الثلاثاء، 4 يناير، 2011

جيل فاشل صحيح

جيل فاشل مهبب و أيامه سودا و مستقبله مالوش ملامح , جيل بايظ معندوش انتماء معندوش ولاء معندوش عطاء و لا أي حاجه فيها ااء جيل ملوش غير في المخدرات و التحرشات والتفاهات و كل حاجه فيها اات, منتظرين ايه من جيل بيسقط البنطلون و بيصبغ شعره مييت لون غير انه يطلع شباب ماشيين ورا شهواتهم, منتظرين ايه من جيل بدقون و متلفحين بمييت حجاب غير انه يطلع منهم متطرفين و ارهابيين منتظرين ايه من جيل بيشتم بلده كل يوم و بيشتم أمه و أبوه و كل اللي يتعرضله غير انه يطلع منه جواسيس و حراميه....
زمان كانت البنت بتمشي بجيبه قصيره و محدش يبصلها و لا يعاكسها...زمان كان طلاب الجامعه بيفكروا و يتظاهروا و يموتوا عشان بلدهم...زمان كان الخير مالي الناس و الحب و مفيش حاجه اسمها مسيحي و مسلم...مش دلوقتي جيل مُتطرف...زمان حاربنا و انتصرنا و كنا آخر الرجال المحترمين....انتوا بقى عملتوا ايه يا جيل فاشل.

عفواً.....احنا مش جيل فاشل....انتم اللي فشلتم مش احنا....انتم جيل نجيب محفوظ و كبار الأدباء و الشعراء و الفنانين...انتم جيل الوطنيه اللي بجد مش (الوطني)ه بتاعة دلوقتي...انتم محدش فيكو شرب ميه ملوثه و كل من الزباله و اتنهب و اتظلم و ضاع حقه و حق ولاده....انتم مكانش عندكم واسطه و لا محسوبيه و لا بطاله...مكانش عندكم شباب مش عارف يمارس أبسط حقوقه و يتجوز...مكانش عندكم شقق بالهبل محدش قادر يشتريها....مكانش عندكم مشاكلنا و همومنا و فراغنا.

عارفين انتوا سيبتولنا ايه نورثه من جيلكم العظيم....ورثنا ديون...ورثنا رجال فاقوا الثمانين و مش عايزين يدوا فرصه لغيرهم....ورثنا ريان و أمثاله....ورثنا حطّة لسنّا فبوقنا....ورثنا فكر متطرف...ورثنا مفاهيم و اعتقادات أكل عليها الزمان و شرب.

هي دي دراسه دي داحنا كنا بنذاكر من مراجع يا فاشل انت و هو.....آه دراسه و نص و تلت تربع كمان انتوا كنتم بتدخلوا الجامعه عندكم 20 سنه بتخشوا كلية طب ب60% و الأول على الدفعه بيبقى جايب جيد جداً بالكتير...أنا ابني بيدرس فأولى ابتدائي اللي كنت بدرسه فسنه تالته....
و بعدين مالكوا بنلبس ايه مش في حاجه اسمها حريه و لا دي في الاحتلال بس مش ضروري ألبس قصير عشان مصر ترجع بخير و عمر مصر ما كان ليها زيي عشان نقول بتنهيده يااااه فين أيام زمان قبل ما نفقد هويتنا و نبقى شبه الخليج و أمريكا...طب نرجع نلبس ملايه لف و برقع عشان نرجع الانتماء و لانعمل ايه مش فاهمه.

اوعوا تفتكروا ان الأدباء و العظماء اللي ف جيلكم بينتسبوا ليكم أو بقوا كده بسببكم لا يا ماما لا....دول نتاج الجيل اللي قبلكم زي ما احنا نتاج ليكم بثقافتنا الضحله بأدباءنا الثائرين الساخرين بعُلمأنا  المتغربين بسلاطتنا ببابا غنوجنا....منتظرين ايه من جيل بيسمع هيفا وشبيهاتها و أبوالليف و شعبولا و الكثير من رجال الدين المتذمتين(اللي هما من جيلكم بردو)....منتظرين ايه من جيل سلبتوه ثقته في نفسه و جردتوه من أحلامه دخلتوه مدرسه مفيهاش أنشطه و علمتوه يبقى مؤدب في زمن مش مؤدب و اهتميته بأنه يذاكر أكتر ما يلعب و يحفظ أكتر ما يفهم و يقلد أكتر ما يفكر...و بعدين جاين تقولو اننا جيل غبي و ممنوش أمل.

