الجمعة، 4 مارس 2011

لكل الأسفين الزعلانين المرعوبين

بعض من كتاباتي على الفيس توك:

                                                      كلمة وقفت في زوري

ماذا كانت تعني المذيعة المتواضعة الأداء حينما طلت علينا منتفخة العينين كئيبة المنظر لتتحدث تليفونياً مع رئيس الوزراء السابق شفيق و تسأله بعطف الابنه عن ساعاته الأخيره و الظلم الذي وقع عليه و ماذا سيفعل في حياته بعد ذلك و تحاول استدرار عطف المشاهدين بطريقه سمجه و عطف ضيفها الموقر بأن تدعوه بأنه متأثر و تزوووم على عينه لنرى الدموع, ثم تسأل ببراءه عن ما اذا كان ينتوي الترشح لرئاسة الحمهوريه!!! هل هذا درباً من العبط أم الاستعباط؟؟



و ماذا كان يقصد المذيع المتلون الأداء حينما ظهر علينا بائساً مُحبطاً ليتحدث عن شفيق و ساعاته الأخيره و كيف أن الشباب على الانترنت يطالبون بعودته و يتملكهم الحزن الرهيب, ثم يتحدث مع اعلامي مشهور عن رئيس الوزراء السابق مُعدداً مزاياه مُتحسراً على رحيله و ينهي حديثه بأن هناك وقفه غداً في ميدان مصطفى محمود للتعاطف معه و الوفاء له!!! منه لله ذكرني بموقعة أُحد أقصد الجمل.


لماذا يُصر بعض الاعلاميين على اثارة البلبله و اشاعة الفتن بين الناس لماذا لا ينصتوا لصوت العقل و يحاولوا ايضاح الأمور لمن يجهلها من الناس بدلاً من اثارة الرأي العام أعلم أنهم غداً سيبدأوا التطبيل للوزارة الجديده لكن لم نكن نحتاج أمس سوى لمسة شكر و احترام للفريق شفيق مع تقدير لرأي الجماهير و المثقفين و الشرفاء و ايضاح لماذا تمت تلك الخطوه نزولاً على أراء و تحاليل منطقيه و ليس نزولاً على رغبة الألاف في ميدان التحرير الذي يتمنى البعض أن يظهروهم في صورة خاطئه و مشوهه و ما هم الا نبض كل المصريين الشرفاء و ها نحن نمشي في طريقنا للديمقراطيه رغماً عن العثرات و الجهلاء و المتخوفين دائماً.








                            لكل الأسفين الزعلانين المرعوبين

أنا ماكنش ليه في السياسه كان ليه في حب مصر بس, كنت بهرب لما ألاقي كلام عن الفساد و المشاكل و الأراضي و السرقه على مستويات كبيره و الناس اللي عيشين في تلوث و مجاري و الناس اللي بتموت من غير تمن و الأمراض اللي بقت مستوطنه, يعني برنامج واحد من الناس و عينته كنت بسميهم فقرة النكد لأنها بالنسبه لي أسباب للنكد و وجع الدماغ و القلب من غير ما يكون عندي أي حلول أو أشباه حلول و حتى لو عندي متأكده ان محدش هيسأل فيه اذا كانت مش عارفه أخد حقي أساساً يبقى ازاي هجيب حق الناس.



لما الثوره قامت اتأثرت جداً من أول يوم حسيت ان الهمم موجوده و العزيمه عايشه و اننا بنعرف نثور بنعرف نقول لأ رغم التحديات الكتير و الخوف و السلبيه و المفردات اللي ماشيه زي (كبّر نفّض هيّس) و الاسرائلين اللي كانوا بيضربوهم رغم كل ده صوتهم كان عالي و اصرارهم كان قوي و كانوا رجاله بمعنى الكلمه, كنت فاكره ان كل الناس هيبقى عندها نفس الحماس و الرغبه في التغيير لكن ناس كتير للأسف صدمتني...


أنا مش معترضه ان حد يكون بيحب الرئيس السابق لكن المفروض بعد ما شاف اللي حصل و ضرب النار و العربيات اللي بتدهس الشباب و بعد ما سمع التفاصيل السياسيه زي الدستور المتفصل و الانتخابات المزوره و الحريات المقموعه و العدل اللي مفيش ريحته و المساواه اللي حتى مش في الظلم , كنت فاكره ان اللي استوعب كل ده يقول مش عايزينه عايزين انسان يعرف الديمقراطيه اللي بجد لكن فوجئت بان الناس لسه بتقول آسفين و لسه عايزين يحطوا رسهم في الرمل و يعملوا فيها انهم دعاة التهدئه و ان الناس اللي في التحرير عايزين يهدّوا البلد و مش خايفين عليها.


و الغريب في الموضوع ان الناس بتوع آسفيين و التهدئه دول هما نفسهم كانوا بينشروا على النت أي وقائع فساد و كانوا في حالة نقد دائم لأوضاع البلد و سخط على النظام اللي عمره ما هينصلح و أول ما قامت رياح الثوره هووووب بقوا يا جماعه حرام عليكم ...يا ناس ده ريسنا بردو...اللي في التحرير دول غلطانين و مش قلبهم على مصر...أجندات...أجانب...اسرائيل على الحدود...أمريكا بعته سفن...و الفيلم الهندي اللي كلنا عارفينه, و بعد ما الثوره أثبتت نجاحها بفضل بعد ربنا التحرير نفس الناس الأسفيين على شبابهم هووووب أنا أفتخر اني مصري...ثورتنا البيضاء...شفوا برّه بيقولوا ايه علينا...مفيش مشكله لكن المشكله انهم الى الآن بيكنوا بعض الكره أو نقول الضيق من التحرير و ده باين جداً في محاولتهم لتلويث سمعة أي مشهور كان هناك أو مؤيد معروف بادعاء انه مزيف و في محاولتهم للمره التانيه للتهدئه و اننا نقبل أي حاجه و أي وضع عشان مصر متضيعش, و كأنهم أثبتوا ان النظام اللي فات نجح يخليهم مش معترضين على أي حاجه.


