الجمعة، 22 يوليو، 2011

محاوله...


لم أعتد أن أتكلم في الدين...لست فقيهه أو متفقهه...لا أملك من العلم في الدين ما أستطيع أن أدافع به عنه أو أوضح أمر ما...أستشيط غضباً من كل من يسئ للاسلام بقول أو فعل أو جهل أو تهكم على ثوابت لاثبات أنه متفتح و مثقف و مفكر أو لمجرد الاختلاف...و لا استطيع أن أرد بأحاديث لأني قد أكون أعرفها و أفهمها لكن لا أحفظها أو الآيات القرآنيه لأني لا أحفظ الا قصار الصور لأصلي بها.

دائماً أشعر بالخجل من نفسي في الناحيه الدينيه...منذ أن كنت صغيره تعودت على أن أحافظ على صلاة الفجر و أواظب على قراءة القرآن يومياً...كنت أحاول أن أتقرب إلى الله و كانت أهم عباداتي الدعاء و المناجاه...أما الآن و منذ أن أنجبت طفلتي و أنا لا اصلي الفجر سوى نادراً و لا أقرأ القرآن الا كل عدة أيام قد تصل لأسبوع...أصبحت بعيده تماماً عن المناجاه و الدعاء و لا أستطيع أن أصلي التراويح في المسجد منذ سنوات...


منذ صغري كنت أحصل على معلوماتي من الدين من أبي لأن المدرسه كما نعلم الدين فيها سطحي و عبارة عن حصص حواديت رعب, كنت أرى والداي و هما يشاهدا الشيخ الشعراوي في برنامجه الشهير و يتابعاه مهما تكرر...بصراحه لم أستطع تفسير كلامه ربما لم أركز معه...قررت يوماً أن أصلي صلاة التراويح في مسجد نادي الصيد...هناك سمعت خطبه رائعه بين الصلاوات...شدتني بشده كلمات هذا الخطيب الشاب حماسه وسطيته كلامه القريب مننا كشباب و كأنه يخاطب إخوته و أصدقاءه...كان هذا الخطيب (عمرو خالد) من اكثر من أثروا في و من وقتها داومت على متابعته و حضور دروسه في مسجد الحصري بالعجوزه ثم مسجد آخر في سفنكس...الى أن مُنع عن إلقاء الدروس لشعبيته الهائله و حب الشباب و الكبار أيضاً له لكن لم يثنيني هذا عن متابعته في كل برامجه.

للأسف هذا لم يغير من تقصيري و من عدم تركيزي في الصلاه و كأني مجرد أسقط فرضاً علي...يؤسفني أن أعترف بهذا و لكني دائماً أحاول...حاولت أن أقرأ كتب دينيه لم تستهويني, التفاسير لكسلي أقرأ بعض منها ثم أتوقف...حاولت كثيراً أن أتعلم تلاوة القرآن و أن أحفظ بعضاً منه...دخلت في مقارئ مرات عديده و لم أكمل في أي منها أحياناً بسبب الزواج ثم الخلفه ثم ضيق الوقت ثم...أعلم أن كلها حجج واهيه و أن السبب الرئيسي هو أني أُبدّي أشياء أخرى على هذا الأمر.

من أجمل صفات ديننا الحنيف أن لا وساطه فيه هي علاقه بين الله و العبد لا ثالث فيها لذا لست مضطره أن أعترف أو أبدي أسفي و ندمي سوى لله...لكني أردت أن أخرج بعضاً من شعوري بالتقصير لعلي أستطيع أن أحاول مره أخرى و قد أنجح في أن أجعل شهر رمضان بدايه جديده...لعل بعدي عن ربي هو سبب تواهان نفسي مني و شعوري بالضعف الشديد هذه الأيام.

أعلم أني أعاني بطبيعة الحال من شعور بالتقصير عموماً...أخاف دائماً على شعور الناس أحياناً زياده عن اللزوم... أؤنب نفسي كثيراً على التقصير...أحاول و أحاول دائماً دون جدوى...و عندما قرأت جدول عبادات رمضان في مدونة (يوم من عمري) للمدونه الجميله (نيللي) تمنيت أن أفيق من كسلي و أن أجد وقتاً للاقتراب من ربي في رمضان و قررت مشاركتكم به لعل أحداً يكون مثلي لا ييأس من المحاوله.

دوس هنا (جدول عبادات رمضان)   

هناك 45 تعليقًا:

نيللى يقول...

