الجمعة، 10 أغسطس 2012

ماتقولش كده على نفسك..إنت جميل

أعتقد إن الإعلانات في أي بلد بتعبّر عن ثقافته و وعيه و شخصيته و جوانبه الحياتيه المختلفه, و بصراحه الإعلانات عندنا في مصر بتتأرجح ما بين الذكاء و التخلف (هما كلمتين مش عكس بعض بس مش لاقيه أنسب منهم) يعني الإعلانات عندنا عامله زي طبق الكشري هتلاقي فيه كل حاجه و حتى لو بتحب مكون واحد من مكوناته لكن في الآخر بتلاقي الطبق كله له مذاق مميز.

إعلانات بيبسي السنة دي أسوأ بكتييير من السنة اللي فاتت فكرتها غير منطقيه من حيث إن حد يدفع للصف كله! إحنا لاقين ندفع لنفسنا :) و بعدين إحنا صحيح أهل الكرم بس إحنا برضو اللي إخترعنا عزومة المراكبية مضطرين, ملابس دنيا مش مميزه زي السنة اللي فاتت خاصة يونيفورم البحاره, و عملوا طيب لما بطّلوا يعرضوا الإعلان الأول و هي بترقص بفجاجه و بتغني رمضان كريم أوي! لكن على العكس إعلان كوكاكولا السنة دي كان متفوق عليه بالأغنيه الرائعه لنانسي عجرم..فرحة..بحس لما بسمعها إني محتاجه أنكش على الفرحة بمنكاش :)

إعلان فودافون مكانش قد التوقعات تماماً و حسيت إنه مسلسل بايخ و متكلف جامد على الفاضي, على عكس إعلانات موبينيل السنة دي  و الجمله العبقريه "عشان لازم نكون مع بعض" كانت أقوى من وجود أي فنانين مبيقدموش غير وشوشهم المحفوظه, ده غير طبعاً إعلانات الجوايز الجميله ببساطة فكرتها كفايه إني أحبها لما أسمع بنتي بتقول بصوتها الرُفيّع..إجري يا مجدي :)


أما إعلانات إتصالات فبالرغم من فكرتها العبقريه الغنية عن الإنفصال في التليفون إلا إني كـ بنت بصراحة إتخنقت..مش عشان ده مش حقيقي بالعكس ده واقعي جداً و كتير بنات بيلجأوا للنفاق و (إنت جميل..أكيد إحنا اللي عملنا حاجه) عشان يتمموا الموضوع و خلاص و يبقوا يقتصوا لنفسهم بعد كده..بس اللي خنقني إنهم معملوش إعلانات بالعكس يعني بنت بتسيب ولد..عادي و الله بتحصل كتير لكن لأننا مجتمع ذكوري حتى النخاع فالأجمل و الأريح و الأمرح إننا نتريق على البنات و نحطهم في خانة الضعف و الهزيمه.

و بمناسبة المجتمع الذكوري فبالرغم من إن إعلانات السمنة لا تستهويني نهائياً و لا تلفت نظري إلا إن الإعلان العجيب بتاع الراجل المصري الأصيل اللي بيطلب من مراته المصريه العبيطه الأصيله إنها تعملّه مولوخيه (نسي يقول زي بتاعة أمي) و الحلوه طبعاً لسه صغيره مبتعرفش فخدت بنصيحة كل ربات البيوت لحد ما جه الباشا و قعد على العرش و لبس السلطانية في وشّه و قال بصوت فخيم (اللـــــه) في إشارة إن المولوخيه عجبت فخامته فهللت البنات فرحةّ و هنوها أنها خلاص مبقتش صغيره..بصراحه منتهى الإستهتار بالمرأة لما يحصروا نضجها في طبق المولوخيه اللي يعجب سيادته..ثم إني مؤمنه إن الأكل بيتعمل بالحُب و يتاكل بالحُب عشان يكون له مذاق حلو غير كده مبيبقاش إلا وقود و بس.