تخيلوا ان في منهم بيقول نظام فاسد مش مشكله بس نبقى في أمان يسرقونا مش مشكله بس ميدخلوش السجن و يتهانوا, أخاصمك آه أسيبك لا, و في منهم بيقول الناس أخلاقها بقت وحشه بعد الثوره تصور بيطالبوا بحقهم بالعافيه تخيل انهم زعلانين من الشرطه و بيشتموا الحراميه, و ياعيني بيتريقوا على أسيادهم و هما كلهم عملاء.


أعزائي عايزه أقولكم ان أي حد منكم حاجه من التلاته اما كان منتفع بشكل ما و سقوط النظام ضره بشكل أو التاني هو أو حد من قريبه اللي كان بيمده بالواسطه, اما انه انسان أناني مش شايف غير نفسه و مش حاسس بآلام غيره اللي تحت خط الفقر و اللي مالهومش صوت و اللي اتعذبوا و اتسحلوا من الشرطه و مش هامه غير انه هو تمام التمام, اما انه بسيط مالوش في الطور و لا الطحين و عايز يعيش جنب الحيط كافي شيره خره و ماشي على سياسة الرضا اللي كانوا بيعلموهالنا...و أهي عيشه و السلام.


أرجوكم الثوره في الحق خير من التهدئه في الباطل...و الاستقرار في نظافه خير من الاستقرار في الطين.


أنا نفسي كلنا نتفق على حب مصر و اعمارها و ده مش هيحصل غير بديمقراطيه صح و حريه بجد و مساواه حقيقيه و عشان يتحققوا لازم نضحي شويه و نصبر شويتين و بدل ما نهاجم بعض نشجع بعض و بدل ما نسيئ الظن و نروج الشائعات و نشيير أي خبر غريب مش متأكدين منه ممكن يثير الذعر أو يستفز نشيير بس الأخبار الأكيده, و بدل ما نكتئب و نقول الناس بقت وحشه و الدنيا مش أمان منصدقش و ندور على الجوانب المشرقه الكتيييير, مصر بأمان طول ما فيها ناس بتحبها و تقدر تحميها و عدم الأمان كان من الدوله اللي جوا الدوله اللي كان عاملها النظام السابق عشان يحمي نفسه, عدم الأمان كان من احساسك ان دي مش بلدك بلد اللي عنده نفوذ أو فلوس بس بلد اللي يقدر يدفع رشوه و يجيب واسطه بلد اللي بينهب في خيرها و سايب أهلها جعانين و بردانين و ظروفهم صعبه من الغلاء و الأمراض و كرامتهم ضايعه عشان مالهومش صوت و لا يقدروا ينتخبوا أو يعترضوا دلوقتي خلاص دي بلدك و راسك اترفعت قصاد العالم أرجوك بقى اتصالح مع نفسك و افهم مصلحتك و حافظ على نتائج الثوره.


أنا عارفه ان في ناس بتتلبش من كلمة ثوره و عندها حساسيه من كلمة التحرير لازم تؤمنوا بالثوره و تعرفوا قيمة الميدان لأنكم هتكونوا أول المستفيدين و لأن مصر أكيد أجمل لما تلفظ الفساد و تتنفس حريه و عدل و خير.


ملحوظه: البوست القادم ان شاء الله هنشر الجزء التاني من قصة (معطف من القيود) اللي هيكتب جملة (و كان المعطف كفناً يحوي جسداً بلا روح) هتخذ معاه اجراءات صارمه و دي أول خطوه على طريق الديموالكراسي قصدي الديمقراطيه :)

هناك 56 تعليقًا:

سواح في ملك اللــــــــــــــــــه- يقول...

يسلم قلمك ياشيرين
قال كل اللي جوانا
معنديش حاجة اضيقها غيران
الشرطةالمصريةبقي عليها
علامة استفهام
همامش راضيين ينزلوا الشارع
عشان فعلا خايفين من الناس
ودي تبقي مصيبةسودة لان المفروض
الي مهمته حماية الناس ميخفش منهم
وان رجال اشرطةالي صدعونا بيهم
انه نازل من بيته شايل روحه عي كفه
عشان يحمي البلد
ولا بيدوا فرصة لازلام الحزب الوطني
لالتقاط الانفاس ومحاولة العودة
دون تدخل حتي لايدانوا
ولا عايزننا نقول ولايوم من ايامك
ياريس والا ايه بالظبط
اما انا واما الفوضي
اخر كلمات الرئيس السابق في حوار مع
صحفية امريكية
تحيتي

Unknown يقول...

سواح: أعتقد شرفاء الشرطه نزلوا و اللي خايف أكيد لأنه عارف انه مُدان و عموماً صفحة الحزب الوطني اتقفلت خلاص و مش هنرجع لورا تاني كل يوم الثوره بتثبت نجاحها أنا متطمنه جداً و حاسه ان اللي جي أفضل و أجمل بكتيير
تحياتي ليك

شمس النهار يقول...

