الثلاثاء، 5 أبريل، 2011

ديكتاتوريه و أفتخر

اكتشفت بعد كل ما حدث من وقت أن إنتهت الثوره حتى الآن أنني أكره الديمقراطيه , نعم أكره الديمقراطيه التي كنا ننادي بها من بدء الثورة و كانت من أهم طلبات الثوره بعد أن عشنا عمرنا كله كشباب نعاني من عدم ممارسة حقوقنا و عدم الأخذ برأينا أو مشاركتنا في أي حوار أو قرار, لكن بعد تفكير عميق و اكتآب سحيق إكتشفت أن الحل هو الديكتاتوريه.

كنا في العهد البائد نتفق في الرأي أننا ضد النظام بما فينا مجموعة (الأسفين يا ريس و ارجع يا ريس عشان تقضي عيد ميلاك في بيتك و في وسط ثرواتك) كانوا ضد الفساد و التخلف و الاهمال و البطاله و النهب و كل الدهاليز التي وضعنا فيها النظام السابق, أما الآن فأصبحنا طوائف و مجموعه من الائتلافات, كل له أغراضه و توجهاته و أولوياته و نسينا الأسباب و الأهداف التي قامت من أجلها الثوره تحولت للوجوهات و أعمال خيريه و شعارات و اتهامات.

إكتشفت أننا كنا نعيش في ديمقراطية من نوع خاص, قل رأيك و افعل ما تشاء في النهاية النتيجه واحده, لكنك لن تجد من يجرح فيك أو يعترض بسبب و بدون أو يصدمك برأيه الذي يتلون كإشارة المرور من الأحمر للأخضر ثم يعود للإحمرار, لن تجد من يتعصب و يزايد و يشمت و يملأ الدنيا شائعات كما يملي عليه هواه, كنا كلنا غاضبين بصمت و بدون في اتجاه واحد.
.
أما الآن فالغضب تحول في كل الاتجاهات, فما أن يحدث أي حادث حتى يبدأ البعض بالقاء اللوم على الثوره و الثوار, الثوره التي حررتنا و زادتنا شرفاً و فخراً , أردت هنا أن أوضح موقفي و أنسلخ من جلدي الذي كان يتوق للديمقراطيه, و ذلك حفاظاً على صحتي النفسيه التي بدأت في التدهور مع بدأ فعاليات الاستفتاء المزعوم, أنني قررت أن أكون ديكتاتوريه, أرائي لن أثنيها و لن تعنيني أراءك و لو فُرضت أراءك علي لن أقبلها سأرفضها أقل ما أستطيع بقلبي, فما معنى الديمقراطيه التي تعطي الحق للشعب أن يتنازل عن حقه, أي ديمقراطيه في التخاذل و الضعف و هل الديمقراطيه هي السماح للبلطجيه بالانتشار بدعوى الحرية و على كل مواطن حماية نفسه.

 أصاب بالذهول عندما أسمع أحدهم يقول أنه لن ينتخب البرادعي لأن إبنته ترتدي المايوه أو لأنه ضيع العراق, أصاب بالدوار عندما أقرأ أخبار غريبه عن السلفيين تخص الأُذن و الأضرحه, أصاب بالغثيان عندما أصادف من يروجوا لانتخاب شفيق كرئيس بدعوى أننا مشفناش منه غير كل خير و أدب, و بأننا شعب يجب أن يحكمه عسكريون لأننا تعودنا أن نحكم بالقوه, عفواً لقد سئمت كلامكم و ابتسامتكم الصفراء (عند إعتراضي) مصحوبه بكلمة واحده...إنها الديمقراطية!

مللت من نغمة الإستقرار و كأن هناك من لا يريده و يتمناه و بدلاً من أن نحاسب الشرطه على تقصيرها و نشجع شرفاءها حتى يسود الأمان نتهم البعض بأنهم ضد الاستقرار, بإعتبار أن نزول الميدان يوم الأجازة سيعطل سير العمل!...حتى المظاهرات الفئويه هي رد فعل طبيعي لظلم و عدم مساواه لأعوام طويله و هي مجرد تنفيث لن تتطور لانقطاع عن العمل مثلاً...لأن العمل ليس بالشئ السهل في بلدنا.