اولا شيرين اشكرك على وضع جدول عبادات شهر رمضان ..بجد اشكرك بشده

ثانيا عاوزه اقولك ياشيرين اوعى تيئسى على طول حاول تتقربى الى الله ..على فكره كل حاجه فى حياتنا فيها تحديات ..حتى القرب الى الله هو اكبر تحدى فى الحياه فالانسان يتحدى "نفسه" ثم "الشيطان" ثم "الدنيا والناس"....من الجميل ان لديكى ضمير وقلب واعى ومستيقظ ومدرك "اين هو مشكلته؟

استمرى سوف تنجحين للوصول ...ولكن لازم يكون عندك اراده واصرار وعزيمه

وربنا ينور قلبك وطريقك...

دعاء العطار يقول...

كأنك بتتكلمى عنى

وتقريبا كانك بتتكلمى عن معظمنا

كلنا كده ياشيرين .. نقرب شويه ونبعد شويه

دعوه جميله ياشيرى وخاصة ان رمضان ع الابواب

وحشتينى (:

ابراهيم رزق يقول...

اختى الفاضلة شرين

اولا كل عام و انتى بخير بمناسبة شهر رمضان المبارك

كلنا هذا الرجل و اشكرك و اشكر نيللى جازاكى الله خيرا
احرص على تعليم اولادى القران فى المقارىء و اتمنى ان يتعودوا

تحياتى

Bent Men ElZaman Da !! يقول...

انا شوفت الجدول
بجد رائع وان شاء الله انفذه

هو دايما كده بتيجى علينا فترات تحسى بالتقصيير
انا بردو اوقات كتير بحس بكده
وده بيبقى اختبار
عشان نقدر نرجع تانى نقرب من ربنا
اللهم بلغنا رمضان
ونقدر نخرج منه واحنا راضيين عن نفسنا

سواح في ملك اللــــــــــــــــــه- يقول...

دكتورة شيرين

لم اقرا الجدول

ولكني زمان راجل مسن كنت احب الحديث معه لعلمه الغزير قال لي

لاتستن لنفسك سنه يومية حتي اذا تكاسلت عنها شعرت انك فعلت حراما
حتي لو لم يكن التقصير في فرض من الفروض

يعني الكلام معناه

اني معاهدش نفسي مثلا اقرا القران كل يوم من الساعة كذا للساعة كذا
علشان لو قصرت يوما احس اني ارتكبت حرمانية فافتح باب للجدال مع نفسي

تحيتي

مصطفى سيف يقول...

اتمنى ان تنجح محاولتك تلك
وان تكملي المسيرة في طريق الرجوع الى الله
واتمنى ذلك لنفسي ايضا
بارك الله فيكي وثبتك على طريقه

موناليزا يقول...

إليكِ هذه البشارة حديث قدسى عن رب العزة "" مَنْ تَقَرَّبَ إِلَيَّ شِبْرًا تَقَرَّبْتُ مِنْهُ ذِرَاعًا ، وَمَنْ تَقَرَّبَ إِلَيَّ ذِرَاعًا تَقَرَّبْتُ إِلَيْهِ بَاعًا " .
وأيضاً إليكِ هذا الحديث النبوى الشريف "

عن أبي حمزة أنس بن مالك الأنصاري- خادم رسول الله صلي الله عليه وسلم _ رضي الله عنه قال: قال رسول الله صلي الله عليه وسلم : (( لله أفرح بتوبة عبده من أحدكم: سقط على بعيره، وقد أضله في أرض فلاة))

تقبل الله منا ومنكم صالح الاعمال

Ramy يقول...

جميل الكلام يا شيرين

جميل اننا لما نحس بالتقصير نبقى عارفين و منقوحش (:

ربنا يديكى قوة علشان تعملى كل اللى نفسك فيه و تقربى من ربنا اكتر و اكتر

.........

حتى انا كنت بشوف و اسمع د/عمرو خالد
(:

أبو حسام الدين يقول...

السلام عليكم

أولا أجد هذا البوح الطاهر محفزا للجميع ولكل مقصر مثلي.

جعل الله هذا في ميزان حسناتكِ.

محمد الجرايحى يقول...

بارك الله فيك وأعزك
وادعو الله تعالى أن يحفظك ويرعاك ويثبت على طريق الحق خطاك.....
وأحيي شجاعتك وصدقك مع نفسك وكلنا سيدتى فى حاجة أن يثبت الله قلوبنا على دينه.
تقبلى خالص تقديرى واحترامى
وكل عام وأنت بخير

reemaas يقول...