اولا بعتذر عن التقصير بس الوقت ضيق ومابلحقش اعمل كل حاجه في اليوم
ودخول النت عندي مش شئ ثانوي لكن بحب ادخل بمزاج علشان البوستات دي عصير فكر المدونين يجب ان تتقري بهدوء وتركيز

ندخل علي البوست بجد انا مش مستغربه الواقعه ابدا
علشان لسه الاعلام لم يرحل منه الطبلجيه والخفافيش والحزن الوطني

عارفة كنت لسه بتكلم عن برنامج واحد من الناس بقول انه ارشيف للناس الموجوعه واللي عندها مشاكل
يعني لو عايزين حالات جاهزة نجيب ارشيف البرنامج ونشتغل وده يعتبر ملف ساخن جاهز بكل المعلومات

ومش مستغربه ان تفاعل الشعب مع الثورة ماكنش واحد
علشان الحزن الوطني كان كاكوادر بس 3 مليون طيب اعضاءه المنتفعين كانوا اد ايه
والتلاته مليون دول همه من الناس المتواجده ومتعلمه ومتفاعله مع المجتمع
تخيلي بقا التلاته مليون دول يعملوا ايه
لما حد بلاقيه كلامه مش قد كده عن الثورة او متلون علي طول اساله هو انت مش حزب وطني كان يزهل ازاي عرفت

وهمه دول نفسهم اللي بيقولوا بحبك ياريس طبعا لازم يقولوا مش دول المنتفعين

وماتصدقيش موضوع انهم خايفين او عايزين الامان
اي امان مع فساد دول بيضحكوا علي نفسهم

لكل الاسفين بقت خلاص ياجماعه ااسفوا علي مهلكم علشان العجله مش هترجع للوراء
ياتشتركوا في النهضه والتنميه ياتركنوا علي جنب بدموعكم

ومستنيه القصه
وهحاول ارجع للبوستات القديمة اقراها ان شاء الله

شهر زاد يقول...

فراشة التدوين
الله يعطيك العافية
انت قلت كل حاجه ومخلتيش حاجه
انت جدعه بصح
لازم حب مصر هو الي يجمع مش ارتباطنا المزيف بالاشخاص الي دمروها
دي مهمة كلي الي بيكتبو لازم يركزو على الوحدة هي اساس النجاح
الثورة مش حتكمل لو الفرقه سادت والاراء اختلفت
تحياتي

غير معرف يقول...

يسلم فمكِ ياشيرين
أنتِ كدا ( رافعه لك إبهامي )
^_^
فعلاً قلتِ كل اللي لازم يتقال
ربنا يصلح الحال يارب
ويحمي أم الدنيا حبيبة الدنيا كلها
ويحمي شعبها الطيب
كل الود

وردة الجنة يقول...

بجد يا شيرين ماشاء الله عليكى فعلا

انا معنديش اى تعليق بعد كلامك لانك جبتى كل حاجة احنا عاوزينها وسبب اللخبطة اللى بتحصل دلوقتى فعلا تحليلك ليها صح

ربنا يعدى المراحل والفتن دى كلها على خير وتكون مصر دايما ابية وعزيزة بين الامم ومتقدمة باولادها

تحياتى

مدونه ما كفايه بقى يقول...

السلام عليكم

والله يا دكتوره الواحد كان جواه كلام كتير مكنش عارف يعبر عنه بس انتى قلتيه كله الله ينور

هو طبعا فيه مؤيد ومعارض بس فيه كمان منافقين وعددهم مش قليل كمان

ربنا يوصل مصر للبر على ألف خير علشان كلنا يهدأ بالنا

تحياتى لكى دكتورتى

محب روفائيل يقول...

هيه هيه ، دنيا !!!!!!

ازيك يا دكتورة عاملة أيه ؟

كلامك صح ، وانا برضه مش عارف ليه كده ،عموما ربنا يسهل

تحياتى على السخرية اللى فى بعض الجمل :)

محب روفائيل يقول...
أزال المؤلف هذا التعليق.
سكن الليل يقول...

والله الأيام اللي فاتت دي كانت أصدق
مثال على "اللي يعيش ياما يشوف"
عبارة عن خلطبيطة من أحداث متضاربة
وآراء مختفلفة حتى للشخص الواحد
ودة لأننا للأسف مش شايفين الحقيقة الكاملة..
عشان كدة ممكن تلاقي وجهة نظرنا بتتغير كل شوية..
دة الناس العادية يعني اللي بتحب البلد
الناس البسيطة اللي متضامنة مع الثورة بكل روحها وقلبها وعقلها..
ونفسها البلد تتغير والأحوال تتعدل
الناس دي منهم اللي دلوقتي مستمر في التظاهر ومؤيد له
وطموحاته مالهاش سقف
ومنهم بردو اللي بيقلق لما التظاهر يستمر ..خايف بردو على البلد ووقف حركتها..وممكن أول ما اتعين الدكتور أحمد شفيق أعجب بكلامه وحس بتغيير
واستغرب لمهاجمته وطلف إقالته
وبيقول ندي فرصة الدنيا تهدا والناس تشتغل والأمن يستتب
دول مانقدرش نشكك في وطنيتهم
احنا متفقين على الوطنية وحب البلد
لكن كل واحد فينا بيشوف الصورة من ناحية..وبردو مش عارفين إيه الصح
يمكن كلنا صح..
ويمكن يكون ضمن الناس دي ناس كبيرة
حد في البلد مثلا مذيع وللا معارض وللا حد له فكر سياسي واضح وبنشوف اساميهم
ومانقدرش نلوم عليهم طالما النية سليمة .. واحنا ربنا أعلم بنوايانا
ودول مش عايزين الثورة تنتهي
في فرق بين انتهاء الثورة وبين تقليل التظاهر..لان لو الثورة وقفت يبقى اللي احنا عملناه كله مالوش لازمة ..لازم الثورة تستمر
لكن بردو لازم عجلة الحياة تستمر
الناس تشتغل وتتابع وتراقب سير الأمور
وتنتقد الوضع ماشي
لكن مش طول الوقت تظاهر
دي وجهة نظر

