الجمعة، 1 يوليو 2011

أخيراً و ليس آخراً

خلاص انهارده آخر يوم في شهر يونيو و نهاية حملة التدوين اليومي يا رب ماتكونوش زهقتوا مني , كان من أجمل الشهور برغم من أني كنت بكتب تحت ضغط الشغل و البيت و الفيرس اللي بيهدد الجهاز, كل بوست كتبته كنت بفكر فيه طول النهار و أكتبه بليل و أنشره و زي ما يطلع عشان كده نفسي تقيموني بعيداً عن المجامله في التقيم اللي تحت عشان عايزه أعرف أنا واقفه فين بالظبط إيه اللي عجبكم في كتاباتي و إيه اللي معجبكومش عشان أحاول أغيره.

ده أول هام تاني هام بقى أنا قررت إن زي ما الشهر اللي فات كان شهر التدوين اليومي الشهر الجاي يكون شهر القراءة اليوميه لأن اللي مبيقراش مش هيعرف هيكتب أنا كنت بدأت في روايتين و لسه مكملتهومش ده غير تقصيري الشهر اللي فات في قراءة القرآن , و غير كمان اني عايزه أتابع مدوناتكم و أتعرف على مدونات جديده كان زارني أصحابها و معرفتش أتابعها, عشان كده قررت أخد أجازه صغيره عشان حتى تستريحوا مني شويه:)

إستمتعت الشهر اللي فات بمتابعة مدوناتكم الممتعه الساخره الراقيه, و إستمتعت طبعاً بالكتابه اليوميه خلقت عندي أفكار كتير و يمكن بقيت أحسبها آخر أيام عشان الأفكار تزاحمت في دماغي و كنت عايزه أختصرها للأفضل, كتبت عشرين بوست تحت إسم قصاقيص من حياتنا هي غالباً من حياتي لكن لأنها بتشبه ناس كتير سميتها حياتنا و نزلت ثلاث أشعار أو خواطر كنت كتباهم قبل كده و قصة قصيره إسمها (يوم الخميس) في حملة إتكلمي و مقال عن التحرش إسمه (أنا آسف يا تحرش) في يوم التدوين عن المشكله دي, و بكده أبقى نزلت 25 بوست في شهر يونيو.
أنا سعدت جداً بمتابعة تدويناتكم حتى لو كانت مش بتتنشر كل يوم , هستنى تقيمكم و هستنى تقولولي ايه أكتر تدوينه عجبتكم و ليه و ايه أكتر واحده معجبتكومش و ليه بردو, هيوحشني النشر اليومي بس فعلاً محتاجه أجازه.

تحياتي و تقديري و حبي للجميع



شيرين

هناك 20 تعليقًا:

Casper يقول...

انتي اشرتي إلى نقطة مهمة جدا وهي القراءة

القراءة بجد متعة خاصة جدا
لا استطيع وصف احساسي عند خروجي وحيدا للعمل أو في الذهاب إلى قريب لي وبين يدي كتاب يؤنس وحدتي في المواصلات

__________

خالص تقديري لفكرك وقلمك
وبالتوفيق دائما

إســـراء يقول...

كتاباتك جميلة أوى يا دكتور
أنا مش بتابع مدونات وأول مرة أقرألك بصراحة بس فعلاً اسلوبك يستحق القراءة والثناء وان شاء الله اتابع مدوناتك

بالتوفيق والى الامام دائماً بإذن الله

Bent Men ElZman Da !! يقول...

كان شهر جميل بكل التدوينات اللى نزلت فيه
انا حبيت طريقتك اوى يا شيرين
لانها بسيطه وبتوصل لقلب الواحد بسرعه مهما كانت الحاجه اللى بتتكلمى عنها
ماتبقيش بس تطولى فى الاجازه :))

ابراهيم رزق يقول...

اختى شرين المبدعة

يا عندليب متخفش من غنوتك
قول شكوتك و احكى عن بلوتك
الغنوة مش هتموتك ..انما
كتم الغنا هو اللى هيموتك
عجبى

ما تتميزى به يا شرين هو البساطة و التلقائية و يمكن ده سبب حبى لجاهين بساطة فكرته كونى كما انتى و غنى كما تريدين
البوست الاخير كان فعلا مسك الختام
كان نفسى اكمل الشهر لكنى انقطعت قليلا لظروف و حاولت العودة و مازلت
عندى فكرة لاحياء المعطف نختار مدونين ليكملوا اجزاء المعطف الى ثلاثين على الا يكتب اى مدون الا جزء واحد و عليه ان يكمل الجزء الذى يليه خلال يوم اى المهلة يوم واحد مش عارف دى فكرة و لا تخريفة على العموم ادرسيها

تحياتى

Carmen يقول...

والله ياحبيبتي انت من اجمل الناس اللي قرأتلها شخصية وفكر واسلوب
ودايما متابعاكي باذن الله

مصطفى سيف الدين يقول...

احنا استمتعنا جدا في مدونتك
بتعجبني طريقة سردك كلماتك البسيطة تصل للقلب والعقل معا انتي دايما بتبهرينا يا شيرين وكل تدويناتك كانت جميلة اوي وبصراحة مش عارف اختارلك ايه سامحيني
فكرة الاستاذ ابراهيم للمعطف فكرة مجنونة :)
تحياتي

سندباد يقول...

