لكل الأسفين الزعلانين المرعوبين

بعض من كتاباتي على الفيس توك:

                                                      كلمة وقفت في زوري

ماذا كانت تعني المذيعة المتواضعة الأداء حينما طلت علينا منتفخة العينين كئيبة المنظر لتتحدث تليفونياً مع رئيس الوزراء السابق شفيق و تسأله بعطف الابنه عن ساعاته الأخيره و الظلم الذي وقع عليه و ماذا سيفعل في حياته بعد ذلك و تحاول استدرار عطف المشاهدين بطريقه سمجه و عطف ضيفها الموقر بأن تدعوه بأنه متأثر و تزوووم على عينه لنرى الدموع, ثم تسأل ببراءه عن ما اذا كان ينتوي الترشح لرئاسة الحمهوريه!!! هل هذا درباً من العبط أم الاستعباط؟؟



و ماذا كان يقصد المذيع المتلون الأداء حينما ظهر علينا بائساً مُحبطاً ليتحدث عن شفيق و ساعاته الأخيره و كيف أن الشباب على الانترنت يطالبون بعودته و يتملكهم الحزن الرهيب, ثم يتحدث مع اعلامي مشهور عن رئيس الوزراء السابق مُعدداً مزاياه مُتحسراً على رحيله و ينهي حديثه بأن هناك وقفه غداً في ميدان مصطفى محمود للتعاطف معه و الوفاء له!!! منه لله ذكرني بموقعة أُحد أقصد الجمل.


لماذا يُصر بعض الاعلاميين على اثارة البلبله و اشاعة الفتن بين الناس لماذا لا ينصتوا لصوت العقل و يحاولوا ايضاح الأمور لمن يجهلها من الناس بدلاً من اثارة الرأي العام أعلم أنهم غداً سيبدأوا التطبيل للوزارة الجديده لكن لم نكن نحتاج أمس سوى لمسة شكر و احترام للفريق شفيق مع تقدير لرأي الجماهير و المثقفين و الشرفاء و ايضاح لماذا تمت تلك الخطوه نزولاً على أراء و تحاليل منطقيه و ليس نزولاً على رغبة الألاف في ميدان التحرير الذي يتمنى البعض أن يظهروهم في صورة خاطئه و مشوهه و ما هم الا نبض كل المصريين الشرفاء و ها نحن نمشي في طريقنا للديمقراطيه رغماً عن العثرات و الجهلاء و المتخوفين دائماً.








                            لكل الأسفين الزعلانين المرعوبين

أنا ماكنش ليه في السياسه كان ليه في حب مصر بس, كنت بهرب لما ألاقي كلام عن الفساد و المشاكل و الأراضي و السرقه على مستويات كبيره و الناس اللي عيشين في تلوث و مجاري و الناس اللي بتموت من غير تمن و الأمراض اللي بقت مستوطنه, يعني برنامج واحد من الناس و عينته كنت بسميهم فقرة النكد لأنها بالنسبه لي أسباب للنكد و وجع الدماغ و القلب من غير ما يكون عندي أي حلول أو أشباه حلول و حتى لو عندي متأكده ان محدش هيسأل فيه اذا كانت مش عارفه أخد حقي أساساً يبقى ازاي هجيب حق الناس.



لما الثوره قامت اتأثرت جداً من أول يوم حسيت ان الهمم موجوده و العزيمه عايشه و اننا بنعرف نثور بنعرف نقول لأ رغم التحديات الكتير و الخوف و السلبيه و المفردات اللي ماشيه زي (كبّر نفّض هيّس) و الاسرائلين اللي كانوا بيضربوهم رغم كل ده صوتهم كان عالي و اصرارهم كان قوي و كانوا رجاله بمعنى الكلمه, كنت فاكره ان كل الناس هيبقى عندها نفس الحماس و الرغبه في التغيير لكن ناس كتير للأسف صدمتني...


أنا مش معترضه ان حد يكون بيحب الرئيس السابق لكن المفروض بعد ما شاف اللي حصل و ضرب النار و العربيات اللي بتدهس الشباب و بعد ما سمع التفاصيل السياسيه زي الدستور المتفصل و الانتخابات المزوره و الحريات المقموعه و العدل اللي مفيش ريحته و المساواه اللي حتى مش في الظلم , كنت فاكره ان اللي استوعب كل ده يقول مش عايزينه عايزين انسان يعرف الديمقراطيه اللي بجد لكن فوجئت بان الناس لسه بتقول آسفين و لسه عايزين يحطوا رسهم في الرمل و يعملوا فيها انهم دعاة التهدئه و ان الناس اللي في التحرير عايزين يهدّوا البلد و مش خايفين عليها.