دي حتى فوانيس رمضان بقت صيني و كل حاجه مستورده مش عارفين تصنعوا حاجه جيل فاشل صحيح...على أساس ان واحد لسه متخرج هيروح يفتح مصنع مثلاً... الزباله ماليه الشوارع....هو احنا اللي اتفقنا مع شركات نظافه عشان تسرقنا....البلد اللي بتتسرق كل يوم...هو احنا اللي نهبنا...الانفجار السكاني....هو احنا اللي خلفنا....التكدس المروري....هو احنا اللي حطينا قوانين المرور....فتنه طائفيه....هو احنا اللي سممنا عقول نفسنا....الأخلاق بقت زفت....هو احنا اللي ربينا....جيل فاشل صحيح!!!

على الأقل عندنا ناس ايجابيه قادره تفكر وسط الزحمه و اللخمه و تعترض و تعتصم و تثور...على الأقل بنحل مشاكلنا بنفسنا مش مستنيين ضربة حظ و لا الفانوس السحري على الأقل بنحاول نتكاتف و نلم شملنا اللي بعترتوه بنتجوز و نخلف و نعيش في الحدود اللي سمحتولنا بيها و مع ذلك( اللي فضل منا و ماهاجرش و طفش) بنربي ولادنا بتحضر و نعرفهم قيمة العلم و قيمة المرأه و قيمة التسامح الديني و قيمة الاختلاف ما هو الاختلاف بردو قيمه لمن يفهم....بنعلمهم يعشقوا تراب البلد دي و يحموها بدمهم.

أما احنا بقى فعشان نرجع نثق فنفسنا تاني نقعد نقول "احنا مش جيل فاشل...احنا جيل عبقري" على غرار أنا مش قصير و أوزعه....و نحاول ننسى التركه اللي ورثناها و اضربنا فيها و نركز بقى في التركه اللي هنسيبها لأجيال جايه مش عايزنها تلعنا...كفايه اللي سبقونا بيلعنونا....مع اننا مسيبناش خرم ابره غير و بندور فيه على حل و حرية رأي و تعبير...عايزين نورّثهم الوسطيه اللي اتحرم منها كتير مننا ضاعوا ما بين تربيه متذمته أو منفتحه و سبور و أدب مُضر و قلة أدب جذابه....عايزين ايدينا في ايد بعض عشان اللي جي أهم.







هناك 61 تعليقًا:

سواح في ملك الله- يقول...

ياااه ياشيرين
حوار رائع
بس لازم يبقي فيه حل وسط يحل المعضلة دي
بالعلم ياشيرين
والقيم
الامانة
الاخلاق اللي افتقدناها
الانتماء
حتي لو انتميتي لبيتك هتخافي عليه وهتجمليه وتخليه
احسن بيت في الدنيا من وجهه نظرك
والعلم دائما هو البدايه
لكل شئ
تحياتي واحييكي اختي
علي عبقرية حوارك
دمتي لي اختا فاضلة

Casper يقول...

حوار جميل جدا لكنه مُحزن وللأسف الشديد
عامة حل المشكلة دي من وجهة نظري

" ابدأ بنفسك "

_________

خالص تقديري واحترامي لفكرك وقلمك
وفي انتظار ابداعات جديدة

تقبلي مروري
Casper

Ramy يقول...

يا خرابى (:

أنتى غلبتينى بالحوار دة

أصل انا اجدع واحد يكلم الحيطة

و ترد عليه (:

بس برافو حقيقى

تحليل منطقى برضه

بس نحاول برضه يمكن ينصلح الحال

بأذن الله

شيرين سامي يقول...

