الثلاثاء، 22 يناير، 2013

مينيو الحفلات :)

“في يوم صحيت شاعر براحة و صفا..الهم زال و الحزن راح و اختفي..خدني العجب و سألت روحي سؤال..أنا مُت ؟ و لا وصلت للفلسفة..عجبي”

معرض الكتاب يناير 2012

بمناسبة معرض الكتاب عملالكم عزومة كده على قدي و ده المينيو بتاعها :)


الـ appetizer أو فاتح الشهية
حفلة توقيع كتاب "حكايات" هو كتاب جماعي لحوالي 40 كاتب منهم زملائي و زميلاتي الأعزاء, زينة زيدان, هبه فاروق, رؤى عليوه, حورية محمد, نهى الماجد, مصطفى فوزي, شروق إلهامي, محمد الناغي, وأحمد عبد العزيز.
أنا مشاركة في الكتاب بخاطره إسمها "ستبقى" كانت منشوره على المدونه و حذفتها في حركة الحذف الأخيره :)
الحفلة هتكون يوم الخميس 24 يناير في جناح دار الحلم الساعة 12 الضهر
و ده الإيفنت بتاعها على الفيس بوك
هنــا
هنتظركم

الـ main dish أو الطبق الرئيسي
حفلة توقيع كتاب "صندوق ورق" و هو كتاب جماعي لأكتر من 50 كاتب إتكلمت عنه قبل كده هنا و فيه مجموعه بديعه من المدونين
أنا مشاركة فيه بقصة "نُطفتُـهُ" اللي بعتز بيها جداً
الحفلة هتكون يوم الحد 3 فبراير الساعة 3 العصر في خيمة 2 جناح دار ليلى(كيان كورب)
و ده الإيفنت بتاعها على الفيس بوك
هنــا
هنتظركم



و أخيراً الـ dessert أو الحلو

شوكولاتة بالفانيليا :)

حفلة توقيع هتجمعني للمره التانيه مع صديقي الرائع و الكاتب المميز جداً صاحب مدونة "طير الرماد", إبن الصعيد, اللي بيبهرنا بكتاباته و بيأسرني بإهتمامه و جدعنته..صديق حقيقي..
زميل الصيدلة و التدوين و المعطف و الأبجدية و النشر و أخيراً الصندوق...طبعاً يعني

مصطفى سيف الدين

الحفلة هتكون لتوقيع كتابه "ضوء أسود" و كتابي "بنكهة مصر" و كتابنا "صندوق ورق" و طبعاً كُتّاب الصندوق مدعوين لتوقيع الكتاب معانا, هتكون شامله مناقشه مفتوحه و نقد بحضور ناقده أدبية معروفه و هيدير الحوار المدوّن و الكاتب الرائع محمد فاروق الشاذلي
الحفلة هتكون في راديو أرابيسك في وسط البلد, شارع قصر النيل(2 ممر بهلر) يوم الخميس 7 فبراير الساعة 6 مساءً بإذن الله
و لأن الغرض بالأساس رؤيتكم و التواصل معكم 
هننتظركم
و اللي مش هيجي مش هنزعل منه...

هنكرهه بس :)
الإيفنت هنــا




و بالهنا و الشفا :)

“في ناس بنشوفها بالالوان وناس جواها مش بيبان
وناس اسود وناس ابيض وناس محتاجه بس امان
واكتر ناس تآمنهم ما بيجي الجرح غير منهم
وناس انت بعيد عنهم بتنسي معاهم الاحزان..و عجبي”
جاهين

هناك 15 تعليقًا:

shreif elsaftty يقول...

رائع جدا يادكتوره دائما من نجاح لنجاح كان نفسي اكون حاضر في مناسبه زي دي بس انتى عارفه انا بر مصر بالتوفيق ويارب دائما كده من ابداع لاابداع

Aya Mohamed يقول...

كان نفسى اكون موجودة جدااا بس انتوا عارفين ظروفى بقى
ان شاء الله تكون حفلات قوية جدا
ومن نجاح لنجاح يارب
ومش تنسوا تتصوروا مع كتابى
فى ارابيسك
وفى المعرض وفى كل مكان
اعتبروه مكانى بالظبط ^_^

FAW يقول...

