السبت، 16 أبريل 2011

تاج الثوره...سيظل فوق رأسي :)

أجمل تاج في الدنيا و بالرغم من إنشغالي الشديد و يمكن محدش مررهولي لكن أنا نفسي أحلّه أويييي :)
السؤال الأول: * هل توقعت ثورة 25 يناير؟


أكيد متوقعتش الثوره بشكلها اللي شوفناه لكن توقعت اننا هنتغير مش هنفضل كده ساكتين و سلبيين و آخرنا شتيمه و نقد و قفشات, كنت حاسه إن ضيق الناس بيزيد و بيكبر كنا عاملين زي الفاكهه اللي إستوت لحد ما بقت جاهزه تقع من على الشجره, كنت بكره أوي الناس المحبطه اللي بتقول مفيش فايده و هما غالباً لسه بيقولوا مفيش فايده...و كانت الناس القريبه مني تتريق عليا لما أقول في أمل كتبت (مقدرش أحب غيرك) و كتبت (لسه في ناس بتحبك) و ناس كانت بترد عليا "نحبها ليه" و "مش لما تبقى بلدنا" و ردود كتير مُحبطه...بس أنا مبيأسش :)
الشباب اللي كان الكل متحامل عليهم كتبت (جيل فاشل صحيح) عشان أقول إنهم إتظلموا و إنهم يمكن أفضل من الأجيال السابقه, الملاين اللي كانو بيصلّوا التراويح و يدعوا من قلوبهم, الألوف اللي شغالين في الأعمال الخيريه و الاهتمام بالغير, الاعلامين و الكتاب الشرفاء, وعي الناس بمشاكلها ,ثقة الكثير منا في نفسهم و قدرتهم,  النيــــــل, الأهرمات, كل دول كانوا بيطمنوني.


* وهل كنت من ثوار ميدان ( التحرير - الكنبة - الكمبيوتر - حدد الميدان الآخر الخاص بك)؟


هو إيه ميدان الكنبه ده؟ :)
ميدان التحرير طبعاً...صحيح منزلتش غير مره واحده لأسباب زوجيه قهريه بحته لما قلت "أنا لو منزلتش ولو مره هحس بالندم و الضيق طول عمري"...لكن مفيش ميدان غير التحرير و قلبي و أعصابي و أهلي كانوا هناك.


* ما لم تنجح الثورة في تحقيقه هو:


الثقه, للأسف خرجنا من الثوره و كلنا عندنا أزمة ثقه...لا قادرين نصدق حد و لا عارفين نثق في حد و كله بيخون كله و الصدمات من الناس تتوالى و مؤقتاً الديمقراطيه, لسه مش بنتقبل آراء بعض لكن بردو ده صحي و عادي في الفتره دي و مفتكرش هيطّول.


* أكثر شىء فرحك في هذه الثورة هو:


السؤال مفروض يبقى إيه اللي مفرحنيش في الثوره, بس أكتر حاجه إننا أثبتنا لنفسنا و للعالم إن المصريين مش بيسكتوا على حقهم و لو بعد حين و إننا وضعنا أقدامنا على أول طريق التقدم الصحيح و المساواه و العدل اللي فاقدينهم  من زمان...كمان فرحني أوي إننا كعرب قربنا من بعض و إتوحدنا أكتر كشعوب طبعاً, أنا عن نفسي العروبه عندي زادت جداً.


* الشخصية التي أعجبتك خلال الثورة:


من غير تحيز أبي و أمي عشان هما في سنهم ده تحملوا المشقه و العناء و كانوا معظم الوقت في الميدان من أول يوم...مستجابوش لرجائي إنهم مينزلوش و مسمعوش كلام أخويا اللي كان بيقابلهم صدفه هناك كانوا مُصرّين و ثابتين و مؤمنين بدورهم في تشجيع الثوار و دلوقتي بيقولوا أجمل أيام حياتنا,  بجد أحترم شجاعتهم و إيمانهم و إخلاصهم للثوره.


* الشخصية التي احتقرتها بسبب الثورة:

الاعلام المصري و معظم الفنانين المصريين و بعض الناس اللي أعرفهم للأسف.


