الاثنين، 21 فبراير 2011

يعني إيه؟


يعني إيه كل الورود الحلوه دبلت في الجناين

يعني إيه كل المعاني الحلوه راحت مبقاش الا الغدر باين

يعني إيه كل القلوب الصادقه سكتت متسمعش الا خاين

يعني ايه تعيش مطاطي و الحس واطي و انت من أشرف المداين

يعني خلاص الكل ثاير

يعني خلاص الهم زايل

يعني خلاص الشمس طالعه و الفجر غائر

يعني خمسه و عشرين يناير


**********

لما لاقينا ناس كتير إتغيرت و بقت غيلان

و ناس في فقر إتمرمطت تتعشى ذل تفطر هوان

و ناس عايشين بياكلوا بعض زي الحيتان

و ناس في سكه إتعثرت

إتقدمت إتأخرت

الكل راضي بإمتنان

و لما لاقينا الظلم طاقه إتفجرت

أزمة ضمير و إستفحلت

و كل نقطة من الفساد صبحت طوفان

و أرض خضرا إتصحرت

و صحرا واسعه إتعمرت

سرقها ندل خسيس جبان

زوقها زي ماتكون خطيئه

ضيع ملامحها البريئه

نساها إيه هيه الحقيقه

خلاها تشحت بالسليقه

شاي يا باشا

يشرب في دمك و كله بشاشه

و إن فكرت في يوم تبان

يقولك هس ده أنا فلان إبن فلان

خلاص يا صاحبي الحق بان

يوم ما كل قلب إتوجع

مسلم مسيحي غني فقير صبيه و جدع

كل  اللي عمره ما اتسمع

 إتجمعوا هنا في الميدان

الحق بان

يعني خلاص الصمت و الخوف معادش حاير

يعني خمسه و عشرين يناير


**********

دمك يا صاحبي كان رخيص مالهوش تمن

دم الشهيد خلاه نفيس خلاك عزيز

خلى ركودك زلزال عنيف فوش المحن

خلى اللي كان بحبها كافر زمان

يفخر يقول يا بلدي يا أعظم وطن

شايف بعيد صبيه سمرا و بضفاير

جايه في عنيها البشاير

يعني خلاص الشمس طالعه و الفجر غائر

يعني خمسة و عشرين يناير





هناك 30 تعليقًا:

هبة فاروق يقول...

الله عليكى يا شيرى يا جميلة لخصتى حدوتة 25 يناير باجمل المعانى والمشاعر واهم الاحداث
لعنة الله على كل حاكم ظالم ومسئول فاسد
تحياتى لاجمل شيرى التى تمتعنا دائما

FAW يقول...

بجد كل ما أقرالك حاجه بيزيد تفاؤلي بالحياة . .
كلماتك جميلة جدا ولخصت الحكاية في معاني رائعه . .
تحياتي .

موناليزا يقول...

عاوزة الايام دى تعدى على خير وترجع مصر لاستقرارها وامنها من جديد وتبقى احسن من الاول كمان

faroukfahmy يقول...

شيرين سامى
ناس فى فقر اتمرمطت تتعشى ذل تفطر هوان ما اعظم هذا التكوين اللغوى انساب فى عبارت ناطقة صادقة ولكن يا شيرين شعاع الفجر يلاحقنا وعطش القلب يزول وهذا وجه الزمن يحول
منظومتك كانت لها طله جاءت فو وقتها وصادفت محلها دمتى لنا شيرى

Tears يقول...

بكره احلى

انا متفائلة

تخاريف مترجــِــمة يقول...

يعني ايه 25 يناير

يعني مصر للاحلى دوما ان شاء اللـه

،،

رااائعه ،، تسلمي يارب يا شيري

مصطفى سيف الدين يقول...

اختي الفاضلة
سنظل نكتب ونكتب حتى ينتهى المداد من اقلامنا ولن نفي حق تلك الثورة العظيمة او ذلك الشعب العظيم
احسنتي وابدعتي كتبتي كل ما نود ان نقول
انها ثورة ضد الفساد والجبن والذل والقهر
تحياتي لكي

Carmen يقول...

يعني احنا بقينا في زمن ربنا سبحانه وتعالي وحده اعلم به وقادر يخرجنا منه
تحياتي لك اجمل شيرين

Mona Hekal يقول...

اقول ايه طيب فعلا لخصتي حال البلد و الثورة في الكلام الهايل ده
تسلم ايدك يا احلي شيري
و علي فكرة احرجتيني بتعليقك :)

BNT ELISLAM يقول...