إعلان بيريل فكرته فظيييعه و متسقه جداً مع شعارهم (إسترجل) اللي كنت برفضه لأني كنت بشوف إن الرجوله معنى أكبر بكتير من مشروب طعمه وحش..لكن بحييهم و أرفعلهم القبعه إنهم قدروا يستغلوا الشعار و الحمله بشكل ناجح جداً السنة دي لما خرجوا من نطاق إن الرجوله تكون ظاهره في التعامل مع المرأة بس.

بضحك أوي من إعلان أيس كريم ماكسي بون بتاع (أبووويا) :)) و بحب الريتم اللي كان بيغني عليه الولد و بحب الأيس كريم كمان :)

و بكره أوي إعلان زبده ألماظ و الممثله الفاشله اللي ظهرت بعد سنين عشان تقول "باي سمنه..هاي زبده" و تقفل الإعلان بشلل رباعي :)

و في إعلانات عمرنا ما كنا بنشوفها و كانت الدنيا ماشيه عادي..ظهرت فجأه و كأنها إختراع يا كوتش :)



أحمد مكي رغم إيماني بذكاءه لكن إعلانه مكانش قد التوقعات و مستغلش إمكانياته بشكل جيد.

قلبي بيوقف لما الصغيره صهيبه بتقول..أنا نفسي أعيش...بس إكتشفت إن كلنا نفسنا نعيش بأشكال مختلفه..حيوات كتير بتكون شبه الموت..فعلاً مش كل نفس بيتردد حياه.

أما الإعلان الأفضل من وجهة نظري هو إعلان البنك الأهلي المصري..مكانك مش هنا..جميل إننا نشجع الناس إنهم يشتغلوا الحاجه اللي بيحبوها و فعلاً كتير بقابل ناس بحس إن ده مش مكانهم و إن مستقبلهم في مكان تاني..لكن مع الأسف أغلبنا بيقف في مكانه و مبيحاولش يجري ورا طموحه أو يدوّر على مكان تاني يناسبه أكتر..القدم الثابته دائماً هي إختيارنا حتى لو ثابته على غطا بلاّعه!



**********

ما تنوسش
بُكره السبت 11/08/2012 الساعة 4 العصر أمام مستشفى أبوالريش الياباني تجمع المدونين و التفاصيل عند فاتيما هنا


هناك 34 تعليقًا:

Ramy يقول...

أزيك يا دكتورة (:

بالنسبة للبوست انا يمكن مش عارف اقول لأنى مبتفرجش على التليفزيون خاااالص

بس من كلامك مفيش اعلانات حلوة او قليلة يعنى
(:

مفي اعلان زى بتاع ماجد الكدوانى بتاع السنة اللى فاتت (:

.........

انا قلت اشقر على الناس بقى (:(:

كل سنة و انتى طيبة

شيرين سامي يقول...

إزيك يا رامي :)
و أنا مبسوطه أوي بتشقيرك عليه :)
عملت طيب إنك مش متابع التليفزيون أنا كمان مبشوفش غير الإعلانات تخاطيف كده.
أتمنى أشوفك على خير و كل سنة و إنت طيب يا رامي يا طيب :)

أحمد أحمد صالح يقول...

رائع جدا تحليلك للإعلانات يا دكتورة شيرين،صراحة أنا ما شفتش ولا إعلان منهم لأني تقريبا ما بأتفرجش على التلفزيون،و أما بيحصل بيكون على ناشيونال جيوجرافيك أو فوكس أو ماكس و ما بيجيبوش إعلانات تقريبا !!
..
و طبعا أتفق معاكي إن الإعلانات بتعبر عن ثقافة و وعي الشعب، لأن واضعها ببساطة بيشوف الطريقة المثلى لمخاطبة الناس، فإذا كان عارف أنه بيخاطب مجتمع ذكي وواعي بيخاطبه بأسلوبه،و إذا كان عارف إنه بيخاطب مجتمع نص و نص بيخاطبه بطريقته !! ويمكن معاكي برضة أنها بتتاوجح بين الذكاء و التخلف !!
..
أما موضوع المجتمع الذكوري فمحتاج وقفة طويلة عشلن كدة هنأجله !!
..
كل التحية دكتورة شيرين،و كل التحية لمن سيشارك في أبو الريش،و أعانكم الله و أثابكم عليه حسن الثواب و جزاكم به كل الخير.

