الأحد، 11 نوفمبر 2012

البنات البنات


طبعاً أنا مع البنات جداً و اللي يعرفني يعرف تعصبي الشديد للمرأة, مش بس لأني بنت لكن عشان أنا مؤمنه بإن حقهم مازال مهضوم و أنهم بيعانوا كتير من الظلم بسبب مفاهيم و عادات خاطئه في المجتمع لكن ده ميمنعش ان فيه حاجات كتييييير بتستفزني في البنات , كتبت عنها من زمان بس كنت متردده في النشر لكن قلت قد أكون مخطئه و قد يكون ليهم أعذارهم و قد يكون كلامي نصيحه ليهم عشان يبطلوا حركات البنــــات دي :)

1-أولها مثلاً لما تسألي بنت (الله شنطتك حلوه أوي إنت مشترياها منين؟) يكون الرد غالباً (لأ دي مش من مصر) أو (مش فاكره) أو (دي جايالي هديه) ليه يا أمي كده هو أنا يعني هشتري واحده زيها ده أنا حتى بتضايق لو لاقيت واحده لابسه زيي و بحيل أي لبس عندي شوفته على حد على المعاش المُبكّر..و لا عشان قلت عليها حلوه يبقى ده جزائي.

2-أول ما فكرت أرجع الشغل, نزلت أسأل البنات صحابي (إيه الأخبار؟) معظمهم قالولي (إوعي تيجي) نصحوني كتر خيرهم بس يا ريتهم إكتفوا بكده دول حاولوا يعقدوني بكل الطرق (هتروحي أيام بليل) (مش هتقدري تيجي كل يوم) (ده أنا شعري ابيض من هم الشغل) (الشغل فيه مسئوليه كبيره ممكن تدخلك السجن!) و حاجات كتير كده بس لولا إن طبيعتي مقاوحه و صممت على الشغل ده كان زماني متأخره كتير أوي..طب ليه مبتقولوش على الحقيقه كامله بتحكوا بس اللي مضايقكوا.

3-دي نقطه تانيه قصدي تالته..لما البنات يحكوا مع بعض..تلاقيهم يحكوا عن العرسان العاهات, عن أخوها اللي مطلع عنيها, جوزها اللي موريها الويل, ولادها الشياطين, مامتها اللي جايه من كوكب تاني, قريبتها العيانه..طب فين بقى الحاجات الكويسه..هو كله ضرب ضرب مفيش شتيمه :)...للأسف أنا عكس كده تماماً بكون متقطعه و أفضل أحكي عن أحسن ما عندي..بحب أحتفظ بالغم لنفسي..بس مؤخراً بدأت أخد بالي و أسمح ببعض التسريبات الغمّيه.

4-في نوع من البنات كده يخرجوا من الإمتحان مسهّمين و بعدين يبدأوا فاصل من العياط و مفيش مانع من حالات إغماء..و تلاقي البنات يتجمعوا حواليهم و الولاد يلحقوهم بالكلينكس و يفضلوا يطبطبوا عليهم و يصبروا فيهم....و هما دول بقى البنات اللي بيجيبوا تقدير جيد جداً...يا حسرة قلبي أنا اللي كنت بخرج أضحك و أقول عملت كويس الحمد لله و أجيب جيد :)

5-نيجي بقى عند البنات المسهوكين...و ما أكثرهم...نحنحه بقى و رقة و بربشه برموش كلتها المسكره..بالذااااااات قدام الشباب و الستات الكبار...آآآآآه تباً لكم قلبي الصغير لا يحتمل بجد..(يا عثله, حد عسول, مش بأعرف, أحبوووش) بتشل من النوع ده..أصل في فرق كبير أوي بين الرقه و الإسترقاق, الرقه دي فواحه و طبيعيه أما الإسترقاق ده كولونيا ريحتها رخيصه..و لو واحده طبيعتها مش رقيقه هتكون أجمل لو فضلت بالطبيعه دي..بس نقول لمين.

