الأحد، 9 ديسمبر 2012

لأني أشبهني

خطاريف شيرين

عارف...بحب الكلام لما يبدأ بكلمة عارفـ هـ  بحس إن هيتقال بعد الكلمه دي حاجات تزغزغ القلب


عارف إني بستناك من و أنا صغيره


طب عارف إني نفسي أسافر معاك بعيييييد
و أكيد عارف إني نفسي أتعلق في دراعك
و نسهر و نفضل نرقص طول الليل
و ميبقاش في إختراع إسمه موبايل و لا حاجه إسمها وقت
***

سأعيش مَعَّك حتى التوهج ,

لآ حتى الإحتراق 


لـ غاده السمان
***


إنه شيء غير إنساني أن تمتلك روحاً تهفو إلى لمسة من الحب و لا تجد من يأبه بها ..
..
لـ محمد المنسى قنديل
***

في عشق بيستنانا و عشق بنستناه..و عشق بينسينا العشق اللي عشقناه
***

سعيْدةٌ لأننَا نتحرَك فِي مَجرة واحِدَة ..
ولأننِي مررَت يومَاً بمَدارِك ولم أرتِطم بكوكبِك .. وأحْتِرق ..
سَعيْدةُ لِمُجرد أنَك مَوجُود
ويَكفينِي أننِي عَرفتُك .. وأحَببتُك ♥

غادة السمان
***

أشعر أنني أريد أن أقول لك فقط:
( أحبك )
.. ومن ثم أبكي ،
أبكي ؛ لأنها تعبر عن الكثير
ولأنها تختصر الكثير
...
لـِ جبران خليل جبران

***


لم نفترق..لكننا لن نلتقي أبداً,,
..
لـ محمود درويش

***


إنني أريد أن آخذ حقي من الحياة عنوة.أريد أن أعطي بسخاء، أريد أن يفيض الحب من قلبي فينبع ويثمر.ثمة آفاق كثيرة لابد أن تزار، ثمة ثمار يجب أن تقطف، كتب كثيرة تقرأ، وصفحات بيضاء في سجل العمر، سأكتب فيها جملاً واضحة بخط جريء


لـ الطيب صالح

*************

خبايا شيرينيه

بتغاظ أوي
أيوه بتغاظ لما بطلع جنبك سلم طويل و ماتمسكش إيدي..متفرحش أوي بنفسك...مش عارف إني لما بطلع سلم بكعب عالي بخاف أقع؟
بتغاظ كمان لما تناديني قدام الناس بإسمك..و مبردش بعمل نفسي مسمعتش...ما هو لو مش هتقولي يا حبيبتي يبقى على الأقل إندهني بإسمي..مش عارف إن إسمي بيبقى أجمل لما بتقوله..

عندما تبدأ هي في التهرب مني..و تبدأ صداقتنا في الخفوت..أعرف أن هناك رجل ستبدأ الدوران في مجرته..
 
أتذكر ذلك اليوم عندما غضبنا و غادرت و تركتني معهم..عندما عدت في ساعة متأخره..و لم يكن معك مفتاح..فتحت لك الباب لأنهم كانوا نيام..و أنا كنت دائماً..أنتظرك..

مبحبش أدوّن أو أكتب ستيتس ديني..بحس إنها حاجه بيني و بين ربنا..و مع ذلك أجد من تتهمني بأني بدّعي التدين!

و كل مره بيعمل فيها رقيق أكتر بكرهه أكتر..مش عارف إن المرأة مخلوق يحتاج لأيادي خشنه تعامله برقّه.

قالت لي بلهجتها الناصحه المعاتبه : عيب تسيبي خطيبك يمسك إيدك.., شعرت بالخجل الشديد و لم أناقشها فهي لن تفهم شعوري أو شعورنا, عندما خُطِبت هي, جاءت لي مره باكيه شاكيه تقول : تخيلي 3 شهور مخطوبين مفكرش يمسك إيدي!

