الخميس، 17 فبراير 2011

أنا رئيسة الوزراء...انت مين؟

واجب تدويني من المدونه الفاضله صاحبة مدونة المدينه الفاضله أختي الجميله لولو أو أم هريره و كمان اجباري من المدون خفيف الظل محب روفائيل صاحب مدونة الكاتب محب روفائيل , الواجب صعب جداً و متمناش يحصلي في يوم من الأيام لأنها مسؤليه كبيره أعتقد لو انسان طبيعي ممكن تخليه مينامش, لكن أنا هجاوب براحتي طالما مفيش عواقب و هطلق لخيالي الحريه عشان يعبر عن بعض الحاجات اللي بتضايقني و مش عارفه أغيرها آن الأوان اني أقعد على الكرسي الأحمر الكبير(خيالي بقى و أنا حره) و أقف و أقول بأعلى صوتي أنا المدييييير احمم قصدي رئيسة الوزراء.


ماذا تفعل لو أصبحت يوماً و وجدت نفسك رئيساً للوزراء؟
أولاً هلبس التاج اللي فوق ده :)....أكيد هاستشير مجموعه من الفقهاء الشرفاء في مجالتهم و هختار وزراء يستحقوا أماكنهم و يكونوا من العلماء أو الأدباء أو المتميزين و ليس رجال أعمال أو أصحاب مشاغل أخرى, و هعمل على مراقبتهم و محاسبتهم دورياً على ما تؤول اليه وزارتهم و ياحبذا يكونوا متوسطين في العمر عشان يقدروا يقوموا بشغلهم بنفسهم و هخلي الفترة الوزاريه متزيدش عن سبع سنوات و متقلش عن سنه و أنا نفسي هتعهد لكم اني مش هقعد أكتر من نص ساعه :)


وزارة  الدفاع و الانتاج الحربي:
وزارة مش محتاجه تعديل لأنها أفضل وزارة في مصر لكن ممكن أخلي المجندين في الجيش ليهم قيمة و محدش يهنهم و هعملهم مرتب مجزي و مش هخلي الواسطه تخرج حد من الجيش كله لازم يدخل الجيش, و هدور على سلاح رادع (زي فيلم ليلة سقوط بغداد) و أحدث الأسلحه أوفرها, و أحدث أساليب التدريب و الاستعداد لازم تبقى موجوده.


وزارة الماليه:
دي أصعب وزارة بالنسبه لي لأني نوعاً ما مبعرفش أحوش خالص اللي يجيلي بصرفه لكن في حالة اني هصلح من كل الوزارات خصوصاً الصحه فمش هلغي الضرائب كلها بس هلغي كتير منها و هزود المرتبات كلها خصوصاً الصيادله :)


وزارة الداخليه:
أهلاً...للأسف مش هينفع ألغيها و الا هنتحول لغابه لكن هسميها وزارة الأمان و مش هسمح بدفع رشاوي لقبول الطلبه و هخليهم يتدربوا زي الجيش على تأمين الناس و الحفاظ على أرواحهم و ممتلكاتهم و التعامل مع المخطأين بآدميه و هعاقب اللي يثبت انه أهان حد أو عذّب حد أو استعمل سلطته عقاب عظيم و هكرّم المحترمين الشرفاء منهم بصفه دوريه و هعين في الأقسام و المرور و السجون مراقبين يرصدوا الرشاوي و طريقة التعامل و الشكاوي عشان يبقى في جهة رقابيه عليهم و هلغي كلمة (باشا).


وزارة البترول:
هلغي الواسطه و هيبقى التعيين بالكفاءه و المرتبات الوهميه و الحوافز الخياليه هلغيهم عشان يبقى في مساواه لو البترول بيجيب فلوس يبقى بدل ما تتفرق على العاملين الأفضل تتصرف في أوجه مفيده و الخريجين الجداد هوفرلهم فرص كريمه و طبعاً مش هصدر غاز لجهات معاديه.