**
ناس تانية بقى بردوا مثال للوطنية والشرف
قالوا لا يا جماعة
احنا مش هنوقف دلوقتي
هنفضل في التحرير لحااااااد ما نوصل لحاجات كتيرة كل شوية بتزيد
ودة حقهم بردو وبردو يمكن هما شايفين حاجة الناس اللي قبلهم مش شايفينها..
**
ناس تالتين بقى ينطبق عليهم كلمة:
"معاهم معاهم عليهم عليهم"
ودول شرذمة منافقة بتمشي مع التيار
وتشوف مصالحها مع مين
عشان كدة كل شوية برأي وحجة
حبة ضد الثورة بصرااااامة
ولما الثورة تبقى جميلة والناس كلها تمدحها يبقى هما مع الثورة قلبا وقالبا..
دول بقى لازم لهم قنبلة تنسفهم من الوجود..ويتكشفوا ويبقوا عبرة لمن اعتبر..عشان ماحدش يطلع زيهم تاني
**
شيرين
الثورة عمرها ما هتنتهي
لازم الكل يبقى في ثورة تصحيح
سواء على مستوى الوطن أو على المستوى الشخصي..
بس لازم نشتغل وننتج ونصلح ونعالج
ونرتقي بالبلد ونحمي أمنها
ونصونها ونحافظ عليها من أي اعتداء خارجي أو داخلي
**
بالنسبة للشرطة بقى
فأنا شايفة إن جهاز الشرطة الحالي لا يصلح لما بعد الثورة
مش مؤهلين لأداء الأهداف النبيلة اللي كان المفروض إنهم داخلين كلية الشرطة عشانها
الامل في الجيل الجديد إنه يكون قدر المسئولية..
ولحاد ما ييجي دورهم نحاول كلنا بقى مع الفئة الشريفة اللي في الشرطة:ماهو مش الكل وحش..
وننقذ ما يمكن إنقاذه
---


عجبني الموضوع وحبيت المناقشة فيه
تسلم الأيادي يا بنوتة

eng_semsem يقول...

انا معاكي من اول حرف لاخر حرف في كلامك
وعلى فكره حكاية الاعلام ده عندك حق بس المشكله في اشخاص اتعلموا ان النجاح هو التملق للسلطات وان هو مش يبقى ليه راي شخصي انما يبقى في راي يقولوا ليه دافع عنه
وعشان كده الحلم اللي في خيالنا والصوره اللي عايزين نشوف مصر فيها مش هتيجي في يوم وليله لسه الطريق طويل بس المهم ان احنا عرفناه وبدانا نمشي فيه وهنحقق حلمنا ان شاء الله
تقبلي تحياتي

هبة فاروق يقول...

حبيبتى شيرى انت قولتى المفيد والخلاصة
اؤيدك فى طرح وجهة نظرك فى ان اللى كان عايز استمرار النظام اما منتفع او انسان مش حاسس بغيرة او الوسطة كما ذكرتى
اما الناس المتقلبة حسب الاحوال دول منافقين ومتلونين واصبحو غير مصدر للثقة وفقدوا المصداقية
الشىء الوحيد اللى خايفة منة الفتنة بين الناس وبعضهم والطلبات الفئوية المتكررة فى كل مكان وغياب الشرطة والامن كل الحاجات دى لو انتهت مصر حتبقى بخير وانا متفائلة ببكرة ان شاء الله
اما فئة المذيعين والمذيعات فدول لازم يبقو محايدين ولا داعى للحركات المبالغ فيها
وفى انتظار الجزء التانى من قصة وكان المعطف كفنايحوى جسدا بلا روح هههههههههههههه
بهزر معاكى يا قمر يا احلى شيرى فى الدنيا
والله الملحوظة فطستنى من الضحك اوعى تكونى لسة زعلانة يا قمر انتى اغلى اخت فى الدنيا

افروديت يقول...

بوست جامدجدآ
وأحيكي عليه ياشيري بجد
لا أعلم لماذا يبكون علي قبور السفاحين
لا أعلم لماذا يتحسرون علي زمن المسخ
حقآلا أعلم ولا أريد أن أعلم
يكفي أنهم ذهبوا من الساحة
ويكفي الخراب الذين تركوه لنا
سنحتاج وقت وهمم وعزيمة قوية للأصلاح
تحياتي

جايدا العزيزي يقول...

شرين

اولا وحشانى جدا يا قلبى

ثانيا انا معاكى الثورة غيرت فينا كتير

بس المهم زى ما قلت اننا نتفق على حب مصر

ونحافظ عليها

ودى اهم نقطه

اشكرك

تحياتى

مصطفى سيف الدين يقول...