سواح في ملك الله- :شكراً يا أخي العزيز و انت أثرت نقطه مهمه الانتماء قيمه لازم نهتم بيها و نبدأ من بيوتنا أخواتنا و ولادنا عشان هما كمان يعلموا غيرهم و الجيل الجاي يبقى أفضل
دمت بخير و سعاده

شيرين سامي يقول...

Casper: عندك حق يا أسامه لازم كل واحد يحاول مع نفسه الأول يمكن نعرف نصلح الدمار اللي حولينا
أشكرك على تعليقك الجميل و تحياتي الخالصه لك

Tears يقول...

المشكلة مش فى الاجيال اصلا

المشكلة فى النظام اللى خرب الدنيا

و الدليل

ان همه همه المصريين زمان و النهاردة بره كويسين و زى الفل و انا شفتهم بعينى مش تهيأت...المصرى بره حتى لو فقير و فيه بلاوى الدنيا و شاف ست لابسة قصير و لا مش لابسة زى اللى كانوا فى فرنسا برضة ماشى بأدبه و بيقول و انا مالى

شيرين سامي يقول...

Ramy: نورت المدونه و البلوجر كله أحسن حاجه فعلاً ان الواحد يكلم الحيطه بدل ما يخبط دماغه فيها:)
ربنا يصلح الحال

موناليزا يقول...

دايما بقول قبل ماتلوم ولادك على قلة أدبهم أسأل نفسم مين رباهم

موضوع جميل وواقعى جدا

Mona Abo - Elso3od يقول...

بجد قولتي كل اللي جوانا مافيش تعليق علي الحوار ده
تعليقي بس علي الوسطية انا معاااااااااااااااااكي اوي خير الامور الوسط انا بحاول اعمل كده و اعيش كده و اربي ولادي عليها

شيرين سامي يقول...

Tears: أنا معاكي يا تيرز تماماً بس الأجيال اللي قبلنا هما اللي وصلونا لكده و خلونا من غير قوانين عادله و رادعه فبالتالي محدش بيحترم نفسه الا لما يبقى مُجبر...لما العقاب و الصواب يختلوا الدنيا كلها بتختل
تحياتي ليكي

شيرين سامي يقول...

موناليزا: كلامك عين العقل
نورتيني بزيارتك تحياتي ليكي

الحــب الجميـــل يقول...

ربنا يصلح الحال للجميع
يارب
اشياء ايجابيه جميله فعاله كتير اختفت من حياتنا
وظهر فعلا بعض الجوانب السيئه
اللى انتشرت بطريقه غير لائقه فى مجتمع المفروض ان له قيم ومعايير المفروض ميخرجش منها

ربنا يستر
ربنا يلطف بنا

حوار مفيد ويارب يفيد

شيرين سامي يقول...

Mona Abo - Elso3od: احنا محتاجين نربي نفسنا و ولادنا على الوسطيه عشان ميعيشوش عيشة الشيزوفرينيا اللي حوالينا دي
مني الجميله دائماً منوراني ربنا يقدرنا جميعاً على تربية ولادنا صح
تحياتي لكي

شيرين سامي يقول...

الحب الجميل:يا رب الغمه تنزاح و الحال ينصلح
للأسف الحاجات السيئه دي مش وليدة يوم أو يومين عشان كده محتاجين قوه و صبر عشان نقدر نصلح من نفسنا و نقوم براسنا
تحياتي الخالصه ليك وشكراً على تعليقك الجميل

سندباد يقول...

احسنتي التعبير واحسنتي الحوار
للاسف الشديد كل اللي قلتيه صح وللاسف الشديد كويس اننا قادرين نعيش ونفكر ونكمل لحد دلوقتي
تحياتي

هبة فاروق يقول...

اولا احييك على فكرة البوست
حوار رائع بين جيلين رغم قسوة ما يحملة
من مشاحنات واعتراضات واختلافات فى وجهات النظر
ابدعتى فى سردك لهذا الحوار
تحياتى لكى يا شيرى

مصطفى سيف يقول...

