الخميس، 10 فبراير 2011

طلقنا يا ريس

دي نوتس كتبتها على الفيس بوك الأسبوع اللي فات و قلت أكتبها تاني هنا عشان البلوجريه

أجنده و لا كنتاكي و لا اخوان


مبدأياً أنا رميت أي أجنده عندي و أي حد معاه أجنده يرميها هو كمان عشان بيتمسكوا دلوقتي, و كمان لو بتاكل كنتاكي لو سمحت متقربش من ميدان التحرير و لا تروح تاخد تور هناك و تتفرج عشان هيفتكروك أحد أفراد الثوره ثورة ( الكنتاكي الكنتاكي ينخلي عيشتكوا بلاكي), خاليك قاعد بترنج التوحيد و النور و انت قاعده ببجامة معرض العروسين و اتفرجوا على القناة التانيه و هي بتجيب الناس تصوت من البلطجيه و تترحم على أيام الاستقرار و المتظاهرين يتكلموا يقولوا (اخوان اخوان اخوان) بعدين تجيب المؤيدين اللي بالملايين و معندهومش حصنه و لا جمال و بعدين يزيعوا اختارناك, و قناة المحور عشان تعرف حقيقة المتظاهريين اللي بيتدربوا في أمريكا و بيقبضوا بالدولار و اليورو عشان يخونوا بلادهم و يطالبوا بحُريه موجوده و فرص للعمل و الحياه النظيفه متوفره و ديموكراتيه على أفى مين يشيل.

عيب عيب أوي لما ناس سابت بيوتها و عايشه على الرصيف انضربوا و شافوا الموت بعنيهم و زمايلهم اللي اتقتلوا و كل ده عشان اتخلصوا من الخوف و السلبيه اللي كانت جوانا و كسروا كل الحواجز النفسيه و القهريه عشان يجيبولنا حياه أفضل و مصر أجمل و أكثر تحضراً من غير نهب لمواردها و واسطه و ذل و تعذيب في ناس أبرياء و اعتقال من غير سبب و تأخر في كل المجالات.....نيجي احنا نشرب الشاي و احنا تحت البطانيه و نضيق عنينا كده و نقول دول أكيد بيعملوا لحساب أجندات أجنبيه.....ايرانيه, اسرائيليه, أمريكانيه, اخوانجيه.

و كأن كتير علينا كمصريين اننا نفكر و يفيض بينا و نثور كتير علينا اننا نعتمد على قوتنا و حماسنا و نبقى عايزين نتغير بجد و مش عارفين نبرر جرأة غيرنا غير بأنهم عملاء و بياكلوا كنتاكي....عيب, و الاخوان بيلعبوا دور أبو لهب الشر المطلق اللي بيسيطر على العقول البريئه و يسخرهم لخدمة أغراضه الدنيئه....أولاً مش مفروض نرهب الناس من الاسلاميين كده ثانياً لو خالد النبوي و منى زكي و خالد يوسف و نوال السعداوي و الولاد اللي بيلعبوا أغاني جاز و البنات المش محجبات اخوان يبقى احنا أكيد مختلين عقلياً زي اللي بيعملوا كل الجرائم اللي الشرطه مبتعرفش تمسك فيها حد.

ثورتنا على الظلم التاريخ هيكتبها بدم الشهداء و فرحة العقلاء و خوف الجبناء و احنا لو معرفناش نشارك فيها على الأقل منحبطهاش و ننسبها لأي حد الا اللي عملها, و مش معقول نوقف ثوره عشان ننزل الشغل و نشتري من السوبرماركت القريب و نحط بنزين من أقرب محطه دي أسباب هبله أوي , و بعدين فين الأمان ده ماهو كل يوم حادثه مروعه بتحصل اما جريمه فرديه أو عمل ارهابي ده غير حوادث الطرق و الفقر اللي علم الناس الرشوى و السرقه و النصب, الاستقرار في الوحل أحسن و لا الاستقرار الطويل المدى و مستقبل أفضل ان شاء الله ايه فرحتنا لما منضطرش نسافر و نسيبها فرحتنا لما نحقق فيها كل اللي بنحلم بيه لينا و لولادنا , الحكايه أيام نستحمل فيها شويه و نيجي على نفسنا....مصر أمانة في ادينا و عايزين نحافظ عليها بأننا نرفع راسها و نتشرف بيها و هي متقدمه و خيرها لأهلها مش منهوبه و مذلوله.....مصر أبقى من أي ظروف و المصريين أقوى و هما متفقين.