استمتعنا جدا معاكي بكتابتك وخواطرك واراءك وافكارك واعتقد ان كلنا فعلا علي قناعة تامة وكاملة ببراعتك في الكتابة وجذب الانتباه
لذا نحييكي جميعا علي مجهودك وبراعتك في الكتابة
انا بالنسبة للقراءة ففاقد الشئ لا يعطيه اذا لم تقرأ لن تكتب
تحياتنا الخالصة

eng_semsem يقول...

اكيد عارفين وحاسين بالمجهود الكبير اللي عملتيه خلال الشهر بس احنا اتعودنا نيجي نشوف كل يوم موضوعوك الجديد ما تتاخريش كتير
تقبلي تحياتي واعجابي بكتاباتك

كريمة سندي يقول...

خدي راحتك عزيزتي الدنيا ما طارتش

اكتبي في الوقت اللي عايزه في نحن بانتظارك

غير معرف يقول...

مساء الغاردينيا شيري
طبعاً أنا كنت سعيدة جداً طول الشهر الي فات ويمكن عمري ماعرفت جمال كتاباتك غير الشهر الي فات لاني كنت بتابعك الا في ايام سفري بس بجد كتاباتك جميلة ورقيقة وحبيت كتثير بحب نفسي حسيت ببرائتك وصدقك ودا بيكون اجمل حاجة
اممم نديكي اجازة بس اوعي تطولي لانك بتوحشينا :) "
؛؛
؛
لروحك عبق الغاردينيا
كانت هنا
reemaas

سواح في ملك اللــــــــــــــــــه- يقول...

كتاباتك كانت رائعة

في المجمل

اكتر بوست عجبني بتاع امن والدراسة

ووصف الاخاسيس لام

ووصف الاحاسيس لطفل

اجدتي الوصف وعبرتي جيدا

تحيتي

Noha Saleh يقول...

انا بحب القراءة جدا
تخيلى بقى ان الوقت عندى دلوقتى ضيق اوى ومع ذلك بحاول
بس المشكلة ان معايا كتاب بقالى 3 شهور مش عارفة اخلصه ومعاياي رواية عاوزة اقراها بس مش بعرف ابدا فى حاجة غير لما اخلص اللى قبلها بس انتى شجعتينى جدا

Noha Saleh يقول...

انا بحب القراءة جدا
تخيلى بقى ان الوقت عندى دلوقتى ضيق اوى ومع ذلك بحاول
بس المشكلة ان معايا كتاب بقالى 3 شهور مش عارفة اخلصه ومعاياي رواية عاوزة اقراها بس مش بعرف ابدا فى حاجة غير لما اخلص اللى قبلها بس انتى شجعتينى جدا

جايدا العزيزي يقول...

مبروووك شيرى
واهلا بالراحه والاستجمام

اعذرك الشهر الماضى كان مرهق جدا بالنسبلك

ولكنك متعتينا بابداعات منفرده

ادام الله عليك ابداعك

تحياتى

Mostafa gazar يقول...

والله كان شهر جميل وكل قصوصه كانت رائعه و متميزه ومبدعه وبجد كنت أنتظر بلهفه كل يوم لأقرأ ماذا ستكتبين ..... و غياب شهر كتير ياريت نقرأ عمل جديد لكى قريبا.....و القراءة متعه ......أنا أقرأ الن رواية قمر على سمرقند للمبدع محمد المنسى قنديل
أتمنى لكى دوام الصحه و الخير والسعاده

و التدوين
:-))

مها البنا يقول...

شيرين ..

رغم انى زعلانه انك مش هتنزلى بوست تانى قريب .. لكنى احترمت تفكيرك قوى

جميل ان الانسان من فتره للتانيه يقف ويعد اللى انجزه ويفكر ازاى ينجز اللى معملهوش ويقيم كل ده تقييم حيادى

بالنسبه للقرايه .. فانتى عندك الف حق .. القرايه دى عالم بذاته عالم كده ملهوش وصف .. تقدرى تقولى عليا مدمنة قرايه

يعنى ممكن فى يوم اقرا كتابين او اكتر .. ولما انزل على موقع من مواقع الكتب .. مش بسيبه غير لما اقرا كل اللى عليه .. سياسه ، اقتصاد ، قصص ورورايات ، أدب ، فن .. الخ. بستمتع ع ع ع ع ع بحاجه اسمها قرايه ونفسى قوى الناس كلها تقرا

بس ده لا يمنع ان اللى بيقرا ياخد فى اعتباره قول الكاتب الرائع انيس منصور لما قال ..

إذا كنت ستصدق كل ما تقرأ .. فلا تقرأ

تقبلى إحترامى .. وتقييمى لمدونتك انها اكتر من رائعه .. يكفى انها بتلمس حياتنا وبتحترم عقلنا .. الى جانب مستوى ادبى لا يمكن اغفاله

تحياتى يا قمر

Ms Venus يقول...

شيرين

اجازة سعيدة بس ارجعى لنا بسرعة


كتاباتك كلها جميلة انا عن نفسى بحب جدا اسلوبك

سلس وسهل ممتنع بيوصل كده بسرعة للقلب

فعلا بتكبى حاجات كتير بنحس فيها اننا الابطال

حبى واحترامى ليكى

أحمد محمدي يقول...

بارك الله في جودكم البيضاء

يقول كافكا ان الكتابة ضرب من الصلاة

شكرا

eng_semsem يقول...

ينتظرك واجب تدويني بعنوان صندوق الذكريات اتمنى تقبله مني

Unknown يقول...

يا شعبي الحبيب بحبكم جداً و بشكركم جداً جداً مستنياكم في البوست الجاي :)