اختي شيرين
حوار مهم جدا بس مش معاكي في اغلبه مش عايزين نعلق فشلنا علي شماعات ولا اننا نتبادل اتهامات لازم كل الاجيال تتكاتف ده مش وقت نرمي علي بعض اتهامات
صحيح كل جيل هو نتيجة اللي زرعه الجيل اللي قبله بس لازم ننسي علي الاقل نفكر هنزرع ايه في الجيل اللي ورانا ولا بعد كام سنة هنقرا البوست نفسه بس علينا
احنا محتاجين خبرتهم و محتاجين نتعلم منهم مش وقت الحساب دلوقت

طرح راقي اختي العزيزة وطريقتك في كتابة الموضوع ممتازة جدا بصراحة اسلوبك يفوق الوصف
تحياتي وتقديري

شيرين سامي يقول...

سندباد: أشكرك على ذوقك و ان شاء الله الأمور هتبقى أحسن
تحياتي و احترامي ليك

شيرين سامي يقول...

هبه فاروق: شكراً يا جميل على زيارتك و تعليقاتك المشجعه دائماً
تحياتي الشديده لك
دمتي بود

شيرين سامي يقول...

مصطفى سيف: أولاً تحياتي ليك و نورتني بالزياره
ثانياً أنا مبعلقش فشلنا على حد أنا بقول اننا مفشلناش بالمقومات اللي عندنا بالعكس هما فشلوا في تربية نشئ واعي أكتر و عشان كده مش عايزه نقع في نفس المشكله و بالعكس أنا نفسي كلنا نتكاتف مع بعض عشان بُكره أفضل
سعيده بزيارتك و تعليقك
تحياتي ليك

الكاتب محب روفائيل يقول...

يعنى انتى يا دكتورة بتقولى ان احنا هنبدأ من تحت الصفر .

طيب كويس ، طمنتينى الله يطمنك :)
الموضوع جميل

eng_semsem يقول...

بصراحه وكل صراحه انا عايش بره مصر وحاسس بالامان اكتر وشايف ان حالتي الماديه والنفسيه استريحت اكتر وشايف وسطيه وجنسيات ماشيه على الارض مفيش حد بتفرق معاه دينك او لونك والناس بتتعايش مع بعض وحقيقي ما فكرتش حتى ان مصر وحشتني وانا زعلان انا عايزاها توحشني لانها بلدي بس مليش مكان فيها ونفسي اشوفها احسن بلاد العالم وحاولت اني اغير فيها لحد ما هي غيرتني وقالت ليا مش عاجبك امشي وسبني

reemaas يقول...

اول مره اخد بالى من ه يا شيرى
فعلا جيل الادباء والعظماء هو نتاج جيل قبله واحنا نتاج الجيل اللى قبلنا لو فشلنا ينسب الفشل ليهم

برافو بجد

sal يقول...

بجد يا شيرين
استمتعت بهذه التدوينة
احييك
فيه حاجات عجبتنى اوى
.............
.ورثنا فكر متطرف...ورثنا مفاهيم و اعتقادات أكل عليها الزمان و شرب.
................
طب نرجع نلبس ملايه لف و برقع عشان نرجع الانتماء

.....................
قيمة الاختلاف
ما هو الاختلاف بردو قيمه لمن يفهم..
.................

يوووووه هو انا من انهو جيل

صيدلانيه طالعه نازله يقول...

دائما وابدا سيقى الصراع بين الاجيال
ولكن قبل ان نلوم الاجيال الحاليه
لابد ان نلوم من سبقوهم لانهم ببساطه
من اكتسب منهم الاجيال الجديده اخلاقهم

حوارك كان رائع وسلس ومفهوم

تحياتى

FAW يقول...

جميله قوي
والله هم ما شافوا حاجه فعلا

re7ab.sale7 يقول...

