ببساطه

ببساطه في موضوع صغير بيستفزني شويه هو موضوع الجمال و مفهومه عند الناس يعني كل الناس بتقول ان الجمال جمال الروح و الكلام التقليدي اللي كلنا عارفينه لكن في قرارتهم في منطقة اللاوعي الجمال ليه مقاييس تانيه خالص يعني مثلاً الرجاله الجمال بالنسبه لهم شكل و مظهر بالمقام الأول الستات الكبار الجمال بالنسبه لهم أدب و سمعان كلام و مفيش مانع من بياض و شوية تختخه أما البنات فامفيش واحده شايفنها جميله لازم تكون جميله بس عايزه تخس, جميله بس دمها تقيل أو مش ستايل يعني و الى آخره.

أعرف واحده جميله كانت ماشيه مع صاحبتها الأقل منها جمالاً و عدى من جنبهم ولدين طبعاً هي تصورت انهم هيعاكسوها لاقيتهم بيعاكسوا صاحبتها و هي و لا أكنها هنا عرفت بعد كده ان جيبة صاحبتها القصيره هي اللي خلتها في نظرهم أحلى, و في بنت مش في منتهى الجمال و بنلاقى واحد بيحبها و دايب دوب كمان, وحتى احنا ممكن نشوف أخوتنا أو أصحابنا أجمل من صورتهم الحقيقيه بكتير عشان كده أنا بشوف ان الجمال عامل زي السحر و في عفاريت (زي مسرحية حلم منتصف الصيف لشكسبير) بتضع سحر الجمال في عيون الناس عشان يشوفوا اللي بيحبوهم أجمل بكتير من الحقيقه.

نيجي بقى للجزء المستفز الجمال اللي الناس بتفتكره في الزياده زيادة المكياج زيادة العطور زيادة العري آه و الله زيادة العري , كل طبقات الشعب العُليه المستعليه و الوسطى المضمحله حتى الشعبيه المتشعبه كلهم بيؤمنوا بمبدأ كل ما كشفت أكتر و ضيقت على الآخر هتبقى مالآخر و اكبر دليل على كلامي الأفراح لما بتروح فرح تلاقي البنات (مش كلهم طبعاً) بيتفننوا في زيادة كل شئ و تلاقي عنيك زغللت من الألوان و فساتين مش مناسبه على أجسام مش مناسبه و الرقص طبعاً مش مجامله للعروسه زي ما بيدعي البعض قد ما هو أحد أساليب اظهار الجمال و مفيش فرق في كلامي بين محجبه أو غير لأن للأسف كله بيتبع موضة علمني العوم والنبي يا أحمد و ربنا يخليلنا بوديهات كارينا.

كتير بشوف بنات بسطاء بيتعاملوا مع العري على انه رُقي و تحضر و في أي مكان الناس بتفتكر الست اللي صبغه شعرها أصفر منجاوي و حطى في وشها أربع ألوان على الأقل هانم حتى في المهرجانات و الحفلات الفنانات الفاضلات كلهم بيتسموا بالمبالغه في لبسهم و ماكياجهم ألوان صارخه و عري غيرلائق.

من يومين شوفت خطوبة الأمير ويليام ابن الأميره ديانا و ملك انجلترا المنتظر و بهرتني خطيبته في رقة مظهرها ملكة انجلترا القادمه في فستان قمه في البساطه و الذوق و مظهر ناعم هادئ يخطف القلوب لا في عُري بقى و لا بتنوّر في الضلمه و لا حاجه, تصورت لو كان المشهد ده عربي كان هيبقى في كم هائل من المبالغه في كل شئ, نفسي الناس تغير فكرتها عن الجمال شويه عن اقتناع مش شعارات و خلاص لأن في الأول و الآخر الشئ الزائد عن حده حتى لو جذبك لدقائق فهو بيعمل شعور بالنفور لكن البساطه بتحمل في طياتها أسمى معاني الجمال و ده مجرد رأي.