عايزها شاطره زي مامته و جميله زي فلانه و مثقفه زي علانه و ناجحه زي ترتانه و يا ريت لو موّزه زي سهتانه...طب و حضرتك مش عايز تبقى شبه حد؟

قالوا لي أنها تحسدني..تقول أني شعله لا تنطفئ و طموح لا يهدأ و شباب لا يغيب و أن لي ألف حلم و حلم, عندما زرتها في بيتها وجدتها ممتلئة الجسم مرتاحه, ثابته الخطوه, هادئة الوجه, تجلس وسط بيتها كأنها ملكه على عرش, هي ليست خائفه و لا متوتره, هي موقنه بأنها سيدة البيت و صاحبة الكلمة, البيت مرتب و دافئ برائحة الكعك المنزلي, الأطفال منسجمون في سينفونية متناغمه من التفاهم, في يدها قطعة تريكو كأنها الدنيا, في قلبها رجل و طفلان و في عقلها لاشئ سوى كيف تسعد الرجل والطفلان..
حسدتها..كثيراً.

****************

شوفت هؤلاء :)


قابلت نور الشريف..كنت بتمرن في صيدليه في الدقي و دخل يشتري دوا و لقيتني متنحه قدامه, شكله كان فيه نضاره و نظرته كلها حماس رغم شعره الأبيض, عمره ما كان فنان مُفضّل بالنسبه لي بس بعد ما شوفته بدأت أعيد حساباتي معاه :)

قابلت دنيا سمير غانم..كانت زميلة أخويا الصغير في المدرسه , و كانت قبل الظهور الإعلامي و السنفره..شخصيه خجوله و منطويه جداً..

قابلت الفنان نبيل الحلفاوي..نشأت صداقه بينه و بين والدي لأن إبنه كان بيتمرن كره قدم مع أخويا..و كان شخصيه مرحه, مدخن شره, أب جميل و إنسان طيب فعلاً...متواضع لأقصى حد...و في نفس التمرين كان إبن عصام شرف رئيس الوزراء الأسبق (وقتها كان أستاذ في الجامعه) و كان دمث الأخلاق..أحياناً كان بيوصل أخويا للبيت لأنه كان جارنا في نفس الشارع.

قابلت فنانين و لعيبة كرة قدم كتييير في نادي الصيد..و قابلت أكتر لما كنت بشتغل من فتره طويله في صيدلية في الزمالك, سمير صبري كان دائم المرور أمام الصيدليه بيمشي على رجليه مش بعربيه, حنان ترك, جميل راتب, عزت أبو عوف, عمر الحريري, كل دول كانوا زبايني..و مره مذيع إسمه طارق حبيب كان بيشتري مني و بعدين شكيت إنه معروف بس مش فاكره إسمه..فسألته "مش حضرتك....؟" قالي "أيوه أنا....." و كان لطيف الحقيقه فضل يتكلم معايا شوية مش فاكره قال إيه بس ساب إنطباع لطيف.

شوفت حمدي غيث مره و كنت طالبه في الكليه..كان بيعاكسني في الشارع...آه و الله ضحكت بعدها ضحك السنين :)

****************

دي كانت محاولات عابثه لتقليد بعض المدونين المعروفين..لكن عذراً واضح إني مش عارفه أكون غير شبهي.



هناك 30 تعليقًا:

مصطفى سيف الدين يقول...

ههههههههه
حمدي غيث كان بيعاكسك
كنت قلتيله عيب عليك يا جدو و لا كنتي قلتيله (اكتلني يا سليم )

بصراحة البوست روعة كلماتك و اختياراتك في منتهى الابداع حتى خباياكِ الشيرينية

candy يقول...

عجبتنى :)

بس طبعاً أنتى مش محتاجة تبقى زى حد ، كل واحد لذيذ وهو طعمُه .. مش طعم اللى معاه فى سلة التدوين ..

ما أشهاها سلة ;)

شيرين سامي يقول...

مصطفى سيف الدين

هههههههههههههه
تخيل يا مصطفى كنت همووت من الضحك :)
أشكرك يا صديقي العزيز و سعيده إنه عجبك :)

شيرين سامي يقول...

candy:

:)
مش عارفه يا كارول كنت عايزه أقلدهم ;)
أهو غلاسه كده :)
بس في ناس صعبة التقليد زي حضرتك و زي الأخ اللي علق أول واحد ده..صعب أوي..بس على مين..هكتب في يوم عن الضوء الأخضر و دوامات الفينو الحاف :)
فعلاً سله شهيه و غنيه

نورتيني يا جميل

ياسمين يقول...