**********
أن تفهم

أفهم لما تطلع ممثله خليعه أو مغني سيس يقول (احنا عايشين في حمايتك يا ريس)

أفهم لما أبو محمود البواب يقول (العيال بتوع التحرير دول أذى)

أفهم لما تنت شفيقه تقول من على الشلته ( ثورة الندامه و شهداء الغباء)

أفهم لما مذيعه في المحور تشم بصلتين و تطلع تستقبل تليفونات بتولول و تقول( بابا مبارك)

أفهم لما عم محمد اللي بيقبض 600 جنيه يقول (ماحنا عايشين كويسين و الحمد لله)

أفهم لما لعيب كوره دخله بعشرات الآلاف يقول ( و ماله الريس شفنا معاه أجمل أيام)

أفهم لما الناس بقت عايزه تروح الشغل و تقبض القرشين و تصرفهم في يومين و تربي العيال و تجوزهم و تموت

أفهم اننا بقينا في طريقنا لالغاء العقل و الرضوخ للحياه الروتينيه

أفهم اننا نسينا اننا لينا حقوق كتير مسلوبه أهمها حق الاختيار

أفهم انك لو فضلت تفكر في نفسك هتفضل صغير و بلدك هتضيق عليك أكتر

أفهم انك لازم تكون ايجابي و متسيبش حد يضللك

أفهم انك متضيعش دم و جهد ناس بتدافع عن حقك و حق ولادك من غير مقابل

أفهم انك لازم ترجّع وطنك و تفتخر بيه متضحيش بيه في مزبلة التاريخ عشان أنانيتك و عدم تقديرك

أفهم انك لازم تفهم
*******

طلقنا يا ريس


لماذا لا يريد أن يتنحى الرئيس و هل التنحي إهانه أكثر من حكم شعب بالغصب, لماذا لا يتركنا في الفوضى التي يخشاها حتى نُفطم و نتعلم النظام, و ماذا لو كان مات مثلاً هل كنا سنستبقيه في الحكم حتى يتعدل الدستور و تتغير القوانين, كيف يقوى على قيادة شعب لا يريده و لم يعد يصفق و يدعو له بطول العمر, شعباً حطم جدار الخوف و السلبيه و جاب البلاد طولاً و عرضاً يطلب حريته في اختيار قائده, شعباً رفض الظلم و الفساد و الانسياق و التخلف بعد أن كان يتنفسه في كل مكان و اعتاد وجوده كأنه من المعالم الطبيعيه التي لا تتغير, شعباً تغلب على تسليمه بأننا لا نتغير و لا يحكمنا سوى سطوة المال و النفوذ و بدأ يعي احتياجاته و دوره في بناء وطنه و النهوض به للأفضل.



هل يظن الرئيس أن بقاءه حتى انتهاء مدته سيعطيه الفرصه لتصليح فساد استمر 30 عاماً أم أنه يظن أن التاريخ لن يذكر ثورة شعبه على نظامه المستبد و المتسبب لتأخر البلد عشرات السنين و هي التي كانت رائده, يكفي ما رآه الشباب في عام 2010 من ذل (الشاب المصري الذي قتل في لبنان) و قهر (السجون المليئه بأعداء النظام) و فقر (الشباب الذين يغرقوا أثناء هربهم من البلد) و بداية من 2011 عدم أمان (حادثة كنيسة القديسين).


الشعب لا يطالب برحيله من الحياه لا سمح الله فقط يطالب برحيله عن الكرسي الذي أصبح لا يناسبه خاصة و قد بدأت تتكشف لنا كل يوم مظاهر الفساد اللولبي الذي كنا نعيش فيه مغمضين العين مستسلمين ببلاهه و لم يكفي سيادته كان يطالبنا بالرضا و الشكر, على بلدنا المنهوبة الموارد و أقراننا الذين يعيشون في المجاري و دون أدنى متطلبات الحياه الآدميه...و هو و حكومته لا حياة لمن تنادي الآن يريد أن يخمد ثورتنا الغاليه و يثبط من عزيمتنا على التغيير بزعم قوانين و داساتير واهيه فُصلت على مقاسات معينه.


