الأحد، 22 مايو 2011

سنه أولى سواقه

جديده أنا في السواقه بجري على الأسفلت بقالي سنه و نص تقريبا و أحب أقول وجهة نظري في هذه التجربه الجديده و أنا أمام عجلة القياده.



أولا أحب أقول لكل شاب و كل فتاه حذاري حذاري مدارس تعليم السواقه لأنها نصب رسمي فهمي نظمي بيعلموك ازاي تجيب السرعات بس و طبعا الساعه ب50 جنيه و الحسابه بتحسب و تخلص الكورس من هنا تبقى جاهز تماما لتدمير عربيتك و عربيات الناس من هنا, لذالك بنصح أي حد عاوز يتعلم بجد يلجأ لباباه أو أخوه أو صاحبه بس طبعا لو واحده متجوزه متفكريش أبدا ان جوزك يعلمك لأنها هتبقى فرصة عمره عشان يزعق و يبرّق و يشفي غليله منك :)


ثانيا لاستخراج الرخصه بنصح ان محدش يروح الامتحان الا لو معاه واسطه أو مقضيها سواقه سنتين في الشوارع بدون رخصه و ده الحل الوحيد عشان تنجح من أول مره في الامتحان اللي تعبني جداً نفسياً ورجعني تاني لموود الامتحانات خصوصاً ان معاملة الممتحن منتهى الذل و يا قهرتي بقى لما بنوتات حلوين كده يقولولي "أنا بابا عاملي الرخصه و أنا في البيت و مبعرفش أسوق أساساً" الكلام ده طبعاً كان قبل الثوره.

السواقه نفسها مش صعبه و الصعب هو التعامل مع أشكال السواقه الخاطئه اللي في الشارع من سير عكس الاتجاه و غرز و استعجال البعض و برود البعض الآخر و الكل مصمم انه يعدي الأول و كله كوم و الناس اللي ماشيه في الشارع كوم تاني تقريبا كله بيبقى واكل فول الناس مغيبه و كأن مفيش عربيات, يمشي في نص الشارع يعدي بمنتهى عدم الاكتراث و الأطفال اللي بتلعب كره و استغمايه بين العربيات يعني لو ماعندكش كلكس هتشيل كل يوم 3,4 على الأقل.

ناهيك طبعا عن المسرحيه الهزليه اللي بيقوم ببطولتها عسكري المرور لما يهدد بمخالفه لحد ما تظهرله فلوس أو يشوف كارنيه ينقلب بعدها وشه لضحكه من الودن للودن و يقول كمية "يا باشا" و يعظم للسائق و يعديه بكل سعاده...ده بردو كان قبل الثوره.
أكره جداً تحرش العربيات بعربيتي ماعرفش بيقربوا كده إزاي و ببقى هموت من الرعب, كنت بستغرب لما ألاقي اللي بيسوق بيشتم أو ينفعل لغاية ما عرفت ان السواقه (في مصر) إنفعاليه جداًو بتخلي الأعصاب خصوصاً لو حد مش بارد تفلت,  فبقيت أقفل الازاز و أنفعل براحتي :) أتذكر واحده صاحبتي كانت راكبه العربيه و باباها سايق و بجواره عريس متقدم لها, عربيه زنقت عليهم فالبنت يا عيني بمنتهى العفويه شتمت...و دي كانت نهاية الجوازه اللي مبدأتش:)


لكن الحاجه الايجابيه انه معظم الناس بتصبر عليه لما بكون متلخبطه أو بطيئه و ده شئ أثبتلي ان الناس لسه فيها خير أو يمكن أنا عايزه أقنع نفسي بكده عشان أحافظ على طبيعتي المتفائله, بس لو في ناس عندها صبر فده مينطبقش أبدا على سواقين التاكسيات و الميكروباسات و دول معذورين بردو لأنهم في الشارع بزحمته و همجيته طول اليوم.


نفسي الناس تبطل تهاجم سواقة الستات لأن لو أي حد فكر هيلاقي ان معظم الحوادث و الكوارث المروريه سببها الرجاله و عموما يا ريت الناس تتعلم النظام و الكل يسوق كأنه لسه متعلم السواقه بمبادئها و قوانينها و يا رب أنا بقى اللى متغيرش و أمشي على قوانين الشارع المصري الخاصه جدا.

هناك 23 تعليقًا:

Ramy يقول...

مبرووك العربية

المفروض كنا باركنا البوست اللى فات بس العتب ع النظر بقى
هههههههههههه

اللى ماشى على الأرض فى مصر يتطلب منه مهارات خاصة

ما بالك بالسواقة

أحنا قدمنا كتير علشان نتعلم حاجات كتير

ربنا يستر طريقك (:

شوفتى الدعوة دى بتاعة السواقة
ههههههه

Tamer Nabil Moussa يقول...

