الأحد، 7 نوفمبر، 2010

مشاركه لأحسن ناس


سالخير عليكم .....
اولاً ومن هذا المنبر الجديد احب ان امرر خالص شكرى واعتزازى وتقديرى و .......
.... ايه الدخله دى .........
لا لا لا ...... انسوا الكلام اللى فوق فى اولاً ده ....... احنا مش كده خالص .....


احنا هنا اصحاب وزملاء ..... احنا هنا قرايب وعزوه .............
يعنى لا فيه رسميات ولا هو موقع عام بيتكلم بشكل رسمى او بصوره مرسومه مسبقاً وهيكل واطار وبرواز وتشكيل وتبــــ ....... برده الكلام كبر منى تانى .........


لا بقى بصوا ...... انا هقول تانى بس بالشكل بتاعنا اللى كلنا هنتفق عليه الا وهو ......
اننا هنا مش عاملين موقع رسمى او مؤسسه وده واجهتها ....... لا خاااالص ...... ابسلوتلى ........


يا اخوانا هنا زى ما قلنا بيت المدونين ...... يعنى كل الناس اللى هنا اعضاء فيه ..... بدون طلب اشتراك او التحاق ........


ده بيت معمول عن طريق مجموعه من وسطنا ..... بهدف نتلم ونتقابل فيه ....... حاجه كده زيها زى التجمعات التدوينيه ..... لا بيبقى فيها ريس ولا بيبقى فيه برنامج مفروض ........

بمعنى أصح وأقرب للفهم ...... هنا بمثابة تجمع تدوينى ، بس بدل ماهو بشحمنا ولحمنا ....... هيبقى بقلمنا وكيبوردنا .......


لان مش كل الناس بتعرف تحضر التجمعات ..... مش كل الناس بسهوله تقدر تتواجد فى كل الأماكن .......
لكن هنا كله يقدر يتواجد فى نفس الوقت من اى مكان او زمان ......... من اسكندريه لاسوان ...... صحره كان او بستان ..... حلوه الـ (وان دى ) ....
حتى ولو عايش برا مصر هيقدر يتواصل ........ هنقدر نتكلم وندردش ....... هنقدر نتبادل الحوار والنقاش .......
هنقدر نقترح على بعض افكار كتير ومواضيع اكتر واكتر ..............


احنا هنا بنعتقد ان المدونين فى مصر بدأوا يبقوا فى الصوره ..... بدأو يبقوا كيان مؤثر فى المجتمع والاعلام ......


لقد قال نابليون بونابرت يوماً :
"لا أخشى ألف مدفع وألف جندي بقدر ما أخشى لسان صحفي أو مقال جريدة. ... "


فالصحافه هى الطابور او السلطه الرابعه ..... وهى المؤثر والمحرك للمجتمع ........
علشان كده قلنا نحاول نتجمع.....
نعمل مكان نتلم فيه ومن بعض نسمع ........
اكيد هتفرق كتير معانا ...... اكيد هتفرق مع المجتمع .......

تخيلوا لو مثلاً ...... المكان ده فعلاً بقى بيلتقى فيه اكبر عدد مننا ..... وبقينا نتفق على حاجات مع بعض من خلاله .....
وبقى كل الناس عارفاه ... القاسى منهم والبادى ..... ومثلاً مثلاً .......
جينا على تجمع زى بتاع التبرع بالدم اللى خالد همس الاحباب بيدعى ليه ده ........ وجينا معلنين هنا وقولنا "يا جماعه عايزين الايام الجايه دى كلها كل المدونين يعلنوا عندهم على التجمع حتى اللى مش هيجوا يعلنوا ..... لان التجمع مش مقتصر على المدونين بس ............... "
وفعلا الناس كلها عجبتها الفكره واعلنت ............... متخيلين رد الفعل ؟!!!!