وزارة الطيران المدني:
هرخص أسعار الرحلات الداخليه عشان أشجع الناس يشوفوا بلدهم بسهوله من غير ارهاق و خطورة الطرق الطويله و كمان ههتم بصيانة الطائرات بشكل مكثف و أجاري أحدث تكنولوجيا ممكنه و نقطه صغيره...هسمح للمحجبات بالعمل كمضيفات خلاص هسهس الحجاب اللي عند الحكومه ده لازم يتلغي.


وزارة الدوله لشئون البيئه:
هي فعلاً بقت بيئه خالص:)...هحفز عمال النظافه و أهتم بيهم من حيث المرتبات و القيمه الذاتيه عشان يعملوا شغلهم بحب و لو شفت منظر كومة زباله هشيل أكبر مسؤل و أخصم على الكل , هخضر كل شبر في أرض مصر الجميله و طبعا هعمل غرامات لكل متسبب في تلوث سواء سمعي أو بصري...و بردو هعين جهة رقابيه تراقب عليهم.


وزارة الشباب:
ههتم بالرياضه بشكل أكبر و هعمل نوادي مجهزه في كل قرية و مركز و حي عشان نشجع الناس على ممارسة الرياضه و هزود الصرف على كل الرياضات ماعدا كرة القدم...و هحاول متحيزش للنادي الأهلي و نادي الصيد.


وزارة التجارة و الصناعه:
ههتم بالتصنيع و تجديد المصانع بشكل مواكب للتكنولوجيا  و اقامة مصانع جديده و تصنيع كل شئ بشكل متقن و جذاب عشان أقدر أنافس المنتاجات الأسياويه و أصدر كمان و كل شئ هيبقى ماشي بخطه و بالاستعانه بخبراء مصريين و أجانب...مش عيب.


وزارة الزراعة:
أكيد هعاقب كل المسؤلين عن المبيدات المسرطنه و الري بالمجاري و هوفر أساليب جيده للري و الزراعه و يا ويله اللي هيبني على أرض زراعيه احنا بلد زراعي بالأساس و أرضنا كلها خير...و بردو هشجع الفلاحين و مستصلحي الأراضي.


وزارة التربيه و التعليم:
في رأيي دي أهم وزارة و عايزه شغل كتير أوي هقول اللي هفتكره...أولاً هلغي المناهج كلها و هستعين بخبرا يضعوا مناهج حديثه بطرق ممتعه و جذابه للطالب متحتجش كتب خارجيه...هأعطي المدرسين كورسات تعليميه باستمرار للنهوض بمستواهم الفكري و العلمي...مدرسات الانجليزي لازم يكونوا بيعرفوا يتكلموا بنطق صحيح, هزود مرتابتهم طبعاً عشان اللي يفكر يدي دروس خصوصيه يبقى يستاهل الرفد...هخلي الامتحانات توضع بطريقه تحث على استعراض التفكير و استعمال الخيال و اللمسات الشخصيه بجانب الثوابت مفيش الكررر بتاع الامتحانات و كده أكيد مش هيبقى فيه غش...هخلي المدارس نضيفه و ههتم بتعليم الدين بشكل أساسي مفيهوش تهريج...هرجع الطالب الميثالي عشان أنمي الأخلاق و أحفز الطلبه على انهم يكونوا مثال يحتذى به و بردو ههتم بالجانب الرياضي و الفني و أساعد الطلبه في صقل مواهبهم جنب التعليم...هلغي سنه سته.


وزارة الاتصالات و تكنولوجيا المعلومات:
هخلي الانترنت مجاني تماماً و أرخص المكالمات و قصاد كده ممكن أعمل اعلانات عن طريق الsmsأو رسائل الانترنت عشان أدعم الاتصالات اللي هي مهمه لدرجة انها ممكن تشيل رئيس دوله...و لو في حد تظلم مش هحاسبه الا لما أتأكد من مظلمته و هعمل كمبيوترات بالتقسيط المريح عشان بقت ضروره.


وزارة الاسكان:
مش محتاجه كلام مدن للشباب بأسعار رمزيه و مدن جديده عموماً باسعار مناسبه و بمرافق كامله في محاولة تخفيف الزحام في القاهره الكبرى.