احساس التقصير ده يا شيرين كافى انه يخليكى تحاولى مرة واتنين وتلاته اوعى تياسى
كلنا مقصرين مهما وصلنا بالعبادات للكمال

FAW يقول...

إحساس عااااام

محدش علي فكرة يقدر يقول إنه مش مقصر

ربنا يقوينا ونعرف إيه الأهم

عايز أقولك إني قاعد بقالي يومين بفكر هعمل إيه في رمضان , عشان هبقي فاضي مش ورايا حاجة (غير الشغل طبعا) - (أنا بحب أعمل ميت حاجه) . . المهم , مجاش في بالي خالص إني أحاول أعمل حاجة لديني ولربنا . .

شكرا للتذكير كسبتي فيا ثواب :)
هكسب أنا كمان فيكي ثواب وأقولك إن "سور" القرآن بالسين مش بالصاد :))

تحياتي . .

Radwa Ashraf يقول...

بجد كلامك كله منطبق عليا .. احساسى بأن كلها حجج واهية
و محاولاتى دايما بيصيبها التقصير
شكرا لوضع جدول عبادات رمضان :)
أشكرك و أشكر نيللى على الجدول :)

Ms Venus يقول...

ياريت كلنا نحب ربنل بجد من قلبنا

ومش يبقى حبنا له مجرد مظاهر خارجية وبس

ربنا بيشوف القلب


جميل اننا نحس بالبعد ونحاول نقرب منه


كل سنة وانتى طيبة يا شيرين

سندباد يقول...

سيدنا محمد صلي الله عليه وسلم كان دائما يدعي بهذا الدعاء
اللهم اعنا علي ذكرك وشكرك وحسن عبادتك
جزاكي الله خيرا وجعله في ميزان حسناتك
رمضان كريم

zizi يقول...

شيرين الغالية ..قرأت بوستك الجميل ..وعجبني انك تحسي انك مقصرة وعلى فكرة كلنا مقصرين مهما عملنا بس المهم الآتي :1- لا نجعل تقصيرنا يثنينا عن المضي قدماً للأفضل يعني مانقلش ماحنا مقصرين مهما عملنا مش حانقدر ..لأ نبتدي وربنا حايعيننا ..2- مع الإعتذار للأخت نيللي ولغيرها ..هي طبعا مشكورة لكن كل انسان في الدنيا ادرى بظروفه مع ربه ولم يوجد على ظهر الأرض منذ ان خلق الله البرية من عمل جدول عبادات للآخرين والا كان اسهل على الرسول الكريم ان يعمل لأصحابه مثل هذا الجدول ..واقولك على حاجة كمان تقبل ربنا سبحانه وتعالى للأعمال يختلف من انسان لآخر المهم هو النية والإخلاص في العمل ..3-لا تقللي من قيمة اي عبادة تتقربي بها الى الله فالله يضاعف لمن يشاء ..يعني ماتقوليش انا ما عييش الا الجنيه ده قليل يمكن عند ربنا احسن من ميت جنيه بيدفعها واحد عنده ملايين .زكل واحد له ميزانه عند ربنا ..4- ربنا رب السنة كلها مش رب شهر رمضان بس وياريت نكون جوان الإحساس ده دايماً..يعني طول السنة فيه صيام الإتنين والخميس و13 و14 و15 من كل شهر عربي ..فيه الصدقة ..فيه قيام الليل وما اعظمه ؟؟فيه تبسمك في وجه اخيك ..فيه اخلاصك في العمل ..فيه بر الوالدين ..فيه صلة الرحم ..فيه الجيرة الحسنة ...كل الحاجات دي انتي بتستهوني بيها وهي عند ربنا مش حا قولك حا تعملك حسنات اد ايه..شيرين اخص خصوصيات العبد صلته بالله ..وما ادراكي اعترافك ده بالتقصير يرفع درجاتك عند ربنا اد إيه وخصوصاً انك حاتشجعي ناس تانية انهم يجدوا شوية في تقربهم لله ..
يا حبيبتي ربك رب قلوب وحاولي وانتي بتقري في المصحف وخصوصاً في الأول يكون جنبك مصحف صغير اللي فيه تفسير الكلمات عشان بس تبقى تعرفي المعنى العام للآيات وبعد كده نتكلم في التفسير الكبير ..تحياتي وارجو الا اكون قد ازعجتك ومعذرة العبادات مع الله عز وجل ليست بمواعيد ولا جداول ..عيشي مع الله بجوارحك وبتعاملاتك مع الناس والدين المعاملة هذا هو جوهر الدين ..والدليل على هذا سأترك ابنتي الحبيبة نيللي هي التي تجيب عليه ..قولي لنا يا نيللي الحديث الشريف :اتدرون من هو المفلس ؟؟انا باقولك كده عشان متأكدة انك عارفاه وعشان اشركك معايا في وجهة نظري لأنكم كلكم اولادي وانا لست داعية ولكني اعي تماماً جوهر الدين الإسلامي ..تحياتي وشكري لكي وللجميع

كريمة سندي يقول...