* أطرف ما سمعته خلال الثورة؟


لما كان النت قاطع كنت في منتهى الاكتآب و الشعور بالخيانه و الضيق و الخوف لكن لما النت رجعت و بدأت أقرى و أسمع و أشوف خفة دم الناس المتناهيه وسط كل الأحداث دي حسيت إن روحي إتردتلي, فعلاً تعليقات المصريين و إبتكارتهم الكوميديا بتخفف عن الواحد كتير...أطرف حاجه اليفط اللي كانوا رافعينها في الميدان زي "إرحل عشان إيدي وجعتني" "إرحل عشان عايز أرجع لمراتي" "إرحل عشان عايز أحلق"


* القناة التي تابعت من خلالها أحداث الثورة هي:


الجزيره, العربيه البي بي سي و شبكة رصد.


* الجريدة التي كنت تقرأها لتتابع الثورة:

المصري اليوم.



* الكاتب المفضل خلال الثورة:

بلال فضل و عمر طاهر.


* المذيع (المذيعة) المفضل خلال الثورة هو:

مفيش.


* كلمة تقولها لشهداء وجرحى 25 يناير:


وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا بَلْ أَحْيَاءٌ عِنْدَ رَبِّهِمْ يُرْزَقُونَ


عمرنا ما هننساكم أبداً و دمكم مش هيروح هدر.
و الجرحى كل ألم حسيتوا بيه رفع راسنا لفوق أشكركم من هنا لحد آخر يوم في عمري.
 
* متقولش إيه إدتنا مصر وقول حندي إيه لمصر.. عندك حاجة تديها لمصر؟


اني أكون قدوه و معملش حاجه تُسئ لبلدي أو أهل بلدي و مسكوتش على أي وضع خطأ.


* من سترشح لرئاسة الجمهورية؟ ولماذا؟


مش هقدر أحدد دلوقتي أنا بأقُدر البرادعي لأسباب كتير أبسطها انه أول واحد قال مبارك لازم يرحل و الوحيد اللي متفاوضش مع عمر سليمان.


 * لو أصبحت رئيسا لمصر ما هي أول ثلاث قرارات لك؟


كتبت بالتفصيل بوست طويل إسمه ( أنا رئيسة الوزراء...إنت مين؟) كان واجب تدويني, أكيد أول قرار هيكون إعادة الأمن و الأمان بأي ثمن و إعادة هيكلة الداخليه و معاقبة اللي مش هيقوم بواجبه, ثاني قرار هيكون خاص بتوفير الغذاء و القمح و الاكتفاء الذاتي و حل مشكلة منابع حوض النيل, ثالث قرار هيكون إيجاد فرص عمل و محو الأميه , طبعاً تطوير التعليم و البحث العلمي و الصحه مفيش خلاف عليهم لكن لهم خطط طويلة المدى ميخلصوش في قرار.


* لو أعطوك نصيبك من المليارات المسروقه, ماذا تتوقع أن يكون نصيبك منها و ماذا ستفعل بهذا المال؟


هههههه أهي دي حاجه من الحاجات اللي بتضحكني أوي الناس فاكره نفسها تورث, و مستنيين نصيبهم بجد مش هزار, عموماً المال اللي إتسرق من الناس لازم يرجع للناس على هيئة مشاريع توفر فرص عمل ,مساكن بدل العشوئيات, توفير الخدمات الأساسيه لكل بيت ,تطوير قطاعات التعليم و الصحه, تحسين الاقتصاد , إنهاء الديون, رفع المستوى الإجتماعي للفرد.....و حاجات تانيه كتيييير السرقه قضت عليها.


 بمرر التاج ده لـــ


يوميات شحات صاحب مدونة يوميات شحات
سواح في ملك الله صاحب مدونة سواح في ملك الله
منى أبو السعود صاحبة مدونة تخاريف عقل و قلب
الحسيني صاحب مدونة desert rose
Faw صاحب مدونة باش كاتب 
نهى صالح صاحبة مدونة كلام فاضي
remass صاحبة مدونة بنوتة مصرية
مُحب روفائيل صاحب مدونة مُحب روفائيل
Human صاحب مدونة إنسان في عتمة النور
و أي حد محالهوش يا ريت يحلّه :)

هناك 30 تعليقًا:

همسات وبحــ الحياه ــر يقول...

ادخل برجلى اليميييين واحجز اول تعليق ^_^

همسات وبحــ الحياه ــر يقول...

المدونة وحشتنى كتييييييييييير
ازيك ياشرين
دخلت هنا مش شوية والبوست كان محذوف :(
هروح اقرأ بقى واجيلك

FAW يقول...