6-في بنات بقى لما صاحبتهم تتخطب...ستوب خلاص متعرفهاش..أو نوع تاني بيفضل يسأل عن أدق التفاصيل, و هو ده النوع اللي بيفضل جنب العروسه و في الفرح يطلع في كل الصور..و بعد الجواز يسأل السؤال السخيف "أخبار الجواز إيه؟" (إتفضلي معانا حضرتك!!!) و غالباً النوع ده بيكون جنب كل عروسه و صلاحية صداقته بتنتهي بعدم ظهور صديق للعريس.

7-في بنات تخصص ثقافة, علم أو أدب, يا سلام بقى لو أدب و تلاقيهم حزانا كده دايماً زي فكرة الناس عن الكاتب الجيد إن كلماته لازم تكون قاتمه و حزينة, بيفكروني بسميحة أيوب من حيث الأداء المسرحي, ميعرفوش إن الأقرب للقلوب هي البساطه, و سعاد حسني بتلقائيتها المحببه و صدق و بساطة تعبيرها أكيد تكسب..تكسب حُب الناس و بقاءها حيّه بينهم دائماً.

8-البنات اللي بيتخطبوا لواحد و هما عارفين من جواهم إنه بالنسبه لهم إستبن..إلى أن يظهر اللي أحسن منه..فيقولوه بالسلامه..بجد في بنات كده شوفتهم كتير للأسف.

9-مبحبش بقى صنف من البنات لسانهم طويل و بذيئ بيقلدوا الرجال في كل شئ و فاكرين كده إنهم الأفضل و الأجرء, مش عارفين إن الناس ممكن تسقفلهم و تموت من الضحك على كلامهم الصادم و تنفخهم بكلمات الثناء و الإعجاب بجرأتهم, لكن بينهم و بين بعض بينتقدوهم و عارفين إن في خلل ما في شخصيتهم.





10-أكتر نوع بكرهه في البنات...هو النوع الشرشوح...و النوع ده ممكن يكون بيلبس سينيهات و ساكن في أرقى الأماكن و خريج أحسن المدارس..لكن الطبع يغلب التطبع, تلاقيها لما تتخانق مع واحده تقولها "يا حببتييييي" أو "يا ماما" و ميمنعش لو في إسم دلع و بعدين تفرغ كل اللي عندها من صندوق قاذورات متتخيلش أبداً إنه جواها..بشوفهم كتير في خناقات السواقه و في الشغل و في كل مكان..منتشرين الحقيقه :) و مبعرفش أتعامل معاهم..ربنا يكفينا شرهم.

كفايه عليكم كده إنهارده...ممكن أبقى أعمل جزء تاني :)
بس طبعاً دول بعض الأصناف من البنات مش كلهم أكيد و أنا مش أحسن منهم أكيد برضو..هما بس بيستفزوني..

و مننساش إن لو في 10 حاجات مستفزه في البنات فهناك 100 حاجه مستفزه في الولاد ممكن نتكلم عنهم بعد كده بإستفاضه :))

هناك 34 تعليقًا:

شيماء علي يقول...

طب والله بيحصل
ههههههههههههههههههه
اه والله يا شيخة ..
ضحكتيني أوي :)

شيرين سامي يقول...

شيماء علي:
أعمل إيه مهم يحرقوا الدم :)
المدونه نورت يا فاندم

MTMA89 يقول...

مدام الموضوع عن البنات .. أنا ماليش مكان هنا بقى ..
بس تدوينة حلوة و خفيفة .. بس بصراحة خوفتيني من رقم 8 .. :))


محمد

eng_semsem يقول...

الله يكون في عونا
ههههههههههه

شيرين سامي يقول...

MTMA89 :

أهلاً محمد :)
من خاف سلم :))
نورتني

شيرين سامي يقول...

أسامه:

مش أوي كده:)
مهما كان الله يكون في عونا إحنا..
الإستفزاز ممكن يكون أرحم من حاجات تانيه

نورتني

ياسمين يقول...

كلام انا معاه
وبالذات في بتاعة جيد جداا..يانهار أبيض عليهم ..بجد يجيبوا الشلل ربنا يستر ع أعصابنا...
عايزين باقي الأجزاء

الازهرى يقول...