و الغريب في الموضوع ان الناس بتوع آسفيين و التهدئه دول هما نفسهم كانوا بينشروا على النت أي وقائع فساد و كانوا في حالة نقد دائم لأوضاع البلد و سخط على النظام اللي عمره ما هينصلح و أول ما قامت رياح الثوره هووووب بقوا يا جماعه حرام عليكم ...يا ناس ده ريسنا بردو...اللي في التحرير دول غلطانين و مش قلبهم على مصر...أجندات...أجانب...اسرائيل على الحدود...أمريكا بعته سفن...و الفيلم الهندي اللي كلنا عارفينه, و بعد ما الثوره أثبتت نجاحها بفضل بعد ربنا التحرير نفس الناس الأسفيين على شبابهم هووووب أنا أفتخر اني مصري...ثورتنا البيضاء...شفوا برّه بيقولوا ايه علينا...مفيش مشكله لكن المشكله انهم الى الآن بيكنوا بعض الكره أو نقول الضيق من التحرير و ده باين جداً في محاولتهم لتلويث سمعة أي مشهور كان هناك أو مؤيد معروف بادعاء انه مزيف و في محاولتهم للمره التانيه للتهدئه و اننا نقبل أي حاجه و أي وضع عشان مصر متضيعش, و كأنهم أثبتوا ان النظام اللي فات نجح يخليهم مش معترضين على أي حاجه.


تخيلوا ان في منهم بيقول نظام فاسد مش مشكله بس نبقى في أمان يسرقونا مش مشكله بس ميدخلوش السجن و يتهانوا, أخاصمك آه أسيبك لا, و في منهم بيقول الناس أخلاقها بقت وحشه بعد الثوره تصور بيطالبوا بحقهم بالعافيه تخيل انهم زعلانين من الشرطه و بيشتموا الحراميه, و ياعيني بيتريقوا على أسيادهم و هما كلهم عملاء.


أعزائي عايزه أقولكم ان أي حد منكم حاجه من التلاته اما كان منتفع بشكل ما و سقوط النظام ضره بشكل أو التاني هو أو حد من قريبه اللي كان بيمده بالواسطه, اما انه انسان أناني مش شايف غير نفسه و مش حاسس بآلام غيره اللي تحت خط الفقر و اللي مالهومش صوت و اللي اتعذبوا و اتسحلوا من الشرطه و مش هامه غير انه هو تمام التمام, اما انه بسيط مالوش في الطور و لا الطحين و عايز يعيش جنب الحيط كافي شيره خره و ماشي على سياسة الرضا اللي كانوا بيعلموهالنا...و أهي عيشه و السلام.


أرجوكم الثوره في الحق خير من التهدئه في الباطل...و الاستقرار في نظافه خير من الاستقرار في الطين.


أنا نفسي كلنا نتفق على حب مصر و اعمارها و ده مش هيحصل غير بديمقراطيه صح و حريه بجد و مساواه حقيقيه و عشان يتحققوا لازم نضحي شويه و نصبر شويتين و بدل ما نهاجم بعض نشجع بعض و بدل ما نسيئ الظن و نروج الشائعات و نشيير أي خبر غريب مش متأكدين منه ممكن يثير الذعر أو يستفز نشيير بس الأخبار الأكيده, و بدل ما نكتئب و نقول الناس بقت وحشه و الدنيا مش أمان منصدقش و ندور على الجوانب المشرقه الكتيييير, مصر بأمان طول ما فيها ناس بتحبها و تقدر تحميها و عدم الأمان كان من الدوله اللي جوا الدوله اللي كان عاملها النظام السابق عشان يحمي نفسه, عدم الأمان كان من احساسك ان دي مش بلدك بلد اللي عنده نفوذ أو فلوس بس بلد اللي يقدر يدفع رشوه و يجيب واسطه بلد اللي بينهب في خيرها و سايب أهلها جعانين و بردانين و ظروفهم صعبه من الغلاء و الأمراض و كرامتهم ضايعه عشان مالهومش صوت و لا يقدروا ينتخبوا أو يعترضوا دلوقتي خلاص دي بلدك و راسك اترفعت قصاد العالم أرجوك بقى اتصالح مع نفسك و افهم مصلحتك و حافظ على نتائج الثوره.


أنا عارفه ان في ناس بتتلبش من كلمة ثوره و عندها حساسيه من كلمة التحرير لازم تؤمنوا بالثوره و تعرفوا قيمة الميدان لأنكم هتكونوا أول المستفيدين و لأن مصر أكيد أجمل لما تلفظ الفساد و تتنفس حريه و عدل و خير.


ملحوظه: البوست القادم ان شاء الله هنشر الجزء التاني من قصة (معطف من القيود) اللي هيكتب جملة (و كان المعطف كفناً يحوي جسداً بلا روح) هتخذ معاه اجراءات صارمه و دي أول خطوه على طريق الديموالكراسي قصدي الديمقراطيه :)