التقصير من طبيعة بني البشر فكل بني آدام خطأ وخير الخطائين التوابين

أعاده الله علينا باليمن والبركة فالله غفور رحيم ذو عرش مجيد فهو ليس في حاجة لعبادتنا له بل نحن في حاجة إليه

بارك الله فيك وحفظك وقوى إيمانك اللهم آمين

ريــــمــــاس يقول...

مساء الغاردينيا شيري
ومن منا لم يقصر في حق الله
رائع ماتفضلتي بطرحه
وجزاكِ الله خير انتِ والرائعة نيللي
؛؛
؛
لروحك عبق الغاردينيا
reemaas

شيرين سامي يقول...

نيللي العزيزه...أنا اللي بشكرك على مجهودك في وضع الجدول و ربنا يجعله في ميزان حسناتك.
إن شاء الله ربنا يقدرني إني أكون أفضل و أتقى لأني بجد محتاجه أقرب أوي الحمد لله أنا عموماً معرفش يعني إيه يأس لكن محتاجه همه عاليه.
شكراً ليكي يا جميل و يا رب دائماً تكوني إنسانه رائعه و متدينه زي ما إنت.

تحياتي الخالصه لكي

شيرين سامي يقول...

دعاء العطار: إنت وحشتيني أكتر و عندك حق يا دودو إحنا محتاجين نستغل رمضان عشان نقرب شويه من ربنا.

تحياتي ليكي يا جميل

آخر العنقــــــود يقول...

"تمنيت أن أفيق من كسلي"
يارب رمضان يكون بداية جديدة وفاتحة خير عليكي وعلى نفسي بردو اللى بوجه لها نفس ما كتبتيه

ربنا يثبتك ويثبتنا جميعا

تحياتي

شيرين سامي يقول...

استاذ إبراهيم: كل سنه و حضرتك بألف خير و الأسره الكريمه...ربنا يقدرك على حسن تربيتهم التأسيس من الصغر أكيد أسهل بكتير.
تحياتي و إحترامي لك

شيرين سامي يقول...

Bent Men ElZaman Da !!: ياريت الواحد يرضى عن نفسه من الناحيه الدينيه أعتقد صعب بس أدينا بنحاول و ربنا يقدرنا إننا نكون أفضل.
شكراً لزيارتك الجميله و ربنا يبلغنا رمضان و يتقبل عبادتنا فيه.

تحياتي الخالصه لكي

شيرين سامي يقول...

سواح في ملك الله: أخي الفاضل خالد أنا لم أقصد حرمانيه خالص لكن قصدت تقصير و في فرق كبير.
أنا كمان إنسان بحبه أوي و هو أخي الأكبر علمني يكون ليه حاجات صغيره بيني و بين ربي أعملها كل يوم عشان قلبي يفضل متعلق بيها و فعلاً أنا اليوم اللي مبقراش فيه قرآن بحس إن ناقصني حاجه مهمه.
كلها وجهات نظر و الغرض واحد و هو التقرب إلى الله ربنا يقدرني و إياكمز

تحياتي و كل التقدير لك

شيرين سامي يقول...

مصطفى سيف: بارك الله فيك يا مصطفى إنت كمان و ربنا يقدرنا جميعاً على طاعته و حسن عبادته.
تحياتي أخي العزيز

شيرين سامي يقول...

موناليزا: شكراً يا حبيبتي إنك أضفتي الأحاديث القيمه دي للبوست أنا طبعاً عرفاهم و بسعد جداً عندما أقرأهم لكن مش عايزه أفضل طول عمري طمعانه في كرم ربنا نفسي أقرب أكتر نفسي.
شكراً جداً ليكي و جزاكي الله خيراً
تحياتي لكي

شيرين سامي يقول...

Ramy:شكراً يا رامي على زيارتك و أمنيتك الحلوه لي أكيد مقدرش أقاوح يا رامي الا دي.
عمرو خالد إنسان متحضر و واعي و قادر يحب كل الناس عشان كده ربنا حبب فيه الناس.
نورتني يا رامي

شيرين سامي يقول...

