقد كسبتى قلوبنا بقلمك النابض
وان شاء الله ستحوزين بكل تقدير وثناء

موناليزا يقول...

أسبابك مقنعة :)

عجبنى البوست ده بجد

zizi يقول...

شيري الحبيبة دا اقل حاجة نعملها واقل واجب نقدمه بس قولي نصوت فين وازاي ؟؟؟؟؟

عباس ابن فرناس يقول...

مممم مكسوف اقول
مش عارف اصوت !
حاولت عند ناس كتير ومعرفتش تخيلى !
بس قرات التدوينات وعجبتى طبعا تدوينة (وصلتك رسالة )وبالمناسبة انتى رائعة لما بتكتبى فى قالب زاتى

تحياتى المستعطرة
وبتوفيق انشاء الله

Unknown يقول...

يا جماعه التصويت انك تدوس على x+ اللي تحت التدوينه الx دي رقم حسب عدد الأصوات يعني مثلاً 10+ دوس عليها هتبقى 11+ و هكذا و عموماً أنا مش هزعل لو حد مصوتش....هتغاظ بس :)
مفيش مشكله اصواتكم وصلت برقة مشاعركم