وزارة النقل:
هعمل أتوبيسات و ميكروبسات للسيدات  فقط و همد المترو لكل الأحياء و افتح خطوط في المحافظات, و هجيب قطرات جديده بدل القطرات اللعبه اللي شغاله, و هعمل مخالفات ماليه كبيره لأي سائق بيخالف قوانين المرور ويمكن أسجنه.


وزارة التعليم العالي و البحث العلمي:
هخلي التعليم زي ما كتبت في وزارة التعليم اما البحث العلمي اللي بنبحث عنه من ساعتها و مش لاقينه هركز عليه و اعمله ميزانيه كافيه و اهتم بتجهيزاته و أوفر لكل صاحب فكر فرصه و مناخ للابداع و هخلي الدراسات العليه بمصاريف رمزيه للتشجيع, و يا حبذا لو يشرف عليه اساتذه بخبره عاليه و المحبطين المعقدين هرفدهم.


وزارة السياحه:
في الوقت الراهن هوجه دعوه للسياح اللي غادروا انهم يرجعوا مصر تاني و هقدملهم تذاكر طيران مجانيه او مخفضه على سبيل الدعايه عشان نرجع نروج للسياحه تاني و هركز في السياحه على الآثار الساحره سواء فرعونيه أو قبطيه أو اسلاميه هيبقى موضوع فكري و ثقافي أكتر منه ترفيهي و مش هسمح بأي مسخره!


وزارة العدل:
هخليها وزارة الحقوق للمحاميين اما القضاه فنعملهم مجلس اعلى للعدل عشان القضاء سلطه تشريعيه و قضائيه  مينفعش يكون في ايد سلطه تنفيذيه يعني مينفعش يبقى في حاجه فوق العدل و القضاء.


وزارة الصحه:
هبعت بعثه لمستشفيات في أمريكا و ألمانيا و انجلترا و اخليهم يرجعوا بكل التفاصيل و اعمل كوبي و بيست...هزود مرتبات الاطباء خاصة الخريجين الجدد اللي مبيبقاش ليهم دخل تاني...هعمل على تصنيع الأدويه في مصر و الانسولين و الادويه الحيويه و هنهض بادارات الجوده و هعمل دورات تدريبيه باستمرار للأطباء و الصيادله لرفع مستواهم ... هتأكد من كل قرارات العلاج على نفقة الدوله انها تروح للي يستاهل و ههتم جداً بالتأمين الصحي لكل أطياف الشعب بصورة لائقه و كافيه...العلاج هخليه زي الماء و الهواء.


وزارة الاعلام:
مش هسمح بانه يبقى اعلام النظام لازم يكون اعلام حر و محايد و مش مستفز و هنتج المسلسلات التاريخيه عشان أساعد على معرفة الناس بتاريخهم و هعمل برامج ثقافيه خفيفه للشباب بدل (لعبة الحياة) و البرامج التجاريه اللي زيه هعمل برامج لاكتشاف المواهب مش بس الغنى للكتابه و الشعر و الرسم و العزف و التصميم...الكوميديا بردو مهمه أوييي في التليفزيون عشان يبقى فيه بسمه وسط زحمة الحياة بس مش الكوميدينات المبتذلين طبعاً حاجات جديده بقى افتكاسات...نقطه مهمه بردو هخلي المحجبات يبقى ليهم مكان بين المذيعات لأن مجتمعنا مش غير محجبات بس لازم الاعلام يعبر عن كل الناس لأنه مش حكر على حاجه واحده خلاص سياسة (ماما سوزان) مش هتمشي.


أنا عارفه ان في وزارات تانيه كتييير بس خلاص تعبت و طولت عليكم أويييي يا رب اللي جاي يبقى أحسن و نتغير بجد كل واحد يشتغل على نفسه و يبلغ عن أي فساد يقابله حتى لو صغير...مش هنرجع سلبيين خلاص اتخلصنا من أي خوف و ده وقت البنى و النهوض مش عايزين أي سلبيه أو تكبير دماغ و تنفيض و الكلام ده...احنا في عهد جديد و الدنيا كلها بتتكلم عن انجازنا التاريخي مش هنضيع ده باستهتار أو مبالغه في تصفية الحسابات العقل مطلوب و الايجابيه كمان مطلوبه.
يا ريت البطل اللي هيقرى البوست يقولي ايه أكتر وزارة أنفع فيها؟


عشان أرشح نفسي طبعاً:)





















هناك 53 تعليقًا:

سواح في ملك اللــــــــــــــــــه- يقول...