رؤى عليوة يقول...

البوست جميل وعندك حق جدااااا
اعلانات اكترها بايخ
ولو عملتى بوست عن المسلسلات المستفزة هيبقى تحفه وهتلاقى انتقادات كتييييير

نادر لما نلاقى اعلان كويس ويجذب فعلا

اما المسلسلات فى رأيى مفيش غير الخواجة عبد القادر

رمضان كريم

ظلالي البيضاء يقول...

السلام عليكم أختي شيرين ..
الصراحة نحن بالكاد نتوقف عند الإعلانات .. لكن لا يمكنني أن أدخل دارك هنا ولا ألقي التحية ..
فلك كل التحية الطيبة المباركة وتقبل الله صيامكم وصلاتكم ودعاءكم .. وجعل السعادة في قلوبكم ودياركم ..
ودمت بكل الخير والسلامة ..

Casper يقول...

انا شايف ان اغلب الاعلانات بتتميز بالهيافة فيما عدا حاجات قليلة جدا لكن يظل الطابع المميز هو التفاهة
ولا عزاء للاعلانات في مصر

فاتيما يقول...

عرض وافى وواقعى يا شوشو
بس انا بقى عاجبنى اعلان جالاكسى
عشان اللى عمله كان محايد
وفضح اهل جنسه من الرجالة الانطاع
اللى رجولتهم بيولوجية وفقط
ونساءهم بيعانوا منهم ...

كان حيادى
وشابوه للى عمله فعلا
:)


كل سنة وانتى طيبة يا حبيبتى
ورمضان كريم
واعلاناته مبتخلصش ...
لأنها انعكاس للواقع اللى احنا فيه
فعلا ...



اشوفك بكرة يا قممممممر
ان شاء الله

:-*

amina يقول...

ههههههههههههههههههه وصف دقيييييييق جدااااا ومليان تفاصيل...
وبجد بجد يستفزني اعلان السمنة ده زيك...اعلان باارد ..وكمان حسيت ان اعلان دنيا سمير غانم مصطنع ومفيهش حاجة من الريالتي
..
موتني ضحك اعلان اتصالات بجد فظيع جداا...
تحياتي

FAW يقول...

تحفة التحليل
ومعاكي جدا بالذات في باي سمنه هاي زبدة دي ، أففففف أعوذ بالله ، تخيلتها بس نفسي غمت عليا :(

وإعلان قطونيل فعلا مايستاهلش تعليق ، الناس كلها قامت بالواجب :)

كل سنة وإنتي طيبة :)

شمس النهار يقول...

ضحكتيني

بس انا بحب اعلان اتصالات وخصوصا اللي بتقوله انت جميل
والتانية اللي بتتخانق معاه
:))

كان نفسي اكون معاكم في ابو الريش
بس للأسف كل سنة انتوا مظبتنها مع الاجتماع العائلي اللي مااقدرش افوته
علشان دول البقية الباقية من عماتي واهل والدي

ان شاء الله ابو الريش السنة دي يكون اجمل واجمل

مها البنا يقول...

حتى الاعلانات يا شيرى؟؟ ههههههه

جميل جدا تحليلك ليها بس انا تقريبا مش شفت ولا اعلان منهم حتى الأن عدا اعلان "إنت جميل" ده .. من باب الفضول يعنى لما الكلمه انتشرت

انما انا تقريبا مش بتفرج على التليفزيون .. تحسى ان بينى وبينه عداء بسبب كم الإعلانات الغبى والعقيم اللى بيقطع اى عمل فنى .. حتى النشرات بقى يتخللها فترات اعلانيه يا بنتى

ماله النت؟؟ لما بحب اتفرج على اى شئ .. بجيبه من ع النت .. وربنا يخليلنا يوتيوب وجوجل وغيرهم ^_^

كل سنه وانتٍ طيبه .. العيد قرب :)

نسرين شرباتي "أم سما" يقول...