أحلى حاجة عجبتنى هى السطر الأخير

بتأمنى نفسك مثلا من البنات ؟؟؟؟؟
حاجة للزمن كده يعنى


بحب أحتفظ بالغم لنفسي

دى عينة نادرة سواء فى البنات أو الولاد

رقم 5 دول مأساة حقيقية بالنسبة لى
وكتير بأعلن إنى مسافر واقفل أكاونت الفيس بسبب ظهور البعض منهم

رقم 7 برضه موجودين فى الولاد كتييييييير


الباقى امممممممم


******

http://fritend.blogspot.com/2010_10_01_archive.html

دى حاجات كتبتها لما اتعرفت على فاتيما لأول مرة فى أكتوبر 2010 وكانت مناقرات وشغل ديوك

:))

شيرين سامي يقول...

ياسمين:

حاضر يا ياسمين لو مفيش و لا بنت زعلت أوعدك بجزء تاني :)

نورتيني يا جميل

شيرين سامي يقول...

الأزهري:

هههههههههه لأ طبعاً
أنا فعلاً مع إن المرأة مهما كانت مستفزه أهون بكتيييير من بعض الرجال :)

غريبه مع إني كنت بفتكر نمره 5 متضايقش الولاد :)

نمره 7 في الولاد كتير كمان ده صحيح

هقرى التدوينات حالاً :)

نورتني و أسعدتني بوجودك يا أسامه كالعاده

Ramy يقول...

هههههههه

يااااه ياااااه

الأعتراف بالحق فضيله (:

مش ليكى يا دكتورة انا على اللى بتتكلمى عليهم دول

و دى من الأسباب الرئيسية اللى خلتنى متعرفش على حد فى الكليه خاااااااااااالص (:

((:

شيرين سامي يقول...

رامي:

:)
بس ليه يا رامي ده ميمنعش إن كان في بنات طبيعين و مش مزيفين كتير في الكليه.
سعيده بتواجدك يا رامي كالعاده

موناليزا يقول...

متفقة معاكِ جداً
وخصوصا رقم أربعة :)

موافقة على جزء تانى عن البنات
وأجزاء كتيرة بقى للرجال :)

مصطفى سيف الدين يقول...

ايوة كده يا وديع
افضحيهم يا دكتورة و قولي الحقيقة المرة اللي مش قادرين الستات يفهموها :)

و رقم خمسة دي مالهاش حل

الله ينور يا دكتورة البوست ده هيتشير في كل مكان و نقول شهد شاهد من اهلها

MaNoOoSh يقول...

كمان النفسنة اللي بقت في بنات كتير بصراحة بقت شيء فوق الوصف هي والسهوكة

بس السهوكة دي بقت سمه في معظم البنات بلاقيها من اول 13 سنة ل35 سنة

اه والله.. لما قربت اقتنع ان الواحد اصله شيخ غفر مش بنات :))

هبة فاروق يقول...

صباحك هنا وسعاده يا شيرى
والله كل نقطه حكايه قدرتى تحللى كل شخصيه بطريقه مدهشه
تعرفى ان فعلا علاقه البنات ببعضها بتتقطع لما تتجوز او تتخطب وده حصلى على فكره لما اتخطبت وكانت اعز صديقه او كانت بقى
للاسف بحزن لما اشوف جوزى عنده صداقات كثير من ايام الجامعه وانا مطلعتش حتى بصديقه بواحده
البوست ده كشف المستخبى كله بصراحه الرجاله حتتعقد مننا كده ههههههههه عايزين بوست رجالى نطلع فيه المستخبى
اليوست رائع يا شيرين وطريقتك الساخره جديده وجميله وفى انتظار باقى المستخبى

mostafa gazar يقول...