والله اللي انا شايفه ان عصر مبارك انتهى ومعتقدش ان النفاق والتملق لسه موجود دول ناس غالبا ليهم مصالح مع بقايا النظام بيحاولو يحافظو عليها
وكلامنا الكتير عن الناس دي هو اللي هيديلهم الاهمية
يعني وضحت قوتنا في التحرير ووضح ضعفهم في مصطفى محمود
اما عن شفيق بقى الراجل وضح من برنامج اون تي في انه مالوش فيها ولا يعرف حاجة عن البلد كل شوية يقول رايي واقتراحي ولسه الملف موصليش مقالش اي حاجة عن اي قرار ممكن يتخذه بالتالي وضح شخصيته الضعيفة وفوق ده كله الشعب مش طايقه ولا عايزه
بالنسبة للناس وارائهم المختلفة المؤمن بالثورة واللي مش مؤمنين بالثورة وخايفين من الفوضى والصنف التالت من المنافقين خلاص جيم اوفر والشعب انتصر والحكومة استقالت والنظام بيقع
خلاص نبدا بقى نبني البلد ومنفكرش في حساب اللي كانوا بيأيدوا مبارك الا اذا كانوا من الفاسدين اللي عليهم قضايا او يجب محاسبتهم لكن اللي كان بيأيدوا بالكلمة والراي ومظاهرات رد الجميل والحاجات دي خلاص بقى مهما ان كان دول مصريين زيهم زينا يمكن ايام الذل نستهم ان في حاجة اسمها كرامة وايام الخوف ادمنوها ومش عايزين يسيبوها ومبدا اللي تعرفه احسن من اللي متعرفوش هو مبدأهم في الحياة دول بقى منتهمهمش بالخيانة والعمالة بالعكس احنا نتكلم عن ثورتنا وعن اهدافها ونبدا نعمل في تحقيق الاهداف دي الناس دي وقتها هتفهم وتعرف
مبدا شمولية الفساد والخيانة على كل مؤيدي مبارك مبدأ غلط جدا وممكن في المستقبل يدمر البلد خصوصا ان الشعب دلوقت هو مصدر السلطات يعني كل واحد هيترسخ جواه ان اي معارض لرايه عميل بالتالي هتبدا العداوات بين الجميع
علشان كده كل واحد حر يعبر في رايه عن اللي شايفه وفي النهاية الاغلبية والاكتر في العدد قرارهم هو اللي هيمشي
يبقى الحكاية متخوفش كده وان كانت فعلا البكاء الزايد مستفز لكن ده حقهم ومش هنخلي كل الناس تفكر بعقلنا ده رايي يا دكتورة شيرين يمكن ميعجبكمش بس صدقوني الشهداء ضحوا بحياتهم علشان يقولوا رايهم ضد نظام مش بيسمع غير رايه يا ريت احنا كمان نسمع باقي الاراء علشان منبقاش زي النظام ده
اخيرا اشكرك على البوست القيم والجميل اللي بيعبر عن حبك للبلد دي اللي كلنا بنحبها ونعشق ترابها ونتمنى انها بكرة تبقى احسن
وبالنسبة للجزء التاني من القصة انا هاستناه بفارغ الصبر بصراحة الجزء الاولاني كان تحفة فنية وادبية

Carmen يقول...

فعلا ناس كتير هدفها ان الامور ماتستقرش ابدا , ناس جوه وبره
يسلم قلمك وفكرك ياشيرين

faroukfahmy يقول...

فراشة التدوين .. هذا التعريف الصادق مش عارف ليه ياشيرين حاسس انه ينطبق عليك تماما، اما عم مقالك عن الثورة المضادة فقد كان مقالا تحليلياجريئا والحقيقة ان كل يوم يثبت نجاح خطوات الثورةواكبر دليل ان اثبتت ارادتها بتعيين شخص رئيس الوزراء الذين يريدونه واصبح تعيين الوزراء من سلطة الشعب وليس من سلطةالرئيس الحاكم

MTMA89 يقول...

"كلمة وقفت في زوري"
الحمدلله اني مشفتش حوار زي ده.. التلفزيون لسه في ناس مستفزة كتير.. و ساعات بحس ان عندهم مشكلة نفسية فعلا.. اكيد شفتي النهارده احتفلوا بعصام شرف و هوا في التحرير ازاي.. اعلامنا اصبح مجرد فرقة استعراض.. كل واحد ياخد يومين كده و يشوفوا غيره..

بالنسبة لشفيق.. انا اقدمله كل الاحترام لانه تقدم بالاستقالة و انهى خلاف كان ممكن يكون اسوأ من كده..


"لكل الآسفين الزعلانين المرعوبين"
انا هاخالفك في الرأي.. دي من الآخر ناس عاوزة الحرق.. بس للأسف ده عكس أي مبدأ إنساني.. ندعيلهم بقى ربنا يهديهم..


بالنسبة لصفحة الفبس "بوك".. أنا ضايفها عندي.. لكن للأسف مش متابعها باستمرار.. وعد مني اتابعها على قد ما اقدر.. ان شاء الله..


تحياتي

محمد
:)

ندا منير يقول...

للاسف فعلا الاعلام لحد دلوقتى بيتلون كل شوية مع الصورة الجديدة

وبعدين معلش يعنى هو دكتور احمد شفيق شفنا منه ايه عشان نقول انه خسارة فينا لما كان وزير للطيران المدنى اوكى حقق نجاح لكن حاليا لما يبقى رئيس الوزراء دا امر تانى ومختلف تماما
ولما يطلع ويقول دول فشلوا وكل يوم بيبقوا اضعف من الاول قبل ما يتنحى حسنى مبارك ويقول اجيبلهم بومبونى واوزعه عليهم ومبارك مش هيمشى
وكان بيتكلم باستهزاء عالى جدا
دى اول حاجة تخلينا نقول الف لا انه يبقى رئيس الوزراء

المشكلة بجد دلوقتى شوية يقولوا عاييزن شفيق وشوية لا
بقى كل جماعة ليها رايها
وعشان كدة لحد دلوقتى اتحقق خطوات ناجحة جدا
ونشوف دكتور عصام هيعمل ايه وهو وعد بالتغيير

اعتقد لحد هنا وكفاية مظاهرات عشان نعرف نشوف ايه اللى هيتعمل
وعشان مش كل شوية ينقسم الناس احزاب

Unknown يقول...