والله العظيم عندي مقال بنفس المعني لكن مش بنفس الطريقة..... بس مشكلتي اني مشغولة ومش عارفة حتي ارد علي المدونة عندي علي كام موضوع فاتوا ....
لاء يعني تخيل لما حد يشوفني ويقولي يا جيل النايتي والهوهوز ....
مواليد عام 1980 وما بعدها او ما قبلها بقليل....
جيل فاشل ومحطم
وجيل مش عارف اية
لاء ده كتر خيرنا بصراحة اننا لسة عايشين وبنعافر ف الزمن ده
شوفي انا هحاول بقدر الامكان اني انشر البوست قريب
شوفي بالنسبة للسؤال اللي انت سألتية ساهل جدا كل ما ف الامر يا ستي انك وانت بتكتبي البوست في عندك ادراج صورة ف الاطار فوق وانت بتكتبي مش ف الاطار اللي فوق خالص لاء ف الاطار اللي بتكتبي فيه البوست
حطي المؤشر ف المكان اللي انت عايزة تحوطي فيه الصورة واعملي ادراج صورة واختاريها وحمليها واعملي اضافة الصورة المختارة .....بس كدة
ولو عايزة واحدة كمان او اي صورة او اي عدد م الصور برضه بنفس الطريقة تحطي المؤشر بتاع الكتابة ف المكان واعملي ادراج صورة وتختاريها وتحمليها ....بس كدة ....
وبعدين عادي كلنا بنسأل بعض ...ده انا كنت مبعرفش حاجة خالص بس بقعد كل فترة اشوف الاعدادات والتصميم واحاول اني اغير شكل المدونة ....
صباحك ورد يا جميييييل
بس ادعيلي لاني مشغولة طحن
احنا مش كدة

carmen يقول...

انا مع كاسبر في رأيه اني ابدأ بنفسي
لأن اسهل كلمة في لسان اي حد اشمعنا انا اتغير حاسب نفسك وكل الناس قبل ماتحاسبني
حوار رائع حط ايده ع سبب المشكلة
تسلم ايدك شيرين

شيرين سامي يقول...

الكاتب محب روفائيل: مش من الصفر أوي منكرش بردو اننا استفادانا من تجارب اللي قبلنا
زيارتك اللي أجمل نورتني

شيرين سامي يقول...

eng_semsem: للأسف ناس كتير بيقولوا نفس كلامك و مستريحين في الهجره أو السفر معذورين بس لو كلنا سيبناها و كرهناها مين هيصلحها مين هيغيرها حتى لو بعد حين
تحياتي ليك و شكراً على زيارتك و تعليقك

شيرين سامي يقول...

reemaas: أجمل بنوته مصريه ماهو أجمل حاجه في التدوين ان الواحد بيلاقي الأفكار طلعت و الدماغ بتشتغل على طول
نورتيني يا قمر

شيرين سامي يقول...

sal: شكراً يا صلاح أنا استمتعت أكتر بزيارتك و تعليقك
أنت أكيد من جيلنا هو أنا مش عارفه انت عندك كام سنه بس معانا غصب و اقتدار:)
تحياتي ليك

شيرين سامي يقول...

صيدلانيه طالعه نازله: شكراً يا لولو على زيارتك الجميله و بجد انت لخصتي الموضوع
تحياتي و تقديري لك

شيرين سامي يقول...

faw:مش كده بردو شكراً على زيارتك الجميله يا مصطفى

شيرين سامي يقول...

رحاب صلاح:يشرفني طبعاً ان يبقى في توارد خواطر بيني و بين صحفيه جميله زيك و هو موضوع واضح للي يفكر في لأن بجد جيلنا مظلوم أوي و لو احنا جيل الهوهوز هما بقى جيل الهولاهوب ههههه
شكراً على شرحك الوافي أنا بحاول أستكشف التصميم و التنسيق بس ساعات حاجات بتقف معايا
ربنا معاكي في مذاكرتك متوفقه ان شاء الله و في انتظار بوستك القادم
تحياتي الخالصه لكي

شيرين سامي يقول...

كارمن:عندك حق يا أرق كارمن نورتيني بزيارتك و تعليقك الجميل

شهر زاد يقول...

فراشة التدوين
اعذريني اسفه على التأخير
تحليلك صارخ من جوا منطقي لحد الذهول صريح لغاية الاقناع
الجيل مش فاشل بس الحليب الي شربو منو كان فاسد ومغشوش
وكراريس التعليم كانت نزورة وكئيبة
وكراسي الشغل كانت مليانه وغايبة
وقايمة لوازم الفرح غالية ومستعصية
والحب ملا كرنيش النيل وجنينة الاسماك
ودا حالنا ووضعنا في كل بلادن العربية
علشان دي سياسة مدروسه انهم يخربو حياة شباب العرب ويرتبوهم في اواخر الصف ويسحبو من تحتهم بساط الحرية
تحياتي

جايدا العزيزي يقول...