عارفة ياشيرين بجد بحس بدفء حروفك !♥
بالتوفيق ليك في حياتك كلها
أنا شفت 3 ممثلين بحالهم ههههه
لا 4 تقريبا,اثنين منهم مشاهرين واثنين مش اووي ,
بس بردو الانبهار كان عامل عمايله معايا
دلوقتي عادي خالص ,
لما بشوفه عادي لكن لما بشوف الانبهار ف عيون ناس بضحك مش عارفة بحس اني عايزة اضحك ,يمكن لان الانبهار مع الوقت بيفتر ,ولما بتشوف حد زيك في وقت كنت فيه بتحسي انك اتديتي حاجات اكبر من حجمها

شيرين سامي يقول...

ياسمين:
:) أشكرك بجد أسعدتيني بكلامك
هما مبيبهروش..لكن بتحسي إنك عايزه تشوفي هما صحيح شبه الصوره اللي إحنا واخدينها..و غالباً بيكونوا مختلفين.

نورتيني يا جميل

موناليزا يقول...

عجبنى جداً
ومبتسمة لغاية دلؤتى ^_^

مروه زهران يقول...


روووعة يا شيرين
كلماتك واختيارتك جميلة أوى

لـــولا وزهـــراء يقول...

روووووووووعة جداً وخاصاً مقولة محمود درويش
لم نفترق لكننا لن نلتقي ابداً


لولا

Aya Mohamed يقول...

بوست جميل جداااا
وانتى مش محتاجة تكونى شبه حد
يمكن الموضوعات المميزة لعدد من المدونين بتثير داخل اى حد فينا
فكرة انى عايزة اقول انا كمان زيهم كدا :)))
انا بحس كدا اوقات
جميلة انتِ فى كل حالاتك <3

افكار مبعثرة يقول...

حلو اوي بجد :)
حتى لو حاولتي تقلدي بصمتك واضحه اوي و متميزة كعادتك :)

فاتيما يقول...

انا لازم اروح دلوقتى
ومش هينفع اكتب تعليق سريع

لما أرجع اكتبلك ف الروقان
بس مؤقتا
البوست اجمل ما فيه
انه يشبهلك جدا
:-*

بس كدا ولنا عودة

لبنى أحمد نور يقول...

جميلة التدوينة :))
حتى واحنا بنقلد بنشبهنا من غير قصد :)

فاتيما يقول...

خطاريفك وجعتنى يا شوشو
اغلب اختياراتك شبههى
:)
شبه الى ف قلبى
انتى اختصرتيها ف الجملة دى


إنه شيء غير إنساني أن تمتلك روحاً تهفو إلى لمسة من الحب و لا تجد من يأبه بها محمد المنسى قنديل


وكلام غادة و الطيب صالح
وكلهم
كلهم ..

متهيألى انتى مش محتاجة انى اشرحلك
او اوضحلك
انا بقول كل حاجة اصلا
وانتوا كلكم عارفين


عارفة

اجمل ما فى كل هذا الألم
انه حقيقى
ومحناش اول ناس نمر بيه اهو
فيه غيرنا وكثيرين اهو
ومش اى ناس
دول قلوب واحاسيس نابضة
وعندهم الموهبة اللى تخليهم احيانا
وغالبا يكتبوننا لأنهم يشبهوننا
واحنا شبههم



اما خباياكِ بقى
فبتكشف أهم شىء
ان احيان كتيرة الناس بتنخدع
ف الشكل والابتسامة و الثبات
ودايما كل واحد فاكر ان حياة التانى أسهل ولو كان مكانه كان وكان وكان ..

ودا مش حقيقى
وفيه حكمة فيما معناها
ان الالم ثمرة
وربنا مش هيحطها غير على غصن شجرة يتحملها
وطالما كتب علينا محنة او ألم ما
يبقى احنا قادرين نشيله
بس يمكن مش حاسين او شايفين كويس
واحنا ف عز الوجع


هولاء بقى
طبعا ضحكت قوى
عشان انتى كدا قطعّتى على ابراهيم
وردتيلى حقى لما هوه قطّع عليا
وكتب خطاريف يضرب بيها خطاريفى ف السوق
:)