السلام عليكم أختي شيرين..

والله لا أجد ما أقوله غير أنك سرقتِ خواطري حول المواضيع التي طرحتيها! :)
ورغم أني لا أحب الكتابة بالعامية، لكن بالفعل عبرتِ بتلقائية جميلة وواضحة جدا.. وأدت المطلوب كما ينبغي..
أحييك على هذه السطور بلا أدنى مجاملة.

ملحوظة1: ضحكت كثيرا على الملحوظة الأخيرة الخاصة بالقصة :)
ملحوظة2: رغم أني لستُ من الذين سقطوا في شرك الجملة إياها!! إلا أني صرت أحرص على التعليق قبل قراءة تعليق (مصطفى سيف) هههههه

دمتِ محبة لمصر غيورة عليها مع تحياتي.

;كارولين فاروق يقول...

اخاصمك اه اسيبك لا
لا جامده جدا
صباح السلبيه
خلاص بقي كل الامور اتضحت ومفروض منا
جميعا الوقوف امام الفاسدين
وسلامي لبوستك الرائع

الحسينى يقول...

زعلان أوى يا شيرين من الناس اللى تجيب إحباط دى
مش عاوزين يفهموا إن مصر محتاجة تتغربل علشان يبقى النضيف بس والوحش يشوف له حته تانيه.
وزعلان كمان علشان مصر فيها ناس وحشة صنعها النظام القديم بلطجية كانت مهمتهم يبقوا تحت طلب الداخلية وناس وحشة بتستغل الثورة أسوأ استغلال وإعلام بيكذب قبل الثورة وبعدها.
وزعلان علشان اكتشفت إن فيه ناس مش بيحبوا مصر وكل اللى كان همهم هو إنهم يحلبوا خيرها ودلوقتى عاوزين يخربوها بعد ما عرفوا إن مالهومش مكان فيها.
بس ربنا موجود وإن شاء الله غصب عنهم اللى جاى أحسن.

ENG./ELSAYED,PMP يقول...

أعزائي عايزه أقولكم ان أي حد منكم حاجه من التلاته...

خليهم حاجة من أربعة :
http://www.youtube.com/watch?v=XA4AqrPo9Xs&feature=player_embedded


Stockholm syndrome

متلازمة إستكهولم

حلم بيعافر يقول...

لكل الاسفين والزعلانين

طظظظظظظظظظظظظظظظظظظظ

Unknown يقول...

شمس النهار: نورتي يا شمس المدونات افتقدت تعليقاتك المهمه بس أنا كنت متبعاكي و عارفه قد ايه كنت مشغوله بنقل المهازل في مستشفيات الحكومه مع مصابين الثوره ربنا يصلح الحال و يسلمهم.
كلام حضرتك مظبوط جداً و مش بس كوادر الحزن الوطني لأ ده كمان البواب و البقال و الناس اللي عاشقه عيشت الحضيض بس يبقوا في أمان...بجد أنا اتخنقت من الناس دي فعلاً أول مره ثوره تقوم و نقعد نقنع الناس بيها.
المفروض زي ما حضرتك قلتي كله يشتغل و يساعد في النهوض و نسيبهم يقعدوا يعيطوا و يتخانقوا مع نفسهم.
تحياتي ليكي و أسعدتيني بزيارتك الرائعه.

Unknown يقول...

شهرزاد : الله ينور عليكي هي فعلاً مش حتكمل لو الفرقه سادت والاراء اختلفت
ربنا يكملها على خير.
أشكرك على تعليقك الجميل
تحياتي لشهرزاد التدوين

Unknown يقول...

رحيق الضوء: يارب كله ينصلح أشكرك على تعليقك و زيارتك
كل الود ليكي تحياتي الخالصه

Unknown يقول...

وردة الجنه: أتمنى يا عزيزتي يا رب مصر تفضل عزيزه بأهلها و نتجمع و نتوحد مش ناقصين فرقه خالص ده وقت البناء
تحياتي ليكي نورتيني

Unknown يقول...

مدونه ما كفايه بقى: للأسف المنافقين كتير في الوقت اللي احنا محتاجين فيه مصداقيه يا رب كله ينصلح يا عزيزتي
تحياتي ليكي و أسعدتني زيارتك

Unknown يقول...

محب روفائيل: ازيك يا محب افتقدت تعليقاتك الفتره اللي فاتت سعيده بزيارتك و يا رب دائماً منورني
تحياتي ليك

Unknown يقول...