 اذا كانت الأراء المستفزه و الرغبه في إعادتنا للخلف و محاولة تفريق الناس و فرض شخصيات من العهد المثار عليه  هي الديمقراطيه,  فسامحوني جميعاً لأنني قررت أن أكون ديكتاتوريه.

هناك 54 تعليقًا:

ابراهيم رزق يقول...

معلش يا شرين بعض المساجين من كثر تعودهم غلى السجن لا يطيقوا الحرية
وبعض من تعود على الظلام لا يستطيع العمل فى ضوء الشمس
اخر واحد اللى اسمه ابراهيم حسن اللى الجهل مليه ايام الثورة طالب بقطع الاكل و المياه و الادوية عن الثوار

و بعد الماتش الفضيحة قال لشوبير الثورة خربت مصر
و سافر السعودية و قال ان مصر بعد مبارك بتتاخر لورا و سانتخب شفيق؟؟؟
الامل فى الجيل اللى طالع اللى لما يتعود على النور لن يقبل بالظلام
خالص تحياتى

Tears يقول...
أزال المؤلف هذا التعليق.
Tears يقول...

اصبرى و اقرى التاريخ ح تعرفي ان كل ده عادى و لازم كله ياخد وقته

كنت لسه على صفحة ضباط من أجل الثورة على الفيس بوك و اتفرجت على فيديو لرائد و اخر لنقيب بيكلموا عن تضامنهم فى الجمعه القادمة بس الاهم ان عندهم وعى سياسي و دعم للثورة و دول جزء منا و هو ده الجيش اللى استقبله الشعب بالورود

فيه جهل و فيه تلذذ بالاستعباد عند جزء كبير من الشعب اسمه حزب الكنبه بس فيه وعى بين مجموعات فى كل قطاع

سندباد يقول...

فترة انعدام الوزن دي مش هاتطول واي ثورة في الدنيا بتفرز شخصيات هلامية زي زبد البحر لا تنفع الناس ولكن دي فترة الي حد ما ممكن تطول شوية انما في النهاية لا يصح الا الصحيح المهم اننا نبطل كلمة معلش وعادي ومش مشكلة وناخد خطوات ايجابية ونبدا بنفسنا وباذن الله القادم افضل

سواح في ملك الله- يقول...

الاخت الفاضلة
شيرين ولاتتعقدي ولاحاجة
انا مش متضايق ان حد عايز ينتخب احمد شفيق
والا البرادعي ولا سويرس ولا عبد المنعم ابو الفتوح انشالله حتي يرشحوا شعبولا
قد اصبحخ لدينا وعي
ونعرف من هو الذي ييق بحكم مصر
ومن لايستحق حتي يبقي موظف فيها

شمس النهار يقول...

عملنا زي العصفور

اللي فضل محبوس سنين ولما اتفتح له القفص ماعرفش يهرب
ولما اتشجع وعرف يهرب ماعرفش يطير صح فافضل يتخبط ويقع ويطير
والخوف انه جناحه يتكسر

مصطفى سيف يقول...

مفيش حد في الدنيا بيكره الديمقراطية بمفهومها الحقيقي لكن بنكره الفوضى مفيش حد بيطبق الديمقراطية صح عندنا كلنا فهمنا الحرية بمعناها الغلط كل واحد بيتعصب لرأيه وعايز الباقي كالقطيع ينساق ورائه
من زمان وانا بقول اصلاح اي هرم في الدنيا يبدأ من القاعدة اولا ثم القمة اخيرا
نحن عندما اصلحنا القمة وتغافلنا عن القاعدة ظننا ان الهرم قد اصلح تماما بالعكس لو لم يصلح تفكير كل فرد وطريقة معاملته مع الاخرين فاننا سنعود للخلف كثيرا وحينها سنتمنى ان يعود مبارك
تحياتي واشكرك وانا مثلك اخاف على ما وصلنا له

دعاء العطار يقول...

انا كمان زيك متضايقه م اللى بيحصل وم الكلام اللى بيستفز الواحد ويخليه هيشد فى شعره

خاااصة .. نبرة أخدنا ايه م الثوره ؟

بس عارفه برجع واقول ان اللى احنا فيه ده صحى جدااااااا

تخيلى كده حد عاش طوووول عمره فى مكان ضللللمه ومش شايف غير سوااااااد وفجاه اتسلط عليه نووور شديد

بالرغم من حلاوة النور واشتياقه له .. الا انه هيضايقه لانه مش قادر يشوف كويس

هو ده حالنا

طبيعى اننا نختلف بالشكل ده لاننا ماتعودناش ع الاختلاف اسااااااسا

صدقنى صحى جدا اللى احنا فيه ده ع مانقدر نفهم يعنى ايه ديمقراطيه.. وكمان ع مانقدر نوعى الناس وده دورنا فى الفتره دى

لازال هناك امل .. فلا تياسى

دمتى بكل ود

;كارولين فاروق يقول...