لا انا كده هنتخبك رايس جمهورية
تحيتي اختي الفاضلة

reemaas يقول...

ههههههههههههههههه
طبعا الصحة يا شيرى

مصطفى سيف الدين يقول...

فكرتيني بمصنع الانسولين اللي عندنا في المنطقة الصناعية
جه احمد نظيف في 2005 حط حجر الاساس في حتة صحرا وكتب عليه احمد نظيف بيفتتح مصنع الانسولين ولحد دلوقت ولله الحمد الحجر لسه موجود بس مفيش ولا طوبة اتبن في المصنع
اوعى يكون هتعملي كده برضه
هههههههههههه
احييكي على افكارك بالنسبة للتربية والتعليم و الداخلية بالذات
بس مقلتيش هتلغي سنة ستة ليه؟
ماهو لغوها ورجعوها يبقى اكيد فشلت حكاية الالغاء دي

افكارك ممتازة يا دكتورة شيرين
واول صوت ليكي من عندي يلا اروح اكلملك المشير تمسكي الوزارة الانتقالية

Casper يقول...

فعلا افكار ممتازة واراء بناءة
خالص تقديري واحترامي

Casper

mrmr يقول...

برافو يا شرين
انا سعيده ان فى عقليه ذى كده بناءه ومعطاءه لو ينفع رئيسه جمهوريه بنت كنت انتخبتك على طوووول وعملتلك دعايه جامده موت تنجحى بالتذكيه بدون انتخابات
ههههههه

محب روفائيل يقول...

على فكرة أنا غيرت اسم المدونة ، خليتها محب روفائيل من غير ألقاب ، لآن من ساعة ما أتولدت والألقاب بتضايقنى ، ومش عارف ليه كتبت الكاتب قبل كده ، المهم كده أحسن .

المهم شكرا على خفيف الظل دى :)

أنا بحاول أبقى خفيف ظل على فكرة .

المهم الواجب محلول مية مية .

واضح انك بتحبى التاريخ والآثار .

يلا أنا بقول 0 من 10 ، لأ قصدى 10 من 10 طبعا .

تحياتى لحضرتك .

آخر أيام الخريف يقول...

فين بقية الوزارات ... أنا نزولا على رغبة الجماهير عملت تعديل عندى فى الوزارة بتاعتى :)))

ابراهيم رزق يقول...

المهم الاخلاص

Mona Hekal يقول...

سعادة رئيس وزراء مصر
هو فيه كده روحي يا بنتي رشحي نفسك و احنا هاننتخبك علي طووووووول و هانعملك علي الفيس حملة تأييد شيرين سامي
بجد اتفق معاك في كل افكارك يا ريت ده يكون الفكر اللي البلد تمشي بيه
بس مش كنت عينتي الوزرا كمان و متنسيش اصحابك بقي و لا اقولك دي كده كوسة انسي اصحابك

Unknown يقول...

سواح في ملك الله: ههههه لأ منفعش خالص
تحياتي أخي العزيز

Unknown يقول...

ريماس: و لو أني كنت عايزه أغير كاريري بس ماشي صحه صحه

Unknown يقول...

مصطفى سيف: عيب عليك يا مصطفى وزارة انتقاليه برده لأ أنا عايزه وزارة ثابته تقعدلها قد 30 سنه كده:)

و متقلقش على مصنع الانسولين هبني طوب و أسيبه كده أشيك من طوبه واحده,
سنه سته هلغيها عشان أنا من بتوع سنه خامسه و شايفه ان سته مالهاش لازمه سنه ضايعه و خلاص.

تحياتي ليك و شكراً لانتخابي

Unknown يقول...

كاسبر: شكراً يا كاسبر تحياتي ليك و نورتني

Unknown يقول...

