زي إنهارده لبست أجمل فستان في حياتي, شلال من النعومه بنور النهار و بريق الكريستال..ده كان فستاني اللي كان تصميمه مختلف عن أي تصميم تصورته أو رسمته قبل كده, بس إكتشفت إن الفستان بيبقى طبقات من الحب و الفرحة مش الأقمشه.
زي إنهارده أول ما شوفتني بوست إيدي و إنت بتديني الورد و ماخدتش بالك إن بابايا كان واقف, و قالك بضيق أنا بس اللي لاحظته "كنت خليها بعد كتب الكتاب"
زي إنهارده إتزفينا و إحنا مبنحبش الزفه بس كنا كل ما نبص في عنين بعض و نفتكر إننا بعد شويه هنبقى كيان واحد مش ممكن يفرقه غير اللي جمعه, بنبتسم و منفكرش في الكاميرات و الناس.
زي إنهارده أصحابي كانوا واقفين حواليه و أنا بمضي العقد و قالولي (مش هتكتبي شروط؟) قلتلهم شرطي الوحيد إنه ميجرحنيش في يوم من الأيام...شرط ميتكتبش يتحس بس.
زي إنهارده قلت لبابايا بصوت مشتاق و فرحان "زوجني موكلتك " وقالك و هو مبتسم و عنيه فيها دمعه بتعبير عمري ما هنساه وصوت رصين جميل " و أنا قبلت"
زي إنهارده كان أسعد و أجمل يوم في حياتي, و يمكن فاكره كل تفاصيله عشان بتفرج علي الفيديو كتير, بشوفه لما بنبقى زعلانين و أفضل أعيط, و بشوفه لما بنبقى بعاد و أفضل أفتكر, و بشوفه لما بتبقى قاسي عشان مزعلش منك, و بشوفه لما أحس إن الحياه بقت مادية أوي عشان أتشحن بوقود من المشاعر.
فاضل سنتين عشان تغنيلي الأغنية اللي بحبها من أول مره سمعتها و إستنتها... "أشهد ألا إمرأة أتقنت اللعبة إلا أنت...و إحتملت حماقة عشرة أعوام كما إحتملتي" زي ما غنيتلي زمان "قولي أحبك" و بعدها " زيديني عشقاً" و "يدُكِ" , صحيح إني عرفت بعد كده إنك كنت بتضحك على عقلي عشان عارف إني بحب الأغاني و الأشعار لكن إنت مالكش أساساً في القصائد و لا في الأدب عموماً, و مش هتقرى كلامي إنهارده غير بعد ما أعملك إيدي مسدس و أحطه على راسك و أجبرك إنك تقرى...بس أنا موافقه تضحك على عقلي :)
كل سنة و إنت سكني و أنا سكنك