أبو حسام الدين: و عليكم السلام و رحمة الله و بركاته
سعيده إنك إعتبرت كلامي محفز و أتمنى كل مقصر مثلي ينتهز فرصة رمضان لنزداد قرباً لله.
تحياتي و كل الإحترام لك

شيرين سامي يقول...

محمد الجرايحي: أستاذي تعليقك أسعدني جداً و دعواتك الرائعه أثلجت صدري أتمنى أن يتقبل الله منك.
أتمنى أن يثبت الله خطانا جميعاً و يقدرنا على طاعته و حسن عبادته.

أشكرك شكراً جزيلاً سيدي الفاضل
كل عام و إنت بألف خير

شيرين سامي يقول...

reemaas: مبيأسش يا نور طبعي إني مبيأسش بس ربنا يقدرني أكون أفضل و أدوم على الطاعه.
نورتيني يا جميل

شيرين سامي يقول...

FAW: عند حق هو إحساس عام فعلاً حسيت أكتر من رد فعل الناس على البوست...على فكرة أنا كمان بحب أعمل مية حاجه و محبش أقعد فاضيه أبداً...ربنا يقدرنا يا مصطفى نقرب أكتر و نستغل فرصة رمضان اللي كل عمل فيه أجره مضاعف...شكراً على الثواب دائماً بتصلحلي كده و تاخد ثواب فيه ماشي ماشي:)

نورتني

شيرين سامي يقول...

Radwa Ashraf:شكراً يا رضوى على زيارتك و تعليقك المشجع ربنا يقدرنا جميعاً على حسن عبادته و التقرب له.

تحياتي الخالصه لكي

شيرين سامي يقول...

Ms Venus: و إنت طيبه يا فينوس بجد زيارتك و تعليقك في البوست ده له طعم تاني شكراً ليكي يا حبيبتي و كل كلامك صحيح جداً المهم القلب و ما يحمله.

كل سنه و إنت بألف خير

شيرين سامي يقول...

سندباد: الله أكرم من أجمل الأدعيه شكراً إنك شاركتنا بيه جزاك الله كل خير.

تحياتي و كل الإحترام لك

شيرين سامي يقول...

zizi: نورتي المدونه و شرفتيني بتعليقك إسمحيلي أرد على نقطه نقطه,
1-صحيح كلام حضرتك مش مفروض إحساسنا بالتقصير يخلينا نكسل المفروض يكون حافز للمضي قدماً و ده اللي بحاول أعملهز
2-ماما زيزي هقولك على حاجه عن تجربه أنا دائماً بعمل جدول لكل شئ أحب أنجزه يعني جدول للمذاكره جدول للعمل فيه اللي عملته و اللي بخطط إني أعمله و اللي نفسي أوصله, و بصراحه موضوع الجدول ده كان دائماً بينجح أو على الأقل بيوصل لأحسن نتائج زي ما في إتجاه عالمي إننا نربي أطفالنا على جدول للثواب و العقاب و جدول نأيد فيه كل عمل صائب و عمل خاطئ...كمان جدول للأحلام و الأماني اللي نفسنا نحققها, تقدري تقولي يا ماما زيزي إن جدولة الأعمال نوع من التنمية البشرية الحديثه عشان نحفز و نشجع نفسنا و ده طبعاً مجرد رأي.
3-مقدرش أقلل من أي عباده لكن بطمع في عبادات أكثر أو على الأقل نفس العبادات أعملها بتركيز و ضمير أكتر و كلام حضرتك صح جداً.
4-رمضان شهر عظيم و عظمته إن كل عمل فيه ثوابه مضاعف و يكفي قدره عند ربنا و مقدار الرحمه و المغفره و العتق من النار عشان كده بنحب نستغل الروحانيات الشديده في هذا الشهر الكريم عشان نعلى بأروحنا و عبادتنا لكن ده ميمنعش إن المسلم لازم يحاول دائماً يبقى أفضل و يداوم على الطاعه طول السنه مش في رمضان بس.
أشكرك على نصيحتك الغاليه في قرآة القرآن و فعلاً مش مفروض أضغط على نفسي مفروض أخد كل خطوه بالتدريج...إزعاج إيه يا ماما زيزي ده تعليق رائع و أسعدني جداً و أهم شئ المعاملات زي ما حضرتك قلتي (الدين المعامله) و الحمد لله أنا في النقطه دي مطمإنه شويه لأني الحمد لله براعي ربنا جداً لكن مشكلتي في العبادات و المناجاه اللي بقتقدها جداً نفسي أبكي من خشية الله نفسي.