فعلا عندك حق أحلي تاج
شكرا عالتمرير

همسات وبحــ الحياه ــر يقول...

جميييييييييل
ميدان الكنبة دا شكله قعدتك قدام التيفزيون
ماشاء الله ربنا يخليلك ماما وبابا وميحرمكيش منهم يااااارب

ابراهيم رزق يقول...

اجابات وافية بصحيح
ما اروعها ايا بحزنها و فرحها
انا جالى التاج و لسه مجاوبتش لانى اشعر ببعض المرارة اخشى ان تؤثر على اجابتى

خالص تحياتى لكى

سواح في ملك اللــــــــــــــــــه- يقول...

اختي الفاضلة شيرين
فقد نسخت لكي اجابتي علي البوست
فقد اجبته من قبل عن الاستاذة مجداوية
وهذه اجاباتي
سيدتي الفاضلة هل
تسمحين ان اجيب عندك في مدونتك

س هل توقعت ثورة 25 يناير؟؟
ج لدي بوست بعنوان(( سبحان من له الدوام ))
بتاريخ 24 سبتمبر اي قبل الثورة
بشهر تقريبا يتوقع نهاية ما لهذا الحكم
خاصة بعد الانتخابات الاخيرة احسست
ان الرايس مش هو اللي بيحكم
وان اللي بيحكم عائلة شبهتها في خيالي
بعائلة بشارة واكيم في فيلم لو كنت غني
القديم
حينما كان عبد الفتاح القصري
كان المدير المالي وكل شوية يسال نفسه
هو انا قبضت ولا لسة
س2 هل كنت من ثوار ميدان التحرير
ج2 حقيقة كنت نقطة في بحر البشر هناك
ولم احضر كل الايام 4 ايام فقط حضرتهم
س3 مالم تنجح الثورة في تحقيقة ؟؟
بالنسبة لي فسقوط راس الحكم فهو نجاح كامل وتدريجيا سوف تعود البلاد باذن الله الي وضع افضل من عهد الرايس المخلوع

3س,ج اكثر شيئا فرحني في هذه الثورة
هو ترابط المسلمين والمسيحين تحت مسمي
انا مصري

4س,ج الشخصية التي اعجبتني خلال الثورة
هي المهندس ممدوح حمزة الذي كان يدير
الامداد والتموين للثورة
وهو رجل دائما تجدينه ينكر ذاته
وطبعا نوارة نجم اشاركك اعجابي بها
فاني كنت اراها مشروع شهيدة

5س,ج الشخصية التي احتقرتها خلال الثورة هي فريق برنامج 48 ساعة
بمذيعيه خاصة اني اعتبرهم مشاركين
في الاساءة والتحريض علي الثورة

6س,ج اطرف تعليق هو طفل صغير يحمل يفطة مكتوب عليها ارحل اطفال مصرمش عايزينك

7 س,ج القناة التي تابعت كل القنوات
التي اجد فيها اخبار عن الثورة

8,س,ج لم اكن اتابع صحف

9س,ج بلال فضل ,ابراهيم عيسي

10س,ج مني الشاذلي رايتها اجرا مذيعة
مصرية تكلمت

11س,ج كلمة لشهداء 25
كتبت بوست عنوانه بنوتة مصرية

12 هندي ايه لمصر ((مواطن صالح بيحب بلده))


13,,س,ج لو اصبحت رايسا
لااري نفسي في هذا الموقع
ولكن اتمني من الرايس الجديد
ان يشدد العقوبات علي الرشوة والفساد
ويجعلها تصل للمؤبد حتي نقضي علي هذا الوباء المنتشر في كل المؤسسات

بالنسبةللمليارات
انا مش عايز منهم ولا جنيه
عايز اكل واشرب واتعالج كويس واعيش في مستوي كريم وبس
تحيتي

باحث عن حب يقول...

الله على التاج
بجد
احلى تاج
التاج ده
انا حاسس بيه قوى
يا حدوته

مجداوية يقول...