شيرين قلبى

حوار رائع

وطرح راقى حقا نال اعجابى

واندهشت من تحكمك فى الحرف

اشكرك يا الغاليه

عن كشف جيلنا اللى معظمه زى الفل ههههه

تحياتى

ماجد القاضي يقول...

السلام عليكم أختي شيرين.

جميل جدا الحوار ده...

فعلا من أعجب وأغرب ما يلوم الآباء أبناءهم عليه..... تربيتهم اللي زي الزفت!!!!!!

هوا مين اللي ربّا مين؟؟؟

تحياتي أختي الكريمة.

الحسينى يقول...

العزيزة شيرين
شفت الموضوع إمبارح بالليل أول لما نزل بس مكنتش عاوز أعمل أى حاجه ولا حتى الكلام.
النهاردة قريت الموضوع وعجبنى مليان نقط كتير مهمة.
بس أنا حبيت أقول بس كفاية أن فيه شباب مصرى بالرغم من كل حاجه وحشة وكل الظروف اللى حواليه جواه خير شباب بينزلوا ينظفوا البلد من غير مقابل وشباب بيزوروا الأيتام والمرضى والمسنين وشباب بيتبرعوا بدمهم للى محتاج وده بيثبت حاجه واحدة هى أن الطريق الكويس موجود على طول والطريق الوحش كمان موجود وأحنا قدامنا نختار ومهما كانت الظروف ده مش مبرر لأنعدام الأخلاق.
محتاج أعلق على نقط معينة فى الموضوع بروقان لو قدرت أرجع مرة تانية إن شاء الله هاعلق ولو مقدرتش سامحينى :)
تقبلى تحياتى

حرّة من البلاد..! يقول...

شيرين الغالية
اعتذر عن تأخري عليك
حوار جميل يحمل مضامين هامة في رأيي
دائما الجيل السابق يزرع وسيحصد في الجيل اللاحق ما زرع هذا في ما يخص التربية والأخلاق والقيم والانتماء
اما في ظروف البلد فالحكومة والقوانين والتبعية والغزو الفكري له تأثيره الكبير على ما يعيشه المواطن
الحل التغيير يبدأ من النفس والكل بحاجة ان يعود نفسه على انه قيادي وان له موقعه على خارطة وطنه
وانه يستطيع ولو بالقليل ان يصينع الفارق .
تحياتي لك اختي
واتمنى ان يتغير الحال للأحسن

Noha Saleh يقول...

معاكى حق فى كل حرف ياشيرين
احنا مش جيل فاشل احنا جيل عبقرى وعاوزين نصلح كل العك اللى فات
بجد هايل جدا
ومعلش انى اتأخرت عليكى

Tamer Nabil يقول...

كلامك لاغبار علية شرين


وبجد عندنا افلاس فى كل حاجة


لو كل واحد يبتدى بنفسة وعلى قد ما يقدر اكيد الحال هيتغير


مع خالص تحياتى

المصوراتي يقول...

بسم الرحمن الرحيم و بعد

النقاش حلو مثير ! بس محدش فيهم حسيس الاتنين حلوين
في الوقت القديم اللي كان فيه بركه و مفيش زحمه مكنش في دين زي الان علي الاقل كان في حكم ملكي في احتلال في ثورة جابتنا ورا كان لسه عندنا ذهب و كان في صكوك كنا عايشين في خير و البطيخه كان اتنين بيشلوها و الحاجه لها طعم و الجو نضيف و كمان مكنش في علم في جهل بنسبه كبيره بسالمثقف له قيمه بردو و يحترم لكن لو ابني عنده شوية برد كان ممكن يموت مني , في شعب رضي باللي سعي في خرابها , فيها حزب ملأ البلاد اسف دعاره كان في الالاف في السجون في الوقت اللي كان في تأميم القناه زمان شويه كمان كان في ملحدين كثر زمان كان في علماء الازهر و الشعراوي و حسن البنا و غيرهم كتير زمان مفيش فرق بين مسلم و مسيحي بس دا عشان العدو من الخارج و ظاهر امامي