مرمر: ده بس من ذوقك أنا مش بتاعة مسؤليه كبيره كده كفايه عليه رئاسة الوزرا:)
تحياتي ليك و نورتيني

Unknown يقول...

محب: هو محب لوحده أجمل و أدل فعلاً و بعدين الواجب بتاعك صعب أوي بجد بس شكراً على ال10 من 10 ده أقل واجب و لا ايه
تحياتي ليك و شكراً انك ادتني الفرصه أتخيل نفسي في الأماكن دي بجد

Unknown يقول...

آخر أيام الخريف: المدونه نورت يا نور بجد, بصراحه لقيت الوزارات كتييير أوي و زهقت قلت كفايه كده بس انت وزارتك تكسب :)

Unknown يقول...

ابرهيم رزق: طبعاً الاخلاص أهم شئ زيارة حضرتك شرف كبير أرجو متكنش الأخيره
تحياتي ليك

Unknown يقول...

منى أبو السعود: ميرسي يا منمنتي بجد دائماً بترفعي معنوياتي لأ أنا كفايه عليه البيت و المدونه.
و طبعاً مش هلاقي أصحاب أجمل منكم.
تحياتي لأجمل منى

هبة فاروق يقول...

ماشاء الله عليكى يا شيرى تسلم افكارك يا قمر
وياريت تبقى كل افكارك حقيقة علشان البلد دى محتاجة لفكر جديد
تحياتى لاجمل شيرى

رحاب صالح يقول...

صباحك ورد
وباقة ورد بنفسجي مهداة ليك
بجد كلام ولا اروع
حاولت اني اقرا التدوينة الصبح بس النت كان زفت الصراحة
المهم بجد تدوينة ما شاء الله عليك فيها بجد
تسلم ايديك
الاول قبل ما انسي بما ان اختي ...شيرين برضه علي فكرة اسمها يعني علي اسمك
مدرسة انجليزي فهخليها تقرا التدوينة وتقولك رأيها
لانها كانت لسة بتقولي علي حكاية النطق دي خصوصا اني ف الانجليزي مش حلوة خالص بس بحاول وهي بتحاول معايا...
كلامك كله كلنا بنفكر فيه وبجد يا ريته يتحقق...بتمني ده من كل قلبي
تحياتي ...وقبلاتي لاني حاسة اني يوم بعهد يوم بحبك وبحترمك وبتعلي في نظري اوووي

تخاريف مترجــِــمة يقول...

ما شاء الله يا شيرين هتظبطي البلد وهتشجعيني عن جد اعيش في مصر للابد
&ــ&

تسلمي يا حبي وربنا يولي الاصلح

eng_semsem يقول...

المنحه يا ريس
ياريت تحقيق الكلام سهل زي ان حد يقوله
وان شاء الله مصر للاحسن المشكله اللي كانت موجوده زمان ان كتير منهم كانوا بيدوروا على المصلحه الشخصيه مش اكتر
بس اللي جاي هيفكر اكتر في مصلحة الناس والشعب

Carmen يقول...

good job shery ;)
htb2y a7la ra'es wzara:x

الحسينى يقول...

العزيزة شيرين
سعيد أن أول تعليق ليا بعد الفترة اللى فاتت هو تعليق على تدوينة ليكى :)
وعلى فكرة بعد الكلام اللى قولتيه ده الشباب هيرجعوا التحرير تانى ينادوا باسقاط الوزارة ويعينوكى أنتى رئيسة للوزارة الجديدة ويمسكوكى بالمرة كل الوزارات التانية :)
إن شاء الله فى مصر الجديدة هيبقى فى وزراء يعملوا كل اللى قلتى عليه وأكتر
تقبلى تحياتى

Emtiaz Zourob يقول...

والله على الكلام اللي قولتيه وكتبتيه تستحقي بجدارة لقب رئيسة الجمهورية ، ربنا يحفظكم ويحفظ حبيبة الكل مصر .

MTMA89 يقول...