شكراً كتير ليكي و نورتيني بالزياره
تحياتي و كل الود لكي

شيرين سامي يقول...

كريمه السندي: خير الخطائين التوابين...ما أسعدني كلما سمعت هذه الكلمات ربنا يقدرنا دائماً على طاعته و حسن عبادته أنا في حاجه لربنا جداً و أكيد بحاول أرضيه عشان سعادتي من رضاه.
بارك الله فيكي يا عزيزتي
نورتيني بالزياره

شيرين سامي يقول...

ريماس: كلنا في حاجه لرضا الله ربنا يقدرناعلى التقرب له دائماً ليرضى عنا.
شكراً يا ريماس أسعدتيني بتعليقك
تحياتي الخالصه لكي

شيرين سامي يقول...

آخر العنقود: ربنا يتقبل من جميعاً و يجعل رمضان بدايه جيده للتقرب إلى الله.

شكراً يا عزيزتي على تعليقك الجميل
أرق تحية لكي

نيللى يقول...

بصى يا "zizi" انا عارفه الحديث عن الرسول صلى الله عليه وسلم قال صلى الله عليه وسلم: ان المفلس من أمتي من يأتي يوم القيامة بصلاة وصيام وزكاة، ويأتي وقد شتم هذا وسب هذا، وقذف هذا، وأكل مال هذا، وسفك دماء هذا، وضرب هذا، فيعطى هذا من حسناته وهذا من حسناته فإن فنيت حسناته قبل ان يقضي ما عليه أخذ من خطاياهم فطرحت عليه ثم طرح في النار” صدق رسول الله صلى الله عليه وسلم (رواه مسلم).

ثانيا كل انسان طبعا حره فى تفكيره ..لكن انا هتكلم عن نفسى وهرد فى نفس الوقت على كلامك

انا الحمد الله مش بطبق بس الدين صلاه وبس او ذكاه وبس بل كمان معامله ..لكن لو هتكلم عن نفسى فى ان احب اتقرب الى الله ولكن فى نفس الوقت فى عدون لي هم الشيطان والنفس االبشريه فلازم اتغلب عليهم واعمل اى شئ للتقرب منه ..فمثلا فى رمضان فى مسلسلات ومليون حاجه تلهينى عن ربنا فلم اعمل جدول التزم بيه عشان اقرب من ربى "تعتقدى اى هخد ورز او سيئات" وله المفروض دى شئ كويس انه بحاول اقرب من ربنا...

انا مش بحاول اصلى وخلاص وكمان بحاول اتفقه فى دينى

ثانيا بتقولى الرسول كان عملنا جدول صلى الله عليه وسلم ...ومين قالك ان الرسول معملناش جدول ...هو مش اللى انا كتبه فى الجدول ربنا ورسول طلبو مننا ولا انا مخترعه من عندى

بصراحه مش فهمه سبب اختلفك بس طبعا انا مفرضش الجدول ده على حد وهو فى الاخر مش جدول مسلسلات رمضان هو جدول ازاى الانسان يتفقه فى دينه ويقرب من ربنا

حتى مش فهمه سبب سؤالك عن الحديث انا الحمد الله جدول واضح انه بيرعى الاخلاق والتقرب من الله ..ومش عيب ابدا ان الانسان يكون لى ورد فى اليوم يمشى عليه وبعدين ...بتقولى ربنا امشى معه بجوارحك ..تفتكرى ان عشان توصلى لحب ربنا ده بالسهل كدا ..وله عشان تتفقهى فى الدين بالسهل ..ان الواحد يسيبها كدا مفتوحه امال الشيطان وظيفتو ايه ...على عموم كل انسان حره فى رايه ..وفى اختيارته وبعدين بتقولى صدقه وتبسم فى وش اخيك اكيد مش هكتب انى بطلع صدقه وبضحك لناس فى وش الناس ..ولو ركزتى شويه فى الجدول كاتبه الاخلاق ...وهى شامله كل اللى انتى كتبه...يعنى جدولى شامل الاخلاق والعبادات والسنن ...اللى امر بيه الله ورسوله وعلى عموم اكيد مش هدخل النار عشان عملت جدول وشكرا ليكى

نيللى يقول...
أزال المؤلف هذا التعليق.
نيللى يقول...