السلام عليكم

بتتبع التاج وصلت إلى هنا واسمحي لي أن أهديكِ إياه بكل الحب والإمتنان لكِ لهذه الروح الجميلة والتي أجابت حباً في الثورة دون انتظار إهداء ولعلني كنت أتوقع هذا من جميع من أهديتهم التاج ولكن مع الأسف الكثير منهم لم يفعل مثلك فأسميته التاج الشهيد ولكن بعد تتبعه بين مدونات لم أدخلها من قبل سعدت جدا ليس لانتشاره فحسب ولكن للاجابات التي قرأتها وللتجارب الرائعة المختلفة مثل تجربة والديك حفظهما الله , أتصور احساسهما بهذا الفخر لأني كنت من رواد ميدان الكنبة ,

وميدان الكنبة لمن لا يعرفه أطلقه ما يطلقون على أنفسهم النخبة فاتهموا كل من لم يشارك في الثورة وخاصة في ميدان التحرير أنهم فقط من رواد ميدان الكنبة أمام التليفزيون وهذا ليس صحيحا فهناك ظروف قهرية للملايين وخاصة النساء وأنا منهن تمنع الخروج مع الثوار لكن كانوا بكل قلوبهم وتأييدهم مع الثورة وأعتقد أن ما قام به بعض الملايين من الثوار كان بمثابة تفويض من البقية من الشعب


أتفق معك تماما أن الثورة من سلبياتها أنها أفقدتنا الثقة في كل شىء على الرغم أنها كانت لا بد أن تحدث العكس لأننا استعدنا الثقة في انفسنا

أرجو أن تبلغي تحياتي الخاصة لوالديك الكريمين ولكل من تعرفين ممن شاركوا في الثورة فلولاهم كنا سنظل نرتدي تاج الفساد والقهر والظلم

شكراً لك عزيزتي
وسعيدة بالتعرف على مدونتك


Casper يقول...

اجابات جميلة

وفعلا اغلب اليفط اللى كانت موجودة في ميدان التحرير كان دمها خفيف هذا وان دل فيدل على طيبة وخفة دم الشعب المصري اللى وفي عز الازمات مش عاوز يستغنى عن الضحك والفرح

_________

خالص تحياتي

Tamer Nabil Moussa يقول...

تسلمى ياشرين على الاجابات الجميلة

ربنا يوفقك ويكرمك

مع خالص تحياتى

arab video يقول...
أزال المؤلف هذا التعليق.
غير معرف يقول...

فعلا انا بقول لأصدقائي اللي منزلوش الميدان ان فاتهم نص عمرهم و سيندمون ندم شديد

شكرا على تمرير هذا التاج و سوف اجيب عليه في المدونة

Wish I were a Butterfly ... يقول...

آااااه بجد!! البوست كله كـوم،و آخر جملتين قلتيهم دول كوم تاني! فيه نـاس بجد مستنية الفلوس و فاهمة إنها هتاخد نصيبها. هو فيه فعلا حدهياخد فلوسه كاش كدة؟؟

حابة التاج، و إجاباتك فيه مميزة. حاساها لايقة عليكي. سعيدة إنك اخترتي مامتك وباباكي إنهم يكونوا أكتر شخصية عجبتك وقتها.. ربنا يخليهملك بجد.... الولد اللي عايز يحلق دة صاحب أخويا:)).استغربته بجد

الثقـة..دي اللي بتهيألي هتحتاج لسة وقت كتير اوي اوي. دة تراكم من سنين كتيـر. مش هينفع يروح أثره بسرعة

مصطفى سيف الدين يقول...

اجابات رائعة حقا ومتوقعة روعتها من شخصك الكريم اختي العزيزة
اغبطك لانك زرتي التحرير في اوج الثورة
كنت اتمنى ان اكون هناك لارى بعيني ما رايته في خيالي
اجاباتك تنم عن حبك لمصر
على فكرة معتقدش ان في حد فاكر ان فلوس مبارك لو رجعت هتتقسم على الشعب لكن اعتقد ان ده تعبير مجازي لتكتب عن احلامك
اشكرك اختي العزيزة
تاج رائع تستحقينه عن جدارة

سندباد يقول...

باذن الله القادم يكون افضل ونحقق كل اللي بنتمناه
اجابات جميلة
تحياتي الخالصة

Unknown يقول...

السلام عليكم

ما شاء الله.. كالعادة إجابات خارجة من القلب بصدق وبإحساس حقيقي.. هذا ما شعرته..

"السؤال مفروض يبقى إيه اللي مفرحنيش في الثوره"... عندك حق والله.. ومش بس كده.. ده كل أسبوع تقريبا فيه فرحة جديدة أو فرحتين..