يا شعبي الحبيب الصبور المهاود...تكلم فأنت في قلبي

أول مرة اكتب كومنت في المدونة ابديت اعجابي بالجملة دي جدا

و نصيحتي ليكي لو بقيتي رئيسة الوزراء انك تلتزمي بالجلمة دي طول ما التاج على راسك :)

عن نفسي ارشحك لمنصب وزارة التربية و التعليم..خطة رائعة جدا

بالنسبة لوزارة الصحة..ياريت تهتمي بينا احنا - شباب الأطباء :( - .. هو أي نعم ان انا لسه مشروع دكتور ..
و بلاش تقفي في الصيادلة .. ده حتى احنا دراستنا اطول :(

و ربنا يكتب الخير لمصر

تحياتي

محمد
:)

المصوراتي يقول...

لا الله ينور
جميل ان يكون المصري نفسه يشوف بلده بالشكل دا

بس حضرتك محطتيتش اي حلول لاي مشاكل ملموسه

فقط انا حخلي انا ححط انا حودي انا حعمل بعثات

انا حعمل صناعات

بس انا مازالت علي رأي لا اقبل برئيسة لبلادي

هديل يقول...

أحلى حاجة موضوع التاج هههههههه
ربنا يديكي من اوسع ابوابه يارب :)

إنسان || Human يقول...

طبعا اكتر وزارة ممكن تكون عندك خبرة فيها
ودي هاتكون سبق تاريخي ان صيدلانية تمسك وزارة الصحة ...وترجعي للصيدليات مجدها
هههههه
والا أقولك انتي ممكن تعملي وزارة جديدة وزارة خاصة بالأدوية والمستحضرات الطبية
ونعمل ثورة دوائية في البلد بحيث ان احنا
نكون رواد في المجال ده ...وفلتري شركات الدوا وتلمي الشباب الغلابة اللي عمالين يلفوا كعب داير على الدكاترة بمكملات غذائية وتخليهم يشتغلوا أبحاث
علمية لتطوير العلاج
وتفلتري شركات الأدوية ...وتشمعي اللي تحت السلم
......
أي خدمة

Unknown يقول...

هبه فاروق: شكراً يا جميل دائماً كده بتكسفيني بذوقك

Unknown يقول...

رحاب صالح: مرسي على الورد أنا بحب الورد البنفسجي أوي له دلاله على الذوق العالي...أنا كمان رغم اني طول عمري مدارس انجليزي و IG و بتاع بس عندي مشكله في النطق:( خصوصاً ان الكليه بتنسي الواحد اسمه.
انت اللي تعليقك رائع و بستناه دائماً يشرفني اني أكون على اسم أختك و أنا كمان كل يوم بحبك أكتر و بحترم شخصيتك المختلفه دي أوي
تحياتي و قبلاتي لأجمل رحاب

Unknown يقول...

تخاريف مترجمه: تسلميلي يا قمر و ربنا يولي الصالح فعلاً ده اللي بتمناه

Unknown يقول...

أسامه: طبعاً منحه أمال إيه ههههه
ربنا يستر على اللي جي بس أنا متفآله خير ان شاء الله و أكيد هنتعلم من أخطاء الماضي
تحياتي ليك

Unknown يقول...

الحسيني: حمد لله على سلامتك أنا اطمنت عليك من الفيس
شكراً على ثقتك في وزارتي و طبعاً هتبقى معايا فيها عشان تتدبس انت كمان
سعيده بزيارتك و تعليقك نورت المدونه

شهر زاد يقول...

فراشة التدوين
اسفة على التأخير
دنت تنفعي قوي وقوي كمان
بس حابه اقول لك خليك معنا بلاش تغوصي في بحر الي يروح ما يجيش
انت فراشتنا الي بتفرح قلوبنا
تحياتي

أحمد الصعيدي يقول...

دوما كانت تتابع كتاباتي


وبعدها


لا أعلم

لكني اعتقد أنها موجودة


أسعدك الله

Unknown يقول...

السلام عليكم

أحييك أختي شيرين على كثير من اقتراحاتك القيمة بالفعل..