سكن الليل: تحياتي ليك بداية نتفق ان كده كده مش هنشكك في وطنية حد لأن دي حاجه ماتقبلش المزايده, الناس فعلاً متلخبطه أنا نفسي بتجيلي لحظات رأيي بيتقلب لكن الحمد لله يقيني بالثوره ثابت بالنسبه لشفيق بصراحه أنا مشوفتش منه حاجه كويسه أو وحشه هو بس يحسبله أنه رضي يمسك في الوقت الصعب ده و متمسكش و مشي لما لقى الناس عايزه كده و أنا كنت مع انه يمشي لأنه شرعيته سقطت مع سقوط النظام, أنا مقصدتش ان المذيعين اقل وطنيه من غيرهم لكن الاعلام عموماً مفروض ميحرضش الناس على بعض و مفروض ميتسببش في فتنه خصوصاً اننا في مرحله حساسه كان يجرى ايه لو يفهموا الناس ان ده لمصلحتهم بدل ما يستدروا عطفهم أهو كل الناس دلوقتي بتتخانق و يقولوا مالوا شفيق الناس اللي في التحرير دول مش هيتهدوا و النت كله خناقات الاعلام مش بريئ منها في رأيي.
أنا معاكي اننا لازم نبقى في حالة ثورة تصحيح على طول أي نعم أنا كمان نفسي الأمور تستقر و عندي حاجات كتير متعطله بس الأهم دلوقتي التغيرات اللي هتغير تاريخ مصر كله لينا و لولادنا, عشان كده مفروض نتعامل مع الوضع و منخافش و الاسفين دول يجوا على جنب عشان نعرف نشتغل و مش عايزين من الشرطه غير الشرفاء و اعادة تأهيل للدفعات الجديده عشان كله يرجع.
أنا كمان سعيده بالمناقشه معاكي :)
تحياتي الخالصه لك

Unknown يقول...

eng_semsem: وجهة نظرك في الاعلام صحيحه جداً هما فعلاً متعودين يتقالهم رأي و يدافعوا عنه لكن خلاص الأساليب دي مش لازم تستمر ان شاء الله اللي جاي أفضل.
تحياتي ليك و نورتني

Unknown يقول...

هبه فاروق: أنا كمان مبحبش الناس المتلونين دول و بوافقك اننا محتاجين المظهرات الفئويه تنتهي و الأمن يستقر عشان نعرف نستمتع بانجازات الثوره.
طبعاً مش زعلانه منك حد يزعل من أجمل و أخف مدونه أنا بس لما اتكلمت عن الحكايه دي لأني استغربت ان أكتر من خمس تعليقات نفس الحكايه, يلا هستنى رأيك في القصه الجايه يا قمر.
تحياتي ليكي و نورتيني

Unknown يقول...

أفروديت: موافقاكي على كل كلمه و نفسي نفوق لنفسنا بقى عشان نقدر ننجز في أماكنا.
تحياتي الخالصه لكي

Unknown يقول...

جايدا العزيزي: وحشاني أوييييي بجد أسعدني تواجدك و عودتك من تاني و في انتظار زيارتك اللي بتسعدني دائماً و يا رب بكره أجمل.
تحياتي العطره لكي

Unknown يقول...

مصطفى سيف : رأيك يحترم جداً و صحيح مئه بالمئه بس ساعات الواحد بيستفز خصوصاً لما يقعدوا يعملوا بيدجز و جروبز ضد شباب الئتلاف أو علاء الأسواني أو أي حاجه بتساند الثوره أنا بتشل من الكلام ده عشان كده قلت أكتب الكلمتين اللي فنفسي لكن بصراحه رأيك هو صوت العقل و اللي (أنتوي) اني أعمله:)
وبالنسبه لشفشق هو فعلاً مش مفيد مفتكرش اني شوفتله لقاء قال حاجه مفيده تحس انه معندوش فكره عن حاجه و مع ذلك هيموتوا نفسهم عليه! بس خلاص خلاص كل واحد حر و الأغلبيه هي اللي رأيها هيمشي بس واجب علينا بردو نفكر و نحلل بصوت عالي لاربما نقدر نقنع حد برأي صحيح أو نقتنع برأي حد لو مقنع.
سعيده بمناقشتك يا زميلي العزيز
تحياتي ليك

Unknown يقول...

كارمن: شكراً يا كارمن دائماً منوراني و بيسعدني تعليقك
تحياتي ليكي

Unknown يقول...

كارمن: شكراً يا كارمن دائماً منوراني و بيسعدني تعليقك
تحياتي ليكي

Unknown يقول...

faroukfahmy58: أشكرك أنا فعلاً الوصف ده بيسعدني جداً:))
سعيده ان الكلام عجب كاتب رائع زيك و أكيد تعليقك بيهمني و يسعدني جداً و ان شاء الله الثوره من نجاح لنجاح
تحياتي الخالصه لك

Unknown يقول...

MTMA89: عندك حق الاعلام بقى مستفز جداً و موفقاك ان شفيق مشي في الوقت المناسب و لازلت بحترمه
هههههه الحرق مره واحده ربنا يهديهم فعلاً عشان نفوق لنفسنا بقى
سعيده جداً يا محمد بمتابعتك و يا رب دائماً منورني
تحياتي ليك

Unknown يقول...

ندا منير: أولاً سعيده بأول زياره ليكي نورتيني:)
المشكله ان تلون الاعلام ده بيأثر على الناس و يخليهم أحزاب زي ما قلتي لأنه بيثير تعاطف البعض و بيثير حنق البعض لأنه لازال متأثر بسياسته القديمه في فرض آراء معينه مش الحقيقه.
انت حطيتي ايدك على أهم سبب لرغبتنا ان شفيق يمشي لأنه كان موقفه مش مع الثوره فبالتالي مكانش هيبقى حريص على تحقيق أهدافها و مكانش هيرضي الثوار.
معاكي بردو اني نفسي المظاهرات بتاعة المرتبات و التثبيت و الكلام ده تنتهي لأن في طرق شرعيه دلوقتي للتظلم هينظر فيها مش هتترمي زي زمان.
تحياتي ليكي و أسعدني تعليقك المهم

Unknown يقول...