رأيك فيه كتير من رأيي بالإعلانات يا شيري،، قلتي والله اللي نفسي أحكيه :))
إعلانات السمنة والزيوت بشكل عام شلّتني من كثرتها وألماظ زي ما قلتي بيشل بزيادة هههههههههههههههههههههه
تمنيت إني أكون في مصر علشان أشوف أنا وبناتي كوكا كولا افرح :) :) :)
غير كل ده انتي واحشاني أوي وكتاباتك وحشاني كمان

مصطفى سيف الدين يقول...

سيشهد التاريخ اننا قمنا بثورة لنصبح اكثر فجاجة حتى ان العاشق يقول لعشيقته
طمعانة فيا و لا في قطونيلي

EMA EMA يقول...

عندك حق و الله اعلانات رمضان السنة دى تجيب الشلل و مش هقول اكتر من اللى قلتيه..

تسلمي يا قمر


كل سنة و انتى بالف خير

P A S H A يقول...

ده إعلان برضة:
http://www.youtube.com/watch?v=gCvo0ns4Z-M
:)
كل سنة وحضرتك طيبة

الازهرى يقول...

أنا الإعلان الوحيد اللى اتفرجت عليه بتاع موبينيل
لإنه انتشر على النت بقوة
وبصراحة الأغنية جميلة جدا فى معانيها وأدائها

إنما من خلال البوست
والصالون الثقافى اللى اتقام عليه فى الأوبرا

تقريبا عرفت خريطة الإعلانات الأساسية كلها

شىء محزن

شيرين سامي يقول...

أحمد صالح:
أشكرك و جميل إنك مش متابع التليفزيون لأنه فعلاً مضيعه كبيره للوقت.
المجتمع ذكوري جداً الموضوع مش محتاج مناقشه :))

أشكرك مره تانيه أسعدتني بزيارتك
تحياتي الخالصه لك

شيرين سامي يقول...

رؤى عليوة:

أشكرك يا رؤى و الحمد لله أنا مش متابعه أي مسلسل بشوف أجزاء بس مقدرش أحكم على أساسها و ماليش في التليفزيون أساساً :)

نورتيني و أسعدتيني بالزيارة

شيرين سامي يقول...

ظلالي بيضاء:

و عليكم السلام أخي محمد أشكرك على زيارتك الطيبة و دعاءك الرقيق و أتمنى لك كل السعاده و الأمنيات الطيبة.

تحياتي و تقديري لك

شيرين سامي يقول...

كاسبر:

ده حقيقي يا أسامه لكن في بعض الإعلانات شذت عن القاعده.

تحياتي لك

شيرين سامي يقول...

فاتيما:

مساءك سكر يا طمطم :)
مبسوطه إني شوفتك و يا رب متجمعين في الخير دائماً.
أنا زعلت أوي من نفسي إني نسيت أكتب عن إعلان جالاكسي مع إنه فعلاً مهم جداً و من أفضل و أنصف الإعلانات..و برافو إنك ذكرتيه لأنه فضح كتير من سلبيات الرجاله و يا ريتهم كانوا سابوني أنا أكتب الإعلان ده كنت هبدّع و الله :))

كل سنة و إنت بألف خير و رمضان كريم عليكِ و على يوسفك و كل حبايبك

سلام يا جميل

شيرين سامي يقول...

أمينه:

مبسوطه إن البوست عجبك :)
و رأيك مظبوط تماماً

نورتيني و أرق تحية لكِ

شيرين سامي يقول...

FAW:

:)
مبسوطه إن البوست عجبك و سعيده أكيد بزيارتك
كل سنة و إنت بألف خير و سعادة

شيرين سامي يقول...