لكن لا ننسى ضرورة التنسيق بين الوزارات حتى لا يحدث تعارض في المهام..
كذلك بالنسبة لتعيين المحجبات يجب ألا يكون لمجرد دمج المحجبات (أو عنادا مع النظام القديم) بل بالكفاءة الفنية التي تؤدي أفضل نتيجة دون تفريق بالسن أو الجنس أو مدى الالتزام الديني أو حتى الديانة...

تحياتي أختي الكريمة.

شمس النهار يقول...

لا لا لا
انا عايزة ابقي وزيرة البيئه والنظافه

ونبيييييييييي
:))))

Ms Venus يقول...

كده انتى تبقى رئيسة للجمهورية وبامتياز هههههههههه


وردة لعيونك يا احلى شيرين

Tinker Bell يقول...

ياريتك تبقى رئيسة وزراء
وياريت تنورينى فى مدونتى العلمية
http:tinkerbell4science.blogspot.com

ثـــوره الــغضب يقول...

طيب ما ممكن نعينك على راس اللجنه المعينه وتشكلى الوزاره

انتى عقليه فزه

كلامك جمييييييييل

Unknown يقول...

وجع البنفسج: شكراً يا جميله ده من ذوقك نورتيني

Unknown يقول...

MTMA89: طبعاً لازم أتحيز للصيادله:)
بس متزعلش ما أنا قلت بردو اني هزود مرتبات الدكاتره حديثي التخرج أنا عارفه انها ملاليم ومتساويش جهد الدراسه أو الشغل
شكراً يا محمد على تعليقك و ربنا ان شاء الله هيصلح الحال

Unknown يقول...

المصوراتي: حلول ملموسه أممممم أنت صدقت اني رئيسة وزراء و لا ايه الواجب ده عشان ننتقد الحجات اللي مضيقانه بس لكن خطة طريق بقى و كده مش أنا خالص :)
نورتني و متخافش لو جتلي الرئاسه هرفضها:)

Unknown يقول...

هديل: شكراً يا جميل ربنا يخليكي
نورتيني يا جميل

Unknown يقول...

Hu-man: طب ايه رأيك اني برشحك انت للوزارة دي ده انت عندك أفكار هايله بجد عجبتني جداً فعلاً كل فكره كتبتها مفيده و بناءه جداً بحييك عليها.
شكراً يا مجمد تعليقك أكيد أثرى البوست تحياتي ليك

Unknown يقول...

شهرزاد: أشكرك على تعليقك الجميل و لا تخافي لازلت أهوى التحليق في عالم الأدب و قليل من الساسه لا يضر
تحياتي الخالصه لكي

Unknown يقول...

أحمد الصعيدي: ربنا يسعدنا و اياك أعتذر منك مره أخرى على تقصيري و بالتأكيد زيارتك نورت المدونه
تحياتي لك

Unknown يقول...

ماجد القاضي: و عليكم السلام و رحمة الله و بركاته التنسيق بالفعل مهم جداً أعذرني لازلت رئيسة وزراء جديده:)
أستاذ ماجد هل عندك شك أن ليس كل المذيعات بالتليفزيون المصري ذوات كفاءه عاليه و هل عندك شك أن هناك الكثير من المحجبات ذوات كفاءه و ثقافه عاليه ان نسبة المحجبات في مصر عاليه بالتأكيد فلماذا لا نجد من تعبر عن هذه النسبه مع التزامنا بالمعايير المطلوب توفرها أم أنك توافق المقوله المستفزه (الحجاب هو حجاب للعقل!) أظن لا
تحياتي الخالصه لك و يسعدني دائماً تعليقك

Unknown يقول...

شمس النهار: يا ريت دي وزارة البيئه تتشرف طبعاً ههههه
نورتيني يا شمس المدونات

Unknown يقول...

فينوس الجميله: ده من ذوقك يا أجمل ورده بين المدونات

Unknown يقول...

Tinker Bell: شكراً يا عزيزتي بالطبع سأزور مدونتك
نورتيني

Unknown يقول...

أدم المصري: شكراً يا أدم دي شهادة تقدير أعتز بيها جداً و أكيد تعليقك أسعدني
تحياتي الخالصه لك