اخت زيزى ادعلنا بس ربنا يثبت ايمانا ويقوينا ...والدين دين يسر مش عسر .

نيللى يقول...

حاجه اخيره اخت زيزى مش عارفه ليه داخله فى موضوع الاخلاق مين قالك انى معرفش المفروض تكون اخلاقى ازاى ..وكل ده عشان بعمل حاجه تقربنى من ربنا ..لا اله الا الله ...ولو تقصدى من الحديث الاخلاق الحمد الله ازاى هكون بفسر قران وبقيم ليل وبقول عاوزه اقرب من ربنا وهشتم الناس واغتبهم ..عشان تسالينى او تنقشنى فى اخلاقى لازم تكونى تعرفنى ...وبعدين كل حاجه فى حياتنا بجدول الا تقرب من الله مش عاوزين نعملها ...على فكره الجدول مش بدعه...وانا سعيده انى بجتهد باخلاقى وانى بفكر ازاى اقرب من ربنا ...وربنا يحسن ختمتنا يارب

zizi يقول...

العزيزة نيللي ..
اولاً ..انا ىسفة على تأخر الرد عشان كنت برة المنزل ..
ثانياً :يابنتي لا انا اعرفك لابعداً ولا قرباً عشان اشتمك أو اقلل من شأنك كما تحاولين ادعاءه ..ولكنها كما تقولين وجهات نظر وطريقة تفكير ..ومتهيألي ان شيرين قرت التعليق زيك بالضبط ولو فيه حاجة تأذيكي ماكانتش نشرته أو كانت ردت بما يوحي إليه هذا التعليق ولعلمك انا عندي زوجة ابني منقبة وقد تناقشت معها هي وابني فهي ايدت موضوع النصح بجدول معين اذا وجدنا انه قد يساعدنا في آداء العبادات ..
وابني اتفق معي ان لكل انسان جدوله او اهتماماته الخاصة به ..حسب احتياجاته وظروف عمله ..وبعدين ياستي حاشا لله ان نكون بنتكلم في العبادات الخاصة بالشهر الكريم ..واكون انا ممن ازعل انسانة لا اعرفها ولا تعرفني ..يا ستي اٍسألي عني صحابي المدونين ..انا لست جراحة ..اي انا لست ممن يجرحون الآخرين ..واعملي يا بنتي اللي انتي عايزاه ولا يهمك وسيبك من البت زيزي دي خالص انتي ياستي على راسي وعيني من فوق وتاني مرة اذا هوبت ناحية مدونة انتي معلقة فيها ابقي شهدي عليا خلق الله ..والعملية ما كانتش طالبة منك تتعبي نفسك في تلات تعليقات ورا بعضهم عشان توريني مقامي ..الحر تكفيه الإشارة يانيللي ومش عارفة انت يا في دور بنتي او حفيدتي ..المهم انا زي ماما او تيتا معلش بقى انتي عارفة الواحد لما بيكبر بيخرف احتملي تخاريف نهايات العمر ...تيتا زينب

zizi يقول...

شيرين الغالية العالية ..تحياتي وآسفة ان كنت سببت لك اي ازعاج ..بدون قصد ..على صفحة مدونتك الهادئة ..بس انا حاتكلم كلمتين لأني لست ممن اخرج من الميدان بسهولة وخاصة ان كان قصدي لم يفهم ..
اولاً :أنا اتخضيت من طريقة رد الأستاذة الفاضلة نيللي وحسيت ان العملية احتمال يكون فيها دم والا حاجة فلازم اقول لولادي من دلوقتي انهم احتمال "ينطخوا عيارين "ويفضل معاهم التار ده ويورثوه لولادهم والعملية مش ناقصة ..كفاية ثوار التحرير ..
ثانياً..أنا يا بنتي صحيح في سن ماما او أكبر شوية أو أصغر شوية مش مهم ..المهم ان انا طبيعتي بأهوى المعرفة ومن زمان وانا باجمع كل ماهو جديد واهتم بيه وطبعاً لما دخل النت كنت مهتمة إني اتعلم فنونه ..رغم اني في مجمل حياتي الناس ممكن تشوفني اني خلاص واحدة قاعدة في البيت ..
يبقى اطبخ واغسل واجيب الحاجة من السوق واقرالي شوية قرآن ..وكان الله بالسر عليم ..لكن اللي احب اوضحهولك لكي وللناس ان انا لا أجد في العلم بالشيء أي انتقاص من معلوماتي ..بل اجد انه من احدى دعامات الدين :اطلبوا العلم ولو في الصين ..