الرحيل ليس اهانه الاهانه هي أن يضطر الناس لخلع أقنعة الاحترام و النفاق و التمادي في الاهانات اللفظيه و الشعارات المسيئه التي ظهرت نتيجة ضغوط أعوام لماذا لا يجنب نفسه هذا الحرج و ينوء بنفسه العظيمه عن هذا العبث لأني لازلت أحترمه أريده أن يرحل بكرامه و عزه و كفاه دماء أراقت من أجل حفاظه على الكرسي....هل هو العند أم أنه الطابع الرجولي الشهير بأن يعيش الزوج مع زوجه تكرهه و تطلب منه الطلاق يومياً و هو يرفض فقط لأنه يريد أن يأتي برغبته لا رغبتها نسي أنه أصبح هناك قانون خلع لن نتنازل فيه عن حقوقنا....لسنا زوجتك يا سيادة الرئيس و لا أبناءك الا اذا كنت تنوي أن تشركنا في أن نرث ال73 مليار دولار, نحن أحراراً رضينا بك و لم ترضى أنت علينا...فلم نعد نرضى.


لماذا لا ترحل و تتركنا نداوي جراحنا و تعطي مصر فرصه لتتعافى.






هناك 15 تعليقًا:

Casper يقول...

الفكرة أختي في الله تكمن في أنه لابد من حدوث انتقال سلمي للسلطة وأيضا حتى تحدث المطالب التى طالبنا بها لأن الرئيس هو الوحيد القادر على الدعوة إلى تغييرها حسب ما فهمت من كبار رجال السياسة

لو رحل الآن حسب كلامك سيأتي رئيس جديد على وفقاً لمواد الدستور القديمة !

مهما حدث من فساد وتخريب في عمر هذا النظام وأنا هنا لا أقصد الرئيس مبارك بل النظام ككل فلابد من خروج مشرف لهذا الرجل ولا داعي أن نؤمر المخ بأن يتجاهل ولو شئ واحد طيب لهذا الرجل

المطالب تُنفذ وما هي إلا بضعة أشهر وقد أعلن الرئيس بنفسه أنه لن يترشح مرة أخرى لفترة رئاسية جديدة

لا داعي أن يأخذنا عنفوان الشباب إلى ما لا يحمد عُقباه فلننتظر حتى شهر سبتمبر ونسعى جاهدين أن نحافظ على استقرار بلدنا فمصر أغلى بكثير من كل كلمة قبيحة تردد على لسان الأجانب في تصريحاتهم وقنواتهم

Tears يقول...

تسلمى

تسلمى و يسلم قلمك و عقلك و وعيك

الناس مش فاهمه ان الدستور بيقول فى حالة غياب الرئيس بالاستقالة او التنحى او الموت و فى حالة حل مجلس الشعب تنتقل السلطة لرئيس المحكمة الدستورية العليا بشكل مؤقت و يعدل الدستور باستفتاء الشعب مباشرة لانه مصدر السلطات يعنى مش عايزن مبارك فى اى حاجة و لما السادات مات و قبله عبد الناصر لم تحدث فوضى

شمس النهار يقول...

تصفييييييييييق حااااااااااد

Unknown يقول...

كاسبر حمد لله على سلامتك نورت البلوجر
عزيزي تابع الأستاذ حسنين هيكل و فهمي هويدي و غيرهم من رجال السياسه المحترمين الغير منتفعين ستفهم أنها حجج واهيه لأخذ فتره لتزييف الحقائق.

كاسبر الثورات تأتي لتطيح بنظام فاسد لا لتحاول اصلاحه خاصة و أنه أصبح هناك دماء كثيره شاهده على الفساد و العطب التام للنظام.