متخيلين الفكره دى (التجمع ) ممكن تعجب ناس تانيه اد ايه وممكن يعملوها فى محافظاتهم ازاى ؟! وعلى ذلك قيسوا امثله كتيره ......
متخيلين مدى تأثيرنا هيبقى عامل ازاى فى المجتمع ؟!!

ده من جهه ...... وفيه جهات تانيه او افكار تانيه كتيره هى هدفنا هنا برده ..............

زى ايه ؟!!
زى اخبارنا اللى احنا بننشرها كل يوم دى ..... فلان اتجوز، فلانه اتجوزت ...... فلان عيد ميلاده امتى ...... فلانه غسلت المواعين ولا لسه ؟!
فلان اتخنق من مراته ...... فلانه قتلت جوزها ..............
طبعا كده بقى الموضوع جرسه وشرده ........... لا مش كده .....
لان بكل بساطه ...... احنا هنا مش هنذيع او ننشر اى خبر الا من خلال صاحبه ..............
صاحبه فقط هو اللى هيقولنا عليه وننشرهوله ...... مش هننشر شئ الا ما صاحبه هو اللى يقول او يوافق مسبقاً ..... لان بكل بساطه .....
الخبر هيتنشر وصاحبه هو اللى بنفسه هيجى يعلق عليه ويرد على تعليقات الناس ............
بمعنى اصح هيبقى فيه تواصل اكتر ومشاركه اكبر ........ هيبقى فيه ود وترابط وتراحم ......
لان الموضوع مش هيبقى عباره عن "موقع بينشر اخبار" (موقع اخبارى) لا .............. احنا هدفنا هنا اجتماعى ......
برده زى خبر مدونه جديده اتفتحت ، ممكن نعلن عنها ، لمزيد من الانتشار ومساعده للمدونين الجدد انهم يجوا وينتشروا وسطينا بدون مجهود كبير ووقت طويل ....
زى برده اننا نحط لنكات كل المدونين المتواجدين معانا ومش متواجدين .... بنحاول نضيف كل اللى نعرفه .... (طالما ان محتوى مدونته فى اطار مقبول ... طبعاً) ...



فيه افكار تانيه برده كتيره عندنا وعندكم ممكن تقولولنا عليها ونناقشها .......

يعنى على سبيل المثال ....... عندنا فكره جديده هقترحها عليكم دلوقتى ...... ونتناقش فى كيفيه تنفيذها ..... زى ما اتناقشنا فى الشعار بتاع بيتنا هنا واختارناه فعلا على حسب اقتراح الاغلبيه وقد كان والحمد لله ............



وان كان انا نفسى بعترف ان الشعار فيه حته كده عايزه تتغطى ......................... (بس ان شاء الله هنغطيها ونلبسها نقاب كمان ان شاء الله ....... ههههه ) . بس يا جماعه والله ما حد فينا يعرفها الست دى ..... دا احنا لقيناها كده فى وسط الجماعه اللى واقفين واتكسفنا نمشيها ..............


المهم
نرجع لموضوعنا وفكرتنا ................ الا وهى :

هنستضيف كل فتره معينه (ثابته او متغيره.... للنقاش برده ) ، مدون من المدونين ......
حاجه كده هتبقى زى التاج .... بس المره دى فيها ميزتين ...... الاولى انه هيبقى معمول له هو بعينه .... والتانيه هيبقى فيه تفاعليه اكتر ..... ليه ؟! ..... لان .....

لان ايه ؟!

لان احنا هنتفق مع المدون ده الاول زنبلغه انه مرشح للبوست اللى جاى علشان يتعمل معاه حوار ..... ولو وافق ....
هننزل خبر فى بوست نقول:
"ان المدون اللى هيتعمل معاه الحوار القادم يا اخوانا هو ..... فلان ......
وبالتالى الناس فى صفحة التعليقات تبدأ تكتب الاسئله اللى عايزين يسألوهاله ........ (طبعاً فى المعقول يعنى ..... ) ، واللى هيبعتوا الاسئله ممكن يبعتوا بالاسم بتاعهم او لو محرجين ممكن يبعتوا باسم غير معروف .............
من ضمن الاقتراحات برده ...... ان التعليقات فى البوست بتاع الاسئله ده بعينه (الاسئله المقترحه) هتبقى معمول لها اشراف ، بحيث ما احناش ضمنين الظروف برده ......
واحد زى على علوكه او اشرف كوخه ممكن يدخلوا بغير معروف ويسألوا اسأله كخه .... ونبقى اتسببنا فى احراج للراجل او الراجله اياً كان .......



