الخميس، 27 يناير، 2011

رجاله

شكراً يا تيرز على ثقتك بالناس و الشعب المصري الي مش هيفضل حاطط راسه في الطين

 شكراً يا دكتوره ستيته على تفتيح عنينا و مخنا و تعليقاتك المنطقيه الصريحه على أي حدث

شكراً لكل المدونين اللي أعرفهم و معرفهمش و شباب الفيس و التويتر اللي مسكتوش و فضلوا سنين بيقولوا لأ و بيعدوا نفسهم و غيرهم للحظه دي

شكراً لكل الناس العواجيز اللي نزلوا, الستات اللي بيدعوا, الشباب اللي شالوا أرواحهم على كفوفهم, البنات اللي مخافوش و صرخوا, شكراً لأن من غيركم مصر مش حره, شكراً لأنكم صحيتوا الغضب اللي جوانا و خرجتم المارد من حبسه, شكراً لكل مصري انه أثبت للعالم كله انه لسه بيفكر و يقرر و يقدر يطالب بحقه بكل تحضر.
خلاص مبقاش فيه تحرش و لا سرقه و لا بلطجه فيه ناس بتتكاتف في الأزمات ( عندما تحل الكوارث تتقارب القلوب و تزول العداوات وتصفى النفوس تجاه بعض) زي ما قال الأستاذ ماجد القاضي, المصريين ظهر أصلهم و بان معدنهم الحقيقي سمعت ان المواطن المصري عامل زي ثمرة البطاطا كل ما تتحرق أكتر يبقى طعمها و ريحتها أجمل....ربنا معانا و ينصرنا جميعاً.

يا مصر رجالتك رجاله

و بناتك رجاله

و عيالك رجاله
...

أصل الرجوله الصح مش بلطجه و قواله

الرجوله موقف قلب ميت و بساله

و انت شعبك طيب صحيح

لكن وقت الجد يقول للظلم و الخوف استحاله

شعبك اختار الثوره على الظلم... حاله

شعبك عظيم بيرفض الذل و المهانه

في صمتهم رجاله

في صبرهم رجاله

في حبهم ليكي رجاله

في وقفتهم و لمتهم في كل أزمه رجاله

يا بلدي قلبي بينزف بيبكي و يدعي باستماته

ربنا يحميكي و يحمي ولادك الرجاله

هناك 15 تعليقًا:

سندباد يقول...

تسلم ايدك وانشالله هانفضل كده لاننا خلاص فوقنا ومش هانياس
تحياتي الخالصة

الــحــــنـــــــــــــــــــين يقول...

شكرا لكل شاب راجل ولكل بنت جدعه وقفت فى وش الظلم وقالت لا بعلو الصوت وشكرا ليكى

Tears يقول...

حبيبتى يا ريت لو اى حد يقدر يساهم فى نشر الاخبار و الفيديو لانى مش لاحقة غير انى احطها على المدونة بس

عايزين ننشرها على اوسع نطاق فى بلوجات و فيس بوك و كل مكان لمكافحة الحجب و محاولة العزل و التعتيم الاعلامى لما يحدث ...خاصة نشر فيديو الضابط الذى انضم للمتظاهرين لان ده شجع اخرين و هناك جنود ايضا كسروا حاجز الخوف لان النظام الان اصيب بالجنون و يستخدم مصريين اخرين فى الشرطة لمحاربة الشعب المصرى الاعزل بالرصاص الحى فى عدة محافظات من أجل بقاء فرد فى الخامسة و التمانين يريد ان يستمر فى الحكم مدة اخرى و يورثنا لابنه يكمل هو و عصابته سرقه و نهب فى حقنا و حق الاجيال الجاية و للاسف اكتر من مصدر مهم أكد استعانتة بخبراء أمن اسرائليين وصولوا مصر ليساعدوه فى قمعنا كما يفعلوا فى فلسطين المحتلة...نظام مبارك خاين

ربنا مع شعب مصر

carmen يقول...

ربنا يوفقهم يارب قلوبنا ودعواتنا معاهم ربنا يعمل اللي فيه الخير
تحياتي لك

الشاب الصح يقول...

ان شاء الله بكره الماتش النهائى مع الحكومه وان شاء الله نكسب يا احنا يا هما فى البلد دى موعدنا غدا جمعه الغضب

افروديت يقول...