ندا منير: أولاً سعيده بأول زياره ليكي نورتيني:)
المشكله ان تلون الاعلام ده بيأثر على الناس و يخليهم أحزاب زي ما قلتي لأنه بيثير تعاطف البعض و بيثير حنق البعض لأنه لازال متأثر بسياسته القديمه في فرض آراء معينه مش الحقيقه.
انت حطيتي ايدك على أهم سبب لرغبتنا ان شفيق يمشي لأنه كان موقفه مش مع الثوره فبالتالي مكانش هيبقى حريص على تحقيق أهدافها و مكانش هيرضي الثوار.
معاكي بردو اني نفسي المظاهرات بتاعة المرتبات و التثبيت و الكلام ده تنتهي لأن في طرق شرعيه دلوقتي للتظلم هينظر فيها مش هتترمي زي زمان.
تحياتي ليكي و أسعدني تعليقك المهم

Unknown يقول...

ماجد القاضي: و عليكم السلام و رحمة الله و بركاته أكيد يا أستاذ ماجد حضرتك لو كتبت في هذه المواضيع سيكون طرحك أغنى و أفضل لأني الحقيقه مقدرش أقول اني أفهم جيداً في السياسه انما كتبت شعوري و رأيي الخاص و سعيده جداً لو كان في توارد خواطر مع كاتب مميز زي حضرتك.
عجبتني جداً جملة (لم أقع في شرك الجمله)ههههههه
لا و الله أنا مش زعلانه ده كان هزار
تحياتي لحضرتك

Unknown يقول...

كارولين فاروق: شكراً يا جميل سعيده اننا متفقين
تخياتي ليكي نورتيني

Unknown يقول...

الحسيني: أنا كمان هطق من الناس دي بس تعرف احنا المفروض بردو ناخدهم بالهداوه عشان ميتقالش الثوره خلت الناس عدوانيين و فرقت بينهم و كتر المقالات و الكلام أكيد هيوصلهم وجهة نظرنا تفاءل يا عزيزي ان شاء الله اللي جي خير
بالمناسبه بشكرك على ردك على اللي كانت بتخبط في الحلل على الفيس شكراً ليك:))
تحياتي ليك و دائماً منورني

Unknown يقول...

ENG./ELSAYED,PMP: أنا فعلاً سمعت عنها و واضح ان ناس كتير مصابه بالمرض ده عشان كده هياخدوا وقت على ما يخفوا
تحياتي ليك و نورتني في أول زياره:)

Unknown يقول...

حلم بيعافر: هههههههههههههههههه
نورت

Wish I were a Butterfly ... يقول...

ماشي يا ديموكراسية :).

معـاكي، معاكي، معاكي جدا ..في كل حاجة إلا إني مش من بعد الثورة بس اهتميت بالسياسة :) لأني للأسف من النـاس "الغم" اللي بتقولي عليهم و كنت بشتغل في الصحافة في يوم من الأيام

المشكلة إن الإعلاميين المهتمين بإثارة العبط، مش بس البلبلة...فيه كتير أوي ناس بتصدقهم و بتثق فيهم. بجد فيه كتير ناس نيتهم طيبة زيادة عن اللزوم و بينسوا الوحش بسرعة و يتعاطفوا أسرع. هي دي حقيقي المشكلة في مصر

عجبني أوي أوي البوست دة حتة حتة بس مش حابة أطـول عليكي اكتر من كدة

سلامات

تخاريف مترجــِــمة يقول...

بصي يا شيرين

هو كل واحد له رايه الخاص بكل موضوع وعن كل شخص

لكن الفكرة ان لما يكون الشخص ده مذيع او مذيعه

فتبتقى بايخه اوي

لانهم بياثروا على اللي قدامهم

عموما الحمد لله الذي خلق لنا العقل

دمتي صاحبة راي بناء يا حبيبتي

وكلنا اتعلمنا السياسة ف الآونة الاخيره
:)

سندباد يقول...

تحياتي لقلمك الراقي وفكرك الرائع
موضوع في منتهي الاهمية وتحدثتي فيه بمنتهي الرقي
وباذن الله القادم افضل وكل الاسفين عندما يشاهدون الخير القادم ويعيشونه سيعلموا الصواب من الخطأ
تقديري واحترامي

Ms Venus يقول...

مافيش حاجة تتقال بعد اللى كتبتيه يا شيرين

قولتى كل حاجة ومتفقة معاكى

Unknown يقول...

Wish I were a Butterfly ...:فراشتي الجميله مبسوطه ان الموضوع عجبك و للأسف الاعلام في مصر حالته صعبه هياخد وقت عشان يتغير سعيده جداً بزيارتك
تحياتي ليكي و نورتيني

Unknown يقول...

تخاريف مترجمه: انت جبتي الخلاصه و غهمتي قصدي بالظبط المشكله ان الاعلام بيؤثر جداً في الناس فضروري يبقى محايد
دائماً بتسعديني بزيارتك و تعليقك
تحياتي الخالصه ليكي

Unknown يقول...

سندباد: أنا اللي بشكرك على زيارتك الغاليه و فعلاً في المستقبل الناس الأسفين هيعرفوا قيمة الثوره
تحياتي و احترامي لك

Unknown يقول...

فينوس: شكراً يا جميل نورتيني بزيارتك
تحياتي ليكي يا فينوس الجميله

Emtiaz Zourob يقول...

دايما في كل بلد وفي كل زمان ، بتلاقي من هالنوعية من البشر ، زي اللي بيصطاد في مية عكرة .. عموما ربنا يعدي هالايام على خير وتوصل مصر واولادها لبر الامان،
تقبلي مروري وتحيتي.