ده شئ طبيعي
تضارب الآراء وأختلافها في الفتره الحاليه
كل واحد يري من منظوره هو الشخصي
ويقابل من يعترضه ويشكك فيه
واصبح الشك سمه هذا الوقت
لا أحد يفهم شئ
دومتي بخير يا أحلي ديكتاتوريه

حمدى جعوان يقول...

غالبيتنا فعلا فى حالة اشبة ب إرتجاج فى الافكار..... يعنى مثلا انتى لو هتتابعى الاخبار كل يوم ( مع العلم انك امبارح قولتى والله ما عدتش متابعه اخبار)
هتلاقى خبر حلو تطيرى فى السما وف لحظه تسمعى خبر وحش ينزل بيكى لسابع ارض
على كدا ببقى كتير شوية تحيا الديموقراطيه
تسقط الديموقراطيه

بصبر نفسى وعاوز اصدق انى دى فعلا فتره وهتعدى وانها حاجه صحيه وطبيعيه
بس يارب ما تطولش بس

شكرا جزيلا

الحسينى يقول...

أنا مؤمن تماماً يا شيرين بأن كل بلوه وكل مصيبة فى البلد سببها ال30 سنة الأخيرة.
يعنى إذا ما كانش سبب اللى بيجرى فى مصر حالياً (زى مهزلة ماتش الزمالك مثلاً) هو أن الناس القديمة لسه موجودة وبتخرب فى البلد بشكل مباشر يبقى برضه هما السبب علشان وصلوا الناس للمستوى ده من تدنى الأخلاق والذوق العام وتخريب عقول الناس.
وإن الناس المستفزة دى يا إما ليها مصلحة مباشرة علشان كده بتتلون بالشكل اللى ذكرتيه يا إما مرضى تحت تأثير 30 سنة من نظام معتل كان كل هدفه أنه يخرب البلد زى ما هو واضح.
ومؤمن كمان أن البلد مش هينصلح حالها بإذن الله إلا لما الناس دى تتحاكم فى أقرب وقت محاكمة نزيهة.
وبعدها بقى نبتدى نبنى مصر الجديدة - مصر النضيفه

FAW يقول...

معاكي جدا يا شيرين رغم إني برضو شايف إنها إن شاء الله فترة و هتعدي . . بس أنا عن نفسي مش قادر أستحملها :(

المشكلة في مصر إن لو عايزة تحققي ديمقراطيه حقيقيه يبقي لازم رأي الأغلبية هو اللي يمشي . . اللي هو رأي الأغلبية الأميه ومحدودي التعليم , حوالي 80 % مثلا . . وللأسف جزء من الـ 20 % ناس فاهمة بس فاسدة و هيأثروا علي كل الـ80 % ويخلوهم يتقلبوا علي باقي الـ20 % اللي هم ناس بتفهم وشرفاء . . ده بإختصار :)) ( وده ظهر في الإستفتاء علي التعديلات )

للأسف مع إن دي الديمقراطيه الحقيقيه بس هتبقي نتيجتها سيئة . . وده مش ذنب الناس , ده ذنب الحكومة والحاكم الفسدة اللي دمروا مصر وكانوا عايزينهم يفضلوا دايما جهلة عشان لو فكروا يتقلبوا عليهم يفشلوا , و ده سبب خوفي لأن الثورة لسه مخلصتش ولسه هنشوف نتائج أكتر . .
ممكن يكون الحل إننا نسلم رقبتنا بقي لأي حد و ندعي ربنا إنه يسترها علينا . .

يا رب .

Carmen يقول...

علي فكرة اي كرسي حكم ده لعنة عشان كده الرسول صلي الله عليه وسلم نهي عن طلب الامارة
كل اللي بيقعد مابيقدرش يحكم بالعدل وبيتحول لظالم
مسؤولية كبيرة بيشيلها مش مقدر هتوديه فين
ربنا يرحمنا برحمته

يوميات شحات يقول...