عموماً الموضوع بين اديكم ....... الفكره كلها اتعرضت ...... (اقصد فكرة البيت نفسه ) .... والفكره بتاعت الحوار برده اتعرضت ...... مستننين ارائكم ومقترحاتكم ......


صحيح برده احنا عايزين نسمى الفكره الاخيره دى اسم .... زى موضوع التاج كده ما اصطلح عليه انه اسمه تاج ......
يعنى عايزين نسمى البوست ده اسم ثابت مثال :

" فى بيتنا مدون " .....
"على القهوه " .....
"انا مين " ...........
" اقفش مدون " ......
" مدون فى ورطة " ........
كده يعنى .............
وعلى فكره الاسماء دى مش للاختيار ، دى للمثال .... يعنى عايزين اسماء تانيه .....
............
...............


بس...........


انتوا لسه قاعدين ............ الموضوع عجبكم ولا إيه .... انا عايز أروح ....




سلاااام
ويكا


ياريت كلنا نشترك و نعرف نشارك أفكارنا و أعمالنا و اختلافنا يبقى في حاجه تجمعه
شيرين


هناك 11 تعليقًا:

FAW يقول...

done already

سندباد يقول...

سمعا وطاعة

خالد أبجيك يقول...

فكرة طيبة، وستوطد العلاقة بين المدونين

كنت هنا..

زهرة يقول...

شيرين

معلش يا حبيبتى بجد متأسفة جداً .. لحد ما النت عندى فاق من غيبوبتة المعتادة .. كنت إتاخرت فى الرد عليكى وكنتى نشرتى الموضوع فعلاً ..

بعتزر لك مرة تانية يا حبيبتى :(

sony2000 يقول...

الله فكره حلوا
واهو كلو يورط كلو:)))))))

الحسينى يقول...

الفكرة ممتازة وتجميع المدونين من خلال مكان واحد هيسهل على ناس كتير عملية البحث عن المدونات المميزه تحت تصنيف معين زى أدبية أو سياسية أو غيره كمان فكرة حوار مع مدون حلوه قوى وزى ما بيقولوا هنا "يعطيكى العافيه" :)

حاجات جوايا يقول...

فكرة جميلة يا شيرى
عجبنى اسم مدون فى ورطة
واقفش مدون
ههههه
بالتوفيق يا جميل

karmen يقول...

انت تأمر ياقمر ^_*

شيرين سامي يقول...

شكرا يا جماعه على مشاركتكم الجميله

مصطفى بشكرك على رحابة صدرك و بتمنى لك التوفيق

سندباد شكرا يا أول قارئ و مشجع لي

خالد أبجيك سعيده ان الفكره عجبتك و نورتني

زهره مفيش اعتذار و لا حاجه كان عندي مشكله في الاعدادات و اتحلت شيلاكي لعوزه

sony2000 ميرسي يا جميل

الحسينى يعافينا و يعافيك شكرا لاعجابك بالفكره

حاجات جوايا بشكرك لزيارتك بس على فكره دي فكرة و كتابة فريق بيت المدونين أنا ساهمت في نشرها بس لاعجابي بيها

كارمن الأمر أمرك يا جميل

Dr/ walaa salah يقول...

فكره جميله اوي يا شيرين


انا موافقه عليها جدا

وممكن كمان نسميها مدون على كرسي الإعتراف

متابعه معاكم

reemaas يقول...

عجبتنى الفكيره كتير