شمس النهار:

خسارة كان نفسي أشوفك بجد :(
إن شاء الله تتعوض و أكيد حضرتك من أكتر الناس اللي بتمنى أتعرف عليهم شخصياً.

سعيده بزيارتك و إن البوست عجبك

تحياتي و كل الود لكِ

شيرين سامي يقول...

مها البنا:

و الله بشوف الإعلانات مجبره أنا كمان ماليش في التليفزيون خالص.
كل سنة و إنت بألف خير و سعادة
عيد سعيد عليكِ و على كل حبايبك

شيرين سامي يقول...

نسرين شرباتي "أم سما" :

إنت كمان وحشاني يا نسرين :)
مبسوطه إن البوست عجبك و تيجي مصر قريب عشان تفرحي و نفرح بيكِ :)

نورتيني

شيرين سامي يقول...

مصطفى سيف الدين:

هههههههههههههههه
مقدرتش أبطل ضحك :)

كل سنة و إنت طيب يا صديقي العزيز

شيرين سامي يقول...

EMA EMA:
تسلميلي دائماً
أشكرك و أسعدتني زيارتك
:)

شيرين سامي يقول...

P A S H A:
:)
لسه بدري علينا لكن إحنا لينا بصمتنا برضو :)
كل سنة و إنت بألف خير

شيرين سامي يقول...

الأزهري:

إعلان موبينيل راااائع على غير العادة
مبسوطه أوي بالصالون الثقافي في الأوبرا كان نفسي أحضر بجد.

و سعيده بزيارتك
نورتني

yasmeen يقول...

نسيتي إعلان موبينيل :)) عايزه اقولك البنت الي بتطلع تاني واحده وبترش الورد ليها شبه كبير اوي منك ورقتها واهتمامها بالورد لها نفس الرقة الي بحسها في حروفك .. كل ما أشوف الإعلان بتجي في بالي من كتر الرابط الي في ذهني بينكم ^^
http://www.youtube.com/watch?v=VjpGBXAm2M0

اما بالنسبة لإعلان بريل "استرجل" طول ما الإعلان في كلمة "استرجل" مش بطيقة ولو شوفت واحد بيشرب بريل ممكن أضحك عليه " أصله بيشربة علشان يسترجل " !! إعلان مهين لكل الي هيشتري المشروب !!

Deyaa Ezzat يقول...

مابتفرجش على تلفزيون في رمضان.. بس صدفة شفت صهيبة فاروق.. واد إيه مؤثر جدا.. بس معجبنيش التجارة بالطفولة :)

وشفت إعلان أبويا ومت من الضحك.. فعلا ظريف جدا

عجبني نقدك مع ربطه بموضوعات تانية مهمة زي ذكورية المجتمع ونفاق بعض البنات ومفهوم الرجولة

بالتوفيق دايما

فتاة من عالم آخر يقول...

كل سنة وانتى طيبة الأول
حلو أوى الموضوع يمكن الكلام كتير كنت بقوله لما بسمع الإعلانات دى بس مجاش فى دماغى خالص فكرة انى اكتب عن كدا بس بجد تحليلك رائع واهتمامك بموضوع زى الإعلانات عجبنى جدا لان فى ناس فعلا ميهمهاش بالرغم من انها بتعكس ثقافتنا

MTMA89 يقول...

أنا انقطعت عن المدونات فترة طويلة .. لكن كما كنتي و مازلتي .. تتألقي بكتاباتك و تدويناتك ..

اخترت تدوينة قديمة -عشوائيًا- .. و كانت هذه التدوينة صاحبة النصيب ..

جميل جدا السرد بتاعك .. و الأجمل هو المقدمة اللي لفتت نظري لأهمية الأعلانات .. مش بس السينما و المسلسلات في التأثير في أفكار المجتمع ..

تحياتي لكِ ..
و اعتذر لانقطاعي الطويل ..

محمد ..
:)