محدش عاجبوا حاله
و دلوقت في ايام لما وعيت علي الدنيا كانت الكاكولا ب 40 قرش دلوقت
دلوقت في فساد خلقي مستورد قبلنا به و ادخلناه بيوتنا الا من رحم ربي في هيفا و شاكيرا و تامر و منتخب مصر في ازمة سكان في فلسطين مازالت محتله حتي السادات معملش حاجه لفلسطين مش اكتوبر كانت اخر حرب بردو لمصر اللي بنتفشخر بيها اوي و عندنا حق

الحل في الوسطيه لا في زمان ابيض و اسود بنات لابسين فوق الركبه و محدش حد بيكلمهم و لا في صور ديجيتال مش لبسين بردو و احنا مش راضيين

اما اسم الموضوع فهوجارح جداً
الجيل دا اللي ماسك فيه علي الحق بخمسين من صحابة رسول الله و اللي بيقول عنهم كمان اخواني ( يأتون بعدي و يؤمنون بي و لم يروني

جزاك الله خيراً شيرين فوقتيني

المصوراتي يقول...

خلي عينك حلوه تشوفي الدنيا حلوه

شيرين سامي يقول...

شهرزاد:متأخرتيش و لا حاجه بالعكس أنا اللي مقصره معاكي
أشكرك على التعليق القيم و كل كلمه فيه صحيحه للأسف في خطه فعلاً لهدم الشباب العربي و وضعهم في آخر الصفوف عشان كده عايزين نبقى أقوى و نثق في قدراتنا
تحياتي الخالصه لكي

شيرين سامي يقول...

جايدا العزيزي: جايدا العزيزه أشكرك على اطراءك و ذوقك هو مفيش جيل فاشل لكن في جيل بيتنصل من مشاكله عشان كده لازم نواجه مشاكلنا و نربي أولادنا صح بدل ما نفضل نلوم بعض
تحياتي الخالصه لكي

شيرين سامي يقول...

ماجد القاضي: أشكرك يا أخي العزيز على زيارتك و عندك حق طبعاً اللي بيلوم على التربيه الأولى يلوم نفسه
تحياتي ليك و نورتني

شيرين سامي يقول...

الحسيني : دائماً بنتظر تعليقك و فعلاً انت أثرت نقط مهمه زي ان طريق الخير دائماً موجود بدليل كل أعمال الخير اللي بيقوم بيها الشباب دلوقتي من تبرعات و حملات و أعمال خيريه
شكراً على تعليقك و زيارتك الجميله
تحياتي الخالصه

شيرين سامي يقول...

حره من البلاد: لا تعتذري يا أختي انه واجبي أنا مقصره معك للأسف
الحل التغيير يبدأ من النفس والكل بحاجة ان يعود نفسه على انه قيادي وان له موقعه على خارطة وطنه
وانه يستطيع ولو بالقليل ان يصينع الفارق .
كلامك رائع و أثرى البوست أشكرك جزيلاً و نورتيني بزيارتك

شيرين سامي يقول...

نهى صالح: متأخرتيش و لاحاجه شكراً يا جميله على ذوقك و في انتظارك دائماً
تحياتي الخالصه لك

شيرين سامي يقول...

تامر نبيل: سعيده بزيارتك نورت المدونه و شكراً على رأيك اللي أكيد بيهمني

شيرين سامي يقول...

المصوراتي : تعليقك جميل و غني بالآراء الجميله و فعلاً كل جيل و مرحله زمنيه ليها عيوبها و مميزتها و أكيد أنا مقصدش بالعنوان اننا أو انهم جيل فاشل بالعكس أنا ضد ان جيل ينسب الأشياء اللي فشل فيها لجيل و أرى ان الأجيال السابقه بتنسب لنا كل المصائب بل و بيعتبروا اختلافنا هو ضياع للهويه و بينقدوا كل شئ بنعمله

أشكرك على تعليقك و تصورك و على فكره أن من مبادئي في الحياه كن جميلاً ترى الوجود جميلا
تحياتي الخالصه لك

شمس العصارى يقول...

