الثلاثاء، 12 أكتوبر، 2010

إبتسامة الصور




حياتي معاك زي الابتسامه في الصور


الناس تشوفها تقول الله زي القمر


لا حد شاف دموع و آه و جرح مُر


و لا حد يعرف قد إيه قلبك حجر


و الكل فاكرينك ملاك و إني أسعد البشر


لا حد فكر إنك هلاك و إني فهواك دوايا صبر


إضحك و هزّر و إبتسم ...زي الصور


خبي القساوه و إترسم...زي الصور


و متنساش تحضن بإيدك كتفي


و وشك جنب وشي...لزوم الصور


ماهو حضنك الدافي كله شوك ألم و شر


و الإبتسامه الحلوه دي وراها غدر






























































هناك 12 تعليقًا:

شمس العصارى يقول...

ما اجمل الحب بدون تكلف ولا اصطناع
لي المهم الناس
بل المهم المحبين انفسهم
صور بكادرات مختلف تغطى كل تصرفات التكلف
جميل رؤيتك للصور من الناحية الاخرى

سندباد يقول...

جميلة اوي الفكرة وجديدة برافو عليكي
الحب الحقيقي لا يهمه تواجد الناس او ماذا يقول الناس
الحب الحقيقي ان تعطي بدون حساب ولا تتنتظر ماذا ستاخذ
احييكي علي كلماتك الجميلة
دمتي مبدعة
تحياتي الخالصة

شيرين سامي يقول...

@شمس العصاري:شكرا على قراءتك و تعليقك و فعلا انا بشوف ناس كتير حياتها كلها كأنها بتتصور كل شئ صناعي و مزيف و الوجه الآخر الحبيب أو الحبيبه بس اللي يعرفوه

@سندباد: شكرا على كلماتك الرقيقه و طبعا كلامك مظبوط...الابتسامه مش شرط تكون معناها سعاده أوقات كتير بتبقى مزيفه أوساخره

H@mdy يقول...

بصي انا هاخد اخر بيت اللي هو ده

"و الإبتسامه الحلوه دي وراها غدر"

دي بقي اكتر حاجة جابتلي اكتئاب لاني بكره البتاع ده اللي هو الغدر ربنا يبعده عنا..


تحياتي

شخابيط يقول...

احساسها حلو اوى يا شيرين :)
"
حياتي معاك زي الابتسامه في الصور
الناس تشوفها تقول الله زي القمر
لا حد شاف دموع و آه و جرح مُر
و لا حد يعرف قد إيه قلبك حجر
"

eng_semsem يقول...

صدقيني انا لوحسيت في يوم ان حبيبتي شايله مني للدرجه ده اكيد هتكلم معاها وهحاول احل والفراق احيانا بيكون حل كويس ليكي وليه انما عشان تعيشي وتضحكي بس في الصور وقدام الناس انت قبل ما بتتحكي على الناس انت بتضحكي على نفسك واكيد هتلاقي اللي يستاهل حبك

شيرين سامي يقول...

h@amdy عندك حق الغدر بيبقى مؤلم جدا ممكن كمان يكون من صديق أو زميل...ربنا يكفينا شره و تحياتي ليك

شيرين سامي يقول...

شخابيط ميرسي بجد على تعليقك الجميل:)

شيرين سامي يقول...

eng semsem نورت مدونتي و كلامك صح طبعا لكن أنا كنت عايزه أقول ان أي حاجه بكتبها ملهاش علاقه بحياتي الشخصبه هي بتبق حاله بعيشها و أسيب قلمي يعبر براحته بقى...سعيده بزيارتك

وداد يقول...

تصوير جميل جدا لكل اتنين بيعشوا حياة مزيفة

حياة يخلو منها الحب والصدق

سعدت جدا انك مش بتوصفي نفسك

وربنا يسعدك دائما

وتشرفت بقراءة كلماتك

هبة فاروق يقول...

اية الفكرة الجامدة دى بجد عجبتنى اوى هما كدة الرجالة كل واحد همة فى الدنيا شكلة ووضعة قدام
الناس ويحب يظهر فى احسن صورةو انة مثالى لكن اول شى ء بينسى يفكر فية الطرف الاخر ونظرتة لية ودة الاهم طبعا ياريت الاقنعة دى تسقط ونبقى على طبيعتنا
وارجو ان تشرفينى فى مدونتى الصغيرة ومش حتندمى
الرابط http://wwwmcdialogueorgurllisttxt.blogspot.com/

هبة فاروق يقول...

حاولت الاشتراك لكن تقريبا فى مشكلة