ربناينصرنا
تحياتي لك

مصطفى سيف يقول...

وانا كمان باشاركك الشكر لكل من ساهم وقرر انه مش هيسكت رغم القيود ورغم العنف اللي قابلوه ورغم كل الحواجز فضلوا صابرين وصامدين علشان يقولوا للناس فوقوا جه اليوم اللي يجنوا فيه ثمرة تعبهم
ان شاء الله نكمل المشوار لحد ما تحصل الحرية
وينتهي النظام

تحياتي وشكري وتقديري ليكي دكتورة شيرين

ماجد القاضي يقول...

لمن لا يفتح لديه الفيسبوك

تحديث مستمر للأخبار الواردة من رصد كل بضع دقائق

http://magidalkady.blogspot.com/2011/01/r-n-n.html

eng_semsem يقول...

ده بداية الطريق وانا متهيالي ان في كتير لم يشاركوا في يوم 25 وحاسين بالذل والمهانه لانهم ماكنوش مع الرجاله والجمعه هتكون فيها الغضب اللي بيحمله كل المصريين في قلوبهم
تقبلي تحياتي

مملكة الظلام يقول...

يا مصر رجالتك رجاله

و بناتك رجاله

و عيالك رجاله
الله معكم يا رب
يرحم شهدائكم ويشفي جرحاكم
ربنا معاكم

model يقول...

تاثرت جدا برجالتنا رجالة
و بناتنا رجالة
و عيالنا رجالة
فعلا رجالة
يا رب انصرنا
بوست جميل

موديل

ماجد القاضي يقول...

السلام عليكم

أرجو أختي الكريمة عندما يعمل الإنترنت أن تطمئنيني عليك وعلى الأهل.

تخاريف مترجــِــمة يقول...

السلام عليكم

وحشتينا يا شيرين خالص والله

طمنينا عليكي وعلى الحالة عندكم الان

ان شاء الله هنشكر مصر كلها لما اللي فالشارع الان يطلعوا البيت

ونبطل ضرب وموت ودمار


تعالوا نرجع لمبدأنا وأسسنا من تاني

ربنا يكرم مصر والمصريين

توتو يقول...

ربنا يكرمك

وينصرنا يارب وينصر شعبنا العظيم ده

الحــب الجميـــل يقول...

مصر تحتاج للدعاء

أرجوكم ادعوا لها

اللهم لك الحمد كله كما ينبغي لجلال وجهك وعظيم سلطانك

اللهم صل على محمد وعلى آل محمد كما صليت على إبراهيم وعلى آل إبراهيم وبارك على محمد وعلى آل محمد كما باركت على إبراهيم وعلى آل إبراهيم

اللهم الطف بأهل مصر

اللهم احفظهم بحفظك واكلأهم برعايتك و احفظ بلادنا يا رب العالمين

اللهم انصر المصريين في أرض الكنانة وحكم فيهم شرعك واكفهم شر كل طاغية جبار

ربِ انصر إخواننا وأهلنا في مصر و لا تنصر عليهم، ربِ ثبت أقدامهم وارحمهم

ربِ رد كيد كل من أراد بهم السوء يا عزيز يا جبار
اللهم احفظ مصر واهلها وكل ما فيها

يا الله يا رحيم يا حي يا قيوم برحمتك استغيث

اللهم انت ثقتي في كل كربة ورجائي في كل شدة وانت لي في كل امر
اللهم يا قادراً على كل شيء .. اغفر لنا كل شيء وارحمنا برحمتك الواسعة التي رحمت بها كل شيء وإذا وقفنا بين يديك لا تسألنا عن أي شيء فإنك أهل التقوى وأهل المغفرة .
اللهم عجل الفرج وأرح العباد والبلاد ممن خربوها وأذلوا أهلها
اللهم كن لأهلنا في مصر ناصراً ومعيناً
اللهم ارزقهم الأمن والأمان والسلامة والإيمان
اللهم اعصم دماء المسلمين و أعراضهم و أموالهم
اللهم أمين
يارب العالمين
استغفر الله العظيم الذي لا إله إلا هو الحي القيوم وأتوب إليه.
نسألكم الدعاء