ابتسمت ابتسامه عريضه بعد قرأتى لهذه التدوينه ....وضحكت كثيراعلى عبارة
(نيجي بقى عند البنات المسهوكين...و ما أكثرهم...نحنحه بقى و رقة و بربشه برموش كلتها المسكره)
.وتذكرت العباره الرائعه ل د أحمد خالد توفيق
(عبقريه هى الفتاه التى تجيد التفرقه بين الدلال والميوعه ...لو قابلتها يا بنى فلتتبعها الى اخر العالم)
.........

تدوينه خفيفه وروحها حلوه :)
تحياتى واحترماتى

ليلى الصباحى.. lolocat يقول...

ياه ياشيرين كل ده فى قلبك وساكتة من زمان هههههههههه
اضحك الله سنك حبيبتى

ممكن تشوفى كل الاصناف دى فى وقت واحد مع بعض (( لما تركبى المترو)) يا الله احس ان حصلى اغماء وصداع شديد جدا
اشكال عجيبة واسلوب اعجب ورغى ليس له حدود كل شىء صناعى الكلمة والاحساس والحركات

اوافقك فى كل كلمة قلتيها ههههه بس ياريت بقى تتبعى البوست ببوست اخر عن الطرف التانى علشان ماتشمتيهم فينا ههههههه واضح ان تعليقاتهم فيها شماته كبيرة الله يسامحك هههههههه

سلمت اختى وتحياتى لك بحجم السماء

ريـــمـــاس يقول...

صباح الغاردينيا شيري
:)
أنا جيت
ههههههههه
والله ضحكت بجد بس طبعاً فيه بنات عسل ورقة ودلع
ومافيش حاجة صناعي ابداً مش كدا :)
طبعاً حستنى البوست بتاع الطرف التاني"
؛؛
؛
لروحك عبق الغاردينيا
كانت هنا
Reemaas

ابراهيم رزق يقول...

بنات كتير حلوين عند اهلهم قاعدين
ما بين طبيخ و عجين و بختهم بطال
عايزها لحم فصوص مش عود قصب ممصوص
و محربقه بعصعوص وعامله روحها غزال
عايز نتايه صحيح من ربع شمع تسيح
مهوش بشكل قبيح لكن بذوق و دلال
عندك بنات جمالات مقلوظين نتايات
و دمهم شربات يسكر نسا ورجال
أما اللي عاملة سبور و جدها بلفور
و عايزه واد دكتور خسارة فيها ريال
و لا اللي عاملة إله و شعرها قصاه
و بأكسجين صابغاه دي تجلب الإسهال
وان جبتي واحده بكرش من الحمير م تغيرش
مانيش واخدها بقرش واحط فوقها شوال

هههههههههههههههه
ده كلام قالوا عمنا بيرم التونسى عن البنات من فوق خمسين سنة وواضح ان هما هما متغيروش

على العموم شهد شاهد من اهلها
بصى انا فعلا رقم 5 دى اكتر شىء بكرهه فى البنت التصنع والسهوكة تبقى ضاربة سندوتش سمين وتعزم عليها تقولك اصلى عاملة دايت
على فكرة بكره الشباب المسهوك برده وده بيختلف عن البنات انه مش بيتسهوك غير قدام الجنس الناعم فقط اما قدام الجنس الخشن فشخصية مختلفة
على العموم انا بلاحظ ان النفسنة والامراض النفسية بين البنات وبعض اكثر بكثير جدا من بين الاولاد
فى انتظار الجزء الثانى على احر من الجمر
تحياتى

;كارولين فاروق يقول...

ههههههههه
اهو انا بيحصلي شلل من رقم خمسه
بالذات (مش عارف) يا سلام كمان
لو مش لايق عليها الدلع بتقبي عثل:)
هي بتبقي محتاجه بوكس في منخرها
علشان ترجع لطبيعتها زي التليفزيون لما
يتخبط علشان يشتغل
ضحكتيني يا شيرين
بوست رائع
تحياتي

شيرين سامي يقول...

موناليزا:

هي نمره أربعه فعلاً الأكثر إنتشاراً :)
هحاول في موضوع جزء تاني بجد

نورتيني يا منى كالعاده

شيرين سامي يقول...