الأجانب جزء من العالم و طبيعي أن يدلوا بأراءهم و طبيعي أن تنفذ رغبة الشعب الثائر الغائر على وطنه المنهوب ثم أننا لا تريد خروج مهين له و هل تنحي جمال عبد الناصر أهانه؟
نريده أن يحترم رغبتنا و يبعد بكرامته و ملياراته.
تحياتي لك و الختلاف لا يفسد للود قضيه

Unknown يقول...

TEARS: تسلميلي يا تيرز بصي أنا مكانش ليه في السياسه أوي بس الأحداث دي تخلي الواحد يتنفس سياسه
نورتيني بزيارتك و تعليقك

Unknown يقول...

شمس النهار: شكراً شكراً ده كتير عليه و الله:)

Casper يقول...

الله يسلمك
بلوجر منورة بكتاباتك المتميزة

________

الأجانب جزء من العالم لكنهم في حقيقة الأمر لا يدلون بأرائهم بل يتدخلون في شئون مصر الداخلية وتصريحاتهم واضحة جدا
________

بالتأكيد الخلاف في الرأي لا يفسد للود قضية

________

اتفقنا او اختلفنا في الرأي
فالهدف واحد والغاية واحدة
وهي استقرار هذا الوطن
وعودة الأمان والكرامة لكل مواطن مصري

_________

خالص تقديري لفكرك وقلمك
تقبلي مروري

Casper

esraa يقول...

بجد أنا بحترمك جدااااااا
جزاكى الله خير الجزاء
أنا مش هتناقش فى أى حاجة من اللى انتى قلتيه لأن كل اللى قولتيه حقائق لا تقبل النقاش
اللى مودينا فى داهية اننا بنفكر فى نفسنا و عايزين الاستقرار فى الوحل مش الاستقرار على المدى الطويل....
تحياتى

الموسوعة الحرة يقول...

تحية طيبة...
تمنياتنا جميعا بالنصر للثورة المصرية الخالدة...
سررت بزيارة المدونة ...
خالص تقديري...

FAW يقول...

أحسنتي جدا والله وقلتي كل اللي عايز أقوله
النهاردة الصبح إتجننت علي واحد علشان أقنعه
أنا بجد مبكرهش في حياتي قد البني آدم اللي بيتنازل عن حقه وعايز يعيش وخلاص , ناكل و نشرب وننام ونربي العيال , وبعدين نموت , إيه ده !!
بس هنقول إيه , 30 سنة يعملوا في الناس أكتر من كده , منه لله . .

مصطفى سيف الدين يقول...

الله عليكي يا شيرين
بصراحة مش سايبالنا اي حاجة نقولها
هو مش عايز يطلقنا ومش عايز يسيب البلد غير لما يظبط دفاتره علشان محدش يحاكمه وكمان علشان يكمل ثروة عيلته 100 مليار دولار
بس بيقولو دلوقت ان الجيش في اجتماع دائم واحتمال حسني يتنحى النهاردة ويسلم البلد للجيش
الخوف بقى انهم يحولوا ثورتنا لانقلاب عسكري
وقتها هيصيبني عن نفسي احباط
تحياتي وتقديري واشكرك على كلماتك الجامعة المانعة

Unknown يقول...

السلام عليكم

أحييك أختي شيرين على هذه التجميعة الجميلة.. والكلمات الطيبة..

واحب ابشرك إن الأكلام كله دلوقتي أن الطلاق اقترب بشدة... والبشريات قادمة بقوة إن شاء الله...

وكل التحليلات أن الجيش هيلحق الموضوع قبل الجمعة..... وربنا ما يخلف ظننا...

دمتِ سالمة أختي الكريمة.

Emtiaz Zourob يقول...

هو صحيح ابغض الحلال عند الله الطلاق ،، بس بتهيألي انه النوع هذا حلال مئة بالمئة .. ربنا معاكم يارب ويعدي الايام على خير .

Carmen يقول...

أنا بأيد كاسبر في رأيه
لازم تحصل التعديلات والامن العام يستقر الاول بعدين نطالب برحيله

ذو النون المصري يقول...

خلاص خلاص خلاص
الله اكبر الله اكبر
الرئيس تنحي خلاص
الرئيس تنحي خلاص
مبروك للكل
و يارب تبقي الايام الجاية احسن
مبروك مبروك