موضوع مهم ياشرين

السواقة دى عايزة الصبر وعدم السرعة

والحرص مطلوب دائما

ربنا يوفقك ويكرمك

مع خالص تحياتى

mrmr يقول...

نصيحه هايله لكل شخص مقدم على تعليم السواقه اويفكر يطلع رخصه
مبروووك
وربنا يستر عليكى وانت بتسوقى بس اوعى تسوقى فيها وتحرمينا من الساقع هههه
ربنا يسعدك ويحافظ عليكى

موناليزا يقول...

تعرفى انى كنت مستنية البوست ده جدا:)

اتقالت لى النصيحة دى برضه قبل كده :قبل ما تروحى مدرسة تعليم القيادة ابقى متعلمة السواقة قبلها:)
أومال أنا راحة ليه طيب

ملحوظة:فيه غلطة مطبعية فى كلمة "ميكروباصات" نرجو التصحيح:)

FAW يقول...

شيرين

وأنا أمام عجلة القيادة دي إوعي يكون معناها إنك فعلا أمام عجلة القيادة :)

أنا معاكي جدا في موضوع مدارس السواقة , أختي راحت واحدة منهم وبالفعل . . أنا اللي علمتها . . وطبعا كانت فرصة للزعيق والشخط والنطر :)

أنا بقي اللي علمني أخويا , وكان برضو بيشخط و بيزعق , والله حاجة تجنن زي ما يكون الموضوع ده من ضمن قواعد السواقة :)

إنتي موتيني من الضحك علي (بقفل القزاز وأنفعل براحتي ) دي . .
أنا والله بيصعب عليا كتير البنات والستات لما الناس بتتنرفز عليهم , ده غير إني برضو يعني بخاف علي عربيتي :) . . فبوسعلهم الطريق خااااااااااالص

علي فكرة القصة برضو مش حب في الغرز والسواقة بطريقة عشوائية , والله إحنا لو لقينا شارع متقسم حارات متساوية ومستمرة ومن غير حفرة يمين و حفرة شمال وبلاعة في النص هنمشي كويس إلي حد ما . . البنات بقي وعن تجربة ما بيشوفوش الحفر أصلا فبيمشوا في خط مستقيم , و ربنا يخلي بتوع العفشة :)

ألف مبروك تاني وعقبال ما تغيري العربية للأحسن والأحسن دايما رغم إني عارف إنها بتفرق مع الولاد بس :)

تحياتي . .

د/دودى يقول...

يا لهوى ....ده انا كان من خططى السنه دى -طبعا قبل يناير و الاحداث- عربيه صغنوطه و مدرسه سواقه تعلمنى القياده فى السريع دون الم ...واضح ان الموضوع كارثى اكثر مما تخيلت ..

ليلى الصباحى.. lolocat يقول...

السلام عليكم
مبروووووووك السواقة والعربية حبيبتى
لكن بالنسبة لى انا بقى مش ممكن ومستحيل و محالة وعلى الاطلاق المطلق اسوق بنفسى
بابا و اخويا وكل اللى يعرفنى حاولوا معايا مستحييييييييل
باخاف جدا جدا جدا
اخاف اخبط حاجة ولو كانت ورقة بالطريق ههههههه


لكن ادعيلك ان ربنا يحفظك دايما :)

شكرا لك حبيبتى على النصيحة الطيبة
جزاك الله خيرا

لك تحياتى وتقديرى

مصطفى سيف الدين يقول...

معلومات خطيرة ومهمة
شكرا يا شيرين
ومنكم نستفيد :)
تحياتي

rack-yourminds يقول...

أتذكر واحده صاحبتي كانت راكبه العربيه و باباها سايق و بجواره عريس متقدم لها, عربيه زنقت عليهم فالبنت يا عيني بمنتهى العفويه شتمت...و دي كانت نهاية الجوازه اللي مبدأتش ههههه

انا جربت اتعلم السواقه وطبعا استنزفت فلوس وبرده استنزفت صاحب العربيه خوف لاني عرضته لمواقف خطيره لكن ربنا ستر

اتمني بعد الثوره انه مشاكل اللي بتصاحب استخراج الرخصه تنتهي

سواح في ملك اللــــــــــــــــــه- يقول...

تعرفي اني في وقت
قلت ان السائق المصري احسن سائق في العالم
وده بسبب انك لوجبتي خبير سواقة عالمي
هنا في مصر مش هيعرف يسوق ولايتعامل
لامع الطرق ولا مع الانواع المختلفة من السائقين
ولا مع بتوع المرور
وبمناسبة اي بيتعلموا اسواقة وبيسوقوا جديد
واحد صاحبي جاب عربية جديدة
وكان بيتبرجل في السواقة شوية قلتله علي فكرة
يعملها بص ياصاحبي انت اخرك تمشي في اليمين
وتكتب يافطة علي الزجاج الخلفي للعربية
انتبه السيارة في التليين هههههه
وهي كانت العربية زيرو اصلا
لكن هو مكدبش خبر ونفذ الفكرةوفضلت اليافطة
لحد ماتعلم السواقة وبقي كويس
تحيتي

غير معرف يقول...