طيب واشمعنا صورة احمد حلمى

Haytham Alsayes يقول...

علي فكرة شكلي هتعارك جامد هنا
يجماعة والجيل ماله طيب
مش في حاجة اسمها دولة مش في حاجة اسمها نظام تعليم
يعني العالم الشباب اللي مالي البلد دة اتعلم حاجة كويسة وقال لا بلاش
عموما اي جيل او مجتمع نتاج افكار وتربية وتعليم وغيره وغيره
يعني صلح فوق وصلح المنظومة هتطلع شباب زى الورد
اديله تعليم كويس هيطلع صناعة اديلة تدين حقيقي مش هيبقي في ارهاب
اديله حديد عز هيتجوز هههههههههههههه
والله ياجماعة انتوا ظالمين الشباب
العيب في النظام ياخوانا
علي فكرة بقالي خمس ست تعليقات اقول العيب في النظام
شكلي عتحول الي برايز قريبا
لو كنتي شفتي الفيلم

تحياتي علي الطرح

;كارولين فاروق يقول...

السلام عليكم
انت يا سيدتي
لخصت ما بيدور
بين الجيلين المختلفين من حوار رائع واقعي
ومدي ما يعانيه هذا الجيل ومدي حكمنا
عليه من الظاهر دون تفكير بما يفكر
أو يتمناه موجودا في بلده
فهذا الجيل مظلوم كل الظلم
والجيل الذي يشير بأصبع الاتهام اليه تمتع
بكل وسائل الراحه الماديه والفنيه والثقافيه
أمتعتي قرائك
ونشكرك

شمس النهار يقول...

ايه ده كله ياشيرين ده انتي معبيه

بس علي فكرة برضوا كنا بنسمع نفس الكلام من الكبار برضوا
ده صراع اجيال
كلام زي انتوا مش فالحين غير انكم تربوا شعوركم وتسيبوا سوالفكم ده للصبيان
وللبنات احنا عارفين ايه الميني جيب ده اللي طلعتوا لنا فيه
وحاجات كده يعني

Timo.. يقول...

ايه صراع الاجيال الجامد ده يا شيرين..؟؟
ديما كل جيل بيبقى مش شايف غير (نفسه) دون مراعاه لظروف باقي الاجيال..
مش معنى كده اني ضد الجيل القديم..
ولا اني مع الجيل الجديد..
بس للاسف الشبابا معذور لان ببساطة ما بقاش عارف يختار اي طريق ولا اي قدوة لان كله في الاخر بيطلع "مزيف"

بس عجبني قوي فكرة البوست..
بس كان محتاج يتنظم شوية بالالوان عشان يبين كلام كل جيل.

صباحك مسك وعنبر :)

الشوكه الناعمه يقول...

حوار جميل اوى
بس اكيد فى حل لفشل الجيل
بيتهئ لى لازم كل واحد يشتغل على نفسه
تقبلى مرورى

ahmed_k يقول...

أحييكي أستاذه يرين على هذه الحوار الأكثر من رائع
حوار الأجيال المظلومه
فالجيل الحالي كالجيل السابق ظلم في تقوقع البلد في فكر واحد منذ ثلاثين عام
ومن يحاول التطوير أو التفكير يجد المحبطات والمثبطات تحاصره من كل جانب
نعم الجيل الجديد مظلوم
ولكن من الظالم ؟؟؟ ليس الجيل الذي يسبقه بالتأكيد
ولكن من ظلمه وظلم الجيل السابق له هو إعلام فاسد ، تعليم فاسد ، صحه فاسده ، حتى الهواء أصبح فاسد
فالكل متأذي ، الكل مظلوم
إلا فقط من عرف من أين تؤكل الكتف

نسأل الله أن يصلح حال الشباب والشابات
وأن يجعل مستقبل مصر أفضل لا أفقر
خالص تحياتي

Montana Master Of Love يقول...

جيل فاشل صحيح
حوار رائع صحيح