إن شاء الله بكره أفضل من النهارده
و ربنا ان شاء الله هيجنبنا الفتن و هنعدي المحنة و المستقبل هيكون ورد

محب روفائيل يقول...

شيرين : -

أولا : أسف على الغيبة الطويلة دى :)

بصى أنتى لخضتى اللى أنا عاوز أقوله بالظبط فى كلمتين ، يلا بقى ربنا يستر .

فوتك بالعافية ، أى خناقة بقى :)

elsha3er يقول...

ندعوكم للمشاركة معنا فى جروب للمدونين على الفيس
http://www.facebook.com/home.php?sk=group_150308615029590#!/home.php?sk=group_150308615029590&ap=1

Ms Venus يقول...

معاكى حق


ربنا يستر على مصر

Casper يقول...

مهما حدث انا مُصر على التفاؤل خير وان شاء الله ستمر هذه المرحلة سريعا وننعم بالأمن والاستقرار

ابراهيم رزق يقول...

شرين

خدى بالك المعطف موجود عندك

يالله بسرعة خلصيه الناس مستنية

مش هاسمح بالتاخير اكتر من كده ههههههه
خالص تحياتى لابداعك

faroukfahmy58 يقول...

فراشة المدونات
مقالك جرئ ونسلموصريح وهادف
اننا تعيش فى فترة انعدام الوزن .. مفاهيم كثيرة فقدت مدلولاتها وانقلبت المعانى الى ضدها ودخلت الفاظ حديثة لم نسمع عنها من قبل مما يستوجب معه ان نعدل فى معانى الكلمات فمثلا ان الديمقراطية هى ديكتاتورية الراى و الديمقراطية هى حجر الراى ونسلم بعد كده على الترماى ابو سنجه

وردة الجنة يقول...

هو فعلا الجهل بكل شئ فى السياسة والامور اللى حصلت كلها

واننا فعلا كتيير اوى ومننا من يوم متولد تقريبا اتعودنا على اننا نقول نعم وبس وحاضر وهنعمل اللى تقول عليه

متعودناش اننا نفكر وناخد قرار ونتحمل مسؤليته

ربنا يعمل اللى فيه الخير يارب

تحياتى لك ولقلمك الثائر

تامر نبيل موسى يقول...

ربنا يسترها

كل ثورة وتغير وبيكون فيها تخبط وهرجلة ومحاولة الظهور فى الصورة بافكار غريبة علينا وتهم وحاجات كتير بتحصل

بس ان شاء الله كل دة يعدى

والجاى افضل

مع خالص تحياتى

ريبال بيهس يقول...

صباح الخير

هدي فترة حرجة التي تمر بها مصر لدلك سيحدث بعض الخلل البسيط وعدم توازن جراء الثورة التي أطاحت بمبارك ورجالاته وقد يستمر هدا الوضع حتى يتم أنتخاب رئيس جديد يعيد مسك زمام الأمور من جديد ويعيد الحياة للشارع المصري بتوازن بعيد عن ثقافة إقصاء الآخر ....

تمنياتي لمصر بأن ترفل بالأمن والتطور بإدن الله ...

تحياتي

ماجد القاضي يقول...

السلام عليكم

أختي شيرين.. طبعا إذا عرضنا كلامك عن حب الدكتاتورية ونبذ الديمقراطية بسبب بعض الممارسات الخاطئة (المتوقعة والمنطقية في البداية ممن حرم الحرية كثيرا) أو بعض الممارسات غير السليمة (ممن اكتشفنا أنه كان يدعــــــــي الديمقراطية، ولكن الأيام كشفته).. فلن يستقيم ما قلتيه..

لكني مدرك تماما أنك كتبتي هذه التدوينة بروح الأديبة والثائرة (التي تتميز بالانفعال الدائم والعاطفة الجياشة)!!!
لذا فأنا أقبله من هذا الباب ليس سواه..!!! :)

لذا نريدها رغم كل شيء ورغم أي أحد: ديمقراطية.. ديمقراطية.. ديمقراطية!

تحياتي أختي الكريمة.

reemaas يقول...