تأثرت وأعجبت بشدة بموقف والديك حفظهما الله وبارك فيهما.. فتحيتي لهما رجاء..

ملحوظة: أنا مررت التاج لكِ في ردي عليك في تاجي.. لكن واضح أنك لم تنتبهي.. حتى ذكرت أني كنت أنوي تمريره لك ولأختنا شمس النهار، لكن كنت معتقد - خطأ - أنه وصلكما..
عامة جميلة إيجابيتك التي زادت التيجان تاجا..

تحياتي أختي صاحبة معطف التحرير :)

Emtiaz Zourob يقول...

ربنا يديم التاج فوق رؤسكم دوما ، فهو تاج العزة والكرامة والاحترام .. بجد حببتونا في الثورة وقديش اتمنينا نكون معاكم هناك ..

أنا سعيدة بوالدك ووالدتك وشجعاتهم في مثل سنهم .. ولك كل الحق في الفخر بهم دوما ..

انا كمان كان نفسي اشارك في مظاهرات 15 اذار لانهاء الانقسام رغم خوف زوجي الشديد علي بسبب العنف والضرب والاهانة ,, بس انا اصريت ونزلت بس مالقيتش حد ههههههه ، كانوا كلهم انضربوا وروحوا على بيوتهم ..!!

ربنا يفرحكم كمان وكمان بالحرية ..
اعجبني البوست كثير كثير .

Carmen يقول...

اجابات موفقة شيرين حبيبتي يسلم فكرك
تحياتي لك

دعاء العطار يقول...

" "أنا لو منزلتش ولو مره هحس بالندم و الضيق طول عمري".

نفس اللى كنت حساه وكنت بقوله لنفسى وللاسف معرفتش انزل

انا بجد كل ماافتكر كده اتضايق اوووووووى

بس بحاول اصبر نفسى انى احافظ ع الثوره واكون صوت لها فى كل حاجه بعملها التحرير كان هدم نظام واللى احنا فيه دلوقتى بناء نظام جديد

انا فاتنى الهدم .. فبإذن الله مش هيفوتنى البناء

اجاباتك من اروع الاجابات اللى قريتها عن تاج الثوره

دمتى بكل الخير (: (:

reemaas يقول...

اجاباتك جمييييييييييله ياشيرى ومن عينى هحط التاج مع انى خايفه اتحط فى القايمة السودا ههههههههههه

وردة الجنة يقول...

جمييلة اوى يا شيرين وجميل اوى تعليقاتك اللى بجد تدل انك شخصية جمييلة او اكثر من رائعة

لك كل الود والتقدير غاليتى

نيللي علي يقول...

مش هرغى كتير واقولك كلام كتير غير الكلمه اللى بين اقوسين ده


"مصريه ..اصيله ...كل حته فيكى ممزوجه بارضها وعرقتها"

انحنى ليكى اجلالا

محب روفائيل يقول...

شيرين ، ازيك يا دكتورة :)

أنا جيت قريت البوست ده من أول ما اتنشر على ما أفتكر ، ان شاء الله هحله قريب ، أو ممكن بعد العيد ، كل سنة وأنا طيب :):):):):):)

بس اجاباتك كلها فى منتهى الروعة ، بجد بجد تحفة !!

تحياتى

محب روفائيل يقول...

شيرين مطولتش ، صح ؟

عموما الموضوع أهه

http://mo7eb-rofail.blogspot.com/2011/04/25.html

وطبعا مستنى رأيك :)

الحسينى يقول...

شيرين العزيزة
أولاً إجاباتك كلها حلوة ومعظمها متوقع من شخصية زيك
ثانياً سلامى للوالد والوالدة و تحياتى لهم.
وشكراً على تمرير التاج إن شاء الله اعمله فى أقرب وقت.
تحياتى.

Kem يقول...

حلو اوى هعمله ان شاء الله فى القريب العاجل مع نه متمررليش بس هعمله برضو :)))
اتفق معاكى فى معظم الاجابات خصوصا البرادعى اكتر حاجة عجبانى فيه انه بيناقر مبارك من رمان مجاش بعد اما مشى و عمل بطل

محب روفائيل يقول...