الله عليكى
حلوه اوى اوى ى اوى


تسلمى عبرتى عن الى جونا والله
تحياتى لكى

حـــلـــم كـــان يقول...

كلماتك واسلوبك جميل
الواحد متفاءل بجد
يارب فرحتنا تكمل على خير

Unknown يقول...

السلام عليكم

جميلة كلماتك أختي شيرين.. وإحساسك واضح فيها قوي..

تقبلي تحياتي..

سندباد يقول...

تحياتي وتقديري لاسلوبك المميز وربنا سبحانه وتعالي يكملها علينا بالخير

esraa يقول...

السلام عليكم
أعزك الله وزاد موهبتك و أسبغ عليكى نعمه
بجد كلماتك مؤثرة و معبرة
تحياتى لك

Ms Venus يقول...

الله يا شيرين

بجد كلمات رائعة ومعبرة جدا


يسلم قلمك حبيبتى

elsha3er يقول...

أسلوب مميز وجميل جدا وعجبنى اوى التعبير دة بالذات

أزمة ضمير و إستفحلت

تحياتى

غير معرف يقول...

بجد مفيش تعليق يعبر عن جمال الكلام اللى انتى كاتباه
بجد كلمات رائعة ومعبرة جدا
تسلم ايدك :)
وربنا يرجع لمصر الامن والاستقرار ويبقى الوضع افضل مماكان بمراحل ان شاء الله

الحسينى يقول...

دمك يا صاحبي كان رخيص مالهوش تمن


دم الشهيد خلاه نفيس خلاك عزيز

شيرين أنتى قلتى كل حاجه
الأحساس اللى فى كلامك حلو أوى وإن شاء الله مصر أحلى واللى جاى أحلى
وعلى فكرة أنا كمان متفائل :)
دمتى ودام أحساسك العالى

شهر زاد يقول...

فراشة التدوين
الثورة حياة
الثورة ايقظت فيك احلى الاشعار
فعبرت باصدق الكلمات
ولخصت الحكاية من البداية للنهاية
وكتبت بقلمك كل مايخبيه قلب انسان
تحياتي

سواح في ملك اللــــــــــــــــــه- يقول...

من اجمل ماقرات لاختي
شيرين حطيتي احساسك كلة فيها
الله الله عليكي بجد
تحيتي

;كارولين فاروق يقول...

كل معني كنت تقصديه
شعرت بها ..حقيقي ابدعت
يا شيرين كلمات معبره وقويه
تحياتي

ابراهيم رزق يقول...

فعلا بوست جميل
الذى حصل فى ميدان التحرير حلم يعجز اساتذة الشعر و البلاغة ان يوصفوه لكنك وصلتى لدرجة عالية ببساطة و دون فذلكة

تحياتى

♥نبع الغرام♥♪≈ يقول...

الله عليكى بجد حبيبتى

ماشاء الله اتكلمتى وعبرتى بطريقه اكتر من روووعه

دمتى ودام احساسك وقلمك

Casper يقول...

كلمات في غاية الروعة
مهما سطرنا في مديحها فلن نوفيها حقها

خالص تحياتي

Casper

وردة الجنة يقول...

بجد ماشاء الله عليكى

كلامك متميز ومميز جداااااااااا
مبروووووووك للمصريين كلهم ويارب الايام اللى جايا تكون احسن واحسن

لك كل المودة ........

غير معرف يقول...

مستوى عالي
و ده المنتظر من موهبه زييك يا شيرين

يعني ايه تعيش مطاطي و الحس واطي و انت من أشرف المداين

يا ريت لو شيلتي الألف و اللام من "المداين"

باحث عن حب يقول...

شرين
مبدعه
طول عمرك
والله
جميله جدا
كلمتك

Ahmad يقول...

يا سلام يا استاذه شيرين..
حدوته بلغه عامية جميلة

ده الملخص والمفيد فعلا.

بجد مدونة حضرتك وحشتني..
ليها عندي طابع مختلف
..

تحياتي وتقديري

reemaas يقول...

اجمل من جميله يا شيرى روعه بجد

Wish I were a Butterfly ... يقول...

كل مرة بدخل عندك بكتشف فيكي جزء جديد :)). بس برده جمـيل زي كل اللي قبله

أسلوبك جميل أوي و لخص كـتير من الحدوتة. صحيح ناس كتير فاهمة الحرية غلط و مش عارفة المفروض إيه اللي يتعمل بس أنا متفائلة كتير. إن شاء الله بكرة هيبقى أحلى

أطيب تحياتي لرقيك و بساطتك