وسبب تانى ضحكنى
ان الله يرحمه بقى
مسبش واحدة ف سكته معاكسهاش
واعرف هذا جيدا
لأنى ف وقت ما كنت ساكنة ف الهرم
ورا ومبى وكانت اكاديمية الفنون هناك
و كان عنده عربية حمرا غريبة كدا
و الحق يقال انه مسبش ولا بنوتة
ف محيط الأكاديمية والشوارع المحيطة
الا ووّجب معاها...
:)

انا انصدمت فيه جداااا
كنت بحبه م المسلسلات التاريخية
بس كنت بعشششششق ولا زلت
اخوه عبدالله
وبعتبره فنان عالمى .. بجد


يلا الله يرحم الجميع


سبحان الله .. الأنسان سيرة

وبالنوسبة لنور الشريف
دا برج التور يا ماما
لازم ينحب او ما يتشاف علطول
(انى أتحيز)

:9

اما طارق حبيب
فطبعا بتهرجى
دا كان فتى احلام زميلاتى ف المدرسة
ايام اعدادى يا بنتى
كان بيقدم برنامج ف رمضان
محدش كان بيفوته .. !!
هوه الكلام دا ف نص التمانينات
واكيد ساعتها حضرتك كنتى لسه ف بطن ماما ..او اللفة وكدا
:)


كل تدوينة جميلة كدا
وانتى شبه نفسك
متميزة
و جميلة
وطيبة
وبتعرفى تحبى ..


:))

ومعلش التعليق طويل

ظلالي البيضاء يقول...

هههههههههه
دكتورة شيرين ..
ضحكت كثيراً لكنك لن تعرفي لماذا إلا إذا أخبرتك ..
حقيقةً بالمصادفة أخطأتُ في كتابة عنوان رابط مدونتك بحرف واحد فقط فاكتشفت أن هناك حدوتة مصرية أخرى هذا رابطها :
http://hadotamasreya.blogspot.com/
دخلتُ أبحث عن الدكتورة شيرين هناك .. لكنني لم أجدها ..
ولم أجد شبيهةً لها ..
استغربتُ أين ذهبت الدكتورة وهل هذه شبيهتها ؟؟؟؟؟؟
وقفت طويلاً قبل أن أدرك أنني كنت في حدوتة مصرية أخرى مختلفة .. لكنها لم تكن أبداً تشبه الحدوتة المصرية التي اعتدت التوقف عندها والنهل من معينها والسياحة في خيالها الخصب ..
دمت بألف خير ..
وأظن أن أحداً لا يشبهنا إلا أنفسنا ..
مع التحية الطيبة ..

زينة زيدان يقول...

تدوينة جميلة تدعونا للانسجام
و تسرقنا حيث شخصيتك..
جميل أن نقلد شيء ايجابي في شخصيات الغير..والأجمل أن نكون أنفسنا

مختارات رقيقة عذبة
وشيرينيات منحتني الكثير عن شخصك

لو كتبت يوما بوست مشابه
ستجدي اسمكِ في أول قائمة "قابلت هؤلاء"
وبكل صدق لي الشرف بذلك

ابراهيم رزق يقول...

هههههههههههههههههههه
جميلة جدا يا شرين
وسعيد بيها جدا
وعجبنى تعليق فاتيما
فعلا البوست شبك جدا جدا واتمنى تكرار التجربة
اما جدو حمدى غيث فمعروف عنه فى الوسط الفنى ده وضحكت جدا لما قلتى انه عاكسك قت بركاته وصلت لشرين هههههههههههه
زيه زى ممدوح الليثى تصدقى فى مرة فى مهرجان القاهرة فضل ماشى ورا الممثلة شمس فى ك مكان بس هى ساعتها كانت لسه طالعة وصغيرة وموزة وانا و واحد صاحبى متابعينه وعمالين نضحك
انا بطلب منك شفت هؤلاء بوست منفصل عن كل واحد من اللى شفتيهم وخصوصا حمدى غيث

تحياتى

شيرين سامي يقول...

موناليزا:
:)
جميل إني أخليكي تبتسمي

شيرين سامي يقول...

مروه زهران:

أشكرك يا مروه و سعيده بجد بزيارتك
:)
نورتيني

شيرين سامي يقول...

لولا و زهراء:

أشكرك يا لولا و نورتيني بجد :)
المقوله دي الcover بتاع بروفايلي على الفيس بوك..و مش هغيره أبداً :)

شيرين سامي يقول...