يا باشدكتورة شيرين أنا آسف ، الفيس عندى فى العناية المركزة اليومين دول ، مش عارف موقع أيه اللى بيكشف عليه ومخليه يطول عنده كده :) علشان كده مقدرتش أعلق عليه .
فاسمحيلى أرد هنا
أنا عاوز أحل مشكلتك التقنية مع مدونتى ، فيا ريت تدخلى مدونتى وتاخدى التحديثات عبر الايميل مثلا من فوق خالص ، أو بالخلاصات من تحت خاااااالص فى صفحة المدونة .
أما بقى مشكلة التعليقات فأقرى الحتة دى كده : -
إرسال تعليق

ملحوظة : ان وجدت مشكلة فى التعليق على هذه الرسالة ، فحاول أن تلتف على هذه المشكلة كى لا تحرمنى تعليقك ، وهذا بواسطة الضغط على ارسال رد على أى تعليق موجود مسبقا ، ستظهر لك صفحة منبثقة ، وفيها التعليقات السابقة والصندوق الذى ستكتب فيه تعليقك ، سيكون به كود بسيط ، امسحه أو لا تمسحه لن يفرق كثيرا ، وشكرا على تعاونكم معنا .
ده اللى أنا كاتبه قبل صندوق التعليقات .
ندخل بقى فى الكلام المهم : -
وانتى طيبة يا بشدكتور :) وان شاء الله عيد سعيد علينا كلنا وأيام ميكونشى فيها حاجة تانى .
شكرا على اطرائك بخصوص اللغة والبوست .
بصراحة أنا لغاية دلوقتى ندمان على انى منزلتش زى ما الناس نزلت ، بس يا رب فعلا اللى ذكرته ده يكون عذر مناسب ، أقوله لأحفادى يصدقوه :):):):):):):):)
بخصوص أسيوط فالمدينة نفسها زى مدينة القاهرة بس مش قوى يعنى ( من جهة نوعية الشباب لحسن حد يقول أيه المسطول ده :) ) لكن فى القرى بقى فأحنا بصراحة أنضف بكتيييييييييييييييييييييييييييييير قوى أنا فاكر كذة مرة لقيت حاجات زبالة فى بصراوى ( قرية فى امبابة ) أولا حد يثبتك انتى وماشية فى الليل ، ( الحمد لله محصلتش معايا ، بس حد قريبى حكالى :) ) البنت تشتم بألفاظ أستحى أن أسمعها ، الشمامين لما مايلاقوش رجالة فى البيت يتخانقوا معاهم يتخانقوا مع النسوان ، وهلم جرى ومشى وركب صاروخ وطلع القمر !!!!!
لكن عندنا فى أسيوط ، حتى الملابس التى تتوافق مع البنات المسلمات ، طلع منها موضات زبالة !! بس لساننا عفيف عن قرى مصر ، أنا عارف طبعا أن القاهرة فيها حتت حلوة ، بس ان شاء الله كلها هتبقى حلوة ، والخياطين يخيطوا ملابس حلوة لبتوع أسيوط برضه فيما بعد :):):)
أنا عموما بلبس بنطلون وقميص ، وساعات قليلة تى شيرت :)
أما بقى الأولاد عندنا ، فالظاهر كده فقرا ، فيه حتت مبتتغطاش من جسمهم ، الظاهر معندهمش فلوس كفاية يجيبوا بيه بناطيل كبيرة أو طويلة أو على الأقل ساترة ، هحاول اتبرع ب 2 جنيه وربع قريب ليهم :):)
بخصوص بقى البنات المسيحيات فدول حاجة تانية خالص ، خالص ، خالص ، بس لعلمك فيه واحدة لبسها حلو جدا ومحترمة جدا وشيك جدا :) ( عبيط أنا ؟ مش مهم !!)
بخصوص أسد التحرير كان نفسى بجد أيده تطلع من الفيديو أو أنا ايدى تدخل الكمبيوتر وأخذ شرف انى سلمت عليه ، ده مصرى نادر زى كده مصطفى كامل اللى أفنى شبابه لخدمة مصر . بس ده ربنا يطول فى عمره ان شاء الله ، بس أنا مش عارف هيقدم أيه لمصر مستقبلا وهو عسكرى ، وأحنا استبعدنا الجماعة دول أصلا ( نظريا :)
مش كل بتوع آسف يا ريس ، انتى عارفة اننا شعب عاطفى ، وعاطفتنا بتتغلب على عقولنا ، الا القليل طبعا ، فبتوع أنا آسف يا ريس ، وارحموا عزيز قوم ذل . مش ناسيين أن مبارك كان الريس وحرب اكتوبر والكلام ده ، مع أن مدرس العربى فى الثانوية قاللى ، ياعم مكانش طيار ميدانى ، كان قائد موجه من القاهرة يعنى ، يعنى بعيد عن النار أصلا !!
بخصوص أحلامى لمصر ، دى بقى مش هتحقق والأقباط على حالهم كده ، وآدى دقنى لو حصل حاجة من اللى اتمنيتها لمصر والأقباط مضطهدين بالشكل ده فيها ، مش علشان أنا قبطى ، لأ علشان التاريخ بيقول كده ، الحكاية سوفسطائية شوية ، ركزى كده : دلوقتى ناس لا يقبلون الآخر ، معروف عن قابل الآخر أنه رجل ذو فكر وسمعة وبالتأكيد علم ، كده العلم اتنفى عن المصريين هو والفكر واالسمعة ، ومن المعروف أن الفكر والعلم مسئولين عن تقدم البلد ثقافيا وعلميا ، أما السمعة فدى بتحدد تعاملاتك مع العالم الخارجى من أقرب كوكب الى أبعد نجم ، شكلك مش مصدقة ، خلاص براحتك يا ستى :)
شكرا على الصورة والعرض ، طيب هتلاقى مدونتك عندى كلها بعدين :)
أخيرا وحضرتك طيبة ، أنا بصراحة من كتر تعليقى ده ، مش عارف البلوجر هياخده على مرة ولا مش هيرضى بالمرة ، ومش عارف برضه أنتى هتبصيله أصلا ولا لأ ، بس عموما ، مساااء الخيييييير :):)