مبروك جدا

وحلو المينيو :)

إن شاء الله ألحق حفلة أرابيسك

Bent Men ElZman Da !! يقول...

كويس انى عرفت بحفلة حكايات
لانى كنت ناوية اروح يومها إن شاء الله
بس انا زعلانة عشان نسيتى حفلة كتابى اللى هتكون بعد صندوق ورق واللى لو مش هتكونى فيها هيبقى فى كتييييير ناقصنى :)
مبسوطة اووووووووى بحفلتك انتى ومصطفى فى ارابيسك إن شاء الله اكون موجودة واخد منك توقيع تانى ^_^
ربنا يوفقك دايماً يا شيرين :)

مصطفى سيف الدين يقول...

ايوة زي ما قلتي كده يا شيرين هنكرهه :)
و شوفوا بقى زعل الصعايدة وحش اد ايه؟
الشرف ليا يا زميلة اني اشاركك الحفل
و الف مبروك لينا و ان شاء الله تكون كل الحفلات موفقة
كان نفسي احضر كل الحفلات دي بس انتي عارفة بقى الصعايدة مالهمش نصيب

موناليزا يقول...

أهو كله كوم وحفلة الشوكلاتة بالفانيليا دى كوم تانى خاالص
بجد كان نفسى أوى أكون موجودة وأشارككم هذا اليوم الرئع وهذه الصحبة المتميزة
أرسل لكم من الآن سلامى الخاص وتهنئتى الرقيقة

بالتوفيق دائماً أصدقائى الأعزاء♥

حَنيّـن نِضال يقول...

بالتوفيق ومن نجاح لنجاح يارب

وانا كمان متل البقيه كان نفسي اكون موجوده بكل الحفلات بس الخليل بعيده شوي عن القاهرة :D

هبة فاروق يقول...

ماشاء الله ربنا يزيدك نجاح وتألق يا شيرى الحقيقة المنيو تحفة ويفتح النفس
اشوفك على خير لو قدرت احضر حفلة التوقيع
الف مبروك حبيبتى

faroukfahmy58 يقول...

ابنتى شيرى
من نجاح الى نجاح والحمد لله ان نجاحكم وانتم الاقربون سوف يتصب خيراته علينا ويا بخت من كان النقيب قريب
وياريت طروفى تسمح بالحضور

ابراهيم رزق يقول...

ماذا اعلق بعد ما علق و ما من تعليق علق من قبل ما علق
طبعا ده تعليقى الخصوصى الباتع الساطع المتعملق من الاعماق
لو كنتى فهمتى حاجة اكون انا فهمت
انا كل الحكاية بحاول اقلد واحد صاحبى

طبعا انا بحجز حفلة صديقى وبلدياتى سيف حتى لو كان عندى شغل هسيبه
بقية الحفلات بأذن الله هحاول اجيهابس ياريت الحفلات تبقى فول اوبشن بالاكل يعنى


تحياتى

momken يقول...

.....

ماشاء الله
ربنا يزيد ويبارك
وعقبال الطبعه العاشره

بالتوفيق لحضرتك وجميع المبدعين والمشاركين فى المشاريع المختلفه

انا كنت جاى اعلق على بوست ( صبأت )
لكن مافيش نصيب

تحياتى

....

رؤى عليوة يقول...

بالتوفيق يا شيرين

اتمنى انى اقدر احضر كل الحفلات
ولسه بحاااااااول :(


دمت بخير

;كارولين فاروق يقول...

منيو شهي فعلا يا شيري:)
كله حاجات جميله
الف مبروك ليكي ولمصطفي ولهبه
ولكل من شارك في هذه الاعمال المميزه
الف مبروك ومن نجاح لنجاح بإذن الله
تحياتي وتقديري

Asmaa Fathy يقول...

الف مبروك وان شاء الله من نجاح وتألق الي نجاح أقوى وأكثرا تميزاً

تحياتي
Asmaa Fathy

eng_semsem يقول...

بالتوفيق دائما يا دكتوره
وان شاء الله اعرف احضر حفلات كتابك القادم لما ارجع على بلدي حبيبتي
تحياتي