آيه محمد:
مبسوطه إنه عجبك :)
الأفكار بتاعتهم كانت عجباني ففكرت أكتبها بطريقتي.
أشكرك يا آيه الأجمل هو وجودك
نورتيني

شيرين سامي يقول...

أفكار مبعثره:

أشكرك و سعيده بتواجدك جداً
هي البصمه :)

شيرين سامي يقول...

لبنى أحمد نور:

:)
صحيح يا لبنى و بيبقى جميل إن بيبقى لك بصمه..بس إنتي بقى محدش يعرف يقلدك أبداً :)

شيرين سامي يقول...

فاتيما:

:)
أولاً كده مبسوطه أوي بزيارتك الغاليه بجد :)
كنت حاسه إنها هتعجبك
صحيح يا فاتيما الوجع نغمه واحد
و إن تعددت آلات العزف
مش محتاجه تشرحيلي..أنا بفهمك
و دي أجمل حاجه إننا بنفهمك من إشاره :)
و الله يا فاتيما فعلاً الناس بتتخدع في الشكل..و كتير بيحسدوا غيرهم و هو يحتاج الرثاء و الدعاء.
عجبتني حكمتك جداً
كل واحد يشيل ثمرته بقى و يسكت :)

بس تيجي إيه خطاريفي جنب خطاريفك بالذاااات لما بتكون سياسيه بتكون تُحفه :)
كان لازم أقطع على أ.إبراهيم طبعاً اساسي :)

ههههههههه أيوه هي العربيه الحمرا
تمام كده إنتي معايا على الخط
أنا كمان بحب عبد الله غيث جداً مفيش مقارنه بينهم.
نور الشريف أكيد :) و برج الثور ماكنتش أعرف إن لهم تأثير قوي كده على أرض الواقع.
كنت عارفه طارق حبيب بس كان تايه عن بالي إسمه و شاكله كمان في الواقع كان عجوز عن في التليفزيون.زبس هو شخصيه لطيفه.
نص التمانينات ممممم كنت حيه أرزق :)

مبسوطه بتعليقك أويييييي
و آسفه إني إتأخرت في الرد
طولي براحتك المدونه كلها تحت أمرك :)

نورتيني و أسعدتيني جداً
بعرف أحب..........مش عارفه

شيرين سامي يقول...

ظلالي بيضاء:
:)
روحك المرحه دائماً تعطي التعليقات مذاق خاص..سعيده إن التوهه مطولتش عن كده :)
تحياتي الدائمه لك اخي محمد

شيرين سامي يقول...

زينه زيدان:

صديقتي الجميله الغاليه مبسوطه بزيارتك و تعليقك بجد :) و مبسوطه أكتر إن التدوينه عجبتك.
يا خبر و الله إنتِ أحرجتيني
أنا اللي إتشرفت بشوفتك و معرفتك و يا رب تتكرر المقابلات عشان نقدر نتكلم أكتر..
سلامي الحار لأسرتك الجميله
و أرق و أعذب تحية لكِ

شيرين سامي يقول...

إبراهيم رزق:

:) مبسوطه إن البوست عجبك
قطعت عليكم كلكم نياهاهاها
بس أكيد عشان الفكره عجباني
بتهيألي صعب أكتب بوست منفصل

هو بإختصار أنا كنت ماشيه في شارع محي الدين أبو العز و سمعت صفافير شويه و كلاكسات..قلت فنفسي "الغضب حماقه" :) هووب و كلام سمج بقى...كل ده و لسه مبصتش..لحد ما قررت أبصله بغضب..و ياللهول..الغضب فثانيه بقى ضحك السنين :)

نورتني و أسعدتني بتواجدك أ.إبراهيم

Bent Men ElZman Da !! يقول...

أنتِ بتسيبى أنطباع جوه الواحد كده بالأنبساط كل ما يقرأ ليكِ
بالرغم أنك بتحاولى تكونى شبة حد
ألا أنك أنتِ زى ما أنتِ جميلة وبتخلقى أبتسامة جميلة زيك
عاجبتنى اووووووووووووى بقى الخبايا الشيرينية دى :))

شيرين سامي يقول...

بنت من الزمن ده:

دندونه مبسوطه بكلامك أويييي :)
حاضر هحاول أكتب المزيد من الخبايا :)

نورتيني و بتسعديني دايماً بتواجدك

فاتيما يقول...

:-*