انا معاكى ان مجموعه اسفين ياريس ومجموعه مش اسفين يا ريس الاتنين هادفين لامن البلد دى كل واحد حسب طريقته ومعاكى ان كلنا المفروض بنحب البلد ومعاكى فى انى مليت من كلمة اليمقراطيه وفلول وثورة وثورة مضاده وكل اللى كان هدفهم مصر بس اعتقد زينا ملو
اللى هدفهم غل وانتقام بقى وتصفيه حسابات دول اصحاب لشعارات الكتير الموجودة حاليا

تقسيم الناس وضح جدا من يوم ما اتقسموا ان مع الثورة ولا ضدها وكان اللى ضد ده يعنى داخل النار واللى مع على الجنة بدون حساب

استغرب جدا من كلمه تغيير الوجوه القديمة ماكلنا كنا قدام وكلنا بنجدد فىنفسنا

بيوجعنى اوى ان بعد ماعملنا استفتاء نطلع بمظاهرة نطالب بيها بسقوط اول حاجة ديموقراطيه عملناها وكاننا بناكد فشلنا لنفسنا

معلش طولت بس اصلك فتحتى موضوع بجد واجعنى

Timo.. يقول...

والله عندك حق يا شيرين..
لاني فعلا حاسس اننا بندور في نفس الدواير..
وكمان عرفت انت فعلا كان عندك حق تختاري لي اغنية بنلف في دواير لاننا فعلا: " بنلف في دواير.. ندور ع الامان..ونلاقينا رجعنا تاني لنفس المكان..!!"

صباحك ورد وقرنفل :)

eng_semsem يقول...

انا معكي في كلاماتك ولكني لا ارجو عودة الديكتاتوريه ولكن اطلب هدنه مع الناس ان نصمت قليلا ونسمع ونتعلم وعند الانتخابات اختار ما يناسبك دون تجريح في طرف ولكننا حبسنا الافعى في شرم واطلقنا كل منا لسان يستخدمه في التجريح
تقبلي تحياتي

شيرين سامي يقول...

ابراهيم رزق: كلام حضرتك مظبوط جداً و أتمنى نتعود على النزر بسرعه و من غير حوادث, أما التوأم حسن فللأسف موقفهم كان مخزي من أول الثوره...ربنا يهدي.
تحياتي لحضرتك سعيده بزيارتك دائماً

شيرين سامي يقول...

Tears: عندك حق احنا محتاجين الصبر و أتمنى حزب الوعي هو اللي ينتصر على حزب الكنبه, شكراً على تعليقك المميز.
نورتيني

شيرين سامي يقول...

سندباد: أنا كمان عندي أمل كبير يمكن ساعات بيأس و بحزن لكن الغالب هو ايماني بأن اللي جي خير.
تحياتي لك و أسعدتني بزيارتك

شيرين سامي يقول...

سواح في ملك الله: الحريه حلوه لكن للأسف ممكن تستخدم ضد المصلحه العامه بسبب قلة الوعي و التعود على الانسياق لكن معاك اننا على بداية الطريق و اننا في كل الأحوال أفضل من السابق.
تحياتي لك أخي العزيز

شيرين سامي يقول...

شمس النهار: تشبيه حضرتك رائع و لخص كل اللي عايزه أقوله و بفكر فيه ربنا يستر و تعدي الفترة دي على خير.
تحياتي الخالصه لكي

شيرين سامي يقول...

مصطفى سيف: ربنا يستر من قاعدة الهرم و لو أن القمة بقيت لبقي الهرم على فساده و لكن رحيل قمة الفساد خطوه كبيره و مهمه لبناء هرم قوي و المهم الآن التداوي...ان شاء الله القادم يكون أفضل.
تحياتي لك زميلي العزيز

شيرين سامي يقول...

دعاء العطار: كلامك صحيح و مطمإن و تشبيهك واقعي أتمنى الفتره دي تعدي على خير و الوعي يزيدو ان شاء الله مفيش يأس.
اشكرك على تعليقك القيم
تحياتي الخالصه لكي

شيرين سامي يقول...

;كارولين فاروق: هي فعلاً فترة تخبط و محدش فاهم حاجه.
شكراً يا جميل نورتيني

شيرين سامي يقول...

حمدى جعوان: حلو تشبيه ارتجاج في الأفكار معبر جداً و انت كنت بتتكلم عني في تعليقك:)
أنا زيك خايفه بس مؤمنه انها هتعدي على خير ان شاء الله
تحياتي العطره لك

افروديت يقول...