مصطفى سيف الدين:

هههههههههه أنا مع الحق أياً كان و أشهد عادي و لا يهمني :)
مبسوطه بوجودك يا مصطفى

نورتني يا صديقي

شيرين سامي يقول...

MaNoOoSh:

:)
كلنا مرينا بمرحلة شيخ الغفر عادي :)
الى أن إكتشفنا إن في حاجه إسمها سهوكه

بس الطبيعي يكسب أكيد
نورتيني

شيرين سامي يقول...

هبه فاروق:

موضوع الصداقة بين البنات ده تتكتب فيه كتب..أنا كمان مريت بحاجات عقدتني و خليتني أحتفظ بعلاقات كتير..سطحية..القرب مؤذي..

شكراً يا هوبه و من بعض ما عندكم يا جميل :)

تحياتي و كل الود لكِ

شيرين سامي يقول...

مصطفى جزر:

:)
مبسوطه إني رسمت على وجهك إبتسامه يا رب دايماً
نورتني يا صديقي

شيرين سامي يقول...

ليلى الصباحى.. lolocat:

شوفتي بقى :)
الحقيقه مبلحقش ألاحظ الناس في المترو..بكون مش شايفه قدامي أساساً :)
سعيده إن البوست عجبك و هحاول أكتب عن الطرف التاني كمان أوعدك.

تحياتي لكِ صديقتي الطيبة

شيرين سامي يقول...

ريماس:

صباحك ورد جوري :) و ده أغلى صباح عندي

أكيد يا ريماس في بنات كتير رقتهم و دلعهم طبيعي و يا ريت ميتأثروش بالمناخ العام من السهوكه :)

حاضر هحاول في البوست التاني واضح إنه مطلب جماعي :)

نورتيني بزيارتك الجميله كالعاده

شيرين سامي يقول...

إبراهيم رزق:

ههههههههههه ده كلام بيرم التونسي؟! ده مدي على شعبان عبد الرحيم :)

حلوه نقطه سهوكة الولاد قدام البنات..أحييك عليها بجد لأنها مستفزه جداً...تلاقيه صوته في منتهى الرقة و العذوبه بره البيت و جوه بيكون إنسان تاني :)
النفسنه أكتر بكتييير بين البنات ده صحيح جداً للأسف

نورتني يا فاندم كالعاده

شيرين سامي يقول...

كارولين فاروق:

هههههههههههههه
وحشتني تعبيراتك الساخره يا كارولين بجد..ضحكتيني جداً :)
عندك حق تماماً

نورتيني و أسعدتيني بزيارتك المميزه

شمس النهار يقول...

ليه بس كده ياشرين علي الملاء كده
طيب كنتي خاليتيها بينك وبينهم

كانت داده الله يرحمها تقول علي الست الشكايه
دي سعيده
بس الشكوي رقوة

mohammad nabiel يقول...

أحييك د.شيرين على صراحتك وتحليلك لشخصيات البنات فعلاً ..

بنتى هَنَا لسَّه عندها 6 سنين .. ب ادعى ربنا يحفظها لمَّا تكبر من مثل هذه الصفات " البناتية " ولو إنى أعتقد إنه مفيش واحدة خالية من حاجة من دول ..

وبقالها فترة ما عندهاش حاجة شاغلاها ليل ونهار غير أغنية نانسى عجرم ( يا بنات يا بنات يا بنات .. اللى ما خَلِّفش بنات .. ماشبعش من الحنية ولا داقش الحلويات ) ..

البنات بيبقوا حلوين قوى فى المرحلة السنية دى .. يارب تفضل كده على طول.

تحياتى لك د.شيرين وكل عام وأنت بخير

شيرين سامي يقول...

شمس النهار:

:)
الشكوى رقوه...صحيح
نورتيني و أسعدتيني بزيارتك

شيرين سامي يقول...

محمد نبيل:

اشكرك و نورت مدونتي بزيارتك
ربنا يخليلك بنوتك و يحفظها من كل شر
لكن أكيد في بنات بتخلو من الصفات دي :)

تحياتي الخالصه لك