ومن هذا المنطلق احب ان اوضح لكي وللسادة المشاهدين اني من الناس الذين يضعون جداول لأنفسهم طوال العام وليس في رمضان فقط ...ثانياً اني من المداومات علي متابعة كل جديد في مسألة التنمية البشرية ولدي جميع كتابات د.ابراهيم الفقي ..واهديت ابني منذ سنوات كتاباً له كان عبارة عن جداول لتحقيق الأهداف سواء اليومية او الأسبوعية او الشهرية او السنوية أو الخطط الخمسية..
يعني انا ادرك تماماً ان هناك مايسمى بالتخطيط ..ولكني اعترض على شيء واحد ..ان كل واحد له التخطيط المناسب له هو شخصياً وماهو مناسب لكي قد يكون غير مناسب للآخرين حسب وقتهم وطاقاتهم زادت او قلت ..وهذا هو محور قضيتي .."العامة"وبالطبع لا اخص بها "نيللي " او غيرها ولكني خصصتها بتكملة الحديث تقديراً لعلمها ..فانا اعرف الحديث تماماً ..ولكني ادراكاً مني انها من اهل العلم بأقولها :كملي يا نيللي ..تقديراً لها وليس انتقاصاً من علمها ..والحاجة الأخرى اللي عايزة اقولك عليها يا شيرين اني لو كنت معايا تليفونك ماكنت قلت كل هذا الكلام وكنت قلتهولك لوحدك على السماعة ..بصي يا شيرين انا عايزة اوضح وجهة نظري في برواز "طالع منه نيللي "::وجهة نظري ان كل انسان العلاقة بينه وبين ربناعلاقة خاصة جداً..وقد تكون عبادتك اقل من فلان ولكن الله له من عناصر تقييمه لنا ما يختلف عن عناصر تقييم البشر ..حتى أني قرأت ذات مرة في أحد التفاسير ان اسم الله الأعظم قد يكون مختلفاً من شخص لآخر ..يعني مثلاً اذا فرض واني دعوت الله باسمه "اللطيف "وابحرت في تجليات هذا الإسم فقد يكون هذا بالنسبة لي هو الإسم من اسماء الله العظمي الذي إذا دعوت الله به استجاب ..بينما انتي مثلاً قد تجدي ضالتك في إسمٌ آخر ..وهكذا ..يعني انا
لاانكر عليكي او على غيرك وضع نظام معين او الإستعانة بنظام معين ولكن مما لاشك فيه ان لكل انسان عاداته وقدراته سواء من وضع هذا الجدول س او ع او ن ..مع خالص تحياتي لك ولكل من يحترم هذه المدونة وروادها..

zizi يقول...

أ.نيللي ..
لقيتك في ردودك مقهورة قوي مني ..انا يابنت الناس الطيبين لم اقصدك انتي بأي كلمة غير حاجتين محددتين ان شيرين قالت فيه جدول من نيللي ولو شيرين قالت فيه جدول من سعاد او علية او سنية كنت حاقول اي اسم من دول يعني انتي مش مقصودة بشخصك واقصدك ليه وانا ما عرفكيش ؟؟؟
ثانياً اني قد اكون ادركت ..والعلم عند الله ...انك اكيد مادام داخلة في امور الدين حاتكوني عارفة الحديث ده اللي بيؤكد ان الدين المعاملة فأنا باقولك قوليه يا نيللي عشان يمكن لو قلت لشيرين او غيرها قوليه مش حاتكون عارفاه ..يعني عايزة أأكد عن طريقك ان الدين زي ماهو فيه عبادات هو دين معاملة عشان اطمن شيرين ان ربنا بيعملنا درجات اعمال سنة في كل امورنا الحياتية مش بس للعبادات بس وهذا الحديث لاأخصك انتي به بل اختصصتك بذكره زي المعلم لما يقول للألفة بتاع الفصل قوللهم بيت الشعر الفلاني هل المدرس مايعرفهوش والا عشان عارف ان التلميذ ده شاطر؟؟
عموماً متهيألي ان برضه من صفات المؤمن اللي بيشتغل في الدعوة انه يكون افقه واسع وصدره اوسع ..متهيألي كده ومعذرة عشان افقي ضيق سايبالك انتي اربع اوض وصالة ..وباقي مدونة شيرين.. بس لو سمحتي انا كنت باوضح وجهة نظري ومش عايزة رد عليها خلاص انا اكتفيت كفاياني تلات تعليقات منك..دانا غلبببببببببببببببببببببببببانة