شيرين

لن أقول لكي سوي جملة واحدة

"هذا البوست يصف لسان حالي "


لقدسئمت مثلك تمامآ

ولكني أتوق للديمقراطية

تحياتي

شيرين سامي يقول...

الحسينى: يا ريت يا حسيني على فكره تحليلك منطقي جداً هما فعلاً الناس فقدوا الذوق العام في ظل الفساد السابق...ربنا يرحمنا و يعديها على خير.
تحياتي الخالصه لك

شيرين سامي يقول...

FAW: هو فعلاً النظام السابق اللي خلى معظم الناس جهله هو السبب في المهازل اللي بنسمعها و نشوفها دلوقتي بس مش موافقه اننا نسلم رقبتنا لأي حد مش عايزين نمر بفترات عصيبه تاني عايزين نستقر مع رئيس شريف محترم و مخلص يا رب نلاقيه:)
تحياتي ليك
نورتني

شيرين سامي يقول...

Carmen: هو شر لابد منه يا كارمن لازم يكون في رئيس يمثل البلد و يدير شئونها و لازم يكون جدير بثقتنا ربنا يولي علينا خيارنا ان شاء الله
تحياتي الخالصه لكي

شيرين سامي يقول...

محب روفائيل: هههههه خناقة إيه؟
حمد لله على سلامتك يا رب منورني دائماً
تحياتي ليك

شيرين سامي يقول...

يوميات شحات: آمين يا رب
نورتني يا أستاذي
تحياتي ليك

شيرين سامي يقول...

Ms Venus: يا رب يا فينوس كلنا بندعي
تحياتي ليكي يا جميل

شيرين سامي يقول...

casper: أنا كمان متفأله شويه بس ساعات بأكتأب بصراحه...ان شاء الله خير
نورتني

شيرين سامي يقول...

ابراهيم رزق: شكراً يا أستاذ ابرهيم علم و سينفذ :)
يا رب يعجب حضرتك

شيرين سامي يقول...

faroukfahmy58: ههههه تعليقك رائع يا أستاذ فاروق فعلاً هي بقت كده
تحياتي ليك و يا رب منورني دائماً

شيرين سامي يقول...

وردة الجنة: عندك حق للأسف بس كل ده هيتغير بالوقت
تحياتي ليكي نورتيني يا جميل

شيرين سامي يقول...

تامر نبيل موسى: ان شاء الله عندي أمل كبير
احترامي و تقديري ليك

شيرين سامي يقول...

ريبال بيهس: اشكرك على أمنياتك الرقيقه و تعليقك أسعدني جداً
تحياتي لك و نورتني بالزياره

شيرين سامي يقول...

ماجد القاضي: و عليكم السلام و رحمة الله و بركاته
المقال فكرته ساخره يا أستاذي كتبته في ساعات غضبي من القافزين على الديمقراطيه لكن بالطبع لا خلاف أننا جميعاً ننادي بالديمقراطيه و ننبذ الديكتاتوريه التي وصلت بنا لهذا الحال.
تحياتي و احترامي لك

شيرين سامي يقول...

reemaas: مطولتيش يا ريمو و لا حاجه البيت بيتك أنا معاكي في كل اللي قلتيه و موضوع الاستفتاء ده مستفز جداً لأنهم قبوا الناس على بعض و في الآخر عملوا اللي عايزينه و كأننا منزلناش و وقفنا في طوابير و اتصرف 20 مليون جنيه...يلا معلش بكره أجمل ان شاء الله
تحياتي ليكي يا جميل

شيرين سامي يقول...

Timo..: الأغنية فعلاً معبره جداً يا تيمو سعيده انها عجبتك و سعيده أكتر بزيارتك
تحياتي الخالصه لك

شيرين سامي يقول...

eng_semsem: أنا مثلك لا أرجو عودة الديكتاتوريه لكن أخشى من ديمقراطية مع بقايا انسياق و جهل لكن على كل حال قد أخذنا أول خطوة في الطريق الصحيح.
أشكرك على تعليقك نورتني
تحياتي ليك

شيرين سامي يقول...

افروديت: سعيدع اني اتكلمت بلسانك و متشوقه زيك للديمقراطيه الحقيقيه.
تحياتي لأجمل أفروديت