♥نبع الغرام♥♪≈ يقول...

اجاباتك اكتر من روعه اختى حبيبتى

والحمدلله انى مش جالى

هههههههههههههههههههههههه

تحياتى ليكى ولقلمك

Unknown يقول...

وحشتوني جداً آسفه على التأخير

همسات و بحر الحياه انت وحشاني أكتر.

مصطفى طبعاً أجمل تاج.

ابراهيم رزق أجمل و أصعب أيام و أحلى ذكرى بكل تأكيد.

سواح في ملك الله إجابات جميله ليتك نشرتها في بوست كي يطلع الجميع عليها.


مجداويه المدونه نورت بزيارتك و تشرفت بمعرفتك سأزورك قريباً بإذن الله و أشكرك بشده على فكرة التاج الرائعه التي ستأرخ فترة من أهم ما يكون.

كاسبر أشكرك يا عزيزي.

تامر نبيل بتسعدني دائماً بتعليقك.

يوميات شحات العفو يا أستاذي التاج تشرف بك.

Wish I were a Butterfly ...الفراشه الجميله عندك حق.

مصطفى سيف شكراً على ذوقك يا زميلي العزيز.

Unknown يقول...

سندباد أشكرك و أشاركك التمنى أن يكون القادم أفضل.

ماجد القاضي وجدت التمرير أشكرك على ذوقك و سعيده بتشجيعك الدائم.

وجع البنفسج يكفي نيتك الصادقه في المشاركه ربنا ينعم على العرب أجمع بالحريه نورتيني يا جميل.

كارمن تسلميلي يا حبيبتي.

دعاء العطار مش هيفوتك البناء ان شاء الله و يكفي رغبتك الصادقه سعيده بتعليقك الجميل.

ريماس مفيش حاجه اسمها قايمه سودا كلنا مصريين بنحب مصر.

وردة الجنة أشكرك على ذوقك نورتيني.

نيللي ربنا يخليكي ليه تعليقك دائماً بيفرحني.

مُحب قريت تعليقك الثالث و متفقه معاك في معظمه بس صدقني باختصار مفيش حلاوه من غير نار و احنا كمصريين بنحب بعض و بنقف مع بعض في الأزمات مش عايزين القلة الجاهله تأثر علينا, وخدت بالي أنا من البنت اللي بتلبس كويس :)

الحسيني شكراً يا أخي العزيز.

أغاني الشتاء نورتني بزيارتك و في انتظار التاج

نبع الغرام شكراً على ذوقك و حاولي تحليه حتى لو متمررلكيش لأنه فعلاً جميل.