ماجربتش موضوع السواقه بصراحه ... كان نفسى وانا صغيره اسوق عجله بس حتى العجله مكنتش بعرف اسوقها :( :(

لما اجيب عربيه هجيلك تعلمينى السواقه وتدينى كورس فى الشتيمه عشان اتسلح كويس

ضحكتينى اوى ع صحبتك

هههههههههههههه

واخيييييييراً

مبروووووووووووووك العربيه (: (:

ابراهيم رزق يقول...

بصى يا شرين

نصيحة مخلصة لا تستفزى الرجال و انتى بتسوقى دايما تقولى معلش دى سواقة ستات
هتلاقى على طول العرق الذكورى يضرب فى النافوخ و يبتسم بغرور و يعديكى و يستحملك
على فكرة دى مش نصيحتى دى نصيحة صديقة لى على طول بتنفذها و ناجحة دائما
اما موضوع الشتيمة فممكن تحطيها على كاسيت او سيدهاية توفيرا للطاقة و البنزين
تحياتى

غير معرف يقول...

صباح الغاردينيا
ازيك ياشيرين ؟
طبعاً ان كنت معدية على البوست
وافتكرت حلاقي حدوتة جديدة
طبعاً لقيت حدوتة من نوع تاني ههههههه
طبعا بما اني سعودية ولسى ماسمحوش بالسواقة مش حعرف اقولك الا حاجة وحدة
لما اجي مصر ابقي علميني السواقة اية رايك :)
وكمان ربنا يحميكي ويحفظك من كل شر
؛؛
؛
لروحك عبق الغاردينيا
كانت هنا
reemaas

Mahmoud Ahmed يقول...

فكرتيني بالذي مضي
ههههههههههه
بس على فكره معظم الحوادث سببها الستات
و ده حقيقه فعلا

اكيد مش كل الينات و الستات
و ممكن ميكونوش هما الي بيشوقوا كمان
بس هما ليهم سبب او آخر في الحادثه الى بتحصل
ههههههههه

كلامي واضح اكيد ؟؟!!

سندباد يقول...

مبروك وانشالله ربنا يديكي خيرها ويكفيكي شرها
مبروك مرة تانية

Ms Venus يقول...

مبرووك يا شيرى

قولتى حاجات مهمة اوى

هتنفعنى اكيد ^-*


لانى ناوية قريب اعمل زيك كده

Tears يقول...

الف مبروووك :)

و لو ان اليومين دول الذات السواقة بقت اخطر كتير و ربنا يسترها و يحميكى دايما

eng_semsem يقول...

السواقه في مصر عايزه مهدئات وشويه شويه هتلاقيك بقيت ماشيه زي اللي ماشيين ومش بعيد انت اللي تزنقي على التاكسيات والميكروباصات فعلا حاجه تتعب الاعصاب الله يكون ف عونك ومش هقولك غير انت اللي جبتيه لنفسك
ربنا يحفظك ويحميكي

ذو النون المصري يقول...

اصعب محافظة في القيادة هي القاهرة
كلما زرت هذه المحافظة اري ان لا مستقبل لها طالما بقي حاهل كما هو عليه الان
عندنا في كفر الشيخ القيادة ليست صعبه لان البلد فااااااااااااضية و ما في زحمة نهائيا

Carmen يقول...

‏^‏_^ فكرتيني بنفسي وانا بتعلم دخلت في جنب مرسيدس مرة ومرة كنت هدوس كلب ومرة قط ده انا عملت كوارث ^_^ والحمدلله بقالي سنتين بتعلم ولحد دلوقتي مابعرفش امشي وسط العربيات :d

reemaas يقول...

السواقة فى مصر انفعاليه جداااااااااا


ده صحيح بدليل ان كل السواقين اعصابهم فلتانة

خوفتينى منها يا شرين رغم انى ناوياها السنة دى بس ولو هسووووووق بردو

Unknown يقول...

الله يبارك فيكم جميعاً و شكراً بجد على تعليقاتكم الجميله و دعواتكم الرقيقه قدامي شغل كتير في المدونة الفترة الجاية بنا يستر و ابقى قدها.
تحياتي و احترامي لكم جميعاً

Unknown يقول...

السلام عليكم

ههههههههههههههههههههههههههههههه

الأول أخلص ضحك.. بطني وجعتني....!

أصلك اتكلمتي على كل اللي بيحصل من بداية التعلم إلى نزول ميدان المعركة .. أقصد الشارع..!! وده أكبر دليل على أنك جربتي فترة مناسبة.. واتعجنتي بما فيه الكفاية..

أسلوبك ظريف جدا في الوصف..

دمتِ سالمة من بلاوي الطريق وسائقيه...!!